ܨܠܽܘܬܳܐ ܕܫܽܘܪܳܝܳܐ

ܠܳܐ ܡܳܝܽܘ̣ܬܳܐ ܐܰܠܳܗܳܐ ܕܡܝ̣ܬ ܒܰܒܣܰܪ ܡܶܛܽܠܳܬܰܢ ܘܐܰܚܝ̣ ܠܓܶܢܣܰܢ ܡܳܝܽܘ̣ܬܳܐ: ܘܰܒܬܶܫܒܘ̣ܚܬܳܐ ܩܳܡ ܡܶܢ ܩܰܒܪܳܐ: ܘܠܰܟܝܳܢܰܢ ܚܰܕܶܬ ܘܐܰܬܩܶܢ ܡܶܢܕܪܝ̣ܫ: ܐܰܢ̱ܬ ܡܳܪܝܳܐ ܡܳܪܰܢ ܚܰܕܶܬ ܬܶܫܒܚ̈ܳܬܳܐ ܕܝ̣ܠܳܟ ܒܦܘ̣̈ܡܰܝܢ: ܘܬܰܘܕ̈ܝܳܬܳܟ ܒܠܶܫܳܢܰܝ̈ܢ: ܘܐܰܫܪܳܐ ܒܰܢ ܚܘ̣ܒܳܟ ܘܪܶܚܡܬܳܟ ܟܽܠܗܘܢ̇ ܝܰܘ̈ܡܳܬܳܐ ܕܚܰܝܰܝ̈ܢ: ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘܡܝܽܘܢ

ܬܶܫܒܘ̣ܚܬܳܐ ܐܰܡܝ̣ܢܬܳܐ ܘܬܰܘܕܝ̣ܬܳܐ ܥܦܝ̣ܦܬܳܐ: ܘܩܘ̣ܠܳܣܳܐ ܫܰܦܝܳܐ ܘܰܨܠܝ̣ܠܳܐ ܟܽܠܰܢ ܢܶܫܬܘܶܐ ܕܰܢܩܰܪܶܒ ܒܩܳܠܳܐ ܕܠܳܐ ܫܳܬܶܩ: ܠܚܰܕ ܐܰܒܳܐ ܩܰܕܝ̣ܫܳܐ ܐܰܘܨܪܳܐ ܕܟܽܠܳܗ̇ ܩܰܕܝ̣ܫܘ̣ܬܳܐ: ܠܚܰܕ ܒܪܳܐ ܩܰܕܝ̣ܫܳܐ ܕܚܰܫ ܘܡܝ̣ܬ ܒܰܒܣܰܪ ܡܶܛܽܠܳܬܰܢ: ܘܐܶܬܩܒܰܪ ܘܩܳܡ ܡܶܢ ܩܰܒܪܳܐ ܚܠܳܦ ܓܶܢܣܳܐ ܕܰܒܢܰܝ̈ܢܳܫܳܐ: ܠܚܰܕ ܪܘ̣ܚܳܐ ܩܰܕܝ̣ܫܳܐ ܓܳܡܘ̣ܪܳܐ ܘܰܡܫܰܡܠܶܐ ܟܽܠ ܒܩܰܕܝ̣ܫܘ̣ܬܳܐ ܕܠܶܗ ܟܽܠܰܢ ܢܶܫܬܘܶܐ ܕܰܢܩܰܪܶܒ ܬܶܫܒܚ̈ܳܬܳܐ ܘܩܘ̣̈ܠܳܣܶܐ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܘܢ̇ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܘܢ̇ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܝ̣ܠܰܢ: ܗܰܘ ܕܰܫܘܶܐ ܐܰܢ̱ܬ ܒܐܝ̣ܬܘ̣ܬܳܐ ܗܳܝ ܡܬܘ̣ܡܳܝܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܟܰܕ ܒܚܰܪܰܬ ܙܰܒܢ̈ܶܐ ܦܰܓܪܳܐ ܡܳܝܽܘܬܳܐ ܢܣܰܒ̣ܬ ܠܳܟ ܡܶܢ ܓܶܢܣܳܐ ܐ̱ܢܳܫܳܝܳܐ: ܘܰܕܡܘ̣ܬܳܐ ܕܥܰܒܕܱܳܐ ܢܣܰܒܬ ܘܢܰܦܫܳܐ ܚܰܝܬܳܐ ܘܝܰܕܘ̣ܥܬܳܢܝ̣ܬܳܐ ܚܰܝܶܕܬ ܠܳܟ ܨܶܒܝܳܢܳܐܝ̣ܬ ܘܰܒܡܘ̣̈ܫܚܳܬܳܐ ܐ̱ܢܳܫܳܝ̈ܳܬܳܐ ܥܰܡܰܢ ܐܶܬܗܰܦܰܟܬ: ܐܰܢ̱ܬ ܕܐܝ̣ܬܰܝܟ ܐܰܠܳܗܳܐ ܒܰܟܝܳܢܳܟ ܘܰܠܥܶܠ ܡܶܢ ܚܰܫ̈ܶܐ ܘܥܘ̣ܪ̈ܙܳܠܶܐ ܕܰܚܛܝ̣ܬܳܐ ܫܰܪܝ̣ܪܳܐܝ̣ܬ ܟܽܠܡܶܕܶܡ ܒܳܟ ܐܶܬܒܪܝ̣ ܘܐܶܬܬܰܩܰܢ ܪܶܡܙܳܢܳܐܝ̣ܬ: ܐܰܢ̱ܬ ܗ̱ܘ̣ ܕܥܰܡ ܐܰܒܳܐ ܘܪܘ̣ܚܳܐ ܡܶܬܓܰܝܶܐܐ ܐܰܢ̱ܬ ܡܬܘ̣ܡܳܐܝ̣ܬ: ܘܟܰܕ ܠܟܽܠܳܗ̇ ܡܕܰܒܪܳܢܘ̣ܬܳܟ ܦܳܪܘ̣ܩܳܝܬܳܐ ܕܰܚܠܳܦܰܝܢ ܫܰܡܠܝ̣ܬ ܒܰܩܢܘ̣ܡܳܟ ܨܶܒܝܳܢܳܐܝ̣ܬ: ܘܰܠܡܰܘܬܳܐ ܨܶܒܝܳܢܳܝܳܐ ܝܰܗ̣ܒܬ ܢܰܦܫܳܟ ܫܝ̣ܛܳܐܝ̣ܬ ܐܰܝܟܰܢܳܐ ܕܒܳܟ ܢܶܬܚܰܕܰܬ ܨܰܠܡܳܐ ܕܝ̣ܠܰܢ ܕܐܶܬܚܰܒܰܠ ܒܰܚܛܝܬܐ ܡܳܪܘ̣ܕܳܐܝ̣ܬ: ܘܟܰܕ ܠܩܰܒܪܳܐ ܙܥܘ̣ܪܳܐ ܒܨܶܒܝܳܢܳܟ ܥܰܠ̣ܬ ܐܰܝܟ ܒܰܪܢܳܫܳܐ ܘܚܰܝܰܬ݀ ܡܝ̣̈ܬܶܐ ܡܠܰܟ̣ܬ ܠܰܢ ܐܰܝܟ ܐܰܠܳܗܳܐ ܡܳܪܳܢܳܐܝ̣ܬ: ܘܒܶܗ ܒܗܳܢܳܐ ܥܺܐܕܳܐ ܩܰܕܝ̣ܫܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܢܚܶܬܘ̱ ܡܰܠܰܐܟ̈ܶܐ ܡܶܢ ܫܡܰܝܳܐ ܘܥܰܓܶܠܘ̱ ܟܺܐܦܳܐ ܡܶܢ ܦܘ̣ܡ ܩܰܒܪܳܐ: ܘܝ̣ܬܶܒܘ̱ ܥܠܶܝܗ̇ ܙܗܝ̣ܪܳܐܝ̣ܬ ܘܚܰܘܺܝ̣ܘ ܒܗܳܕܶܐ ܕܰܬܚܶܝܬ ܫܘ̣ܥܒܳܕܳܐ ܐܝ̣ܬܰܝܗܘܢ̇ ܕܐܰܠܳܗܘ̣ܬܳܟ ܫܡܰܝܳܐ ܘܐܰܪܥܳܐ ܘܟܽܠ ܕܰܒܗܘܢ̇ ܦܳܩܘ̣ܕܳܐܝ̣ܬ: ܘܟܰܕ ܒܗܳܢܳܐ ܝܰܘܡܳܐ ܩܰܕܝ̣ܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܐܰܙܠܶܓ ܢܘ̣ܗܪܳܟ ܒܗܰܘܬܳܐ ܚܶܫܘ̣ܟܬܳܐ ܕܡܝ̣̈ܬܶܐ ܢܰܗܝ̣ܪܳܐܝ̣ܬ: ܘܐܰܪܓܶܫܘ̱ ܟܽܠܗܘܢ̇ ܒܡܰܥܰܠܬܳܟ ܕܰܠܘܳܬܗܘܢ̇ ܡܰܐܠܘܢ̇ ܚܳܕܝܳܐܝ̣ܬ: ܘܰܫܪܰܝܬܳܝܗ̱ܝ ܫܘ̣ܠܛܳܢ ܡܰܘܬܳܐ ܘܰܡܠܰܟܬ ܚܰܝ̈ܶܐ ܘܢܘ̣ܚܳܡܳܐ ܦܨܝ̣ܚܳܐܝ̣ܬ: ܘܒܶܗ ܒܗܳܢܳܐ ܝܰܘܡܳܐ ܩܰܕܝ̣ܫܳܐ ܕܚܰܕ ܒܫܰܒܳܐ ܫܩܰܠ̈ܝ̱ ܗ̱ܘܰܝ̈ ܢܶܫ̈ܶܐ ܢܰܟ̈ܦܳܬܳܐ ܒܶܣ̈ܡܶܐ ܘܗܶܪ̈ܘ̣ܡܶܐ ܕܰܢܒܰܣ̈ܡܳܢ ܠܦܰܓܪܳܟ ܝܰܩܝ̣ܪܳܐܝ̣ܬ: ܘܰܢܦܰܩ̈ܝ̱ ܠܩܰܒܪܳܟ ܡܰܥܒܶܕ ܚܰܝ̈ܶܐ ܫܰܦܪܳܐܝ̣ܬ: ܘܡܶܢ ܡܰܠܰܐܟ̈ܶܐ ܐܶܣܬܰܒܰܪ̈ܝ̱ ܥܰܠ ܩܝܳܡܬܳܟ ܡܰܥܒܶܕ ܚܰܝ̈ܶܐ ܪܗܝ̣ܒܳܐܝ̣ܬ: ܘܰܪ̈ܗܶܛܝ̱ ܘܣܰܒܰܪ̈ܝ̱ ܠܰܫܠܝ̣ܚ̈ܶܐ ܟܽܠܗܘܢ̇ ܟܶܢܫܳܐܝ̣ܬ ܕܩܳܡ ܠܶܗ ܡܳܪܰܢ ܡܶܢ ܩܰܒܪܳܐ ܘܰܚܙܰܝܳܝ̈ܗ̱ܝ ܠܩܰܒܪܳܐ ܕܰܦܬܝ̣ܚ ܣܦܝ̣ܩܳܐܝ̣ܬ: ܘܩܳܡܘ̱ ܫܶܡܥܽܘܢ ܘܝܽܘܚܰܢܳܢ ܘܰܪܗܶܛܘ̱ ܠܩܰܒܪܳܟ ܡܰܥܒܶܕ ܚܰܝ̈ܶܐ ܦܨܝ̣ܚܳܐܝ̣ܬ: ܘܡܶܢ ܚܰܕܘ̣ܬܳܐ ܕܐܶܬܡܠܝ̣ܘ ܘܪܶܬܚܳܐ ܚܰܡܝ̣ܡܳܐ ܥܠܰܝܡܳܐ ܩܰܕܡܳܐܝ̣ܬ ܡܛܳܐ ܠܩܰܒܪܳܐ ܪܗܝ̣ܒܳܐܝ̣ܬ: ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܫܝ̣ܚܳܐ ܐܰܠܳܗܰܢ ܚܢܝ̣ܓܳܐܝ̣ܬ ܐܰܢ̱ܬ ܕܐܝ̣ܬܰܝܟ ܢܘ̣ܚܳܡܳܐ ܘܚܰܝ̈ܶܐ ܘܣܰܒܪܳܐ ܘܠܘ̣ܒܳܒܳܐ ܕܟܽܠܰܢ ܡܳܪܳܢܳܐܝ̣ܬ: ܠܳܐ ܬܰܗܡܶܐ ܚܝܳܪܳܟ ܡܶܢܰܢ ܡܶܛܽܠ ܣܰܢܝ̈ܳܬܰܢ ܘܠܳܐ ܢܳܡܘ̣̈ܣܳܝܘܳܬܳܐ ܕܡܶܢܰܢ ܐܶܣܬܥܰܪ̈ܝ̱ ܗܰܦܟܳܐܝ̣ܬ: ܘܰܗܘܺܝ̣ ܩܳܝܽܘ̣ܡܳܐ ܘܰܡܥܰܕܪܳܢܳܐ ܘܰܡܢܰܛܪܳܢܳܐ ܘܰܡܚܰܣܝܳܢܳܐ ܘܒܶܝܬ ܓܰܘܣܳܐ ܡܕܰܒܪܳܢܳܐܝ̣ܬ: ܘܫܰܘܙܶܒ ܠܰܢ ܡܶܢ ܟܽܠܗܶܝܢ ܣܰܩܘ̣ܒܠ̈ܳܝܳܬܳܐ ܕܡܶܬܟܰܬܫ̈ܳܢ ܥܰܡܰܢ: ܘܩܳܝ̈ܡܳܢ ܠܩܘ̣ܒܠܰܢ ܠܚܝ̣ܡܳܐܝ̣ܬ: ܘܰܟܠܝ̣ ܡܶܢܰܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܘ̣ܓܙܳܐ ܡܳܪܘ̣ܕܳܐܝ̣ܬ: ܘܗܰܒܠܰܢ ܫܰܦܝ̣ܪܘ̣ܬ ܡܡܰܙܓܘ̣ܬܳܐ ܗܳܝ ܕܐܳܐܰܪ̈ܰܣ ܚܠܝ̣ܡܳܐܝ̣ܬ: ܐܳܦ ܚܘ̣ܠܡܳܢ ܢܰܦܫ̈ܳܬܰܢ ܘܦܰܓܪ̈ܰܝܢ ܡܣܰܡܣܡܳܐܝ̣ܬ: ܘܐܰܘܪܶܒ ܠܥܺܕܬܳܟ ܒܬܶܫܒܚ̈ܳܬܳܐ ܩܰܕܝ̣̈ܫܳܬܳܐ ܡܗܰܕܪܳܐܝ̣ܬ: ܘܰܣܥܘ̣ܪܶܝܗ̇ ܒܪ̈ܰܚܡܶܐ ܣܰܓܺܝ̈ܶܐܐ ܘܰܡܠܺܝ̣ـܝܳܗ̇ ܫܘ̣̈ܟܳܢܶܐ ܕܡܰܘ̈ܗܒܳܬܳܟ ܗܳܢܶܝܢ ܥܰܬܝ̣ܪܳܐܝ̣ܬ: ܟܰܕ ܦܳܪܶܩ ܐܰܢ̱ܬ ܠܳܗ̇ ܡܶܢ ܒܥܶܠ̈ܕܒܳܒܶܝܗ̇ ܘܡܶܢ ܟܽܠ ܙܰܒܢ̈ܶܐ ܕܚܰܫ̈ܶܐ ܘܐܘ̣ܠ̈ܨܳܢܶܐ ܥܰܝܽܘ̣ܩܬܳܢܳܐܝ̣ܬ: ܘܢܰܛܰܪ ܠܰܒܢܶܝ̈ܗ̇ ܒܰܐܘܝܽܘ̣ܬܳܐ ܕܡܶܢܳܟ ܠܳܐ ܦܠܝ̣ܓܳܐܝ̣ܬ: ܘܪܰܡܪܶܡ ܩܰܪܢܳܗ̇ ܒܰܐܪ̈ܒܰܥܦܶܢܝܳܢ ܕܰܒܪܝ̣ܬܳܐ ܡܥܰܠܝܳܐܝ̣ܬ: ܘܰܥܒܶܕ ܕܘ̣ܟܪܳܢܳܐ ܛܳܒܳܐ ܠܥܰܢܝ̣̈ܕܶܐ ܡܗܰܝ̈ܡܢܶܐ ܕܡܶܢܳܗ̇ ܫܟܶܒܘ̱ ܥܰܠ ܡܰܕܒܚܳܟ ܡܚܰܣܝܳܢܳܐܝ̣ܬ: ܕܰܚܢܰܢ ܘܗܶܢܽܘܢ̇ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܓܡܝ̣ܪܳܐܝ̣ܬ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܫܰܘܝܳܐܝ̣ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܠܳܟ ܡܳܪܝܳܐ ܐܰܠܳܗܰܢ ܩܰܪܶܒܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ: ܠܪܝ̣ܚܳܐ ܗܰܢܺܝܳܐܐ ܘܒܰܣܝ̣ܡܳܐ ܒܝܰܘܡܳܐ ܕܰܩܝܳܡܬܳܐ ܕܝ̣ܠܳܟ ܡܫܰܒܰܚܬܳܐ ܕܡܶܢ ܩܰܒܪܳܐ: ܐܶܨܛܒܝ̣ ܡܳܪܝܳܐ ܒܥܶܕܳܢܳܐ ܗܳܢܳܐ ܕܰܩܕܳܡܰܝܟ ܩܳܝܡܝ̣ܢܰܢ: ܘܰܠܡܳܪܘ̣ܬܳܟ ܒܶܣ̈ܡܶܐ ܕܡܶܢ ܥܶܩܳܪ̈ܶܐ ܐܰܥܛܰܪܢܰܢ ܦܰܢܳܐ ܫܶܐܠܴ̈ܬܰܢ ܘܚܰܣܳܐ ܚܰܘܒ̈ܳܬܰܢ ܘܐܰܢܝ̣ܚ ܪ̈ܘ̣ܚܳܬܰܢ: ܘܩܰܒܶܠ ܦܝ̣ܪܡܰܢ ܘܐܶܬܬܢܝ̣ܚ ܒܬܶܫܡ̈ܫܳܬܰܢ: ܘܠܳܟ ܫܘ̣ܒܚܳܐ ܡܶܢ ܦܘ̣ܡ ܟܽܠܰܢ ܡܫܝ̣ܚܳܐ ܕܩܳܡ ܡܶܢ ܩܰܒܪܳܐ ܘܰܦܪܰܩ ܠܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܚܽܘܬܳܡܳܐ

ܐܰܠܳܗܳܐ ܠܳܐ ܚܳܫܘ̣ܫܳܐ ܕܚܰܫ ܒܰܒܣܰܪ ܚܠܳܦܰܝܢ ܘܠܳܐ ܚܳܫܘ̣ܫܘ̣ܬܳܐ ܫܰܟܶܢ ܠܰܢ: ܘܰܒܚܰܫܶܗ ܒܰܛܶܠ ܠܚܰܫܰܝ̈ܢ ܓܰܢ̱ܒܳܪܳܐܝ̣ܬ: ܦܪܘ̣ܩ ܡܳܪܝ̱ ܠܥܺܕܬܳܟ ܒܛܰܝܒܘ̣ܬܳܟ ܘܥܰܕܰܪ ܠܝܰܠ̈ܕܶܝܗ̇ ܬܰܩܝ̣ܦܳܐܝ̣ܬ: ܘܢܰܛܰܪ ܐܶܢܘܢ̇ ܡܶܢ ܢܶܟܝ̈ܳܢܶܐ ܥܰܙܝ̣ܙܳܐܝ̣ܬ: ܘܰܫܓܘ̣̈ܫܝܶܐ ܘܚܶܪ̈ܝܳܢܶܐ ܢܶܫܬܰܗܘܢ̇ ܡܶܢ ܒܶܝܬ ܓܘ̣̈ܕܶܝܗ̇ ܐܰܡܝ̣ܢܳܐܝ̣ܬ: ܘܬܶܬܶܒܝ̱ ܝܳܪܬܘ̣ܬܳܟ ܒܫܰܝܢܳܐ ܘܒܰܫܠܳܡܳܐ ܢܝ̣ܚܳܐܝ̣ܬ: ܘܰܩܪ̈ܳܒܶܐ ܢܶܬܒܰܛܠܘܢ̇ ܡܶܢܳܗ̇ ܒܗܝ̣ܠܳܐܝ̣ܬ: ܘܟܽܠ ܝܰܡܝ̣̈ܢܳܝܳܬܳܐ ܢܶܫܬܰܟ̈ܢܳܢ ܠܳܗ̇ ܡܪܰܚܡܳܢܳܐܝ̣ܬ: ܐܰܪܘܰܚ ܠܰܐܠܝ̣̈ܨܶܝܗ̇ ܘܐܰܩܝ̣ܡ ܠܰܟܪ̈ܺܝ̣ܗܶܝܗ̇ ܐܳܣܝܳܐܝ̣ܬ: ܕܬܰܣܶܩܝ̱ ܫܘ̣ܒܚܳܐ ܦܨܝ̣ܚܳܐܝ̣ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀