ܨܠܽܘܬܳܐ ܕܫܽܘܪܳܝܳܐ

ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ: ܕܩܳܡ̣ܬ ܒܰܒܣܰܪ ܡܶܢ ܩܰܒܪܳܐ ܫܰܪܺܝܪܳܐܝ̣ܬ ܐܰܝܟ ܕܰܨܒ̣ܰܝܬ: ܘܶܐܬܢܰܚ̣ܰܡܬ ܒܫܽܘܒܚܳܐ ܐܰܝܟ ܕܰܫܦ̣ܰܪ ܠܳܟ: ܢܰܚܶܡ ܡܳܪܝ̱ ܠܬܰܪ̈ܥܝܳܬܰܢ ܡܶܢ ܛܽܘܠܫܳܐ ܕܰܚܛܺܝܬܳܐ ܘܰܐܥܺܝܪ ܡܰܕ̈ܥܰܝܢ ܕܢܶܣܬܰܟܠܽܘܢ ܬܶܕܡܪ̈ܳܬܳܐ ܕܰܒܢܳܡܽܘ̈ܣܰܝܟ ܘܢܶܬܗܰܓܶܐ ܒܗܽܘܢ ܐܺܝܡܳܡܳܐ ܘܠܺܠܝܳܐ ܕܢܰܘܕܶܐ ܘܰܢܫܰܒܚܳܟ ܒܝܰܘܡܳܐ ܕܰܩܝܳܡܬܳܟ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܘܝܰܡܳܐ ܕܛܳܒܽܘܬܳܐ: ܕܰܢܚ̣ܶܬ ܠܐܱܪܥܳܐ ܒܨܶܒܝܳܢܶܗ ܡܶܛܽܠ ܚܰܛܳܝ̈ܶܐ: ܠܗܰܘ ܫܰܝܢܳܐ ܐܰܡܺܝܢܳܐ ܘܰܫܠܳܡܳܐ ܡܪܰܥܝܳܢܳܐ ܕܰܙܪܰܥ ܫܰܝܢܳܐ ܘܐܰܘܝܽܘܬܳܐ ܒܶܝܬ ܥܶܠܳܝ̈ܶܐ ܠܬܰܚܬܳܝ̈ܶܐ: ܠܗܰܘ ܕܰܒܫܰܝܢܳܐ ܨܳܒܶܐ ܘܰܒܫܰܝܢܳܐ ܡܶܬܪܰܥܶܐ: ܠܗܰܘ ܕܫܰܝܢܳܐ ܐܝ̣ܬܰܘܗ̱ܝ ܘܒܰܫܠܳܡܳܐ ܡܶܬܬܢܺܝܚ: ܗܰܘ ܕܰܠܬܰܠܡܺܝ̈ܕܶܐ ܕܺܝܠܶܗ ܩܰܕܺܝ̈ܫܶܐ ܐܶܡ̣ܰܪ ܕܰܫܠܳܡܳܐ ܕܺܝܠܝ̱ ܝܳܗܶܒ ܐ̱ܢܳܐ ܠܟܽܘܢ: ܘܰܫܠܳܡܳܐ ܕܺܝܠܝ̱ ܫܳܒܶܩ ܐ̱ܢܳܐ ܠܟܽܘܢ: ܒܶܗ ܡܳܪܝ̱ ܫܰܪܰܪ ܠܰܢ ܒܚܽܘܒܳܟ ܕܢܰܘܕܶܐ ܘܰܢܫܰܒܚܳܟ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܝܰܠܕܳܐ ܫܰܪܺܝܪܳܐ ܒܪܶܗ ܕܰܐܒܳܐ ܓܢܺܝܙܳܐ: ܐܰܢ̱ܬ ܕܰܢܚ̣ܶܬܬ ܡܶܢ ܡܶܕܝܳܪ̈ܶܐ ܪ̈ܳܡܶܐ ܘܰܡܥܰܠܰܝ̈ܳܐ ܕܰܐܒܽܘܟ: ܘܶܐܬܥܰܛܰܦ̣ܬ ܕܡܽܘܬܳܐ ܥܰܒܕܳܢܳܝܬܳܐ ܟܰܕ ܐܝ̣ܬܝܟ ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܟܽܠ ܡܳܪ̈ܰܘܳܬܳܐ: ܐܶܬܺܝܠܶܕܬ ܡܶܢ ܟܰܪܣܳܐ ܕܒܶܣܪܳܐ ܐܰܝܟ ܒܰܪܢܳܫܳܐ: ܟܰܕ ܐܝ̣ܬܝܟ ܗܰܘ ܕܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܕܳܐ ܐܰܠܳܗܽܘܬܳܐ ܫܽܘܪܳܝܳܐ ܘܫܽܘܠܳܡܳܐ ܠܰܝܬ ܠܳܟ: ܥܡ̣ܰܕܬ ܒܝܽܘܪܕܢܳܢ ܢܰܗܪܳܐ ܐܰܝܟ ܚܰܝܳܒܳܐ ܡܶܢ ܐܺܝ̈ܕܰܝ ܝܽܘܚܰܢܳܢ ܥܰܒܕܳܟ: ܐܰܢ̱ܬ ܕܺܐܝܬܰܝܟ ܚܰܣܝܳܐ ܘܰܡܕܰܟܝܳܢܳܐ ܕܛܰܡ̈ܶܐܐ ܘܰܡܚܰܣܝܳܢܳܐ ܕܰܡܟܰܬܡ̈ܶܐ ܩܰܒ̣ܶܠܬ ܥܠܰܝܟ ܨܰܘܡܳܐ ܨܶܒܝܳܢܳܝܳܐ ܐܰܪܒܥܺܝܢ ܝܰܘ̈ܡܺܝܢ ܘܰܐܪܒܥܺܝܢ ܠܰܝܠܰܘ̈ܳܢ ܕܰܬܡܰܠܐܷ ܐܽܘܪܚܳܐ ܗܳܝ ܕܰܕܪܰܫ ܠܳܟ ܢܒܺܝ̈ܶܐ ܕܰܐܒܽܘܟ: ܩܰܒ̣ܶܠܬ ܥܠܰܝܟ ܕܬܶܬܢܰܣܶܐ ܡܶܢ ܐܳܟܶܠܩܰܪܨܳܐ ܬܠܳܬܳܐ ܕܰܪ̈ܶܐ: ܘܰܒܗܽܘܢ ܕܳܫܬܳܝܗ̱ܝ ܘܰܠܟܽܠܶܗ ܚܰܝܠܶܗ ܘܰܥܒܰܕܬܳܝܗ̱ܝ ܒܶܙܚܳܐ ܘܡܽܘܝܳܩܳܐ ܠܕܳܪ̈ܶܐ ܕܳܐܬܶܝܢ ܩܕܳܡ ܨܰܝܳܡ̈ܶܐ ܕܦܳܪܽܘܫܽܘܬܳܐ: ܘܡܶܢ ܬܰܡܳܢ ܫܰܪܺܝܬ ܒܳܐܬܘ̈ܳܬܳܐ ܘܬܶܕܡܪ̈ܳܬܳܐ ܕܠܐܴ ܡܶܢܝܳܢܳܐ: ܘܰܪܟܶܒ̣ܬ ܥܺܝܠܐܴ ܙܥܽܘܪܳܐ ܕܰܐܬܳܢܳܐ ܒܨܶܒܝܳܢܳܟ: ܘܥܰܠ̣ܬ ܠܳܗ̇ ܠܨܶܗܝܽܘܢ ܡܰܟܺܝܟܳܐܝ̣ܬ: ܘܰܥܕܰܡܳܐ ܠܗܳܢܳܐ ܡܽܘܟܳܟܳܐ ܐܶܬܢܰܚ̣ܰܬܬ ܫܺܝܛܳܐܝ̣ܬ ܐܰܢ̱ܬ ܕܳܐܦܠܐܴ ܗܰܘ̈ܢܶܐ ܘܠܐܴ ܪ̈ܶܥܝܳܢܶܐ ܡܳܛܶܝܢ ܕܢܶܒܨܽܘܢܳܟ ܪܶܡܙܳܢܳܐܝ̣ܬ ܘܒܳܬܪܰ ܕܫܰܡܠܺܝܬ ܟܽܠܳܗ̇ ܡܕܰܒܪܳܢܽܘܬܳܟ ܠܐܴ ܡܶܬܕܰܪܟܳܢܺܝܬܳܐ ܥܰܠ̣ܬ ܠܒܶܝܬ ܕܺܝܢܳܐ ܐܰܝܟ ܚܰܝܳܒܳܐ ܟܰܕ ܐܝ̣ܬܝܟ ܕܰܝܳܢܳܐ ܕܕܰܝ̈ܳܢܶܐ: ܘܰܒܕܺܝܢܳܟ ܠܐܴܕܳܡ ܚܰܝܳܒܳܐ ܡ̣ܢ ܕܺܝܢܳܐ ܚ̣ܰܪܰܪܬ ܘܰܠܚܰܣܺܝܢܳܐ ܒܝܰܕ ܚܰܝܠܳܟ ܦܟ̣ܰܪܬ: ܘܶܐܬܩܒ̣ܰܪܬ ܒܩܰܒܪܳܐ ܚܰܕܬܳܐ ܐܰܝܟ ܟܽܠ ܒܰܪܢܳܫ ܐܰܝܟܰܢܳܐ ܕܠܰܩܒܺܝܪ̈ܶܐ ܕܬܰܡܳܢ ܡܶܢ ܕܰܚܺܝܚܳܐ ܬܢܰܦܶܨ ܘܰܬܚܰܕܶܬ: ܘܝܰܘ̈ܡܶܐ ܬܠܳܬܳܐ ܥܰܡܗܽܘܢ ܕܰܝܰܪܬ ܘܠܰܟܡܺܝܪܽܘܬܳܐ ܕܺܝܠܗܽܘܢ ܒܰܐܝ̣ܬ: ܘܐܬܢܰܚܰܡ̣ܬ ܒܫܽܘܒܚܳܐ ܘܩܳܡ̣ܬ ܒܬܶܫܒܽܘܚܬܳܐ ܪܰܒܬܳܐ ܕܠܐܴ ܡܶܬܡܰܠܠܐܴ: ܘܰܠܟܽܠܗܽܘܢ ܐܰܝܠܶܝܢ ܕܗܰܝܡܶܢܘ̱ ܒܳܟ ܐܰܩܺܝܡܬ ܥܰܡܳܟ: ܘܰܐܟ̣ܪܶܙܘ̱ ܪܰܒܽܘܬܳܟ ܘܐܰܠܳܗܽܘܬܳܟ ܒܶܝܬ ܥܰܡܳܐ ܛܳܠܽܘܡܳܐ ܘܰܩܫܶܐ ܩܕܳܠܐܴ ܕܝܽܘܕܳܝ̈ܶܐ: ܘܒܳܬܰܪ ܩܝܳܡܬܳܟ ܡܫܰܒܰܚܬܳܐ ܠܢܶܫ̈ܶܐ ܩܰܕܡܳܝܰܬ݀ ܐܶܬܚܰܘܺܝܬ: ܘܶܐܡ̣ܰܪܬ ܠܗܶܝܢ ܕܢܺܐܡܪܽܘܢ ܠܰܫܠܺܝ̈ܚܶܐ ܕܢܺܐܙܽܠ̱ܘܢ ܠܰܓܠܺܝܠܐܴ ܘܬܰܡܳܢ ܢܶܚܙܽܘܢܳܟ: ܘܰܣܥ̣ܰܪܬ ܐܶܢܽܘܢ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܘܫ̣ܰܪܰܪܬ ܐܶܢܽܘܢ ܥܰܠ ܩܝܳܡܬܳܐ ܕܺܝܠܳܟ ܡܫܰܒܰܚܬܰܐ: ܘܰܒܝܰܕ ܫܠܳܡܳܟ ܠܥܳܩܬܳܐ ܘܟܰܪܝܽܘܬܳܐ ܡܶܢ ܠܶܒܰܘ̈ܳܬܗܽܘܢ ܕܚ݂ܰܝܬ: ܘܰܠܗܰܝܡܳܢܽܘܬܳܐ ܕܺܝܠܗܽܘܢ ܢܰܨܰܚ̣ܬ: ܘܰܠܬܳܐܘܡܰܐ ܕܶܐܬܦܰܠܰܓ ܒܓܶܫܬܳܐ ܕܕܰܦܢܳܟ ܫ̣ܰܪܰܪܬ ܘܦܰܩ̣ܶܕܬ ܐܶܢܽܘܢ ܕܠܰܒܪܺܝܬܳܐ ܢܶܦܩܽܘܢ: ܠܟܽܠܗܽܘܢ ܥܰܡ̱̈ܡܶܐ ܢܣܰܒܪܽܘܢ ܚܰܕ ܐܰܠܳܗܳܐ ܕܶܐܬܒܰܪܢܰܫ ܘܰܒܬܶܫܒܽܘܚܬܳܐ ܩܳܡ ܡܶܢ ܩܰܒܪܳܐ: ܚܰܕ ܡܫܺܝܚܳܐ ܕܶܐܬܓܰܫܰܡ: ܘܗ̣ܽܘ ܟܰܕ ܗ̣ܽܘ ܕܥܳܡܰܪ ܒܰܡܪ̈ܰܘܡܶܐ ܥܰܡ ܝܳܠܽܘܕܶܗ: ܘܒܰܕܓܽܘܢ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܐܰܚܺܝ̣̈ܕܰܝ ܫܪܳܪܳܐ ܕܺܝܠܗܽܘܢ ܘܰܪ̈ܕܺܝܦܰܝ ܡܶܛܽܠܳܬܳܟ ܘܰܡܩܰܦ̈ܚܰܝ ܚܠܳܦ ܗܰܝܡܳܢܽܘܬܳܐ ܗܳܝ ܕܰܐܫܠܶܡܘ̱ ܠܰܢ ܫܠܺܝ̈ܚܶܐ ܩܰܕܺܝ̈ܫܶܐ: ܘܡܶܛܽܠ ܨܠܺܝܒܳܐ ܘܰܫܪܳܪܶܗ ܣܶܓܕܬܳܐ ܡܩܰܪܒܺܝܢܰܢ ܠܳܟ ܟܰܕ ܐܳܡܪܺܝܢܰܢ: ܫܽܘܒܚܳܐ ܠܳܟ ܐܰܠܳܗܳܐ ܠܐܴ ܚܳܫܽܘܫܳܐ ܕܚܰܫ̣ܬ ܒܰܒܣܰܪ ܡܶܛܽܠܳܬܰܢ ܘܰܦ̣ܪܰܩܬ ܠܰܢ: ܫܽܘܒܚܳܐ ܠܳܟ ܒܳܪܽܘܝܳܐ ܚܰܟܺܝܡܳܐ ܕܡܶܢ ܒܶܪ̈ܝܳܬܳܐ ܐܶܬܩܰܦ̣ܰܚܬ: ܫܽܘܒܚܳܐ ܠܳܟ ܓܰܐܝܳܐ ܘܓܰܢ̱ܒܳܪܳܐ ܕܩܳܡ̣ܬ ܡܶܢ ܩܰܒܪܳܐ ܒܫܽܘܒܚܳܐ ܘܙܳܟܽܘܬܳܐ ܕܠܐܴ ܡܶܬܡܰܠܠܐܴ: ܫܽܘܒܚܳܐ ܠܳܟ ܕܳܐܶܢ ܟܽܠܐܴ ܕܰܒܕܺܝܢܳܐ ܕܥܰܘܠܐܴ ܐܶܬܚܰܝܰܒ̣ܬ: ܫܽܘܒܚܳܐ ܠܳܟ ܚܰܢܳܢܳܐ ܕܰܒܥܶܕܳܢ ܨܶܗܝܳܟ ܚܰܠܐܴ ܐܰܫܩܝܽܘܟ ܒܢ̈ܰܝ ܨܶܗܝܽܘܢ ܨܳܠܽܘܒܬܳܐ: ܫܽܘܒܚܳܐ ܠܳܟ ܦܳܪܽܘܩܳܐ ܕܥܳܠܡ̈ܶܐ ܕܡܶܢ ܦܪ̈ܺܝܫܰܝܟ ܩܰܒ̣ܶܠܬ ܨܰܥܪܳܐ ܘܒܶܙܚܳܐ ܘܡܽܘܝܳܩܳܐ: ܫܽܘܒܚܳܐ ܠܳܟ ܬܰܩܺܝܦܳܐ ܘܰܡܫܰܒܚܳܐ ܕܰܒܬܽܘܩܦܳܟ ܪܰܒܳܐ ܠܳܟ ܡܕܰܒܰܪ ܐܰܢ̱ܬ ܬܰܩܺܝܦܳܐܝ̣ܬ: ܘܒܰܩܝܳܡܬܶܗ ܡܫܰܒܰܚܬܳܐ ܐܰܦܨܰܚ̣ܬ ܠܰܫܡܰܝܳܢ̈ܶܐ ܘܠܐܱܪ̈ܥܳܢܳܝܶܐ: ܘܬܶܗܪܳܐ ܘܕܽܘܡܳܪܳܐ ܐܶܬܡܠܺܝܘ ܚܰܝܠܰܘ̈ܳܬܳܐ: ܘܠܰܚܕ̈ܳܕܶܐ ܡܫܰܐܠܺܝܢ ܗ̱ܘܰܘ ܒܝܽܘܡ ܣܽܘܠܳܩܳܟ: ܡܰܢܽܘ ܗܳܢܳܐ ܕܩܳܡ ܡܶܢ ܩܰܒܪܳܐ ܒܚܰܝܠܐܴ ܘܫܽܘܒܚܳܐ ܪܰܒܳܐ ܡܰܢܽܘ ܗܳܢܳܐ ܕܩܳܡ ܡܶܢ ܩܰܒܪܳܐ ܘܰܡܒܰܙ̈ܥܳܢ ܐܺܝܕܰܘ̈ܗ̱ܝ ܘܪ̈ܶܓܠܰܘܗ̱ܝ ܘܥܺܝܪ̈ܶܐ ܣܳܓܕܺܝܢ ܠܶܗ: ܡܰܢܽܘ ܗܳܢܳܐ ܕܰܬܪܺܝܥ ܓܰܒܶܗ ܒܠܽܘܟܳܝܬܳܐ ܘܪܰܘܡܳܐ ܕܰܪܩܺܝܥܳܐ ܪܳܥܶܠ ܡܶܢܶܗ: ܘܙܳܥܩܺܝܢ ܣܪ̈ܳܦܶܐ ܒܝܽܘܒܳܒܰܝ̈ܗܽܘܢ ܘܰܡܦܰܢܶܝܢ ܒܚܰܕܽܘܬܳܐ ܟܰܕ ܐܳܡܪܺܝܢ ܗܳܢܰܘ ܡܳܪܝܳܐ ܚܰܝܠܬܳܢܳܐ: ܗܳܢܰܘ ܡܳܪܝܳܐ ܦܳܪܽܘܩܳܐ ܕܰܫܒܰܝ̈ܳܐ: ܗܳܢܰܘ ܡܳܪܝܳܐ ܡܚܰܪܪܳܢܳܐ ܕܰܚܒܺܝ̣̈ܫܶܐ: ܗܳܢܰܘ ܡܳܪܝܳܐ ܕܶܐܡ̣ܰܪ ܥܠܰܘܗ̱ܝ ܐܺܝܽܘܒ ܕܝܳܕܰܥ ܐ̱ܢܳܐ ܕܦܳܪܽܘܩܝ̱ ܚܰܝ ܗ̱ܽܘ ܘܥܰܠ ܐܰܪܥܳܐ ܒܣܰܘ̈ܦܶܐ ܡܶܬܓܠܐܷ: ܗܳܢܰܘ ܡܳܪܝܳܐ ܕܶܐܡ̣ܰܪ ܥܠܰܘܗ̱ܝ ܐܶܫܰܥܝܳܐ ܕܰܚ̣ܙܳܐ ܣܪ̈ܳܦܶܐ ܕܰܡܩܰܕܫܺܝܢ ܠܶܗ: ܒܪܺܝܟ ܡܳܪܝܳܐ ܕܰܙܟܳܐ ܠܰܛܪܘ̣ܢܳܐ: ܒܪܺܝܟ ܡܳܪܝܳܐ ܕܕܳܫܶܗ ܠܐܴܟܶܠܩܰܪܨܳܐ: ܒܪܺܝܟ ܗ̱ܘ ܡܳܪܝܳܐ ܕܣܰܚܦܶܗ ܠܚܰܝܠܶܗ ܕܒܝ̣ܫܳܐ: ܒܪܺܝܟ ܗ̣ܽܘ ܡܳܪܝܳܐ ܕܶܐܬܢܰܚܰܡ ܒܫܽܘܒܚܳܐ ܡܶܢ ܩܰܒܪܳܐ ܘܰܒܢܽܘܚܳܡܶܗ ܐܰܦܨܰܚ ܠܰܫܡܰܝܳܢ̈ܶܐ ܘܠܐܱܪ̈ܥܳܢܳܝܶܐ ܘܫܰܡܠܺܝ ܡܕܰܒܪܳܢܽܘܬܳܐ ܕܺܝܠܶܗ ܒܛܰܝܒܽܘܬܶܗ: ܘܰܐܣܶܩ ܐܶܢܽܘܢ ܠܥܰܦܪ̈ܳܢܶܐ ܠܰܫܡܰܝܳܐ ܘܰܥܬܺܝܕ ܬܽܘܒ ܕܢܺܐܬܶܐ ܕܰܢܚܰܘܶܐ ܫܽܘܒܚܳܐ ܕܪܰܒܽܘܬܶܗ: ܘܢܶܥܒܶܕ ܢܽܘܚܳܡܳܐ ܚܰܕܬܳܐ ܠܰܓܒܺܝܠܬܳܐ ܕܺܝܠܶܗ: ܘܰܢܚܰܕܶܐ ܐܶܢܽܘܢ ܒܰܚܙܳܬܳܐ ܕܦܰܪܨܽܘܦܶܗ: ܘܢܶܩܪܶܐ ܘܰܢܩܺܝܡ ܐܶܢܽܘܢ ܡܶܢ ܓܰܒܳܐ ܕܺܝܠܶܗ: ܠܐܱܝܠܶܝܢ ܕܗܰܝܡܶܢܘ̱ ܒܶܗ ܡܒܰܣܶܡ ܒܰܓܢܽܘܢܶܗ ܘܰܡܢܺܝܚ ܒܡܰܠܟܽܘܬܶܗ: ܘܥܰܠ ܐܰܦ̈ܰܝ ܗܳܠܶܝܢ ܫܽܘܒܚܳܐ ܘܺܐܝܩܳܪܳܐ ܢܰܣܶܩ ܠܶܗ ܘܠܐܱܒܽܘܗ̱ܝ ܘܰܠܪܽܘܚܶܗ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܕܒܰܕܡܳܟ ܝܰܩܺܝܪܳܐ ܫܰܝܶܢ̣ܬ ܠܰܫܡܰܝ̈ܳܢܶܐ ܥܰܡ ܐܰܪ̈ܥܳܢܳܝܶܐ: ܘܒܰܩܝܳܡܬܳܟ ܕܡܶܢ ܒܶܝܬ ܡܺܝ̈ܬܶܐ ܠܰܚܒܳܠܐܴ ܕܒܰܩܒܺܝܪ̈ܶܐ ܫ̣ܪܰܝܬ: ܩܰܒܶܠܳܝܗ̱ܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܘܰܐܫܘܳܐ ܠܰܢ ܕܰܢܥܰܕܥܶܕ ܠܳܟ ܪܽܘܚܳܢܳܐܝ̣ܬ: ܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ: ܟܰܕ ܢܳܛܰܪ ܐܰܢ̱ܬ ܒܰܢ ܓܽܘܥܠܳܢܳܐ ܛܳܒܳܐ ܕܡܰܘܗ̈ܒܳܬܳܟ ܐܰܠܳܗܳܝ̈ܳܬܳܐ: ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܚܽܘܬܳܡܳܐ

ܥܺܝܪܳܐ ܕܡܶܢ ܥܺܝܪ̈ܰܝ ܪܰܘܡܳܐ ܐܶܬܝܰܩܰܪ ܒܰܩܝܳܡܬܶܗ: ܘܡܶܢ ܬܰܠܡܺܝ̈ܕܶܐ ܐܶܣܬܓܶܕ ܒܢܽܘܚܳܡܶܗ: ܘܡܶܢ ܢܶܫ̈ܶܐ ܐܶܫܬܰܒܰܚ ܒܝܰܘܡܳܐ ܦܰܐܝܳܐ ܕܰܩܝܳܡܬܶܗ: ܗܰܒܠܰܢ ܡܳܪܝܳܐ ܕܢܶܗܘܽܘܢ ܠܳܟ ܩܳܠܰܝ̈ܢ ܟܶܢܳܪ̈ܶܐ ܘܣܶܦܘ̈ܳܬܰܢ ܐܽܘܪܓܰܢܽܘܢ ܠܫܽܘܒܚܳܟ: ܘܢܰܘܕܶܐ ܠܰܫܡܳܟ ܒܥܰܕܥܺܐܕܳܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀