ܨܠܽܘܬܳܐ ܕܫܽܘܪܳܝܳܐ

ܬܠܺܝܬܳܝܳܐ ܘܰܠܚܽܘܕܳܝܳܐ ܐܰܠܳܗܳܐ ܗܰܘ ܕܰܬܠܺܝܬܳܐܝ̣ܬ ܡܶܫܬܰܒܰܚ ܒܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ: ܘܒܰܬܠܳܬܳܐ ܫܡܳܗ̈ܶܐ ܣܓܺܝ̈ܕܶܐ ܡܶܬܗܰܝܡܰܢ ܐܳܦ ܡܶܬܺܝܕܰܥ: ܘܒܰܬܠܳܬ ܥܺܕ̈ܳܬܳܐ ܕܰܫܡܰܝܳܐ ܡܶܬܒܰܪܰܟ: ܒܝܽܘ̈ܒܳܒܶܐ ܕܚܰܝܠܰܘ̈ܳܬܳܐ ܫܡܰܝ̈ܳܢܶܐ ܡܶܬܢܰܨܰܪ ܘܡܶܬܗܰܕܰܪ: ܐܰܢ̱ܬ ܡܳܪܝܳܐ ܐܰܠܳܗܳܐ ܩܰܕܶܫ ܠܰܢ ܒܗܰܘܢܳܐ ܘܢܰܦܫܳܐ ܘܦܰܓܪܳܐ: ܐܰܝܟܰܢܳܐ ܕܰܬܠܺܝܬܳܐܝ̣ܬ ܢܫܰܒܚܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ܀

ܦܪܽܘܡܝܽܘܢ

ܫܽܘܒ̈ܚܶܐ ܬܠܺܝܬܳܝ̈ܶܐ ܒܩ̈ܳܠܐܷ ܬܠܺܝܬܳܝ̈ܶܐ ܒܩܺܝܢܬܳܐ ܬܠܝܬܳܝܰܬ݀ ܩܽܘ̈ܕܳܫܶܐ ܢܶܫܬܘܶܐ ܕܰܢܩܰܪܶܒ ܠܐܱܒܳܐ ܩܰܕܺܝܫܳܐ ܕܰܬܠܺܝܬܳܐܝ̣ܬ ܐܰܟܚܕܳܐ ܡܶܬܩܰܕܰܫ ܘܠܰܒܪܳܐ ܩܰܕܺܝܫܳܐ ܕܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܡܶܫܬܰܒܰܚ: ܘܰܠܪܽܘܚܳܐ ܩܰܕܺܝܫܳܐ ܕܥܰܡ ܐܰܒܳܐ ܘܰܒܪܳܐ ܫܰܘܝܳܐܝ̣ܬ ܡܶܬܝܰܩܰܪ: ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ݀ ܒܽܐܘܣܺܝܰܐ ܒܺܐܝܩܳܪܳܐ ܘܒܺܐܝܬܽܘܬܳܐ: ܐܰܒܳܐ ܕܚܰܕ ܐܝ̣ܬܰܘܗ̱ܝ: ܘܰܒܪܳܐ ܕܚܰܕ ܐܝ̣ܬܰܘܗ̱ܝ: ܘܪܽܘܚܳܐ ܕܚܰܕ ܐܝ̣ܬܰܘܗ̱ܝ: ܬܠܺܝܬܳܝܽܘܬܳܐ ܣܓܺܝܕܬܳܐ ܚܰܕ ܐܰܠܳܗܳܐ ܫܰܪܺܝܪܳܐ: ܚܰܕ ܒܳܪܽܘܝܳܐ: ܚܰܕ ܓܳܒܽܘܠܐܴ ܚܰܕ ܡܳܪܝܳܐ: ܚܰܕ ܨܶܒܝܳܢܳܐ: ܚܕܳܐ ܡܰܥܒܕܳܢܽܘܬܳܐ: ܚܕܳܐ ܕܠܐܴ ܡܣܰܝܟܳܐ ܠܶܗ ܚܕܳܝܽܘܬܳܐ: ܘܰܬܠܳܬܳܐ ܕܠܐܴ ܡܬܰܚܡܳܐ ܠܗܽܘܢ ܬܠܺܝܬܳܝܽܘܬܳܐ: ܚܰܕ ܚܰܝܠܐܴ ܕܰܠܥܶܠ ܡܶܢ ܟܽܠ ܫܽܘܡܳܗ̇: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܐܝ̣ܬܝܳܐ ܠܐܴ ܡܶܬܕܰܪܟܳܢܳܐ ܘܠܐܴ ܡܶܬܒܰܨܝܳܢܳܐ ܩܢܽܘܡܳܐ ܡܫܰܒܚܳܐ ܘܠܐܴ ܡܶܬܡܰܠܠܳـܢܳܐ: ܟܝܳܢܳܐ ܓܢܺܝܙܳܐ ܘܠܐܴ ܡܶܬܚܰܙܝܳܢܳܐ: ܗܰܘ ܕܰܬܠܺܝܬܳܐܝ̣ܬ ܥܰܡ ܐܰܒܳܐ ܘܪܽܘܚܳܐ ܡܶܣܬܓܶܕ ܡܶܙܕܰܝܰܚ ܘܡܶܫܬܰܒܰܚ: ܡܶܢ ܬܠܳܬ ܥܺܕ̈ܳܬܳܐ ܕܚܰܝ̈ܠܰܘܳܬܳܐ ܢܽܘܪ̈ܳܢܶܐ ܘܰܫܡܰܝ̈ܳܢܶܐ: ܗܰܘ ܕܰܬܠܺܝܬܳܐܝ̣ܬ ܩܰܝܶܡ ܠܰܒܪܺܝܬܶܗ ܗܽܘܠܳܢܳܝܬܳܐ ܘܕܰܠܥܶܠ ܡܶܢ ܗܽܘ̣̈ܠܐܷ: ܟܰܕ ܐܰܒܽܘܗ̱ܝ ܫܰܪܺܝ ܘܗ̣ܽܘ ܫܰܡܠܺܝ ܘܪܽܘܚܳܐ ܩܰܕܺܝܫܳܐ ܓܰܡ̣ܰܪ: ܗܰܘ ܕܛܰܟ̣ܶܣ ܬܠܺܝܬܳܐܝ̣ܬ ܠܟܽܠ ܚܕܳܐ ܡܶܢ ܥܺܕ̈ܳܬܳܐ ܕܰܠܥܶܠ ܒܰܬܠܳܬܳܐ ܬܶܓ̈ܡܶܐ: ܘܰܬܠܺܝܬܳܐܝ̣ܬ ܢܶܗܘܽܘܢ ܡܫܰܒܚܺܝܢ ܠܶܗ ܐܰܝܟ ܕܰܡܟܳܢܺܝܢ: ܠܥܳܠܡܳܐ ܕܶܝܢ ܕܰܠܬܰܚܬ ܐܳܦ ܬܠܺܝܬܳܐܝ̣ܬ ܥܒ̣ܰܕ: ܒܗܽܘ̣̈ܠܐܷ ܘܳܐܕܫ̈ܶܐ ܘܓܶܢ̈ܣܶܐ: ܠܐܴܕܳܡ ܕܶܝܢ ܒܢܰܦܫܳܐ ܘܰܒܦܰܓܪܳܐ ܘܗܰܘܢܳܐ ܝܰܩܰܪ ܬܠܺܝܬܳܐܝ̣ܬ: ܗܳܢܳܐ ܕܶܝܢ ܥܰܠ ܢܳܡܽܘܣܳܟ ܥܒ̣ܰܪ ܘܰܠܡܶܠܬܳܟ ܠܳܐ ܫܡܰܥ ܘܫܳܛ ܦܽܘܩܕܳܢܳܟ ܬܠܺܝܬܳܐܝ̣ܬ ܕܶܝܢ ܐܶܬܡܰܚܺܝ: ܘܶܐܬܦܰܪܣܺܝ ܕܶܝܢ ܘܰܢܦ̣ܰܠ ܡܶܢ ܪܰܘܡܳܐ ܘܶܐܬܛܪܶܕ ܡܶܢ ܐܰܬܪܶܗ: ܘܰܒܕܺܝ̣̈ܢܶܐ ܬܠܳܬܳܐ ܚܰܝ̣ܶܒܬ ܠܐܱܝܠܶܝܢ ܕܰܢܩ̣ܶܦܘ̱ ܠܡܳܪܽܘܕܳܐ: ܠܐܴܕܳܡ ܘܰܠܚܰܘܳܐ ܘܰܠܚܶܘܝܳܐ: ܠܐܴܕܳܡ ܕܰܠܥܰܦܪܳܐ ܬܶܗܦܽܘܟ ܘܰܐܪܥܳܐ ܕܟܽܘ̈ܒܶܐ ܬܶܦܠܽܘܚ: ܘܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܐ ܠܚܰܘܳܐ ܕܶܝܢ ܕܰܒܟܺܐܒ̈ܶܐ ܬܺܐܠܕܺܝܢ ܒܢܰܝ̈ܳܐ: ܘܰܠܘܳܬ ܒܰܥܠܶܟܝ̱ ܬܶܗܦܟܺܝܢ: ܘܗ̣ܽܘ ܢܶܫܬܰܠܰܛ ܥܠܰܝܟܝ̱: ܘܰܠܚܶܘܝܳܐ ܕܥܰܠ ܟܰܪܣܳܟ ܬܗܰܠܶܟ ܘܰܕܥܰܦܪܳܐ ܬܶܗܘܶܐ ܡܶܐܟܽܘܠܬܳܟ ܘܒܶܝܬ ܟܽܘ̈ܒܶܐ ܢܶܗܘܶܐ ܝܰܬܒܳܟ ܘܡܰܥܡܪܳܟ: ܠܩܳܐܶܝܢ ܕܶܝܢ ܬܠܺܝܬܳܐܝ̣ܬ ܦ̣ܪܰܥܬ ܗܳܝ ܕܠܺܝܛ ܐܰܢ̱ܬ ܡܶܢ ܐܰܪܥܳܐ: ܘܬܶܗܘܶܐ ܙܳܐܰܥ ܘܢܳܐܶܕ ܒܰܐܪܥܳܐ: ܘܩܳܐܶܝܢ ܚܰܕ ܒܫܰܒܥܳܐ ܢܶܬܦܪܰܥ: ܠܢܽܘܚ ܕܶܝܢ ܙܰܕܺܝܩܳܐ ܕܰܬܠܺܝܬܳܐܝ̣ܬ ܢܶܪܟܰܒ ܠܟܶܐܘܶܝܠܐܴ ܦܰܩ̣ܶܕܬ: ܐܰܒܪܳܗܳܡ ܪܳܚܡܳܟ ܬܠܺܝܬܺܐܝ̣ܬ ܐܶܫܬܰܘܕܥܳܟ: ܕܥܰܡ ܐܰܒܳܐ ܘܪܽܘܚܳܐ ܚܕܳܢܳܐܝ̣ܬ ܫܰܡܗܳܟ: ܠܐܻܝܣܚܳܩ ܒܰܬܠܳܬܳܐ ܝܰܘ̈ܡܺܝܢ ܥܒ̣ܰܕܬ ܦܽܘܪܩܳܢܳܐ: ܠܝܰܥܩܽܘܒ ܬܽܘܒ ܬܠܺܝܬܳܐܝ̣ܬ ܐܶܬܓܠ̣ܰܝܬ ܒܣܶܒܠܬܳܐ: ܘܒܰܩܪܳܒܳܐ ܕܥܰܡ ܡܰܠܐܱܟܳܐ: ܘܰܒܟܺܐܦܳܐ ܗܳܝ ܕܰܡܫ̣ܰܚ ܒܒܶܝܬ ܐܺܝܠ: ܠܡܽܘܫܶܐ ܕܶܝܢ ܬܠܳܬ ܙܰܒܢܺܝ̈ܢ ܐܶܬܚ̣ܙܰܝܬ ܒܛܽܘܪ ܣܺܝܢܰܝ: ܒܣܰܢܝܳܐ ܘܒܰܥܢܳܢܳܐ ܘܰܒܥܽܘܢܕܳܢܶܗ: ܕܰܘܺܝܕ ܬܠܺܝܬܳܐܝ̣ܬ ܫܶܐܠ ܦܽܘܪܩܳܢܳܐ ܒܪܰܡܫܳܐ ܘܰܒܨܰܦܪܳܐ ܘܰܒܛܰܗܪܳܐ: ܘܒܰܬܠܳܬܳܐ ܓܰܒܪ̈ܶܐ ܐܶܬܓܰܡܪܰܬ݀ ܗܘܳܬ݀ ܫܶܐܠܬܶܗ: ܐܠܶܝܫܳܥ ܢܒܺܝܳܐ ܒܛܰܠܝܳܐ ܕܰܚ̣ܝܳܐ ܕܰܬܠܺܝܬܳܐܝ̣ܬ ܡܶܬܦܰܘܰܩ: ܝܰܘܢܳܢ ܢܒܺܝܳܐ ܕܰܬܠܳܬܳܐ ܝܰܘ̈ܡܺܝܢ ܒܰܟܪܶܣ ܢܽܘܢܳܐ ܩܰܘܺܝ: ܢܺܝܢܘܶܐ ܕܒܰܬܠܳܬܳܐ ܝܰܘ̈ܡܺܝܢ ܐ̱ܚܪ̈ܳܝܶܐ ܕܒܳܥܽܘܬܳܐ ܢܶܣܒܰܬ݀ ܫܽܘܒܩܳܢܳܐ: ܬܳܡܳܪ ܕܒܰܬܠܳܬܳܐ ܐܳܕܫܺܝ̈ܢ ܢܶܣܒܰܬ݀ ܙܳܟܽܘܬܳܐ: ܗܳܟܘܳܬ ܘܰܒܟܽܠܗܽܘܢ ܥܶܕ̈ܳܢܶܐ ܐ̱ܪܳܙܳܐ ܬܠܺܝܬܳܝܳܐ ܡܶܬܶܐܪܶܙ ܗ̱ܘܳܐ: ܣܪ̈ܳܦܶܐ ܕܰܡܩܰܕܫܺܝܢ ܬܠܺܝܬܳܐܝ̣ܬ: ܐܠܰܗܶܗ ܕܰܐܒܪܳܗܳܡ ܐܠܰܗܶܗ ܕܺܐܝܣܚܳܩ ܐܠܰܗܶܗ ܕܝܰܥܩܽܘܒ ܡܽܘܫܶܐ ܫܡ̣ܰܥ: ܬܽܘܒ ܕܶܝܢ ܕܡܳܪܝܳܐ ܐܠܰܗܳܟ ܡܳܪܝܳܐ ܚܰܕ ܗ̣ܽܘ: ܟܰܕ ܕܶܝܢ ܡܕܰܒܪܳܢܽܘܬܳܟ ܕܶܢܚܰܬ݀ ܟܽܠܳܗ̇ ܥܰܡ ܟܽܠܳܗ̇ ܬܠܺܝܬܳܐܝ̣ܬ ܐܶܫܬܰܒܚܰܬ݀: ܘܥܰܠ ܗܳܝ ܫܽܘܒܚܳܐ ܡܫܰܘܫܛܺܝܢܰܢ ܠܳܟ ܟܰܕ ܐܳܡܪܺܝܢܰܢ: ܫܽܘܒܚܳܐ ܠܳܟ ܕܰܗܘܳܝܳܟ ܬܠܺܝܬܳܐܝ̣ܬ ܐܶܬܓܡܰܪ: ܒܨܶܒܝܳܢܶܗ ܕܰܐܒܽܘܟ ܘܰܒܚܽܘܒܳܟ ܘܰܒܡܰܐܓܢܳܢܽܘܬܶܗ ܕܪܽܘܚܳܐ ܩܰܕܺܝܫܳܐ: ܫܽܘܒܚܳܐ ܠܳܟ ܕܰܬܠܺܝܬܳܐܝ̣ܬ ܐܶܬܚܰܘܺܝ ܒܰܛܢܳܟ: ܠܡܰܪܝܰܡ ܐܶܡܳܟ ܘܠܐܷܠܺܝܫܒܰܥ ܘܰܠܝܰܘܣܶܦ ܕܶܐܬܦܰܠܰܓ: ܫܽܘܒܚܳܐ ܠܳܟ ܕܡܰܘܠܳܕܳܟ ܬܠܺܝܬܳܐܝ̣ܬ ܐܶܣܬܰܒܰܪ: ܘܠܰܡܓܽܘ̈ܫܶܐ ܒܝܰܕ ܟܰܘܟܒܳܐ: ܘܰܠܚܰܝܠܰܘ̈ܳܬܳܐ ܕܰܫܡܰܝܳܐ ܕܰܬܠܺܝܬܳܐܝ̣ܬ ܠܳܟ ܡܫܰܒܚܺܝܢ ܗ̱ܘܰܘ: ܫܽܘܒܚܳܐ ܠܳܟ ܕܡܶܢ ܡܰܠܟ̈ܶܐ ܬܠܳܬܳܐ ܒܩܽܘܪ̈ܒܳܢܶܐ ܬܠܳܬܳܐ ܐܶܣ̣ܬܓܶܕܬ: ܘܡܶܢ ܪ̈ܳܥܰܘܳܬܳܐ ܒܕܳܫ̈ܢܶܐ ܬܠܳܬܳܐ ܐܶܬܝܰܩܰܪܬ: ܫܘ̣ܒܚܳܐ ܠܳܟ ܕܰܒܝܽܘܡ ܥܡܳܕܳܟ ܬܠܺܝܬܳܐܝ̣ܬ ܐܶܣ̣ܬܗܶܕܬ ܡܶܢ ܐܰܒܳܐ ܒܩܳܠܐܴ: ܘܡܶܢ ܪܽܘܚܳܐ ܒܪܽܘܚܳܦܳܐ: ܘܡܶܢ ܝܽܘܚܰܢܳܢ ܒܟܳܪܽܘܙܽܘܬܳܐ: ܫܽܘܒܚܳܐ ܠܳܟ ܕܰܒܨܰܘܡܳܟ ܬܠܺܝܬܳܐܝ̣ܬ ܐܶܬܢܰܣܺܝܬ: ܘܰܒܦܽܘ̈ܢܳܝܶܐ ܬܠܳܬܳܐ ܠܰܬܠܳܬܳܐ ܢܶܣܝܽܘ̈ܢܶܐ ܙܟܰܝܬ ܘܠܰܡܢܰܣܝܳܢܳܐ ܕܶܝܢ ܐܰܒܗ̣ܶܬܬ: ܫܽܘܒܚܳܐ ܠܳܟ ܕܣܽܘܓܳܐܐ ܕܬܶܕܡܪ̈ܳܬܳܟ ܬܠܺܝܬܳܐܝ̣ܬ ܓܡ̣ܰܪܬ ܐܶܢܶܝܢ ܒܨܶܒܝܳܢܳܐ ܘܒܰܥܒܳܕܳܐ ܘܰܒܡܶܠܬܳܐ: ܫܽܘܒܚܳܐ ܠܳܟ ܕܰܠܓܰܒܪܳܐ ܓܰܪܒܳܐ ܕܰܟܺܝܬ ܒܨܶܒܝܳܢܳܟ ܘܰܒܡܶܠܬܳܟ ܘܰܒܓܶܫܬܳܟ: ܫܽܘܒܚܳܐ ܠܳܟ ܕܰܬܠܳܬܳܐ ܡܺܝ̈ܬܶܐ ܨܒ̣ܰܝܬ ܘܰܐܚܺܝܬ: ܒܰܐܬܪܳܐ ܘܰܒܙܰܒܢܳܐ ܘܒܰܡܫܽܘܚܬܳܐ: ܫܽܘܒܚܳܐ ܠܳܟ ܕܰܬܠܺܝܬܳܐܝ̣ܬ ܡܶܢ ܬܠܳܬ ܢܶܫܺܝ̣̈ܢ ܨܒ̣ܰܝܬ ܕܬܶܬܡܫܰܚ: ܡܶܢ ܡܰܪܝܰܡ ܚܰܛܳܝܬܳܐ: ܘܡܶܢ ܡܰܪܝܰܡ ܙܰܕܺܝܩܬܳܐ ܚܳܬܶܗ ܕܠܳܥܳܙܳܪ: ܫܽܘܒܚܳܐ ܠܳܟ ܕܳܐܦ ܗܳܝ ܙܳܢܺܝܬܳܐ ܬܠܺܝܬܳܐܝ̣ܬ ܠܳܟ ܐܶܬܩܰܪܒܰܬ݀: ܒܗܰܝܡܳܢܽܘܬܳܐ ܘܰܒܣܰܒܪܳܐ ܘܰܒܚܽܘܒܳܐ: ܘܰܬܠܺܝܬܳܐܝ̣ܬ ܕܶܝܢ ܝܰܩܰܪܬܳܟ ܒܡܽܘܪܽܘܢ ܪܺܝܫܳܝܳܐ ܘܒܶܟܝܳܐ: ܘܰܒܕܶܡ̈ܥܶܐ ܕܰܦܝܳܣܳܐ: ܫܽܘܒܚܳܐ ܠܳܟ ܕܡܶܢ ܥܠܰܝ̈ܡܶܐ ܘܰܛܠܳܝ̈ܶܐ ܘܬܰܠܡܺܝ̈ܕܶܐ ܒܝܰܕ ܡܰܥܰܠܬܳܟ ܕܠܐܘ̣ܪܫܠܶܡ ܬܠܺܝܬܳܐܝ̣ܬ ܐܶܬܩܰܠܰܣ̣ܬ: ܫܽܘܒܚܳܐ ܠܳܟ ܕܠܰܬܠܳܬܳܐ ܐܶܣܟ̈ܺܡܶܐ ܕܝܰܥܢܽܘܬܳܐ ܡܶܢ ܗܰܝܟܠܳܟ ܛܪܰܕܬ ܗ̱ܘܰܝܬ: ܘܠܰܡܙܰܒ̈ܢܳܢܶܐ ܘܠܰܡܥܰܪ̈ܦܳܢܶܐ ܘܠܰܛܥܺܝ̣̈ܢܰܝ ܓܪ̈ܳܒܶܐ ܕܡܰܝ̈ܳܐ: ܫܽܘܒܚܳܐ ܠܳܟ ܕܰܒܥܶܠܺܝܬܳܐ ܬܠܳܬܳܐ ܐ̱ܪ̈ܳܙܺܝܢ ܫܰܡܠܺܝܬ: ܡܶܐܟܽܘܠܬܳܐ ܕܐܶܡܪܳܐ: ܘܰܫܝܳܓܬܳܐ ܕܪ̈ܶܓܠܐܷ: ܘܡܰܘܗܰܒܬܳܐ ܕܦܰܓܪܳܟ ܩܰܕܺܝܫܳܐ ܘܰܕܡܳܟ ܡܚܰܣܝܳܢܳܐ: ܫܽܘܒܚܳܐ ܠܳܟ ܕܰܬܠܺܝܬܳܐܝ̣ܬ ܨܰܠܺܝܬ ܠܘܳܬ ܐܰܒܽܘܟ ܕܢܰܥܒܪܳܟ ܟܳܣܳܐ ܕܡܰܘܬܳܐ: ܒܰܠܘܺܝܬܳܐ ܕܰܬܠܳܬܳܐ ܬܰܠܡܺܝ̈ܕܰܝܟ ܗܳܢܘܢ̇ ܕܰܚ̣ܙܰܘ ܫܽܘܒܚܳܟ ܬܠܺܝܬܳܐܝ̣ܬ ܥܰܠ ܛܽܘܪܳܐ: ܫܽܘܒܚܳܐ ܠܳܟ ܕܰܬܠܺܝܬܳܐܝ̣ܬ ܐܶܬܬܕܺܝܢܬ: ܡܶܢ ܩܰܝܳܦܳܐ ܪܺܝܫ ܟܳܗ̈ܢܶܐ: ܘܡܶܢ ܦܺܝܠܰܛܳܘܣ ܐܺܝܓܡܽܘܢܳܐ ܘܡܶܢ ܗܶܪܳܘܕܶܣ ܡܰܠܟܳܐ: ܫܽܘܒܚܳܐ ܠܳܟ ܕܰܬܠܳܬܳܐ ܚܰܫܺܝ̈ܢ ܩܰܒܶܠ ܪܺܝܫܳܟ: ܩܽܘܦܳܚܳܐ ܕܰܒܩܰܢܝܳܐ: ܡܰܚܘ̈ܳܬܳܐ ܕܒܰܦܪ̈ܳܓܶܠܐܷ: ܟܠܺܝܠܐܴ ܟܽܘܒܳܢܳܝܳܐ: ܫܽܘܒܚܳܐ ܠܳܟ ܕܰܬܠܳܬܳܐ ܒܶܙܚܺܝ̣̈ܢ ܣܒ̣ܰܠ ܦܰܪܨܽܘܦܳܟ: ܦܰܟܳܐ ܕܥܰܒܕܳܐ: ܘܪܘ̣ܩܳܐ ܛܰܡܳܐܐ ܘܬܰܚܦܺܝܬܳܐ ܕܰܐܦ̈ܶܐ: ܫܽܘܒܚܳܐ ܠܳܟ ܕܰܬܠܳܬ ܡܰܚ̈ܘܳܢ ܣܰܝܒ̣ܰܪ ܓܽܘܫܡܳܟ: ܢܶܓ̈ܕܶܐ ܕܥܰܠ ܚܰܨܳܟ: ܘܰܦܟܳܪ̈ܶܐ ܕܺܐܝ̈ܕܰܝܳܐ: ܘܶܐܣܳܪܳܐ ܕܒܶܐܣܛܽܘܢܳܐ: ܫܽܘܒܚܳܐ ܠܳܟ ܕܒܰܬܠܳܬܳܐ ܨܰܥܪ̈ܺܝܢ ܐܶܬܟܰܪܙܰܬ݀ ܡܰܠܟܽܘܬܳܟ: ܒܩܰܢܝܳܐ ܕܒܺܐܝܕܳܟ ܘܒܰܠܒܽܘܫܳܐ ܡܰܠܟܳܝܳܐ: ܘܰܒܣܶܓܕܬܳܐ ܕܰܩܕܳܡܰܝܟ: ܫܽܘܒܚܳܐ ܠܳܟ ܕܰܬܠܳܬܫܳܥܺܝ̈ܢ ܗ̣ܘܰܝܬ ܥܰܠ ܨܠܺܝܒܳܐ: ܘܒܰܬܠܳܬܳܐ ܗܰܕܳܡܺܝ̈ܢ ܒܠܰܥ̣ܬ ܡܰܚܘ̈ܳܬܳܐ: ܒܺܐܝ̈ܕܰܝܟ ܘܰܒܪ̈ܶܓܠܰܝܟ ܘܰܒܕܰܦܢܳܟ ܡܰܒܥܰܬ݀ ܚܽܘܣܳܝܳܐ : ܫܽܘܒܚܳܐ ܠܳܟ ܕܒܰܬܠܳܬܳܐ ܟܬܳܒܺܝ̣̈ܢ ܘܠܶܫܳܢܺܝ̣̈ܢ ܘܥܰܡ̱̈ܡܝ̣ܢ ܡܰܠܟܳܐ ܐܶܬܟ̣ܪܶܙܬ: ܫܽܘܒܚܳܐ ܠܳܟ ܕܡܶܢ ܬܠܳܬܳܐ ܣܳܗ̈ܕܺܝܢ ܐܶܫܬܰܡ̣ܰܗܬ ܡܰܠܟܳܐ ܘܰܐܠܳܗܳܐ ܘܦܳܪܽܘܩܳܐ: ܡܶܢ ܓܰܝܳܣܳܐ ܝܰܡܺܝܢܳܝܳܐ: ܘܡܶܢ ܩܶܢܛܪܽܘܢܳܐ: ܘܡܶܢ ܝܰܘܣܶܦ ܪܳܡܬܳܝܳܐ: ܫܽܘܒܚܳܐ ܠܳܟ ܕܡܶܢ ܬܠܳܬܳܐ ܟܝ̈ܳܢܶܐ ܚܰܪ̈ܫܶܐ ܐܶܬܚܰܘܝܰܬ݀ ܐܰܠܳܗܽܘܬܳܟ: ܡܶܢ ܫܶܡܫܳܐ ܕܰܚܫܶܟ ܒܫܶܬܫܳܥܺܝ̣̈ܢ ܘܬܽܘܒ ܐܰܢܗ̣ܰܪ: ܘܡܶܢ ܐܰܦ̈ܰܝ ܬܰܪܥܳܐ ܕܗܰܝܟܠܐܴ ܗܰܘ ܕܶܐܨܛܰܪܺܝ ܘܒܶܝܬ ܩܒܘ̣ܪ̈ܶܐ ܕܐܶܬܦܰܬܰܚܘ̱: ܘܡܶܢ ܐܰܪܥܳܐ ܕܐܶܬܬܙܝ̣ܥܰܬ݀ ܘܫܘ̣̈ܥܶܐ ܕܐܶܨܛܰܪܝ̣ܘ ܘܦܰܓܪ̈ܶܐ ܕܩܰܕܺܝ̈ܫܶܐ ܕܩܳܡ̣ܘ̱: ܫܽܘܒܚܳܐ ܠܳܟ ܕܰܬܠܺܝܬܳܐܝ̣ܬ ܐܶܬܝܰܩܪܰܬ݀ ܐܠܰܗܽܘܬܳܟ ܒܰܩܒܽܘܪܬܳܟ: ܒܟܶܬܳܢ̈ܶܐ ܢܰܩ̈ܕܶܐ: ܘܗܶܪ̈ܽܘܡܶܐ ܕܟܰܝ̈ܳܐ: ܘܩܰܒܪܳܐ ܚܰܕܬܳܐ ܢܩܺܝܪ ܒܫܽܘܥܳܐ: ܫܽܘܒܚܳܐ ܠܳܟ ܕܰܬܠܳܬܳܐ ܝܰܘ̈ܡܺܝܢ ܩܰܘܺܝܬ ܒܰܫܝܽܘܠ ܘܩܳܡ̣ܬ ܕܠܐܴ ܚܒܳܠܐܴ: ܫܽܘܒܚܳܐ ܠܳܟ ܕܒܰܬܠܳܬܳܐ ܐܰܘ̈ܘܳܢܺܝܢ ܗ̣ܘܳܬ݀ ܢܰܦܫܳܟ ܒܺܐܝ̈ܕܰܝ ܐܰܒܽܘܟ ܒܰܫܡܰܝܳܐ: ܘܰܒܦܰܪܕܰܝܣܳܐ ܥܰܡ ܓܰܝܳܣܳܐ: ܘܥܰܡܳܟ ܒܓܰܘ ܫܝܽܘܠ ܨܶܝܕ ܐܳܕܳܡ: ܫܽܘܒܚܳܐ ܠܳܟ ܕܒܰܬܠܳܬܳܐ ܐܰܘ̈ܘܳܢܺܝܢ ܣܥ̣ܰܪܬܳܝܗܝ ܠܐܴܕܳܡ ܨܰܠܡܳܟ: ܒܟܰܪܣܳܐ ܘܰܒܡܰܥܡܽܘܕܺܝܬܳܐ ܘܰܒܓܰܘ ܩܰܒܪܳܐ ܘܶܐܫܟܰܚܬܳܝܗ̱ܝ ܘܥܰܡܳܟ ܐܰܩܺܝܡܬܳܝܗ̱ܝ: ܫܽܘܒܚܳܐ ܠܳܟ ܕܒܰܬܠܳܬ ܕܽܘܟܳܝ̈ܢ ܐܶܬܚܰܘܺܝܬ ܠܰܫܠܺܝ̈ܚܰܝܟ ܟܢܺܝܫܳܐܝ̣ܬ ܒܥܶܠܺܝܬܳܐ ܟܰܕ ܐܰܚܺܝܕܳܐ: ܘܒܰܓܠܺܝܠܐܴ ܥܰܠ ܛܽܘܪܳܐ ܕܙܰܝ̈ܬܶܐ ܒܝܽܘܡ ܣܽܘܠܳܩܳܟ: ܫܽܘܒܚܳܐ ܠܳܟ ܕܰܒܡܶܢܝܳܢܳܐ ܬܠܺܝܬܳܝܳܐ: ܠܰܡܨܺܝܕܬܶܗ ܕܫܶܡܥܽܘܢ ܢܽܘ̈ܢܶܐ ܐܰܣܪܰܚ̣ܬ: ܡܳܐܐ ܘܚܰܡܫܺܝܢ ܘܰܬܠܳܬܳܐ ܟܰܕ ܬܠܳܬܳܐ ܥܰܠ̣ܘ̱ ܠܶܗ: ܫܽܘܒܚܳܐ ܠܳܟ ܕܰܬܠܺܝܬܳܐܝ̣ܬ ܐܰܬܩܶܢܬܳܗ̇ ܠܫܳܪܽܘܬܳܐ ܕܺܝܠܳܟ ܒܠܰܚܡܳܐ ܘܢܽܘ̈ܢܶܐ ܘܓܽܘܡܪ̈ܰܝ ܢܽܘܪܳܐ ܒܬܶܕܡܽܘܪܬܳܐ: ܫܽܘܒܚܳܐ ܠܳܟ ܕܰܒܝܰܕ ܫܽܘܐܳܠܐܴ ܬܠܺܝܬܳܝܳܐ ܕܰܠܘܳܬ ܟܺܐܦܳܐ: ܘܦܽܘܢܳܝܳܐ ܬܠܺܝܬܳܝܳܐ ܠܰܟܦܽܘܪܝܳܐ ܬܠܺܝܬܳܝܳܐ ܐܰܣܺܝܬ ܒܛܰܝܒܽܘܬܳܟ: ܫܽܘܒܚܳܐ ܠܳܟ ܕܰܬܠܺܝܬܳܐܝ̣ܬ ܥܳܢ̈ܳܐ ܐܰܓܥ̣ܶܠܬ ܠܶܗ ܠܫܶܡܥܽܘܢ: ܐܶܡܪ̈ܶܐ ܘܥܶܪ̈ܒܶܐ ܘܰܢܩܰܘ̈ܳܬܳܐ ܦܪ̈ܺܝܩܳܬܳܐ: ܫܽܘܒܚܳܐ ܠܳܟ ܕܒܰܬܠܺܝܬܳܝܽܘܬ ܥܶܕܳܢ̈ܶܐ ܐܶܬܚܰܘܝܰܬ݀ ܠܢܶܫ̈ܶܐ ܩܝܳܡܬܳܟ ܒܪܰܡܫܳܐ ܥܰܕ ܚܶܫܽܘܟ: ܘܰܒܫܰܦܪܳܐ ܥܰܡܺܝܩܳܐ ܘܰܒܨܰܦܪܳܐ ܟܰܕ ܕܢܰܚ̣ ܫܶܡܫܳܐ: ܫܽܘܒܚܳܐ ܠܳܟ ܕܰܒܡܰܣܰܩܬܳܟ ܕܠܰܫܡܰܝܳܐ ܬܠܺܝܬܳܐܝ̣ܬ ܐܶܬܝܰܩ̣ܰܪܬ ܡܶܢ ܬܠܳܬ ܥܺܕ̈ܳܬܳܐ ܕܢܽܘܪ̈ܳܢܶܐ ܘܪ̈ܽܘܚܳܢܶܐ ܘܡܰܠܐܱܟ̈ܶܐ: ܫܽܘܒܚܳܐ ܠܳܟ ܕܰܬܠܺܝܬܳܐܝ̣ܬ ܡܶܫܬܰܒܰܚ ܐܰܢ̱ܬ ܒܡܰܘܬܒܳܐ ܐܝ̣ܬܝܳܝܳܐ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܫܽܘܒܚܳܐ ܠܳܟ ܕܫ̣ܰܕܰܪܬ ܪܽܘܚܳܐ ܦܰܪܰܩܠܺܝܛܳܐ ܥܰܠ ܬܰܠܡܺܝ̈ܕܰܝܟ ܬܠܺܝܬܳܐܝ̣ܬ ܒܰܚܙܳܬܳܐ ܘܰܒܩܳܠܐܴ ܘܰܒܡܰܥܒܕܳܢܽܘܬܳܐ ܕܛܰܝܒܽܘܬܳܐ: ܫܽܘܒܚܳܐ ܠܳܟ ܕܫ̣ܰܕܰܪܬ ܠܰܫܠܺܝ̈ܚܰܝܟ ܕܢܰܟܪܙܽܘܢ ܘܢܰܠܦܽܘܢ ܘܢܰܥܡܕܽܘܢ ܠܥܰܡ̱̈ܡܶܐ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܫܽܘܒܚܳܐ ܠܳܟ ܕܗܳܠܶܝܢ ܟܽܠܗܶܝܢ ܬܡܺܝ̈ܗܳܬܳܐ ܣܒ̣ܰܠܬ ܘܣܰܝܒܰܪܬ ܚܠܳܦܰܝܢ ܒܰܒܣܰܪ ܘܠܰܢ ܦ̣ܪܰܩܬ ܡܶܢ ܚܛܺܝܬܳܐ ܘܡܰܘܬܳܐ ܘܣܳܛܳܢܳܐ ܬܠܺܝܬܳܐܝ̣ܬ: ܘܥܰܠ ܗܳܝ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܕܰܥܡܰܕܢ ܒܰܫܡܳܟ ܩܰܕܺܝܫܳܐ: ܘܕܰܐܒܽܘܟ ܘܪܽܘܚܳܟ ܩܰܕܺܝܫܳܐ ܘܶܐܟ̣ܰܠܢ ܦܰܓܪܳܟ ܘܶܐܫܬܺܝܢ ܕܡܳܟ ܡܚܰܣܝܳܢܳܐ ܬܠܺܝܬܳܐܝ̣ܬ: ܘܰܬܚܰܣܶܐ ܘܰܬܩܰܕܶܫ ܘܬܰܢܗܰܪ ܠܰܢ ܬܠܺܝܬܳܐܝ̣ܬ: ܒܢܰܦܫܳܐ ܘܰܒܦܰܓܪܳܐ ܘܰܒܗܰܘܢܳܐ: ܟܰܕ ܠܦܰܓܪܳܐ ܠܘܳܬ ܗܳܠܶܝܢ ܕܢܰܦܫܳܐ: ܘܰܠܢܰܦܫܳܐ ܠܘܳܬ ܗܰܘܢܳܐ ܡܥܰܠܐܷ ܐܰܢ̱ܬ: ܐܳܦ ܠܰܬܠܳܬܰܝ̈ܗܽܘܢ ܠܘܳܬ ܚܙܳܬܳܐ ܕܪܰܒܽܘܬܳܟ ܢܳܬܶܦ ܐܰܢ̱ܬ: ܘܬܽܘܒ ܒܳܥܶܝܢܰܢ ܡܶܢܳܟ ܐܰܝܟܰܢܳܐ ܕܰܬܚܰܝܶܠ ܠܰܢ ܕܰܠܗܳܠܶܝܢ ܬܠܳܬܳܐ ܓܶܢ̈ܣܶܐ ܪ̈ܺܝܫܰܝ ܚܰܫ̈ܶܐ ܢܶܙܟܽܘܢ ܠܗܳܠܶܝܢ ܬܰܘܠܕ̈ܳܬܗܽܘܢ: ܬܽܘܒ ܗܰܒܠܰܢ ܡܳܪܝܳܐ ܐܳܣܝܽܘܬܳܐ ܠܢܰܦܫܳܐ ܘܰܠܦܰܓܪܳܐ ܡܶܢ ܟܪܺܝܗܽܘܬ ܪ̈ܶܓܫܶܐ ܐܰܚܠܶܡ: ܘܰܠܢܰܦܫܳܐ ܡܶܢ ܚܽܘ̈ܫܳܒܶܐ ܫܟܺܝܪ̈ܶܐ: ܘܰܠܗܰܘܢܳܐ ܡܶܢ ܦܶܗܝܳܐ ܐܰܪܥܳܢܳܝܳܐ: ܬܽܘܒ ܗܰܒܠܰܢ ܡܳܪܝܳܐ ܕܥܰܡܳܟ ܢܶܚܰܫ ܘܥܰܡܳܟ ܢܡܽܘܬ: ܘܥܰܡܳܟ ܢܶܫܬܰܒܰܚ: ܘܫܰܟܶܢ ܠܰܢ ܕܥܰܡܳܟ ܢܩܽܘܡ ܘܥܰܡܳܟ ܢܶܣܬܰܠܰܩ ܘܥܰܡܳܟ ܢܰܡܠܶܟ: ܘܬܽܘܒ ܐܰܛܶܐܒ ܠܰܢ ܒܝܰܘܡܳܐ ܕܡܶܐܬܺܝܬܳܟ ܕܬܰܪܬܶܝܢ ܕܥܰܠ ܦܳܬܽܘܪܳܟ ܢܶܣܬܡܶܟ ܘܡܶܢ ܛܳܒ̈ܳܬܳܟ ܢܶܣܒܰܥ: ܘܡܶܢ ܚܙܳܬܳܟ ܢܶܬܦܰܛܰܡ: ܘܰܐܫܘܳܐ ܠܰܢ ܕܥܰܡ ܩܰܕܺܝ̈ܫܰܝܟ ܢܪܰܡܪܡܳܟ: ܒܽܐܘܪܫܠܶܡ ܫܡܰܝܳܢܺܝܬܳܐ ܘܰܒܥܺܕܬܳܟ ܗܳܝ ܕܒܽܘܟܪ̈ܶܐ ܘܰܒܡܰܠܟܽܘܬܳܐ ܗܳܝ ܕܢܽܘܗܪܳܐ ܠܐܴ ܥܳܒܽܘܪܳܐ ܘܠܐܴ ܡܶܫܬܰܪܝܳܢܳܐ: ܘܠܐܱܒܽܘܟ ܡܪܰܚܡܳܢܳܐ ܕܫܰܠܚܳܟ ܠܦܽܘܪܩܳܢܰܢ: ܘܰܠܪܽܘܚܳܟ ܩܰܕܺܝܫܳܐ ܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ ܗܳܫܳܐ܀

ܥܶܛܪܳܐ

ܫܽܘܒܚܳܐ ܠܳܟ ܬܠܺܝܬܳܝܳܐ ܕܐܰܠܳܗܽܘܬܳܐ ܝܶܫܽܘܥ ܡܫܺܝܚܳܐ ܕܡܶܢ ܢܒܺܝ̈ܶܐ ܚܰܙܳܝ̈ܶܐ ܕܡܶܢ ܥܳܠܰܡ ܬܠܺܝܬܳܐܝ̣ܬ ܘܰܚܕܳܢܳܝܳܐ ܐܶܬܶܐܪܶܙ ܦܽܘܪܩܳܢܳܐ ܕܰܥܒ̣ܰܕܬ ܠܰܢ ܒܰܡܕܰܒܪܳܢܽܘܬܳܟ: ܘܒܰܩܢܽܘܡܳܟ ܓܡ̣ܰܪܬ ܘܫܰܡܠܺܝܬ ܒܽܘܕܳܩܰܝ̈ܗܽܘܢ ܘܚܶܙܘܰܝ̈ܗܽܘܢ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܩܰܒܶܠ ܒܛܰܝܒܽܘܬܳܟ: ܠܦܺܝܪܡܳܐ ܕܰܬܠܺܝܬܳܐܝ̣ܬ ܗܳܫܳܐ ܐܶܬܬܰܥܛܰܪ ܠܳܟ ܡܶܢܰܢ: ܘܫܰܟܶܢ ܠܰܢ ܒܶܗ ܡܶܢ ܒܶܝܬ ܓܰܙܳܟ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܫܽܘܘܙܳܒܳܐ ܕܡܶܢ ܟܽܠܗܶܝܢ ܨܶܢ̈ܥܳܬܶܗ ܕܰܒܥܶܠܕܰܪܳܐ: ܘܗܰܒܠܰܢ ܕܒܰܬܠܳܬ ܡܝܰܬܪ̈ܳܬܳܐ ܢܶܬܓܡܰܪ ܩܕܳܡܰܝܟ: ܒܗܰܝܡܳܢܽܘܬܳܐ ܘܰܒܣܰܒܪܳܐ ܘܰܒܚܽܘܒܳܐ: ܘܰܐܫܘܳܐ ܠܰܢ ܠܡܰܘܗܰܒܬܳܐ ܕܫܰܝܢܳܐ ܘܕܰܫܠܳܡܳܐ ܘܰܕܪ̈ܰܚܡܶܐ ܘܩܰܘܡܳܐ ܕܡܶܢ ܝܰܡܺܝܢܳܟ: ܚܢܰܢ ܘܥܰܢܺܝ̈ܕܰܝܢ ܢܶܚܕܶܐ ܥܰܡܳܟ ܒܰܓܢܽܘܢ ܢܽܘܗܪܳܐ ܬܠܺܝܬܳܐܝ̣ܬ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܥܳܠܡܝ̣ܢ܀

ܚܽܘܬܳܡܳܐ

ܗܘܺܝ ܡܳܪܝܳܐ ܐܰܠܳܗܳܐ ܠܒܳܝ̇ܫܽܘܬܰܢ ܡܥܰܕܪܳܢܳܐ ܘܰܡܣܰܝܥܳܢܳܐ: ܘܡܶܢ ܢܶܣܝܽܘ̈ܢܶܐ ܕܰܒܥܶܠܕܰܪܳܐ ܦܳܪܽܘܩܳܐ ܘܰܡܢܰܛܪܳܢܳܐ: ܘܗܰܒ ܠܰܢ ܕܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܢܶܬܶܐܡܶܢ ܒܦܽܘܩ̈ܕܳܢܰܝܟ ܩܰܕܺܝ̈ܫܶܐ ܘܡܰܥܒ̈ܕܰܝ ܚܰܝ̈ܶܐ: ܘܠܐܴ ܬܶܬܶܠ ܠܐܴܟܶܠܩܰܪܨܳܐ ܥܠܰܝܢ ܫܽܘܠܛܳܢܳܐ ܕܢܰܣ̣ܛܶܐ ܠܰܢ ܠܘܳܬܶܗ: ܘܠܐܴ ܢܶܦܠܽܘܚ ܠܶܗ ܥܰܒܕܽܘܬܳܐ ܒܺܝܫܬܳܐ ܘܡܰܪܺܝܪܬܳܐ: ܐܶܠܐܴ ܫܰܟܶܢ ܠܰܢ ܕܠܳܟ ܢܰܚܶܒ ܡܶܢ ܟܽܠܶܗ ܠܶܒܰܢ: ܘܰܒܢܳܡܽܘ̈ܣܰܝܟ ܢܶܬܗܰܓܶܐ ܐܺܝܡܳܡܳܐ ܘܠܺܠܝܳܐ ܘܐܰܩܶܦܰܝܢ ܒܰܠܡܺܐܢܳܐ ܕܺܝܠܳܟ ܕܚܰܝ̈ܶܐ: ܘܰܐܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܒܡܰܠܟܽܘܬܳܟ ܫܡܰܝܳܢܺܝܬܳܐ ܗܳܫܳܐ ܘܰܒܟܽܠܙܒܰܢ܀