ܨܠܽܘܬܳܐ ܕܫܽܘܪܳܝܳܐ

ܡܫܺܝܚܳܐ ܐܰܠܳܗܳܐ ܕܩܳܡ ܡܶܢ ܩܰܒܪܳܐ ܒܫܽܘܒܚܳܐ ܪܰܒܳܐ ܘܰܒܙܳܟܽܘܬܳܐ ܘܓܰܢ̱ܒܳܪܽܘܬܳܐ: ܘܚܰܕܺܝ ܒܥܺܐܕܳܐ ܕܰܩܝܳܡܬܶܗ ܠܓܽܘܕܳܐ ܒܪܺܝܟܬܳܐ ܕܰܫܠܺܝܚܽܘܬܳܐ: ܗܰܒ ܠܰܢ ܡܳܪܝ̱ ܕܟܰܕ ܡܰܪܚܩܺܝܢܰܢ ܡܶܢ ܟܽܠܳܗ̇ ܚܶܡܬܳܐ ܘܒܺܝܫܽܘܬܳܐ ܘܰܐܫܘܳܐ ܠܰܢ ܕܰܢܫܰܒܚܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܚܰܕ ܐܰܠܳܗܳܐ ܫܰܪܺܝܪܳܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܕܠܐܴ ܡܶܬܕܪܶܟ ܘܠܐܴ ܡܶܬܥܰܩܰܒ ܘܠܐܴ ܡܶܬܒܨܶܐ: ܬܠܳܬܳܐ ܫܡܳܗ̈ܶܐ ܘܰܬܠܳܬܳܐ ܩܢܽܘ̈ܡܶܐ: ܘܰܬܠܳܬ ܕܺܝܠܳܝ̈ܳܬܳܐ: ܘܰܬܠܳܬܳܐ ܚܰܕ ܕܡܶܬܦܰܠܓܺܝܢ ܘܡܶܬܚܰܝܕܺܝܢ: ܘܗܰܘ̈ܢܶܐ ܕܰܒܢܰܝ̈ܢܳܫܳܐ ܠܐܴ ܡܳܛܶܝܢ ܠܶܗ: ܣܽܘ̈ܟܳܠܐܷ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܠܐܴ ܒܳܨܶܝܢ ܠܶܗ: ܘܠܐܴ ܚܳܙܶܝܢ ܫܽܘܒܚܳܐ ܕܪܰܒܽܘܬܶܗ ܕܠܶܗ ܝܳܐܶܐ ܫܽܘܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܰܢܽܘ ܕܰܐܝܟ ܕܫܳܘܶܐ ܢܺܐܡܰܪ ܘܰܢܬܰܢܶܐ ܠܝܰܡܳܐ ܪܰܒܳܐ ܕܰܡܕܰܒܪܳܢܽܘܬܳܟ ܐܳܘ ܡܶܠܬܳܐ ܐܰܠܳܗܳܐ: ܐܰܘ ܐܰܝܠܶܝܢ ܒܢ̈ܳܬ ܩ̈ܳܠܐܷ ܣܳܦ̈ܩܳܢ ܕܰܢܒܰܪ̈ܟܳܢ ܘܰܡܩܰܕ̈ܫܳܢ ܠܳܟ ܐܳܘ ܕܡܶܢ ܫܽܘ̈ܒܚܶܐ ܡܰܒܥܰܕ ܐܰܢ̱ܬ: ܦܳܐܕܳܐ ܕܶܝܢ ܡܰܚܫܰܒܬܳܐ ܘܗܰܘܢܳܐ ܘܬܰܪܥܺܝܬܳܐ ܕܟܽܠܗܽܘܢ ܒܪ̈ܰܝܳܐ ܘܰܥܒܺܝ̣̈ܕܶܐ ܡܶܢ ܡܰܐܨܕܳܢܽܘܬܳܐ ܘܡܶܬܒܰܩܝܳܢܽܘܬܳܐ ܒܬܶܕܡܪ̈ܳܬܳܐ ܬܡܺܝ̣̈ܗܳܬܳܐ: ܘܒܳܐܬܘ̈ܳܬܳܐ ܣܰܓܺܝ̈ܳܐܬܳܐ ܗܳܢܶܝܢ ܕܰܡܕܰܒܪܳܢܽܘܬܳܟ ܕܠܐܴ ܣܳܟܳܐ: ܗܳܝ ܕܰܠܘܳܬ ܓܶܢܣܰܢ ܡܚܺܝܠܐܴ ܘܬܰܚܽܘܒܳܐ ܫܰܡܠܺܝܬ ܒܰܩܢܽܘܡܳܟ ܐܰܠܳܗܰܢ ܣܓܺܝܕܳܐ ܡܳܪܰܢ ܝܶܫܽܘܥ ܡܫܺܝܚܳܐ: ܕܟܰܕ ܒܥܽܘܒܳܐ ܟܰܣܝܳܐ ܘܰܓܢܺܝܙܳܐ ܕܝܳܠܽܘܕܳܟ ܥܰܡ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̣̈ܢ ܕܰܐܪܝܳܐ: ܘܰܕܬܰܘܪܳܐ: ܘܰܕܢܶܫܪܳܐ: ܘܰܕܒܰܪܢܳܫܳܐ: ܘܰܠܥܶܠ ܡܶܢܗܽܘܢ ܡܶܬܒܰܣܰܡ ܐܰܢ̱ܬ ܒܬܶܐܘܳܪܺܝܰܐ ܕܺܝܠܳܟ ܠܐܴ ܡܶܬܗܰܘܢܳܢܺܝܬܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܕܰܒ̣ܪܰܝܬ ܠܡܰܠܐܱܟ̈ܶܐ: ܘܛܶܟ̈ܣܶܐ ܠܐܴ ܗܽܘܠܳܢܳܝ̈ܶܐ ܘܓܽܘ̈ܕܶܐ ܢܽܘܪ̈ܳܢܳܝܳܬܳܐ: ܘܰܐܪ̈ܟܰܐܣ ܕܫܰܠܗܶܒܺܝܬܳܐ: ܘܡܳܪ̈ܰܘܳܬܳܐ ܡܢܰܒܪ̈ܫܳܬܳܐ ܕܰܦܣܺܝ̣̈ܩܳܢ ܡܶܢ ܢܽܘܪܳܐ ܝܳܩܶܕܬܳܐ: ܡܶܢܗܽܘܢ ܕܶܝܢ ܒܣܰܓܺܝ ܓܶܦ̈ܶܐ ܦܳܪܚܺܝܢ ܡܶܢܗܽܘܢ ܕܶܝܢ ܒܣܰܓܺܝ ܐܰܦ̈ܶܐ ܚܳܝܪܺܝܢ: ܡܶܢܗܽܘܢ ܕܶܝܢ ܒܣܰܓܺܝ ܥܰܝ̈ܢܶܐ ܚܳܙܶܝܢ: ܡܶܢܗܽܘܢ ܕܶܝܢ ܡܒܰܪܟܺܝܢ ܘܰܡܩܰܕܫܺܝܢ: ܡܶܢܗܽܘܢ ܕܶܝܢ ܡܙܰܡܪܺܝܢ ܘܰܡܗܰܠܠܺܝܢ ܡܶܢܗܽܘܢ ܕܶܝܢ ܡܫܰܒܚܺܝܢ ܘܰܡܪܰܡܪܡܺܝܢ ܘܩ̈ܳܠܐܷ ܢܰܨܺܝ̈ܚܶܐ ܘܠܐܴ ܛܽܘܠܫܳܢܳܝ̈ܶܐ ܠܘܳܬ ܚܕ̈ܳܕܶܐ ܡܫܰܘܫܛܺܝܢ: ܘܦܳܪܚܺܝܢ ܒܓܶܦܰܝ̈ܗܽܘܢ ܟܰܕ ܛܳܝܣܺܝܢ ܘܠܐܱܠܳܗܽܘܬܳܟ ܠܐܴ ܚܳܙܶܝܢ: ܘܠܐܴ ܝܳܕܥܺܝܢ ܐܰܝܟܳܐ ܫܰܪܝܳܐ: ܘܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬܳܢܳܐ ܨܒܰܐܘܽܬ ܡܰܙܥܩܝ̣ܢ: ܩܰܕܝ̣ܫ ܡܳܪܝܳܐ ܕܰܙܟ̣ܳܐ ܠܰܛܪܽܘܢܳܐ: ܩܰܕܺܝܫ ܡܳܪܝܳܐ ܕܚܰܝܒܶܗ ܠܡܳܪܽܘܕܳܐ: ܩܰܕܺܝܫ ܡܳܪܝܳܐ ܕܰܬܪܰܥ ܫܽܘܪ̈ܶܐ ܟܰܗܺܝ̣̈ܢܶܐ ܕܰܫܝܽܘܠ ܕܳܘܺܝܬܳܐ: ܩܰܕܺܝܫ ܡܳܪܝܳܐ ܕܰܐܥܕܺܝ ܫܒܺܝܬܳܐ ܡܶܢ ܐܺܝܕܰܘ̈ܗ̱ܝ ܕܳܐܟܶܠܩܰܪܨܳܐ: ܟܰܕ ܠܳܟ ܚܳܙܶܝܢ ܒܪܰܘܡܳܐ ܘܡܰܠܝܳܐ ܡܰܪܟܰܒܬܳܐ ܡܶܢܳܟ: ܘܠܳܟ ܚܳܙܶܝܢ ܒܥܽܘܡܩܳܐ ܟܰܕ ܡܶܬܗܰܦܰܟ ܐܰܢ̱ܬ ܒܶܝܬ ܐܰܪ̈ܥܳܢܶܐ: ܟܰܕ ܫܪܰܝܬ ܒܟܰܪܣܳܐ ܕܰܒܬܽܘܠܬܳܐ: ܟܰܕ ܥܡ̣ܰܕܬ ܐܰܝܟ ܚܰܝܳܒܳܐ ܒܝܽܘܪܕܢܳܢ ܢܰܗܪܳܐ ܡܶܢ ܐܺܝ̈ܕܰܝ ܥܰܒܕܳܟ ܝܽܘܚܰܢܳܢ: ܟܰܕ ܩܰܒ̣ܶܠܬ ܓܙܽܘܪܬܳܐ ܐ̱ܢܳܫܳܝܬܳܐ ܬܡܺܝܢܳܝܰܬ݀ ܝܰܘ̈ܡܶܐ: ܟܰܕ ܨܳܡ̣ܬ ܠܳܟ ܨܰܘܡܳܐ ܐܰܪܒܥܺܝܢܳܝܳܐ ܘܫܰܚܺܝܬܳܝܗ̱ܝ ܠܰܒܥܶܠܕܰܐܪܳܐ ܒܕܰܪ̈ܶܐ ܬܠܳܬܳܐ ܕܐܰܩ̣ܪܶܒ ܥܰܡܳܟ: ܟܰܕ ܐܶܬܛܥܶܢ̣ܬ ܥܰܠ ܕܪ̈ܳܥܶܐ ܡܰܪ̈ܫܠܐܷ ܘܣܳܒܳܝ̈ܶܐ: ܘܩܽܘܪ̈ܒܳܢܶܐ ܠܡܰܕܒܚܳܐ ܡܩܰܪܶܒ ܗ̣ܘܰܝܬ ܐܰܝܟ ܢܳܡܽܘܣܳܐ ܕܡܽܘܫܶܐ: ܐܰܢ̱ܬ ܗ̣ܽܘ ܕܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܕܶܒ̈ܚܶܐ ܘܩܽܘܪ̈ܒܳܢܶܐ ܡܩܰܒܶܠ ܐܰܢ̱ܬ: ܟܰܕ ܟܽܠ ܬܶܕܡܪ̈ܳܬܳܐ ܫܒܺܝ̣̈ܚܳܬܳܐ ܣܳܥܰܪ ܗ̱ܘܰܝܬ: ܘܥܰܡܳܐ ܠܺܝܛܳܐ ܕܝܽܘ̈ܕܳܝܶܐ ܒܰܚܣܳܡܳܐ ܡܰܪܺܝܪܳܐ ܒܳܠܥܺܝܢ ܗ̱ܘܰܘ: ܟܰܕ ܠܰܟܪ̈ܺܝܗܰܝܗܽܘܢ ܡܰܐܣܶܐ ܗ̱ܘܰܝܬ: ܘܰܠܓܰܪ̈ܒܰܝܗܽܘܢ ܬܽܘܒ ܡܕܰܟܶܐ ܗ̱ܘܰܝܬ: ܘܰܠܟܽܘܣ̈ܬܳܢܰܝܗܽܘܢ ܘܠܰܚܓܺܝܪ̈ܶܐ ܕܺܝܠܗܽܘܢ ܦܳܫܶܛ ܗ̱ܘܰܝܬ: ܟܰܕ ܠܡܺܝܬܰܝ̈ܗܽܘܢ ܡܩܺܝܡ ܗ̱ܘܰܝܬ ܘܰܡܢܰܚܶܡ ܗ̱ܘܰܝܬ: ܘܡܶܢ ܗܳܝܕܶܝܢ ܟܰܕ ܒܓܶܐܪ̈ܶܐ ܫܢܺܝ̣̈ܢܶܐ ܕܬܶܕܡܪ̈ܳܬܳܟ ܠܗܽܘܢ ܡܡܰܚܶܐ ܗ̱ܘܰܝܬ: ܗܳܝܕܶܝܢ ܫܡ̣ܰܥ ܛܶܒܳܟ ܐܰܒܓܰܪ ܡܰܠܟܳܐ ܐܽܘܟܳܡܳܐ ܘܫܰܕܰܪ ܠܘܳܬܳܟ: ܗܳܟܰܢ ܐܶܡ̣ܰܪ: ܕܒܳܥܶܐ ܐ̱ܢܳܐ ܡܶܢܳܟ ܡܫܺܝܚܳܐ ܐܳܣܝܳܐ ܕܟܽܠ ܟܺܐܒܺܝ̣̈ܢ: ܬܳܐ ܨܶܝܕ ܬܰܚܽܘܒܽܘܬܝ̱ ܡܚܺܝܠܬܳܐ: ܕܫܶܡܥܶܬ ܥܠܰܝܟ ܕܰܕܠܐܴ ܥܶܩܳܪ̈ܶܐ ܘܣܰܡ̱̈ܡܳܢܶܐ ܟܺܐܒ̈ܶܐ ܩܫܰܝ̈ܳܐ ܘܟܽܘܪ̈ܗܳܢܶܐ ܡܰܐܣܶܐ ܐܰܢ̱ܬ: ܘܡܺܝ̈ܬܶܐ ܡܩܺܝܡ ܐܰܢ̱ܬ: ܘܰܠܓܰܪ̈ܒܶܐ ܡܕܰܟܶܐ ܐܰܢ̱ܬ: ܘܟܽܠܗܽܘܢ ܟܺܐܒ̈ܶܐ ܘܟܽܘܪ̈ܗܳܢܶܐ ܥܳܪܩܺܝܢ ܡܶܢ ܩܕܳܡܰܝܟ: ܘܝܶܕܥܶܬ ܠܺܝ ܕܐܰܠܳܗܳܐ ܐܰܢ̱ܬ ܐܰܘ ܒܪܶܗ ܕܐܰܠܳܗܳܐ ܕܰܢܚ̣ܶܬܬ ܡܶܢ ܫܡܰܝ̈ܳܐ ܕܗܳܠܶܝܢ ܣܳܥܰܪ ܐܰܢ̱ܬ: ܟܺܐܒܳܐ ܡܶܕܶܡ ܟܰܣܝܳܐ ܘܥܰܣܩܳܐ ܐܝ̣ܬ ܠܺܝ ܬܳܐ ܐܰܣܳܝܗ̱ܝ ܠܺܝ ܡܶܛܽܠ ܫܡܶܥ̇ܬܶ ܕܝܽܘ̈ܕܳܝܶܐ ܗܳܐ ܣܳܢܶܝܢ ܠܳܟ ܘܣܳܩܪܺܝܢ ܠܳܟ: ܘܰܠܚܺܝܡܺܝܢ ܥܠܰܝܟ ܕܢܶܩܛܠܽܘܢܳܟ: ܘܟܰܪܟܳܐ ܙܥܽܘܪܳܐ ܐܝ̣ܬ ܠܺܝ ܐܽܘܪܗܳܝ ܡܕܺܝܢ̱ܬܳܐ ܟܰܗܺܝܢܬܳܐ ܘܣܳܦܩܳܐ ܠܰܬܪ̈ܰܝܢ: ܒܳܥܶܐ ܐ̱ܢܳܐ ܡܶܢܳܟ ܡܫܺܝܚܳܐ ܠܐܴ ܬܰܣܠܐܷ ܒܳܥܽܘܬܳܐ ܕܥܰܒܕܳܟ ܕܣܰܓܺܝ ܠܗܺܝܩ ܐ̱ܢܳܐ ܠܰܚܙܳܬܳܟ: ܘܰܬܪ̈ܰܝܢ ܢܶܥܡܰܪ ܘܢܶܣܬܰܬܰܪ ܒܰܡܕܺܝܢ̱ܬܳܐ ܕܺܝܠܝ̱ ܕܣܰܓܺܝ ܦܰܐܝܳܐ ܘܫܰܦܺܝܪܳܐ: ܐܰܢ̱ܬ ܕܶܝܢ ܐܰܝܟ ܡܳܪܳܐ ܛܳܒܳܐ ܘܰܡܪܰܚܡܳܢܳܐ: ܦܰܢ̣ܺܝܬ ܠܘܳܬܶܗ ܕܬܶܗܘܶܐ ܒܪܺܝܟ ܐܰܢ̱ܬ ܘܟܰܪܟܳܟ ܘܰܡܕܺܝܢ̱ܬܳܟ ܘܰܒܥܶܠܕܒܳܒܳܐ ܠܳܐ ܢܶܫܬܰܠܰܛ ܒܰܡܕܝ̣ܢ̱ܬܳܟ: ܐܶܠܐܴ ܐܝ̣ܬ ܠܺܝ ܡܕܰܒܪܳܢܽܘܬܳܐ ܘܒܳܥܶܐ ܐ̱ܢܳܐ ܕܶܐܫܰܡܠܐܷ ܘܣܳܠܶܩ ܐ̱ܢܳܐ ܠܰܫܡܰܝܳܐ ܠܘܳܬ ܐܰܒܳܐ ܓܢܺܝܙܳܐ ܕܫܰܕܪܰܢܝ̱: ܘܟܰܕ ܩܪܶܒ ܝܰܘܡܳܐ ܕܚܰܫܳܟ ܦܳܪܽܘܩܳܝܳܐ ܥܰܠ ܥܺܝܠܐܴ ܫܺܝܛܳܐ ܪܟܶܒ̣ܬ ܘܥܰܠ̣ܬ ܠܨܳܠܽܘܒܬܳܐ: ܘܰܓܠ̣ܰܝܬ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ ܥܰܠ ܝܰܘܡܳܐ ܕܚܰܫܳܟ: ܘܰܓܠ̣ܰܝܬ ܠܰܫܠܺܝ̈ܚܰܝܟ ܕܰܥܬܺܝܕ ܐܰܢ̱ܬ ܕܬܶܚܰܫ ܠܳܟ ܣܰܓܺܝ̈ܳܐܬܳܐ ܘܬܶܨܛܠܶܒ ܡܶܢ ܪ̈ܰܒܰܝ ܟܳܗ̈ܢܶܐ ܕܝܽܘ̈ܕܳܝܶܐ ܘܩܳܡ̣ܬ ܡܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܘܰܐܒ̣ܗܶܬܬ ܐܶܢܽܘܢ: ܘܣܰܒ̣ܰܪܬ ܢܽܘܚܳܡܳܐ ܠܰܫܟܺܝ̣̈ܒܶܐ ܕܰܫܝܽܘܠ ܘܫ̣ܰܪܰܪܬ ܐܶܢܽܘܢ ܠܰܫܠܺܝ̈ܚܶܐ ܕܺܝܠܳܟ ܥܰܠ ܩܝܳܡܬܳܟ ܡܰܚܝܳܢܺܝܬܳܐ: ܘܦܰܩ̣ܶܕܬ ܘܙܰܗ̣ܰܪܬ ܐܶܢܽܘܢ ܕܦܽܘܩܘ̱ ܐܰܟܪܶܙܘ̱ ܘܐܰܠܶܦܘ̱ ܠܟܽܠ ܥܰܡ̱̈ܡܝ̣ܢ ܚܰܕ ܐܰܠܳܗܳܐ ܫܰܪܺܝܪܳܐ ܕܩܳܡ ܡܶܢ ܩܰܒܪܳܐ: ܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܕܰܦ̣ܪܰܩ ܠܰܢ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ: ܕܠܳܟ ܗܳܫܳܐ ܐܳܘ ܡܳܪܝܳܐ ܟܽܠܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܟܰܕ ܚܳܕܶܝܢܰܢ ܘܪܳܘܙܺܝܢܰܢ ܒܦܽܘܪܩܳܢܳܐ ܘܫܽܘܘܙܳܒܳܐ ܕܰܥܒ̣ܰܕܬ ܠܓܶܢܣܰܢ ܬܰܚܽܘܒܳܐ: ܘܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܒܥܶܕܳܢܳܐ ܗܳܢܳܐ: ܐܶܬܦܢܝ̣ ܘܪܰܚܶܡ ܥܰܠ ܝܳܪܬܽܘܬܳܟ ܙܒܺܝܢܰܬ݀ ܒܰܕܡܳܟ ܝܰܩܺܝܪܳܐ: ܫܰܪܰܪܶܝܗ̇ ܥܰܠ ܦܰܣܰܬ݀ ܐܺܝܕܰܝ̈ܟ ܩܰܕܺܝ̈ܫܳܬܳܐ: ܘܨܽܘܒ ܐܶܢܽܘܢ ܠܝܰܠܕ̈ܶܝܗ̇ ܢܶܨܒܬܳܐ ܒܪܺܝܟܬܳܐ ܕܝܳܗܒܳܐ ܦܺܐܪ̈ܶܐ ܕܰܡܪܰܥܶܝܢ ܠܳܟ: ܘܟܰܢܶܫ ܠܰܒܢ̈ܶܝܗ̇ ܠܓܰܘ ܥܽܘܒܳܗ̇: ܐܰܪܘܰܚ ܠܐܱܠܺܝ̣̈ܨܶܐ ܕܓܳܥܶܝܢ ܠܘܳܬܳܟ: ܒܰܝܬܳܐ ܠܰܡܒܰܕܪ̈ܶܐ ܕܡܰܪܥܺܝܬܳܟ ܘܚܰܣܳܐ ܚܰܘ̈ܒܶܐ ܘܰܚܛܳܗ̈ܶܐ ܕܡܰܣܟܠܳܢ̈ܶܐ ܕܺܐܝܬ ܒܳܗ̇: ܘܰܐܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܡܶܢܳܗ̇ ܫܟܶܒ̣ܘ̱ ܘܚܰܣܳܐ ܐܶܢܽܘܢ: ܦܪܽܘܣ ܡܳܪܝ̱ ܩܕܳܡܰܝܗܽܘܢ ܒܽܘ̈ܣܳܡܶܐ ܪ̈ܓܺܝܓܶܐ ܘܚܰܕܳܐ ܐܶܢܽܘܢ ܘܰܐܩܺܝܡ ܐܶܢܽܘܢ ܡܶܢ ܓܰܒܳܐ ܕܝܰܡܺܝܢܳܟ ܘܰܐܦܨܰܚ ܐܶܢܽܘܢ: ܘܰܐܣܡܶܟ ܐܶܢܽܘܢ ܒܰܣܡܳܟܳܟ ܡܠܐܷ ܢܽܘܗܪܳܐ ܘܗܰܕܳܐ ܐܶܢܽܘܢ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

ܥܶܛܪܳܐ

ܩܰܒܶܠ ܡܳܪܝ̱ ܡܶܢ ܡܚܺܝܠܽܘܬܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܐܥܛܰܪܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܕܡܶܢ ܒܶܝܬ ܡܺܝ̈ܬܶܐ: ܕܒܳܗ̇ ܐܰܦܨܰܚ̣ܬ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܳܐ ܘܰܠܢܶܫ̈ܶܐ ܩܰܕܺܝ̈ܫܳܬܳܐ ܕܛܰܝܶܒ̈ܝ̱ ܗ̱ܘ̈ܰܝ ܒܶܣ̈ܡܶܐ ܘܗܶܪ̈ܽܘܡܶܐ ܠܡܶܡܫܰܚ ܦܰܓܪܳܟ ܡܰܥܒܶܕ ܚܰܝ̈ܶܐ: ܘܚܰܕܽܘܬܳܐ ܡܠܰܝܬ ܠܠܶܒܰܝ̈ܗܶܝܢ ܘܰܐܦܨܰܚ̣ܬ ܐܶܢܶܝܢ: ܐܰܦܨܰܚ ܠܰܢ ܡܳܪܝ̱ ܒܥܰܕܥ̈ܺܐܕܰܝܟ ܘܚܰܕܳܐ ܠܰܢ ܒܰܣܡܳܟܳܐ ܕܚܰܓܰܝ̈ܟ: ܘܰܐܣܓܳܐ ܠܘܳܬܰܢ ܫܽܘ̈ܟܳܢܰܝܟ: ܘܕܰܒܰܪ ܠܰܢ ܒܢܳܡܽܘ̈ܣܰܝܟ ܕܢܰܘܕܶܐ ܠܳܟ ܥܰܠ ܚܰܘ̈ܣܳܢܰܝܟ ܕܰܠܘܳܬܰܢ ܡܳܪܰܢ ܘܰܐܠܳܗܰܢ܀

ܚܽܘܬܳܡܳܐ

ܐܰܩܺܝܡ ܠܰܢ ܡܳܪܝܳܐ ܐܰܠܳܗܳܐ ܥܰܡ ܐܶܡܪ̈ܶܐ ܒܢ̈ܰܝ ܝܰܡܺܝܢܳܟ: ܘܕܰܒܰܪ ܠܟܽܠܰܢ ܒܥܽܘܕܪ̈ܳܢܰܝܟ: ܘܝܰܒܶܠ ܠܰܢ ܠܘܳܬܳܟ: ܘܰܐܦܨܰܚ ܠܰܢ ܒܰܚܙܳܬܳܟ: ܘܗܰܕܳܐ ܠܰܢ ܒܽܐܘܪܚܳܐ ܕܢܳܡܽܘܣܳܐ ܕܺܝܠܳܟ: ܘܡܰܢܰܥ ܠܰܢ ܠܰܩܝܳܡܬܳܟ ܡܰܠܝܰܬ݀ ܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ: ܘܰܐܣܡܶܟ ܠܟܽܠܰܢ ܒܰܓܢܽܘܢܳܟ ܠܐܴ ܥܳܒܽܘܪܳܐ: ܘܡܰܢܰܥ ܠܰܢ ܠܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ ܘܰܡܠܺܝܟܳܐ ܡܶܢܳܟ ܠܓܰܒܪ̈ܶܐ ܕܰܫܠܳܡܳܐ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀