ܣܳܠܶܩ: ܒܡܰܪܝܰܡ ܝܳܠܕܰܬ ܐܰ‌ܠܳܗܳܐ

ܩܕܡܝܐ - H

ܐܺܝܢ ܛܰܠܝܳܐ ܪܓܺܝܓܳܐ ܫܠܶܝܡܽܘܢ ܐܰܝܕܳܐ ܗ̱ܝ ܓܰܢܬܳܐ ܕܠܳܗܿ ܗܽܘ ܡܢܰܨܰܪ ܗ̱ܘܰܝܬ. ܕܰܐܚܺܝܕܳܐ ܗ̱ܘܳܬ ܘܰܚܬܺܝܡܳܐ ܒܰܒܬܽܘܠܽܘܬܳܗ̇. ܡܰܪܝܰܡܺ ܗ̱ܝ ܕܰܕܢܰܚ ܡܶܢܳܗܿ ܗܰܘ ܓܰܢܳܢܳܐ ܕܢܰܨܒܶܗ ܠܦܰܪܕܰܝܣܳܐ܀

ܬܪܝܢܐ - H

ܡܰܢܺ ܗ̱ܝ ܗܳܕܶܐ ܕܒܰܒܬܽܘ̈ܠܶܝܗܿ ܩܰܒܠܰܬ ܒܰܛܢܳܐ ܣܛܰܪ ܡܶܢ ܙܽܘܘܳܓܳܐ. ܡܰܪܝܰܡܺ ܗ̱ܝ ܗܳܝ ܕܶܐܫܰܥܝܳܐ ܥܠܶܝܗܿ ܐܶܬܢܰܒܺܝ. ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ ܝܰܠܕܳܐ ܕܺܐܝܬܰܘܗ̱ܝ ܟܽܠܶܗ ܕܽܘܡܳܪܳܐ܀

ܬܠܝܬܝܐ - H

ܒܨܰܦܪܳܐ ܩܰܕܶܡ ܒܰܪ ܡܰܠܟܳܐ ܕܢܶܐܓܽܘܪ ܦܳܥ̈ܠܶܐ ܠܟܰܪܡܳܐ ܕܒܶܝܬ ܐܰܒܽܘܗ̱ܝ. ܘܶܐܓܰܪ ܠܽܘܩܕܰܡ ܠܰܢ̈ܒܺܝܶܐ ܐܳܦ ܠܰܫܠܺܝ̈ܚܶܐ. ܘܒܰܥܣܰܪ ܘܰܚܕܳܐ ܠܓܰܝܳܣܳܐ ܝܰܗ̱ܒ ܠܶܗ ܩܠܺܝ̈ܕܶܐ ܘܫܰܕܪܶܗ ܠܦܰܪܕܰܝܣܳܐ܀

ܪܒܝܥܝܐ - H

ܐܶܡܰܪܘ̱ ܠܺܝ ܣܳܗ̈ܕܶܐ ܒܪ̈ܺܝܟܶܐ ܐܰܝܢܰܘ ܚܶܙܘܳܐ ܚܙܰܝܬܽܘܢ ܒܶܝܬ ܕܺܝܢܳܐ. ܚܙܰܝܢܰܢ ܣܰܝ̈ܦܶܐ ܕܰܠܛܺܝܫܺܝܢ ܘܢܽܘܪܳܐ ܕܝܳܩܕܳܐ. ܘܪܽܘܚ ܩܽܘܕܫܳܐ ܕܓܳܕܠܳܐ ܟܠܺܝ̈ܠܶܐ ܘܣܳܝܡܳܐ ܒܪܺܝܫܳܐ ܕܟܽܠܗܽܘܢ ܩܰܕܺܝ̈ܫܶܐ܀

ܚܡܝܫܝܐ - H

ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ܆ ܘܡܶܢ ܒܶܝܬ ܓܰܙܳܟ: ܪ̈ܰܚܡܶܐ ܫܳܐܶܠ ‌ܐ̱ܢܳܐ. ܚܰܛܳܝܳܐ ܐ̱ܢܳܐ ܕܰܫ̈ܢܰܝܳܐ ܣ‍ܛܺܝܬ ܡܶܢ ܐܽܘܪܚܳܟ. ܗܰܒܠܺܝ ܕܰܐܘܕܶܐ ܒܰܚ̈ܛܳܗܰܝ ܘܶܐܥܒܰܪ ܡܶܢܗܽܘܢ: ܘܺܐܚܶܐ ܒܛܰܝܒܽܘܬܳܟ܀

ܫܬܝܬܝܐ - H

ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ ܗܘܺܝ ܠܺܝ ܫܽܘܪܳܐ ܪܳܡܳܐ ܘܒܶܝܬ ܓܰܘܣܳܐ. ܡܶܢ ܒܺܝܫܳܐ ܘܚܰܝ̈ܠܰܘܳܬܶܗ ܕܡܰܩܪܶܒ ܥܰܡܰܢ. ܒܟܶܢ̈ܦܶܐ ܕܪ̈ܰܚܡܰܝܟ ܣܰܬܰܪ ܠܰܢ ܡܳܐ ܕܡܶܬܦܰܪܫܺܝܢ ܛܳܒ̈ܶܐ ܡܶܢ ܒܺܝ̈ܫܶܐ܀

ܫܒܝܥܝܐ - H

ܥܒܶܕ ܡܳܪܝ ܕܽܘܟܪܳܢܳܐ ܛܳܒܳܐ ܠܪ̈ܳܥܰܘܳܬܳܐ ܕܰܪܥܰܘ ܡܰܪܥܺܝܬܳܟ. ܘܠܰܢ̈ܒܺܝܶܐ ܫܠܺܝ̈ܚܶܐ ܘܣܳܗ̈ܕܶܐ ܘܟܺܐܢ̈ܶܐ ܘܟܳܗ̈ܢܶܐ. ܘܰܠܟܽܠܗܽܘܢ ܝܰܠ̈ܕܶܝܗ̇ ܕܥܺܕܬܳܐ ܡܶܢ ܕܳܪ ܠܕܳܪ ܘܰܥܕܰܡܳܐ ܠܥܳܠܰܡ܀

ܬܡܝܢܝܐ - H

ܩܪܺܝ ܒܩܳܠܳܟ ܦܳܩܽܘܕܳܐܺܝܬ ܒܰܪ ܐܰ‌ܠܳܗܳܐ ܠܡܺܝ̈ܬܶܐ ܕܰܒܩܰܒܪ̈ܶܐ܆ ܘܰܢܩܽܘܡܽܘܢ ܩܰܠܺܝܠܳܐܺܝܬ ܡܶܢ ܩܰܒܪ̈ܰܝܗܽܘܢ. ܘܢܶܥܠܽܘܢ ܥܰܡܳܟ ܦܨܺܝܚܳܐܺܝܬ: ܠܰܓܢܽܘܢ ܢܽܘܗܪܳܐ: ܕܟܺܐܢ̈ܶܐ ܚܳܕܝܳܐܺܝܬ܀