ܨܠܽܘ̣ܬܳܐ ܕܫܽܘ̣ܪܳܝܳܐ

ܛܪܽܘܕ ܡܳܪܝܳܐ ܐܰܠܳܗܳܐ: ܠܝܽܘܩܪܳܐ ܕܫܶܢܬܳܐ ܡ̣ܶܢ ܥܰܝ̈ܢܶܐ ܕܺܝܠܰܢ: ܘܫܰܟܶܢ ܠܰܢ ܥܺܝܪܽܘܬܳܐ ܘܰܚܦܺܝܛܽܘܬܳܐ ܘܰܐܢܗܰܪ ܬܰܪ̈ܥܝܳܬܰܢ ܒܢܽܘܗܪܳܐ ܕܺܝܕܰܥܬܳܟ ܐܰܠܳܗܳܝܬܳܐ: ܕܢܶܫܬܰܘܕܰܥ ܠܐ̱ܪ̈ܳܙܶܐ ܕܥܺܐܕܳܐ ܗܳܢܳܐ ܩܰܕܺܝܫܳܐ ܕܢܽܘܗܪ̈ܶܐ: ܕܒܶܗ ܐܰܢܗܰܪܬ ܠܢܰܦ̈ܫܳܬܰܢ ܒܚܽܘܣܳܝܳܐ ܕܡܶܬܥܰܒܪ̈ܳܢܘܳܬܰܢ: ܒܪ̈ܰܚܡܶܐ ܕܡܶܢܳܟ ܕܰܠܘܳܬܰܢ: ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܦܪܽܘ̣ܡܝܽܘܢ

ܬܶܫܒܽܘܚܬܳܐ ܐܰܡܺܝܢܬܳܐ ܘܣܶܓܕܬܳܐ ܫܰܪܺܝܪܬܳܐ: ܠܗܰܘ ܢܽܘܗܪܳܐ ܪܺܝܫܳܝ ܡܶܢܟܽܠ: ܘܠܳܐ ܡܶܬܕܰܪܟܳܢܳܐ ܐܰܠܳܗܳܐ ܐܰܒܳܐ: ܝܳܠܽܘܕܳܐ ܕܢܽܘܗܪܳܐ ܡܬܽܘܡܳܝܳܐ: ܒܪܳܐ ܝܺܚܺܝܕܳܝܳܐ ܘܡܰܦܩܳܢܳܐ ܕܢܽܘܗܪܳܐ ܠܳܐ ܡܶܬܡܰܠܠܳܢܳܐ: ܪܽܘܚܳܐ ܩܰܕܺܝܫܳܐ: ܗܰܘ ܕܡܶܢܶܗ ܪܳܕܝܳܐ ܟܽܠ ܡܰܘܗܰܒܬܳܐ ܛܳܒܬܳܐ: ܘܟܽܠ ܫܽܘܘܟܳܢܳܐ ܡܫܰܡܠܝܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ܀

ܣܶܕܪܳܐ

ܐܰܠܳܗܳܐ ܫܒܺܝܚ ܒܓܰܐܝܽܘܬܳܐ: ܘܰܟܣܶܐ ܒܥܽܘܬܪܳܐ ܕܪܰܒܽܘܬܶܗ: ܥܳܒܽܘܕܳܐ ܕܰܓܠܐܴ ܒܣܽܘܓܳܐܐ ܕܬܶܕܡܪ̈ܳܬܶܗ: ܘܰܕܚܺܝܠ ܒܬܽܘܩܦܳܐ ܕܣܳܥܽܘܪ̈ܘܳܬܶܗ: ܥܶܠܳܝܳܐ ܕܰܪܥܶܡ ܒܰܫ̈ܡܰܝ ܫܡܰܝ̈ܳܐ: ܘܫܰܕܰܪ ܥܰܠ ܒܪܳܐ ܕܺܝܠܶܗ ܣܳܗܕܽܘܬܶܗ: ܘܝܰܗܒ ܩܳܠܳܐ ܪܚܺܝܡܳܐ ܡ̣ܶܢ ܡܪ̈ܰܘܡܶܐ: ܘܫܰܘܕܰܥ ܥܰܠ ܒܰܝܬܳܝܽܘܬܳܐ ܟܝܳܢܳܝܬܳܐ ܕܚܰܒܺܝܒܶܗ: ܡܳܪܝܳܐ ܨܒܰܐܘܽܬ ܕܰܒܝܰܕ ܪܽܘܚܳܐ ܩܰܕܺܝܫܳܐ ܕܺܐܝܬܰܘܗ̱ܝ ܨܶܒܥܳܐ ܕܰܟܝܳܢܶܗ: ܓܠܐܴ ܘܚܰܘܺܝ ܠܥܳܠܡܳܐ ܩܢܽܘ̈ܡܶܐ ܕܺܐܝܬܽܘܬܶܗ: ܫܶܡܫܳܐ ܡܬܽܘܡܳܝܳܐ: ܕܟܽܠ ܐܰܝܟܳܐ ܕܨܳܒܶܐ ܢܳܫܒܺܝܢ ܙܰܠܺܝ̣̈ܩܰܘܗ̱ܝ ܢܽܘܗܪܳܐ ܡܫܰܡܠܝܳܐ ܕܫܰܕܰܪ ܠܝܽܘܪܕܢܳܢ ܕܶܢܚܶܗ: ܕܰܢܩܰܕܶܫ ܠܡܰܝ̈ܳܐ ܒܰܥܡܳܕܶܗ: ܩܽܘܕܳܫܳܐ ܩܰܕܺܝܫܳܐ ܕܰܠܥܶܠ ܡ̣ܶܢ ܡܪ̈ܰܘܡܶܐ ܡܥܰܠܰܝ̈ܳܐ ܕܪܰܒܽܘܬܶܗ: ܕܰܐܫܪܺܝ ܒܓܰܘ ܢܰܗܪܳܐ ܪܶܬܚܳܐ ܪܰܒܳܐ ܕܓܰܘܙܰܠܬܶܗ: ܟܝܳܢܳܐ ܛܽܘܒܬܳܢܳܐ ܕܫܰܘܬܶܦ ܠܥܰܦܪ̈ܳܢܶܐ ܒܛܳܒܽܘܬܶܗ: ܓܰܢ̱ܒܳܪܳܐ ܕܰܐܘܫܶܛ ܐܺܝܕܶܗ ܡ̣ܶܢ ܡܪ̈ܰܘܡܶܐ ܥܶܠܳܝ̈ܶܐ: ܘܰܫܠܳܢ ܡ̣ܶܢ ܡܰܝ̈ܳܐ ܣܰܓܺܝ̈ܶܐܐ ܕܰܚܛܺܝܬܳܐ ܒܚܰܝܠܳܐ ܘܦܽܘܪܩܳܢܳܐ ܪܰܒܳܐ ܕܝܰܡܺܝܢܶܗ: ܫܡܳܐ ܡܫܰܒܚܳܐ ܕܰܡܩܰܕܶܫ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܒܪܽܘܚܳܦܶܗ: ܠܳܟ ܐܰܠܳܗܳܐ ܛܳܒܳܐ ܘܰܡܪܰܚܡܳܢܳܐ: ܘܣܳܥܽܘܪܳܐ ܕܬܶܕܡܪ̈ܳܬܳܐ ܒܚܰܝܠܳܟ: ܡܩܰܪܒܺܝܢܰܢ ܥܶܛܪܳܐ ܗܳܢܳܐ ܕܒܶܣ̈ܡܶܐ ܡܶܛܽܠ ܕܰܐܢ̱ܬ ܐܺܝܬܰܝܟ ܡܩܰܒܠܳܢܳܐ ܕܬܰܝ̈ܳܒܶܐ: ܘܰܡܩܰܪܒܳܢܳܐ ܕܰܒܨܺܝܪ̈ܶܐ ܠܘܳܬܳܟ ܒܝܰܕ ܡܶܬܢܰܚܬܳܢܽܘܬܶܗ ܕܺܝܚܺܝܕܳܝܳܐ ܒܪܳܐ ܕܺܝܠܳܟ: ܗܰܘ ܕܟܰܕ ܢܦܰܩ ܡ̣ܶܢ ܐܰܬܪܳܐ ܕܰܓܢܺܝܙܽܘܬܳܟ: ܘܰܢܚܶܬ ܫܪܳܐ ܒܥܽܘܒܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܘܶܐܬܳܐ ܠܓܶܠܝܳܢܳܐ ܦܰܓܪܳܢܳܝܳܐ ܘܰܗܘܳܐ ܟܽܠܶܗ ܠܘܳܬܰܢ: ܟܰܕ ܩܰܘܺܝ ܟܽܠܶܗ ܠܘܳܬܳܟ: ܘܟܰܕ ܡܰܠܝܳܐ ܐܺܝܬܰܘܗ̱ܝ ܘܰܠܟܽܠ ܡܳܠܐܷ ܐܰܠܳܗܳܐܝ̣ܬ: ܥܡܰܕ ܒܝܽܘܪܕܢܳܢ ܢܰܗܪܳܐ ܡܶܛܽܠ ܦܽܘܪܩܳܢܰܢ ܘܩܰܕܶܫ ܠܰܢ ܟܰܪܣܳܐ ܕܡܰܝ̈ܳܐ: ܡܰܪܒܥܳܐ ܚܠܺܝܡܳܐ ܕܡܰܥܡܽܘܕܺܝܬܳܐ: ܘܰܥܒܰܕ ܠܰܢ ܒܢܰܝ̈ܳܐ ܠܛܰܝܒܽܘܬܶܗ: ܘܰܐܚ̈ܶܐ ܠܰܚܢܳܢܶܗ: ܘܡܶܛܽܠ ܗܳܕܶܐ ܡܰܘܕܶܝܢܰܢ ܠܳܟ ܘܰܡܪܰܡܪܡܺܝܢܰܢ: ܥܰܬܺܝ̈ܩܶܐ ܕܶܐܬܚܰܕܰܬܘ̱: ܘܚܰܕ̈ܬܶܐ ܕܶܐܬܩܰܕܰܫܘ̱: ܘܡܶܣ̈ܟܺܢܶܐ ܕܰܥܬܰܪܘ̱: ܘܢܰܦ̈ܠܶܐ ܕܩܳܡܘ̱: ܘܡܺܝ̈ܬܶܐ ܕܰܚܝܰܘ: ܟܰܕ ܡܶܬܟܰܫܦܺܝܢܰܢ ܠܪܶܚܡܰܬ݀ ܐ̱ܢܳܫܽܘܬܳܟ ܕܰܐܡܺܝܢܳܐܝ̣ܬ ܢܶܬܢܰܛܪܽܘܢ ܒܕܰܟܝܽܘܬܳܐ: ܐܰܝܟܰܢܳܐ ܕܟܰܕ ܓܰܠܝ̈ܳܢ ܐܰܦܰܝ̈ܗܽܘܢ: ܢܶܥܬܪܽܘܢ ܩܳܠܰܝ̈ܗܽܘܢ ܒܫܽܘܒܚܳܟ ܘܰܢܙܰܡܪܽܘܢ ܠܶܫܳܢܰܝ̈ܗܽܘܢ ܬܰܘܕܺܝܬܳܟ: ܘܢܶܚܕܶܐ ܠܶܒܗܽܘܢ ܒܦܽܘܪܩܳܢܳܟ: ܘܢܶܣܒܥܽܘܢ ܡ̣ܶܢ ܚܰܕܽܘܬܶܗ ܕܦܰܪܨܽܘܦܳܟ: ܘܡ̣ܶܢ ܒܰܣܺܝܡܽܘܬܳܐ ܕܙܳܟܽܘܬܳܐ ܕܝܰܡܺܝܢܳܟ: ܘܢܶܬܚܰܣܽܘܢ ܥܰܢܺܝ̈ܕܶܐ ܒܰܚܢܳܢܳܟ: ܘܡܶܢܟܽܠ ܦܽܘܡܺܝ̈ܢ ܘܠܶܫܳܢܺܝ̈ܢ: ܫܽܘܒܚܳܐ ܠܳܐ ܡܛܰܘܫܳܐ ܢܰܣܶܩ ܠܳܟ ܘܠܺܝܚܺܝܕܳܝܳܐ ܒܪܳܟ: ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀