ܨܠܽܘܬܳܐ ܕܫܽܘܪܳܝܳܐ

ܐܰܫܘܳܐ ܠܰܢ ܡܫܺܝܚܳܐ ܐܰܠܳܗܳܐ ܕܺܝܠܰܢ ܐܰܝܟܰܢܳܐ ܕܠܰܩܝܳܡܬܳܟ ܦܳܪܽܘܩܳܝܬܳܐ ܒܢܰܦ̈ܫܳܬܰܢ ܢܙܰܝܰܚ: ܘܒܳܗ̇ ܟܽܠ ܛܳܒ̈ܳܬܳܐ ܠܘܳܬܰܢ ܡܶܢܳܟ ܢܶܫܬܰܪܬܰܚ: ܘܰܠܘܳܬܳܟ ܒܓܰܠܝܽܘܬ ܐܰܦ̈ܶܐ ܢܶܦܪܰܚ ܟܰܕ ܥܠܰܘܗ̱ܝ ܕܰܨܠܺܝܒܳܐ ܩܰܕܺܝܫܳܐ ܛܳܝܣܺܝܢܰܢ: ܬܰܪܥܳܐ ܕܪ̈ܰܚܡܶܐ ܠܰܢ ܢܶܬܦܬܰܚ: ܘܥܰܠ ܥܰܦܪܳܐ ܣܝܳܢܳܝܳܐ ܡܶܫܬܪܶܐ ܪܽܘܟܳܒܰܢ: ܓܽܘܫܡܰܢ ܢܶܬܕܰܚܰـܚ: ܐܰܫܘܳܐ ܠܰܢ ܠܫܽܘܠܳܡܳܐ ܛܳܒܳܐ ܡܰܪܘܰܚ ܘܰܠܡܰܦܩܳܢܳܐ ܒܪܺܝܟܳܐ ܕܠܳܟ ܚܳܫܰܚ: ܕܠܰܫܡܳܟ ܩܰܕܺܝܫܳܐ ܢܫܰܒܰܚ ܘܢܶܣܓܽܘܕ ܘܠܐܱܒܽܘܟ ܕܰܠܦܽܘܪܩܳܢܰܢ ܠܳܟ ܫܠܰܚ ܘܰܠܪܽܘܚܳܟ ܩܰܕܺܝܫܳܐ ܬܰܘܕܺܝܬܳܐ ܢܕܰܒܰܚ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ ܐܰܡܺܝܢ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܳܪܳܐ ܛܳܒܳܐ ܕܰܠܥܶܙ ܒܰܢܒܺܝܰܘ̈ܗ̱ܝ ܐ̱ܪ̈ܳܙܰܘܗ̱ܝ ܘܒܰܩܢܘ̣ܡܶܗ ܐܶܬܳܐ ܘܫܰܡܠܝ̣ ܛܘ̣ܦܣ̈ܶܐ ܘܦ̈ܶܠܐܴܬܳܐ ܐܰܟܡܳܐ ܕܠܰܥܙܽܘܗ̱ܝ: ܘܶܐܬܥܰܠܺܝ ܠܰܨܠܺܝܒܳܐ ܐܰܟܡܳܐ ܕܪܰܡܙܽܘܗ̱ܝ ܘܶܐܫܬܺܝ ܚܰܠܐܴ ܘܰܡܪܳܪܳܐ ܕܠܶܗ ܪܰܫܡܽܘܗ̱ܝ: ܘܡܺܝܬ ܕܰܨܒܳܐ ܡܶܢ ܒܺܝ̈ܫܶܐ ܕܰܐܪܓܙܽܘܗ̱ܝ: ܐܳܦ ܐܶܬܩܒܰܪ ܟܰܕ ܚܰܝܰܘ̈ܗ̱ܝ ܐܝ̣ܬܝ̈ܳܝܶܐ ܠܐܴ ܫܰܒܩܽܘܗ̱ܝ: ܘܩܳܡ ܡܶܢ ܩܰܒܪܳܐ ܘܡܰܠܐܱܟ̈ܶܐ ܣܰܥܪܽܘܗ̱ܝ ܘܶܐܬܚܙܺܝ ܠܰܫܠܺܝ̈ܚܶܐ: ܘܗܶܢܽܘܢ ܒܟܽܠ ܦܶܢ̈ܝܳܢ ܐܰܟܪܙܽܘܗ̱ܝ: ܕܠܶܗ ܝܳܐܶܐ ܫܽܘܒܚܳܐ ܡܶܢ ܦܽܘ̈ܡܶܐ ܕܠܐܴ ܛܰܠܡܽܘܗ̱ܝ ܣܶܓܕܬܳܐ ܘܺܐܝܩܳܪܳܐ ܡܶܢ ܥܰܡ̱̈ܡܶܐ ܕܗܰܝܡܢܽܘ̣ܗ̱ܝ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܐܰܠܳܗܳܐ ܐܰܒܳܐ ܗܰܘ ܕܰܕܠܐܴ ܫܽܘܪܳܝܳܐ ܐܝ̣ܬܝܟ ܐܝ̣ܬܝܳܐܝ̣ܬ: ܘܰܡܩܰܘܶܐ ܐܰܢ̱ܬ ܕܠܐܴ ܫܽܘܚܠܳܦܳܐ ܘܠܐܴ ܫܽܘܠܳܡܳܐ ܡܬܽܘܡܳܐܝ̣ܬ: ܗܰܘ ܕܟܰܕ ܠܐܴ ܫܶܦܪܰܬ݀ ܠܛܳܒܽܘܬܳܟ ܕܬܶܬܒܰܣܰܡ ܒܬܶܐܘܳܪܺܝܰܐ ܕܡܰܠܟܽܘܬܳܟ ܠܚܽܘܕܳܐܝ̣ܬ: ܒܪܰܝܬ ܠܡܰܠܐܱܟ̈ܶܐ ܘܰܩܪܰܝܬ ܐܶܢܽܘܢ ܗܰܘ̈ܢܶܐ ܬܪ̈ܰܝܳܢܶܐ ܚܰܟܺܝܡܳܐܝ̣ܬ ܕܢܶܗܘܽܘܢ ܡܫܰܡܫܺܝܢ ܠܳܟ ܗܰܘܢܳܐ ܩܰܕܡܳܝܳܐ ܒܳܪܽܘܝܗܽܘܢ ܐܰܠܳܗܳܐܝ̣ܬ: ܡܶܢ ܗܳܝ ܕܠܐܴ ܐܝ̣ܬܝܗܽܘܢ ܗ̱ܘܰܘ ܟܽܠܳܢܳܐܝ̣ܬ ܐܰܝܬܺܝܬ ܐܶܢܽܘܢ ܠܗܳܝ ܕܢܶܗܘܽܘܢ ܡܝܰܬܬܺܝܢ ܦܳܩܽܘܕܳܐܝ̣ܬ: ܘܒܳܬܰܪܟܶܢ ܫܦ̣ܰܪ ܠܨܶܒܝܳܢܳܟ ܛܳܒܳܐ ܠܐܴ ܡܶܬܕܰܪܟܳܢܳܐܝ̣ܬ ܒܰܡܕܰܒܪܳܢܽܘܬܳܟ ܗܳܝ ܕܠܐܴ ܡܶܬܡܰܠܠܐܴ ܡܶܢ ܒܢܰܝ̈ܢܳܫܳܐ ܡܶܬܥܰܩܒܳܢܳܐܝ̣ܬ: ܘܡܶܢ ܐܰܪܒܰܥ ܦܶܢ̈ܝܳܬܳܐ ܕܝܰܒܺܝܫܬܳܐ ܫܩܰܠܬ ܐܰܢ̱ܬ ܐܰܒܳܐ ܟܶܬܳܐ ܡܶܕܪܳܢܳܝܬܳܐ ܨܠܺܝܒܳܐܝ̣ܬ: ܒܳܬܰܪ ܕܫܰܡܠܺܝܬ ܟܽܠܗܶܝܢ ܗܳܢܶܝܢ ܕܰܗܘ̈ܰܝ ܘܶܐܬܒܪܺܝ ܬܡܺܝܗܳܐܝ̣ܬ: ܘܠܰܒܪܳܟ ܘܰܠܪܽܘܚܳܟ ܩܰܕܺܝܫܳܐ ܠܰܥܶܙܬ ܪܶܡܙܳܢܳܐܝ̣ܬ: ܟܰܕ ܡܫܰܘܕܰܥ ܐܰܢ̱ܬ ܥܰܠ ܫܰܘܝܽܘܬ ܟܝܳܢܳܐ ܘܨܶܒܝܳܢܳܐ ܕܺܝܠܳܟ ܠܰܕܡܶܣܬܰܟܰܠ ܚܰܟܺܝܡܳܐܝ̣ܬ: ܕܬܰܘ ܕܢܶܥܒܶܕ ܐ̱ܢܳܫܳܐ ܒܨܰܠܡܰܢ ܘܒܰܕܡܽܘܬܰܢ ܕܢܶܬܒܰܣܰܡ ܒܰܥܒܳܕܳܐ ܕܺܝܠܰܢ ܘܰܒܬܶܐܘܳܪܺܝܰܐ ܕܫܽܘܒܚܰܢ ܐܰܡܺܝܢܳܐܝ̣ܬ: ܘܰܒܪܰܝܬ ܒܨܰܠܡܳܟ ܗܰܘ ܪܰܒܳܐ ܘܠܐܴ ܡܶܬܡܰܠܠܳܢܳܐ ܘܠܳܐ ܡܶܬܦܰܚܡܳܢܳܐ ܬܗܝ̣ܪܳܐܝ̣ܬ: ܡܶܢ ܗܳܝ ܟܶܬܳܐ ܐܳܕܰܡܬܳܢܳܝܬܳܐ ܠܗܰܘ ܨܰܠܡܳܐ ܕܐܰܠܳܗܘ̣ܬܳܟ ܐܰܟܡܳܐ ܕܫܶܦܪܰܬ݀ ܠܛܳܒܘ̣ܬܳܟ ܗܳܝ ܛܘ̣ܒܬܳܢܳܝܬܳܐ ܛܳܒܳܐܝ̣ܬ: ܘܫܰܡܝ̣ܬܳܝܗ̱ܝ ܗܰܘܢܳܐ ܬܠܝ̣ܬܳܝܳܐ: ܕܰܠܗܰܘ̈ܢܶܐ ܬܪ̈ܰܝܳܢܶܐ ܢܶܩܰܦ ܘܢܶܫܬܰܥܒܰܕ: ܘܰܢܫܰܡܶܫ ܠܡܳܪܘ̣ܬܳܟ ܥܰܒܕܳܢܳܐܝ̣ܬ: ܘܐܰܓܥܶܠܬ ܠܶܗ ܦܰܪܕܰܝܣܳܐ ܕܒܘ̣ܣܳܡ̈ܶܐ ܟܕ ܦܳܩܶܕ ܐܰܢ̱ܬ ܠܶܗ ܙܗܝ̣ܪܳܐܝ̣ܬ ܕܡܶܢ ܟܽܠܗܘܢ̇ ܐܝ̣ܠ̈ܳܢܰܝ ܦܰܪܕܰܝܣܳܐ ܢܶܐܟܘ̣ܠ ܡܫܰܠܛܳܐܝ̣ܬ: ܘܡܶܢ ܐܝ̣ܠܳܢܳܐ ܗܰܘ ܕܠܳܐ ܥܕܰܟܝ̣ܠ ܡܛܳܐ ܙܰܒܢܳܐ ܕܝ̣ܠܶܗ ܕܢܶܬܶܐܟܶܠ ܠܳܐ ܢܶܐܟܘ̣ܠ ܝܰܥܢܳܐܝ̣ܬ: ܟܕ ܒܡܶܠܟܳܗ̇ ܕܗܳܝ ܕܡܶܢܳܟ ܠܶܗ ܐܶܬܝܰܗܒܰܬ݀ ܥܶܕܪܳܐ ܡܪܰܚܡܳܢܳܐܝ̣ܬ: ܘܰܒܫܘ̣ܕܳܠܳܐ ܕܚܶܘܝܳܐ ܕܐܶܬܦܪܶܣ ܕܐܳܦ ܠܶܗ ܢܶܛܪܘ̣ܕ ܢܟܝ̣ܠܳܐܝ̣ܬ: ܦܫܰܛ ܐܝ̣ܕܶܗ ܘܰܡܪܰܛ ܦܺܐܪܳܐ ܕܡܰܘܬܳܐ ܪܶܓܬܳܢܳܐܝ̣ܬ: ܐܶܫܬܠܰܚ ܡܶܢܶܗ ܫܘ̣ܒܚܳܐ ܗܰܘ ܕܐܰܠܒܶܫܬܳܝܗ̱ܝ ܫܒܝ̣ܚܳܐܝ̣ܬ: ܘܟܰܕ ܠܰܠܒܝ̣ܒܘ̣ܬܳܐ ܕܢܰܦܫܶܗ ܓܠܝ̣ܙܘ̣ܬ ܝܘ̣ܠܦܳܢܳܐ ܢܶܩܦܰܬ݀ ܐ̱ܚܝܳܢܳܐܝ̣ܬ: ܥܒܰܕܬܶܗ ܠܳܐ ܠܒܝ̣ܒܳܐ ܐܳܦ ܕܰܚܘ̣ܠܬܳܢܳܐ ܡܕܰܘܕܳܐܝ̣ܬ: ܘܰܕܠܳܐ ܝܳܕܰܥ ܕܐܰܝܟܰܢܳܐ ܡܰܦܰܩܒܪܘ̣ܚܳܐ ܢܶܬܶܠ ܡܛܰܝܒܳܐܝ̣ܬ: ܗܳܝܕܶܝܢ ܩܳܠܳܐ ܕܕܘ̣ܪ̈ܟܳܬܳܟ ܩܕܝ̣̈ܫܳܬܳܐ ܫܡ̣ܰܥ ܒܦܰܪܕܰܝܣܳܐ ܟܰܕ ܐܳܡܰܪ ܐܰܢ̱ܬ ܠܶܗ ܡܫܰܐܠܳܢܳܐܝ̣ܬ: ܐܰܢ̱ܬ ܕܟܽܠ ܡܶܕܶܡ ܝܳܕܰܥ ܐܰܢ̱ܬ ܩܕܳܡ ܗܘܳܝܶܗ ܐܰܠܳܗܳܐܝ̣ܬ: ܐܳܕܳܡ ܐܳܕܳܡ ܐܰܝܟܳܐ ܐܰܢ̱ܬ: ܘܰܨܒܳܐ ܗ̱ܘܳܐ ܕܰܠܥܶܕܠܳܝܳܐ ܢܰܝܬܶܐ ܥܠܰܝܟ ܐܰܢ̱ܬ ܕܰܕܠܳܐ ܥܶܕܠܳܝܳܐ ܐܝ̣ܬܰܝܟ ܟܰܕ ܐܳܡܰܪ: ܕܗܳܝ ܕܣܳܡ̣ܬ ܥܰܡܝ̱ ܐܰܝܟ ܕܰܠܥܶܕܪܳܐ ܢܟ݂ܰܠܬܰܢܝ̱ ܣܰܟ݂ܠܳܐܝ̣ܬ: ܠܳܐ ܡܰܛܝ̣ܬ ܠܘܳܬܶܗ ܪܗܝ̣ܒܳܐܝ̣ܬ ܕܠܳܐ ܬܨܰܦܚܝ̣ܘܗ̱ܝ ܠܳܐ ܘܳܠܝܳܐܝ̣ܬ: ܐܶܠܳܐ ܩܳܠܳܐ ܒܶܝܬ ܐܝ̣ܠ̈ܳـܢܶܐ ܕܦܰܪܕܰܝܣܳܐ ܐܰܫܡܰܥܬܳܝܗ̱ܝ ܢܝ̣ـܚܳܐܝ̣ܬ: ܕܟܰܕ ܢܶܫܡܰܥ ܠܗܰܘ ܩܳܠܳܐ ܕܡܶܬܩܰܪܩܰܫ ܒܶܝܬ ܐܝ̣ܠܳـܢ̈ܶܐ ܢܶܬܛܰܝܰܒ ܠܰܡܩܰܪܳܒܘ̣ ܬܰܟܫܶܦܬܳܐ ܡܦܝ̣ܣܳܢܳܐܝ̣ܬ: ܘܗܳܝ ܕܐܰܝܟܳܐ ܐܰܢ̱ܬ ܐܳܕܳܡ: ܗܳܢܰܘ ܕܶܝܢ ܐܳܕܳܡ ܐܰܒܝ̣ܕ ܐܰܢ̱ܬ ܫܓܝ̣ܫܳܐܝ̣ܬ: ܡܶܕܶܡ ܕܰܫܟܝ̣ܚ ܠܳܐ ܡܶܬܰܐܡܪܳܐ ܥܠܰܘܗ̱ܝ ܕܐܰܝܟܳܐ ܐܰܢ̱ܬ ܡܫܰܐܠܳܢܳܐܝ̣ܬ: ܠܰܘ ܐܰܢ̱ܬ ܠܳܐ ܝܳܕܰܥ ܗ̱ܘܰܝܬ ܐܰܝܟܳܐ ܐܝ̣ܬܰܘܗ̱ܝ ܗ̱ܘܳܐ ܐܶܠܳܐ ܕܢܶܫܬܰܘܕܰܥ ܕܐܰܒܝ̣ܕ ܗ̱ܘܳܐ ܫܰܐܶܠܬܳܝܗ̱ܝ ܪܶܡܙܳܢܳܐܝ̣ܬ: ܟܰܕ ܠܳܐ ܝܳܕܘ̣ܥܳܐ ܩܰܘܺܝ̣ ܘܡܰܪܳܚܳܐ ܐܶܬܚܙܝ̣ ܠܰܘ ܫܳܛܝܳܐܝ̣ܬ: ܡܣܳܡܒܪܝ̣ܫܳܐ ܐܰܝܟ ܕܫܳܘܶܐ ܐܶܠܳܐ ܐܰܟ݂ܡܳܐ ܕܰܡܨܶܐ ܕܰܢܣܰܝܒܰܪ ܩܰܒܶܠ ܡܶܢܳܟ ܟܺܐܢܳܐܝ̣ܬ: ܕܡܶܢ ܥܰܦܪܳܐ ܗ̱ܝ ܒܪܝ̣ܬܳܟ ܩܰܕܡܳܝܬܳܐ ܘܡܶܢܕܪܝ̣ܫ ܠܥܰܦܪܳܐ ܗܳܦܶܟ ܐܰܢ̱ܬ ܒܕܰܥܒܰܪܬ ܦܘ̣ܩܕܳܢܳܐ ܠܳܐ ܘܳܠܝܳܐܝ̣ܬ: ܘܡܶܢ ܗܳܫܳܐ ܡܶܬܬܰܘܝܳܢܘ̣ܬܳܐ ܙܰܡܶܢ ܗ̱ܘܳܐ ܠܶܗ ܒܡܰܦܩܳܐ ܕܡܶܢ ܒܘ̣ܣܳܡܳܐ ܥܕܶܢܳܝܳܐ ܩܛܝ̣ܪܳܐ: ܘܟܰܕ ܐܶܬܥܰܪܙܰܠ ܥܰܡ ܐܰܢ̱ܬܬܶܗ ܘܰܢܦܰܩ ܡܶܣܟܺܢܳܐܝ̣ܬ ܟܰܣܝܰܬ݀ ܒܳܪܘ̣ܝܘ̣ܬܳܟ ܠܥܰܪܛܶܠܳܝܘ̣ܬܶܗ ܒܝܰܕ ܟܘ̣ܬܝ̣̈ܢܝܳܬܳܐ ܡܶܫܟ̈ܳܢܝܳܬܳܐ ܕܡܶܢ ܠܳܐ ܡܶܕܶܡ ܒܪܰܝܬ ܐܶܢܶܝܢ ܕܫܳܥܬܳܐ ܦܳܩܘ̣ܕܳܐܝ̣ܬ: ܘܡܶܢ ܗܳܠܶܝܢ ܫܪܰܥ ܨܶܒܝܳܢܳܐܝ̣ܬ ܘܰܠܫܺܐܕ̈ܶܐ ܒܥܶܠ̈ܕܒܳܒܶܐ ܕܟܺܐܢܘ̣ܬܳܟ ܐܶܬܥܰܒܕܰܕ ܬܥܝ̣ܫܳܐܝ̣ܬ ܐܳܦ ܐܶܬܥܰܠ݂ܕܒܰܒ ܠܰܐܠܳܗܘ̣ܬܳܟ ܣܰܢܝܳܐܝ̣ܬ: ܘܰܚܠܰܕ ܒܥܰܦܪܳܐ ܠܰܘ ܕܐܰܪܥܳܐ ܐܶܠܳܐ ܕܨܘ̣ܥܨ̈ܳܥܶܐ ܣܝܳܢܳܝ̈ܶܐ ܒܝ̣ܫܳܐܝ̣ܬ: ܐܰܢ̱ܬ ܛܳܒܳܐ ܘܚܰܝܽܘ̣ܣܬܳܢܳܐ ܘܰܕܠܳܐ ܨܳܒܶܐ ܒܰܓܒܝ̣ܠܬܶܗ ܕܬܺܐܒܰܕܝ̱ ܓܡܝ̣ܪܳܐܝ̣ܬ: ܟܰܕ ܚܙܰܝܬܳܝܗ̱ܝ ܕܠܳܐ ܝܳܕܰܥ ܕܐܰܝܟܰܢܳܐ ܐܰܘ ܒܡܳܢܳܐ ܢܶܬܦܰܪܰܣ ܠܦܘ̣ܪܩܳܢܶܗ ܙܳܕܩܳܐܝ̣ܬ: ܠܳܐ ܣܰܝܒܰܪܬ ܕܢܺܐܒܰܕ ܠܰܓܡܳܪ ܐܶܠܳܐ ܫܰܕܰܪܬ ܠܦܘ̣ܪܩܳܢܶܗ ܢܒܺܝ̈ܶܐ ܘܰܫܠـܝ̣̈ܚܶܐ ܪܶܚܡܰܬ݀ ܐ̱ܢܳܫܳܐܝ̣ܬ: ܘܟܰܕ ܠܳܐ ܐܶܫܟܰܚܘ̱ ܠܡܰܐܣܳܝܘ̣ܬܶܗ ܘܰܠܡܰܗܦܳܟܘ̣ܬܶܗ ܠܐܘ̣ܪܚܳܐ ܕܰܫܪܳܪܳܐ ܕܰܠܘܳܬܳܟ ܡܰܘܒܠܳܐ ܬܪܝ̣ܨܳܐܝ̣ܬ: ܠܳܐ ܐܶܨܛܰܡܥܪܰܬ݀ ܪܰܒܘ̣ܬܳܟ ܕܰܒܥܶܠܕܒܳܒܳܐ ܕܟܺܐܢܘ̣ܬܳܟ ܘܡܰܪܓܙܳܢܳܟ ܬܶܒܥܶܐ ܒܛܝ̣ܠܳܐܝ̣ܬ: ܐܶܠܳܐ ܠܰܒܪܳܟ ܚܰܒܝ̣ܒܳܐ ܫܰܕܰܪܬ ܠܦܘ̣ܪܩܳܢܶܗ ܦܰܐܝܘ̣ܬ ܐܰܠܳܗܳܐܝ̣ܬ: ܘܡܶܢ ܦܰܓܪܶܗ ܐܶܬܥܰܛܰܦ ܠܶܗ ܕܡܘ̣ܬܳܐ ܓܘ̣ܫܡܳܢܳܝܬܳܐ ܘܐܶܬܝ̣ܠܶܕ ܠܥܶܠ ܡܶܢ ܟܝܳܢܳܐ ܡܶܢ ܓܶܢܣܶܗ ܕܐܳܕܳܡ : ܘܐܶܬܬܣܝ̣ܡ ܒܐܘ̣ܪܝܳܐ ܕܚܰܝ̈ܘܳܬܳܐ ܘܐܶܬܟܪܶܟ ܒܥܰܙܪ̈ܘ̣ܪܶܐ ܫܝ̣ܛܳܐܝ̣ܬ: ܘܐܶܬܪܰܒܝ̣ ܗ̱ܘܳܐ ܒܡܘ̣̈ܫܚܳܬܳܐ ܐ̱ܢܳܫܳܝ̈ܳܬܳܐ ܐܰܝܟ ܒܰܪܢܳܫܳܐ ܠܳܐ ܡܶܬܰܐܡܪܳܢܳܐܝ̣ܬ: ܘܰܥܪܰܩ ܠܡܶܨܪܶܝܢ ܡܶܢ ܩܕܳܡ ܬܰܥܠܳܐ ܫܝ̣ܛܳܐ ܐܝ̣ܪܳܘܕܝ̣ܣ: ܘܬܰܒܰܪ ܦܬܰܟܪ̈ܶܐ ܘܰܓܠ̈ܝ̣ܦܶܐ ܕܬܰܡܳܢ ܓܰܢ̱ܒܳܪܳܐܝ̣ܬ: ܘܡܶܢ ܒܳܬܰܪ ܕܫܰܡܠܝ̣ ܓܙܘ̣ܪܬܳܐ ܡܘ̣ܫܳܝܬܳܐ ܗܳܝ ܕܡܶܢܳܟ ܠܘܳܬ ܥܰܒܕܳܟ ܐܶܬܬܰܚܡܰܬ݀ ܢܳܡܘ̣ܣܳܐܝ̣ܬ: ܐܶܬܪܰܒܝ̣ ܒܢܳܨܪܰܬ ܕܰܓܠܝ̣ܠܳܐ: ܘܫܰܦܶܦ ܥܰܡ ܫܰܒܪ̈ܶܐ ܨܶܗܝܘ̈ܢܳܝܶܐ ܡܕܰܒܪܳܢܳܐܝ̣ܬ: ܟܰܕ ܥܰܡܳܟ ܘܥܰܡ ܪܘ̣ܚܳܟ ܩܰܕܝ̣ܫܳܐ ܡܕܰܒܰܪ ܠܰܫܡܰܝܳܐ ܘܠܰܐܪܥܳܐ ܐܰܠܳܗܳܐܝ̣ܬ: ܥܡܰܕ ܡܶܢ ܝܽܘܚܰܢܳܢ ܟܳܪܘ̣ܙܶܗ ܒܝܽܘܪܕܢܳܢ ܢܰܗܪܳܐ ܡܰܟܝ̣ܟܳܐܝ̣ܬ: ܘܐܶܣܬܗܶܕ ܡܶܢܳܟ ܕܗܳܢܰܘ ܒܶܪܝ̱ ܚܰܒܝ̣ܒܝ̱ ܕܫܰܕܰܪܬܶܗ ܠܦܘ̣ܪܩܳܢ ܒܶܪ̈ܝܳܬܳܐ ܚܰܝܽܘ̣ܣܬܳܢܳܐܝ̣ܬ: ܐܶܬܕܒܰܪ ܠܡܰܕܒܪܳܐ ܕܢܶܬܢܰܣܶܐ ܡܶܢ ܐܳܟܶܠܩܰܪܨܳܐ: ܘܝܰܗ݂ܒ ܠܰܢ ܚܰܝܠܳܐ ܕܠܨܶܢܥ̈ܳܬܶܗ ܢܶܙܟܶܐ ܚܠܝ̣ܨܳܐܝ̣ܬ: ܒܚܰܝܠܳܐ ܕܝ̣ܠܶܗ ܠܳܐ ܡܶܙܕܰܟܝܳܢܳܐ ܢܰܨܝ̣ܚܳܐܝ̣ܬ: ܘܰܠܒܰܟ ܨܰܘܡܳܐ ܡܶܛܽܠܳܬܰܢ ܘܐܰܠܶܦ ܠܰܢ ܕܰܚܢܰܢ ܡܶܛܽܠ ܢܰܦܫ̈ܳܬܰܢ ܢܨܘ̣ܡ ܘܰܢܨܰܠܶܐ ܬܟܝ̣ܠܳܐܝ̣ܬ: ܢܰܓܕܘ̣ܗ̱ܝ ܪ̈ܰܚܡܰܘܗ̱ܝ ܠܒܶܝܬ ܕܝ̣ܢܳܐ ܘܩܳܡ ܐܰܝܟ ܚܰܝܳܒܳܐ ܘܐܶܬܬܕܝ̣ܢ ܡܶܢ ܛܰܡ̈ܶܐܐ ܗܰܘ ܠܳܐ ܚܰܝܳܒܳܐ ܨܶܒܝܳܢܳܐܝ̣ܬ: ܐܶܨܛܠܶܒ ܥܰܠ ܩܰܝܣܳܐ ܕܚܶܣܕܳܐ ܗܰܘ ܕܰܨܠܝ̣ܒܳܐ ܒܝܰܘܡܳܐ ܫܬܝ̣ܬܳܝܳܐ ܒܳܬܰܪ ܕܫܰܡܠܝ̣ ܟܽܠܗܘܢ̇ ܐ̱ܪ̈ܳܙܶܐ ܘܐܘ̣ܚ̈ܕܳܬܳܐ ܕܐܶܬܡܰܠܰܠܘ̱ ܥܠܰܘܗ̱ܝ ܪܶܡܙܳܢܳܐܝ̣ܬ ܠܐܝ̣ ܒܝܰܘܡܳܐ ܫܬܝ̣ܬܳܝܳܐ ܗܰܘ ܕܠܳܐ ܣܟ ܠܳܐܶܐ: ܟܰܕ ܫܰܡܠܝ̣ ܡܕܰܒܪܳܢܘ̣ܬܶܗ ܒܠܶܐܘܬܳܐ ܣܰܓܝ̣ܐܬܳܐ ܒܛܝ̣ܠܳܐܝ̣ܬ: ܘܟܰܕ ܢܚܶܬ ܠܒܶܝܬ ܡܝ̣̈ܬܶܐ ܐܶܫܬܡܠܝܰܬ݀ ܡܶܠܬܳܟ ܐܰܠܳܗܳܝܬܳܐ ܕܐܶܡܰܪܬ ܕܐܶܬܬܢܝ̣ܚ ܐܰܠܳܗܳܐ ܒܝܰܘܡܳܐ ܫܒܝ̣ܥܳܝܳܐ ܡܶܢ ܟܽܠܗܘܢ̇ ܥܒܳܕܰܘ̈ܗ̱ܝ ܡܫܰܡܠܝܳܐܝ̣ܬ: ܟܶܐܡܰܬ ܕܫܰܡܠܝ̣ ܟܽܠܳܗ̇ ܡܕܰܒܪܳܢܘ̣ܬܶܗ ܘܰܠܐܝ̣ ܒܝܰܘܡܳܐ ܫܬܝ̣ܬܳܝܳܐ ܒܰܨܠܝ̣ܒܳܐ ܘܐܶܬܬܢܝ̣ܚ ܒܝܰܘܡܳܐ ܫܒܝ̣ܥܳܝܳܐ ܒܶܝܬ ܡܝ̣̈ܬܶܐ ܟܰܕ ܦܪܰܩ ܠܨܰܠܡܶܗ ܢܰܦܫܳܐ ܐ̱ܢܳܫܳܝܬܳܐ ܕܰܫܒܳܗ̇ ܗ̱ܘܳܐ ܡܳܪܘ̣ܕܳܐ ܒܝ̣ܫܳܐܝ̣ܬ: ܘܰܒܝܰܘܡܳܐ ܩܰܕܝ̣ܫܳܐ ܕܚܰܕ ܒܫܰܒܳܐ ܕܐܝ̣ܬܰܘܗ̱ܝ ܩܰܕܡܳܝܳܐ ܘܰܬܡܝ̣ܢܳܝܳܐ ܕܒܶܗ ܐܶܬܒܪܝ̣ ܢܘ̣ܗܪܳܐ ܡܶܢ ܒܪܝ̣ܫܝ̣ܬ: ܘܒܶܗ ܬܘ̣ܒ ܩܳܡ ܡܶܢ ܩܰܒܪܳܐ ܘܚܰܕܶܬ ܠܢܘ̣ܗܪܳܐ ܠܳܐ ܡܶܬܡܰܠܠܳܢܳܐܝ̣ܬ: ܡܳܪܝܳܐ ܡܳܪܰܢ ܡܳܐ ܡܫܰܒܰܚ ܫܡܳܟ ܘܰܬܡܝ̣ܗ ܒܟܽܠܳܗ̇ ܐܰܪܥܳܐ ܘܪ̈ܰܘܪܒܝ̣ܢ ܐܶܢܽܘܢ̇ ܥܒܳܕܰܝ̈ܟ ܠܰܐܝܠܶܝܢ ܕܨܳܒܶܝܢ ܒܗܘܢ̇ ܡܶܬܒܰܥܝܳܢܳܐܝ̣ܬ: ܐܰܢ̱ܬ ܕܝܰܘܡܳܢ ܐܰܩܝ̣ܡܬ ܠܰܒܪܳܟ ܒܚܰܝܠܳܐ ܪܰܒܳܐ ܡܶܢ ܒܶܝܬ ܡܝ̣̈ܬܶܐ ܘܐܶܬܚܙܝ̣ ܠܢܶܫ̈ܶܐ ܘܰܠܬܰܠ̈ܡܝ̣ܕܶܐ ܓܰܠܝܳܐܝ̣ܬ: ܘܡܶܢ ܒܳܬܰܪ ܕܩܳܡ ܡܶܢ ܩܰܒܪܳܐ ܒܬܶܫܒܘ̣ܚܬܳܐ ܟܰܬܰܪ ܥܰܠ ܐܰܪܥܳܐ ܐܰܪܒܥܝ̣ܢ ܝܰܘܡܝ̣̈ܢ: ܘܫܰܪܰܪ ܐܶܢܘܢ̇ ܠܰܐܚܰܘ̈ܗ̱ܝ ܥܰܠ ܩܝܳܡܬܶܗ ܡܕܰܒܪܳܢܳܐܝ̣ܬ: ܘܰܥܒܰܕ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܒܳܬܰܪ ܕܩܳܡ ܐܰܠܳܗܳܐܝ̣ܬ ܘܐܶܬܥܰܠܝ̣ ܠܰܫܡܰܝܳܐ ܒܦܰܓܪܳܐ ܕܡܶܢܰܢ ܢܣܰܒ: ܘܒܶܗ ܫܰܡܠܝ̣ ܠܟܽܠܗܶܝܢ ܐ̱ܢܳܫܳܝ̈ܳܬܳܐ: ܘܐܶܬܥܰܠܝ̣ ܘܝ̣ܬܶܒ ܡܶܢ ܝܰܡܝ̣ܢ ܐܰܒܘ̣ܗ̱ܝ ܕܫܰܠܚܶܗ ܡܪܰܡܪܡܳܐܝ̣ܬ: ܘܗܳܐ ܟܽܠ ܥܰܡ̱̈ܡܝ̣ܢ ܚܳܕܶܝܢ ܘܕܳܝܨܝ̣ܢ ܘܰܡܫܰܒܚܝ̣ܢ ܘܡܰܘܕܶܝܢ ܒܰܩܝܳܡܬܳܐ ܕܝ̣ܠܶܗ ܡܳܪܳܐܝ̣ܬ: ܘܰܚܢܰܢ ܡܚܝ̣̈ܠܶܐ ܘܚܰܛܳܝ̈ܶܐ ܡܰܘܕܶܝܢܰܢ ܠܳܟ ܬܪܝ̣ܨܳܐܝ̣ܬ: ܝܰܘܡܳܢܳܐ ܥܰܡ ܡܫܝ̣ܚܳܐ ܐܶܫܬܰܒܰܚܢܰܢ ܒܰܩܝܳܡܬܶܗ ܡܶܛܽܠ ܕܰܡܢܳܬܡܳܠ ܐܶܬܩܒܰܪܢܰܢ ܥܰܡܗ ܪܘ̣ܚܢܳܐܝ̣ܬ: ܝܰܘܡܳܢܳܐ ܥܰܡ ܡܫܝ̣ܚܳܐ ܡܳܪܰܢ ܩܳܡܢܰܢ ܡܶܛܽܠ ܕܥܰܡܶܗ ܡܢܳܬܡܳܠ ܚܰܫܢܰܢ ܨܶܒܝܳܢܳܐܝ̣ܬ: ܝܰܘܡܳܢܳܐ ܥܰܡ ܡܫܝ̣ܚܳܐ ܚܰܝܺܝ̣ܢܰܢ ܒܰܩܝܳܡܬܶܗ ܡܶܛܽܠ ܕܰܡܢܳܬܡܳܠ ܡܝ̣ܬܢܰܢ ܥܰܡܶܗ ܐ̱ܪܳܙܳܢܳܐܝ̣ܬ: ܘܗܳܫܳܐ ܠܶܗ ܠܰܡܫܝ̣ܚܳܐ ܐܰܠܳܗܰܢ ܝ̣ܚܝ̣ܕܳܝܳܐ ܒܪܳܟ ܕܩܳܡ ܡܶܢ ܩܰܒܪܳܐ ܓܰܢ̱ܒܳܪܳܐܝ̣ܬ ܘܐܰܩܝ̣ܡ ܠܰܢ ܥܰܡܶܗ ܬܰܩܝ̣ܦܳܐܝ̣ܬ: ܠܳܟ ܡܦܝ̣ܣܝ̣ܢܰܢ ܡܶܬܚܰܢܳܢܳܐܝ̣ܬ ܘܡܶܬܟܰܫܦܝ̣ܢܢ ܡܶܬܓܰܪܓܚܳܢܳܐܝ̣ܬ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܐܰܥܛܰܪܢܰܢ ܩܕܳܡ ܬܪܘ̣ܢܘ̣ܣ ܕܐܝ̣ܩܳܪܳܟ ܒܰܣܝ̣ܡܳܐܝ̣ܬ: ܟܰܕ ܡܰܙܥܩܝ̣ܢܰܢ ܒܠܶܒܳܐ ܫܚܝ̣ܩܳܐ ܘܐܳܡܪܝ̣ܢܰܢ ܚܢܝ̣ܓܳܐܝ̣ܬ: ܕܰܒܰܪ ܠܰܢ ܒܚܰܝܠܳܟ ܠܳܐ ܡܶܙܕܰܟܝܳܢܳܐ ܚܰܝܠܬܳܢܳܐܝ̣ܬ: ܘܰܥܶܕ ܠܰܢ ܠܡܶܫܬܘ̣ܬܳܐ ܕܛܰܝܶܒܬ ܠܕܳܚ̈ܠܰܝܟ ܡܛܰܝܒܳܐܝ̣ܬ: ܝܰܒܶܠ ܠܰܕܪܰܚܝ̣ܩܝ̣ܢ ܢܛܝ̣ܪܳܐܝ̣ܬ: ܕܘܢ̇ ܕܝ̣ܢܳܐ ܕܝ̣ܠܰܢ ܡܶܢ ܒܥܶܠ̈ܕܒܳܒܶܐ ܕܝ̣ܠܰܢ ܓܰܢ̱ܒܳܪܳܐܝ̣ܬ: ܒܪܝ̣ ܒܰܢ ܠܶܒܳܐ ܕܰܟܝܳܐ ܕܰܟܝܳܐܝ̣ܬ: ܪܰܡܪܶܡ ܠܰܢ ܒܫܘ̣̈ܟܳܢܶܐ ܕܝ̣ܠܳܟ ܬܰܩܢܳܐܝ̣ܬ: ܥܰܕܰܪ ܠܰܢ ܕܩܳܪܶܝܢܰܢ ܠܳܟ ܚܢܝ̣ܓܳܐܝ̣ܬ: ܒܰܕܰܪ ܠܰܒܥܶܠ̈ܕܒܳܒܰܝܢ ܕܩܳܝܡܝ̣ܢ ܠܩܘ̣ܒܠܰܢ ܣܰܩܘ̣ܒܠܳܐܝ̣ܬ: ܕܳܫ̈ܢܶܐ ܕܝ̣ܠܰܢ ܢܶܬܩܰܒܠܘܢ̇ ܕܶܝܢ ܩܕܳܡܰܝܟ ܡܪܰܚܡܳܢܳܐܝ̣ܬ: ܐܰܘܳܐ ܠܰܢ ܒܛܶܠܳܠܳܟ ܐܰܟܝ̣ܦܳܐܝ̣ܬ: ܠܰܠܡܺܐܢܳܐ ܕܫܰܝܢܳܐ ܡܰܢܰܥ ܠܰܢ ܚܳܕܝܳܐܝ̣ܬ: ܟܰܢܶܫ ܠܰܢ ܠܒܶܝܬ ܨܰܘܒܳܟ ܫܰܘܝܳܐܝ̣ܬ: ܪܰܡܪܶܡ ܩܰܪܢܳܗ̇ ܕܥܺܕܬܳܐ ܩܰܕܝ̣ܫܬܳܐ ܒܰܣܝ̣ܡܳܐܝ̣ܬ: ܝܰܡܳܐ ܕܪ̈ܰܚܡܰܝܟ ܬܪܘ̣ܥ ܠܰܢ ܫܦܝ̣ܥܳܐܝ̣ܬ: ܡܚܰܣܝܳܢܳܐ ܗܘܺܝ̣ ܠܰܢ ܡܳܪܝܳܐ ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܕܰܫܟܶܒܘ̱ ܥܰܠ ܣܰܒܪܳܟ ܒܗܰܝܡܳܢܘ̣ܬܳܐ ܕܰܫܪܳܪܳܐ ܬܪܝ̣ܨܳܐܝ̣ܬ: ܕܰܚܢܰܢ ܘܗܶܢܽܘܢ̇ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܺܝ̣ܬܳܐ ܐܱܡܝ̣ܢܳܐܝ̣ܬ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܫܰܘܝܳܐܝ̣ܬ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡܰܝܟ ܥܺܕܬܳܟ ܩܰܕܝ̣ܫܬܳܐ ܩܰܪܒܰܬ݀ ܒܝܰܘܡܳܐ ܗܳܢܳܐ ܕܒܶܗ ܣܓܺܝ̣̈ ܚܰܕܘ̈ܳܬܰܢ: ܒܶܗ ܡܶܢܳܟ ܢܶܬܦܰܢܝ̈ܳܢ ܫܶܐܠܴ̈ܬܳܐ ܫܰܦܝ̣ܪ̈ܳܬܳܐ: ܘܰܒܫܘ̣ܒܩܳܢܳܐ ܕܡܶܢܳܟ ܢܶܥܬܪ̈ܳܢ ܢܰܦܫ̈ܳܬܰܢ: ܘܒܰܫܦܝ̣ܥܘ̣ܬ ܛܰܝ̈ܒܘܳܬܳܟ ܢܶܫܬܰܦܥ̈ܳܢ ܒܘ̣ܪ̈ܟܳܬܰܢ : ܡܫܝ̣ܚܳܐ ܕܚܰܫ ܡܶܛܽܠܳܬܰܢ ܘܩܳܡ ܡܶܢ ܩܰܒܪܳܐ ܘܐܰܩܝ̣ܡ ܣܚܝ̣ܦܘ̣ܬܰܢ : ܠܳܟ ܫܘ̣ܒܚܳܐ ܡܶܢ ܦܘ̣ܡܰܝ̈ܢ ܘܣܶܦܘ̈ܳܬܰܢ : ܘܠܰܐܒܘ̣ܟ ܫܳܒܘ̣ܩܳܐ ܕܚܰܘܒ̈ܳܬܰܢ ܘܰܠܪܘ̣ܚܳܟ ܩܰܕܝ̣ܫܳܐ ܡܰܥܒܪܳܢܳܐ ܕܥܳܩ̈ܳܬܰܢ ܘܡܰܦܨܚܳܢܳܐ ܕܰܟܡܝ̣ܪܘ̣ܬܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܚܽܘܬܳܡܳܐ

ܕܰܝܳܢܳܐ ܕܕܰܝ̈ܳܢܶܐ ܕܐܰܝܟ ܐܶܡܪܳܐ ܠܕܝ̣ܢܳܐ ܐܶܬܩܰܪܰܒ ܫܰܬܝ̣ܩܳܐܝ̣ܬ: ܘܡܶܢ ܚܒܘ̣ܫܝܳܐ ܘܡܶܢ ܕܝ̣ܢܳܐ ܐܶܬܕܒܰܪ ܡܰܟܝ̣ܟܳܐܝ̣ܬ: ܝܳܗܶܒ ܠܳܐ ܚܳܫܘ̣ܫܘ̣ܬܳܐ ܕܚܰܫ ܚܠܳܦܰܝܢ ܨܶܒܝܳܢܳܐܝ̣ܬ: ܘܰܒܚܰܫܶܗ ܒܰܛܶܠ ܠܚܰܫܰܝ̈ܢ ܓܰܢ̱ܒܳܪܳܐܝ̣ܬ: ܦܪܘ̣ܩ ܡܳܪܝ̱ ܠܥܺܕܬܳܟ ܒܚܰܝܠܳܟ ܪܰܒܳܐ ܬܰܩܝ̣ܦܳܐܝ̣ܬ: ܘܢܰܛܰܪ ܠܝܰܠ̈ܕܶܝܗ̇ ܘܫܰܗܳܐ ܠܰܫܓܘ̣̈ܫܝܶܐ ܐܰܡܝ̣ܢܳܐܝ̣ܬ: ܘܐܰܪܘܰܚ ܠܰܐܠܝ̣̈ܨܶܐ ܘܰܠܥܰܝܺܝ̈ܩܰܝ ܠܶܒܳܐ ܢܦܺܐܫܳܐܝ̣ܬ: ܕܢܰܘܕܶܐ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܫܰܘܝܳܐܝ̣ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀