ܦܪܽܘ̣ܡܝܽܘܢ

ܠܗܰܘ ܕܰܟܣܶܐ ܡ̣ܶܢ ܥܺܝܪ̈ܶܐ: ܘܰܓܢܺܝܙ ܒܰܐܠܳܗܽܘܬܶܗ ܡ̣ܶܢ ܪ̈ܽܘܚܳܢܳܝܶܐ: ܕܶܐܬܳܐ ܠܓܶܠܝܳܐ ܒܝܰܕ ܡܶܬܒܰܪܢܫܳܢܽܘܬܶܗ: ܠܗܰܘ ܕܓܰܒܠܶܗ ܠܳܐܕܳܡ ܡ̣ܶܢ ܥܰܦܪܳܐ: ܘܰܢܦܰܚ ܒܶܗ ܢܫܰܡܬܳܐ ܕܚܰܝ̈ܶܐ: ܠܗܰܘ ܕܓܰܢܒܳܗ̇ ܠܐܘ̣ܪܚܳܐ ܗܳܝ ܕܰܡܕܰܒܪܳܢܽܘܬܶܗ ܡ̣ܶܢ ܣܳܢܳܐܐ ܘܡܰܘܒܕܳܢܳܐ ܕܰܓܒܺܝܠܬܶܗ: ܘܟܰܕ ܨܒܳܐ ܕܢܶܦܪܽܘܩ ܠܒܶܪ̈ܝܳܬܳܐ: ܒܝܰܕ ܣܒܰܪܬܳܐ ܡܰܠܰܐܟܳܝܬܳܐ: ܘܰܣܛܰܪ ܡ̣ܶܢ ܫܰܘܬܳܦܽܘܬܳܐ ܓܰܒܪܳܢܳܝܬܳܐ: ܐܶܬܒܛܶܢ ܒܟܰܪܣܳܐ ܗܳܝ ܕܟܺܝܬܳܐ ܘܩܰܕܺܝܫܬܳܐ ܕܝܳܠܶܕܬܶܗ: ܘܰܠܝܰܘܣܶܦ ܟܺܐܢܳܐ ܗܰܘ ܕܰܗܘܳܐ ܣܶܬܳܪܳܐ ܠܺܝܠܺܝܕܽܘܬܶܗ ܡ̣ܶܢ ܥܫܽܘܩܝܳܐ ܕܝܽܘ̈ܕܳܝܶܐ ܛܳܠܡ̈ܰܝ ܛܰܝܒܽܘܬܳܐ: ܘܰܦܪܰܩ ܘܚܰܪܰܪ ܡ̣ܶܢ ܟܶܫܠܳܐ ܗܰܘ ܕܰܦܠܺܝܓܽܘܬܳܐ ܒܝܰܕ ܓܶܠܝܳܢܳܐ ܕܰܒܡ̈ܶܠܶܐ ܘܥܽܘܩܳܒܳܐ ܕܺܐܝܙܓܰܕܳܐ ܕܫܰܝܢܳܐ: ܘܰܡܫܰܡܫܳܢܳܐ ܕܦܽܘܪܩܳܢܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ: ܒܗܳܢܳܐ܀

ܣܶܕܪܳܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܝܰܠܕܳܐ ܐܺܝܬܝܳܝܳܐ ܕܰܐܒܳܐ ܡܬܽܘܡܳܝܳܐ: ܕܺܝܚܺܝܕܳܐܝ̣ܬ ܠܥܶܠ ܡ̣ܶܢ ܟܽܠ ܗܰܘܢܳܐ ܡܰܕܪܟܳܢܽܘܬܳܐ ܡܶܢ ܐܰܒܳܐ ܝܺܠܺܝܕ ܐܰܢ̱ܬ ܡܬܽܘܡܳܐܝ̣ܬ: ܘܥܰܡ ܪܽܘܚܳܐ ܩܰܕܺܝܫܳܐ ܡܟܰܬܰܪ ܐܰܢ̱ܬ ܥܳܠܡܺܝܢܳܐܝ̣ܬ: ܘܚܳܝ̇ܒܺܝܢ ܟܽܠܗܽܘܢ ܟܝ̈ܳܢܶܐ ܕܢܰܕܪܟܽܘܢ ܠܺܝܠܺܝܕܽܘܬܳܟ ܕܡ̣ܶܢ ܐܰܒܳܐ: ܘܠܰܝܬ ܐ̱ܢܳܫ ܕܝܳܕܰܥ ܠܰܐܒܳܐ ܐܶܠܳܐ ܐܶܢ ܒܪܳܐ: ܘܳܐܦ ܠܰܒܪܳܐ ܐ̱ܢܳܫ ܠܳܐ ܝܳܕܰܥ ܐܶܠܳܐ ܐܶܢ ܐܰܒܳܐ ܗܰܘ ܕܫܰܕܪܶܗ: ܟܰܕ ܕܶܝܢ ܨܒܰܝܬ ܐܳܘ ܡܶܠܬܳܐ ܐܰܠܳܗܳܐ ܕܰܠܨܰܠܡܳܐ ܕܺܝܠܟܳ ܗܰܘ ܕܶܐܬܚܰܒܰܠ ܒܛܽܘܥܝܰܝ ܘܬܽܘܒ ܡ̣ܶܢ ܕܪܺܝܫ ܬܚܰܕܬܺܝܘܗ̱ܝ: ܘܳܐܦ ܠܫܽܘܦܪܶܗ ܩܰܕܡܳܝܳܐ ܬܰܦܢܺܝܘܗ̱ܝ ܠܳܐ ܡܫܰܢܝܳܢܳܐܝ̣ܬ ܘܠܳܐ ܡܶܫܬܰܚܠܦܳܢܳܐܝ̣ܬ: ܫܒܰܩܬ ܪܰܘܡܳܐ ܕܪܰܒܽܘܬܳܟ ܘܥܰܡ ܒܢܰܝ̈ܢܳܫܳܐ ܐܶܬܗܰܦܰܟܬ: ܘܰܠܦܰܓܪܳܐ ܐ̱ܢܳܫܳܝܳܐ ܡ̣ܶܢ ܚܰܛܳܝܽܘܬܰܢ ܠܳܟ ܚܰܝܶܕܬܳܝܗ̱ܝ ܠܳܐ ܡܶܬܦܰܠܓܳܢܳܐܝ̣ܬ ܘܠܳܐ ܡܶܣܬܰܝܟܳܢܳܐܝ̣ܬ: ܘܟܽܠܗܶܝܢ ܡܳܟ̈ܳܬܳܐ ܘܠܳܐ ܥܕܺܝ̈ܠܳܬܳܐ ܕܺܝܠܰܢ ܩܰܒܶܠܬ ܥܠܰܝܟ ܡܕܰܒܪܳܢܳܐܝ̣ܬ: ܐܰܝܟܰܢܳܐ ܕܠܰܟܝܳܢܰܢ ܪܰܦܝܳܐ ܬܫܰܟܶܢ ܬܽܘܒ ܚܰܝܠܬܳܢܽܘܬܳܐ ܘܓܰܢ̱ܒܳܪܽܘܬܳܐ: ܘܟܰܕ ܟܽܠܗܶܝܢ ܕܺܝܠܰܢ ܩܰܒܶܠܬ ܥܠܰܝܟ: ܐܳܦ ܡܰܘܠܳܕܳܐ ܕܺܝܠܰܢ ܡܕܰܒܪܳܢܳܐܝ̣ܬ ܨܒܰܝܬ ܕܬܶܬܺܝܠܶܕ: ܐܶܡܳܐ ܓܒܰܝܬ ܠܳܟ ܡ̣ܶܢ ܛܽܘܗܡܳܐ ܕܐ̱ܢܳܫܽܘܬܰܢ: ܗܳܝ ܕܝܰܬܺܝܪ ܡ̣ܶܢ ܟܽܠܗܶܝܢ ܢܶܩ̈ܒܳܬܳܐ ܡܥܰܠܝܳܐ ܗ̱ܘܳܬ ܘܕܰܟܝܳܐ ܗ̱ܘܳܬ ܘܩܰܕܺܝܫܳܐ ܗ̱ܘܳܬ: ܘܰܣܒܰܪܬܳܐ ܕܶܝܢ ܕܦܽܘܪܩܳܢܳܐ ܒܝܰܕ ܐܺܝܙܓܰܕܽܘܬܳܐ ܕܓܰܒܪܺܐܝܶܠ ܡܰܠܰܐܟܳܐ ܐܰܘܟܺܝܬ ܡܫܰܡܫܳܢܳܐ ܕܰܚܕܰܬܳܐ: ܠܗܳܝ ܕܰܓܒܰܝܬ ܕܬܶܗܘܶܐ ܐܶܡܳܐ ܫܰܕܰܪܬ: ܟܰܕ ܙܗܺܝܪܳܐܝ̣ܬ ܢܰܛܪܶܗ ܠܐ̱ܪܳܙܳܐ ܕܓܰܢܒܳܗ̇ ܠܐܘ̣ܪܚܳܗ̇ ܡ̣ܶܢ ܒܶܠܶܐܝܰܪ ܐܰܘܟܺܝܬ ܕܰܡܚܰܦܝܳܐܝ̣ܬ ܢܶܗܘܶܐ ܒܰܛܢܳܐ: ܘܓܰܠܝܳܐܝ̣ܬ ܢܶܬܓܠܐܷ: ܕܝܰܬܺܝܪ ܕܶܝܢ ܙܗܺܝܪܳܐܝ̣ܬ ܢܰܛܪܳܗ̇ ܠܗܳܝ ܡܶܬܰܐܪܙܳܢܽܘܬܳܐ: ܘܟܰܕ ܣܰܓܺܝ ܚܰܟܺܝܡܳܐܝ̣ܬ ܘܩܰܕܺܝܫܳܐܝ̣ܬ ܒܰܚܢܰܬ݀ ܥܰܡ ܐܺܝܙܓܰܕܳܐ ܡܰܪܝܰܡ ܕܟܺܝܬܳܐ: ܒܳܬܰܪܟܶܢ ܒܬܰܡܺܝܡܽܘܬܳܐ ܫܰܠܡܰܬ݀ ܘܛܰܝܒܰܬ݀ ܗ̣ܺܝ ܠܳܗ̇: ܘܰܒܝܰܕ ܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ ܩܰܒܠܰܬ݀ ܒܰܛܢܳܐ ܠܥܶܠ ܡ̣ܶܢ ܟܝܳܢܳܐ ܘܰܣܛܰܪ ܡ̣ܶܢ ܙܽܘܘܳܓܳܐ: ܟܰܕ ܢܛܺܝܪܺܝܢ ܛܰܒ̈ܥܶܐ ܕܰܒܬܽܘ̈ܠܶܝܗ̇: ܝܰܘܣܶܦ ܕܶܝܢ ܒܰܥܠܳܗ̇ ܟܺܐܢܳܐ ܘܰܡܟܺܝܪܳܐ ܩܰܕܺܝܫܳܐ ܟܰܕ ܐܶܬܓܠܺܝ ܠܶܗ ܐ̱ܪܳܙܳܐ ܕܒܰܛܢܳܐ ܕܰܡܟܺܝܪܬܶܗ ܩܰܕܺܝܫܬܳܐ ܐܶܬܦܰܠܰܓ ܘܶܐܬܡܠܺܝ ܟܶܫܠܳܐ: ܘܡܶܛܽܠ ܟܺܐܢܽܘܬܶܗ ܠܗܳܝ ܕܡܰܛܫܝܳܐܝ̣ܬ ܢܶܫܪܶܝܗ̇ ܐܶܬܪܰܥܺܝ: ܟܰܕ ܕܶܝܢ ܐܶܫܬܰܘܕܥܰܬ݀ ܛܽܘܒܳܢܺܝܬܳܐ ܩܰܕܺܝܫܬܳܐ ܠܗܳܠܶܝܢ: ܐܳܦ ܒܠܽܘܠܝ̈ܳܬܳܐ ܕܚܶܣܕܳܐ ܡܶܫܬܰܦܕܳܐ ܗܘܳܬ݀: ܥܰܝ̈ܢܰܝ ܬܰܪܥܺܝܬܳܗ̇ ܠܐܦܰܝ̈ ܟܰܪܣܳܗ̇ ܐܰܪܺܝܡܰܬ݀ ܟܰܕ ܐܳܡܪܳܐ: ܚܽܘܪ ܡܳܪܝ̱ ܩܰܠܺܝܠܳܐܝ̣ܬ ܒܡܽܘܟܳܟܳܗ̇ ܕܰܐܡܬܳܟ: ܘܰܠܓܰܒܝܳܟ ܕܠܶܗ ܐܰܓܥܶܠܬܳܢܝ̱ ܐܶܩܢܶܐ ܦܝܳܣܳܐ: ܘܠܳܐ ܬܰܗܡܶܐ ܒܰܐܡܬܳܟ: ܕܠܳܐ ܠܰܪܓܽܘܡܝܳܐ ܕܓܰܝܳܪ̈ܳܬܳܐ ܢܰܫܠܡܽܘܢܳܢܝ̱: ܫܰܪܰܪ ܕܶܝܢ ܠܬܰܪܥܺܝܬܶܗ ܕܢܶܗܘܶܐ ܠܺܝ ܩܳܐܶܡ ܒܰܐܦ̈ܶܐ: ܘܰܡܣܰܬܪܳܢܳܐ ܕܠܳܐ ܢܓܰܕܦܰܢܝ̱ ܚܶܣܕܳܐ ܕܝܽܘ̈ܕܳܝܶܐ: ܘܟܰܕ ܗܳܠܶܝܢ ܪܶܬܡܰܬ݀ ܩܰܕܺܝܫܬܳܐ: ܪܡܰܙ ܦܽܘܩܕܳܢܳܐ ܠܡܰܠܰܐܟܳܐ ܕܰܫܠܳܡܳܐ: ܩܰܠܺܝܠܐܝ̣ܬ ܘܰܡܛܳܐ ܨܶܝܕ ܟܺܐܢܳܐ ܒܓܶܠܝܳܢܳܐ ܐܰܠܳܗܳܝܳܐ: ܕܰܡܠܐܷ ܗ̣ܽܘ ܣܰܒܪ̈ܳܬܳܐ ܛܳܒ̈ܳܬܳܐ: ܘܚܰܘܺܝ ܘܰܓܠܐܴ ܟܽܠܗܶܝܢ ܟܰܣ̈ܝܳܬܳܐ: ܘܫܰܝܶܢ ܘܫܰܪܰܪ ܠܬܰܪܥܺܝܬܶܗ ܦܠܺܝܓܬܳܐ: ܡܶܛܽܠܗܳܕܶܐ ܒܡ̈ܶܠܶܐ ܕܬܶܫܒ̈ܚܳܬܳܐ ܕܡܰܠܝ̈ܳܢ ܩܽܘ̈ܠܳܣܶܐ ܡܚܰܓܶܝܢܰܢ ܠܓܶܠܝܳܢܳܐ ܐܰܠܳܗܳܝܳܐ: ܟܰܕ ܡܰܠܝ̈ܳܢ ܢܰܦ̈ܫܳܬܰܢ ܬܶܗܪܳܐ ܘܕܽܘܡܳܪܳܐ ܡܫܰܒܚܺܝܢܰܢ ܟܰܕ ܐܳܡܪܺܝܢܰܢ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܰܐܟܺܝܦܳܐܝ̣ܬ ܐܰܪܶܙ ܕܰܕܠܳܐ ܕܶܚܠܳܐ ܢܶܣܒܺܝܗ̇ ܠܡܰܪܝܰܡ ܐܰܢ̱ܬܬܶܗ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܒܰܣܺܝܡܳܐܝ̣ܬ ܩܰܒܠܶܗ ܝܰܘܣܶܦ ܘܰܐܪܺܝܡ ܡܶܢܶܗ ܠܕܶܚܠܬܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܓܰܠܝܳܐܝ̣ܬ ܚܰܘܺܝ: ܕܗܰܘ ܒܰܛܢܳܐ ܡ̣ܶܢ ܪܽܘܚܰܐ ܗ̱̇ܘ ܕܩܽܘܕܫܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܰܕܢܺܝܚܳܐܝ̣ܬ ܐܶܬܚܙܺܝ ܠܶܗ ܡܰܠܰܐܟܳܐ ܘܰܩܪܳܝܗ̱ܝ ܘܶܐܡ̣ܰܪ ܠܶܗ ܒܰܪ ܕܰܘܺܝܕ ܕܡܶܢܶܗ ܕܢܰܚ ܡܫܺܝܚܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܗܰܕܺܝ ܠܟܺܐܢܳܐ ܠܘܳܬ ܗܳܝ ܕܢܶܕܒܪܺܝܗ̇ ܠܩܰܕܺܝܫܬܳܐ ܐܰܝܟ ܕܰܠܢܳܛܽܘܪܽܘܬܳܐ ܡ̣ܶܢ ܪܓܽܘܡܝܳܐ ܕܝܽܘ̈ܕܳܝܶܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܘܳܠܝܳܐܝ̣ܬ ܥܰܒ̣ܕ݂ܶܗ ܟܰܕ ܩܳܡ ܡ̣ܶܢ ܫܶܢܬܳܐ ܘܕܰܒܪܳܗ̇ ܘܠܳܐ ܚܰܟܡܳܗ̇ ܠܰܕܟܺܝܬܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܙܰܗܝܳܐܝܬ ܘܕܰܟܝܳܐܝ̣ܬ ܚܰܘܝܶܗ ܕܰܡܫܰܡܶܫ ܗ̱ܘܳܐ ܩܽܘܕܡܶܗ ܒܢܰܟܦܽܘܬܳܐ: ܐܳܘ ܓܶܠܝܳܢܳܐ ܐܰܠܳܗܳܝܳܐ ܕܚܰܒܺܝܒܳܐܝ̣ܬ ܘܚܰܣܝܳܐܝ̣ܬ ܐܰܙܺܝܥܶܗ ܠܡܶܫܬܰܥܒܳܕܽܘ ܠܩܰܕܺܝܫܬܳܐ ܒܩܰܕܺܝܫܽܘܬܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܰܛܪܰܕ ܟܽܠ ܡܰܣܒܪܳܢܽܘܬܳܐ ܒܺܝܫܬܳܐ ܘܡܰܚܫܰܒܬܳܐ ܠܳܐ ܕܟܺܝܬܳܐ ܕܥܰܠ ܫܒܺܝܚܬܳܐ ܕܡ̣ܶܢ ܟܽܠ ܒܩܰܕܺܝܫܽܘܬܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܝܰܬܺܝܪ ܡ̣ܶܢ ܩܺܐܒܽܘܬܳܐ ܕܢܳܡܽܘܣܳܐ ܐܰܠܳܗܳܝܳܐ ܒܕܰܟܝܽܘܬܳܐ ܪܰܒܬܐ ܡܶܙܕܗܰܪ ܗ̱ܘܳܐ ܒܳܗ̇: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܟܺܐܢܳܐܝ̣ܬ ܡ̣ܶܢ ܛܰܝܒܽܘܬܳܐ ܐܰܠܳܗܳܝܬܳܐ ܠܰܡܟܺܝܪܳܐ ܡܰܟܺܝܟܳܐ ܐܶܬܡܰܟܪܰܬ݀ : ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܠܳܚܡܳܐܝ̣ܬ ܘܫܰܦܺܝܪܳܐܝ̣ܬ ܠܰܡܒܰܪܰܟܬܳܐ ܠܝܰܘܣܶܦ ܒܰܝܬܺܝ ܗ̱ܘܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܡܰܟܺܝܟܳܐܝ̣ܬ ܫܰܥܒܕܶܗ ܠܟܺܐܢܳܐ ܠܰܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܢܰܗܺܝܪܳܐܝ̣ܬ ܚܰܘܺܝ ܠܟܺܐܢܳܐ ܕܗܽܘܝܽܘ ܗܰܘ ܕܡܰܢܗܰܪ ܠܟܽܠܢܳܫ ܕܳܐܬܶܐ ܠܥܳܠܡܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܣܳܗܕܽܘܬܶܗ ܕܓܰܒܪܺܐܝܶܠ ܡܰܠܰܐܟܳܐ ܘܰܡܫܰܡܫܳܢܳܐ ܕܰܚܕܰܬܳܐ ܫܰܪܪܶܗ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܥܰܡܰܢܽܘܐܶܝܠ ܐܺܝܬܰܘܗ̱ܝ ܗܰܘ ܕܒܰܛܢܳܐ ܕܺܐܝܬܰܘܗ̱ܝ ܥܰܡܰܢ ܐܰܠܳܗܰܢ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܦܳܪܽܘܩܳܐ ܫܰܘܕܥܶܗ ܒܗܳܝ ܕܶܐܡ̣ܰܪ ܕܗ̣ܽܘ ܢܶܦܪܩܺܝܘܗ̱ܝ ܠܥܰܡܶܗ ܡ̣ܶܢ ܚܛܳܗܰܝ̈ܗܽܘܢ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܰܐܨܡܰܚ ܒܬܰܪܥܺܝܬܶܗ ܕܟܺܐܢܳܐ ܘܰܐܢܗܪܶܗ ܘܰܛܪܰܕ ܡܶܢܶܗ ܟܶܫܠܳܐ ܘܰܦܠܺܝܓܽܘܬܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܩܰܕܶܫ ܘܕܰܟܺܝ ܗ̱ܘܳܐ ܠܚܽܘ̈ܫܳܒܰܘܗ̱ܝ ܡ̣ܶܢ ܟܽܠ ܣܒܺܝܪܽܘܬܳܐ ܠܳܐ ܚܣܺܝܬܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܐ̱ܪܳܙܳܢܳܐܝ̣ܬ ܐܶܫܬܰܡܰܫ: ܘܪܽܘܚܳܐ ܩܰܕܺܝܫܳܐ ܓܰܠܝܳܐܝ̣ܬ ܓܠܳܝܗ̱ܝ ܘܚܰܘܝܶܗ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܫܰܝܶܢ ܠܬܰܪܥܺܝܬܶܗ ܕܝܰܘܣܶܦ ܘܒܰܝܳܐܗ̇ ܠܡܰܪܝܰܡ ܛܽܘܒܳܢܺܝܬܳܐ ܒܬܽܘܠܬܳܐ ܩܰܕܺܝܫܬܳܐ: ܐܳܘ ܠܓܶܠܝܳܢܳܐ ܐܰܠܳܗܳܝܳܐ ܕܬܶܗܪܰܐ ܗ̱̇ܘ ܟܽܠܶܗ ܕܽܘܡܳܪܳܐ: ܘܬܰܘܕܺܝܬܳܐ ܝܳܐܶܐ ܗ̱ܘܳܐ ܠܰܢ ܕܰܢܩܰܪܶܒ ܚܠܳܦܰܘܗ̱ܝ ܠܳܟ ܡܫܺܝܚܳܐ ܐܰܠܳܗܰܢ ܘܦܳܪܽܘܩܳܐ ܘܰܡܚܰܪܪܳܢܳܐ ܕܓܶܢܣܰܢ: ܐܳܘ ܪܳܥܝܳܐ ܛܳܒܳܐ ܕܝܰܗܒ ܢܰܦܫܶܗ ܚܠܳܦ ܡܰܪܥܺܝܬܶܗ ܘܚܰܪܪܶܗ ܡ̣ܶܢ ܕܺܐܒ̈ܶܐ ܣܳܪ̈ܽܘܚܶܐ: ܘܡܶܢ ܐܪܝܳܐ ܡܚܰܒܠܳܢܳܐ ܕܰܐܡܺܝܢ ܠܚܽܘܒܳܠܳܗ̇ ܘܠܰܬܒܳܪܳܗ̇: ܘܰܥܕܰܡܳܐ ܠܣܳܟܶܗ ܕܡܽܘܟܳܟܳܐ ܢܚܶܬ ܘܫܰܐܠܶܗ ܡܶܛܽܠ ܦܽܘܪܩܳܢܳܗ̇: ܟܰܕ ܪܰܥܽܘܡܳܐܝ̣ܬ ܡܦܺܝܣܳܐ ܘܡܶܬܟܰܫܦܳܐ ܠܪ̈ܰܚܡܶܐ ܕܺܝܠܳܟ ܡܬܽܘ̈ܡܳܝܶܐ: ܕܬܰܓܶܢ ܥܠܶܝܗ̇ ܝܰܡܺܝܢܳܟ ܘܰܬܣܰܬܪܝ̣ܗ̇ ܘܰܬܗܰܕܪܝ̣ܗ̇ ܒܰܩܠܺܝܪܳܘܣ ܩܰܕܺܝܫܳܐ: ܘܥܰܡܳܐ ܡܫܰܒܚܳܐ ܕܰܒܢܶܝ̈ܗ̇: ܟܰܕ ܗܳܘܶܐ ܐܰܢ̱ܬ ܠܪ̈ܺܝܫܰܝ ܟܳܗ̈ܢܶܐ ܕܒܳܗ̇ ܡܗܰܕܝܳܢܳܐ: ܠܟܳܗ̈ܢܶܐ ܡܙܰܗܝܳܢܳܐ: ܠܰܡܫܰܡ̈ܫܳܢܶܐ ܡܩܰܕܫܳܢܳܐ: ܠܰܐܦܽܘܕ̈ܝܰܩܢܽܘ ܕܶܝܢ ܡܰܢܗܪܳܢܳܐ: ܠܐܱܦܣ̈ܰܠܛܽܘ ܘܩܳܪ̈ܽܘܝܶܐ ܡܕܰܟܝܳܢܳܐ: ܠܣܳܒ̈ܶܐ ܕܶܝܢ ܘܰܛܠܳܝ̈ܶܐ ܡܢܰܛܪܳܢܳܐ: ܘܰܠܓܰܒܪ̈ܶܐ ܥܰܡ ܢܶܫ̈ܶܐ ܡܢܰܟܦܳܢܳܐ: ܠܰܒܬܽܘ̈ܠܶܐ ܘܠܰܡܙܰܘ̈ܓܶܐ ܡܩܰܕܫܳܢܳܐ: ܘܰܠܝܰܬܡ̈ܶܐ ܘܠܰܐܪ̈ܡܠܳܬܳܐ ܩܳܝܽܘܡܳܐ ܘܰܡܬܰܪܣܝܳܢܳܐ: ܠܛܳܥܰܝ̈ܳܐ ܡܰܦܢܝܳܢܳܐ: ܠܰܡܒܰܕܪ̈ܶܐ ܡܟܰܢܫܳܢܳܐ: ܠܰܟܒܺܝ̈ܫܶܐ ܘܰܐܣܺܝܪ̈ܶܐ ܡܚܰܪܪܳܢܳܐ: ܠܬܰܝ̈ܳܒܶܐ ܫܰܪܺܝܪ̈ܶܐ ܡܩܰܒܠܳܢܳܐ: ܠܚܰܛܳܝ̈ܶܐ ܫܳܒܽܘܩܳܐ ܘܰܡܙܰܕܩܳܢܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܕܡܶܢܳܗ̇ ܫܟܶܒܘ̱ ܡܢܺܝܚܳܢܳܐ ܘܰܡܚܰܣܝܳܢܳܐ: ܘܥܰܠ ܟܽܠ ܛܶܟܣܺܝ̈ܢ ܘܬܶܓܡܺܝ̈ܢ ܘܩܰܘ̈ܡܳܢ ܘܡܽܘܫ̈ܚܳܢ ܕܒܳܗ̇ ܡܪܰܚܡܳܢܳܐܝ̣ܬ ܡܰܫܦܰܥ ܐܰܢ̱ܬ ܛܰܝܒ̈ܘܳܬܳܟ ܐܰܝܟܰܢܳܐ ܕܟܽܠܶܗ ܟܺܐܢܳܐܝ̣ܬ: ܬܰܘܕܶܐ ܘܬܶܣܓܽܘܕ ܠܳܟ ܡܳܪܝ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀