ܩܰܕܡܳܝܰܬ݀ ܨܠܽܘ̣ܬܳܐ ܕܫܽܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ: ܕܥܰܡ ܥܺܝܪ̈ܰܝ ܪܰܘܡܳܐ ܢܗܰܠܶܠ ܘܰܢܙܰܡܰܪ ܠܳܟ ܗܽܘ̈ܠܳܠܶܐ ܕܟܰܝ̈ܳܐ ܘܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܘܥܰܡ ܪ̈ܳܥܰܘܳܬܐ ܢܶܣܓܽܘܕ ܠܳܟ ܣܶܓܕܬܳܐ ܫܰܪܺܝܪܬܳܐ: ܘܥܰܡ ܡܓܽܘ̈ܫܶܐ ܢܶܬܗܰܪ ܒܳܟ ܘܳܐܦ ܢܫܰܒܚܳܟ: ܒܗܳܢܳܐ ܝܰܘܡܳܐ ܕܡܰܘܠܳܕܳܟ ܫܒܺܝܚܳܐ ܕܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܠܗܰܘ ܝܰܠܕܳܐ ܡܬܽܘܡܳܝܳܐ: ܕܡܶܛܽܠ ܦܽܘܪܩܳܢܰܢ ܐܶܬܳܐ ܠܡܰܘܠܳܕܳܐ ܦܰܓܪܳܢܳܝܳܐ ܕܡ̣ܶܢ ܒܬܽܘܠܬܳܐ ܡܰܠܝܰܬ݀ ܛܰܝܒܽܘܬܳܐ: ܗܰܘ ܕܓܰܒܪܺܐܝܶܠ ܣܰܒܰܪ ܠܐ̱ܪܳܙܳܐ ܕܒܰܛܢܶܗ ܠܰܒܬܽܘܠܬܳܐ: ܘܰܢܒܺܝ̈ܶܐ ܐܰܟܪܶܙܘ̱ ܡܶܐܬܺܝܬܶܗ: ܗܰܘ ܕܰܫܠܺܝ̈ܚܶܐ ܝܰܒܶܠܘ̱ ܣܒܰܪܬܶܗ: ܘܰܡܓܽܘ̈ܫܶܐ ܪܗܶܛܘ̱ ܠܣܶܓܕܬܶܗ: ܗܰܘ ܕܪ̈ܳܥܰܘܳܬܳܐ ܐܶܬܬܰܒܪܰܩܘ̱ ܗ̱ܘܰܘ ܒܬܶܫܒܽܘܚܬܶܗ ܘܳܐܦ ܥܳܠܡܳܐ ܟܽܠܶܗ ܚ̣ܝܳܐ ܒܕܶܢܚܶܗ: ܕܠܶܗ ܝܳܐܶܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܝܰܠܕܳܐ ܩܰܕܡܳܝܳܐ ܕܰܐܒܳܐ ܡܬܽܘܡܳܝܳܐ: ܘܰܫܘܶܐ ܒܽܐܘܣܺܝܰܐ ܠܝܳܠܽܘܕܶܗ ܘܰܠܪܽܘܚܶܗ ܩܰܕܺܝܫܳܐ: ܗܰܘ ܕܡܶܛܽܠ ܕܠܳܐ ܡܶܣܬܰܝܟܳܐ ܛܳܒܽܘܬܳܟ: ܘܠܳܐ ܡܶܬܡܰܫܚܳܐ ܡܪܰܚܡܳܢܽܘܬܳܟ ܘܠܳܐ ܡܶܬܬܟܺܝܠܳܐ ܪܶܚܡܰܬ݀ ܐ̱ܢܳܫܽܘܬܳܟ: ܕܰܨܒܰܝܬ ܕܬܶܦܪܽܘܩ ܠܨܰܠܡܳܐ ܠܪܰܒܽܘܬܳܟ: ܒܡܶܬܢܰܚܬܳܢܽܘܬܳܟ ܘܺܝܠܺܝܕܽܘܬܳܟ ܕܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܟܰܕ ܒܗܳܕܶܐ ܫܰܡܠܺܝܬ ܐ̱ܪܳܙܳܐ ܕܦܽܘܪܩܳܢܳܐ ܕܓܶܢܣܳܐ ܕܺܝܠܰܢ ܚܰܠܳܫܳܐ ܘܟܳܪܽܘܙܽܘܬܳܐ ܕܰܢܒܺܝ̈ܶܐ: ܘܒܰܕܓܽܘܢ ܟܰܕ ܠܥܺܐܕܳܐ ܗܳܢܳܐ ܕܚܽܘܕܳܬܳܐ ܕܺܝܠܳܟ ܕܡ̣ܶܢ ܒܬܽܘܠܬܳܐ ܡܥܰܕܥܕܺܝܢܰܢ: ܒܚܽܘ̈ܓܳܝܶܐ ܕܪܽܘܚܳܐ ܩܰܕܺܝܫܳܐ ܐܳܡܪܺܝܢܰܢ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܺܝܠܺܝܕ ܡ̣ܶܢ ܐܰܒܳܐ ܕܠܳܐ ܫܽܘܪܳܝܳܐ: ܘܶܐܬܺܝܠܶܕ ܡܶܢ ܡܰܪܝܰܡ ܒܫܽܘܠܳܡ ܙܰܒ̈ܢܶܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܰܒܡܰܘܠܳܕܶܗ ܕܡ̣ܶܢ ܐܰܒܳܐ ܠܳܐ ܡܶܬܕܪܶܟ: ܘܰܒܡܰܘܠܳܕܶܗ ܕܡ̣ܶܢ ܡܰܪܝܰܡ ܠܳܐ ܡܶܬܕܪܶܟ ܘܠܳܐ ܡܶܬܕܰܪܰܫ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܓܰܒܪܺܐܝܶܠ ܩܪܳܝܗ̱ܝ ܕܽܘܡܳܪܳܐ ܘܡܳܪܝܳܐ: ܘܓܽܘ̈ܕܶܐ ܕܡܰܠܰܐܟ̈ܶܐ ܟܽܠܗܽܘܢ ܝܰܒܶܒܘ̱ ܫܽܘܒܚܳܐ ܚܰܕܬܳܐ ܠܡܰܠܟܳܐ ܕܶܐܬܺܝܠܶܕ ܡ̣ܶܢ ܐܰܒܳܐ ܡܫܰܒܚܳܐ ܘܰܕܠܳܐ ܙܽܘܘܳܓܳܐ ܐܶܬܺܝܠܶܕ ܡ̣ܶܢ ܐܶܡܳܐ ܒܬܽܘܠܬܳܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܰܗܘܳܐ ܠܰܢ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ: ܘܰܗܘܳܐ ܬܰܪܥܳܐ ܕܰܡܗܰܕܶܐ ܠܰܢ ܠܘܳܬ ܐܰܒܽܘܗ̱ܝ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܘܰܥܶܕ ܡܓܽܘ̈ܫܶܐ ܠܐܝ̣ܩܳܪܳܐ ܕܣܶܓܕܬܶܗ ܘܰܩܪܳܐ ܠܥܰܡ̱̈ܡܶܐ ܘܠܐܷܡܘ̈ܳܬܳܐ ܠܰܫܪܳܪܳܐ ܕܗܰܝܡܳܢܽܘܬܳܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܙܺܝܘܳܐ ܕܬܶܫܒܽܘܚܬܳܐ ܐܰܨܡܰܚ ܥܰܠ ܪ̈ܳܥܰܘܳܬܳܐ ܒܒܶܝܬ ܠܚܶܡ: ܘܙܰܗܪܳܐ ܕܟܰܘܟܒܶܗ ܢܳܓܶܕ ܗ̱ܘܳܐ ܠܰܡܓܽܘ̈ܫܶܐ ܒܢܰܝ̈ ܦܳܪܶܣ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܰܚܙܳܝܗ̱ܝ ܚܰܙܩܺܝܶܐܝܠ ܥܰܠ ܟܽܘܪܣܝܳܐ ܕܰܩܪܽܘܣܛܶܠܳܘܣ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܰܚܙܳܝܗ̱ܝ ܕܳܢܺܝܶܐܝܠ ܒܟܽܘܪܣܝܳܐ ܕܓܰܐܝܽܘܬܶܗ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܰܛܠܺܝܬܳܐ ܝܺܠܶܕܬܶܗ ܠܥܶܠ ܡ̣ܶܢ ܡܶܠܬܳܐ ܘܰܛܪܰܕ ܚܶܫܟܳܐ ܕܛܽܘܥܝܰܝ ܡ̣ܶܢ ܟܽܠܶܗ ܥܳܠܡܳܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܝܰܠܕܶܗ ܐܰܒܳܐ ܕܠܳܐ ܫܽܘܪܳܝܳܐ ܘܺܝܥܳܐ ܘܰܣܠܶܩ ܡ̣ܶܢ ܐܰܪܥܳܐ ܨܗܺܝܬܳܐ: ܡܰܪܝܰܡ ܒܫܽܘܠܳܡ ܙܰܒ̈ܢܶܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܝܰܠܕܶܗ ܐܰܒܳܐ ܕܠܳܐ ܫܽܘܪܳܝܳܐ: ܘܰܒܬܽܘܠܬܳܐ ܐܰܫܘܰܚܬܶܗ ܠܥܶܠ ܡ̣ܶܢ ܟܝܳܢܳܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܟܰܕ ܐܶܬܺܝܠܶܕ ܡ̣ܶܢ ܐܰܒܳܐ ܐܰܠܳܗܰܐ ܗ̱̇ܘ ܘܒܰܪ ܐܰܠܳܗܳܐ: ܘܟܰܕ ܐܶܬܺܝܠܶܕ ܐ̱ܢܳܫܳܐܝ̣ܬ ܠܳܐ ܐܶܫܬܰܚܠܰܦ ܡ̣ܶܢ ܗܳܝ ܕܺܐܝܬܰܘܗ̱ܝ ܐܰܠܳܗܳܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܰܠܥܳܠܡܳܐ ܐܰܢܗܰܪ ܒܕܶܢܚܶܗ: ܘܠܰܒܬܽܘ̈ܠܶܐ ܕܶܐܡܶܗ ܠܳܐ ܫܪܳܐ ܒܡܰܘܠܳܕܶܗ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܡ̣ܶܢ ܐܽܘܣܺܝܰܐ ܕܰܐܒܳܐ ܐܶܬܺܝܠܶܕ ܕܶܝܢ ܡܬܽܘܡܳܐܝ̣ܬ: ܘܡ̣ܶܢ ܒܶܝܬ ܠܚܶܡ ܕܢܰܚ ܡܕܰܒܪܳܢܳܐܝ̣ܬ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܰܢܒܺܝ̈ܶܐ ܩܰܕܶܡܘ̱ ܐܰܟܪܙܽܘܗ̱ܝ ܘܢܽܘܪ̈ܳܢܶܐ ܝܰܒܶܒܘ̱ ܬܶܫܒܽܘܚܬܶܗ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܰܣܒܰܪܬܶܗ ܐܶܬܟܰܪܙܰܬ݀ ܒܰܫܠܺܝ̈ܚܶܐ: ܘܣܰܒܪܳܐ ܛܳܒܳܐ ܫܰܟܶܢ ܠܟܽܠܶܗ ܟܝܳܢܳܐ ܐ̱ܢܳܫܳܝܳܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܥܰܠܘ̱ ܘܰܣܓܶܕܘ̱ ܠܶܗ ܪ̈ܳܥܰܘܳܬܳܐ ܘܰܡܓܽܘ̈ܫܶܐ ܒܒܶܝܬ ܠܚܶܡ ܕܺܝܗܽܘܕܳܐ: ܘܥܺܝܪ̈ܶܐ ܫܡܰܝ̈ܳܢܶܐ ܡܠܐܱܘܽܘܗ̇ ܠܰܡܥܰܪܬܳܐ ܝܽܘܒܳܒܳܐ ܕܫܽܘܒܚܳܐ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܦܰܓܪܳܐ ܐܶܬܥܰܛܰܦ ܡܶܢܰܢ ܘܦܽܘܪܩܳܢܳܐ ܫܰܟܶܢ ܠܰܢ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܨܶܝܕ ܐܰܪ̈ܥܳܢܶܐ ܕܢܰܚ ܒܝܰܕ ܕܶܐܬܪܟܶܢ ܒܛܰܝܒܽܘܬܶܗ: ܕܰܨܒܳܐ ܕܢܶܦܪܽܘܩ ܠܓܶܢܣܳܐ ܐ̱ܢܳܫܳܝܳܐ ܒܡܶܐܬܺܝܬܶܗ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܩܰܒܶܠ ܕܢܶܬܺܝܠܶܕ ܝܰܠܕܳܐ ܬܪܰܝܳܢܳܐ ܡܶܛܽܠ ܪܶܚܡܰܬ݀ ܐ̱ܢܳܫܽܘܬܶܗ: ܘܩܽܘܪ̈ܒܳܢܶܐ ܫܦܰܪ ܠܶܗ ܕܰܢܩܰܒܶܠ ܒܡܰܘܠܳܕܶܗ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܪܺܝܫ ܚܰܝܠܰܘ̈ܳܬܳܐ ܫܡܰܝ̈ܳܢܶܐ ܣܰܒܰܪ ܒܰܛܢܶܗ: ܘܪܽܘܡܪܳܡܳܐ ܠܥܺܕܬܶܗ ܫܰܟܶܢ ܒܺܝܠܺܝܕܽܘܬܶܗ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܫܰܒܰܚܘ̱ ܫܡܰܝ̈ܳܢܶܐ ܘܰܐܪ̈ܥܳܢܳܝܶܐ ܠܺܝܠܺܝܕܽܘܬܶܗ: ܘܰܫܪܳܐ ܣܝܳܓܳܐ ܕܰܒܥܶܠܕܒܳܒܽܘܬܳܐ ܒܡܶܬܓܰܠܝܳܢܽܘܬܶܗ: ܗܳܢܰܘ ܝܰܠܕܳܐ ܦܳܪܽܘܩܳܝܳܐ ܕܬܶܫܒܽܘܚܬܳܐ ܪܰܒܬܳܐ ܐܶܬܡܰܠܝܰܬ݀ ܟܽܠܳܗ̇ ܒܪܺܝܬܳܐ ܒܡܰܘܠܳܕܶܗ: ܘܬܶܗܪܳܐ ܐܶܬܡܠܺܝܘ ܫܡܰܝ̈ܳܢܶܐ ܒܡܶܬܢܰܚܬܳܢܽܘܬܶܗ: ܕܠܶܗ ܡܦܺܝܣܺܝܢܰܢ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܕܰܢܫܰܟܶܢ ܠܰܢ ܒܪܶܚܡܰܬ ܐ̱ܢܳܫܽܘܬܶܗ ܫܰܝܢܳܐ ܘܰܫܠܳܡܳܐ ܕܡܶܢܶܗ: ܟܰܕ ܡܒܰܝܰܐܐ ܠܰܢ ܒܣܰܒܪܶܗ: ܘܓܳܡܰܪ ܠܰܢ ܒܰܚܢܳܢܶܗ: ܘܰܡܕܰܒܰܪ ܠܰܢ ܒܰܡܪܰܚܡܳܢܽܘܬܶܗ: ܘܰܡܗܰܕܶܐ ܠܰܢ ܒܽܐܘܪܚܶܗ: ܘܡܰܘܕܶܐ ܒܰܢ ܒܡܶܐܬܺܝܬܶܗ: ܘܡܰܫܘܶܐ ܠܰܢ ܠܰܓܢܽܘܢܶܗ: ܘܰܡܚܰܕܶܐ ܠܰܢ ܘܰܠܥܰܢܺܝ̈ܕܰܝܢ ܒܡܰܠܟܽܘܬܶܗ ܘܰܡܒܰܣܶܡ ܠܰܢ ܒܫܽܘܒܚܳܐ ܕܪܰܒܽܘܬܶܗ: ܘܕܰܐܒܽܘܗ̱ܝ ܘܰܕܪܽܘܚܶܗ ܩܰܕܺܝܫܳܐ ܗܳܫܳܐ܀

ܥܶܛܪܳܐ

ܫܽܘܒܚܳܐ ܠܳܟ ܡܫܺܝܚܳܐ ܦܺܝܪܡܳܐ ܕܬܰܪܥܽܘܬܳܐ ܕܰܡܚܳܐ ܪܺܝܚܶܗ ܒܗܶܪ̈ܽܘܡܶܐ ܠܐܝ̣ܩܳܪܶܗ: ܘܬܰܘܕܺܝܬܳܐ ܠܳܟ ܥܶܩܳܪܳܐ ܒܪܺܝܟܳܐ ܕܺܝܥܳܐ ܘܰܣܠܶܩ ܡ̣ܶܢ ܐܰܪܥܳܐ ܨܗܺܝܬܳܐ ܡܰܪܝܰܡ: ܘܣܳܩܽܘܗ̱ܝ ܡܺܝ̈ܬܶܐ ܘܰܚܝܰܘ ܒܶܗ: ܒܰܪܶܟ ܐܶܢܽܘܢ ܡܳܪܝ̱ ܠܒܶܣ̈ܡܶܐ ܗܳܠܶܝܢ ܐܰܝܟ ܕܰܐܗܪܽܘܢ ܘܠܶܘܳܝ̈ܶܐ ܒܬܶܫܡ̈ܫܳܬܳܐ ܕܺܝܠܗܽܘܢ ܐܰܝܟܰܢܳܐ ܕܟܰܕ ܦܳܐܰܚ ܒܰܢ ܪܺܝܚܳܐ ܚܰܠܝܳܐ ܕܒܰܣܺܝܡܽܘܬܳܟ: ܕܢܰܘܕܶܐ ܘܢܶܣܓܽܘܕ ܘܰܢܫܰܒܚܳܟ: ܒܥܺܕܬܳܐ ܕܺܝܠܳܟ ܩܰܕܺܝܫܬܳܐ ܦܪܺܝܩܰܬ݀ ܒܰܨܠܺܝܒܳܟ ܙܰܟܳܝܳܐ ܘܦܳܪܽܘܩܳܝܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀