ܩܰܕܡܳܝܰܬ݀ ܨܠܽܘ̣ܬܳܐ ܕܫܽܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܪܳܚܶܡ ܐ̱ܢܳܫܳܐ: ܕܰܢܥܰܕܥܶܕ ܒܕܰܟܝܽܘܬܳܐ ܘܰܒܩܰܕܺܝܫܽܘܬܳܐ: ܠܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܝܟ ܣܳܗ̈ܕܶܐ ܫܰܪ̈ܘܳܝܶܐ: ܕܡܶܛܽܠܳܬܳܟ ܐܶܬܩܰܛܰܠܘ̱ ܒܒܶܝܬ ܠܚܶܡ ܡܶܢ ܗܶܪܳܘܕܶܣ ܥܰܘܳܠܳܐ: ܘܥܰܡܗܽܘܢ ܕܫܰܒܪ̈ܶܐ ܫܦܰܝ̈ܳܐ ܘܝܰܠܽܘ̈ܕܶܐ ܬܰܡܺܝ̈ܡܶܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ܀

ܦܪܽܘ̣ܡܝܽܘܢ

ܠܗܰܘ ܝܰܠܕܳܐ ܣܓܺܝܕܳܐ: ܕܡܶܛܽܠܳܬܶܗ ܐܶܬܩܰܛܰܠܘ̱ ܫܰܒܪ̈ܶܐ ܫܦܰܝ̈ܳܐ ܘܰܕܪܰܫܘ̱ ܐܽܘܪܚܳܐ ܠܣܳܗܕܽܘܬܳܐ: ܕܰܠܗܰܘ ܚܰܝܠܳܐ ܠܳܐ ܡܶܬܚܰܣܢܳܢܳܐ ܕܚܰܝܶܠ ܠܝܰܠܽܘ̈ܕܶܐ ܒܪܺܝܪ̈ܶܐ ܕܢܶܙܟܽܘܢ ܠܰܛܪܽܘܢܽܘܬܶܗ ܕܗܶܪܳܘܕܶܣ ܥܰܘܳܠܳܐ: ܠܗܰܘ ܪܺܝܫܳܐ ܕܣܳܗ̈ܕܶܐ ܕܒܰܟܠܺܝܠܳܐ ܕܙܳܟܽܘܬܳܐ ܟܰܠܶܠ ܠܰܒ̈ܢܰܝ ܩܰܘܡܬܶܗ ܕܩܰܪܶܒܘ̱ ܠܶܗ ܕܶܡܗܽܘܢ ܩܽܘܪܒܳܢܳܐ: ܕܰܠܗܽܘܢ ܥܰܡ ܣܳܗ̈ܕܶܐ ܩܰܕܺܝ̈ܫܶܐ ܡܝܰܩܪܺܝܢܰܢ ܒܬܶܫܒ̈ܚܳܬܳܐ ܥܰܡ ܙܽܘܡܳܪ̈ܶܐ ܕܪܽܘܚܳܐ ܩܰܕܺܝܫܳܐ: ܒܗܳܢܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ: ܗܰܘ ܢܽܘܗܪܳܐ ܡܬܽܘܡܳܝܳܐ ܘܡܰܢܗܪܳܢܳܐ ܕܩܰܕܺܝ̈ܫܶܐ: ܘܫܶܡܫܳܐ ܠܳܐ ܡܶܬܦܰܚܡܳܢܳܐ ܕܰܐܬܠܺܝ̈ܛܶܐ ܪ̈ܽܘܚܳܢܳܝܶܐ: ܗܰܘ ܕܐܰܠܶܦܬ ܠܰܢ ܠܥܰܒ̈ܕܶܐ ܕܺܝܠܳܟ ܡܳܟ̈ܶܐ ܘܰܕܠܳܐ ܫܳܘܶܝܢ ܒܝܰܕ ܐܶܘܢܓܶܠܺܝ̈ܰܐ ܕܺܝܠܳܟ ܣܓܺܝ̈ܕܶܐ ܘܡܰܚܝ̈ܳܢܶܐ: ܕܚܽܘܒܳܐ ܪܰܒ ܡ̣ܶܢ ܗܳܢܳܐ ܠܰܝܬ ܕܐ̱ܢܳܫ ܢܣܺܝܡ ܢܰܦܫܶܗ ܚܠܳܦ ܪܳܚܡܶܗ: ܟܰܕ ܐܰܢ̱ܬ ܢܰܦܫܳܟ ܚܠܳܦܰܝܢ ܣܰܪܶܩܬ: ܘܰܕܡܽܘ̣ܬܳܐ ܕܥܰܒܕܳܐ ܢܣܰܒܬ: ܘܰܠܚܰܫ̈ܶܐ ܒܝܰܕ ܨܠܺܝܒܳܐ ܘܡܰܘܬܳܐ ܣܒܰܠܬ: ܕܠܰܢ ܬܶܦܪܽܘܩ ܡ̣ܶܢ ܚܰܫ̈ܶܐ ܕܰܚܛܺܝܬܳܐ ܘܰܕܡܰܘܬܳܐ: ܘܡ̣ܶܢ ܗܳܪܟܳܐ ܡܕܰܡܝ̈ܳܢܶܐ ܕܰܒܡܰܘܬܳܟ ܕܰܚܠܳܦܰܝܢ ܐܶܬܚܰܘܺܝܘ ܣܳܗ̈ܕܶܐ ܩܰܕܺܝ̈ܫܶܐ ܠܚܰܫ̈ܰܝ ܙܰܝܢܳܐ ܕܓܰܢ̱ܒܳܪܽܘܬܳܐ: ܟܰܕ ܒܰܚܘܺܝܚܽܘܬܳܐ ܠܡܰܘܬܳܐ ܕܰܚܠܳܦ ܦܽܘܪܩܳܢܗܽܘܢ ܡܶܬܠܰܒܒܺܝܢ ܗ̱ܘܰܘ: ܟܰܕ ܐܰܘܒܶܕܘ̱ ܢܰܦ̈ܫܳܬܗܽܘܢ ܡܶܛܽܠܳܬܳܟ ܕܠܳܟ ܒܰܠܚܽܘܕܰܝܟ ܢܶܩܢܽܘܢ: ܕܺܐܝܬܰܝܟ ܚܰܝ̈ܶܐ ܫܰܪܺܝܪ̈ܶܐ ܕܰܐܝܠܶܝܢ ܕܒܳܟ ܡܶܬܓܰܘܣܺܝܢ ܘܰܢܝܳܚܬܳܐ ܛܽܘܒܬܳܢܺܝܬܳܐ ܕܰܐܝܠܶܝܢ ܕܡܶܛܽܠ ܚܽܘܒܳܟ ܐܶܬܩܰܛܰܠܘ̱: ܟܰܕ ܠܺܝܠܺܝܕܽܘܬܳܐ ܦܳܪܽܘܩܳܝܬܳܐ ܕܰܚܠܳܦܰܝܢ ܐܶܬܰܝܬ: ܐܰܢ̱ܬ ܕܺܐܝܬܰܝܟ ܣܳܗܕܳܐ ܩܰܕܡܳܝܳܐ ܘܰܡܟܰܠܠܳܢܳܐ ܕܦܳܠܚܰܝ̈ܟ: ܘܠܰܡܓܽܘ̈ܫܶܐ ܒܢ̈ܰܝ ܦܳܪܶܣ ܒܝܰܕ ܚܙܳܬܳܐ ܕܟܰܘܟܒܳܐ ܟܳܪ̈ܽܘܙܶܐ ܩܰܕ̈ܡܳܝܶܐ ܕܐ̱ܪ̈ܳܙܶܐ ܫܒܺܝ̈ܚܶܐ ܕܡܶܬܓܰܠܝܳܢܽܘܬܳܟ ܚܰܘܺܝܬ: ܘܥܰܡ ܩܽܘܪ̈ܒܳܢܶܐ ܡܫܰܘ̈ܕܥܳܢܶܐ ܠܰܐܠܳܗܽܘܬܳܟ ܘܡܰܠܟܽܘܬܳܟ ܘܡܺܝܬܽܘܬܳܟ ܫܰܪܰܪܘ̱: ܘܟܰܕ ܩܰܪܶܒܘ̱ ܠܳܟ ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ: ܗܳܝܕܶܝܢ ܗܶܪܳܘܕܶܣ ܦܳܠܚܳܐ ܕܥܰܘܠܳܐ ܘܕܰܚܛܺܝܬܳܐ: ܠܩܶܛܠܳܐ ܠܳܐ ܢܳܡܽܘܣܳܝܳܐ ܕܰܠܘܳܬ ܫܰܒܪ̈ܶܐ ܟܺܐܢ̈ܶܐ ܥܰܘܳܠܳܐܝ̣ܬ ܐܶܬܦܰܪܰܣ: ܟܰܕ ܒܝܰܕ ܣܰܝܦܳܐ ܠܛܺܝܫܳܐ ܠܫܽܘܦܳܥ ܕܡܳܐ ܕܺܝܠܗܽܘܢ ܚܰܣܝܳܐ ܒܝܰܕ ܚܣܳܡܶܗ ܕܰܒܥܶܠܕܒܳܒܳܐ ܘܩܳܛܶܠ ܐ̱ܢܳܫܳܐ ܐܶܫܰܕ: ܘܠܐܘ̣ܠܝ̈ܳܬܳܐ ܚܢܺܝ̈ܓܳܬܳܐ ܕܶܐܪܰܡܝܳܐ ܗܰܘ ܬܡܺܝܗ ܒܓܶܠܝ̈ܳܢܶܐ ܩܰܕܺܝ̈ܫܶܐ ܥܠܰܘܗ̱ܝ ܢܓܰܕ: ܘܰܠܒܶܟܝܳܐ ܡܰܪܺܝܪܳܐ ܕܪܳܚܶܝܠ ܢܰܟܦܬܳܐ ܘܨܳܝܪܰܬ݀ ܛܽܘܦܣܳܐ ܕܥܺܕܬܳܐ ܩܰܕܺܝܫܬܳܐ ܐܰܙܺܝܥ: ܕܪܳܚܶܝܠ ܠܰܡ ܒܳܟܝܳܐ ܥܰܠ ܒܢܶܝ̈ܗ̇ ܘܠܳܐ ܨܳܒܝܳܐ ܠܡܶܬܒܰܝܳܐܘ̣: ܡܶܛܽܠ ܕܠܳܐ ܐܺܝܬܰܝܗܽܘܢ: ܡܰܢ ܠܳܐ ܢܙܺܝܥ ܩ̈ܳܠܐܶ ܡܰܠܝ̈ܰܝ ܚܰܫܳܐ: ܟܰܕ ܚܳܙܶܐ ܠܐܷܡܗ̈ܳܬܳܐ ܕܰܡܪ̈ܺܝܒܳܢ ܠܩ̈ܳܠܶܐ ܕܒܶܟܝܳܐ ܥܰܠ ܚܰܒܺܝܒܰܝ̈ܗܶܝܢ: ܟܰܕ ܟܶܢ̈ܦܳܬܗܶܝܢ ܠܡܰܘܬܳܐ ܕܰܒܝܰܕ ܣܰܝܦܳܐ ܡܶܫܬܰܠܡܺܝܢ: ܡܰܢ ܠܳܐ ܢܶܒܟܶܐ ܟܰܕ ܚܳܙܶܐ ܝܰܠܽܘ̈ܕܶܐ ܕܠܳܐ ܡܰܡܠܠܐܴ: ܕܠܐܰܦܽܘܦܰܐܣܺܝܣ ܕܡܰܘܬܳܐ ܕܚܺܝ̣ܠܳܐ ܡܶܫܬܰܠܡܺܝܢ ܗ̱ܘܰܘ: ܡܰܢ ܠܳܐ ܢܶܗܘܶܐ ܫܰܘܬܳܦܳܐ ܠܚܰܫܳܐ ܕܶܐܡܗ̈ܳܬܳܐ: ܗܳܢܶܝܢ ܕܶܐܬܚܣܶܠܘ̱ ܡܶܢܗܶܝܢ ܥܽܘܠܰܝ̈ܗܶܝܢ ܒܝܰܕ ܣܰܝܦܳܐ ܕܚܺܝ̣ܠܳܐ: ܘܒܰܕܓܽܘܢ ܟܰܕ ܠܝܰܘܡܳܐ ܗܳܢܳܐ ܕܕܽܘܟܪ̈ܳܢܰܝܗܽܘܢ ܒܩܽܘ̈ܠܳܣܶܐ ܕܰܦܐܷܝܢ ܠܰܟܠܺܝ̈ܠܰܝܗܽܘܢ ܡܚܰܓܶܝܢܰܢ: ܘܰܒܒܰܪ̱ܬ ܩܳܠܳܐ ܕܫܽܘܒܚܳܐ ܡܰܙܥܩܺܝܢܰܢ ܘܳܐܡܪܺܝܢܰܢ: ܛܽܘܒܰܝܟܽܘܢ ܚܕܽܘܓܰܘ̈ܗ̱ܝ ܕܚܰܬܢܳܐ ܫܡܰܝܳܢܳܐ ܡܰܠܟܳܐ ܕܬܶܫܒܽܘܚܬܳܐ: ܛܽܘܒܰܝܟܽܘܢ ܕܰܗܘܰܝܬܽܘܢ ܟܠܺܝ̈ܠܶܐ ܡܰܦܪ̈ܓܶܐ ܒܬܳܓܳܐ ܡܶܬܗܰܘܢܳܢܳܐ: ܛܽܘܒܰܝܟܽܘܢ ܒܢ̈ܰܝ ܡܰܠܟܽܘܬܳܐ ܕܰܗܘܰܝܬܽܘܢ ܣܳܗ̈ܕܶܐ ܕܩܶܛܠܶܗ ܦܳܪܽܘܩܳܝܳܐ ܕܰܡܫܺܝܚܳܐ: ܛܽܘܒܰܝܟܽܘܢ ܗܡܰܝܪ̈ܶܐ ܕܓܰܢܰܬ݀ ܥܕܶܝܢ ܕܒܽܘ̈ܣܳܡܶܐ: ܐܶܠܳܐ ܡܦܺܝܣܺܝܢܰܢ ܠܳܟ ܡܫܺܝܚܳܐ ܦܳܪܽܘܩܰܢ: ܕܰܒܝܰܕ ܕܡܳܐ ܚܰܣܝܳܐ ܘܰܐܬܠܺܝܛܳܐ ܕܰܪ̈ܚܽܘܡܰܝܟ ܕܬܶܬܪܰܥܶܐ ܥܰܠ ܥܺܕܬܳܟ ܩܰܕܺܝܫܬܳܐ: ܘܰܬܫܰܟܶܢ ܠܳܗ̇ ܫܰܝܢܳܐ ܐܰܡܺܝܢܳܐ ܕܡ̣ܶܢ ܠܘܳܬܳܟ: ܘܰܬܒܰܛܶܠ ܡܶܢܳܗ̇ ܠܟܽܠܗܶܝܢ ܐܶܪ̈ܶܣܺܝܣ ܡܚܰܒ̈ܠܳܬܳܐ: ܘܬܰܫܰܪ ܠܳܗ̇ ܫܽܘܘܕܳܝܰܝ̈ܟ ܫܰܪܺܝܪ̈ܶܐ: ܕܡܽܘܟ̈ܠܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇: ܘܥܰܡܗܽܘܢ ܕܣܳܗ̈ܕܰܝܟ ܐܰܫܘܳܐ ܠܰܢ ܕܢܶܚܙܶܐ ܠܥܰܢܺܝ̈ܕܰܝܢ ܒܡܰܠܟܽܘܬܳܟ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܰܐܒܳܐ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ܀

ܥܶܛܪܳܐ

ܩܰܒܶܠ ܡܳܪܝ̱ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܠܳܟ ܒܗܳܢܳܐ ܝܰܘܡܳܐ ܕܕܽܘܟܪܳܢܳܐ ܕܰܚܕܽܘ̈ܓܰܝܟ: ܫܰܒܪ̈ܶܐ ܒܪܺܝܪ̈ܶܐ: ܘܢܶܬܩܰܪܰܒ ܡܶܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܠܐܝܩܳܪܳܐ ܕܡܳܪܽܘܬܳܟ: ܐܰܝܟ ܕܡܳܐ ܚܰܣܝܳܐ ܕܝܰܠܽܘ̈ܕܶܐ ܕܶܐܬܕܰܫܰܢ ܒܰܟܳܪܳܐܝ̣ܬ ܠܡܰܠܟܽܘܬܳܟ: ܘܰܥܒܶܕ ܠܰܢ ܡܕܰܡ̈ܝܳܢܶܐ ܕܰܪ̈ܚܽܘܡܰܝܟ: ܘܰܕܢܶܬܩܰܪܰܒ ܚܠܳܦ ܫܡܳܐ ܕܺܝܠܳܟ ܩܰܕܺܝܫܳܐ ܕܶܒܚܳܐ ܡܪܰܥܝܳܢܳܐ: ܕܢܶܬܒܰܣܰܡ ܒܰܓܢܽܘܢܳܟ ܘܢܶܫܬܘܶܐ ܠܪ̈ܰܚܡܶܐ ܕܺܝܠܳܟ: ܗܳܫܳܐ܀

ܚܘ̣ܬܳܡܳܐ

ܝܰܠܕܳܐ ܕܡܶܛܽܠ ܝܰܠܕܶܗ ܐܶܬܩܰܛܰܠܘ̱ ܝܰܠܽܘ̈ܕܶܐ ܬܰܡܺܝ̈ܡܶܐ: ܘܰܚܠܳܦܰܘܗ̱ܝ ܐܶܬܢܟܶܣܘ̱ ܫܰܒܪ̈ܶܐ ܙܥܽܘܪ̈ܶܐ ܒܢܰܝ̈ ܩܰܘܡܬܳܐ ܕܬܰܪܒܺܝܬܶܗ: ܥܒܶܕ ܕܽܘܟܪܳܢܗܽܘܢ ܠܒܽܘܪܟܬܳܐ ܕܥܰܡܳܟ ܘܝܰܩܰܪ ܠܰܡܝܰܩܪ̈ܳܢܶܐ ܕܥܰܕܥܺܐܕ̈ܶܐ ܕܺܝܠܗܽܘܢ ܒܛܳܒ̈ܳܬܳܐ ܕܡ̣ܶܢ ܒܶܝܬ ܓܰܙܳܟ: ܕܰܐܟܚܕܳܐ ܢܫܰܒܚܳܟ: ܘܠܰܐܒܽܘܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ܀