ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܩܕܡܝܐ - H

ܫܠܳܡܶܗ ܕܰܐܒܳܐ ܡܶܢ ܪܰܘܡܳܐ. ܒܝܰܕ ܓܰܒܪܺܐܶܝܠ ‌ܐܶܫܬܰܕܰܪ. ܠܘܳܬ ܡܰܪܝܰܡ ܛܽܘܒܳܢܺܝܬܳܐ: ܡܠܶܐ ܗ̱ܘܳܐ ܦܽܘܡܶܗ ܕܢܽܘܪܳܢܳܐ. ܫܠܳܡܳܐ ܣܰܒܪܳܗ̇ ܘܶܐܡܰܪ ܠܳܗ̇: ܕܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ܀

ܬܪܝܢܐ - H

ܫܠܳܡܳܐ ܕܰܐܝܬܺܝ ܓܰܒܪܺܐܶܝܠ. ܫܰܝܢܳܐ ܐܰܫܪܺܝ ܒܰܒܪܺܝܬܳܐ. ܘܰܫܠܳܡܳܐ ܒܪܰܘܡܳܐ ܘܰܒܥܽܘܡܩܳܐ. ܚܰܝ̈ܶܐ ܗܘܰܘ ܒܶܗ ܠܐܢܳܫܽܘܬܳܐ. ܕܶܐܬܪܰܥܺܝ ܠܰܢ ܐܰ‌ܠܳܗܳܐ. ܒܝܰܠܕܳܐ ܫܒܺܝܚܳܐ ܕܡܶܢ ܡܰܪܝܰܡ܀

ܬܠܝܬܝܐ - H

ܫܠܳܡܳܐ ܥܰܡܗܽܘܢ ܕܰܢܒܺܝ̈ܶܐ܆ ܫܠܳܡܳܐ ܥܰܡܗܽܘܢ ܕܰܫܠܺܝ̈ܚܶܐ. ܘܰܫܠܳܡܳܐ ܥܰܡܗܽܘܢ ܕܣܳܗ̈ܕܶܐ. ܕܪܰܚܡܽܘܗ̱ܝ ܠܡܳܪܶܗ ܕܰܫܠܳܡܳܐ. ܘܰܫܠܳܡܳܐ ܠܥܺܕܰܬ ܩܽܘܕܫܳܐ. ܕܥܳܡܪܺܝܢ ܒܳܗ̇ ܒܢܰܘ̈ܗ̱ܝ ܕܰܫܠܳܡܳܐ܀

ܪܒܝܥܝܐ - H

ܠܰܡܦܺܐܕ̈ܶܐ ܕܢܽܘܗܪܳܐ ܓܰܐܝܳܐ. ܛܥܺܝܢܺܝܢ ܣܳܗ̈ܕܶܐ ܒܺܐܝ̈ܕܰܝܗܽܘܢ. ܘܰܡܣܰܟܶܝܢ ܠܚܰܬܢܳܐ ܕܪܰܘܡܳܐ. ܕܥܰܡܶܗ ܢܶܥܠܽܘܢ ܠܰܓܢܽܘܢܳܐ. ܘܠܳܐ ܕܳܥܟܺܝܢ ܠܰܡܦܺܐܕܰܝ̈ܗܽܘܢ. ܕܒܰܕܡܳܐ ܨܒܺܝܥܺܝܢ ܦܰܓܪ̈ܰܝܗܽܘܢ܀

ܚܡܝܫܝܐ - H

ܡܳܪܰܢ ܬܺܐܬܶܐ ܡܰܠܟܽܘܬܳܟ. ܘܢܶܗܘܶܐ ܒܰܐܪܥܳܐ ܨܶܒܝܳܢܳܟ. ܐܰܟܡܳܐ ܕܺܐܝܬܰܘܗ̱ܝ ܒܰܫܡܰܝܳܐ. ܫܒܽܘܩ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܘܰܠܢܶܣܝܽܘܢܳܐ ܠܳܐ ܬܰܥܠܰܢ: ܐܶܠܐ ܦܰܨܳܢ ܡܶܢ ܒܺܝܫܳܐ܀

ܫܬܝܬܝܐ - H

ܗܳܝ ܛܰܝܒܽܘܬܳܐ ܕܢܰܛܰܪܬܶܗ: ܠܕܰܘܺܝܕ ܡܰܠܟܳܐ ܡܶܢ ܫܳܐܘܳܠ. ܗܺܝ ܬܢܰܛܰܪ ܠܥܺܕܬܳܐ ܘܝܰܠ̈ܕܶܝܗ̇. ܠܟܳܗ̈ܢܶܐ ܬܶܗܘܶܐ ܩܽܘܝܳܡܳܐ. ܘܰܠܙܰܕܺܝ̈ܩܶܝܗ̇ ܪܽܘܡܪܳܡܳܐ. ܘܰܠܚܰܛܳܝ̈ܶܐ ܫܽܘܒܩܳܢܳܐ܀

ܫܒܝܥܝܐ - H

ܒܝܰܘܡܳܐ ܕܕܳܢܰܚ ܐܰܢ̱ܬ ܡܳܪܰܢ܆ ܘܩܳܝܡܺܝܢ ܟܽܠܗܽܘܢ ܥܰܢܺܝ̈ܕܶܐ. ܘܠܳܒܫܺܝܢ ܟܺܐܢ̈ܶܐ ܬܶܫܒܽܘܚܬܳܐ. ܥܰܡܗܽܘܢ ܚܰܕܳܐ ܠܣܳܓܽܘܕܰܝ̈ܟ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܡܚܰܣܝܳܢܳܐ܀

ܬܡܝܢܝܐ - H

ܢܶܬܕܟܰܪ ܐܶܢܽܘܢ ܠܰܐܒܳܗܰܝ̈ܢ܆ ܕܡܰܠܦܺܝܢ ܗ̱ܘܰܘ ܠܰܢ ܟܰܕ ܚܰܝܺܝܢ: ܕܢܶܗܘܶܐ ܒܢܰܝ̈ܳܐ ܠܰܐܠܳܗܳܐ: ܒܗܳܢ ܥܳܠܡܳܐ ܕܥܳܒܰܪ. ܒܪܳܐ ܕܰܐ‌ܠܳܗܳܐ ܢܢܺܝܚ ܐܶܢܽܘܢ. ܒܗܳܝ ܡܰܠܟܽܘܬܳܐ ܕܰܫܡܰܝܳܐ: ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ ܒܥܳܠܡܳܐ ܕܠܳܐ ܥܳܒܰܪ܀