ܨܠܽܘܬܳܐ ܕܫܽܘܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܢܶܗܘܶܐ ܗܶܪܓܰܢ ܘܗܽܘܓܳܝܰܢ ܒܢܳܡܽܘ̈ܣܰܝܟ ܐܰܠܳܗܳܝ̈ܶܐ: ܗܰܒܠܰܢ ܕܢܰܦܪܶܓ ܒܝܰܘܡܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ: ܘܢܶܗܘܶܐ ܠܰܢ ܥܺܐܕܳܐ ܕܚܰܕܽܘܬܳܐ ܘܕܰܕܝܳܨܳܐ ܘܢܶܠ̇ܒܰܫ ܒܶܗ ܚܽܘܕܳܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܘܰܢܣܺܝܡ ܣܰܢܘܰܪܬܳܐ ܕܦܽܘܪܩܳܢܳܐ ܥܰܠ ܪ̈ܺܝܫܰܝܢ ܘܒܳܗ̇ ܢܰܩ̇ܪܶܒ ܠܽܘܩܒܰܠ ܓܶܐܪ̈ܰܘܗ̱ܝ ܫܢܺܝ̣̈ܢܶܐ ܕܳܐܟܶܠܩܰܪܨܳܐ: ܘܢܶܫܟܰܚ ܒܺܐܝ̈ܕܰܝܟ ܓܗܳܝܬܳܐ ܡܫܰܡܠܳܝܬܳܐ ܡܶܢ ܦܰܚܘ̈ܗ̱ܝ ܡܰܘܒܕܳܢ̈ܶܐ ܡܳܪܰܢ ܘܰܐܠܳܗܰܢ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܢܽܘܗܪܳܐ ܪܺܝܫܳܝܳܐ ܘܠܐܴ ܡܶܬܩܰܪܒܳܢܳܐ ܠܗܰܘ ܕܽܘܡܳܪܳܐ ܠܐܴ ܡܶܬܕܰܪܟܳܢܳܐ ܠܗܰܘ ܕܽܘܡܳܪܳܐ ܠܐܴ ܡܶܬܕܰܪܟܳܢܳܐ ܠܐܴ ܡܶܣܬܰܝܟܳܢܳܐ: ܠܗܰܘ ܕܐܳܠܶܦ ܐܰܠܦܺܝ̣̈ܢ ܕܥܺܝܪ̈ܶܐ ܘܡܰܠܐܱܟ̈ܶܐ: ܘܪ̈ܶܒܽܘ ܪ̈ܶܒܘܳܢ ܕܪ̈ܺܝܫܰܝ ܡܰܠܐܱܟ̈ܶܐ ܡܫܰܡܫܺܝܢ ܠܶܗ: ܘܟܽܠܗܽܘܢ ܣܶܕܪ̈ܶܐ ܘܛܶܟ̈ܣܶܐ ܫܬܺܝܬܳܝ̈ܰܝ ܓܶܦ̈ܶܐ ܘܣܰܓܺܝ̈ܰܐܝ ܥܰܝ̈ܢܶܐ ܛܥܺܝ̈ܢܰܝ ܡܰܪܟܰܒܬܶܗ ܘܰܡܙܰܝ̈ܚܰܝ ܠܪܰܒܽܘܬܶܗ: ܗܰܘ ܕܰܒܝܰܕ ܐܽܘܣܺܝܰܐ ܕܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܡܶܣܬܓܶܕ ܘܡܶܫܬܰܒܰܚ ܡܶܢ ܟܽܠܗܽܘܢ ܒܶܪ̈ܝܳܬܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܕܝܰܘܡܳܢܳܐ ܠܰܩܝܳܡܬܳܐ ܕܺܝܠܳܟ ܡܥܰܕܥܕܺܝܢܰܢ: ܘܰܠܢܽܘܚܳܡܳܟ ܕܡܶܢ ܒܶܝܬ ܡܺܝ̈ܬܳܐ ܠܰܡܚܰܓܳܝܽܘ ܒܡܰܕ̈ܥܰܝܢ ܩܰܒܶܠܢܰܢ: ܗܳܢܳܐ ܕܒܶܗ ܢܶܫ̈ܶܐ ܩܰܕܺܝ̈ܫܳܬܳܐ ܥܰܡ ܒܶܣ̈ܡܶܐ ܛܳܒ̈ܶܐ ܘܗܶܪ̈ܽܘܡܶܐ ܠܘܳܬ ܩܰܒܪܳܟ ܝܰܩܺܝܪܳܐ ܐܶܬܘܰܥܰܕ̈ܝ̱ ܗ̱ܘ̈ܰܝ: ܘܥܰܠ ܩܝܳܡܬܳܟ ܡܫܰܒܰܚܬܳܐ ܕܡܶܢ ܩܰܒܪܳܐ ܒܰܕܶܩ̈ܝ̱ ܗ̱ܘ̈ܰܝ: ܘܗܶܢܶܝܢ ܠܘܳܬ ܫܠܺܝ̈ܚܶܐ ܪ̈ܗܶܛܝ̱ ܠܰܡܣܰܒܳܪܽܘ ܟܰܕ ܐܳܡܪ̈ܳܢ ܬܳܝܶܝ̈ܢ ܚܙܳܝܶܝ̈ܢ ܠܫܰܠܗܶܒܺܝܬܳܐ ܕܢܽܘܪܳܐ ܡܶܢ ܡܰܠܐܱܟ̈ܶܐ ܐܶܬܶܐܡܰܪܘ̱ ܠܗܶܝܢ ܕܩܳܡ ܚܰܝܳܐ ܡܶܢ ܒܶܝܬ ܡܺܝ̈ܬܶܐ: ܘܠܰܝܬܰܘܗ̱ܝ ܬܢܳܢ: ܘܗ̣ܶܢܶܝܢ ܟܰܕ ܐܶܫܬܰܘܕܰܥ̈ܝ̱ ܗ̱ܘ̈ܰܝ ܪ̈ܗܶܛܝ̱ ܒܚܰܕܽܘܬܳܐ ܘܠܰܫܠܺܝ̈ܚܶܐ ܕܰܒܛܽܘܫ̈ܝܳܬܳܐ ܘܒܰܟܡܺܐܢ̈ܶܐ ܙܪܺܝܒܺܝܢ ܗ̱ܘܰܘ ܘܶܐܡܰܪ̈ܝ̱: ܫܠܳܡܳܐ ܥܰܡܟܽܘܢ ܐ̱ܢܳܫ̈ܳܐ ܕܰܚܽܘܠܬܳܢ̈ܶܐ: ܣܒܰܪܬܳܐ ܥܠܰܝܟܽܘܢ ܫܠܺܝ̈ܚܶܐ ܓܒܰܝ̈ܳܐ ܕܩܳܡ ܠܶܗ ܪܰܒܟܽܘܢ ܡܶܢ ܩܰܒܪܳܐ: ܣܒܰܪܬܳܐ ܥܠܰܝܟܽܘܢ ܐ̱ܢܳܫ̈ܳܐ ܩܰܢܺܝ̣̈ܛܶܐ ܕܰܒܛܽܘܫ̈ܝܳܬܳܐ ܙܪܺܝܒܺܝܢ ܐܢ̱ܬܽܘܢ: ܬܰܘ ܦܽܘܩܘ ܡܶܢ ܟܡܺܐܢܰܝ̈ܟܽܘܢ: ܘܙܶܠܘ̱ ܣܰܒ̣ܰܪܘ̱ ܣܒܰܪܬܳܐ ܕܦܽܘܪܩܳܢܳܐ ܠܟܽܠܳܗ̇ ܒܪܺܝܬܳܐ: ܒܰܪ̈ܩܶܐ ܓܽܘܙܰܠܬܳܢܳܝ̈ܶܐ ܡܶܢ ܩܰܒܪܶܗ ܢܳܦܩܺܝܢ ܚ̣ܙܰܝܢ: ܢܳܛܽܘܪ̈ܶܐ ܟܰܕ ܥܰܪܺܝܩܺܝܢ ܘܰܪܬܺܝܬܺܝܢ ܘܰܠܥܰܡܳܐ ܕܝܽܘܕܳܝ̈ܶܐ ܡܚܰܣܕܺܝܢ ܘܳܐܡܪܺܝܢ: ܕܗܰܘ ܓܰܒܪܳܐ ܕܰܙܩܰܦ̣ܬܽܘܢ ܘܰܩ̣ܛܰܠܬܽܘܢ ܘܰܩܒ̣ܰܪܬܽܘܢ ܩܳܡ ܠܶܗ ܒܙܳܟܽܘܬܳܐ ܡܶܢ ܩܰܒܪܳܐ: ܘܠܐܴ ܝܳܕܥܺܝܢܰܢ ܐܰܝܟܰܘ: ܠܰܫܡܰܝܳܐ ܣܠ̣ܶܩ ܠܐܴܝܟܳܐ ܕܳܐܡܰܪ ܗ̱ܘܳܐ ܕܣܳܠܶܩ ܐ̱ܢܳܐ ܠܘܳܬ ܐܰܒܳܐ ܕܺܝܠܝ̱: ܒܰܪ̈ܩܶܐ ܕܚܺܝ̣̈ܠܐܷ ܡܶܢ ܩܰܒܪܶܗ ܚ̣ܙܰܝܢ ܟܰܕ ܢܳܦܩܺܝܢ: ܘܒܰܕܡܽܘܬ ܟܳܪ̈ܽܘܙܶܐ ܢܰܨܺܝ̈ܚܶܐ ܗ̣ܘܰܘ ܢܳܛܽܘܪ̈ܶܐ ܟܰܕ ܡܰܟܪܙܺܝܢ ܘܳܐܡܪܺܝܢ: ܕܩܳܡ ܩܛܺܝܠܐܴ ܡܶܢ ܩܰܒܪܳܐ: ܢܦ̣ܰܩ ܠܶܗ ܩܒܺܝܪܳܐ ܘܰܡܢܰܚܡܳܢܳܐ ܟܰܕ ܛܰܒ̈ܥܶܐ ܕܺܝܠܟܽܘܢ ܘܰܚܬܳܡ̈ܶܐ ܩܰܝܳܡܺܝܢ: ܚ̣ܙܝܢ ܡܰܠܐܱܟ̈ܶܐ ܕܓܰܘܙܰܠܬܳܐ ܕܥܰܓܶܠܘ̱ ܗ̱ܘܰܘ ܟܺܐܦܳܐ ܡܶܢ ܦܽܘܡ ܩܰܒܪܳܐ: ܘܰܣܠ̣ܶܩܘ̱ ܝ̣ܺܬܶܒܘ̱ ܠܥܶܠ ܡܶܢܳܗ̇: ܚ̣ܙܰܝܢ ܥܺܝܪ̈ܶܐ ܕܠܐܴ ܡܶܢܝܳܢܳܐ ܘܪ̈ܽܘܚܳܢܶܐ ܕܠܐܴ ܚܽܘܫܒܳܢܳܐ: ܢܽܘܪ̈ܳܢܶܐ ܕܠܐܴ ܓܽܘܫܡܳܐ ܕܶܡܘ̈ܳܬܳܐ ܕܠܐܴ ܫܽܘܚܠܳܦܳܐ: ܨܽܘܪ̈ܳܬܳܐ ܓܢܺܝ̣̈ܙܳܬܳܐ ܡܰܫܪ̈ܝܳܬܳܐ ܕܚܺܝ̣̈ܠܳܬܳܐ ܟܢܽܘ̈ܫܳܬܳܐ ܡܦܰܬܟ̈ܳܬܳܐ: ܠܶܓܝܽܘ̈ܢܶܐ ܫܓܺܝܪ̈ܳܬܳܐ: ܓܽܘ̈ܕܶܐ ܡܢܰܒܪ̈ܫܳܬܳܐ ܚ̣ܙܰܝܢ ܡܰܘܬܳܐ ܟܰܕ ܡܰܝܠܶܠ ܣܳܛܳܢܳܐ ܟܰܕ ܪܳܥܶܠ: ܢܰܦ̈ܫܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܟܰܕ ܛܳܝ̈ܣܳܢ ܪ̈ܽܘܚܳܬܳܐ ܕܰܢܒܺܝ̈ܶܐ ܟܰܕ ܦܳܪ̈ܚܳܢ ܩܰܘ̈ܡܳܬܳܐ ܕܪ̈ܺܝܫܰܝ ܐܰܒܳܗ̈ܳܬܳܐ ܟܰܕ ܡܨܰܒ̈ܬܳܢ: ܚ̣ܙܰܝܢ ܐܽܘܪܫܠܶܡ ܟܰܕ ܡܶܬܪܰܗܒܳܐ ܟܢܽܘܫܬܳܐ ܟܰܕ ܡܶܬܒܰܠܗܳܐ: ܚ̣ܙܰܝܢ ܫܡܰܝ̈ܳܢܶܐ ܟܰܕ ܡܨܰܒܬܺܝܢ ܘܡܶܨܛܰܝܒܺܝܢ ܘܰܐܪ̈ܥܳܢܶܐ ܕܶܐܬܘܰܥܰܕܘ̱: ܘܟܽܠܗܽܘܢ ܒܫܰܘܝܽܘܬܳܐ ܡܰܟܪܙܺܝܢ ܘܳܐܡܪܺܝܢ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܥܒ̣ܰܕ ܫܰܝܢܳܐ ܒܶܝܬ ܥܶܠܳܝ̈ܶܐ ܠܬܰܚܬܳܝ̈ܶܐ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܚܰܕܺܝ ܘܰܐܦܨܰܚ ܠܰܡܗܰܝܡ̈ܢܶܐ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܫܪܳܐ ܚܒܳܠܳܐ ܕܰܒܩܰܒܪ̈ܶܐ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܐܰܒܗܶܬ ܠܟܳܦܽܘܪ̈ܶܐ ܘܰܠܛܳܠܡ̈ܰܝ ܡܕܰܒܪܳܢܽܘܬܶܗ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܪܰܡܪܶܡ ܠܥܺܕܬܳܐ ܩܰܕܺܝܫܬܳܐ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܡܰܟܶܟ ܠܰܟܢܽܘܫܬܳܐ ܕܰܨܠܰܒܬܶܗ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܫܰܝܶܢ ܠܟܽܠܗܶܝܢ ܐܶܡܘ̈ܳܬܳܐ ܕܰܫܓܺܝ̈ܫܳܢ ܘܰܟܡܺܝܪ̈ܳܢ ܗ̱ܘ̈ܰܝ ܥܰܠ ܡܰܘܬܶܗ: ܘܒܰܚܕܳܐ ܒܰܪ̱ܬ ܩܳܠܐܴ ܡܰܙܥ̈ܩܳܢ ܘܳܐܡܪ̈ܳܢ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܓܠܐܴ ܟܰܣ̈ܝܳܬܳܐ ܕܰܒܢ̈ܰܝ ܩܳܐܶܝܢ ܩܳܛܽܘܠܐܴ ܙܳܩܽܘ̈ܦܶܐ ܠܺܝ̣̈ܛܶܐ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܐܰܟ̣ܪܶܙܘ̱ ܢܽܘܚܳܡܳܐ ܘܚܰܝ̈ܶܐ ܠܰܡܗܰܝ̈ܡܢܶܐ ܫܟܺܝ̈ܒܶܐ ܕܰܫܝܽܘܠ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ ܕܰܬܩܰܒܶܠ ܡܶܢ ܐܺܝ̈ܕܰܝܢ ܚܰܛܳܝ̈ܳܬܳܐ ܥܰܒ̣ܕ̈ܶܐ ܕܺܝܠܳܟ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡ ܪܰܒܽܘܬܳܟ: ܘܢܶܬܬܢܺܝܚ ܒܶܗ ܡܳܪܝ̱ ܨܶܒܝܳܢܳܟ ܛܳܒܳܐ ܘܒܰܣܺܝܡܳܐ ܘܰܥܒܶܕ ܒܶܗ ܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܡܺܝܬܘ̱ ܥܰܠ ܣܰܒܪܳܟ ܘܚܳܝܪܺܝܢ ܠܡܶܐܬܺܝܬܳܟ ܬܪܰܝܳܢܺܝܬܳܐ ܕܗܳܝ ܕܡܶܣܬܰܟܝܳܐ ܡܶܢ ܛܳܒ̈ܶܐ ܘܡܶܢ ܒܺܝ̈ܫܶܐ: ܗܳܝ ܕܒܳܗ̇ ܡܶܬܦܪܰܥ ܟܽܠ ܐ̱ܢܳܫ ܐܰܟܡܳܐ ܕܰܣܥ̣ܰܪ: ܗܳܝ ܕܢܶܫܬܘܶܐ ܒܳܗ̇ ܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܡܶܢ ܝܰܡܺܝܢܳܟ ܢܩܽܘܡ ܘܰܢܙܰܡܰܪ ܫܽܘܒܚܳܐ ܠܐܱܠܳܗܽܘܬܳܟ ܡܳܪܳܐ ܕܰܬܪ̈ܰܝܗܽܘܢ ܥܳܠܡ̈ܶܐ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܺܘܚܳܟ ܩܰܕܺܝܫܳܐ ܗܳܫܳܐ܀

ܥܶܛܪܳܐ

ܠܐܴ ܡܳܪܝ̱ ܬܶܡܢܶܐ ܠܰܢ ܥܰܡ ܦܳܥ̈ܠܐܷ ܒܰܛܺܝ̈ܠܐܷ ܕܠܐܴ ܦܠܰܚ̣ܘ̱ ܒܟܰܪܡܳܟ ܟܰܫܺܝܪܳܐܝ̣ܬ ܡܶܢ ܨܰܦܪܳܐ ܠܪܰܡܫܳܐ: ܐܶܠܐܴ ܐܰܘܕܳܐ ܒܰܢ ܓܰܠܝܳܐܝ̣ܬ ܕܰܐܘܕܺܝܢܰܢ ܒܳܟ ܚܰܕܳܢܳܐܝ̣ܬ: ܘܰܐܫܘܳܐ ܠܰܢ ܕܥܰܡ ܗܳܢܘܢ̇ ܕܰܦܠ̣ܰܚܘ̱ ܒܟܰܪܡܳܟ ܟܰܫܺܝܪܳܐܝ̣ܬ: ܢܶܣܰܒ ܐܰܓܪܳܐ ܡܰܠܝܳܐܝ̣ܬ: ܘܢܶܬܩܰܒܰܠ ܦܺܝܪܡܳܐ ܕܩܰܪܶܒܢܰܢ ܩܕܳܡ ܪܰܒܽܘܬܳܟ ܒܰܣܺܝܡܳܐܝ̣ܬ: ܘܢܺܐܬܶܐ ܠܰܢ ܒܶܗ ܚܢܳܢܳܐ ܘܪ̈ܰܚܡܶܐ ܡܶܢ ܒܶܝܬ ܓܰܙܳܟ ܥܰܬܺܝܪܳܐܝ̣ܬ: ܐܰܝܟܰܢܳܐ ܕܥܰܡ ܩܰܕܺܝ̈ܫܰܝܟ ܒܓܽܘܕܰܝ̈ܗܽܘܢ ܢܫܰܒܚܳܟ ܠܐܴ ܫܰܠܘܳܐܝ̣ܬ: ܘܢܰܣܶܩ ܠܳܟ ܫܽܘܒܚܳܐ ܦܨܺܝܚܳܐܝ̣ܬ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܫܰܘܝܳܐܝ̣ܬ ܗܳܫܳܐ܀

ܚܽܘܬܳܡܳܐ

ܡܶܢܳܟ ܒܳܥܶܝܢܰܢ ܚܢܳܢܳܐ ܘܪ̈ܰܚܡܶܐ ܡܳܪܝܳܐ ܕܠܐܴ ܬܶܡܢܶܐ ܠܫܰܗܪܳܐ ܕܺܝܠܰܢ ܐܰܝܟ ܫܰܗܪܳܐ ܕܚܰܢ̈ܦܶܐ ܘܟܳܦܽܘܪ̈ܶܐ: ܘܰܠܒܶܗܬܬܳܐ ܘܟܽܘܐܳܪܳܐ ܕܺܝܠܗܽܘܢ ܢܶܗܘܶܐ: ܘܠܐܴ ܬܶܚܫܽܘܒ ܨܠܰܘ̈ܳܬܰܢ ܐܰܝܟ ܡܰܡܠ̱ܠܐܴ ܦܰܩܳܩܳܐ ܕܥܰܡ̱̈ܡܳܝܶܐ: ܐܶܠܐܴ ܐܶܬܪܰܥܳܐ ܒܨܰܘܡܰܢ ܘܒܰܨܠܰܘ̈ܳܬܰܢ ܐܰܟܡܳܐ ܕܶܐܬܪܰܥܺܝܬ ܒܬܶܫܡ̈ܫܳܬܳܐ ܕܰܐܒܳܗ̈ܳܬܳܐ ܩܰܕܺܝ̈ܫܶܐ: ܘܰܫܒܽܘܩ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܚܰܣܳܐ ܠܥܰܢܺܝ̈ܕܰܝܢ ܒܣܽܘܓܳܐܐ ܕܰܡܪܰܚܡܳܢܽܘܬܳܟ: ܕܢܰܘܕܶܐ ܠܳܟ ܡܳܪܝ̱ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀