ܦܪܽܘ̣ܡܝܽܘܢ

ܠܗܰܘ ܚܰܝܳܐ ܘܡܰܚܝܳܢܳܐ ܘܰܐܚܺܝܕ ܟܽܠ: ܕܰܒܩܳܠܶܗ ܡܺܝ̈ܬܶܐ ܡܶܬܢܰܚܡܺܝܢ ܦܰܓܪ̈ܶܐ ܒܦܽܘܩܕܳܢܶܗ: ܘܡ̣ܶܢ ܥܰܦܪܳܐ ܘܰܚܒܳܠܐ ܡܶܬܢܰܦܨܺܝܢ: ܘܰܒܪܶܡܙܶܗ ܐܶܣܛܰܠ ܫܽܘܒܚܳܐ ܡܶܬܥܰܛܦܺܝܢ: ܘܒܰܪܦܳܦ ܥܰܝܢܳܐ ܫܰܘܝܳܐܝ̣ܬ ܩܳܝܡܺܝܢ ܘܒܰܥ̈ܢܳܢܶܐ ܙܰܕܺܝ̈ܩܶܐ ܠܐܘ̣ܪܥܶܗ ܦܳܪܚܺܝܢ: ܘܩܳܠܰܝ̈ ܬܶܫܒܽܘܚܬܳܐ ܠܶܗ ܡܰܣܩܺܝܢ: ܕܠܶܗ ܝܳܐܶܐ ܫܽܘܒܚܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ: ܘܰܒܟܽܠܗܘܢ̇ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ܀

ܣܶܕܪܳܐ

ܐܰܠܳܗܳܐ ܗܰܘ ܕܡ̣ܶܢ ܥܳܠܰܡ ܐܺܝܬܰܝܟ ܘܰܠܥܳܠܡܺܝܢ ܡܟܰܬܰܪ ܐܰܢ̱ܬ: ܗܰܘ ܕܰܒܢܽܘܗܪܳܐ ܕܐܰܠܳܗܽܘܬܳܐ ܡܶܬܓܰܝܶܐܐ ܐܰܢ̱ܬ: ܗܰܘ ܕܰܒܠܐܴ ܡܳܝܽܘܬܽܘܬܳܐ ܒܺܐܝܬܽܘܬܳܐ ܕܺܝܠܳܟ ܡܶܬܒܰܣܰܡ ܐܰܢ̱ܬ: ܘܡ̣ܶܢ ܡܫܰܡ̈ܫܳܢܶܐ ܕܢܽܘܪܳܐ ܘܰܕܪܽܘܚܳܐ ܒܰܬܠܺܝܬܳܝܽܘܬ ܩܽܘ̈ܕܳܫܶܐ ܡܶܬܩܰܕܰܫ ܐܰܢ̱ܬ: ܗܰܘ ܕܰܒܛܰܝܒܽܘܬܳܐ ܕܺܝܠܳܟ ܡܬܽܘܡܳܝܬܳܐ ܠܒܰܪܢܳܫܳܐ ܩܰܕܡܳܝܳܐ ܡ̣ܶܢ ܐܳܕܳܡܺܝ̈ܣܶܐ (ܥܰܦܪܳܐ) ܠܰܗܘܳܝܳܐ ܐܰܝܬܺܝܬ: ܘܬܰܩܶܢܬ: ܘܰܒܡܰܦܽܘܚܺܝܬܳܐ ܕܺܝܠܳܟ ܐܰܠܳܗܳܝܬܳܐ: ܘܰܢܫܰܡܬܳܐ ܕܒܰܐܦܰܘ̈ܗ̱ܝ ܢܰܦܫܳܢܳܝܳܐ ܘܚܰܝܳܐ ܘܰܡܠܺܝܠܳܐ ܩܰܝܶܡܬܳܝܗ̱ܝ ܘܳܐܦ ܒܬܶܐܘܳܪܺܝܰܐ ܚܳܝܪܰܬ ܒܰܐܠܳܗܳܐ ܐܰܠܳܗܳܐܝ̣ܬ ܨܰܒܶܬܬܳܝܗ̱ܝ: ܘܰܒܨܰܠܡܳܐ ܕܺܝܠܳܟ ܐܰܠܳܗܳܝܳܐ ܐܰܘܪܶܒܬܳܝܗ̱ܝ: ܘܫܰܠܺܝܛ ܥܰܠ ܟܽܠ ܕܒܰܐܪܥܳܐ ܣܳܡܬܳܝܗ̱ܝ: ܘܡ̣ܶܢ ܡܶܐܟܽܘܠܬܳܐ ܕܺܐܝܠܳܢܳܐ ܕܺܝܕܰܥܬܳܐ: ܕܠܳܐ ܢܶܬܩܰܪܰܒ ܘܢܶܐܟܽܘܠ ܙܰܗܰܪܬܳܝܗ̱ܝ: ܘܳܐܦ ܒܬܶܐܘܳܠܳܘܓܺܝܰܐ ܡܰܠܐܰܟܳܝܬܳܐ ܘܩܰܕܺܝܫܬܳܐ ܡܩܰܕܫܳܢܳܐܝ̣ܬ ܫܰܘܬܶܦܬܳܝܗ̱ܝ: ܘܰܒܪܰܘܡܳܐ ܪܽܘܚܳܢܳܝܳܐ ܘܰܥܕܶܢܳܝܳܐ ܐܰܥܡܰܪܬܳܝܗ̱ܝ: ܐܰܝܟܰܢܳܐ ܕܰܒܚܰܝ̈ܶܐ ܠܳܐ ܚܳܫܽܘܫܳܐܝ̣ܬ ܡܰܐܠܽܘܢ ܘܠܳܐ ܡܳܝܽܘܬܳܐܝ̣ܬ ܢܟܰܬܰܪ: ܚܰܣܳܡܳܐ ܗܰܘ ܡܰܢ ܒܥܶܠܕܒܳܒܳܐ ܓܰܘܳܢܳܝܳܐ ܘܩܳܛܶܠ ܒܢܰܝ̈ܢܳܫܳܐ ܒܝܰܕ ܡܶܐܟܽܘܠܬܳܐ ܕܡ̣ܶܢ ܦܺܐܪܳܐ ܠܗܳܢܳܐ ܫܰܪܓܶܠ: ܘܰܒܝܰܕ ܒܰܪ̱ܬ ܢܶܩܦܳܐ ܕܺܝܠܶܗ ܠܗܳܝ ܕܢܶܐܟܽܘܠ ܘܢܶܗܘܶܐ ܐܰܠܳܗܳܐ ܐܰܫܰܪ ܗ̱ܘܳܐ: ܡܶܫܬܰܡܥܳܐ ܗ̱ܘܳܬ݀ ܠܶܗ ܓܶܝܪ ܐܰܦܽܘܦܰܐܣܺܝܣ (ܓܙܳܪܕܝ̣ܢܳܐ) ܗܳܝ ܡܠܺܝܛܳܢܺܝܬܳܐ ܘܡܰܠܝܰܬ݀ ܣܽܘܪܳܕܳܐ ܕܳܐܡܪܳܐ ܠܶܗ ܐܳܕܳܡ ܐܳܕܳܡ ܠܺܝܛܳܐ ܐܰܪܥܳܐ ܡܶܛܽܠܳܬܳܟ: ܟܽܘ̈ܒܶܐ ܘܕܰܪܕܪ̈ܶܐ ܬܰܘܥܶܐ ܠܳܟ: ܘܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܐ: ܥܕܰܡܳܐ ܕܬܶܗܦܽܘܟ ܠܐܪܥܳܐ ܗܳܝ ܕܡܶܢܳܗ̇ ܐܶܬܢܣܶܒ̣ܬ: ܡܶܛܽܠ ܕܡ̣ܶܢ ܥܰܦܪܳܐ ܐܰܢ̱ܬ ܘܰܠܥܰܦܪܳܐ ܬܶܗܦܽܘܟ: ܘܡ̣ܶܢ ܗܳܪܟܳܐ ܟܰܕ ܥܰܡ ܪܺܝܫ ܛܽܘܗ̈ܡܶܐ ܐܶܒܠܳܐ ܡܶܬܥܰܛܦܺܝܢ: ܘܟܰܪܝܽܘܬܳܐ ܡܶܬܠܰܒܫܺܝܢܰܢ: ܘܥܰܡ ܐܶܪܰܡܝܳܐ ܗܰܘ ܬܡܺܝܗܳܐ ܒܓܶܠܝ̈ܳܢܶܐ ܐܳܡܪܺܝܢܰܢ: ܐܰܝܟܰܢܳܐ ܐܶܣܬܠܺܝ ܕܰܗܒܳܐ ܛܳܒܳܐ ܗܰܘ ܕܒܺܐܝ̈ܕܰܝܳܐ ܕܺܝܠܳܟ ܩܰܕܺܝ̈ܫܳܬܳܐ: ܡ̣ܶܢ ܗܽܘ̈ܠܶܐ ܐܰܪ̈ܥܳܢܳܝܳܬܳܐ ܘܝܰܒܺܝܫܽܘܬܳܐ: ܐܶܣܛܽܘܟܣܳܢܳܝܬܳܐ ܘܩܰܪܺܝܪܽܘܬܳܐ: ܠܳܐܕܫܳܐ ܗܳܢܳܐ ܫܰܦܺܝܪ ܕܡܽܘ̣ܬܳܐ ܐܶܬܬܰܝܬܺܝ: ܐܰܝܟܰܢܳܐ ܢܦܰܠ ܫܰܦܺܝܪܳܐ ܡ̣ܶܢ ܪܰܘܡܳܐ: ܗܰܘ ܕܶܐܬܟܰܢܺܝ ܐܽܘܪܫܠܶܡܳܝܳܐ: ܕܰܡܫܰܒܚܺܝܢ ܒܶܗ ܡܰܠܰܐܟ̈ܶܐ ܘܚܰܝܠܰܘ̈ܳܬܳܐ ܕܰܠܥܶܠ: ܘܠܰܐܬܪܳܐ ܗܳܢܳܐ ܬܰܚܬܳܝܳܐ ܕܰܡܫܰܡܰܗ ܐܺܝܪܺܝܚܽܘ: ܘܺܐܝܬܰܘܗ̱ܝ ܒܶܝܬ ܨܰܘܒܳܐ ܘܰܟܡܺܐܢܳܐ ܕܡܰܘܬܳܐ ܘܣܳܛܳܢܳܐ: ܐܰܝܟܰܢܳܐ ܡ̣ܶܢ ܠܶܣܛܳܝ̈ܶܐ ܗܳܢܽܘܢ ܡܶܬܡܰܚܶܐ ܗ̱ܘܳܐ: ܘܰܒܨܽܘܠܦ̈ܳܬܳܐ ܡܰܪܺܝܪ̈ܳܬܳܐ ܗܳܢܽܘܢ ܕܰܒܟܺܐܒ̈ܶܐ ܡܫܺܝ̈ܡܳܢܶܐ ܥܰܠ ܐܰܪܥܳܐ ܡܶܬܪܡܶܐ ܗ̱ܘܳܐ: ܐܰܝܟܰܢܳܐ ܠܩܺܝܬܳܪ ܡܶܢ̈ܶܐ ܥܣܺܝܪ̈ܳܝܳܬܳܐ ܐܰܘܟܺܝܬ ܠܪ̈ܶܓܫܶܐ ܡܶܬܝܰܕ̈ܥܳܢܶܐ: ܗܳܠܶܝܢ ܕܰܐܝܟ ܕܰܠܫܽܘܒܚܳܐ ܕܺܝܠܳܟ ܪܰܟܶܒܬ ܘܬܰܩܶܢܬ: ܒܓܰܘ ܫܝܽܘܠ ܐܶܬܦܣܶܩܘ̱ ܘܰܒܛܶܠܘ̱: ܠܘܳܬ ܡܰܥܒܕܳܢܽܘܬܳܐ ܘܣܳܥܽܘܪܽܘܬܳܐ ܠܳܐ ܡܰܐܫܦܺܝܢ: ܐܰܝܟܰܢܳܐ ܚܠܳܦ ܡܠܺܝܠܽܘܬܳܐ ܗܳܝ ܕܒܳܗ̇ ܐܰܘܪܶܒܬܳܝܗ̱ܝ: ܘܰܒܗܳܕܶܐ ܡ̣ܶܢ ܟܽܠܗܶܝܢ ܠܳܐ ܡܠܺܝ̈ܠܳܬܳܐ ܦܪܰܫܬܳܝܗ̱ܝ: ܗܳܝ ܕܒܳܗ̇ ܡܰܘܪܶܒ ܗ̱ܘܳܐ ܘܰܡܝܰܩܰܪ ܠܳܟ ܘܰܡܫܰܒܰܚ ܠܳܟ: ܗܳܫܳܐ ܕܶܝܢ ܒܫܶܬܩܳܐ ܘܰܒܠܐܴ ܡܶܬܬܙܺܝܥܳܢܽܘܬܳܐ ܥܓܺܝܢ: ܘܪܰܒܺܝܥ ܒܬܰܘ̈ܘܳܢܶܐ ܟܡܺܝܪ̈ܶܐ ܕܰܫܝܽܘܠ: ܐܶܠܳܐ ܐܰܢ̱ܬ ܐܰܠܳܗܳܐ: ܗܰܘ ܕܺܐܝܬܰܝܟ ܡܪܰܚܡܳܢܳܐ ܘܰܡܪܰܚܦܳܢܳܐ: ܘܕܰܝܳܢܳܐ ܕܕܰܝ̈ܳܢܶܐ: ܘܐܰܠܳܗܳܐ ܕܟܽܠ ܒܣܰܪ: ܘܰܐܒܳܐ ܕܥܳܠܡܳܐ ܕܰܥܬܺܝܕ: ܗܰܘ ܕܒܰܠܚܽܘܕܰܝܟ ܩ̇ܢܶܐ̣ ܐܰܢ̱ܬ ܪ̈ܰܚܡܶܐ ܘܪܶܚܡܰܬ݀ ܐ̱ܢܳܫܽܘܬܳܐ: ܘܝܰܡܳܐ ܕܪܽܘܚܳܦܳܐ ܐܺܝܬܰܝܟ: ܡܳܐ ܕܰܐܝܟ ܒܰܪܩܳܐ: ܗܰܘ ܕܡܰܙܠܶܓ ܡ̣ܶܢ ܡܰܕܢܚܳܐ ܕܳܢܰܚ ܐܰܢ̱ܬ: ܘܰܠܕܺܝܢܳܐ ܕܚܺܝ̣ܠܳܐ ܘܠܰܬܒܰܥܬܳܐ ܐܳܬܶܐ ܐܰܢ̱ܬ: ܡܳܐ ܕܰܡܙܺܝܥ ܪܶܡܙܳܐ ܕܫܽܘܒܚܳܟ ܠܫܶܬܶܐܣܶܝ̈ܗ̇ ܕܰܐܪܥܳܐ ܘܡܰܪܗܶܒ ܦܽܘܩܕܳܢܳܟ ܠܟܽܠܗܽܘܢ ܣܰܘ̈ܦܶܐ ܕܡܶܬܥܰܡܪܳܢܺܝܬܳܐ: ܡܳܐ ܕܠܰܝܬ ܕܶܢܚܶܗ ܕܫܶܡܫܳܐ: ܐܳܦܠܳܐ ܡܰܥܒܕܳܢ̈ܘܳܬܶܗ: ܘܠܳܐ ܝܺܠܺܝܕܽܘܬܶܗ ܕܣܰܗܪܳܐ: ܐܳܦܠܐ ܡܰܠܝܽܘܬܶܗ: ܡܳܐ ܕܦܳܝ̈ܫܳܢ ܙܽܘܢܰܐܣ ܛܪܽܘܦܺܝܩܺܝܬܳܐ (ܡܢܰܘ̈ܳܬܳܐ ܕܐܰܪܥܳܐ ܐܰܘܟܝ̣ܬ ܙܰܒܢܳܐ ܕܒܶܗ ܫܶܡܫܳܐ ܡܶܬܪܰܚܩܳܐ ܡܶܢ ܫܰܘܝܘ̣ܬܳܐ ܕܣܘ̣ܪܛܳܐ ܣܶܟܳܢܳܐܝ̣ܬ): ܐܰܘܟܺܝܬ ܫܽܘܚܠܳܦܳܐ ܕܙܰܒ̈ܢܶܐ: ܡܳܐ ܕܠܰܝܬ ܡܶܢܝܳܢܳܐ ܕܝܰܪ̈ܚܶܐ ܘܝܰܘ̈ܡܳܬܳܐ: ܡܳܐ ܕܕܳܥܟܳܐ ܟܺܝܡܰܐ ܘܥܺܝܽܘܬܳܐ (ܕܡܘ̣ܬܳܐ ܟܰܘܟܒܳܢܳܝܬܳܐ) : ܘܟܰܘܟܒܳܐ ܪܰܡܫܳܝܳܐ: ܘܒܳܛܶܠ ܙܽܘܕܺܝܽܘܢ ܬܰܝܡܢܳܝܳܐ(ܒܘ̣ܪ̈ܓܶܐ؛ܡܰܠ̈ܘܳܫܶܐ): ܘܒܳܛܠܺܝܢ ܫܒܺܝ̈ܥܳܝܶܐ ܘܰܬܪܶܥܣܰܪ̈ܳܝܶܐ: ܘܟܽܠܳܗ̇ ܡܰܘܙܰܠܬܳܐ: ܡܳܐ ܕܳܐܒ̈ܕܳܢ ܦܶܢ̈ܝܳܬܳܐ ܘܠܰܝܬ ܐܶܢܶܝܢ: ܘܩܰܢܛܰܐܪ̈ܺܝܰܐܣ (ܪܶܗܛܳܐ ܕܟܰܘܟ̈ܒܶܐ ܠܰܐܦܰܝ̈ ܡܰܕܢܚܳܐ) ܕܺܝܠܗܶܝܢ ܐܰܝܟ ܕܠܳܐ ܗ̣ܘܰܝ̈: ܕܥܳܒܪܺܝܢ ܫܡܰܝܳܐ ܘܰܐܪܥܳܐ: ܘܙܽܘܪܺܝܰܙܝܽܘܢܰܛܺܝܣ ( ܘܪܶܗܛܳܐ ) ܕܺܝܠܗܶܝܢ: ܘܳܐܦ ܡܶܫܬܠܰܚ ܥܳܠܡܳܐ ܡ̣ܶܢ ܟܽܠܗܘܢ̇ ܨܶܒܬܰܘ̈ܗ̱ܝ: ܡܳܐ ܕܰܡܩܺܝܡ ܩܳܠܳܟ ܠܟܽܠܗܽܘܢ ܡܺܝ̈ܬܶܐ ܡ̣ܶܢ ܩܰܒܪ̈ܶܐ: ܐܰܝܟܰܢܳܐ ܕܰܠܟܽܠܢܳܫ ܐܰܝܟ ܥܰܡܠܰܘ̈ܗܝ ܬܶܦܪܽܘܥ: ܡܳܐ ܕܡܰܠܟܽܘܬܳܐ ܕܢܽܘܗܪܳܐ ܢܰܨܺܝܚܳܐܝ̣ܬ ܡܰܦܪܓܳܐ: ܘܓܺܗܰܢܳܐ ܒܢܽܘܪܳܐ ܠܳܐ ܡܶܬܕܰܥܟܳܢܺܝܬܳܐ ܡܶܬܢܰܒܪܫܳܐ: ܡܳܐ ܕܡܶܫܬܰܕܪܺܝܢ ܡܰܠܰܐܟ̈ܶܐ ܕܚܺܝ̣̈ܠܶܐ ܠܰܡܟܰܢܳܫܽܘ ܠܒܶܝܬ ܕܺܝ̣ܢܳܐ ܠܟܽܠܢܳܫ: ܡܳܐ ܕܒܳܛܠܳܐ ܪܗܺܝܛܪܽܘܬܳܐ (ܚܶܟܡܬܳܐ) ܕܦܺܝܠܽܘ̈ܣܽܘܦܶܐ ܡܳܐ ܕܢܳܝܚܳܐ ܡܠܺܝܛܽܘܬܳܐ ܕܶܐܣܟܽܘܠܺܝ̈ܣܛܺܝܩܶܐ (ܕܘ̣ܪܳܫܳܐ،ܘܒܘܕܳܩܳܐ) ܘܡܶܬܦܰܣܩܳܐ ܦܠܺܝܪܽܘܦܽܘܪܺܝܰܐ (ܡܰܦܰܩܒܪܘ̣ܚܳܐ) ܕܟܽܠ ܒܰܪܢܳܫ: ܡܳܐ ܕܰܠܚܰܕ ܐ̱ܢܳܫ ܠܡܰܠܟܽܘܬܳܐ ܡܰܘܒܠܺܝܢ ܠܶܗ: ܘܠܰܐܚܪܺܢܳܐ ܒܓܺܗܰܢܳܐ ܫܳܕܶܝܢ ܠܶܗ: ܡܳܐ ܕܰܠܚܰܕ ܐ̱ܢܳܫ ܥܰܠ ܦܳܬܽܘܪ ܛܽܘ̈ܒܶܐ ܡܰܣܡܟܺܝܢ ܠܶܗ: ܘܠܰܐ̱ܚܪܺܢܳܐ ܡܶܐܟܽܘܠܬܳܐ ܠܢܽܘܪܳܐ ܝܳܗܒܺܝܢ ܠܶܗ: ܡܳܐ ܕܰܠܚܰܕ ܒܢܽܘܗܪܳܐ ܗܰܘ ܓܰܐܝܳܐ ܡܚܰܕܶܝܢ ܠܶܗ: ܘܠܰܐܚܪܺܢܳܐ ܒܚܶܫܽܘܟܳܐ ܟܡܺܝܪܳܐ ܡܥܺܝܩܺܝܢ ܠܶܗ: ܡܳܐ ܕܰܠܚܰܕ ܬܳܐ ܠܳܟ ܒܪܺܝܟܶܗ ܕܳܐܒܝ̱ ܡܶܬܶܐܡܰܪ ܠܶܗ: ܘܠܰܐܚܪܺܢܳܐ ܒܚܶܫܽܘܟܳܐ ܕܙܶܠ ܠܳܟ ܠܢܽܘܪܳܐ ܗܳܝ ܕܰܠܥܳܠܰܡ ܡܰܫܡܥܺܝܢ ܠܶܗ: ܡܳܐ ܕܰܠܚܰܕ ܕܥܽܘܠ ܠܚܰܕܽܘܬܶܗ ܕܡܳܪܳܟ ܠܶܗ ܡܶܙܕܰܡܪܳܐ: ܘܠܰܐܚܪܺܢܳܐ ܕܰܐܣܽܘܪ ܐܺܝ̈ܕܰܘܗ̱ܝ ܘܪ̈ܶܓܠܰܘܗ̱ܝ ܘܰܐܦܶܩܽܘܢܳܝܗ̱ܝ ܠܚܶܫܽܘܟܳܐ ܒܰܪܳܝܳܐ ܡܶܬܬܰܙܥܩܳܐ ܠܶܗ: ܟܡܳܐ ܕܥܰܠ ܪ̈ܰܚܡܶܐ ܕܺܝܠܳܟ ܣܢܺܝܩܺܝܢ ܛܽܘܗ̈ܡܶܐ ܘܫܰܪ̈ܒܳܬܳܐ ܟܽܠܗܶܝܢ: ܘܟܺܐܢܽܘܬܳܐ ܒܰܐܦ̈ܶܐ ܕܐ̱ܢܳܫ ܠܳܐ ܢܳܣܒܳܐ: ܐܺܝܢ ܡܳܪܝܳܐ ܒܗܰܘ ܝܰܘܡܳܐ ܐܰܛܶܠ ܝܰܡܺܝܢܳܟ ܕܡܰܠܝܳܐ ܪ̈ܰܚܡܶܐ ܥܰܠ ܟܽܠܰܢ: ܘܰܐܝܟܰܢܳܐ ܡܪܳܝ̱ ܕܫܰܘܬܶܦܬ ܠܰܢ ܒܡܰܥܡܽܘܕܺܝܬܳܐ ܕܺܝܠܳܟ ܘܰܒܡܰܘܬܳܟ ܘܒܰܩܝܳܡܬܳܟ: ܗܳܟܰܢܳܐ ܒܰܐܪܺܝܬܡܰܐܛܺܝܩܺܝ ܗܰܘ ܝܰܡܺܝܢܳܝܳܐ ܕܶܐܡܪ̈ܶܐ ܕܺܝܠܳܟ ܪ̈ܽܘܚܳܢܳܝܶܐ ܢܶܬܡܢܶܐ ܘܢܶܬܥܢܶܐ ܘܢܶܬܺܝܕܰܥ: ܘܰܐܝܟܰܢܳܐ ܕܰܛܡܰܪܬ ܒܰܢ ܦܰܓܪܳܟ ܝܰܩܺܝܪܳܐ: ܘܰܕܡܳܟ ܡܚܰܣܝܳܢܳܐ: ܐܰܝܟܰܢܳܐ ܕܰܐܢ̱ܬ ܒܰܢ ܬܶܗܘܶܐ ܘܰܚܢܰܢ ܒܳܟ: ܗܳܟܰܢܳܐ ܫܰܘܬܶܦ ܠܰܢ ܐܰܝܟ ܫܽܘܘ̈ܕܳܝܰܝܟ ܫܰܪܺܝܪ̈ܶܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܝܰܘܡܳܢܳܐ ܥ̱ܽܘܗܕܳܢܳܐ ܕܺܝܠܗܽܘܢ ܡܫܰܡܠܶܝܢܰܢ ܐܰܫܘܳܐ ܐܶܢܽܘܢ ܒܒܶܝܬ ܡܰܥܡܪܳܐ ܕܩܰܕܺܝ̈ܫܰܝܟ ܒܝܳܪܬܽܘܬܳܐ ܕܰܓܒܰܝ̈ܟ: ܐܰܠܒܶܫ ܐܶܢܽܘܢ ܐܶܣܛܠܳܐ ܕܠܳܐ ܡܶܬܚܰܒܠܳܢܽܘܬܳܐ: ܐܰܥܛܶܦ ܐܶܢܽܘܢ ܦܪܺܝܣܳܐ ܕܫܽܘܒܚܳܐ ܘܰܡܙܰܠܓܽܘܬܳܐ ܕܺܐܝܡܰܐܬܺܝܣܛܳܘܣ: ܐܰܥܡܰܪ ܐܶܢܽܘܢ ܒܒܶܢܝ̈ܳܢܶܐ ܕܺܝܠܳܟ ܪ̈ܽܘܚܳܢܳܝܶܐ ܒܰܐܝܰܣܦܽܘܢ(ܟܺܐܦܳܐ ܝܰܩܝ̣ܪܬܳܐ ܕܡܶܬܩܰܪܝܳܐ ܝܰܫܦܶܗ) ܡܶܬܝܰܕܥܳܢܳܐ: ܐܰܦܶܩ ܐܶܢܽܘܢ ܡ̣ܶܢ ܨܳܡܰܪܬܳܐ ܕܰܐܒܕܳܢܳܐ : ܘܡ̣ܶܢ ܛܰܪܛܶܐܠܳܘܣ ܚܶܫܽܘܟܳܝܳܐ: ܫܰܘܙܶܒ ܐܶܢܽܘܢ ܡ̣ܶܢ ܛܪ̈ܺܝܣܺܟܺܝܰܐ ܒܺܝܫܬܳܐ ܘܡ̣ܶܢ ܐܰܟܣܽܘܢܽܘܠܳܘܓܺܝܰܐ(ܢܘ̣ܟܪܳܝܘ̣ܬܳܐ) ܠܳܐ ܛܽܘܒܬܳܢܳܐ: ܐܰܫܡܰܥ ܐܶܢܽܘܢ ܒܰܪ̱ܬ ܩܳܠܳܐ ܕܺܝܠܳܟ ܪܚܺܝܡܬܳܐ: ܐܰܝܟܰܢܳܐ ܕܠܳܐ ܢܶܗܘܽܘܢ ܡܶܢܳܟ ܐܰܟܣܽܘܪ̈ܺܝܣܬܺܝܢܶܐ (ܛܪ̈ܝ̣ܕܶܐ) : ܐܶܡܰܬܝ̱ ܕܗܳܠܶܝܢ ܕܺܝܠܰܢ ܐܰܦܽܘܩܪܰܐܣܺܝܣ (ܦܘ̣ܢܳܝܳܐ) ܡܩܰܒܠܺܝܢ ܚܰܘܳܐ ܐܶܢܽܘܢ ܦܰܪܨܽܘܦܳܐ ܕܺܝܠܳܟ ܡܫܰܝܢܳܐ: ܘܒܰܣܶܡ ܐܶܢܽܘܢ ܒܬܶܐܘܳܪ̈ܺܝܰܐܣ ܕܺܝܠܳܟ ܐܰܠܳܗܳܝ̈ܳܬܳܐ: ܒܛܰܝܒܽܘܬܳܐ ܘܰܒܪ̈ܰܚܡܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܐܺܝܬܝܳܝܬܳܐ ܕܶܝܢ ܘܰܡܬܽܘܡܳܝܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀