ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܳܪܳܐ ܕܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܘܠܐܴ ܒܠܺܝ̣̈ܠܐܷ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ: ܠܰܬܠܳܬܳܐ ܫܡܳܗ̈ܶܐ ܣܓܺܝ̈ܕܶܐ ܘܠܐܴ ܡܶܬܕܰܪ̈ܟܳܢܶܐ ܕܰܐܝܬܺܝܘ ܠܰܒܪܺܝܬܳܐ ܟܽܠܳܗ̇ ܠܰܗܘܳܝܳܐ ܚܕܳܐ ܐܰܠܳܗܽܘܬܳܐ ܒܳܪܝܰܬ݀ ܟܽܠ: ܘܡܳܪܰܬ݀ ܟܽܠ: ܘܡܰܝܬܝܰܬ݀ ܟܽܠ: ܘܰܡܟܰܝܢܰܬ݀ ܟܽܠ: ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ݀ ܒܽܐܘܣܺܝܰܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܚܰܕ ܒܪܳܐ ܕܩܳܡ ܡܶܢ ܩܰܒܪܳܐ: ܘܰܐܩܺܝܡ ܠܓܶܢܣܰܢ ܕܥܰܦܪ̈ܳܢܶܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܟܰܕ ܠܰܩܝܳܡܬܳܐ ܕܺܝܠܳܟ ܡܥܰܕܥܕܺܝܢܰܢ ܡܫܺܝܚܳܐ ܐܰܠܳܗܳܐ ܕܺܝܠܰܢ: ܘܒܰܒ̈ܢܳܬ ܩ̈ܳܠܐܷ ܕܪܽܘܚܳܐ ܩܰܕܺܝܫܳܐ ܡܢܰܨܪܺܝܢܰܢ ܟܰܕ ܐܳܡܪܺܝܢܰܢ: ܗܳܕܳܐ ܗ̱̇ܝ ܩܝܳܡܬܳܐ ܡܰܚܝܳܢܺܝܬܳܐ ܕܰܐܩܺܝܡܰܬ݀ ܠܰܢ ܡܶܢ ܡܰܦܽܘܠܬܳܐ ܕܰܚܛܺܝܬܳܐ: ܘܠܰܫܡܰܝܳܐ ܒܫܽܘܒܚܳܐ ܪܰܒܳܐ ܥܰܠܝܰܬ݀ ܠܰܢ: ܗܳܕܳܐ ܗ̱ܝ ܩܝܳܡܬܳܐ ܡܰܚܝܳܢܺܝܬܳܐ ܕܐܰܠܳܗܰܢ ܕܒܳܗ̇ ܓܙܳܪ ܕܺܝܢܳܐ ܕܡܰܘܬܳܐ ܕܬܰܚܶܡ ܥܠܰܝܢ ܐܳܕܳܡ ܪܺܝܫ ܓܶܢܣܰܢ ܒܝܰܕ ܥܒܳܪ ܦܽܘܩܕܳܢܳܐ ܕܦܺܐܪܳܐ ܩܳܛܽܘܠܐܴ ܒܰܡܫܺܝܚܳܐ ܠܛܽܘ̈ܒܶܐ ܛܽܘܒ̈ܬܳܢܶܐ ܐܶܬܡܰܛܺܝܢܰܢ: ܗܳܢܰܘ ܝܰܘܡܳܐ ܕܰܥܒ̣ܰܕ ܡܳܪܝܳܐ ܬܰܘ ܢܕܽܘܨ ܘܢܶܚܕܶܐ ܒܶܗ: ܘܠܐܴ ܐ̱ܢܳܫ ܡܶܢܰܢ ܢܶܫܬܟܰܚ ܒܶܗ ܡܰܐܝܺܢܳܐ ܘܒܰܛܺܝܠܐܴ ܡܶܢ ܬܶܫܒܽܘܚܬܳܐ ܗܰܘ ܕܰܩ̣ܪܳܐ ܠܰܢ ܠܬܶܫܒܽܘܚܬܶܗ ܠܐܴ ܡܶܬܡܰܠܠܳـܢܝ̣ܬܳܐ: ܘܒܰܣܶܡ ܠܰܢ ܒܢܽܘܚܳܡܶܗ: ܘܚܰܕܝ̣ ܠܰܢ ܒܰܩܝܳܡܬܶܗ: ܘܰܐܪܘܺܝ ܠܰܢ ܒܰܚܙܳܬܶܗ ܡܰܪܘ̣ܙܳܢܺܝܬܳܐ: ܝܰܘܡܰܐ ܗ̱̇ܘ ܕܰܩܝܳܡܬܳܐ ܦܳܪܽܘܩܳܝܬܳܐ ܕܰܐܠܳܗܰܢ ܘܦܳܪܽܘܩܰܢ: ܠܐܴ ܢܶܪܚܰܡ ܡ̈ܶܠܐܷ ܒ̈ܰܛܳܠܳܬܳܐ ܘܠܐܴ ܢܡܰܠܶܠ ܦܰܟܺܝ̈ܗܳܬܳܐ ܕܫܶܥܝܳܐ ܘܕܶܒܚܳܐ ܕܰܡܢܰܟܪܺܝܢ ܠܰܢ ܡܶܢ ܬܶܐܘܳܪ̈ܺܝܰܐܣ ܕܡܶܐܬܺܝܬܳܟ ܕܬܰܪܬܶܝܢ: ܗܳܝ ܕܨܳܡܚܳܐ ܐܰܝܟ ܒܰܪܩܳܐ ܡܶܢ ܡܰܕܢܚܳܐ ܘܕܳܢܚܳܐ ܐܰܝܟ ܫܶܡܫܳܐ ܥܰܠ ܥܢ̈ܳܢܰܝ ܫܡܰܝܳܐ: ܠܺܠܝܰܐ ܗ̱̇ܘ ܕܡܰܪܗܶܒ ܠܰܢ ܘܰܡܙܺܝܥ ܒܰܢ ܚܽܘ̈ܫܳܒܶܐ ܛܳܒ̈ܶܐ ܕܢܶܐܪܽܘܥ ܠܪܽܘܚܳܐ ܕܰܩܝܳܡܬܳܐ ܕܟܽܠ ܒܣܰܪ: ܠܐܴ ܢܶܠܒܰܫ ܒܶܗ ܠܒܽܘ̈ܫܶܐ ܥܰܡܽܘ̈ܛܶܐ ܘܚܶܫܽܘ̈ܟܳܝܶܐ: ܠܺܠܝܰܐ ܗ̱ܘ ܕܚܰܕܽܘܬܳܐ ܘܰܪܘܳܙܳܐ ܘܰܦܨܺܝܚܽܘܬܳܐ ܕܒܶܗ ܩܳܡ ܡܳܪܰܢ ܡܶܢ ܩܰܒܪܳܐ ܘܠܐܴ ܚ̣ܙܳܐ ܚܒܳܠܐܴ ܒܶܝܬ ܡܺܝ̈ܬܶܐ: ܠܐܴ ܢܶܕܡܰܟ ܒܶܗ ܐܰܝܟ ܣܰܟ̈ܠܳܬܳܐ ܟܽܠܶܗ ܠܺܠܝܳܐ ܘܠܐܴ ܝܺܨܶܦ̈ܝ̱ ܕܡܶܫܚܳܐ ܣܰܓܺܝܳܐܐ ܕܢܶܗܘܶܐ ܒܡܳܐܢ̈ܶܐ ܕܺܝܠܗܶܝܢ: ܘܟܰܕ ܐܶܬܳܐ ܚܰܬܢܳܐ ܘܶܐܬܬܚܶܕ ܬܰܪܥܳܐ: ܐܰܝܠܶܝܢ ܕܰܡܛܰܝ̈ܒܳܢ ܗ̱ܘ̈ܰܝ ܥܰܠ̈ܝ̱ ܗ̱ܘ̈ܰܝ ܥܰܡܶܗ ܠܰܓܢܽܘܢܳܐ: ܠܺܠܝܰܐ ܗ̱ܘ ܕܪ̈ܶܦܣܶܐ ܘܰܕܩܽܘܝ̈ܳܙܶܐ ܒܪܽܘܚ ܘܒܰܦܓܰܪ: ܠܐܴ ܢܶܕܡܰܟ ܣܰܓܺܝܳܐܝ̣ܬ ܘܢܶܬܶܠ ܦܰܓܪ̈ܰܝܢ ܘܰܢܦ̈ܫܳܬܰܢ ܕܢܶܗܘܽܘܢ ܒܶܝܬ ܡܰܥܡܪܳܐ ܠܕܰܝ̈ܘܶܐ: ܐܶܠܐܴ ܢܩܰܕܶܡ ܡܶܢ ܫܰܦܪܳܐ ܠܟܰܪܡܳܐ ܕܥܺܝܢܓܳܕ ܘܢܶܠܽܘܥ ܚܰܝ̈ܶܐ ܡܶܢ ܣܓܽܘܠ ܟܽܘܦܪܳܐ: ܘܢܶܣܽܘܩ ܣܰܘܩܳܐ ܪܽܘܚܳܢܳܝܳܐ ܕܘܰܪ̈ܕܶܐ ܘܫܽܘܫ̈ܰܢܶܐ: ܘܰܐܝܟ ܢܶܫ̈ܶܐ ܩܰܕܺܝ̈ܫܳܬܳܐ ܕܰܛܥܶܢ̈ܝ̱ ܒܶܣ̈ܡܶܐ ܘܗܶܪ̈ܽܘܡܶܐ ܘܰܠܩܰܒܪܳܐ ܚܰܝܳܐ ܢܦ̣ܰܩ̈ܝ̱ ܕܰܢܒܰܣ̈ܡܳܢ ܠܦܰܓܪܶܗ ܕܗܰܘ ܡܰܚܶܐ ܡܺܝ̈ܬܶܐ ܘܟܰܕ ܬܰܡܺܝ̣̈ܗܳܢ ܙܳܝ̈ܥܳܢ ܘܪ̈ܳܥܠܳܢ ܡܶܢ ܕܶܚܠܬܳܐ ܕܢܳܛܽܘܪ̈ܶܐ: ܦܓܰܥ ܒܗܶܝܢ ܡܰܠܐܱܟܳܐ ܟܰܕ ܝܳܬܶܒ ܚܕܳܪ̈ܰܝ ܩܰܒܪܳܐ ܘܶܐܡ̣ܰܪ ܠܢܶܫܷ̈ܐ ܠܐܴ ܬܶܕܚ̈ܠܳܢ: ܝܳܕܰܥ ܐ̱ܢܳܐ ܓܶܝܪ ܒܰܫܪܳܪܳܐ ܕܰܠܝܶܫܽܘܥ ܗܰܘ ܕܶܐܨܛܠܶܒ ܡܢܳܬܡܳܠ ܒܳܥ̈ܝܳܢ ܐܢ̱ܬܶܝܢ: ܩܳܡ ܠܶܗ ܒܫܽܘܒܚܳܐ ܘܠܐܴ ܗ̱ܘܳܐ ܬܢܳܢ: ܐܶܠܐܴ ܙܶܠܶܝ̈ܢ ܠܰܓܠܺܝܠܐܴ: ܐܰܢ̱ܬܶܝܢ ܘܓܽܘܕܳܐ ܕܬܰܠܡܺܝ̈ܕܰܘܗ̱ܝ ܘܬܰܡܳܢ ܬܶܚܙܽܘܢܳܝܗ̱ܝ: ܘܰܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܥܰܒ̣̈ܕܶܐ ܕܺܝܠܳܟ ܡܳܪܝܳܐ: ܕܰܠܝܰܘܡܳܐ ܕܰܩܝܳܡܬܳܟ ܙܰܝܰܚܢܰܢ: ܘܰܐܫܘܳܐ ܠܰܢ ܕܢܶܦܽܘܩ ܟܽܠܰܢ ܠܐܘ̣ܪܥܳܐ ܕܡܶܐܬܺܝܬܳܟ ܕܬܰܪܬܶܝܢ ܒܙܰܘܚܳܐ: ܟܰܕ ܢܰܗܺܝܪܺܝܢ ܫܪ̈ܳܓܰܝܢ ܘܡܰܨܡܚܺܝܢ ܠܰܡܦܺܐܕܰܝ̈ܢ: ܘܰܡܠܶܝܢ ܡܳܐܢܰܝ̈ܢ ܘܡܰܫܦܥܺܝܢ: ܠܶܒܰܘ̈ܳܬܰܢ ܒܡܶܫܚܳܐ ܕܙܰܕܺܝܩܽܘܬܳܐ ܐܰܘܟܺܝܬ ܥܒܳܕ̈ܶܐ ܛܳܒ̈ܶܐ ܕܰܡܪܰܥܶܝܢ ܠܳܟ: ܘܰܢܥܰܕܥܶܕ ܠܳܟ ܥܺܐܕܳܐ ܪܰܒܳܐ ܕܽܐܘܫܰܥ̈ܢܶܐ ܡܶܬܝܰܕ̈ܥܳܢܶܐ: ܘܰܢܩܰܕܶܡ ܡܶܢ ܫܰܦܪܳܐ ܠܐܱܦܰܝ̈ܟ ܒܬܰܘܕܺܝܬܳܐ ܐܰܝܟ ܢܶܫ̈ܶܐ ܩܰܕܺܝ̈ܫܳܬܳܐ ܠܒܶܝܬ ܩܒܽܘܪܳܐ ܕܺܝܠܳܟ: ܘܰܡܨܰܠܠܺܝܢܰܢ ܡܶܢܟܽܠ ܣܰܢ̈ܝܳܬܳܐ ܕܠܳܟ ܠܐܴ ܫܳܦܪ̈ܳܢ: ܘܰܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ̱ ܥܰܠ ܣܰܒܪܳܟ ܘܰܡܣܰܟܶܝܢ ܠܪ̈ܰܚܡܶܐ ܕܡܶܢܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ܀