ܩܰܕܡܳܝܰܬ݀ ܨܠܽܘ̣ܬܳܐ ܕܫܽܘ̣ܪܳܝܳܐ

ܐܰܫܘܳܐ ܠܰܢ ܡܫܺܝܚܳܐ ܐܰܠܳܗܳܐ ܕܺܝܠܰܢ ܕܰܢܩܽܘܡ ܩܕܳܡܰܝܟ ܙܰܗܝܳܐܝ̣ܬ: ܘܰܢܗܰܝܡܶܢ ܒܝܰܠܕܳܟ ܕܡ̣ܶܢ ܒܰܪ̱ܬ ܕܰܘܺܝܕ: ܐܰܝܟ ܝܰܘܣܶܦ ܟܺܐܢܳܐ ܕܶܐܬܦܰܠܰܓ ܗ̱ܘܳܐ ܘܥܰܡܶܗ ܢܶܥܢܶܐ ܘܢܺܐܡܰܪ: ܕܰܐܢ̱ܬ ܐܺܝܬܰܝܟ ܐܰܠܳܗܳܐ ܫܰܪܺܝܪܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܦܪܽܘ̣ܡܝܽܘܢ

ܬܶܫܒܽܘܚܬܳܐ ܕܠܳܐ ܡܰܘܦܝܳܐ ܘܩܽܘܠܳܣܳܐ ܕܠܳܐ ܒܳܛܶܠ: ܠܗܰܘ ܠܳܐ ܡܶܬܕܰܪܟܳܢܳܐ ܕܶܐܬܺܝܠܶܕ ܡ̣ܶܢ ܐܰܒܳܐ ܩܕܳܡ ܙܰܒ̈ܢܶܐ ܕܠܳܐ ܐܶܡܳܐ: ܘܺܝܠܶܕܬܶܗ ܒܬܽܘܠܬܳܐ ܡܰܪܝܰܡ ܒܬܶܗܪܳܐ ܒܚܰܪܰܬ݀ ܙܰܒ̈ܢܶܐ ܕܠܳܐ ܐܰܒܳܐ: ܗܰܘ ܕܰܠܝܰܘܣܶܦ ܟܺܐܢܳܐ ܕܶܐܬܦܰܠܰܓ ܥܰܠ ܒܰܛܢܳܐ ܫܒܺܝܚܳܐ: ܫܰܪܪܶܗ ܒܝܰܕ ܓܰܒܪܺܐܝܶܠ ܪܺܝܫܳܐ ܕܥܺܝܪ̈ܶܐ: ܘܰܐܘܕܥܶܗ ܕܡ̣ܶܢ ܪܽܘܚܳܐ ܕܩܽܘܕܫܳܐ ܐܺܝܬܰܘܗ̱ܝ ܒܰܛܢܳܐ ܕܡܰܪܝܰܡ: ܘܐܰܠܳܗܰܐ ܗ̱̇ܘ ܘܒܰܪ ܐܰܠܳܗܳܐ. ܕܠܶܗ ܝܳܐܶܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ: ܗܰܘ ܕܰܒܓܶܠܝ̈ܳܢܶܐ ܘܚܶܙ̈ܘܳܢܶܐ ܡܰܠܶܠ: ܘܰܒܝܰܕ ܢܒܺܝܰܘ̈ܗ̱ܝ ܘܚܰܘܺܝ ܠܡܶܐܬܺܝܬܶܗ ܦܳܪܽܘܩܳܝܬܳܐ ܟܰܕ ܛܽܘܦܣܳܢܳܐܝ̣ܬ: ܘܒܰܫܪܳܪܳܐ ܕܡܶܫܬܰܕܪܳܢܽܘܬܳܐ ܕܺܐܝܙ̈ܓܰܕܰܘܗ̱ܝ ܫܰܪܺܝܪ̈ܶܐ ܫܰܘܕܰܥ ܠܥܳܠܡܳܐ ܕܗܽܘܝܽܘ ܦܳܪܽܘܩܶܗ: ܘܡ̣ܶܢ ܟܰܕܽܘ ܥܬܺܝܕ ܕܢܺܐܬܶܐ ܠܡܰܘܠܳܕܳܐ ܦܰܓܪܳܢܳܝܳܐ ܗܰܘ ܕܶܐܬܺܝܠܶܕ ܡ̣ܶܢ ܐܰܒܳܐ ܕܠܳܐ ܫܽܘܪܳܝܳܐ: ܘܟܰܕ ܚܶܒ̈ܠܶܐ ܕܝܰܠܕܳܐ ܦܰܓܪܳܢܳܝܳܐ ܡܚܰܐܘܽܘܗ̇ ܠܝܳܠܶܕܬܶܗ ܒܬܽܘܠܬܳܐ ܩܰܕܺܝܫܬܳܐ: ܗܳܝܕܶܝܢ ܝܰܘܣܶܦ ܗܰܘ ܟܺܐܢܳܐ ܘܙܰܕܺܝܩܳܐ: ܟܰܕ ܚܙܳܐ ܠܒܰܛܢܳܐ ܕܰܠܥܶܠ ܡ̣ܶܢ ܡܶܠܬܳܐ: ܐܶܬܪܰܥܺܝ ܗ̱ܘܳܐ ܕܡܰܛܫܝܳܐܝ̣ܬ ܢܶܫܪܶܝܗ̇: ܘܶܐܬܚܙܺܝ ܠܶܗ ܡܰܠܰܐܟܳܐ ܕܡܳܪܝܳܐ ܟܰܕ ܐܳܡܰܪ ܠܶܗ: ܝܰܘܣܶܦ ܠܳܐ ܬܶܕܚܰܠ ܠܡܶܣܰܒ ܠܡܰܪܝܰܡ ܐܰܢ̱ܬܬܳܟ ܐܳܘ ܒܰܪ ܕܰܘܺܝܕ: ܗܰܘ ܓܶܝܪ ܕܡܶܬܺܝܠܶܕ ܒܳܗ̇ ܡ̣ܶܢ ܪܽܘܚܰܐ ܗ̱̇ܘ ܕܩܽܘܕܫܳܐ: ܬܺܐܠܰܕܝ̱ ܕܶܝܢ ܒܪܳܐ ܘܬܶܩܪܶܐ ܫܡܶܗ ܝܶܫܽܘܥ: ܗܰܘ ܕܗ̣ܽܘ ܢܰܚܶܝܘܗ̱ܝ ܠܥܰܡܶܗ ܡ̣ܶܢ ܚܛܳܗܰܝ̈ܗܽܘܢ: ܘܒܰܕܓܽܘܢ ܠܥܺܐܕܳܐ ܗܳܢܳܐ ܩܰܕܺܝܫܳܐ ܕܚܽܘܕܳܬܳܐ ܕܓܶܠܝܳܢܳܐ ܐܰܠܳܗܳܝܳܐ ܡܥܰܕܥܕܺܝܢܰܢ: ܒܗܽܘ̈ܠܳܠܶܐ ܕܪܽܘܚܳܐ ܩܰܕܺܝܫܳܐ ܡܰܙܥܩܺܝܢܰܢ ܘܳܐܡܪܺܝܢܰܢ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܶܐܬܓܠܺܝ ܠܝܰܘܣܶܦ ܙܰܕܺܝܩܳܐ ܘܰܐܢܗܰܪ ܠܰܫܪܳܪܳܐ ܕܗܰܝܡܳܢܽܘܬܶܗ ܫܰܪܺܝܪܬܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܒܶܗ ܐܶܫܬܰܪܪܰܬ݀ ܬܰܪܥܺܝܬܶܗ ܕܰܡܟܺܝܪܳܗ̇ ܕܡܰܪܝܰܡ: ܘܒܶܗ ܕܚܰܩ ܠܟܶܫ̈ܠܶܐ ܘܦܽܘ̈ܠܳܓܶܐ ܡ̣ܶܢ ܪܶܥܝܳܢܶܗ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܰܓܡ̣ܰܪ ܠܘܳܬ ܝܰܘܣܶܦ ܡܣܰܝܒܪܳܢܽܘܬܳܐ: ܘܓܰܢ̱ܒܰܪ ܬܰܪܥܺܝܬܶܗ ܕܝܰܘܣܶܦ ܠܬܶܫܡܶܫܬܳܗ̇ ܕܡܰܠܝܰܬ ܛܰܝܒܽܘܬܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܰܕܠܳܐ ܟܶܫܠܳܐ ܥܒܰܕ ܠܟܺܐܢܳܐ: ܘܰܕܠܳܐ ܒܨܳܬܳܐ ܫܰܪܰܪ ܠܥܺܕܬܳܐ ܩܰܕܺܝܫܬܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܗܰܝܡܢܶܗ ܝܰܘܣܶܦ ܙܰܕܺܝܩܳܐ ܘܰܗܘܳܐ ܗ̱ܘܳܐ ܣܢܺܐܓܪܳܐ ܚܠܳܦܶܝܗ̇ ܕܡܰܠܝܰܬ݀ ܛܰܝܒܽܘܬܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܘܰܥܕܳܐ ܕܡܽܘܠܟ̈ܳܢܶܐ ܫܰܪܺܝܪ̈ܶܐ ܫܰܟܶܢ ܠܝܰܘܣܶܦ ܒܰܪ ܕܰܘܺܝܕ: ܘܠܰܒܶܒ ܠܬܰܪܥܺܝܬܶܗ ܡܶܬܪܰܗܒܳܢܺܝܬܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܙܰܝܢܳܐ ܕܦܽܘܪܩܳܢܳܐ ܐܶܫܬܰܟܰܢ ܠܰܢ ܒܶܗ: ܘܰܙܟܳܐ ܘܚܰܝܶܒ ܠܬܰܪܥܺܝܬܳܐ ܡܰܣܠܰܝܬܳܐ ܕܣܳܢܝܰܝ̈ ܫܪܳܪܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ: ܕܚܶܙܘܶܗ ܡ̣ܶܢ ܡܰܠܰܐܟܳܐ ܗ̱ܘܳܐ: ܘܚܰܕܽܘܬܶܗ ܡ̣ܶܢ ܡܳܪܳܐ ܕܡܰܠܰܐܟ̈ܶܐ ܐܶܬܓܰܡܪܰܬ݀ : ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܰܛܪܰܕ ܠܟܶܫܠܳܐ ܡ̣ܶܢ ܬܰܪܥܺܝܬܶܗ ܕܝܰܘܣܶܦ ܟܺܐܢܳܐ: ܘܰܕܚܰܩ ܠܬܰܪ̈ܥܝܳܬܳܐ ܕܶܐܪ̈ܶܣܺܝܣ ܡ̣ܶܢ ܒܰܛܢܳܐ ܡܳܪܳܢܳܝܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܟܰܕ ܝܰܘܣܶܦ ܚܙܳܝܗ̱ܝ ܡܰܠܰܐܟܳܐܝ̣ܬ ܘܝܶܪܒܰܬ݀ ܢܰܦܫܳܗ̇ ܕܡܰܪܝܰܡ ܒܫܽܘܪܳܪܳܐ ܕܺܝܠܶܗ ܫܰܪܺܝܪܳܐܝ̣ܬ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܟܰܕ ܐܶܬܓܠܺܝ ܠܝܰܘܣܶܦ ܕܰܟܝܳܐܝ̣ܬ ܒܟܺܐܢܽܘܬܳܐ ܘܰܒܩܰܕܺܝܫܽܘܬܳܐ: ܢܰܛܪܳܗ̇ ܠܡܰܠܝܰܬ݀ ܛܰܝܒܽܘܬܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܰܠܡܰܪܝܰܡ ܙܰܡܶܢ ܬܶܗܪܳܐ: ܘܰܠܝܰܘܣܶܦ ܚܰܘܺܝ ܕܘܽܡܳܪܳܐ ܕܠܳܐ ܡܶܬܡܰܠܰܠ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܡ̣ܶܢ ܛܰܝܒܽܘܬܳܐ ܐܰܠܳܗܳܝܬܳܐ ܐܶܫܬܰܪܰܪ: ܘܰܡܠܳܐ ܠܶܒܳܗ̇ ܕܡܰܪܝܰܡ ܪܘܳܙܳܐ ܪܽܘܚܳܢܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܢܰܗܰܪ ܢܰܗܺܝܪܳܐܝ̣ܬ ܠܝܰܘܣܶܦ ܒܪܶܗ ܕܕܰܘܺܝܕ: ܘܢܶܗܪܰܬ݀ ܒܶܗ ܬܰܪܥܺܝܬܶܗ ܕܡܰܠܝܳܐ ܗܘܳܬ݀ ܩܶܢܛܳܐ ܘܣܽܘܪܳܕܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܰܣܗܶܕ ܥܠܰܘܗ̱ܝ ܓܰܒܪܺܐܝܶܠ ܪ̈ܺܝܫܡܰܠܰܐܟܶܐ: ܘܣܰܒܪܳܐ ܛܳܒܳܐ ܐܶܫܬܰܟܰܢ ܠܰܒܪܺܝܬܳܐ ܒܰܫܪܳܪܶܗ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܰܥܒܰܕ ܬܰܪܥܽܘܬܳܐ ܒܶܝܬ ܬܪ̈ܰܝܗܽܘܢ ܓܰܒ̈ܶܐ: ܘܰܥܩܰܪ ܡ̣ܶܢ ܥܺܕܬܳܐ ܩܰܕܺܝܫܬܳܐ ܠܶܐܪ̈ܶܣܺܝܣ ܫܰܩܳܪ̈ܳܬܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܰܠܡܰܪܝܰܡ ܦܰܨܺܝ ܡ̣ܶܢ ܥܫܽܘܩܝܳܐ ܕܛܳܠܽܘ̈ܡܶܐ: ܘܰܦܪܰܩ ܠܝܰܘܣܶܦ ܡ̣ܶܢ ܠܶܫܳܢ̈ܶܐ ܢܰܟܽܘܠܬܳܢ̈ܶܐ ܕܝܽܘܕܳܝ̈ܶܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܨܰܒܬܳܗ̇ ܠܥܺܕܬܶܗ ܒܫܽܘܡܠܳܝܶܗ ܫܰܪܺܝܪܳܐ: ܘܨܰܒܶܬ ܐܳܦ ܠܰܡܗܰܝ̈ܡܢܶܐ ܒܢܶܨܚܳܢܶܗ ܡܥܰܠܝܳܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܩܰܒܠܶܗ ܝܰܘܣܶܦ ܟܺܐܢܳܐ ܚܳܕܝܳܐܝ̣ܬ: ܘܩܰܕܶܫ ܠܬܰܪܥܺܝܬܶܗ ܕܡܰܠܝܳܐ ܟܶܫ̈ܠܶܐ ܘܦܽܘ̈ܠܳܓܶܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܪܺܝܫ ܚܰܝܠܰܘ̈ܳܬܳܐ ܫܡܰܝ̈ܳܢܶܐ ܚܰܘܝܶܗ ܘܪܽܘܚܳܐ ܩܰܕܺܝܫܳܐ ܗܰܘ ܓܳܠܐܷ ܣܬܺܝܪ̈ܳܬܳܐ ܒܰܕܩܶܗ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܫܰܠܚܶܗ ܐܰܒܳܐ ܩܰܕܺܝܫܳܐ ܒܺܐܝ̈ܕܰܝ ܐܺܝܙܓܰܕܶܗ: ܘܫܰܡܠܝܶܗ ܒܪܳܐ ܚܰܒܺܝܒܳܐ ܒܕܶܢܚܳܐ ܕܰܡܕܰܒܪܳܢܽܘܬܶܗ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܬܶܫܒܽܘܚܬܳܐ ܝܰܒܶܒܘ̱ ܒܶܗ ܥܶܠܳܝ̈ܶܐ ܥܰܡ ܬܰܚܬܳܝ̈ܶܐ: ܗܳܢܰܘ ܓܶܠܝܳܢܳܐ ܐܰܠܳܗܳܝܳܐ ܕܬܶܗܪܳܐ ܙܰܡܶܢ ܠܩܰܕܺܝܫܬܳܐ ܡܰܪܝܰܡ ܟܰܕ ܚܙܳܬ݀ ܠܝܰܘܣܶܦ ܠܗܰܘ ܕܰܒܥܽܘܒܳܗ̇ ܣܳܓܶܕ ܒܕܶܚܠܳܐ: ܕܒܶܗ ܡܦܺܝܣܺܝܢܰܢ ܠܳܟ ܡܳܪܝܳܐ ܡܪܰܚܡܳܢܳܐ ܕܬܰܓܶܢ ܝܰܡܺܝܢܳܟ ܡܰܠܝܰܬ݀ ܪ̈ܰܚܡܶܐ: ܘܰܗܘܺܝ ܡܳܪܝ̱ ܠܐܱܒܺܝ̈ܠܶܐ ܡܒܰܝܳܐܢܳܐ: ܘܠܰܒܬܽܘ̈ܠܶܐ ܡܣܰܬܪܳܢܳܐ ܠܓܰܒܪ̈ܶܐ ܡܢܰܛܪܳܢܳܐ: ܠܕܰܝ̈ܳܢܶܐ ܡܗܰܕܝܳܢܳܐ: ܠܗܳܢܽܘܢ ܕܰܒܫܶܒ̈ܝܶܐ ܦܳܪܽܘܩܳܐ ܕܡ̣ܶܢ ܐܽܘܠܨܳܢ̈ܶܐ: ܠܰܦܠܺܝ̈ܓܶܐ ܡܫܰܪܪܳܢܳܐ: ܠܰܐܠܺܝ̈ܨܶܐ ܡܥܰܕܪܳܢܳܐ: ܠܪ̈ܺܝܫܰܝ ܟܳܗ̈ܢܶܐ ܡܚܰܝܠܳܢܳܐ: ܠܟܳܗ̈ܢܶܐ ܡܕܰܟܝܳܢܳܐ: ܠܟܶܢܫܳܐ ܕܰܡܗܰܝ̈ܡܢܶܐ ܟܽܠܗܽܘܢ ܩܳܝܽܘܡܳܐ: ܠܰܐܦܽܘܕܝܰܩ̈ܢܽܘ ܘܠܐܱܦ̈ܣܰܠܛܽܘ ܡܚܰܟܡܳܢܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܡܚܰܣܝܳܢܳܐ ܘܰܡܢܺܝܚܳܢܳܐ: ܘܟܽܠܰܢ ܢܶܫܬܘܶܐ ܕܰܢܫܰܒܚܳܟ: ܥܰܡ ܩܰܕܺܝ̈ܫܰܝܟ ܘܠܰܐܒܽܘܟ ܕܫܰܠܚܳܟ ܠܦܽܘܪܩܳܢܰܢ: ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

ܥܶܛܪܳܐ

ܡܫܺܝܚܳܐ ܐܰܠܳܗܳܐ ܡܶܠܬܶܗ ܕܰܐܒܳܐ ܫܡܰܝܳܢܳܐ: ܕܰܗܘܰܝܬ ܒܰܪܢܳܫܳܐ ܕܠܳܐ ܫܽܘܚܠܳܦܳܐ ܡܶܛܽܠܳܬܰܢ: ܘܰܠܝܰܘܣܶܦ ܟܺܐܢܳܐ ܘܙܰܕܺܝܩܳܐ ܕܰܦܠܺܝܓܳܐ ܗ̱ܘܳܬ ܬܰܪܥܺܝܬܳܐ ܕܺܝܠܶܗ: ܡܶܛܽܠ ܒܰܛܢܳܟ ܐܰܠܳܗܳܝܳܐ: ܒܝܰܕ ܪܺܝܫ ܡܰܠܰܐܟ̈ܶܐ ܫܰܪܰܪܬ: ܫܰܪܰܪ ܡܳܪܝ̱ ܐܳܦ ܠܬܰܪ̈ܥܝܳܬܳܐ ܕܺܝܠܰܢ ܒܗܰܝܡܳܢܽܘܬܳܐ ܬܪܺܝܨܰܬ݀ ܫܽܘܒܚܳܐ ܘܰܒܢܳܛܽܘܪܽܘܬܳܐ ܕܶܝܢ ܕܦܽܘܩܕ̈ܳܢܰܝܟ ܩܰܕܺܝ̈ܫܶܐ: ܘܩܰܒܶܠ ܡ̣ܶܢ ܐܺܝܕܰܝ̈ܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ: ܘܫܰܟܶܢ ܠܰܢ ܒܶܗ ܚܢܳܢܳܐ ܘܪ̈ܰܚܡܶܐ: ܕܒܰܣܺܝܡܽܘܬܳܐ ܕܺܝܠܳܟ: ܡܳܪܰܢ ܘܰܐܠܳܗܰܢ܀

ܚܘ̣ܬܳܡܳܐ

ܝܶܫܽܘܥ ܐܰܠܳܗܳܐ: ܗܰܘ ܕܺܐܝܬܽܘܬܳܐ ܦܫܺܝܛܳܐ ܒܰܟܝܳܢܶܗ: ܘܶܐܬܳܐ ܠܪܽܘܟܳܒܳܐ ܐ̱ܢܳܫܳܝܳܐ ܒܨܶܒܝܳܢܶܗ: ܕܠܰܢ ܢܶܥܒܶܕ ܕܳܡܝ̈ܰܝ ܠܰܐܠܳܗܳܐ ܒܛܰܝܒܽܘܬܶܗ: ܪܰܟܶܒ ܘܚܰܝܶܕ ܠܰܢ ܒܢܰܩܺܝܦܽܘܬܳܐ ܘܒܶܐܣܳܪܳܐ ܕܰܠܘܳܬܳܟ ܕܰܒܒܰܝܬܳܝܽܘܬܳܐ ܢܟܰܬܰܪ: ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ: ܗܳܫܳܐ܀