ܨܠܽܘܬܳܐ ܕܫܽܘܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܦܰܐܝܽܘܬ ܒܰܪ̱ܬ݀ ܩܳܠܐܴ ܕܪܽܘܚܳܐ ܢܙܰܡܰܪ ܠܳܟ: ܕܫܰܒܰܚܘ̱ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ: ܡܶܛܽܠ ܕܬܶܕܡܽܘܪܬܳܐ ܥܒ̣ܰܕ: ܡܶܛܽܠ ܕܬܶܕܡܽܘܪܬܳܐ ܗ̱ܝ ܒܰܫܪܳܪܳܐ ܩܝܳܡܬܳܟ ܡܰܠܝܰܬ݀ ܬܶܗܪܳܐ ܘܢܽܘܚܳܡܳܟ ܡܗܰܕܪܳܐ: ܒܪܺܝܟ ܗ̱ܘ ܝܰܘܡܳܟ ܡܚܰܕܶܐ ܘܡܰܦܨܰܚ ܠܰܟܡܺܝܪ̈ܶܐ: ܒܪ̈ܝ̣ܟܺܝܢ ܪ̈ܰܚܡܰܝܟ ܕܫܰܠܚܽܘܟ ܠܘܳܬ ܓܶܢܣܰܢ: ܬܰܘܕܺܝ ܠܳܟ ܥܰܡ ܐܰܒܽܘܟ: ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܚܰܕܬܳܢܳܐ ܕܥܳܠܡ̈ܶܐ ܕܒܽܐܘܪܚܳܐ ܚܰܕܬܳܐ ܐܶܬܳܐ ܠܰܒܪܺܝܬܳܐ ܕܰܢܚܰܕܶܬ ܠܰܓܒܺܝܠܬܳܐ ܕܺܝܠܰܢ ܕܰܐܥܬܩܰܬ݀ ܒܛܳܥܝܽܘܬܳܐ ܕܰܚܛܺܝܬܳܐ: ܠܗܰܘ ܢܽܘܗܪܳܐ ܡܬܽܘܡܳܝܳܐ ܘܡܰܢܗܪܳܢܳܐ ܕܥܳܠܡ̈ܶܐ ܕܢܽܘܗܪܳܐ ܚܰܕܬܳܐ ܘܡܶܬܝܰܕܥܳܢܳܐ ܡܠܐܴ ܠܬܺܐܒܶܝܠ ܒܰܩܝܳܡܬܶܗ ܡܫܰܒܰܚܬܳܐ: ܠܗܰܘ ܕܽܘܡܳܪܳܐ ܠܐܴ ܡܶܬܡܰܠܠܳـܢܳܐ ܕܰܥܒ̣ܰܕ ܝܰܘܡܳܢܳܐ ܬܶܕܡܽܘܪܬܳܐ ܚܕܰܬܳܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܠܳܟ ܣܳܓܕܺܝܢܰܢ ܘܰܡܫܰܒܚܺܝܢܢ ܘܡܰܘܕܶܝܢܰܢ ܝܶܫܽܘܥ ܡܫܺܝܚܳܐ ܡܶܠܬܳܐ ܡܬܽܘܡܳܝܳܐ ܕܰܬܠܺܝܬܳܐܝ̣ܬ ܡܶܢ ܬܠܳܬ ܥܺܕ̈ܳܬܳܐ ܕܒܰܫܡܰܝܳܐ ܒܰܬܠܺܝܬܳܝܽܘܬܳܐ ܠܐܴ ܡܶܣܬܰܕܩܳܢܺܝܬܳܐ ܡܶܫܬܰܒܰܚ: ܠܳܟ ܝܰܠܕܳܐ ܝܺܚܺܝܕܳܝܳܐ ܕܡܶܢ ܐܰܒܳܐ ܕܰܒܚܰܪܰܬ݀ ܙܰܒ̈ܢܶܐ ܐܶܬܒܰܣܰܪ ܡܶܢ ܒܬܽܘܠܬܳܐ ܡܰܪܝܰܡ ܡܶܛܽܠ ܦܽܘܪܩܳܢܰܢ ܡܩܰܠܣܺܝܢܰܢ: ܘܰܕܚܰܕ ܐܝ̣ܬܝܟ ܘܠܐܴ ܗ̱ܘܳܐ ܬܪܶܝܢ: ܕܚܰܕ ܝܰܠ̣ܕܶܗ ܐܰܒܳܐ ܘܰܐ̱ܚܪܺܢܳܐ ܒܬܽܘܠܬܳܐ ܐܶܠܐܴ ܚܰܕ ܩܕܳܡ ܚܕܳܝܽܘܬܳܐ ܘܒܳܬܰܪ ܚܕܳܝܽܘܬܳܐ ܕܰܒܟܰܪܣܳܐ: ܚܰܕ ܩܢܘ̣ܡܳܐ ܘܚܰܕ ܦܰܪܨܽܘܦܳܐ ܘܚܰܕ ܟܝܳܢܳܐ ܝܳܕܥܺܝܢܰܢ: ܟܰܕ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܒܚܰܕ ܟܝܳܢܳܐ ܘܨܶܒܝܳܢܳܐ ܘܽܐܘܚܕܳܢܳܐ: ܒܰܬܠܺܝܬܳܝ ܩܢܽܘ̈ܡܶܐ ܘܰܫܡܳܗ̈ܶܐ ܘܦܰܪ̈ܨܽܘܦܶܐ ܘܕܺܝܠܳܝ̈ܳܬܳܐ ܡܗܰܝܡܢܺܝܢܰܢ: ܘܰܨܠܰܘ̈ܳܬܳܐ ܕܺܝܠܰܢ ܘܒܳܥܘ̈ܳܬܰܢ ܒܺܐܝ̈ܕܰܝܟ ܠܐܱܒܽܘܟ ܡܥܰܠܶܝܢܰܢ: ܕܰܬܩܰܪܶܒ ܐܶܢܽܘܢ ܚܠܳܦܰܝܢ ܫܳܐܠܺܝܢܰܢ: ܘܦܽܘܢܳܝ ܫ̈ܶܐܠܳܬܰܢ ܡܶܢܳܟ ܢܳܣܒܺܝܢܰܢ: ܥܰܡ ܥܺܝܪ̈ܰܝ ܪܰܘܡܳܐ ܡܩܰܕ̈ܫܳܢܶܐ ܕܩܳܥܶܝܢ ܬܠܺܝܬܳܐܝ̣ܬ ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬܳܢܳܐ ܒܪܺܝܫ ܨܠܰܘ̈ܳܬܰܢ: ܒܰܬܠܳܬ ܣܶܓ̈ܕܳܢ ܡܰܣܪܚܺܝܢܰܢ ܘܥܰܡ ܬܠܳܬ ܓܽܘ̈ܕܺܝܢ ܕܥܺܝܪ̈ܶܐ ܕܙܰܝܚܘ̱ ܩܒܽܘܪܬܳܟ ܬܠܺܝܬܳܐܝ̣ܬ ܩܰܕܺܝܫܰܬ ܐܰܠܳܗܳܐ ܩܰܕܺܝܫܰܬ ܚܰܝܠܬܳܢܳܐ: ܩܰܕܺܝܫܰܬ ܠܐܴ ܡܳܝܽܘܬܳܐ ܒܰܬܠܳܬ ܒܽܘܪ̈ܟܳܢ ܡܰܙܥܩܺܝܢܰܢ: ܘܥܰܡ ܝܰܘܣܶܦ ܘܢܺܝܩܳܘܕܺܝܡܳܘܣ ܠܗܳܝ ܕܶܐܨܛܠܶܒܬ ܚܠܳܦܰܝܢ ܡܰܘܣܦܺܝܢܰܢ: ܘܥܰܠ ܒܶܝܬ ܥܰܝ̈ܢܰܝܢ ܠܪܽܘܫܡܳܐ ܚܰܝܳܐ ܕܰܨܠܺܝܒܳܐ ܛܳܒܥܺܝܢܰܢ: ܬܠܺܝܬܳܐܝ̣ܬ ܠܳܟ ܩܳܪܶܝܢܰܢ ܘܰܚܢܳܢܳܐ ܘܪ̈ܰܚܡܶܐ ܘܚܽܘܣܳܝܳܐ ܫܳܐܠܺܝܢܰܢ: ܘܰܬܠܳܬ ܬܶܫܒ̈ܚܳܬܳܐ ܒܰܬܠܳܬ ܓܳܗ̈ܢܳܢ ܠܳܟ ܡܩܰܪܒܺܝܢܰܢ: ܬܠܳܬ ܓܽܘܕܺܝ̈ܢ ܒܩܽܘܕܳܫ ܡܽܘܪܽܘܢ ܐܰܠܳܗܳܝܳܐ ܡܩܺܝܡܺܝܢܰܢ: ܒܰܬܠܳܬ ܥܺܕ̈ܳܬܳܐ ܡܛܰܦܣܺܝܢܰܢ ܘܠܰܬܠܳܬ ܙܳܥ̈ܩܳܬܳܐ ܕܰܥܠܰܝܟ ܕܡܶܢ ܠܥܶܠ ܡܶܣܬܰܟܠܺܝܢܰܢ: ܬܠܳܬ ܙܰܒܢܺܝ̣̈ܢ ܒܽܐܘܙܳܢܳܐ ܕܚܰܝ̈ܶܐ ܓܳܡܥܺܝܢܰܢ ܟܰܕ ܥܳܡܕܺܝܢܰܢ: ܘܠܰܬܠܳܬܳܐ ܝܰܘ̈ܡܺܝܢ ܕܰܩܒܽܘܪܬܳܟ ܡܶܫܬܰܘܕܥܺܝܢܰܢ ܬܠܳܬ ܬܠܺܝܬܳܝ̈ܘܳܢ ܕܡܽܘܪܰܐܣ ܗܳܠܶܝܢ ܕܫܰܡܠܺܝܬ ܒܡܰܣܒܗܽܘܬ ܬܠܳܬ ܬܠܺܝܬܳܝ̈ܘܳܢ ܕܥܶܠܳܝ̈ܶܐ ܗܳܢܽܘܢ ܕܰܪܫ̣ܰܡ ܡܽܘܫܶܐ ܒܰܬܠܳܬ ܬܠܺܝܬܳܝ̈ܘܳܢ ܕܟܺܐܦ̈ܶܐ ܡܫܰܡܠܶܝܢܰܢ: ܬܠܺܝܬܳܝܰܬ ܠܐܻܝܩܳܪܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܒܰܝܬܳܐ ܕܥܺܕܬܳܐ ܩܰܕܺܝܫܬܳܐ ܒܳܢܶܝܢܰܢ: ܩܕܽܘܫܩܽܘܕ̈ܫܺܝܢ ܘܡܰܕܒܚܳܐ ܘܗܰܝܟܠܐܴ ܐܰܝܟ ܗܰܘ ܕܡܽܘܫܶܐ ܩܳܒܥܺܝܢܰܢ: ܬܠܺܝܬܳܐܝ̣ܬ ܩܳܐܶܡ ܗ̱ܘܳܐ ܥܰܡܳܐ: ܫܳܡܽܘ̈ܥܶܐ ܒܕܳܪܬܳܐ: ܘܰܡܫܰܡ̈ܫܳܢܶܐ ܒܗܰܝܟܠܐܴ: ܘܰܐܗܪܽܘܢ ܒܰܩܕܽܘܫ ܩܽܘܕ̈ܫܺܝܢ ܫܳܐܠܺܝܢܰܢ: ܬܠܺܝܬܳܐܝ̣ܬ ܚܠܳܦ ܗܰܝܟܠܐܴ ܘܡܰܕܒܚܳܐ ܕܒܶܣ̈ܡܶܐ ܘܰܡܢܳܪܬܳܐ: ܫܠܺܝ̈ܚܶܐ ܘܰܡܣܰܒܪ̈ܳܢܶܐ ܘܡܰܠܦܳܢ̈ܶܐ ܣܳܕܪܺܝܢܰܢ: ܘܰܚܠܳܦ ܩܺܐܒܽܘܬܳܐ ܘܠܽܘ̈ܚܶܐ ܘܩܶܣܛܳܐ: ܦܰܓܪܳܐ ܘܰܕܡܳܐ ܘܡܽܘܪܽܘܢ ܡܛܰܟܣܺܝܢܰܢ: ܬܠܳܬ ܨܠܰܘ̈ܳܢ ܕܰܒܩܰܕܡܳܝܽܘܬ ܩܽܘܪܒܳܢܳܐ ܠܰܬܠܳܬܳܐ ܝܰܘ̈ܡܺܝܢ ܕܰܩܒܽܘܪܬܳܟ ܡܰܐܪܙܺܝܢܰܢ: ܘܰܬܠܝ̣ܬܳܐܝ̣ܬ ܠܐܱܢܢܰܐܦܳܘܪܰܐ ܡܪܺܝܡܺܝܢܰܢ: ܠܰܙܥܳܩܬܳܐ ܬܠܺܝܬܳܐܝ̣ܬ ܕܰܠܘܳܬ ܫܶܡܥܽܘܢ ܕܕܽܘܟܳܝܳܐ ܡܰܐܠܽܘܢ ܡܶܬܢܰܗܪܺܝܢܰܢ: ܬܠܺܝܬܳܐܝ̣ܬ ܠܗܰܘ̈ܢܰܝܢ ܘܡܰܕ̈ܥܰܝܢ ܘܰܠܠܶܒܰܘ̈ܳܬܰܢ ܠܥܶܠ ܬܳܪܨܺܝܢܰܢ: ܘܰܬܠܺܝܬܳܐܝ̣ܬ ܥܰܡ ܗܳܢܘܢ̇ ܕܩܳܥܶܝܢ ܩܽܘܕ̈ܳܫܶܐ ܬܠܺܝܬܳܝ̈ܶܐ ܠܡܶܬܒܰܣܪܳܢܽܘܬܳܟ ܡܩܰܕܫܺܝܢܰܢ: ܬܠܳܬ ܬܠܺܝܬܳܝ̈ܘܳܢ ܨܠܺܝ̣̈ܒܶܐ ܒܰܬܠܳܬ ܕܽܘܟ̈ܝܳܢ ܘܰܐܟܘܳܬܗܽܘܢ ܒܢܰܩܺܝܦܽܘܬܗܽܘܢ ܥܰܠ ܕܡܳܐ ܪܳܫܡܺܝܢܰܢ: ܘܰܬܠܳܬ ܬܠܺܝܬܳܐܝ̣ܬ ܕܥܰܠ ܟܽܠ ܚܰܕ ܚܰܕ ܠܚܽܘܝܳܕܳܐ ܕܥܶܠܳܝ̈ܶܐ ܘܰܕܬܰܚܬܳܝ̈ܶܐ ܡܰܟܪܙܺܝܢܰܢ: ܬܠܳܬ ܙܰܒܢܺܝ̈ܢ ܨܠܺܝ̈ܒܶܐ ܬܠܺܝ̈ܬܳܝܶܐ ܒܰܩܕܽܘܫܩܽܘܕ̈ܫܺܝܢ ܥܰܠ ܐܰܦܰܝ̈ܢ ܒܰܬܠܳܬ ܕܽܘܟ̈ܝܳܢ ܚܳܬܡܺܝܢܰܢ: ܒܰܡܠܰܚܡܽܘܬܗܽܘܢ ܘܰܡܕܰܡܝܽܘܬܳܐ ܕܗܳܠܶܝܢ ܥܰܠ ܥܰܡܳܐ ܠܚܽܘܝܳܕܳܐ ܕܗܳܢܘܢ̇ ܘܰܕܗܳܠܶܝܢ ܘܕܰܐܝܟ ܗܳܠܶܝܢ ܡܶܫܬܰܪܪܺܝܢܰܢ: ܬܠܺܝܬܳܐܝ̣ܬ ܒܰܬܠܳܬ ܕܽܘܟ̈ܝܳܢ ܟܽܠܶܗ ܥܰܡܳܐ ܒܳܪܟܺܝܢܰܢ ܘܰܬܠܺܝܬܳܐܝ̣ܬ ܪ̈ܰܚܡܶܐ ܫܳܐܠܺܝܢܰܢ: ܘܰܬܠܺܝܬܳܐܝ̣ܬ ܠܚܰܫ̈ܶܐ ܚܛܺܝ̈ܬܳܢܳܝܶܐ ܕܢܳܒܗܺܝܢ ܒܰܢ ܡܛܰܠܩܺܝܢܰܢ ܘܰܠܢܰܚ̈ܬܶܐ ܚܰܕ̈ܬܶܐ ܕܡܶܢ ܪܽܘܚܳܐ ܩܰܕܺܝܫܳܐ ܡܶܬܥܰܛܦܺܝܢܰܢ: ܘܠܳܟ ܐܰܠܳܗܳܐ ܕܶܐܬܒܰܣܰܪ ܚܠܳܦܰܝܢ ܡܶܢ ܗܳܫܳܐ ܚܰܕܬܳܐܝ̣ܬ ܒܪܽܘܚ ܘܒܰܦܓܰܪ ܡܫܰܒܚܺܝܢܰܢ: ܐܰܝܟܰܢܳܐ ܕܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡ ܪܰܒܽܘܬܳܟ ܗܳܐ ܡܩܰܪܒܺܝܢܰܢ: ܒܥܺܐܕܳܐ ܗܳܢܳܐ ܕܰܩܝܳܡܬܳܟ ܢܶܬܩܰܒܰܠ ܒܪ̈ܰܚܡܰܝܟ ܘܢܶܬܚ̈ܰܠܛܳܢ ܒܶܗ ܨܠܰܘ̈ܳܬܰܢ ܡܚܺܝ̣̈ܠܳܬܳܐ ܒܛܰܝܒܽܘܬܳܟ ܘܢܶܗܘܶܐ ܠܚܽܘܣܳܝܳܐ ܕܚܰܘ̈ܒܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ ܕܡܰܪܥܺܝܬܳܟ ܦܪܺܝܩܰܬ݀ ܒܰܕܡܳܟ: ܘܰܠܥ̱ܽܘܗܕܳܢܳܐ ܘܰܢܝܳܚܳܐ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ̱ ܒܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܰܚܢܰܢ ܘܗ̣ܶܢܽܘܢ ܢܶܫܬܘܶܐ ܕܰܒܥܺܕܬܳܐ ܕܒܽܘܟܪ̈ܶܐ ܚܰܕܬܳܐܝ̣ܬ ܢܶܫܬܶܐ ܡܶܢ ܝܰܠܕܳܐ ܕܰܓܦܶܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܶܛܪܳܐ

ܚܰܟܺܝܡܳܐ ܘܓܰܢ̱ܒܳܪܳܐ ܘܥܰܫܺܝܢܳܐ ܡܳܪܝܳܐ ܒܬܶܕܡܽܘܪܬܳܐ ܐܰܩܺܝܡ ܠܣܶܕܪ̈ܰܝ ܪܰܘܡܳܐ ܒܝܰܘܡܳܐ ܕܢܽܘܚܳܡܶܗ ܟܰܕ ܣܠ̣ܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢ ܐܰܒܽܘܗ̱ܝ ܒܫܽܘܒܚܳܐ ܕܠܐܴ ܡܶܬܡܰܠܰܠ: ܩܰܒܶܠܳܝܗ̱ܝ ܒܥܶܕܳܢܳܐ ܗܳܢܳܐ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܕܡܶܢ ܒܶܝܬ ܡܺܝ̈ܬܶܐ: ܘܰܐܫܘܳܐ ܠܰܢ ܕܰܐܡܺܝܢܳܐܝ̣ܬ ܢܫܰܒܚܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܝ̣ܢ܀

ܚܽܘܬܳܡܳܐ

ܗܘܺܝ ܡܳܪܝܳܐ ܠܒܳܝ̇ܫܽܘܬܰܢ ܡܥܰܕܪܳܢܳܐ: ܘܡܶܢ ܢܶܣܝܽܘ̈ܢܶܐ ܡܦܰܨܝܳܢܳܐ: ܘܡܶܢ ܩܪ̈ܳܒܶܐ ܩܫܰܝ̈ܳܐ ܡܫܰܘܙܒܳܢܳܐ: ܕܠܐܴ ܬܶܬܶܠ ܠܣܳܛܳܢܳܐ ܥܠܰܝܢ ܫܽܘܠܛܳܢܳܐ: ܐܶܠܐܴ ܡܰܟܶܟ ܘܫܰܦܶܠܳܝܗ̱ܝ ܬܚܶܝܬ ܥܶܩܒܳܐ ܕܰܡܗܰܝ̈ܡܢܶܐ ܒܰܫܡܳܟ ܩܰܕܺܝܫܳܐ: ܘܡܰܘܕ̈ܝܰܝ ܒܰܩܝܳܡܬܳܟ: ܘܣܳܓ̈ܕܰܝ ܠܰܨܠܺܝܒܳܟ: ܘܕܰܒܰܪ ܠܰܢ ܢܽܘܓܪܳܐ ܕܙܰܒ̈ܢܶܐ ܛܳܒ̈ܶܐ ܘܰܒܗܺܝ̈ܠܐܷ ܕܫܳܦܪܺܝܢ ܠܳܟ ܡܳܪܰܢ ܘܰܐܠܳܗܰܢ܀