ܨܠܽܘܬܳܐ ܕܫܽܘܪܳܝܳܐ

ܢܽܘܗܪܳܐ ܕܰܩܝܳܡܬܳܟ ܘܕܶܢܚܳܐ ܕܛܰܝܒܽܘܬܳܟ ܘܨܶܡܚܳܐ ܕܺܝܕܰܥܬܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ: ܐܰܫܪܳܐ ܒܓܰܘ ܠܶܒܳܐ ܘܬܰܪ̈ܥܝܳܬܳܐ ܕܺܝܠܰܢ: ܘܰܡܠܺܝ ܐܶܢܶܝܢ ܚܰܕܽܘܬܳܐ ܘܰܪܘܳܙܳܐ ܕܡܶܢܳܟ ܐܰܝܟܰܢܳܐ ܕܢܰܨܡܰܚ ܒܰܥܒܳܕ̈ܶܐ ܫܰܦܺܝܪ̈ܶܐ ܕܰܡܪܰܥܶܝܢ ܠܳܟ ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܪܰܒܳܐ ܩܕܳܡܰܝܟ ܡܳܐ ܕܡܶܬܓܰܠܝܳܐ ܡܰܠܟܽܘܬܳܟ: ܥܰܡܳܟ ܢܶܥܽܘܠ ܠܰܓܢܽܘܢܳܐ ܡܠܐܷ ܢܽܘܗܪܳܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܥܳܠܡܝ̣ܢ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܚܰܝܳܐ ܘܡܰܚܝܳܢܳܐ ܕܰܢܚܶܬ ܐܰܓܶܣ ܒܩܰܒܪܳܐ ܒܶܝܬ ܡܺܝ̈ܬܶܐ ܕܰܫܦ̣ܰܪ ܠܶܗ: ܠܗܰܘ ܝܳܗܽܘܒܳܐ ܕܚܰܝ̈ܶܐ ܕܶܐܬܡܢܺܝ ܥܰܡ ܩܒܺܝܪ̈ܶܐ ܒܛܰܝܒܽܘܬܶܗ: ܘܫܰܘܺܝ ܗ̱ܘܳܐ ܬܰܫܘܺܝܬܶܗ ܨܶܝܕ ܥܰܒܕ̈ܰܘܗ̱ܝ ܒܰܐܬܪܳܐ ܕܥܰܢܺܝ̈ܕܶܐ: ܠܗܰܘ ܬܰܩܺܝܦܳܐ ܘܥܰܙܺܝܙܳܐ ܕܰܩܥ̣ܳܐ ܒܡܰܘܬܳܐ ܘܰܢܦ̣ܰܠ ܬܳܓܶܗ: ܘܰܢܗ̣ܰܡ ܒܰܫܝܽܘܠ ܘܰܐܚܪܶܒ ܙܳܘܝ̈ܳܬܳܗ̇ ܟܰܗܺܝ̈ܢܳܬܳܐ: ܠܗܰܘ ܚܰܣܺܝܢܳܐ ܕܰܐܣܪܶܗ ܠܡܰܘܬܳܐ ܛܪܽܘܢܳܐ ܡܳܪܳܗ̇ ܕܗܳܡܳܢ: ܗܰܘ ܕܫܰܥܒܶܕ ܬܚܶܝܬ ܢܺܝܪܶܗ ܕܳܪ̈ܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ ܘܥܰܒܕܶܗ ܫܶܢܬܳܐ ܠܰܡܗܰܝ̈ܡܢܶܐ ܘܡܰܗܠܺܝ̣ܢ ܒܶܗ ܝܰܠܕ̈ܰܘܗ̱ܝ ܕܳܐܕܳܡ ܥܰܦܪܳܢܳܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܫܽܘܒܚܳܐ ܠܳܟ ܐܰܠܳܗܳܐ ܐܰܒܳܐ ܠܐܴ ܡܶܬܕܰܪܟܳܢܳܐ ܘܠܐܴ ܡܶܬܒܰܨܝܳܢܳܐ: ܕܒܺܝܕܰܥܬܳܟ ܠܐܴ ܗܽܘܠܳܢܳܝܬܳܐ ܐܰܝܬܺܝܬ ܠܥܳܠܡܳܐ ܟܽܠܶܗ ܠܰܗܘܳܝܳܐ: ܫܽܘܒܚܳܐ ܠܳܟ ܐܰܠܳܗܳܐ ܒܪܳܐ ܝܰܠܕܳܐ ܓܢܺܝܙܳܐ ܠܐܴ ܡܶܬܰܐܡܪܳܢܳܐ ܕܰܩܕܳܡ ܙܰܒ̈ܢܶܐ ܐܰܒܳܐ ܨܡܰܚܬ ܠܳܐ ܡܶܬܗܰܘܢܳܢܳܐܝ̣ܬ: ܘܰܒܚܰܪܰܬ ܙܰܒ̈ܢܶܐ ܡܶܢ ܡܰܪܝܰܡ ܕܢܰܚ̣ܬ ܠܐܴ ܡܶܬܦܰܫܩܳܢܳܐܝ̣ܬ: ܫܽܘܒܚܳܐ ܠܳܟ ܐܰܠܳܗܳܐ ܓܰܐܝܳܐ ܘܓܰܢ̱ܒܳܪܳܐ ܕܰܥܒ̣ܰܕܬ ܫܡܰܝܳܐ ܒܚܶܟܡܬܳܟ: ܘܠܐܴ ܦܳܚܡܺܝܢ ܠܳܟ ܪ̈ܰܘܡܶܐ ܘܥܽܘ̈ܡܩܶܐ ܘܟܽܠܗܶܝܢ ܦܶܢ̈ܝܳܬܳܐ: ܫܽܘܒܚܳܐ ܠܳܟ ܐܰܠܳܗܳܐ ܕܽܘܡܳܪܳܐ ܠܐܴ ܡܶܬܡܰܠܠܳܢܳܐ: ܕܕܽܘܡܳܪܳܐ ܐܝ̣ܬܝܗ̇ ܟܽܠܳܗ̇ ܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܣܳܥܽܘܪ̈ܘܳܬܳܟ ܐܰܠܳܗܳܝ̈ܳܬܳܐ: ܫܽܘܒܚܳܐ ܠܳܟ ܐܰܠܳܗܳܐ ܗܰܕܳܝܳܐ ܘܰܡܗܰܕܝܳܢܳܐ ܕܗܰܕܺܝܬ ܠܰܢ ܠܐܘ̣ܪܚܳܐ ܕܫܰܝܢܳܐ ܘܕܰܫܠܳܡܳܐ: ܘܠܰܫܒܺܝܠܐܴ ܕܰܡܠܐܷ ܚܰܕ̈ܘܳܬܳܐ: ܫܽܘܒܚܳܐ ܠܳܟ ܐܰܠܳܗܳܐ ܘܰܥܕܳܐ ܕܚܰܝ̈ܶܐ ܠܐܴ ܥܳܒܽܘܪ̈ܶܐ ܘܠܐܴ ܡܶܬܚܰܒܠܳܢ̈ܶܐ: ܕܰܒܝܰܕ ܒܪܳܟ ܚܰܒܺܝܒܳܐ ܟܽܠ ܒܽܘܪ̈ܟܳܬܳܐ ܫܰܟܶܢ̣ܬ ܠܰܢ: ܫܽܘܒܚܳܐ ܠܳܟ ܐܰܠܳܗܳܐ ܙܳܝܽܘܢܳܐ ܛܳܒܳܐ ܘܰܡܡܰܠܝܳܢܳܐ ܕܚܰܣܺܝܪ̈ܶܐ: ܘܰܡܣܰܒܥܳܢܳܐ ܕܟܰܦ̈ܢܶܐ ܘܰܨܪ̈ܺܝܟܶܐ: ܕܥܽܘܬܪܳܐ ܣܰܓܺܝܳܐܐ ܝܰܗ̣ܒܬ ܠܰܢ ܒܰܩܝܳܡܬܳܟ ܕܡܶܢ ܩܰܒܪܳܐ: ܫܽܘܒܚܳܐ ܠܳܟ ܐܰܠܳܗܳܐ ܚܰܢܳܢܳܐ ܘܰܡܪܰܚܡܳܢܳܐ ܕܪܰܚܶܡ̣ܬ ܥܰܠ ܓܶܢܣܰܢ ܕܰܬܚܶܝܬ ܠܰܘܛܬܳܐ ܟܕܺܝܢ ܗ̣ܘܳܐ ܘܡܰܪܺܝܪܳܐܝ̣ܬ ܕܠܐܴ ܚܰܘܣܳܢܳܐ ܡܶܬܢܰܘܰܠ ܗ̱ܘܳܐ: ܫܽܘܒܚܳܐ ܠܳܟ ܐܰܠܳܗܳܐ ܛܳܒܳܐ ܘܛܽܘܒܬܳܢܳܐ ܕܒܰܩܝܳܡܬܳܟ ܫܒܺܝܚܬܳܐ ܕܡܶܢ ܩܰܒܪܳܐ ܛܽܘܒܬܳܢܽܘܬܳܐ ܡܥܰܠܰܝܬܳܐ ܐܠܰܒܶܫ̣ܬ ܠܰܢ: ܘܠܐܱܬܪܰܢ ܩܰܕܡܳܝܳܐ ܐܰܦܢܺܝܬ ܠܰܢ: ܫܽܘܒܚܳܐ ܠܳܟ ܐܰܠܳܗܳܐ ܝܰܡܳܐ ܠܐܴ ܡܶܬܬܓܰܫܫܳܢܳܐ ܕܪܶܚܡܰܬ݀ ܐ̱ܢܳܫܽܘܬܳܐ ܘܢܽܘܗܪܳܐ ܦܰܐܝܳܐ ܕܰܡܬܽܘܡܳܝܳܐ: ܫܽܘܒܚܳܐ ܠܳܟ ܐܰܠܳܗܳܐ ܟܠܺܝܠܐܴ ܘܗܶܕܪܳܐ ܕܰܡܗܰܝ̈ܡܢܰܝ ܒܰܫܡܶܗ: ܫܽܘܒܗܳܪܳܐ ܕܡܰܘ̈ܕܝܰܝ ܒܐ̱ܢܳܫܽܘܬܶܗ: ܘܥܽܘܕܪܳܢܳܐ ܕܡܶܬܓܰܘ̈ܣܰܝ ܒܰܐܠܳܗܽܘܬܶܗ: ܫܽܘܒܚܳܐ ܠܳܟ ܐܰܠܳܗܳܐ ܠܡܺܐܢܳܐ ܘܢܰܘܚܳܐ ܕܰܡܛܰܪ̈ܦܶܐ ܘܫܽܘܘܙܳܒܳܐ ܕܥܳܡ̈ܠܐܷ ܘܠܐܱܝ̈ܳܐ: ܫܽܘܒܚܳܐ ܠܳܟ ܐܰܠܳܗܳܐ ܡܥܺܝܢܳܐ ܕܚܰܝ̈ܶܐ ܪ̈ܽܘܚܳܢܳܝܶܐ ܕܰܐܪܕܺܝ ܠܰܢ ܡܶܢ ܣܶܛܪܶܗ: ܫܶܩܝܳܐ ܕܚܰܝ̈ܶܐ ܘܡܰܒܽܘܥܳܐ ܕܚܰܕ̈ܘܳܬܳܐ: ܫܽܘܒܚܳܐ ܠܳܟ ܐܰܠܳܗܳܐ ܢܶܒܥܳܐ ܕܠܐܴ ܓܳܐܶܙ ܘܢܰܗܪܳܐ ܕܫܶܦ̈ܥܶܐ ܫܡܰܝ̈ܳܢܶܐ: ܕܟܽܠ ܬܶܕܡܪ̈ܳܬܳܐ ܬܡܺܝ̈ܗܳܬܳܐ ܚܰܘܺܝ ܠܟܽܠܰܢ ܒܰܩܝܳܡܬܶܗ: ܫܽܘܒܚܳܐ ܠܳܟ ܐܰܠܳܗܳܐ ܣܺܝܡܬܳܐ ܕܚܶܟ̈ܡܳܬܳܐ ܣܒܺܝ̣̈ܣܳܬܳܐ ܘܥܰܬܺܝܪ̈ܳܬܳܐ ܕܰܐܥܬܰܪ ܠܰܢ ܡܶܢ ܓܰܙܳܐ ܕܪ̈ܰܚܡܰܘܗ̱ܝ ܘܝܰܗ̣ܒ ܠܰܢ ܦܰܓܪܶܗ ܕܢܶܬܒܰܣܰܡ ܒܶܗ: ܫܽܘܒܚܳܐ ܠܳܟ ܐܰܠܳܗܳܐ ܥܳܒܽܘܕܳܐ ܘܰܡܬܰܩܢܳܢܳܐ ܕܟܽܠܗܶܝܢ ܒܶܪ̈ܝܳܬܳܐ: ܘܰܐܬܩܶܢ̣ܬ ܠܒܰܪܢܳܫܳܐ ܩܰܕܡܳܝܳܐ ܡܶܢ ܒܪܺܝܫܺܝܬ: ܫܽܘܒܚܳܐ ܠܳܟ ܐܰܠܳܗܳܐ ܘܦܳܪܽܘܩܳܐ ܘܰܡܦܰܨܝܳܢܳܐ ܕܰܦ̣ܪܰܩ ܘܫܰܘܙܶܒ ܠܓܶܢܣܰܢ ܡܶܢ ܐܺܝ̈ܕܰܝ ܒܥܶܠܕ̈ܒܳܒܰܝܢ ܒܺܝܫܳܐ ܘܡܰܘܬܳܐ ܘܣܳܛܳܢܳܐ: ܫܽܘܒܚܳܐ ܠܳܟ ܐܰܠܳܗܳܐ ܨܶܡܚܳܐ ܨܰܡܽܘܚܬܳܢܳܐ ܕܰܨܡܰܚ ܠܰܢ ܡܶܢ ܐܰܒܳܐ ܒܪܺܝܫܺܝܬ ܘܰܕܢܰܚ̣ ܠܰܢ ܡܶܢ ܡܰܪܝܰܡ ܒܚܰܪܰܬ݀ ܙܰܒ̈ܢܶܐ: ܫܽܘܒܚܳܐ ܠܳܟ ܐܰܠܳܗܳܐ ܩܪܰܒܬܳܢܳܐ ܘܬܰܩܺܝܦ ܥܽܘܫܢܳܐ ܕܬܰܒܰܪ ܒܰܩܝܳܡܬܶܗ ܠܢܺܝܪܶܗ ܕܡܰܘܬܳܐ ܘܣܳܛܳܢܳܐ: ܘܰܫ̣ܪܳܐ ܐܰܣܺܝܪ̈ܶܐ ܕܡܶܢ ܥܳܠܰܡ: ܫܽܘܒܚܳܐ ܠܳܟ ܪܳܡܳܐ ܘܰܡܥܰܠܝܳܐ ܕܪܰܡܪܶܡܬ ܘܥܰܠܺܝܬ ܠܓܶܢܣܳܐ ܕܥܰܦܪ̈ܳܢܶܐ: ܘܰܥܒ̣ܰܕܬ ܐܶܢܽܘܢ ܪ̈ܽܘܚܳܢܶܐ ܘܰܒܢ̈ܰܝ ܝܳܪܬܽܘܬܳܐ ܕܺܝܠܳܟ: ܫܽܘܒܚܳܐ ܠܳܟ ܐܰܠܳܗܳܐ ܫܰܝܢܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܐܰܢ̱ܬ ܕܰܥܒ̣ܰܕܬ ܫܠܳܡܳܐ ܘܰܐܘܝܽܘܬܳܐ: ܘܫܰܝܶܢ̣ܬ ܠܰܬܪ̈ܰܝܗܽܘܢ ܓܰܒ̈ܶܐ ܒܰܙܩܺܝܦܽܘܬܳܟ: ܫܽܘܒܚܳܐ ܠܳܟ ܐܰܠܳܗܳܐ ܬܠܺܝܬܳܝܳܗ̇ ܕܰܐܠܳܗܽܘܬܳܐ ܕܩܳܡ̣ܬ ܡܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܘܰܡܠ̣ܰܝܬܳܗ̇ ܠܟܽܠܳܗ̇ ܒܪܺܝܬܳܐ ܪܺܝܚܳܐ ܕܦܰܐܝܽܘܬ ܐܰܠܳܗܽܘܬܳܐ ܡܬܽܘܡܳܝܬܳܐ: ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܰܠܳܗܰܢ ܕܠܐܴ ܬܰܣܠܐܷ ܘܬܶܫܕܶܐ ܠܰܢ ܡܶܢ ܩܕܳܡ ܦܰܪܨܽܘܦܳܟ: ܐܶܠܐܴ ܐܰܡܠܶܟ ܥܠܰܝܢ ܫܰܝܢܳܟ ܘܰܫܠܳܡܳܟ ܘܚܽܘܒܳܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܘܰܫܪܺܝ ܠܐܱܣܺܝܪ̈ܶܐ ܕܒܰܚܛܳܗ̈ܶܐ ܡܦܰܪܟܠܺܝܢ: ܐܰܪܘܰܚ ܠܐܱܠܺܝ̣̈ܨܶܐ: ܘܒܰܝܰܐܐ ܠܰܡܥ̈ܳܩܶܐ ܘܰܠܟܽܠܗܽܘܢ ܐܰܝܠܶܝܢ ܕܒܰܐܢܰܢ̈ܩܰܐܣ ܘܰܒܩܺܝ̈ܢܕܽܘܢܽܘ ܫܰܟܶܢ ܪܘܳܚܳܬܳܐ ܘܰܢܦܺܐܫܳܐ: ܘܰܐܫܘܳܐ ܠܟܽܠܰܢ ܠܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ ܘܰܓܗܳܝܬܳܐ ܡܫܰܡܠܰܝܬܳܐ ܕܡܶܢ ܢܶܣܝܽܘ̈ܢܶܐ: ܘܦܰܨܳܐ ܠܰܢ ܡܶܢ ܟܽܠܗܶܝܢ ܐܽܘܪ̈ܚܳܬܶܗ ܡܥܰܩ̈ܡܳܬܳܐ ܕܒܺܝܫܳܐ ܢܳܟܽܘܠܰܢ: ܘܠܐܴ ܬܶܬܶܠ ܠܶܗ ܐܰܬܪܳܐ ܕܢܶܓܚܰܟ ܒܰܢ: ܘܰܠܦܰܚ̈ܶܐ ܕܺܝܠܶܗ ܡܶܢ ܬܚܶܝܬ ܪ̈ܶܓܠܐܷ ܕܺܝܠܰܢ ܫܰܦܶܠ ܘܬܰܒܰܪ: ܘܚܰܘ̈ܒܶܐ ܘܰܚܛܳܗ̈ܶܐ ܕܟܽܠܰܢ ܚܰܣܳܐ ܘܰܫܒܽܘܩ: ܘܡܶܢ ܓܰܒܳܐ ܕܺܝܠܳܟ ܕܝܰܡܺܝܢܳܐ ܠܟܽܠܰܢ ܐܰܩܺܝܡ: ܘܰܐܢܺܝܚ ܢܰܦ̈ܫܳܬܳܐ ܘܦܰܓܪ̈ܶܐ ܕܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܰܫܟ̣ܶܒܘ̱ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܒܓܽܘ̈ܕܶܐ ܕܢܰܨܺܝ̈ܚܰܝܟ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܶܛܪܳܐ

ܐܶܬܪܰܥܳܐ ܡܳܪܝܳܐ ܐܰܠܳܗܳܐ ܒܬܰܟܫܶܦܬܳܐ ܘܰܨܠܰܘ̈ܳܬܳܐ ܕܠܳܟ ܡܶܬܩܰܪܒܺܝܢ ܡܶܢ ܥܺܕܬܳܟ ܩܰܕܺܝܫܬܳܐ: ܘܠܐܴ ܬܰܣܠܐܷ ܠܦܽܘܠܚܳܢ ܬܶܫܡܫܬܳܐ ܕܟܳܗ̈ܢܰܝܟ: ܐܶܠܐܴ ܐܶܬܪܰܥܳܐ ܡܳܪܝܳܐ ܒܦܺܝܪ̈ܡܰܝܗܽܘܢ ܘܶܐܬܬܢܺܝܚ ܒܒܳܥ̈ܘܳܬܗܽܘܢ: ܘܩܰܒܶܠ ܡܳܪܝܳܐ ܨܠܰܘ̈ܳܬܗܽܘܢ ܘܫܰܟܶܢ ܫܰܝܢܳܐ ܘܰܫܠܳܡܳܐ ܠܐܱܪܥܳܐ ܘܟܽܠܗܽܘܢ ܥܳܡܽܘܪ̈ܶܝܗ̇ ܕܬܰܘܕܶܐ ܠܳܟ ܕܠܐܴ ܫܶܠܝܳܐ: ܘܬܶܣܓܽܘܕܝ̱ ܠܳܟ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܚܽܘܬܳܡܳܐ

ܒܰܪܶܟ ܡܳܪܝܳܐ ܐܰܠܳܗܳܐ ܒܒܽܘܪ̈ܟܳܬܳܐ ܕܺܝܠܳܟ ܫܡܰܝܳܢ̈ܳܝܳܬܳܐ ܠܟܶܢܫܳܐ ܗܳܢܳܐ ܕܶܐܬܟܰܢܰܫ: ܕܰܠܥܺܐܕܳܐ ܕܰܩܝܳܡܬܳܟ ܢܫܰܡܠܐܷ ܒܚܰܕܽܘܬܳܐ: ܘܗܳܐ ܩܳܐܶܡ ܘܰܡܣܰܟܶܐ ܠܪ̈ܰܚܡܰܝܟ: ܐܰܢ̱ܬ ܡܳܪܳܐ ܛܳܒܳܐ ܫܰܕܰܪ ܚܢܳܢܳܟ ܠܐܻܝܳܠܶܗ ܘܣܰܝܰܥܳܝܗ̱ܝ ܒܚܰܝܠܐܴ ܕܥܽܘܕܪ̈ܳܢܰܝܟ ܕܠܐܴ ܡܰܘܦܶܝܢ: ܕܒܶܝܬ ܓܰܙܳܟ ܠܐܴ ܚܳܣܰܪ ܘܠܐܴ ܒܳܨܰܪ ܡܶܢ ܫܽܘ̈ܐܳܠܐܷ: ܘܣܰܓܺܝ ܡܰܘ̈ܗܒܳܬܳܐ ܐܝ̣ܬܝܟ ܡܳܪܝܳܐ ܘܠܳܟ ܫܽܘܒܚܳܐ ܡܰܣܩܺܝܢܰܢ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀