ܨܠܽܘ̣ܬܳܐ ܕܫܽܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܒܰܨܠ̈ܰܘܳܬܶܗ ܕܺܐܝܙܓܰܕܳܟ ܘܡܰܥܡܕܳܢܳܟ ܡܳܪܝ̱ ܝܽܘܚܰܢܳܢ: ܒܬܽܘܠܳܐ ܙܰܗܝܳܐ: ܘܛܰܢܳܢܳܐ ܕܩܽܘܫܬܳܐ ܕܢܶܫܬܰܒܩܽܘܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܒܳܥܘ̈ܳܬܶܗ: ܘܢܶܫܬܰܟܰܢ ܠܰܢ ܫܰܝܢܳܐ ܘܰܫܠܳܡܳܐ: ܘܢܶܬܦܰܨܶܐ ܡ̣ܶܢ ܗܶܪܳܘܕܶܣ ܡܶܬܝܰܕܥܳܢܳܐ: ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܡ̣ܶܢ ܡܪܰܚܡܳܢܽܘܬܳܟ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܠܗܰܘ ܡܰܠܟܳܐ ܕܰܫܡܰܝ̈ܳܢܶܐ: ܕܰܓܒܳܐ ܠܶܗ ܒܰܪ ܥܰܩܪ̈ܶܐ: ܕܢܶܪܗܰܛ ܩܕܳܡ ܡܰܘܠܳܕܶܗ ܘܢܰܟܪܶܙ ܘܰܢܣܰܒܰܪ ܡܰܠܟܽܘܬܶܗ: ܘܫܰܕܪܶܗ ܩܕܳܡܰܘܗ̱ܝ ܒܽܐܘܪܚܳܐ ܕܰܕܡܳܐ: ܘܰܕܪܰܫ ܒܰܩܢܽܘܡܶܗ ܠܐܷܣܛܰܕܺܝܽܘܢ ܕܩܶܛܠܳܐ: ܕܠܶܗ ܠܡܳܪܝܳܐ ܡܟܰܠܠܳܢܶܗ ܢܰܣܶܩ ܫܽܘܒܚܳܐ ܒܝܰܘܡܳܐ ܕܥܰܕܥܺܐܕܶܗ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܟܰܕ ܥܽܘܗܕܳܢܳܐ ܕܰܡܢܺܝ̈ܚܳܢܰܝܟ ܡܝܰܩܪܳܢܳܐܝ̣ܬ ܡܫܰܡܠܶܝܢܰܢ: ܡܳܪܰܢ ܝܶܫܽܘܥ ܡܫܺܝܚܳܐ ܗܳܢܽܘܢ ܕܰܠܗܽܘܢ ܗܰܘ ܛܽܘܒܳܐ ܕܰܦܠܰܚܘ̱ ܒܟܰܪܡܳܟ ܦܽܘܠܚܳܢܳܐ ܟܰܫܺܝܪܳܐ ܕܰܒܢܰܝ̈ܳܐ ܘܠܳܐ ܗ̱ܘܳܐ ܒܕܰܪܓܳܐ ܕܥܰܒ̈ܕܶܐ ܐܰܘ ܕܰܐܓܺܝܪ̈ܶܐ ܟܰܬܰܪܘ̱: ܐܶܠܳܐ ܐܰܝܟ ܒܢܰܝ̈ܳܐ ܫܰܪܺܝܪ̈ܶܐ ܐܶܬܟܰܫܰܪܘ̱: ܘܰܕܩܰܪܢܳܐ ܥܰܡ ܝܽܘܬܪܳܢܳܐ ܒܪܶܚܡܬܳܐ ܢܰܘܫܛܽܘܢ: ܘܳܐܦ ܒܡܶܢܝܳܢܳܐ ܕܛܶܟ̈ܣܶܐ ܬܠܺܝܬܳܝ̈ܶܐ: ܦܺܐܪ̈ܶܐ ܡܫܰܡܠܰܝ̈ܳܐ ܢܰܝܬܽܘܢ: ܚܰܕ ܒܰܬܠܳܬܺܝܢ ܘܒܶܫܬܺܝܢ ܘܒܰܡܳܐܐ ܪܽܘܡܝܳܢܳܐ ܡܝܰܩܪܳܐ ܠܡܳܪܶܐ ܟܰܪܡܳܐ ܫܡܰܝܳܢܳܐ: ܕܠܳܗ̇ ܠܰܡܫܽܘܚܬܳܐ ܗܳܕܶܐ ܕܰܓܡܺܝܪ̈ܶܐ ܐܶܬܥܰܠܺܝ ܗܰܘ ܪܰܗܳܛܳܐ ܩܰܕܡܳܝܳܐ ܘܺܐܝܙܓܰܕܳܐ ܫܰܪܺܝܪܳܐ: ܝܽܘܚܰܢܳܢ ܗܰܘ ܕܰܩܕܳܡ ܡܳܪܽܘܬܳܟ ܐܶܫܬܰܕܰܪ: ܗܰܘ ܕܫܽܘܦܪܳܐ ܕܰܡܝܰܬܪܽܘܬܶܗ ܒܟܽܠܗܽܘܢ ܣܰܡ̱̈ܡܳܢܶܐ ܕܡ̣ܶܢ ܐܰܪܥܳܐ ܠܳܐ ܡܶܬܬܨܺܝܪ: ܡܶܛܽܠ ܕܪܳܡ ܘܰܡܥܰܠܰܝ ܘܡ̣ܶܢ ܩܽܘܠܳܣ̈ܶܐ ܕܰܒܢܰܝ̈ܢܳܫܳܐ: ܡܶܛܽܠ ܗܳܕܶܐ ܥܺܕܬܳܐ ܩܰܕܺܝܫܬܳܐ: ܟܰܕ ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܠܝܰܘܡܳܐ ܗܳܢܳܐ ܕܕܽܘܟܪܳܢܶܗ ܡܝܰܩܪܳܐ ܒܚܰܕܽܘܬܳܐ ܘܒܰܪܘܳܙܳܐ ܥܰܡ ܟܶܢܫܳܐ ܕܰܒܢܶܝ̈ܗ̇ ܠܘܳܬܶܗ ܡܰܙܥܩܳܐ: ܬܳܐ ܒܰܫܠܳܡܳܐ ܡܰܥܡܕܳܢܳܐ ܘܪܰܗܳܛܳܐ ܩܰܕܡܳܝܳܐ: ܢܰܨܺܝܚ ܫܽܘܦܪ̈ܶܐ ܡܳܪܝ̱ ܝܽܘܚܰܢܳܢ: ܪܰܒܳܐ ܕܟܳܗ̈ܢܶܐ ܕܰܒܢܳܡܽܘܣܳܐ ܡܽܘܫܳܝܳܐ ܗܘܳܐ ܡܰܘܠܳܕܶܗ ܙܰܗܝܳܐ: ܘܒܰܚ̇ܕܰܬܳܐ ܬܰܪܒܺܝܬܳܐ ܕܺܝܠܶܗ ܬܡܺܝܗܬܳܐ: ܬܳܐ ܒܰܫܠܳܡܳܐ ܡܰܥܡܕܳܢܳܐ ܪܰܗܳܛܳܐ ܩܰܕܡܳܝܳܐ ܓܰܒܝܳܐ ܡܳܪܝ̱ ܝܽܘܚܰܢܳܢ: ܫܰܘܫܒܺܝܢܳܐ ܡܝܰܩܪܳܐ ܕܚܰܬܢܳܐ ܫܡܰܝܳܢܳܐ: ܕܕܽܘܟܬܳܐ ܠܡܰܠܟܳܐ ܢܳܛܰܪ ܗ̱ܘܰܝܬ: ܬܳܐ ܒܰܫܠܳܡܳܐ ܡܰܥܡܕܳܢܳܐ ܘܪܰܗܳܛܳܐ ܩܰܕܡܳܝܳܐ ܓܰܒܝܳܐ ܡܳܪܝ̱ ܝܽܘܚܰܢܳܢ: ܡܣܰܒܰܪ ܡܰܠܟܽܘܬܳܐ ܕܰܫܡܰܝܳܐ ܕܰܠܩ̈ܳܛܠܰܝ ܢܒܺܝ̈ܶܐ ܘܰܫܠܺܝ̈ܚܶܐ: ܘܩܳܛܠܰܝ̈ ܡܳܪܶܐ ܟܽܠ ܝܰܠܕ̈ܶܐ ܕܳܐܟܶܕ̈ܢܶܐ ܕܰܡܺܝܬ: ܬܳܐ ܒܰܫܠܳܡܳܐ ܡܩܰܒܶܠ ܓܶܠܝܳܢܳܐ ܡ̣ܶܢ ܫܡܰܝܳܐ: ܕܰܫܘܳܐ ܕܢܶܗܘܶܐ ܚܕܽܘܓܳܐ ܠܥܺܕܬܳܐ ܩܰܕܺܝܫܬܳܐ: ܬܳܐ ܒܰܫܠܳܡܳܐ ܡܶܨܥܳܝܳܐ ܕܕܺܝܰܐܬܺܝ̈ܩܰܐܣ ܥܰܬܺܝܩܬܳܐ ܘܕܰܚܕܰܬܳܐ: ܕܰܠܬܰܪܬܰܝܗܶܝܢ ܒܰܫܪܳܪܳܐ ܫܰܡܠܺܝܬ: ܬܳܐ ܒܰܫܠܳܡܳܐ ܢܒܺܝܳܐ ܘܰܫܠܺܝܚܳܐ: ܘܣܳܗܕܳܐ ܘܰܕܪܰܒ ܡܶܢܶܗ ܐ̱ܚܪܺܢܳܐ ܠܳܐ ܐܺܝܬ ܕܩܳܡ: ܬܳܐ ܒܰܫܠܳܡܳܐ ܐܰܟܳܪܳܐ ܛܳܒܳܐ: ܕܰܙܪܰܥ ܥܰܡ ܢܒܺܝ̈ܶܐ: ܘܰܚܨܰܕ ܥܰܡ ܫܠܺܝ̈ܚܶܐ: ܬܳܐ ܒܰܫܠܳܡܳܐ ܪܰܒ ܩܳܠܳܐ ܕܰܫܠܺܝܚܽܘܬܳܐ: ܕܡ̣ܶܢ ܓܰܘ ܟܰܪܣܳܐ ܕܶܐܡܶܗ ܫܰܪܺܝ ܕܢܰܙܥܶܩ ܕܩܶܪܒܰܬ݀ ܡܰܠܟܽܘܬܳܐ ܕܰܫܡܰܝܳܐ: ܬܳܐ ܒܰܫܠܳܡܳܐ ܡܰܥܡܶܕ ܡܳܪܶܗ: ܕܰܒܕܰܘܨܳܐ ܩܰܕܶܡ ܐܰܪܥܶܗ ܒܥܽܘܒ ܝܳܠܶܕܬܶܗ: ܬܳܐ ܒܰܫܠܳܡܳܐ ܝܰܠܕܳܐ ܪܚܺܝܡܳܐ: ܕܰܒܐ̱ܪܳܙܳܐ ܐܶܬܒܛܶܢ ܘܰܒܐ̱ܪܳܙܳܐ ܐܶܬܺܝܠܶܕ: ܬܳܐ ܒܰܫܠܳܡܳܐ ܣܓܽܘܠܳܐ ܪܚܺܝܡܳܐ: ܕܰܠܣܰܬܳܐ ܥܩܰܪܬܳܐ ܐܶܬܺܝܗܶܒ: ܘܚܰܡܪܳܐ ܛܳܒܳܐ ܐܰܫܩܺܝ ܠܟܽܠܗܽܘܢ ܥܰܡ̱̈ܡܶܐ: ܬܳܐ ܒܰܫܠܳܡܳܐ ܟܶܢܳܪܳܐ ܚܰܠܝܳܐ ܕܒܰܚܠܽܘܠܳܐ ܕܟܰܠܰܬ ܡܰܠܟܳܐ ܐܰܫܡܰܥ ܩܳܠܶܗ ܩܺܝ̈ܢܳܬܳܐ ܚܰܠܝ̈ܳܬܳܐ: ܬܳܐ ܒܰܫܠܳܡܳܐ ܐܰܒܽܘܒܳܐ ܚܰܠܝܳܐ: ܕܪܽܘܚܳܐ ܩܰܕܺܝܫܳܐ ܙܡܰܪ ܒܶܗ: ܬܳܐ ܒܰܫܠܳܡܳܐ ܐܶܡܪܳܐ ܩܛܺܝܠܳܐ ܚܒܺܝܫ ܒܰܛܢܳܢܳܐ: ܢܟܺܝܣ ܒܰܚܣܳܡܳܐ: ܬܳܐ ܒܰܫܠܳܡܳܐ ܪܽܘܡܝܳܢܳܐ ܝܰܩܺܝܪܳܐ: ܕܰܒܥܺܐܕܳܐ ܕܡܰܠܟܳܐ ܐܶܬܬܰܝܬܺܝ ܪܺܝܫܶܗ ܡܝܰܩܪܳܐ ܠܰܣܡܳܟܳܐ: ܒܝܰܕ ܪܶܩܕܳܐ ܙܰܠܺܝܠܳܐ: ܬܳܐ ܒܰܫܠܳܡܳܐ ܘܰܪܕܳܐ ܪܚܺܝܡܳܐ ܕܡ̣ܶܢ ܡܰܠܟܳܐ ܗܶܪܳܘܕܶܣ ܐܶܬܩܛܶܦ ܗ̱ܘܳܐ ܘܠܰܛܠܺܝܬܳܐ ܐܶܬܺܝܗܶܒ ܗ̱ܘܳܐ: ܬܳܐ ܒܰܫܠܳܡܳܐ ܐܺܝܠܳܢܳܐ ܕܥܰܠ ܡܰܥܡܽܘܕܺܝܬܳܐ ܐܰܦܪܰܥ ܗ̱ܘܳܐ ܘܒܰܟܠܺܝܠܳܐ ܕܥܺܕܬܳܐ ܐܶܬܬܣܺܝܡ: ܬܳܐ ܒܰܫܠܳܡܳܐ ܫܒܺܝܚܳܐ ܕܰܒܬܰܦܳܐ ܐܰܡܺܝܢܳܐ ܕܡܰܥܡܽܘܕܺܝܬܳܐ ܕܡܰܝ̈ܳܐ ܚܰܝ̈ܶܐ ܐܶܬܢܨܶܒ ܘܰܡܫܺܝܚܽܘܬܳܐ ܠܥܺܕܬܳܐ ܐܶܬܬܰܓܰܪ: ܬܳܐ ܒܰܫܠܳܡܳܐ ܟܳܗܢܳܐ ܪܰܒܳܐ ܕܰܒܪܶܩܕܳܐ ܗ̱ܘܳܐ ܡܰܘܠܳܕܶܗ: ܐܳܦ ܒܶܗ ܐܶܫܬܰܡܠܺܝ ܟܽܘܠܳܠܶܗ: ܘܰܒܚܰܕܽܘܬܳܐ ܡܶܫܬܰܡܠܐܷ ܐܰܡܺܝܢܳܐܝ̣ܬ ܥܰܕܥܺܐܕܶܗ: ܕܰܒܝܰܕ ܨܠܰܘ̈ܳܬܳܟ ܚܰܣ̈ܝܳܬܳܐ ܢܶܫܬܘܶܐ ܟܽܠܰܢ ܕܢܶܗܘܶܐ ܫܰܘܬܳܦ̈ܶܐ ܠܪ̈ܰܚܡܶܐ ܘܰܚܢܳܢܳܐ ܕܡܳܪܳܟ: ܘܥܺܕܬܳܐ ܩܰܕܺܝܫܬܳܐ ܕܒܳܟ ܡܶܬܪܰܡܪܡܳܐ ܬܶܚܕܶܐ ܒܰܚܠܽܘܠܳܟ: ܡ̣ܶܢ ܟܽܠ ܫܓܽܘ̈ܫܝܶܐ ܘܰܕܠܽܘܚ̈ܝܶܐ ܬܶܬܦܰܨܶܐ ܒܒܳܥ̈ܘܳܬܳܟ: ܘܢܰܫܪܶܐ ܒܳܗ̇ ܫܰܝܢܳܐ ܐܰܡܺܝܢܳܐ ܘܰܫܠܳܡܳܐ ܟܰܗܺܝܢܳܐ ܒܬܰܟ̈ܫܦܳܬܳܟ: ܐܰܝܟܰܢܳܐ ܕܠܶܗ ܠܰܡܫܺܝܚܳܐ ܐܺܝܬܝܳܐ ܕܡ̣ܶܢ ܐܺܝܬܝܳܐ ܕܰܓܒܳܟ ܠܶܗ ܐܺܝܙܓܰܕܳܐ ܢܦܺܝܣ ܒܰܚܢܰܓܬܳܐ ܟܰܕ ܐܳܡܪܺܝܢܰܢ: ܐܰܫܦܰܥ ܡܳܪܝ̱ ܒܽܘܪ̈ܟܳܬܳܐ ܠܟܶܢܫܳܐ ܕܰܡܗܰܝ̈ܡܢܶܐ ܕܝܰܩܰܪܘ̱ ܠܥܺܐܕܳܐ ܕܺܐܝܙܓܰܕܳܟ: ܠܟܳܗ̈ܢܶܐ ܙܰܗܳܐ: ܘܠܰܡܫܰܡ̈ܫܳܢܶܐ ܕܰܟܳܐ: ܠܣ̈ܳܒܶܐ ܣܰܡܶܟ: ܠܰܥܠܰܝ̈ܡܶܐ ܚܰܣܶܢ: ܠܰܛܠܳܝ̈ܶܐ ܪܰܒܳܐ: ܠܥܰܠ̈ܠܳܬܳܐ ܒܰܪܶܟ: ܠܰܟܪܽܘܟܝܳܐ ܕܫܰܢ̱ܬܳܐ ܟܰܠܶܠ: ܡܶܛܪ̈ܶܐ ܘ̈ܛܰܠܶܐ ܒܟܺܝܪ̈ܳܝܶܐ ܘܰܠܩܺܝ̈ܫܳܝܶܐ ܫܰܟܶܢ: ܠܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ ܟܠܺܝ ܘܒܰܛܶܠ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܢܺܝܚ ܘܚܰܣܳܐ: ܐܰܝܟܰܢܳܐ ܕܰܒܟܽܠܥܶܕܳܢ ܫܽܘܒܚܳܐ ܘܺܐܝܩܳܪܳܐ ܢܰܣܶܩ ܠܳܟ ܘܠܰܐܒܽܘܟ: ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀