ܦܪܽܘܡܝܽܘܢ

ܠܗܰܘ ܡܚܰܕܬܳܢܳܐ ܕܥܳܠܡ̈ܶܐ ܕܚܰܕܶܬ ܠܓܶܢܣܳܐ ܕܰܒܢܰܝ̈ܢܳܫܳܐ ܒܢܽܘܚܳܡܶܗ: ܠܗܰܘ ܚܰܕܽܘܬܳܐ ܕܰܫܠܺܝ̈ܚܶܐ ܕܐܰܦܨܰܚ ܠܟܽܠܗܶܝܢ ܒܶܪ̈ܝܳܬܳܐ ܒܰܩܝܳܡܬܶܗ: ܠܗܰܘ ܕܒܰܣܶܡ ܒܰܫܠܳܡܶܗ ܠܬܰܠܡܺܝ̈ܕܶܐ ܕܰܐܒܺܝܠܺܝܢ ܗ̱ܘܰܘ ܥܰܠ ܡܰܘܬܶܗ ܘܰܐܦܨܰܚ ܐܶܢܽܘܢ ܕܰܡܥܳܩܺܝܢ ܗ̣ܘܰܘ ܘܰܡܠܐܴ ܐܶܢܽܘܢ ܪܘܳܙܳܐ ܘܚܰܕܽܘܬܳܐ ܒܰܚܙܳܬܶܗ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܡܶܢ ܡܰܪܥܺܝܬܶܗ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܐܰܠܳܗܳܐ ܗܰܘ ܕܚ̣ܰܕܶܬܬ ܒܝܰܕ ܪ̈ܰܚܡܰܝܟ ܠܥܰܬܺܝܩܽܘܬ ܥܳܠܡܳܐ ܕܰܐܫܚ̣ܶܬ ܘܰܒܠܺܝ ܒܰܚܒܳܠܐܴ ܕܰܚܛܺܝܬܳܐ: ܒܡܰܘܬܳܟ ܡܰܥܒܶܕ ܚܰܝ̈ܶܐ ܘܚܽܘܕܳܬܳܐ ܕܰܩܝܳܡܬܳܟ ܡܫܰܒܰܚܬܳܐ ܕܡܶܢ ܕܪܺܝܫ: ܠܘܳܬ ܫܠܺܝ̈ܚܶܐ ܩܰܕܺܝ̈ܫܶܐ ܠܥܶܠܺܝܬܳܐ ܡܰܠܝܰܬ݀ ܐ̱ܪ̈ܳܙܶܐ ܥܰܠ̣ܬ ܘܠܰܘ ܒܗܰܓܳܓܽܘܬܳܐ ܐܶܠܐܴ ܒܒܶܣܪܳܐ ܕܺܝܠܳܟ ܘܰܒܓܰܪ̈ܡܶܐ ܦܰܓܪܳܢܳܐܝ̣ܬ ܐܰܝܟܰܢܳܐ ܕܰܚܢܰܢ ܢܶܬܚܰܕܰܬ݀ ܒܳܟ ܡܫܺܝܚܳܐ ܐܰܠܳܗܰܢ: ܘܫ̣ܰܪܰܪܬ ܐܶܢܽܘܢ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ ܒܗܰܝܡܳܢܽܘܬܳܐ ܕܒܳܟ: ܟܰܕ ܚܰܘܺܝܬ ܠܗܽܘܢ ܕܽܘܟ̈ܝܳܬܳܐ ܕܨܶܨ̈ܶܐ ܕܒܺܐܝܕܰܝ̈ܟ ܘܰܒܪ̈ܶܓܠܰܝܟ ܐܶܣܬܰܟܰܟ̈ܝ̱: ܘܕܰܦܢܳܟ ܕܶܐܬܬܰܪܥܰܬ݀ ܘܰܐܪܕܝܰܬ݀ ܡܥܺܝܢܳܐ ܕܚܰܝ̈ܶܐ ܕܠܐܴ ܡܳܝܽܘܬܽܘܬܳܐ ܘܠܐܴ ܡܶܬܚܰܒܠܳܢܽܘܬܳܐ: ܗܳܝ ܕܫܶܩܝܳܐ ܕܚܰܝ̈ܶܐ ܗܘܳܬ݀ ܠܰܢ: ܘܢܽܘܗܪܳܐ ܘܰܫܪܳܪܳܐ ܡܶܢܳܗ̇ ܡܬ݂ܰܩܢܰܢ ܘܶܐܬܢܰܗܰܪܢܰܢ: ܗܳܝ ܕܡܶܢܳܗ̇ ܢܗܰܪܘ̱ ܫܠܺܝ̈ܚܶܐ ܘܰܠܟܽܠ ܐܶܡܘ̈ܳܬܳܐ ܐܰܨܡܰܚ̣ܘ̱ ܒܟܳܪܽܘܙܽܘܬܗܽܘܢ: ܗܳܝ ܕܰܒܚܰܕܽܘܬܳܐ ܕܪܽܘܚܳܐ ܢܗܰܠܟܽܘܢ ܘܢܰܠܦܘܢ̇ ܝܺܕܰܥܬܳܐ ܕܒܳܟ ܠܰܒܢܰܝ̈ܢܳܫܳܐ: ܘܰܢܕܽܘܫܽܘܢ ܠܥܰܡܽܘܛܽܘܬܳܐ ܗܽܘܠܳܢܳܝܬܳܐ ܕܚܰܫ̈ܶܐ ܫܟܺܝܪ̈ܶܐ: ܘܒܰܙܩܺܝܦܽܘܬܳܟ ܦܳܪܽܘܩܳܝܬܳܐ ܟܰܕ ܦܫ̣ܰܛܬ ܐܺܝ̈ܕܰܝܟ ܒܳܐܐܰܪ ܠܰܒܪܺܝܬܳܐ ܟܽܠܳܗ̇ ܐܶܚ̣ܰܕܬ: ܘܰܒܩܳܠܐܴ ܕܰܐܙܥ̣ܶܩܬ ܥܰܠ ܩܰܝܣܳܐ ܐܰܙܺܝܥܬ ܐܶܢܽܘܢ ܠܐܷܣܛܘ̣ܟ̈ܣܶܐ ܕܰܡܝܰܬܰܒܬܳܐ: ܘܫܽܘ̈ܥܶܐ ܐܶܨܛܰܪܺܝܘ: ܘܩܰܒܪ̈ܶܐ ܐܶܬܦܰܬܰܚܘ̱: ܘܡܺܝ̈ܬܶܐ ܣܰܓܺܝ̈ܶܐܐ ܩܳܡ̣ܘ̱ ܒܦܰܓܪ̈ܰܝܗܽܘܢ: ܘܕܰܝܰܪܘ̱ ܒܫܽܘ̈ܩܶܝܗ̇ ܕܽܐܘܪܫܠܶܡ: ܘܶܐܬܺܝܕܰܥ ܗ̱ܘܰܘ ܠܐܱܒܳܗܰܝ̈ܗܽܘܢ ܘܰܐܚܰܝ̈ܗܽܘܢ ܘܰܐ̱ܚܝܳܢܰܝ̈ܗܽܘܢ ܘܰܒܢ̈ܰܝ ܓܶܢܣܳܐ ܘܩܰܪ̈ܺܝܒܰܝܗܽܘܢ: ܘܳܐܬܘ̈ܳܬܳܐ ܬܡܺܝ̣̈ܗܳܬܳܐ ܥܒ̣ܰܕܬ: ܘܟܰܕ ܒܩܰܒܪܳܐ ܚܰܕܬܳܐ ܐܶܬܬܣܺܝܡܬ ܐܰܝܟ ܟܽܠܢܳܫ: ܘܰܬܠܳܬܳܐ ܝܰܘ̈ܡܺܝܢ ܒܶܝܬ ܡܺܝ̈ܬܶܐ ܟܰܬܰܪܬ: ܘܢܽܘܚܳܡܳܐ ܘܚܰܝ̈ܶܐ ܠܰܫܟܺܝ̈ܒܶܐ ܐܰܟ̣ܪܶܙܬ: ܘܰܒܫܽܘܒܚܳܐ ܪܰܒܳܐ ܩܳܡ̣ܬ ܡܶܢ ܩܰܒܪܳܐ ܘܠܐܴ ܚ̣ܙܰܝܬ ܚܒܳܠܐܴ ܒܶܝܬ ܡܺܝ̈ܬܶܐ: ܘܰܣܚ̣ܰܦܬ ܠܡܰܘܬܳܐ ܘܰܗܓܰܡ̣ܬ ܠܰܫܝܽܘܠ ܒܳܠܰܥܬܳܐ: ܘܰܬܪܰܥ̣ܬ ܫܽܘܪ̈ܶܐ ܥܰܫܺܝ̈ܢܶܐ ܕܺܝܠܳܗ̇: ܘܫܰܪܰܪܬ ܐܶܢܽܘܢ ܠܬܰܠܡܺܝ̈ܕܰܝܟ ܥܰܠ ܩܝܳܡܬܳܟ ܡܫܰܒܰܚܬܳܐ: ܘܶܐܟܰܠ̣ܬ ܘܶܐܫܬܺܝܬ ܠܥܺܢܰܝ̈ܗܽܘܢ ܕܰܬܚܰܘܶܐ ܕܗܰܘ ܕܚܰܫ ܗܽܘܝܽܘ ܕܩܳܡ ܘܶܐܬܢܰܚܰܡ: ܐܰܝܟ ܡܳܐ ܕܶܐܫܬܰܘܕܺܝܬ ܩܕܳܡ ܩܝܳܡܬܳܟ ܡܰܚܝܳܢܺܝܬܳܐ ܠܓܽܘܕܳܐ ܪܚܺܝܡܬܳܐ ܕܬܰܠܡܺܝ̈ܕܰܝܟ ܩܰܕܺܝ̈ܫܶܐ: ܕܬܶܫܬܶܐ ܥܰܡܗܽܘܢ ܠܝܰܠܕܳܐ ܕܰܓܦܶܬܳܐ ܚܰܕܬܳܐܝ̣ܬ ܒܡܰܠܟܽܘܬܳܐ ܕܺܝܠܳܟ ܥܺܕܬܳܐ ܩܰܕܺܝܫܬܳܐ: ܘܟܰܕ ܐܰܢܺܝܚܬ ܒܝܰܘܡܳܐ ܫܒܺܝܥܳܝܳܐ ܠܰܫܟܺܝ̣̈ܒܶܐ ܟܽܠܗܽܘܢ ܢܝܳܚܬܳܐ ܪܽܘܚܳܢܳܝܬܳܐ: ܘܫܳܩܠܐܴ ܣܳܟܳܐ ܫܒܺܝܥܳܝܽܘܬܳܐ ܕܥܳܠܡܳܐ ܗܳܢܳܐ ܥܰܬܺܝܩܳܐ ܘܡܶܬܚܰܒܠܳܢܽܘܬܳܐ: ܘܟܰܕ ܕܶܝܢ ܠܡܶܬܚܰܘܝܳܢܽܘܬܳܐ ܕܗܰܘ ܚܰܕܬܳܐ ܪܳܫܡܳܐ: ܘܰܠܚܰܕ ܐܺܝܡܳܡܳܐ ܩܰܕܡܳܝܳܐ ܘܰܐ̱ܚܪܳܝܳܐ ܕܒܶܗ ܬܶܢܝܳܢܽܘܬ ܕܳܢܰܚ ܐܰܢ̱ܬ ܡܶܢ ܫܡܰܝܳܐ ܕܠܰܒܪܺܝܬܳܐ ܗܳܕܶܐ ܡܣܰܟܰܡܬܳܐ ܬܰܥܒ̣ܰܪ ܘܬܰܡܛܰܪ: ܘܥܰܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܚܰܝܳܐ ܕܡܺܝܬ ܘܰܚܝ̣ܳܐ: ܕܚܽܘܕܳܬܳܐ ܫܡܰܝܳܢܳܐ ܘܰܐܠܳܗܳܝܳܐ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܫܰܟܶܢ̣ܬ: ܘܪܰܗܒܽܘܢܳܐ ܒܚܽܘܪܳܪܳܐ ܕܡܶܢ ܚܛܺܝܬܳܐ ܡܰܘܗܰܒܬܳܐ ܪܰܒܬܳܐ ܒܛܰܝܒܽܘܬܶܗ ܘܰܒܪܶܚܡܰܬ݀ ܐ̱ܢܳܫܽܘܬܶܗ ܘܰܒܪ̈ܰܚܡܰܘܗ̱ܝ ܣܰܓܺܝ̈ܶܐܐ ܘܠܐܴ ܡܶܬܡܰܠܠܳܢ̈ܶܐ ܝܰܗܒܠܰܢ: ܘܰܠܒܽܘ̈ܫܶܐ ܚܰܕ̈ܬܶܐ ܘܡܰܦܪ̈ܓܰܝ ܒܺܝܕܰܥܬܳܐ ܘܰܒܚܰܕܽܘܬܳܐ ܕܪܽܘܚܳܐ ܥܰܛܶܦ ܠܰܢ: ܟܰܕ ܫܳܠܚܺܝܢܰܢ ܠܰܠܒܽܘ̈ܫܶܐ ܥܰܬܺܝ̈ܩܶܐ ܗܳܢܘܢ̇ ܕܒܰܪܢܳܫܰܢ ܥܰܬܺܝܩܳܐ: ܘܰܒܡܰܥܒܕܳܢܽܘܬܳܐ ܕܚܰܝ̈ܶܐ ܠܐܴ ܡܳܝܽܘ̈ܬܶܐ ܒܫܽܘܢܳܩܳܐ ܕܡܶܢ ܗܳܪܟܳܐ ܥܰܬܶܕ ܠܰܢ: ܐܰܝܟܰܢܳܐ ܕܥܰܡ ܩܰܕܺܝ̈ܫܶܐ ܗܳܢܘܢ̇ ܕܡܶܢ ܥܳܠܰܡ ܫܦ̣ܰܪܘ̱ ܠܳܟ ܢܶܫܬܘܶܐ ܕܰܢܩܽܘܡ ܥܰܡܗܽܘܢ ܘܢܶܬܒܰܣܰܡ ܘܰܠܢܰܦܫܴ̈ܬܳܐ ܕܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܡܶܢ ܚܰܝ̈ܶܐ ܕܰܦܓܰܪ ܫܰܢܺܝܘ: ܥܰܡܗܽܘܢ ܛܰܟܶܣ ܘܰܡܢܺܝ ܠܰܢ ܘܰܒܚܰܕܽܘܬܳܐ ܕܪܽܘܚܳܐ ܩܰܕܺܝܫܳܐ: ܚܽܘܕܳܬܳܐ ܕܰܩܝܳܡܬܳܐ ܕܺܝܠܳܟ ܦܳܪܽܘܩܳܝܬܳܐ ܫܰܟܶܢ ܠܰܢ: ܐܰܝܟܰܢܳܐ ܕܢܶܫܬܘܶܐ ܚܢܰܢ ܘܥܰܢܺܝܕܰܝ̈ܢ ܕܰܫܟ̣ܶܒܘ̱ ܥܰܠ ܣܰܒܪܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀