ܨܠܽܘܬܳܐ ܕܫܽܘܪܳܝܳܐ

ܐܰܫܪܳܐ ܡܳܪܝ̱ ܫܰܝܢܳܟ ܒܥܺܕܬܳܐ ܕܺܝܠܳܟ ܩܰܕܺܝܫܬܳܐ: ܘܰܫܠܳܡܳܟ ܒܟܽܠܳܗ̇ ܡܶܬܥܰܡܪܳܢܺܝܬܳܐ ܘܢܰܛܰܪ ܝܰܠܕ̈ܶܝܗ̇ ܒܚܰܝܠܐܴ ܕܰܨܠܺܝܒܳܟ ܘܦܰܬܳܐ ܣܳܚܪ̈ܳܬܳܗ̇ ܘܰܐܘܪܶܒ ܫܡܳܗ̇: ܫܰܪܪܰ ܛܽܘܢ̈ܒܶܝܗ̇ ܘܩܰܝܶܡ ܣܶܟܶܝ̈ܗ̇ ܘܡܰܟܶܟ ܠܰܒܥܶܠܕ̈ܒܳܒܶܝܗ̇ ܩܕܳܡܶܝܗ̇: ܘܰܣܬܽܘܪ ܠܪܰܘܡܳܐ ܕܡܶܬܥܰܫܰܢ ܥܠܶܝܗ̇ ܘܰܡܠܺܝـܝܳـܗ̇ ܫܰܝܢܳܐ ܘܰܫܠܳܡܳܐ ܘܚܽܘܒܳܐ ܟܰܗܺܝܢܳܐ: ܕܬܰܘܕܶܐ ܠܳܟ ܡܳܪܝ̱ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܰܬܠܺܝܬܳܝܽܘܬܳܐ ܣܓܺܝܕܬܳܐ ܕܠܐܴ ܡܶܬܒܰܨܝܳܢܺܝܬܳܐ ܡܶܢ ܕܳܪ̈ܽܘܫܶܐ: ܠܰܚܕܳܐ ܐܰܠܳܗܽܘܬܳܐ ܡܪܰܝܰܡܬܳܐ ܕܠܐܴ ܡܶܬܕܰܪܫܳܐ ܡܶܢ ܚܰܟܺܝ̣̈ܡܶܐ ܠܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܪ̈ܳܡܺܝܢ ܡܶܢ ܝܺܕܰܥܬܳܐ ܕܰܒܢܰܝ̈ܢܳܫܳܐ: ܐܝ̣ܬܝܳܐ ܡܬܽܘܡܳܝܳܐ ܕܙܳܝܥܺܝܢ ܟܽܠܗܽܘܢ ܗܰܘ̈ܢܶܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܡܶܢ ܐܝ̣ܬܘܬܶܗ: ܡܳܪܝܳܐ ܡܪܰܝܡܳܐ ܕܰܡܠܶܝܢ ܫܡܰܝܰܐ ܘܰܐܪܥܳܐ ܡܶܢ ܬܶܫܒܽܘܚܬܶܗ: ܕܠܶܗ ܡܶܬܬܚܺܝܒܳܐ ܒܰܠܚܽܘܕܰܘܗ̱ܝ ܣܶܓܕܬܳܐ ܡܶܢ ܥܶܠܳܝ̈ܶܐ ܘܬܰܚܬܳܝ̈ܶܐ ܕܰܒܪܳܬ݀ ܝܰܡܺܝܢܶܗ: ܡܰܠܐܱܟ̈ܶܐ ܘܰܒܢܰܝ̈ܢܳܫܳܐ ܫܳܘ̈ܝܰܝ ܕܶܚܠܬܳܐ ܕܠܶܗ ܝܳܐܶܐ ܫܽܘܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܕܠܰܡܕܰܒܪܳܢܽܘܬܳܐ ܕܺܝܠܳܟ ܦܳܪܽܘܩܳܝܬܳܐ ܥ̱ܳܗܕܺܝܢܰܢ ܗܳܝ ܕܡܶܛܽܠ ܦܽܘܪܩܳܢܳܐ ܕܺܝܠܰܢ ܒܡܰܕܥܰܢ ܚܰܠܳܫܳܐ ܢܳܣܒܺܝܢܰܢ: ܘܰܒܚܰܫܳܐ ܕܺܝܠܳܟ ܡܶܫܬܰܒܗܪܺܝܢܰܢ ܘܠܰܨܠܺܝܒܳܟ ܚܰܝܳܐ ܣܳܓܕܺܝܢܰܢ ܘܰܡܝܰܩܪܺܝܢܰܢ: ܘܒܰܩܝܳܡܬܳܟ ܡܰܠܝܰܬ݀ ܬܶܗܪܳܐ ܚܳܕܶܝܢܰܢ ܘܪܳܘܙܺܝܢܰܢ ܟܰܕ ܠܐܴ ܡܶܬܦܰܠܓܺܝܢܰܢ ܘܰܒܣܽܘܠܳܩܳܟ ܡܥܰܠܝܳܐ ܕܡܶܢ ܐܰܪܥܳܐ ܠܰܫܡܰܝܳܐ ܚܳܕܶܝܢܰܢ ܘܕܳܝܨܺܝܢܰܢ: ܘܰܒܡܰܘܬܒܳܟ ܕܡܶܢ ܝܰܡܺܝܢ ܐܰܒܽܘܟ ܬܳܗܪܺܝܢܰܢ ܘܡܶܬܕܰܡܪܺܝܢܰܢ ܘܰܠܡܶܐܬܺܝܬܳܟ ܬܪܰܝܳܢܺܝܬܳܐ ܡܣܰܟܶܝܢܰܢ: ܗܳܝ ܕܒܳܗ̇ ܠܥܰܡܳܐ ܕܰܐܪܓܶܙ ܠܛܰܝܒܽܘܬܳܟ ܒܟܺܐܢܽܘܬܳܐ ܘܒܰܬܪܺܝܨܽܘܬܳܐ ܦܳܪܰܥ ܐܰܢ̱ܬ: ܘܥܰܠܗܳܕܶܐ ܡܶܬܟܰܫܦܺܝܢܰܢ ܠܳܟ ܐܳܘ ܡܶܠܬܳܐ ܐܰܠܳܗܳܐ ܠܐܴ ܬܶܟܦܽܘܪ ܒܰܢ ܒܝܰܘܡܳܟ ܪܰܒܳܐ ܕܠܐܴ ܟܦ̣ܰܪܢܰܢ ܒܚܰܫ̈ܶܐ ܝܰܩܺܝܪ̈ܶܐ ܕܰܙܩܺܝܦܽܘܬܳܟ: ܠܰܘ ܓܶܝܪ ܬܪܶܝܢ ܟܝ̈ܳܢܶܐ ܐܰܘ ܬܪܶܝܢ ܩܢܽܘ̈ܡܶܐ ܡܰܘܕܶܝܢܰܢ ܠܳܟ: ܐܰܘ ܬܰܪܬܶܝܢ ܡܰܥܒܕܳܢ̈ܘܳܬܳܐ ܡܳܢܶܝܢܰܢ ܒܳܟ: ܘܠܐܴ ܝܳܕܥܺܝܢܰܢ ܦܰܓܪܳܐ ܕܠܐܴ ܐܰܠܳܗܳܐ: ܘܳܐܦܠܐܴ ܦܰܓܪܳܐ ܕܠܐܴ ܡܶܢ ܒܬܽܘܠܬܳܐ: ܘܠܐܴ ܝܳܗܒܺܝܢܰܢ ܬܡܺܝ̈ܗܳܬܳܐ ܠܚܰܕ ܘܡܳܟ̈ܳܬܳܐ ܠܐܱܚܪܺܢܳܐ: ܘܠܐܴ ܐܳܡܪܺܝܢܰܢ ܕܶܐܬܓܒܶܠ ܦܰܓܪܳܐ ܘܗܳܝܕܶܝܢ ܐܰܓܢܰܬ݀ ܒܶܗ ܐܰܠܳܗܽܘܬܳܐ ܒܳܬܰܪ ܡܶܬܚܳܐ ܕܰܫܢܰܝ̈ܳܐ ܣܰܓܺܝ̈ܳܐܬܳܐ ܫܪܳܬ݀ ܥܠܰܘܗ̱ܝ ܪܽܘܚܳܐ ܕܩܽܘܕܫܳܐ: ܕܰܟܦ̣ܰܪ ܘܶܐܡ̣ܰܪ ܢܶܣܛܽܘܪ ܪܰܫܺܝܥܳܐ ܠܺܝܛܳܐ: ܘܠܰܘ ܒܰܪܝܰܐ ܗ̱̇ܘ ܒܰܐܠܳܗܽܘܬܶܗ ܐܰܝܟ ܕܶܐܡ̣ܰܪ ܐܰܪܺܝܳܘܣ ܘܰܕܒܶܝܬ ܡܰܐܢܺܝ ܘܒܰܪܕܰܝܨܳܢ ܠܺܝ̈ܛܶܐ ܘܡܰܚܪ̈ܡܶܐ: ܘܠܰܘ ܒܕܰܓܳܠܽܘܬܳܐ ܕܕܽܘܡܝܳܐ ܦܰܓܪܳܐ ܗܳܘܶܐ ܗ̱ܘܳܐ: ܐܰܝܟ ܙܺܐܦܶܗ ܘܰܟܦܽܘܪܝܶܗ ܕܡܰܪܩܺܝܰܢܳܘܣ ܦܰܩܪܳܐ ܘܓܽܘܡܕܳܢܳܐ: ܘܠܰܘ ܡܶܫܬܰܚܠܳܦܽܘ ܐܶܫܬܰܚܠܰܦ ܐܰܝܟ ܛܳܥܝܽܘܬܳܐ ܕܽܐܘܛܽܘܟܶܐ ܡܰܚܪܡܳܐ: ܘܠܰܘ ܐܰܝܟ ܕܰܒܣܺܝܠܽܘܢܳܐ ܛܡܺܝܡܳܐ ܥܒ̣ܰܪ ܘܶܐܬܳܐ ܠܝܰܠܕܳܐ ܐܰܝܟ ܫܳܢܝܽܘܬܳܐ ܕܺܝܠܶܗ ܕܝܽܘܠܝܰܢܶܐ ܡܰܚܪܡܳܐ ܘܕܰܐܠܺܝܩܰܪܢܣܽܘܣ: ܘܠܐܴ ܣܳܟ ܡܦܰܠܓܺܝܢܰܢ ܠܶܗ ܠܰܬܪܶܝܢ ܠܗܰܘ ܠܐܴ ܡܶܬܦܰܠܓܳܢܳܐ ܠܰܬܪܶܝܢ ܘܠܐܴ ܐܳܡܪܺܝܢܰܢ ܕܚܰܕ ܐܶܬܺܝܠܶܕ ܘܰܐ̱ܚܪܺܢܳܐ ܠܐܴ: ܘܠܐܴ ܡܰܘܕܶܝܢܰܢ ܠܶܗ ܬܪܶܝܢ ܐܝ̣ܬܝ̈ܳܝܶܐ ܚܰܕ ܛܳܒܳܐ ܘܚܰܕ ܒܺܝܫܳܐ ܐܰܝܟ ܕܶܐܡ̣ܰܪ ܠܺܝܛܳܐ ܐܰܪܺܝܳܘܣ ܕܡܺܝܬ ܒܰܓܙܳܪ ܕܺܝܢܳܐ ܕܫܳܘܶܐ ܗ̱ܘܳܐ ܠܶܗ: ܘܠܐܴ ܚܰܕ ܝܳܢܶܩ ܚܰܠܒܳܐ ܘܰܐ̱ܚܪܺܢܳܐ ܠܐܴ: ܘܠܰܘ ܐܰܝܟ ܕܳܐܡܪܺܝܢ ܐܺܝܪ̈ܺܝܛܺܝܩܽܘ ܡܰܣܠܰܝ̈ܳܐ ܕܒܰܪܢܳܫܳܐ ܐܶܬܬܠܺܝ ܗ̱ܘܳܐ ܒܩܰܝܣܳܐ ܘܠܰܘ ܐܰܠܳܗܳܐ: ܚܢܰܢ ܕܶܝܢ ܡܰܘܕܶܝܢܰܢ ܠܶܗ ܠܐܱܠܳܗܳܐ ܗܰܘ ܕܰܠܒ̣ܶܫ ܠܶܗ ܦܰܓܪܳܐ ܡܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܠܐܴ ܡܢܰܣܝܰܬ݀ ܒܙܽܘܘܳܓܳܐ: ܠܰܘ ܦܰܓܪܳܐ ܐܰܠܳܗܳܝܳܐ ܬܠܰܘ ܒܰܙܩܺܝܦܳܐ: ܘܩܳܡ ܡܶܢ ܩܰܒܪܳܐ ܟܰܕ ܚܳܬܡ̈ܶܐ ܘܛܰܒ̈ܥܶܐ ܕܩܰܒܪܳܐ ܠܐܴ ܣܕܺܝܩܺܝܢ ܐܰܝܟ ܕܰܢܦ̣ܰܩ ܡܶܢ ܟܰܪܣܳܐ ܘܰܒܬܽܘ̈ܠܐܷ ܕܶܐܡܶܗ ܠܐܴ ܫ̣ܪܳܐ: ܡܶܛܽܠ ܗܳܕܶܐ ܚܢܰܢ ܠܳܗ̇ ܠܰܒܬܽܘܠܬܳܐ ܝܳܠܕܰܬ݀ ܐܰܠܳܗܳܐ ܡܰܟܪܙܺܝܢܰܢ: ܘܰܠܗܳܕܶܐ ܗܰܝܡܳܢܽܘܬܳܐ ܫܳܠܡܺܝܢܰܢ: ܘܡܶܢ ܬܚܽܘ̈ܡܶܐ ܕܣܳܡ̣ܘ̱ ܠܰܢ ܐܰܒܳܗ̈ܳܬܳܐ ܩܰܕܺܝ̈ܫܶܐ ܠܐܴ ܡܫܰܢܶܝܢܰܢ: ܘܠܰܨܠܺܝܒܳܐ ܕܒܰܪܢܳܫܳܐ ܠܐܴ ܣܳܓܕܺܝܢܰܢ: ܐܶܠܐܴ ܠܶܗ ܠܰܨܠܺܝܒܳܐ ܕܐܰܠܳܗܳܐ ܚܰܝܳܐ: ܗܰܘ ܕܚܰܫ ܘܶܐܨܛܠܶܒ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘ̈ܡܺܝܢ: ܘܩܳܡ ܒܫܽܘܒܚܳܐ ܘܙܳܟܽܘܬܳܐ ܘܰܐܩܺܝܡ ܥܰܡܶܗ ܠܐܴܕܳܡ ܘܰܠܝܰܠܕ̈ܰܘܗ̱ܝ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܘܰܐܒܳܗ̈ܳܬܳܐ ܕܠܶܗ ܡܣܰܟܶܝܢ ܗ̱ܘܰܘ: ܘܠܶܗ ܡܶܬܝܰܐܝܒܺܝܢ ܕܡܶܢ ܢܽܘܓܪܳܐ ܪܰܒܳܐ ܢܺܐܬܶܐ ܘܢܶܦܪܽܘܩ ܐܶܢܽܘܢ ܡܶܢ ܐܺܝ̈ܕܰܝ ܒܺܝܫܳܐ: ܩܳܡ ܘܠܐܴ ܚ̣ܙܳܐ ܚܒܳܠܐܴ ܒܶܝܬ ܡܺܝ̈ܬܶܐ ܦܳܪܩܳܐ ܪܰܒܳܐ: ܡܳܕܶܝܢ ܒܳܗܬܺܝܢ ܐܺܝܪ̈ܺܝܛܺܝܩܽܘ ܡܰܣܠܰܝ̈ܳܐ ܕܟܳܦܪܺܝܢ ܕܩܳܡ ܡܶܢ ܩܰܒܪܳܐ ܘܰܐܪܒܥܺܝܢ ܝܰܘ̈ܡܺܝܢ ܟܰܬܰܪ ܥܰܠ ܐܰܪܥܳܐ: ܐܰܝܟܰܢܳܐ ܕܰܢܫܰܪܰܪ ܐܶܢܽܘܢ ܠܬܰܠܡܺܝ̈ܕܰܘܗ̱ܝ ܥܰܠ ܩܝܳܡܬܶܗ ܡܰܚܝܳܢܺܝܬܳܐ: ܘܰܣܠ̣ܶܩ ܠܰܫܡܰܝܳܐ ܘܺܝܬܶܒ ܥܰܠ ܟܽܘܪܣܝܳܐ ܕܬܶܫܒܽܘܚܬܳܐ: ܘܰܥܬܺܝܕ ܕܢܺܐܬܶܐ ܒܗܶܕܪܳܐ ܘܓܰܐܝܽܘܬܳܐ ܕܒܶܝܬ ܐܰܒܽܘܗ̱ܝ: ܘܡܶܢܶܗ ܢܶܒܥܶܐ ܐܳܦ ܢܶܬܟܰܫܰܦ ܕܢܶܬܪܰܚܰܡ ܥܠܰܝܢ ܡܶܣܟ̈ܺܢܶܐ ܥܰܒ̣ܕ̈ܶܐ ܕܺܝܠܶܗ ܘܥܰܠ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܰܠܳܗܰܢ ܕܬܺܐܬܶܐ ܛܰܝܒܽܘܬܳܟ ܠܺܐܝܳܠܰܢ: ܘܰܬܣܰܬܰܪܝ̱ ܠܰܢ: ܘܰܬܢܰܛܰܪܝ̱ ܠܰܢ: ܘܰܬܣܰܝܰܥܝ̱ ܠܰܢ: ܘܡܶܢ ܟܽܠܗܶܝܢ ܡܥܺܝܩܳܢ̈ܝܳܬܰܢ ܬܦܰܨܶܐ ܠܰܢ ܘܰܬܫܰܘܙܶܒܝ̱ ܠܰܢ: ܘܬܶܫܒܽܘܩܝ̱ ܚܛܳܗܰܝ̈ܢ: ܘܬܶܠܚܶܐ ܚܰܘ̈ܒܰܝܢ ܘܰܬܚܰܣܶܐ ܠܰܢ: ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ܀

ܥܶܛܪܳܐ

ܚܰܝܳܐ ܘܡܰܚܝܳܢܳܐ ܕܶܐܬܬܰܚܬܺܝ ܥܕܰܡܳܐ ܠܒܶܝܬ ܡܺܝ̈ܬܶܐ ܒܨܶܒܝܳܢܶܗ: ܘܰܣܥ̣ܰܪ ܠܥܰܢܺܝ̈ܕܶܐ ܒܰܚܢܳܢܶܗ ܘܢܰܚܶܡ ܘܰܐܚܺܝ ܠܡܺܝ̈ܬܶܐ ܒܰܩܒܽܘܪܬܶܗ ܘܰܐܩܺܝܡ ܠܰܩܒܺܝܪ̈ܶܐ ܒܢܽܘܚܳܡܶܗ ܘܫܰܕܰܪ ܐܶܢܽܘܢ ܠܦܰܪܕܰܝܣܳܐ ܕܒܽܘ̈ܣܳܡܐ: ܡܬܽܘܚ ܡܳܪܝ̱ ܗܳܫܳܐ ܒܪܶܚܡܰܬ݀ ܐ̱ܢܳܫܽܘܬܳܟ ܠܐܴ ܡܶܬܡܰܠܠܳـܢܝ̣ܬܳܐ ܠܒܰܣܺܝܡܽܘܬ ܪܺܝܚܳܐ ܕܚܽܘܒܶܗ ܠܘܳܬ ܟܽܠܗܽܘܢ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ ܕܺܝܠܳܟ: ܘܩܰܒܶܠܳܝܗ̱ܝ ܠܦܺܝܪܡܳܐ ܗܳܢܳܐ ܕܰܡܩܰܪܒܳܐ ܠܳܟ ܒܦܽܘܡܳܐ ܕܝܰܠܕ̈ܶܝܗ̇ ܐܰܝܟܰܢܳܐ ܕܬܰܣܶܩܝ̱ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܚܽܘܬܳܡܳܐ

ܗܘܺܝ ܡܳܪܝܳܐ ܒܪ̈ܰܚܡܶܐ ܫܦܺܝ̈ܥܶܐ ܕܛܰܝܒܽܘܬܳܟ: ܣܶܬܳܪܳܐ ܘܢܽܘܛܳܪܳܐ ܠܥܺܕܬܳܟ ܡܗܰܝܡܰܢܬܳܐ ܕܒܳܟ ܐܳܚܕܳܐ ܓܰܘܣܳܐ ܘܢܰܛܰܪܶܝܗ̇ ܡܶܢ ܟܽܠ ܢܶܟܝ̈ܳܢܺܝܢ ܘܫܰܘܙܶܒܶܝܗ̇ ܡܶܢ ܩܪ̈ܳܒܶܐ ܘܬܰܟܬܽܘ̈ܫܶܐ ܘܚܶܪ̈ܝܳܢܶܐ ܕܶܐܪ̈ܶܣܺܝܣ ܡܚܰܒ̈ܠܳܬܳܐ: ܘܕܰܒܰܪܶܝܗ̇ ܒܝܰܡܺܝܢܳܟ ܚܰܝܠܬܳܢܺܝܬܳܐ ܡܰܨܝܰܬ݀ ܟܽܠ ܡܶܢ ܣܽܘܓ̈ܦܳܢܶܐ: ܟܰܕ ܡܫܰܪܰܪ ܐܰܢ̱ܬ ܠܳܗ̇ ܥܰܠ ܫܽܘܥܳܐ ܠܐܴ ܡܶܙܕܰܥܙܥܳܢܳܐ ܘܦܶܛܪܽܘܣܳܝܳܐ ܕܬܰܣܶܩܝ̱ ܠܳܟ ܫܽܘܒܚܳܐ ܒܦܽܘܡ ܝܰܠܕ̈ܶܝܗ̇ ܘܠܐܱܒܽܘܟ܀