ܫܒܝܥܝܐ

ܐ: ܩܰܒܶܠ ܒܪ̈ܰܚܡܰܝܟ ܒܳܥܽܘܬ ܟܽܠܰܢ. ܐܳܦ ܬܶܫܡܶܫܬܰܢ ܘܰܨܠܰܘܳܬܰܢ. ܘܗܰܒܠܰܢ ܠܶܒܳܐ ܕܰܡܠܶܐ ܚܽܘܒܳܐ: ܐܳܦ ܠܶܫܳܢܳܐ ܕܙܳܡܰܪ ܫܽܘܒܚܳܐ. ܠܳܐ ܡܳܪܝ ܢܶܗܘܽܘܢ ܩ̈ܳܠܶܐ ܕܦܽܘ̈ܡܰܝܢ ܘܰܕܠܶܫܳܢܰܝ̈ܢ ܐܶܠܝܳܐ ܘܒܶܟܝܳܐ. ܐܶܠܐ ܒܪ̈ܰܚܡܶܐ ܕܒܰܣܺܝܡܽܘܬܳܟ. ܚܰܣܳܐ ܚܰܘ̈ܒܰܝܢ ܫܒܽܘܩ ܒܽܘܨܳܪ̈ܰܝܢ. ܘܰܥܒܶܕ ܪ̈ܰܚܡܶܐ ܥܰܠ ܟܽܠܰܢ. ܡܫܺܝܚܳܐ ܪܳܚܶܡ ܬܰܝܳܒ̈ܶܐ܀

ܐܚܪܢܐ

ܒ: ܒܟܽܠܳܗ̇ ܐܰܪܥܳܐ: ܐܶܬܒܰܩܺܝܬ ܒܰܡܕܺܝ̈ܢܳܬܳܐ ܘܰܒܟܰܪ̈ܟܶܐ. ܘܰܚܕܳܐ ܡܕܺܝܢ̱ܬܳܐ ܚܙܺܝܬ ܐܰܚܰܝ̈. ܕܰܛܡܺܝܪܳܐ ܒܬܶܠ̈ܠܶܐ ܕܥܰܦܪܳܐ. ܘܡܰܘܬܳܐ ܛܪܽܘܢܳܐ ܢܳܛܰܪ ܠܳܗ̇ ܘܰܡܕܰܝܶܨ ܥܰܠ ܣܳܚܪ̈ܳܬܳܗ̇. ܐܳܘ ܡܰܘܬܳܐ ܦܬܰܚ ܠܺܝ ܬܰܪܥܳܟ. ܕܶܐܥܽܘܠ ܘܶܐܚܙܶܐ ܠܰܡܕܺܝܢ̱ܬܳܟ. ܘܰܥܢܳܐ ܡܰܘܬܳܐ ܘܶܐܡܰܪ ܠܺܝ. ܕܗܳܕܶܐ ܡܕܺܝܢ̱ܬܳܐ ܕܚܳܙܶܐ ܐܰܢ̱ܬ. ܒܳܗ̇ ܐܶܢܽܘܢ ܟܽܠ ܓܰܢ̱ܒܳܪ̈ܶܐ. ܘܒܳܗ̇ ܐܶܢܽܘܢ ܟܽܠ ܥܰܫܺܝ̈ܢܶܐ. ܘܒܳܗ̇ ܐܶܢܽܘܢ ܡܰܠ̈ܟܶܐ ܕܰܐܪܥܳܐ. ܘܒܳܗ̇ ܐܶܢܽܘܢ ܟܳܗ̈ܢܶܐ ܕܥܺܕܬܳܐ. ܘܒܳܗ̇ ܐܶܢܽܘܢ ܚܰܬܢ̈ܶܐ ܗܕܺܝܪ̈ܶܐ. ܘܰܟܠܺܝܠܰܝ̈ܗܽܘܢ ܫܰܦܺܝܪ̈ܶܐ. ܘܠܳܐ ܙܟܰܐܽܘܢܝ ܘܠܳܐ ܙܳܟܶܝܢ ܠܺܝ. ܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ. ܚܰܕ ܡܰܠܟܳܐ ܚܙܺܝܬܶܗ ܕܰܙܩܺܝܦ. ܘܗܽܘ ܒܩܳܠܶܗ ܩܥܳܐ ܘܰܐܙܝܥܰܢܝ. ܗܽܘܝܽܘ ܕܳܐܬܶܐ ܒܢܽܘܚܳܡܳܐ. ܘܰܡܢܰܚܶܡ ܠܝܰܠ̈ܕܰܘܗ̱ܝ ܕܳܐܕܳܡ. ܡܳܪܶܐ ܟܽܠ ܫܽܘܒܚܳܐ ܠܳܟ܀

ܐܚܪܢܐ

ܓ: ܛܶܒܶܗ ܕܕܺܝܢܳܐ ܡܙܺܝܥ ܠܺܝ ܐܰܚܰܝ̈. ܘܰܕܓܺܗܰܢܳܐ ܡܰܪܗܶܠ ܠܗܰܕܳܡܰܝ̈. ܡܶܢ ܡܰܒܽܘ̈ܥܶܐ ܕܰܪܕܰܘ ܒܰܒܪܺܝܬܳܐ. ܠܳܐ ܐܶܬܦܰܝܰܓ ܨܰܗܝܳܐ ܕܫܰܢܩܰܢܝ. ܘܰܐܝܟ ܥܰܬܺܝܪܳܐ ܡܰܝ̈ܳܐ ܫܳܐܶܠ ‌ܐ̱ܢܳܐ. ܟܰܕ ܓܳܥܶܐ ܗ̱ܘܳܐ ܒܚܰܫܳܐ ܠܘܳܬ ܐܰܒܪܰܡ. ܩܪܰܘ ܠܺܝ ܢܒܺܝ̈ܶܐ ܘܠܳܐ ܥܢܺܝܬ ܐܶܢܽܘܢ. ܘܰܫܠܺܝ̈ܚܶܐ ܬܽܘܒ ܘܫܳܛܶܬ ܡܶܠܰܝ̈ܗܽܘܢ. ܢܨܰܠܶܐ ܘܢܶܒܥܶܐ ܡܶܢܶܗ ܕܕܰܝܳܢܳܐ. ܕܗܽܘ ܒܨܶܒܝܳܢܶܗ ܢܪܰܚܶܡ ܥܰܠ ܓܶܢܣܰܢ. ܡܫܰܒܰܚ ܐܰܢ̱ܬ ܡܳܪܝܳܐ ܡܰܠܟܳܐ ܕܟܽܠ ܥܳܠܡܺܝܢ. ܘܰܡܚܰܕܬܳܢܶܗ ܕܓܶܢܣܰܢ܀

ܐܚܪܢܐ

ܕ: ܐܳܘ ܥܰܢܺܝ̈ܕܶܐ ܠܳܐ ܬܶܟܪܶܐ ܠܟܽܘܢ ܕܶܐܬܚܰܒܰܠ ܠܶܗ ܫܽܘܦܪܳܐ ܕܰܐܦܰܝ̈ܟܽܘܢ. ܕܰܒܝܰܘܡܳܐ ܕܳܐܬܶܐ ܡܫܺܝܚܳܐ ܘܰܡܚܰܕܶܬ ܨܽܘܪ̈ܳܬܟܽܘܢ. ܗܳܐ ܓܶܝܪ ܡܰܬܩܰܢ ܟܽܘܪܣܝܶܗ ܪܳܡܳܐ. ܘܙܳܐܰܚ ܕܢܺܐܬܶܐ ܥܰܠ ܥܢܳܢܰܝ̈ ܢܽܘܗܪܳܐ. ܘܛܶܟ̈ܣܶܐ ܟܽܠܗܽܘܢ ܕܢܽܘܪܳܐ ܘܪܽܘܚܳܐ ܡܶܢܶܗ ܙܳܝܥܺܝܢ. ܒܕܶܚܠܳܐ ܘܒܰܪܬܺܝܬܳܐ. ܗܳܐ ܓܶܝܪ ܒܰܫܡܰܝܳܐ ܘܒܰܐܪܥܳܐ. ܡܶܬܓܠܶܐ ܫܽܘܒܚܳܐ ܕܪܰܒܽܘܬܶܗ. ܘܥܺܝܪ̈ܶܐ ܘܐܢܳܫ̈ܳܐ ܙܳܝܥܺܝܢ ܡܶܢ ܩܽܘܕܡܰܘܗ̱ܝ ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܳܟ. ܕܠܳܐ ܒܓܰܘ ܢܽܘܪܳܐ ܢܶܬܚܰܒܰܠ ܨܰܠܡܳܟ. ܐܶܠܐ ܚܰܕܶܬ ܝܽܘ̈ܩܢܶܐ ܕܰܒܠܺܝܘ. ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ. ܘܢܺܐܡܪܽܘܢ ܐܳܘ ܒܰܪ ܚܰܝܳܐ ܡܚܰܕܬܳܢܳܐ. ܚܽܘܣ ܥܰܠ ܢܰܦ̈ܫܳܬܳܐ ܕܥܰܒܕܰܝ̈ܟ. ܘܢܰܚܶܡ ܐܶܢܽܘܢ ܒܛܰܝܒܽܘܬܳܟ. ܘܚܽܘܣ ܘܶܐܬܪܰܚܰܡ ܥܠܰܝܢ܀

ܐܚܪܢܐ

ܗ: ܐܶܡܳܐ ܕܟܺܝܬܳܐ ܐܰܝܟ ܕܰܡܥܳܕܰܬܝ ܠܰܡܥܰܕܳܪܽܘ ܠܡܶܣܟܺܢܽܘܬܰܢ. ܕܗܳܐ ܚܳܙܝܰܬܝ ܠܰܢ ܐܰܪ̈ܥܳܢܳܝܶܐ. ܕܡܰܛܺܝ ܩܶܨܳܐ ܗܳܐ ܐܳܒܕܺܝܢܰܢ. ܚܽܘܢܝ ܠܰܢ ܒܒܳܥܽܘܬܶܟܝ. ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ: ܗܘܰܝܬܝ ܡܶܬܟܰܫܦܰܬܝ ܐܰܡܺܝܢܳܐܺܝܬ. ܕܠܳܐ ܢܺܐܒܰܕ ܠܰܢ ܒܝܰܕ ܒܺܝ̈ܫܳܬܰܢ. ܐܰܦܺܝܣܝ ܘܰܒܥܳܝ ܐܳܘ ܡܒܰܪܰܟܬܳܐ. ܠܺܝܚܺܝܕܳܝܳܐ ܕܰܕܢܰܚ ܡܶܢܶܟܝ ܕܢܶܥܒܶܕ ܥܠܰܝܢ ܪ̈ܰܚܡܶܐ. ܒܝܰܕ ܨܠܰܘ̈ܳܬܶܟܝ ܩܰܕܺܝܫܬܳܐ܀