ܨܠܽܘܬܳܐ ܕܫܽܘܪܳܝܳܐ

ܗܰܒ ܘܫܰܟܶܢ ܠܰܢ ܡܳܪܝܳܐ ܐܰܠܳܗܳܐ ܕܰܢܨܰܠܶܐ ܩܕܳܡܰܝܟ ܒܟܽܠܳܗ̇ ܕܰܟܝܽܘܬܳܐ ܟܰܕ ܡܰܪܚܩܺܝܢܰܢ ܡܶܢ ܟܽܠܳܗ̇ ܚܶܡܬܳܐ ܘܒܺܝܫܽܘܬܳܐ: ܢܥܰܕܥܶܕ ܠܳܟ ܥܺܐܕܳܐ ܗܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܟܰܕ ܡܠܶܝܢܰܢ ܟܽܠܳܗ̇ ܒܰܣܺܝܡܽܘܬܳܐ: ܘܰܐܫܘܳܐ ܠܰܢ ܕܰܢܫܰܒܚܳܟ ܟܽܠܰܢ ܒܰܐܡܺܝܢܽܘܬܳܐ: ܘܠܐܱܒܽܘܟ ܕܰܐܩܺܝܡ ܠܰܢ ܡܶܢ ܪܰܡܝܽܘܬܳܐ: ܘܰܠܪܽܘܚܳܟ ܩܰܕܺܝܫܳܐ ܥܳܒܶܕ ܛܳܒ̈ܳܬܳܐ: ܘܰܡܦܰܢܶܐ ܫ̈ܶܐܠܳܬܳܐ ܫܰܦܺܝܪ̈ܳܬܳܐ: ܗܳܫܳܐ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ: ܬܠܳܬ ܕܺܝܠܳܝ̈ܳܬܳܐ ܡܝܰܩܢܳܢ̈ܝܳܬܳܐ: ܐܰܒܳܐ ܥܶܩܳܪܳܐ ܘܰܒܪܳܐ ܦܺܐܪܳܐ ܘܪܽܘܚܳܐ ܣܰܘ̈ܟܶܐ: ܐܰܒܳܐ ܢܽܘܪܳܐ ܘܰܒܪܳܐ ܪܶܬܚܳܐ ܕܺܝܠܳܗ̇ ܘܪܽܘܚܳܐ ܕܰܠܩܳܗ̇: ܚܕܳܐ ܓܰܘܙܰܠܬܳܐ ܒܢܽܘܪܳܐ ܘܰܒܚܰܡܺܝܡܽܘܬܳܐ ܕܺܝܠܳܗ̇: ܐܰܒܳܐ ܗܰܘܢܳܐ ܘܰܒܪܳܐ ܡܶܠܬܳܐ ܘܪܽܘܚܳܐ ܢܰܦܫܳܐ: ܐܰܒܳܐ ܫܽܘܒܚܳܐ ܘܰܒܪܳܐ ܙܺܝܘܳܐ: ܘܪܽܘܚܳܐ ܗܶܕܪܳܐ: ܚܰܕ ܬܠܳܬܳܐ ܘܰܬܠܳܬܳܐ ܚܰܕ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܕܠܐܴ ܣܳܟ ܡܶܬܦܰܠܓܺܝܢ ܐܶܢܽܘܢ ܠܰܡܢܰܘ̈ܳܬܳܐ ܘܠܐܱܠܦ̈ܶܐ ܣܰܓܺܝ̈ܶܐܐ: ܐܶܠܐܴ ܕܫܳܘܶܝܢ ܘܠܰܝܬ ܒܥܳܬܳܐ ܕܡܳܛܝܳܐ ܠܗܽܘܢ ܬܠܺܝܬܳܝܽܘܬܳܐ ܕܠܐܴ ܫܽܘܪܳܝ ܘܰܕܠܐܴ ܫܽܘܠܳܡ: ܬܠܺܝܬܳܝܽܘܬܳܐ ܕܠܐܴ ܡܶܬܰܐܡܪܳܐ ܐܶܬܡܳܠܝ̱ ܘܝܰܘܡܳܢܳܐ ܘܰܡܚܳܪ: ܬܠܺܝܬܳܝܽܘܬܳܐ ܕܠܰܘ ܟܰܕ ܡܶܬܟܰܢܫܳܐ ܬܠܳܬܳܐ ܐܰܠܳܗ̈ܶܐ ܗܳܘܝܳܐ: ܘܠܰܘ ܟܰܕ ܡܶܬܦܰܠܓܳܐ ܬܽܘܠܬܳܐ ܘܰܐܥܦܳܐ ܡܶܬܩܰܪܝܳܐ: ܐܶܠܐܴ ܐܰܠܳܗܳܐ ܡܫܰܡܠܝܳܐ ܐܰܒܳܐ ܘܐܰܠܳܗܳܐ ܡܫܰܡܠܝܳܐ ܒܪܳܐ ܘܐܰܠܳܗܳܐ ܡܫܰܡܠܝܳܐ ܪܽܘܚܳܐ ܩܰܕܺܝܫܳܐ: ܘܰܬܠܳܬܰܝ̈ܗܽܘܢ ܚܰܕ ܐܰܠܳܗܳܐ ܫܰܪܺܝܪܳܐ ܐܝ̣ܬܝܗܽܘܢ: ܕܠܶܗ ܝܳܐܶܐ ܫܽܘܒܚܳܐ ܒܗܳܢܳܐ ܥܶܕܳܢܳܐ ܕܪܰܡܫܳܐ܀

ܣܶܕܪܳܐ

ܟܰܕ ܒܚܽܘ̈ܕܳܬܶܐ ܘܰܒܪܽܘܡܪ̈ܳܡܶܐ ܕܪܽܘܚܳܐ ܩܰܕܺܝܫܳܐ ܠܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ ܡܚܰܓܶܝܢܰܢ: ܘܠܳܟ ܐܳܘ ܡܶܠܬܳܐ ܐܰܠܳܗܳܐ ܕܰܕܢܰܚ̣ܬ ܠܰܢ ܒܰܒܣܰܪ ܡܶܢ ܒܬܽܘܠܬܳܐ ܠܐܴ ܡܢܰܣܝܰܬ݀ ܒܙܽܘܘܳܓܳܐ ܡܰܪܝܰܡ ܠܐܴ ܡܶܬܦܰܫܩܳܢܳܐܝ̣ܬ: ܟܰܕ ܐܝ̣ܬܝܟ ܠܐܴ ܡܶܬܕܰܪܟܳܢܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܒܰܡܪ̈ܰܘܡܶܐ ܡܶܬܓܰܝܶܐܐ ܐܰܢ̱ܬ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ ܠܐܴ ܡܶܬܰܐܡܪܳܢܳܐܝ̣ܬ: ܫܰܕܰܪܬ ܠܪܺܝܫ ܡܰܠܐܱܟ̈ܶܐ ܓܰܒܪܺܐܝܶܠ ܪܶܡܙܳܢܳܐܝ̣ܬ ܕܢܰܟܪܶܙ ܠܥܳܠܡܳܐ ܣܒܰܪܬܳܐ ܚܕܰܬܳܐ ܦܽܘܪܩܳܢܳܐ ܘܚܰܝ̈ܶܐ ܠܓܶܢܣܶܗ ܕܳܐܕܳܡ ܡܫܰܟܢܳܢܳܐܝ̣ܬ: ܘܶܐܬܳܐ ܠܝܰܠܕܳܐ ܘܰܥܡܳܕܳܐ ܘܟܽܠܗܶܝܢ ܐ̱ܢܳܫܳܝ̈ܳܬܳܐ ܩܰܒܶܠ ܥܠܰܘܗ̱ܝ ܡܰܟܺܝܟܳܐܝ̣ܬ: ܟܰܕ ܠܕܰܒܪܳܐ ܢܦ̣ܰܩ ܨܰܘܡܳܐ ܠܒ̣ܰܟ ܗ̱ܘܳܐ ܡܶܛܽܠܳܬܰܢ: ܘܥܰܡ ܒܥܶܠܕܰܪܳܐ ܩܪܳܒܳܐ ܥܒ̣ܰܕ ܗ̱ܘܳܐ ܡܶܬܟܰܬܫܳܢܳܐܝ̣ܬ: ܟܰܕ ܠܘܳܬ ܚܰܫܳܐ ܦܳܪܽܘܩܳܝܳܐ ܒܨܶܒܝܳܢܶܗ ܐܶܬܳܐ ܕܰܢܚܰܬܶܡ ܐ̱ܪ̈ܳܙܶܐ ܕܨܳܪܘ̱ ܠܶܗ ܢܒܺܝ̈ܶܐ ܕܰܐܒܽܘܗ̱ܝ ܓܢܺܝܙܳܐ ܦܶܠܐܴܬܳܢܳܐܝ̣ܬ: ܘܰܩܒܽܘܪܬܳܐ ܩܰܒܶܠ ܥܠܰܘܗ̱ܝ: ܘܰܒܓܰܘ ܩܰܒܪܳܐ ܐܶܬܬܣܺܝܡ ܘܠܐܴ ܚ̣ܙܳܐ ܚܒܳܠܐܴ ܒܰܫܝܽܘܠ ܕܰܩܒܺܝܪ̈ܶܐ ܡܳܪܳܢܳܐܝ̣ܬ: ܘܩܳܡ ܡܶܢ ܩܰܒܪܳܐ ܒܚܰܝܠܐܴ ܘܙܳܟܽܘܬܳܐ ܦܰܐܝܽܘܬ ܐܰܠܳܗܳܐܝ̣ܬ: ܘܰܫ̣ܪܳܐ ܐܰܣܺܝܪ̈ܶܐ ܕܡܶܢ ܥܳܠܰܡ: ܘܰܐܟ̣ܪܶܙ ܚܰܝܰܬ݀ ܡܺܝ̈ܬܶܐ: ܘܩܳܡ ܘܰܐܒܗ̣ܶܬ ܐܶܢܽܘܢ ܠܢܳܛܽܘܪ̈ܶܐ: ܘܕܳܫ ܐܶܢܽܘܢ ܠܰܬܠܳܬܳܐ ܛܪ̈ܽܘܢܶܐ: ܒܺܝܫܳܐ ܘܡܰܘܬܳܐ ܘܣܳܛܳܢܳܐ: ܘܩܳܡ ܘܰܣܚ̣ܰܦ ܠܨܳܠܽܘ̈ܒܶܐ ܘܰܥܒ̣ܰܕ ܐܶܢܽܘܢ ܚܶܣܕܳܐ ܘܡܽܘܝܳܩܳܐ ܠܕܳܪ̈ܶܐ ܕܳܐܬܶܝܢ: ܩܳܡ ܓܰܢ̱ܒܳܪܳܐ ܘܕܳܫ ܐܶܢܽܘܢ ܠܣܳܩܽܘܪ̈ܰܘܗ̱ܝ ܬܚܶܝܬ ܐܶܣܟܽܘܦܬܳܐ ܕܰܫܝܽܘܠ: ܘܠܳܟ ܚܰܝܳܐ ܘܡܰܚܝܳܢܳܐ ܒܥ̣ܰܘ ܡܰܪ̈ܳܚܶܐ ܕܢܶܛܠܡܽܘܢ: ܘܠܰܩܝܳܡܬܳܐ ܕܺܝܠܳܟ ܢܕܰܓܠܽܘܢ: ܐܰܝܟ ܕܰܛܠܰܡ̣ܘ̱ ܐܳܣܘ̈ܳܬܳܐ ܘܳܐܬܘ̈ܳܬܳܐ ܘܬܶܕܡܪ̈ܳܬܳܐ ܘܰܓܒܰܪ̈ܘܳܬܳܐ ܬܡܺܝ̈ܗܳܬܳܐ ܕܰܣܥ̣ܰܪܬ ܩܕܳܡ ܨܠܺܝܒܽܘܬܳܟ: ܘܥܰܡ ܒܥܶܠܕ̈ܒܳܒܰܝܟ ܗܳܢܘܢ̇ ܕܚܶܣܕܳܐ ܠܥܳܠܡܳܐ ܥܒ̣ܰܕܬ ܐܶܢܽܘܢ ܒܰܩܝܳܡܬܳܟ: ܐܶܡ̣ܰܪܘ̱ ܟܳܗ̈ܢܶܐ ܠܢܳܛܽܘܪ̈ܶܐ ܟܰܕ ܡܰܪܟܢܺܝܢ ܪ̈ܺܝܫܰܝܗܽܘܢ ܐܰܝܟ ܬܰܥ̈ܠܐܷ ܘܰܡܚܰܦܶܝܢ ܐܰܦܰܝ̈ܗܽܘܢ ܒܒܶܗܬܬܳܐ: ܓܰܒܪ̈ܶܐ ܫܡ̣ܰܥܘ̱ ܡܶܢܰܢ ܫܩܽܘܠܘ̱ ܕܰܗܒܳܐ ܟܡܳܐ ܕܨܳܒܶܝܢ ܐܢ̱ܬܽܘܢ ܘܰܐܛܶܐܒܘ̱ ܠܣܽܘܥܪܳܢܳܐ ܗܳܢܳܐ: ܕܬܰܠܡܺܝ̈ܕܶܐ ܕܺܝܠܶܗ ܐܶܬܰܘ ܓܰܢܒܽܘܗ̱ܝ ܟܰܕ ܚܢܰܢ ܕܰܡܝ̣ܟܺܝܢܰܢ: ܐܳܘ ܥܘܺܝܪ̈ܰܝ ܠܶܒܳܐ ܘܣܰܡ̈ܝܰܝ ܗܰܘܢܳܐ: ܐܶܢܓܶܝܪ ܕܰܡܺܝܟܺܝܢ ܗ̱ܘܰܝܬܽܘܢ ܡܶܢ ܐܰܝܟܳܐ ܝܳܕܥܺܝܢ ܐܢ̱ܬܽܘܢ ܕܬܰܠܡܺܝ̈ܕܰܘܗܝ ܓܰܢܒܽܘܗ̱ܝ ܡܰܢܽܘ ܓܠܐܴ ܠܟܽܘܢ ܡܰܢܽܘ ܐܰܘܕܰܥܟܽܘܢ: ܡܰܢܽܘ ܚܰܘܺܝ ܠܟܽܘܢ: ܠܡܳܐ ܢܒܺܝ̈ܶܐ ܐܰܢ̱ܬܽܘܢ ܠܡܳܐ ܚܶܙܘ̈ܳܢܶܐ ܚ̣ܙܰܝܬܽܘܢ: ܠܡܳܐ ܓܶܠܝܳܢ̈ܶܐ ܩܰܒ̣ܶܠܬܽܘܢ ܘܶܐܢ ܥܺܝܪܺܝܢ ܗ̱ܘܰܝܬܽܘܢ ܠܡܽܘܢ ܠܐܴ ܠܒܰܟ̣ܬܽܘܢ ܐܶܢܽܘܢ ܠܓܰܢ̈ܳܒܶܐ: ܚܺܝܨܺܝܢ ܗ̣ܘܰܝܬܽܘܢ ܡܶܢ ܫܶܡܥܽܘܢ ܗܰܘ ܕܺܐܝܬܰܘܗ̱ܝ ܣܳܒܳܐ: ܩܰܠܺܝܠܺܝܢ ܗ̱ܘܰܝܬܽܘܢ ܡܶܢ ܛܰܠܝܳܐ ܝܽܘܚܰܢܳܢ: ܙܪܺܝܙܺܝܢ ܐܢ̱ܬܽܘܢ ܡܶܢ ܝܰܥܩܽܘܒ: ܚܰܨܺܝܦܺܝܢ ܐܢ̱ܬܽܘܢ ܡܶܢ ܬܳܐܘܡܰܐ ܘܰܐܢܕܪܶܐܘܳܣ: ܘܡܶܢ ܒܰܪ ܬܽܘܠܡܰܝ ܚܦܺܝܛܺܝܢ ܐܢ̱ܬܽܘܢ: ܢܰܫܺܝܫ ܡܶܢܟܽܘܢ ܦܺܝܠܺܝܦܳܘܣ ܫܦܶܠ ܡܶܢܟܽܘܢ ܡܰܬܰܝ: ܡܚܺܝܠ ܡܶܢܟܽܘܢ ܒܰܪ ܚܰܠܦܰܝ ܬܰܚܽܘܒ ܡܶܢܟܽܘܢ ܛܰܢܳܢܳܐ: ܠܡܳܐ ܠܐܴ ܠܒܰܟ̣ܬܽܘܢ ܐܶܢܽܘܢ ܠܓܰܢ̈ܳܒܶܐ ܐܳܘ ܕܰܓ̈ܳܠܐܷ ܨܰܗܝ̈ܰܝ ܠܰܕܡܳܐ: ܠܡܳܐ ܚܳܣܬܽܘܢ ܥܠܰܝܗܽܘܢ ܐܳܘ ܕܠܐܴ ܚܰܘܣܳܢܳܐ: ܠܡܳܢܳܐ ܪܰܚܶܡܬܽܘܢ ܥܠܰܝܗܽܘܢ ܐܳܘ ܓܠܺܝ̣̈ܙܰܝ ܡܶܢ ܪ̈ܰܚܡܶܐ: ܠܐܻܝܘ ܙܳܩܽܘ̈ܦܶܐ ܕܰܢܚܰܦܽܘܢ ܫܪܳܪܳܐ ܘܠܐܴ ܐܶܫܟ̣ܰܚܘ̱: ܝܰܗ̣ܒܘ̱ ܫܽܘܚܕܳܐ ܣܰܓܺܝܳܐܐ ܕܰܢܩܺܝܡܽܘܢ ܕܰܓܳܠܽܘܬܳܐ: ܘܩܽܘܫܬܳܐ ܠܐܴ ܐܶܬܚܰܦܺܝ: ܟܺܝܣܰܝ̈ܗܽܘܢ ܓܡܰܪܘ̱ ܘܰܐܘܦܺܝܘ ܘܰܫܪܳܪܳܐ ܠܐܴ ܐܶܬܛܰܫܺܝ: ܓܢܰܒܘ̱ ܠܐܻܝܡܳܡܳܐ ܘܠܐܴ ܐܶܣܬܰܟܰܠܘ̱ ܕܠܰܝܬ ܠܗܽܘܢ ܕܽܘܟܬܳܐ ܕܰܡܣܰܬܪܳܐ ܠܶܗ: ܣܳܡ̣ܘ̱ ܫܶܡܫܳܐ ܒܥܽܘ̈ܒܰܝܗܽܘܢ ܕܠܐܴ ܢܶܬܠܽܘܢ ܕܬܶܬܦܰܪܢܰܣܝ̱ ܒܪܺܝܬܳܐ ܒܢܽܘܗܪܶܗ: ܐܺܝܡܳܡܳܐ ܕܢܰܚ ܥܰܠ ܣܰܘ̈ܦܶܐ: ܘܰܐܓܰܪܘ̱ ܦܳܥ̈ܠܐܷ ܕܢܺܐܡܪܽܘܢ ܫܶܡܫܳܐ ܠܐܴ ܣܰܠܺܝܩ: ܓܰܢ̈ܳܒܶܐ ܠ̈ܶܠܐܷ ܠܶܣܛܳܝ̈ܶܐ ܣܰܟ̈ܠܐܷ: ܓܰܝ̈ܳܣܶܐ ܥܘܺܝܪ̈ܶܐ: ܚܰܣ̈ܳܡܶܐ ܡܰܪܺܝܪ̈ܶܐ ܒܳܙܽܘ̈ܙܶܐ ܣܪ̈ܺܝܩܶܐ: ܡܚܰܠܨ̈ܳܢܶܐ ܣܦܺܝ̈ܩܶܐ: ܚܳܛܽܘ̈ܦܶܐ ܒܠܺܝ̣̈ܠܐܷ: ܕܰܓ̈ܳܠܐܷ ܢܟܺܝ̣̈ܠܐܷ: ܡܳܪܰܢ ܘܰܐܠܳܗܰܢ ܡܶܬܢܰܚܳܡܽܘ ܐܶܬܢܰܚܰܡ: ܘܠܰܘ ܡܶܬܓܢܳܒܽܘ ܐܶܬܓܢܶܒ: ܘܒܳܬܰܪܟܶܢ ܗ̣ܽܘ ܡܳܪܰܢ ܐܶܬܚܙܺܝ ܗ̱ܘܳܐ ܠܡܰܪܝܰܡ ܐܶܡܶܗ ܘܰܠܡܰܓܕܠܳܝܬܳܐ ܦܓܰܥ ܒܡܳܪܬܳܐ: ܚܰܘܺܝ ܗ̱ܘܳܐ ܢܰܦܫܶܗ ܠܓܽܘܕܳܐ ܕܬܰܠܡܺܝ̈ܕܰܘܗ̱ܝ: ܚܰܘܺܝ ܢܰܦܫܶܗ ܘܗܰܠܶܟ ܗ̱ܘܳܐ ܒܽܐܘܪܚܳܐ ܥܰܡ ܩܠܶܝܽܘܦܰܐ ܘܚܰܒܪܶܗ: ܚܒ̣ܰܨܘ̱ ܛܶܒ̈ܶܐ ܣܰܓܺܝ̈ܶܐܐ ܕܰܩܝܳܡܬܳܐ: ܬܟܶܒܘ̱ ܟܳܪ̈ܽܘܙܘܳܬܳܐ ܕܢܽܘܚܳܡܳܐ ܙܪ̈ܰܒܝ̱ ܣܰܒܪ̈ܳܬܳܐ ܕܚܰܕ̈ܘܳܬܳܐ ܠܰܚܕ̈ܳܕܶܐ ܐܺܝܡܳܡܳܐ ܕܢܰܚ̣ ܢܰܗܺܝܪܳܐܝ̣ܬ: ܥ̣ܪܰܩܘ̱ ܛܶܠ̈ܳܠܐܷ ܡܶܢ ܙܰܠܺܝ̈ܩܰܘܗ̱ܝ ܕܫܶܡܫܳܐ: ܐܶܬܛܰܠܰܩܘ̱ ܓ̈ܶܠܐܷ ܡܶܢ ܩܕܳܡ ܢܽܘܪܳܐ: ܠܐܴ ܣܰܝܒܪܰܬ݀ ܚܰܒܬܳܐ ܩܕܳܡ ܫܰܠܗܶܒܺܝܬܳܐ ܐܶܒܕܰܬ݀ ܕܰܓܳܠܽܘܬܳܐ ܡܶܢ ܩܕܳܡ ܫܪܳܪܳܐ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܰܢ ܚܢܰܢ ܝܰܠܕ̈ܶܝܗ̇ ܕܰܐܩܠܶܣܺܝܣ (ܥܺܕܬܳܐ) ܕܺܝܠܳܟ ܩܰܕܺܝܫܬܳܐ ܕܥܰܡ ܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ ܠܰܩܝܳܡܬܳܟ ܡܫܰܒܰܚܬܳܐ ܒܰܐܟܰܕܺܝ̈ܰܐܣ (ܒܩܝ̣̈ܢܳܬܳܐ) ܕܪܽܘܚܳܐ ܩܰܕܺܝܫܳܐ ܡܥܰܕܥܕܺܝܢܰܢ ܥܒܶܕ ܠܰܢ ܠܰܘ ܐܰܝܟ ܕܫܳܘܶܝܢܰܢ ܐܶܠܐܴ ܐܰܟܡܳܐ ܕܐܰܠܳܗܽܘܬܳܟ ܡܦܳܣܳܐ ܘܝܳܕܥܳܐ ܕܡܰܘܬܰܪ ܠܰܢ: ܐܶܣܛܽܘܪܳܘܣ (ܨܠܝ̣ܒܳܐ) ܕܺܝܠܳܟ ܙܰܟܳܝܳܐ ܢܣܰܬܰܪ ܠܰܢ ܬܚܶܝܬ ܟܶܢ̈ܦܰܘܗ̱ܝ ܒܰܓܢܽܘܢܳܟ ܡܠܐܷ ܢܽܘܗܪܳܐ ܒܰܣܶܡ ܠܰܢ: ܓܶܕܰܝܢ ܠܐܘܪܰܐܢܳܘܣ ܠܘܳܬܳܟ ܒܰܕܥܰܬܺܝܪ ܗ̣ܽܘ ܐܽܘܡܺܝܪܳܘܣ ܕܺܝܠܳܟ: ܕܰܒܰܪ ܠܰܢ ܒܩܰܡܛܳܘܣ (ܢܝ̣ܫܳܐ) ܕܺܝܠܳܟ: ܕܡܰܘܒܶܠ ܠܡܰܠܟܽܘܬܳܟ: ܗܰܕܳܐ ܠܰܢ ܒܦܽܘܒܳܘܣ ܗܳܝ ܕܰܡܪܰܥܝܳܐ ܠܳܟ: ܘܰܥܶܕ ܠܰܢ ܠܘܳܬܳܟ: ܙܰܡܶܢ ܠܟܽܠܰܢ ܡܶܢ ܛܰܪܛܳܘܣ (ܥܰܡܛܳܢܳܐ) ܠܘܳܬ ܢܽܘܗܪܳܟ: ܚܰܙܶܩ ܠܰܢ ܒܠܺܝܣܺܕܺܝܢ ܗܳܝ ܕܚܽܘܒܳܐ ܕܒܳܟ ܘܒܰܚܕ̈ܳܕܶܐ: ܛܰܪ ܒܰܢ ܗܰܝܡܳܢܽܘܬܳܐ ܬܪܺܝܨܬܳܐ ܘܳܐܘܪܬܳܘܕܽܘܟܣܳܝܬܳܐ ܝܰܒܶܠ ܠܰܢ ܠܘܳܬ ܬܶܓ̈ܡܶܐ ܦܺܝܠܽܘ̈ܟܣܳܝܶܐ ܥܰܡ ܢܰܦ̈ܫܳܬܳܐ ܕܰܐܓܝܽܘ̈ܣܶܐ (ܕܩܰܕܺܝ̈ܫܶܐ): ܟܰܫܰܪ ܠܰܢ ܒܺܐܝܣܺܝܪܳܘܣ ܗܳܝ ܕܚܳܫܚܳܐ ܠܳܟ: ܠܰܚܶܡ ܠܰܢ ܒܫܰܦܺܝܪܽܘܬ ܣܽܘܢܛܰܟܣܺܝܣ ܐܰܪܡܽܘܢܳܝܬܳܐ(ܚܪܝ̣ܙܘ̣ܬ ܡ̈ܶܠܶܐ ܕܩܝ̣̈ܢܳܬܳܐ): ܡܰܟܶܟ ܠܕܺܝܰܒܳܠܳܘܣ (ܠܣܳܛܳܢܳܐ) ܬܚܶܝܬ ܪ̈ܶܓܠܐܷ ܕܺܝܠܰܢ: ܢܰܛܰܪ ܠܰܢ ܒܟܽܠܗܶܝܢ ܐܰܝܠܶܝܢ ܕܠܳܟ ܦܰܐܝ̈ܳܢ ܘܰܪ̈ܚܺܝܡܳܢ: ܣܰܬܶܬ ܒܰܢ ܢܳܛܽܘܪܽܘܬܳܐ ܕܢܳܡܽܘ̈ܣܰܝܟ ܐܰܝܠܶܝܢ ܕܶܐܬܬܣܺܝܡܘ̱ ܥܠܰܝܢ: ܥܰܕܰܪ ܠܰܢ ܒܟܽܠܗܶܝܢ ܥܒܳܕ̈ܶܐ ܕܰܡܪܰܥܶܝܢ ܠܳܟ: ܦܪܽܘܩ ܠܰܢ ܡܶܢ ܒܝ̣ܫܳܐ ܘܡܶܢ ܟܽܠܗܶܝܢ ܨܶܢܥ̈ܳܬܶܗ: ܨܰܠܶܡ ܠܰܢ ܒܶܣܪ̈ܳܢܶܐ ܥܰܒ̣ܕܰܝ̈ܟ ܒܪܽܘܚܳܢܳܝܽܘܬܳܐ ܡܣܰܬܬܳܐ ܕܠܐܴ ܙܽܘܥܙܳܥ: ܩܰܣܡܶܣ (ܨܰܒܶܬ) ܠܰܢ ܒܒܳܒ̈ܳܬܳܐ ܠܐܴ ܛܺܝܛܳܢܝ̈ܳܬܳܐ (ܚܶܘܳܪܳܐ ܕܥܰܝܢܳܐ) ܪܽܘܚܳܟ ܡܒܰܣܰܡܬܳܐ ܬܪܰܡܪܶܡܝ̱ ܠܩܰܪܢܰܢ ܥܰܠ ܣܳܩܽܘܪ̈ܰܝܢ ܫܰܝܢܳܐ ܘܰܫܠܳܡܳܐ ܕܡܶܢ ܠܘܳܬܳܟ ܐܰܚ̣ܕܰܪ ܠܳܗ̇ ܠܥܺܕܬܳܟ ܩܰܕܺܝܫܬܳܐ: ܬܶܗܘܶܐ ܡܳܪܝ̱ ܛܰܝܒܽܘܬܳܟ ܡܚܰܣܝܳܢܺܝܬܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܐܰܝܟܰܢܳܐ ܕܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܢܫܰܒܰܚ ܐܰܟܣܺܝܣܳܐܝ̣ܬ (ܕܝ̣ܠܳܢܳܐܝ̣ܬ، ܡܳܪܳܢܳܐܝ̣ܬ) ܘܠܐܱܒܽܘܟ ܢܙܰܡܰܪ ܘܰܢܕܰܒܰܚ ܠܐܴ ܕܺܝܰܐܬܶܗܣܺܝܣܳܐܝ̣ܬ (ܠܳܐ ܡܶܬܦܰܣܩܳܢܳܐܝ̣ܬ) ܘܰܠܪܽܘܚܳܟ ܩܰܕܺܝܫܳܐ ܢܗܰܠܶܠ ܠܐܴ ܫܰܠܘܳܐܝ̣ܬ ܗܳܫܳܐ ܘܰܒܟܽܠܙܒܰܢ܀

ܥܶܛܪܳܐ

ܩܰܒܶܠ ܡܳܪܝ̱ ܡܶܢ ܡܚܺܝܠܽܘܬܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܐܥܛܰܪܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܕܒܶܗ ܐܰܦܨܰܚ̣ܬ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ: ܐܰܦܨܰܚ ܐܳܦ ܠܰܢ ܡܳܪܝ̱ ܒܥܺܐܕ̈ܶܐ ܕܰܡܕܰܒܪܳܢܽܘܬܳܟ: ܘܚܰܕܳܐ ܠܰܢ ܒܚܰܓܰܝ̈ܟ ܦܨܺܝ̈ܚܶܐ ܘܰܐܣܓܳܐ ܠܘܳܬܰܢ ܫܽܘܟܳܢܰܝ̈ܟ ܐܰܠܳܗܳܝ̈ܶܐ: ܘܒܰܝܰܐܐ ܠܟܽܠܰܢ ܒܚܰܘ̈ܣܳܢܰܝܟ ܘܗܰܒܠܰܢ ܕܢܶܣܢܶܐ ܠܟܽܠܡܶܕܶܡ ܘܠܳܟ ܢܶܩܢܶܐ ܒܰܠܚܽܘܕܰܝܟ: ܘܠܐܴ ܬܰܪܦܶܐ ܒܰܢ ܐܺܝܕ̈ܰܝܳܐ ܕܰܒܥܶܠܕ̈ܒܳܒܶܐ ܕܣܳܢܶܝܢ ܠܰܢ: ܘܕܰܒܰܪ ܠܰܢ ܒܢܳܡܽܘ̈ܣܰܝܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܚܽܘܬܳܡܳܐ

ܐܰܩܺܝܡ ܠܰܢ ܡܳܪܝܳܐ ܐܰܠܳܗܳܐ ܥܰܡ ܐܶܡܪ̈ܰܝܟ ܘܒܰܪܶܟ ܠܰܢ ܒܥܰܕܥܺܐܕ̈ܰܝܟ ܘܰܒܚܰܓܰܝ̈ܟ: ܘܰܓܡܽܘܪ ܠܰܢ ܒܫܽܘ̈ܟܳܢܰܝܟ: ܘܗܰܕܳܐ ܠܰܢ ܒܽܐܘܪܚܳܐ ܕܢܳܡܽܘ̈ܣܰܝܟ: ܘܙܰܡܶܢ ܠܰܢ ܠܰܓܢܽܘܢܳܟ: ܘܰܥܶܕ ܠܰܢ ܠܰܣܡܳܟܳܟ: ܘܚܰܝܶܕ ܠܰܢ ܠܫܳܪܽܘܬܳܟ: ܘܛܰܪ ܒܰܢ ܪܰܗܒܽܘܢܳܐ ܕܐ̱ܪ̈ܳܙܰܝܟ ܘܰܟܢܽܘܫ ܠܰܢ ܠܰܟܢܽܘ̈ܫܝܶܐ ܕܰܢܒܺܝܰܝ̈ܟ: ܠܰܚܶܡ ܠܰܢ ܒܕܰܘܨܳܐ ܡܚܰܕܝܳܢܳܐ ܕܣܳܗ̈ܕܶܐ ܡܪ̈ܰܥܝܳܢܰܝܟ: ܚܰܣܳܐ ܚܰܘ̈ܒܰܝܢ ܘܰܫܒܽܘܩ ܠܰܚܛܳܗܰܝ̈ܢ ܘܰܐܢܺܝܚ ܠܥܰܢܺܝ̈ܕܰܝܢ ܕܰܫܟ̣ܶܒܘ ܥܰܠ ܣܰܒܪܳܟ܀