ܣܳܠܶܩ: ܒܣܳܗ̈ܕܰܘܗ̱ܝ ܐܰܢ̱ܬܽܘܢ

ܩܕܡܝܐ

ܒܬܽܘܠܬܳܐ ܡܰܪܝܰܡ܆ ܗܳܝ ܕܶܐܬܓܰܒܝܰܬ܆ ܡܶܢ ܟܽܠ ܫܰܪ̈ܒܳܢ. ܘܰܗܘܳܬ ܐܶܡܳܐ ܠܰܐܠܳܗܳܐ. ܐܰܦܺܝܣܝ̱ ܘܰܒܥܳܝ܆ ܠܺܝܚܺܝܕܳܝܶܟܝ̱܆ ܕܢܶܥܒܶܕ ܪ̈ܰܚܡܶܐ. ܥܰܠ ܟܽܠܰܢ ܒܰܨ̈ܠܰܘܳܬܶܟܝ̱܀

ܬܪܝܢܐ

ܒܰܕܡܽܘܬ ܫܶܡܫܳܐ܆ ܕܢܳܚܶܬ ܫܳܪܶܐ܆ ܒܓܰܘ ܥܶܢܒܬܳܐ. ܘܰܡܡܰܙܶܓ ܒܳܗܿ ܚܰܠܝܽܘܬܳܐ. ܗܳܟܰܢ ܡܶܠܬܳܐ܆ ܢܚܶܬ ܡܶܢ ܪܰܘܡܳܐ܆ ܫܪܳܐ ܒܰܒܬܽܘܠܬܳܐ. ܘܰܕܢܰܚ ܡܶܢܳܗ̇ ܘܰܚܬܺܝܡܳܐ܀

ܬܠܝܬܝܐ

ܛܽܘܒ ܠܰܢ̈ܒܺܝܶܐ܆ ܘܛܽܘܒ ܠܰܫܠܺܝ̈ܚܶܐ܆ ܘܛܽܘܒܳܐ ܠܣܳܗ̈ܕܶܐ. ܒܝܰܘܡܶܗ ܪܰܒܳܐ ܕܢܽܘܚܳܡܳܐ. ܕܫܳܡܥܺܝܢ ܠܰܐܒܳܐ܆ ܘܚܳܙܶܝܢ ܠܰܒܪܳܐ܆ ܘܰܠܪܽܘܚ ܩܽܘܕܫܳܐ. ܕܓܳܕܠܳܐ ܟܠܺܝ̈ܠܶܐ ܠܪ̈ܺܝܫܰܝܗܽܘܢ܀

ܪܒܝܥܝܐ

ܒܰܕܡܽܘܬ ܒܶܣ̈ܡܶܐ: ܒܢܽܘܪܳܐ ܢܦܰܠܬܽܘܢ ܣܳܗ̈ܕܶܐ ܒܪ̈ܺܝܟܶܐ. ܘܰܒܣܶܡ ܪܺܝܚܟܽܘܢ ܠܰܐܠܳܗܳܐ. ܨܠܽܘܬܟܽܘܢ ܬܦܺܝܣܝ ܠܰܡܠܶܟ ܡܰܠ̈ܟܶܐ. ܕܢܶܥܒܶܕ ܪ̈ܰܚܡܶܐ: ܥܰܠ ܟܽܠܰܢ ܒܰܨ̈ܠܰܘܳܬܟܽܘܢ܀

ܚܡܝܫܝܐ

ܛܽܘܒܰܘܗ̱ܝ ܠܰܐܝܢܳܐ܆ ܕܪܰܚܡܳܟ ܡܳܪܰܢ܆ ܛܳܒ ܡܶܢ ܕܰܗܒܳܐ. ܘܛܳܒ ܡܶܢ ܟܺܐܦ̈ܶܐ ܛܳܒ̈ܳܬܳܐ. ܕܰܒܗܳܢ ܥܳܠܡܳܐ܆ ܣܓܶܐ ܐܺܝܩܳܪܶܗ܆ ܘܰܒܗܰܘ ܕܰܥܬܺܝܕ. ܝܳܪܶܬ ܚܰܝ̈ܶܐ ܕܰܠܥܳܠܰܡ܀

ܫܬܝܬܝܐ

ܐܶܡܰܪ ܡܳܪܰܢ܆ ܠܗܳܝ ܚܰܛܳܝܬܳܐ܆ ܕܙܶܠܝ̱ ܠܶܟܝ̱ ܐܰܢ̱ܬܬܳܐ. ܫܒܺܝ̈ܩܺܝܢ ܚܰܘ̈ܒܰܝܟܝ̱ ܘܰܚܛܳܗܰܝ̈ܟܝ̱. ܐܰܡܺܝܢ ܐܰܡܺܝܢ܆ ܐܳܡܰܪ ܐ̱ܢܳܐ ܠܶܟܝ̱܆ ܕܥܰܡ ܟܳܪ̈ܽܘܙܰܝ. ܒܰܣܒܰܪܬܳܐ ܟܳܬܶܒ ܐ̱ܢܳܐ ܠܶܟܝ̱܀

ܫܒܝܥܝܐ

ܐܰܢܺܝܚ ܡܳܪܝܳܐ܆ ܠܥܰܒ̈ܕܶܐ ܕܺܝܠܳܟ܆ ܒܗܳܝ ܡܰܠܟܽܘܬܳܐ. ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ. ܘܰܟܬܽܘܒ ܐܶܢܽܘܢ܆ ܠܰܫܡܳܗܰܝ̈ܗܽܘܢ܆ ܒܰܣܦܰܪ ܚܰܝ̈ܶܐ. ܒܽܐܘܪܺܫܠܶܝܡ ܗܳܝ ܕܒܰܫܡܰܝܳܐ܀

ܬܡܝܢܝܐ

ܒܰܕܡܽܘܬ ܒܰܪܩܳܐ ܕܨܳܪܶܐ ܥܢܳܢ̈ܶܐ ܘܡܰܢܗܰܪ ܙܺܝܘܶܗ܆ ܠܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ. ܗܳܟܰܢ ܕܳܢܰܚ ܡܰܠܟܳܐ ܡܫܺܝܚܳܐ. ܘܢܳܦܩܺܝܢ ܠܽܐܘܪܥܶܗ ܟܺܐܢ̈ܶܐ ܕܰܥܒܰܕܘ ܨܶܒܝܳܢܶܗ܀