ܨܠܽܘܬܳܐ ܕܫܽܘܪܳܝܳܐ

ܢܽܘܗܪܳܐ ܡܫܺܝܚܳܐ ܕܰܣܠܶܩ ܠܰܨܠܺܝܒܳܐ: ܘܶܐܬܡܬܰܚ ܒܪܰܘܡܶܗ ܕܰܙܩܺܝܦܳܐ: ܘܰܦܫܰܛ ܐܺܝܕܰܘ̈ܗ̱ܝ ܘܰܐܙܺܝܥ ܠܐܱܪܒܰܥ ܦܶܢ̈ܝܳܬܳܐ ܘܰܐܝܬܺܝ ܠܣܶܓܕܬܶܗ ܥܰܡ̱̈ܡܶܐ ܘܶܐܡܘ̈ܳܬܳܐ: ܘܶܐܬܥܰܦܺܝ ܒܓܰܘ ܩܰܒܪܳܐ: ܘܶܐܬܡܢܺܝ ܥܰܡ ܥܰܢܺܝ̈ܕܶܐ: ܐܰܢ̱ܬ ܡܳܪܝ̱ ܒܛܰܝܒܽܘܬܳܟ ܐܰܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ̱ ܥܰܠ ܣܰܒܪܳܟ: ܘܰܐܩܺܝܡ ܐܶܢܽܘܢ ܥܰܡ ܓܒܰܝ̈ܳܐ ܕܰܓܒܰܝܬ ܠܐܻܝܩܳܪܳܐ ܕܰܫܡܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܠܐܴ ܡܳܝܽܘܬܳܐ ܕܡܺܝܬ ܒܰܒܣܰܪ ܘܰܐܚܺܝ ܠܡܳܝܽܘ̈ܬܶܐ: ܘܶܐܬܬܣܺܝܡ ܒܓܰܘ ܩܰܒܪܳܐ ܘܢܰܚܶܡ ܠܰܩܒܺܝܪ̈ܶܐ: ܠܗܰܘ ܚܰܝܳܐ ܕܰܕܡܶܟ ܒܶܝܬ ܥܰܢܺܝ̈ܕܶܐ: ܘܰܐܥܺܝܪ ܠܕܰܡ̈ܟܶܐ: ܘܩܳܡ ܡܶܢ ܩܰܒܪܳܐ ܘܰܐܩܺܝܡ ܠܢܰܦ̈ܠܐܷ: ܘܶܐܬܢܰܚܰܡ ܒܫܽܘܒܚܳܐ ܘܚܰܕܺܝ ܠܬܰܠܡܺܝ̈ܕܰܘܗ̱ܝ: ܘܶܐܬܥܰܠܺܝ ܠܪܰܘܡܳܐ ܘܥܰܠܺܝ ܠܬܰܚܬܳܝ̈ܶܐ: ܘܫܰܡܠܺܝ ܫܽܘܘܕܳܝܶܗ ܘܰܓܡܰܪ ܠܚܰܣܺܝܪ̈ܶܐ ܘܶܐܬܳܐ ܒܫܽܘܒܚܳܐ ܕܰܢܕܽܘܢ ܠܒܶܪ̈ܝܳܬܳܐ: ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܡܳܪܝܳܐ ܡܪܰܝܡܳܐ ܘܰܕܚܺܝܠܐܴ ܘܰܗܕܺܝܪܳܐ ܒܚܰܝܠܐܴ ܕܝܰܡܺܝܢܶܗ: ܘܰܓܡܺܝܪܳܐ ܒܥܽܘܫܢܳܐ ܬܰܩܺܝܦܳܐ ܕܓܰܐܝܽܘܬܶܗ: ܓܰܢ̱ܒܳܪܳܐ ܕܰܒܣܽܘܓܳܐܐ ܕܬܽܘܩܦܶܗ ܣܚܰܦ ܠܣܳܐܢܰܘ̈ܗ̱ܝ ܘܰܒܥܽܘܫܢܳܐ ܕܚܰܝܠܶܗ ܒܰܕܰܪ ܠܰܒܥܶܠܕ̈ܒܳܒܶܐ ܕܟܺܐܢܽܘܬܶܗ ܬܰܩܺܝܦܳܐ ܕܰܫܕܳܐ ܒܝܰܡܳܐ ܠܦܶܪܥܽܘܢ ܡܶܬܝܰܕܥܳܢܳܐ ܘܰܠܚܰܝܠܶܗ: ܘܠܰܓܒܰܝ̈ܳܐ ܕܓܰܢ̱ܒܳܪ̈ܶܐ ܛܰܒܰܥ ܒܥܽܘܡܩܳܐ ܕܰܬܗܽܘܡܳܐ ܕܪܶܡܙܶܗ ܕܚܺܝܠܐܴ ܕܶܐܨܛܰܪܺܝܘ ܫܽܘ̈ܥܶܐ ܒܥܶܕܳܢܳܐ ܕܰܙܩܺܝܦܽܘܬܶܗ: ܘܐܰܢܝ̣ܚ ܠܥܰܢܝ̣̈ܕܶܐ ܒܡܝ̣ܬܘ̣ܬܶܗ: ܡܥܰܠܝܳܐ ܕܶܐܬܦܟܰܪ ܒܰܐܣܽܘܪ̈ܶܐ ܕܡܰܘܬܳܐ ܡܶܛܽܠ ܒܶܪ̈ܝܳܬܶܗ: ܘܦܰܣܶܩ ܣܽܘ̈ܛܡܶܐ ܕܰܚܒܳܠܐܴ ܡܶܢ ܓܒܺܝܠܬܶܗ: ܡܳܪܝܳܐ ܕܡܶܢ ܫܶܢ̈ܶܐ ܕܰܫܝܽܘܠ ܒܳܠܰܥܬܳܐ ܐܰܦܶܩ ܠܨܰܠܡܶܗ ܘܡܶܢ ܓܰܘ ܥܘ̣ܡܩܰܘ̈ܗ̱ܝ ܐܰܦܶܩ ܠܝܘ̣ܩܢܶܗ: ܪܳܡܳܐ ܕܰܠܗܰܘܬܳܐ ܕܡܝ̣̈ܬܶܐ ܢܚܶܬ ܒܰܚܢܳܢܶܗ: ܘܠܳܐܕܳܡ ܪܰܡܝܳܐ ܐܰܩܝ̣ܡ ܥܰܡܶܗ ܡܶܢ ܓܰܘ ܥܓܳܢܳܐ: ܦܳܪܽܘܩܳܐ ܕܰܐܨܡܰܚ ܐܶܢܽܘܢ ܠܡܰܠܐܱܟ̈ܶܐ ܒܝܰܘܡܳܐ ܕܢܽܘܚܳܡܶܗ: ܘܚܰܕܺܝ ܠܥܰܦܪ̈ܳܢܶܐ ܒܫܽܘܒܚܳܐ ܕܰܩܝܳܡܬܶܗ: ܝܰܘܡܳܢܳܐ ܒܗ̣ܶܬܘ̱ ܙܳܩܽܘ̈ܦܶܐ ܕܰܟܦܰܪܘ̱: ܘܰܪܘܰܙܘ̱ ܗ̱ܘܰܘ ܬܰܠܡܺܝ̈ܕܶܐ ܩܰܕܺܝ̈ܫܶܐ ܕܗܰܝܡܶܢܘ̱ ܒܶܗ: ܐܶܬܟܰܦܰܪ̈ܝ̱ ܕܶܡ̈ܥܶܐ ܕܚܰܘܳܐ ܕܚܶܕܝܰܬ݀ ܒܶܗ: ܘܰܥܒܰܪ ܐܶܒܠܐܴ ܕܳܐܕܳܡ ܕܰܛܦܰܣ ܒܶܗ: ܝܰܘܡܳܢܳܐ ܪ̈ܕܰܝ ܢܶܫ̈ܶܐ ܟܰܕ ܛܥܺܝ̈ܢܳܢ ܒܶܣ̈ܡܶܐ ܘܗܶܪ̈ܽܘܡܶܐ ܕܰܢܒܰܣ̈ܡܳܢ ܦܰܓܪܶܗ: ܘܰܗܦܰܟ̈ܝ̱ ܡܶܢ ܩܰܒܪܳܐ ܟܰܕ ܛܥܺܝ̈ܢܳܢ ܫܽܘܘܕܳܥܳܐ ܕܰܩܝܳܡܬܶܗ: ܝܰܘܡܳܢܳܐ ܪܗܶܛܘ̱ ܫܶܡܥܽܘܢ ܘܝܽܘܚܰܢܳܢ ܕܰܢܕܺܝܩܽܘܢ ܒܩܰܒܪܶܗ: ܘܣܰܒܰܪ ܐܶܢܽܘܢ ܡܰܠܐܱܟܳܐ ܩܰܕܺܝܫܳܐ ܥܰܠ ܢܽܘܚܳܡܶܗ: ܝܰܘܡܳܢܳܐ ܒܗܶܬܘ̱ ܚܰܢܳܢ ܘܩܰܝܳܦܳܐ ܕܰܛܠܰܡܘ̱ ܗ̱ܘܰܘ ܫܽܘܒܚܶܗ: ܘܰܪܘܰܙܘ̱ ܦܶܛܪܽܘܣ ܘܰܐܢܕܪܶܐܘܳܣ ܕܗܰܝܡܶܢܘ̱ ܒܶܗ: ܝܰܘܡܳܢܳܐ ܐܶܬܒܰܕܰܪܘ̱ ܙܳܩܽܘ̈ܦܶܐ: ܘܰܒܗܶܬܘ̱ ܩܶܣܛܽܘܢܳܪ̈ܶܐ ܕܢܳܛܪܺܝܢ ܗ̱ܘܰܘ ܩܰܒܪܶܗ: ܘܰܪܗܶܛܘ̱ ܗ̱ܘܰܘ ܥܰܡ̱̈ܡܶܐ ܕܢܶܚܙܽܘܢ ܘܢܶܪܽܘܙܽܘܢ ܒܝܰܘܡܳܐ ܕܰܩܝܳܡܬܶܗ: ܝܰܘܡܳܢܳܐ ܛܪܺܝܕܳܐ ܨܶܗܝܽܘܢ ܘܦܳܗܝܳܐ ܒܶܝܬ ܥܰܡ̱̈ܡܶܐ ܕܰܐܣܠܝܰܬܶܗ: ܘܚܳܕܝܳܐ ܘܪܳܘܙܳܐ ܥܺܕܬܳܐ ܡܗܰܝܡܰܢܬܳܐ ܕܩܰܒܶܠܬܶܗ: ܝܰܘܡܳܢܳܐ ܚܳܕܶܝܢ ܘܪܳܘܙܺܝܢ ܥܰܡ̱̈ܡܶܐ ܕܗܰܝܡܶܢܘ̱ ܒܶܗ: ܘܒܰܗܺܝܬ ܥܰܡܳܐ ܠܺܝܛܳܐ ܕܰܟܦܰܪ ܒܶܗ: ܝܰܘܡܳܢܳܐ ܚܰܕܽܘܬܳܐ ܪܰܒܬܳܐ ܘܬܰܪܥܽܘܬܳܐ ܘܰܪܘܳܙܳܐ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܕܰܒܢܽܘܚܳܡܶܗ ܐܶܫܬܰܝܰܢܘ̱ ܓܰܒ̈ܶܐ ܬܪ̈ܰܝܗܽܘܢ ܕܰܪܓܺܝܙܺܝܢ ܗ̱ܘܰܘ: ܠܳܟ ܡܳܪܝܳܐ ܕܗܳܠܶܝܢ ܟܽܠܗܶܝܢ ܛܰܝܒ̈ܘܳܬܳܐ ܠܐܴ ܡܶܬܦܰܪ̈ܥܢܳܝܳܬܳܐ ܣܥܰܪܬ ܠܘܳܬܰܢ ܒܚܽܘܒܳܟ ܣܰܓܺܝܳܐܐ: ܒܳܥܶܝܢܰܢ ܘܠܳܟ ܡܶܬܟܰܫܦܺܝܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܬܩܰܒܶܠ ܐܶܢܽܘܢ ܒܪܶܚܡܰܬ݀ ܐ̱ܢܳܫܽܘܬܳܟ ܠܐܴ ܡܶܬܡܰܠܠܳـܢܺܝ̣ܬܳܐ: ܘܰܥܒܶܕ ܐܶܢܽܘܢ ܠܰܢܝܳܚܳܐ ܕܐܰܠܳܗܽܘܬܳܟ ܘܰܠܬܰܪܥܽܘܬܳܐ ܘܠܰܡܫܰܝܢܽܘܬܳܐ ܕܰܡܪܰܚܡܳܢܽܘܬܳܟ ܘܰܐܢܗܰܪ ܠܥܰܝ̈ܢܶܐ ܕܪ̈ܶܥܝܳܢܰܝܢ ܒܢܽܘܗܪܳܐ ܫܰܪܺܝܪܳܐ ܕܰܩܝܳܡܬܳܟ: ܐܰܝܟ ܕܰܠܢ̈ܶܫܶܐ ܩܰܕܺܝ̈ܫܳܬܳܐ ܕܰܚ̈ܙܰܝ ܢܽܘܚܳܡܳܟ: ܘܐܰܠܒܶܫ ܐܶܢܽܘܢ ܠܒܽܘ̈ܫܶܐ ܦܰܐܝ̈ܳܐ ܕܬܶܫܒܽܘܚܬܳܐ ܐܰܝܟ ܕܰܠܡܰܠܐܱܟ̈ܶܐ ܕܶܐܬܘܰܥܰܕܘ̱ ܗ̱ܘܰܘ ܠܩܰܒܪܳܟ ܩܰܕܺܝܫܳܐ: ܘܟܰܠܶܠ ܐܶܢܽܘܢ ܒܰܟܠܺܝ̈ܠܐܷ ܕܙܳܟܽܘܬܳܐ: ܘܡܰܢܰܥ ܐܶܢܽܘܢ ܒܓܰܠܝܽܘܬ ܐܰܦ̈ܶܐ ܠܝܰܘܡܳܐ ܕܓܶܠܝܳܢܳܟ: ܘܰܐܫܘܳܐ ܐܶܢܽܘܢ ܘܠܰܢ ܥܰܡܗܽܘܢ ܕܥܰܡ ܦܰܪܶܗܣܺܝܰܐ ܢܶܦܓܰܥ ܒܳܟ: ܘܰܒܚܰܕܽܘܬܳܐ ܢܩܰܒܠܳܟ: ܘܒܰܪܘܳܙܳܐ ܢܶܣܓܽܘܕ ܠܛܰܝܒܽܘܬܳܟ: ܘܒܰܕܝܳܨܳܐ ܢܫܰܒܰܚ ܠܫܳܠܽܘܚܳܟ ܘܰܢܗܰܕܰܪ ܠܪܽܘܚܳܟ ܩܰܕܺܝܫܳܐ܀

ܥܶܛܪܳܐ

ܗܰܒܳܒܳܐ ܗܰܢܺܝ̣ ܪܺܝܚܳܐ ܗܰܘ ܕܒܰܫܝܽܘܠ ܒܳܠܥܰܬ݀ ܓܰܢ̱ܒܳܪ̈ܶܐ ܪܺܝܚܶܗ ܦܳܚ: ܘܰܠܡܺܝ̈ܬܶܐ ܥܓܺܝ̈ܢܶܐ ܕܚܰܠܶܨ ܘܰܫܪܳܐ ܒܳܗ̇ ܒܺܝܫܳܐ ܚܰܝܠܬܳܢܳܐܝ̣ܬ ܒܰܣܶܡ: ܘܰܬܠܳܬܳܐ ܝܰܘ̈ܡܺܝܢ ܒܳܗ̇ ܟܰܬܰܪ: ܒܗܳܝ ܠܰܬܠܳܬܳܐ ܒܥܶܠܕ̈ܒܳܒܶܐ ܫܰܦܶܠ ܒܰܩܝܳܡܬܶܗ: ܠܐܴܟܶܠܩܰܪܨܳܐ ܘܰܚܛܺܝܬܳܐ ܘܡܰܘܬܳܐ: ܐܰܢ̱ܬ ܡܳܪܝ̱ ܠܙܰܦܪܽܘܬܳܐ ܕܰܚܛܳܗܰܝ̈ܢ ܒܝܰܕ ܗܰܢܺܝܐܘܽܬ ܪܺܝܚܳܐ ܕܰܩܝܳܡܬܳܟ ܡܫܰܒܰܚܬܳܐ: ܘܰܐܫܺܝܓ ܘܰܡܪܽܘܩ ܡܶܢܰܢ ܒܝܰܕ ܥܶܛܪܳܐ ܕܒܶܣ̈ܡܶܐ ܗܳܠܶܝܢ ܕܡܶܢ ܒܨܺܝܪܽܘܬܰܢ ܐܶܬܩܰܪܰܒ ܠܳܟ ܡܳܪܝܳܐ ܡܒܰܣܶܡ ܠܥܳܢ̈ܳܗ̇ ܒܢܽܘܗܪܳܐ ܦܰܐܝܳܐ ܕܰܩܝܳܡܬܶܗ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܚܽܘܬܳܡܳܐ

ܡܫܺܝܚܳܐ ܚܰܬܢܳܐ ܕܰܫܪܳܪܳܐ ܕܰܠܥܺܕܬܳܟ ܩܰܕܺܝܫܬܳܐ ܨܰܒܶܬܬܳܗ̇: ܒܦܰܐܝܽܘܬܳܐ ܒܝܰܘܡܳܐ ܕܰܩܝܳܡܬܳܟ: ܐܰܠܒܶܫ ܠܰܢ ܠܒܽܘ̈ܫܶܐ ܚܶܘܳܪ̈ܶܐ ܕܰܥܒܳܕ̈ܶܐ ܛܳܒ̈ܶܐ ܕܢܶܪܕܶܐ ܒܽܐܘܪܚܳܐ ܕܢܳܡܽܘ̈ܣܰܝܟ ܐܺܝܡܳܡܳܐ ܘܠܺܠܝܳܐ: ܘܨܰܒܶܬ ܠܰܢ ܒܶܐܣܛܠܐܴ ܕܬܶܫܒܽܘܚܬܳܐ ܐܰܝܟܰܢܳܐ ܕܥܰܡ ܚܕܽܘ̈ܓܶܐ ܕܰܚܠܽܘܠܳܟ ܒܰܓܢܽܘܢܳܐ ܡܠܐܷ ܢܽܘܗܪܳܐ ܢܫܰܒܚܳܟ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀