ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܳܪܳܐ ܛܳܒܳܐ ܘܪܳܚܶܡ ܐ̱ܢܳܫܳܐ ܕܨܶܒܝܳܢܶܗ ܠܡܰܘܬܳܐ ܐܰܝܬܝܶܗ: ܘܚܽܘܒܶܗ ܣܰܓܺܝܳܐܐ ܠܩܰܒܪܳܐ ܐܰܥܠܶܗ ܡܥܰܠܝܳܐ ܕܡܶܢ ܟܽܠ ܡܥܰܠܰܝ ܘܰܓܢܺܝܙ ܒܰܟܝܳܢܶܗ: ܥܰܬܺܝܪܳܐ ܕܟܽܠ ܥܽܘܬܪ̈ܺܝܢ ܡܶܬܕܰܠܶܝܢ ܡܶܢ ܓܰܙܶܗ: ܘܰܠܟܽܠ ܓܰܒܺܝ̣̈ܢ ܡܦܰܠܶܓ ܣܺܝ̣̈ܡܳܬܶܗ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܐܰܢ̱ܬ ܗܳܟܺܝܠ ܡܫܺܝܚܳܐ ܐܰܠܳܗܳܐ ܕܺܝܠܰܢ: ܒܝܰܕ ܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܰܒܪܶܚܡܰܬ݀ ܐ̱ܢܳܫܽܘܬܳܟ ܐܰܠܳܗܳܝܬܳܐ: ܠܥܺܕܬܳܟ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ ܓܒ̣ܰܝܬ ܡܶܢ ܥܰܡ̱̈ܡܶܐ ܟܽܠܗܽܘܢ: ܘܒܰܕܡܳܟ ܩܰܕܺܝܫܳܐ ܙܒܶܢܬܳܗ̇ ܘܟܰܠܬܳܐ ܡܫܰܒܰܚܬܳܐ ܚܰܘܺܝܬܳܗ̇: ܘܰܒܢܰܝ̈ܳܐ ܕܺܝܠܳܟ ܘܝܳܪܬܽܘܬܳܟ ܥܒ̣ܰܕܬܳܢ ܘܚܰܪܰܪܬܳܢ: ܘܰܦܪܰܩܬܳܢ ܡܶܢ ܫܽܘܥܒܳܕܳܐ ܕܡܰܘܬܳܐ ܘܣܳܛܳܢܳܐ ܘܰܒܢܽܘܗܪܳܐ ܦܰܐܝܳܐ ܕܺܝܕܰܥܬܳܟ ܐܰܢܗܰܪܬܳܢ: ܘܫܰܟܶܢ ܠܰܢ ܡܳܪܝܳܐ ܐܰܠܳܗܳܐ ܘܰܠܟܽܠܗܽܘܢ ܒܢܰܝ̈ܳܐ ܕܺܝܠܳܟ: ܘܗܰܒܠܰܢ ܕܦܽܘܩܕ̈ܳܢܰܝܟ ܐܰܠܳܗܳܝ̈ܶܐ ܢܶܛܰܪ ܘܢܶܬܗܰܓܶܐ ܒܗܽܘܢ ܘܰܒܢܳܡܽܘ̈ܣܰܝܟ ܢܶܪܕܶܐ ܐܺܝܡܳܡܳܐ ܘܠܺܠܝܳܐ ܘܰܒܩܰܕܺܝܫܽܘܬܳܐ ܕܡܶܢܳܟ ܢܶܬܩܰܕܰܫ ܘܢܶܫܬܰܡܠܐܷ ܘܢܶܚܕܶܐ ܒܳܟ: ܘܠܰܣܒܰܪܬܳܐ ܕܺܝܠܳܟ ܡܰܚܝܳܢܺܝܬܳܐ ܢܰܟܪܶܙ: ܘܠܐܷܘܰܢܓܶܠܝܽܘܢ ܕܺܝܠܳܟ ܒܰܝܢܳܬ ܥܰܡ̱̈ܡܶܐ ܘܶܐܡܘ̈ܳܬܳܐ ܢܶܛܥܰܢ: ܘܠܐܘ̣ܪܚܳܐ ܗܳܝ ܕܰܕܪܰܫ̣ܘ̱ ܠܰܢ ܫܠܺܝ̈ܚܶܐ ܩܰܕܺܝ̈ܫܶܐ ܘܰܢܒܺܝ̈ܶܐ ܡܒܰܕ̈ܩܳܢܶܐ ܢܶܩܰܦ: ܘܒܳܗ̇ ܢܶܪܕܶܐ ܘܰܢܗܰܠܶܟ ܒܥܶܩ̈ܒܳܬܳܐ ܕܺܝܠܗܽܘܢ ܬܪ̈ܺܝܨܳܬܳܐ: ܘܰܒܨܶܒܝܳܢܳܐ ܕܰܐܠܳܗܽܘܬܳܟ ܢܶܬܓܡ̣ܰܪ ܟܽܠܰܢ ܘܒܰܫܒܺܝܚܽܘܬܳܐ ܕܫܰܟ̣ܶܢܬ ܠܗܽܘܢ ܒܳܗ̇ ܢܶܬܟܰܠܰܠ: ܘܰܠܥܰܡܳܐ ܕܺܝܠܳܟ ܡܗܰܝܡܢܳܐ ܐ̱ܪܳܙܳܐ ܕܦܽܘܩܕܳܢܰܝ̈ܟ ܢܶܬܶܠ: ܘܡܶܠܬܳܐ ܕܚܰܝ̈ܶܐ ܘܰܕܚܰܕ̈ܘܳܬܳܐ ܠܗܽܘܢ ܢܣܰܒܰܪ: ܘܰܒܢܽܘܗܪܳܐ ܕܺܝܠܳܟ ܫܒܺܝܚܳܐ ܢܶܬܗܰܪ: ܘܡܶܢ ܡܰܒܽܘܥܳܟ ܪܽܘܚܳܢܳܝܳܐ ܫܦܺܝܥܳܐܝ̣ܬ ܢܶܬܦܰܛܰܡ ܘܰܒܫܶܩܝܳܟ ܕܚܰܝ̈ܶܐ ܓܡܺܝܪܳܐܝ̣ܬ ܢܶܬܒܰܣܰܡ: ܘܟܽܠܝܽܘܡ ܩܺܝ̈ܢܳܬܳܐ ܚܰܠܝ̈ܳܬܳܐ ܘܬܶܫܒ̈ܚܳܬܳܐ ܦܰܐܝ̈ܳܬܳܐ ܒܥܺܐܕܳܐ ܕܰܩܝܳܡܬܳܟ ܡܫܰܒܰܚܬܳܐ ܕܡܶܢ ܩܰܒܪܳܐ ܠܳܟ ܢܰܣܶܩ: ܘܰܒܟܽܠܥܶܕܳܢ ܬܰܘܕ̈ܝܳܬܳܐ ܣܒܺܝ̣̈ܣܳܬܳܐ ܘܰܐܡܺܝ̣̈ܢܳܬܳܐ ܠܳܟ ܢܩܰܪܶܒ: ܘܝܰܬܺܝܪܳܐܝ̣ܬ ܠܢܽܘܚܳܡܳܟ ܫܒܺܝܚܳܐ ܘܰܡܠܐܷ ܬܶܗܪܳܐ ܥܰܡ ܣܳܥܽܘܪܽܘܬ ܬܶܕܡܪ̈ܳܬܳܟ ܫܒܺܝ̈ܚܳܬܳܐ ܘܰܬܡܺܝ̈ܗܳܬܳܟ ܘܰܫܠܳܡܳܐ ܫܰܟܶܢ ܠܡܰܪܥܺܝܬܳܟ: ܘܫܰܝܢܳܐ ܠܥܺܕܬܳܟ ܕܰܡܣܰܟܝܳܐ ܠܰܚܢܳܢܳܟ ܘܡܰܘܕܝܳܐ ܒܰܙܩܺܝܦܽܘܬܳܟ ܘܰܡܗܰܝܡܢܳܐ ܒܰܐܠܳܗܽܘܬܳܟ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܕܡܶܢܳܗ̇ ܚ̣ܙܰܩܘ ܒܗܰܝܡܳܢܽܘܬܳܐ ܕܰܫܪܳܪܳܐ: ܫܰܟܶܢ ܒܽܘܣܳܡܳܐ ܘܰܦܨܺܝܚܽܘܬܳܐ ܕܡܶܢ ܓܰܒܳܐ ܝܰܡܺܝܢܳܝܳܐ ܒܝܰܘܡܳܐ ܕܡܶܐܬܺܝܬܳܟ ܕܡܶܢ ܫܡܰܝܳܐ: ܘܰܚܢܰܢ ܘܟܽܠܗܽܘܢ ܝܰܠܕ̈ܶܝܗ̇ ܕܥܺܕܬܳܐ ܡܗܰܝܡܰܢܬܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀