ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܠܐܴ ܚܳܫܽܘܫܳܐ ܕܶܐܬܳܐ ܠܚܰܫܳܐ ܒܨܶܒܝܳܢܶܗ: ܠܗܰܘ ܠܐܴ ܡܳܝܽܘܬܳܐ ܕܰܛܥ̣ܶܡ ܡܰܘܬܳܐ ܐܰܝܟ ܕܰܫܦ̣ܰܪ ܠܶܗ: ܠܗܰܘ ܚܰܝܳܐ ܘܠܐܴ ܡܶܬܚܰܒܠܳܢܳܐ ܕܰܕܒ̣ܰܚ ܩܢܽܘܡܶܗ ܚܠܳܦ ܡܰܪܥܺܝܬܶܗ: ܘܰܬܪܰܥ ܕܡܶܗ ܫܶܩܝܳܐ ܕܚܰܝ̈ܶܐ ܠܥܳܢ̈ܶܗ: ܘܝܰܗ̣ܒ ܦܰܓܪܶܗ ܡܰܚܝܳܢܳܐ ܡܶܐܟܽܘܠܬܳܐ ܚܰܝܬܳܐ ܠܡܰܪܥܺܝܬܶܗ: ܕܠܶܗ ܝܳܐܶܐ ܫܽܘܒܚܳܐ ܕܙܳܕܶܩ ܠܶܗ: ܘܬܰܘܕܺܝܬܳܐ ܕܡܶܬܬܚܺܝܒܳܐ ܠܶܗ ܡܶܢ ܥܺܕܬܶܗ ܘܡܰܪܥܺܝܬܶܗ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܣܳܓܕܺܝܢܰܢ ܘܡܰܘܕܶܝܢܰܢ ܠܳܟ ܡܳܪܰܢ ܝܶܫܽܘܥ ܡܫܺܝܚܳܐ: ܒܳܪܽܘܝܳܐ ܕܟܽܠܳܗ̇ ܒܪܺܝܬܳܐ ܡܶܬܝܰܕܥܳܢܺܝܬܳܐ ܘܡܶܬܪܰܓܫܳܢܺܝܬܳܐ ܗܽܘܠܳܢܳܝܬܳܐ ܘܠܐܴ ܡܶܬܗܰܘܢܳܢܺܝܬܳܐ: ܗܰܘ ܕܪܺܝܚܳܐ ܚܰܠܝܳܐ ܕܺܝܕܰܥܬܳܟ ܡܠ̣ܰܝܬ ܠܠܶܒܰܘ̈ܳܬܰܢ: ܘܰܐܫܘܺܝܬ ܠܰܢ ܠܡܳܟ̈ܶܐ ܘܥܰܦܪ̈ܳܢܶܐ ܥܰܒ̣ܕ̈ܶܐ ܕܺܝܠܳܟ ܕܰܩܕܳܡܰܝܟ ܢܩܽܘܡ ܘܬܶܫܡܫܬܳܐ ܕܐ̱ܪ̈ܳܙܰܝܟ ܐܰܠܳܗܳܝ̈ܶܐ ܘܠܐܴ ܡܶܬܡܰܠ̈ܠܳـܢܶܐ ܢܫܰܡܶܫ: ܗܳܢܘܢ̇ ܕܰܠܗܽܘܢ ܪܳܓܺܝ̣ܢ ܥܺܝܪ̈ܶܐ ܘܡܰܠܐܱܟ̈ܶܐ ܕܢܶܚܙܽܘܢ ܐܶܢܽܘܢ: ܘܠܐܴ ܡܶܬܒܨܶܐ ܐܰܬܪܳܐ ܕܺܝܠܳܟ ܘܠܐܴ ܚܳܙܶܝܢ ܠܰܓܢܺܝܙܽܘܬܳܟ ܠܐܴ ܡܶܬܚܰܙܝܳܢܺܝ̣ܬܳܐ: ܐܶܠܐܴ ܟܰܕ ܡܒܰܪܟܺܝܢ ܘܰܡܩܰܕܫܺܝܢ ܘܰܕܠܐܴ ܫܶܠܝܳܐ ܙܽܘܝܳܚ̈ܶܐ ܘܗܽܘ̈ܠܳܠܐܷ ܣܰܓܺܝ̈ܶܐܐ ܡܫܰܕܪܺܝܢ ܠܐܻܝܩܳܪܳܟ ܟܰܕ ܠܐܴ ܡܥܰܩܒܺܝܢ ܠܪܰܒܽܘܬܳܟ: ܐܰܢ̱ܬ ܕܪܳܡ ܐܰܢ̱ܬ ܡܶܢ ܟܽܠ ܒܨܳܬܳܐ ܘܥܽܘܩܳܒܳܐ ܠܐܴ ܡܶܬܕܰܪܟܳܐ ܐܠܰܗܽܘܬܳܟ ܘܠܐܴ ܡܶܬܒܰܨܝܳܐ ܡܳܪܽܘܬܳܟ: ܘܠܐܴ ܡܶܬܥܰܩܒܳܐ ܐ̱ܢܳܫܽܘܬܳܟ: ܘܕܰܠܟܽܠ ܗܰܘ̈ܢܶܐ ܕܰܥܒܺܝ̣̈ܕܶܐ ܡܰܬܡܗܳܐ ܡܶܢ ܡܰܕܪܟܳܢܽܘܬܳܐ ܕܟܽܠ ܡܟܰܣܝܳܐ: ܗܰܘ ܕܟܰܕ ܐܝ̣ܬܝܟ ܥܰܠ ܟܽܘܪܣܝܳܐ ܕܺܐܝܩܳܪܳܟ ܒܫܽܘܒܚܳܐ ܡܶܬܓܰܝܶܐܐ ܐܰܢ̱ܬ: ܘܰܒܬܶܐܘܳܪܺܝܰܐ ܕܰܐܠܳܗܽܘܬܳܟ ܡܶܬܒܰܣܰܡ ܐܰܢ̱ܬ: ܘܟܰܕ ܫܶܦܪܰܬ݀ ܠܛܳܒܽܘܬܳܟ ܕܰܥܒܳܕܳܐ ܠܐܻܝܕܰܝ̈ܟ ܬܰܬܩܶܢ: ܘܨܰܠܡܳܐ ܡܥܰܠܝܳܐ ܘܡܰܠܟܳܝܳܐ ܕܰܐܠܳܗܽܘܬܳܟ ܒܶܗ ܬܶܒܪܶܐ: ܘܪܽܘܚܳܐ ܚܰܝܬܳܐ ܘܡܰܚܝܳܢܺܝܬܳܐ ܒܶܗ ܢܦܰܚ̣ܬ: ܘܰܡܠܺܝܠܐܴ ܐܰܝܟ ܡܰܠܐܱܟ̈ܶܐ ܥܒ̣ܰܕܬܳܝܗ̱ܝ: ܦܰܪܕܰܝܣܳܐ ܕܛܽܘ̈ܒܶܐ ܘܰܐܬܪܳܐ ܫܰܡܺܝܢܳܐ ܕܒܽܘܣ̈ܳܡܶܐ ܘܓܰܢܬܳܐ ܕܰܥܕܶܝܢ ܐܰܘܚܶܕܬ ܠܶܗ: ܘܥܰܠ ܟܽܠ ܕܺܐܝܬ ܒܳܗ̇ ܒܓܰܢܬܳܐ ܫܽܘܠܛܳܢܳܐ ܝܰܗܒ̣ܬ ܠܶܗ: ܘܢܳܡܽܘܣܳܐ ܦܰܪܫܰܓܢܳܝܳܐ ܣܳܡ̣ܬ ܠܶܗ: ܘܫܰܘܬܳܦܬܳܐ ܒܰܪ̱ܬ ܙܰܘܓܳܢܳܝܬܳܐ ܐܰܝܟ ܕܰܠܥܶܕܪܶܗ ܐܰܩܺܝܡܬ ܥܰܡܶܗ: ܘܶܐܡ̣ܰܪܬ ܠܶܗ ܕܡܶܢ ܟܽܠܗܽܘܢ ܐܺܝܠܳܢ̈ܶܐ ܕܰܒܦܰܪܕܰܝܣܳܐ ܐܰܟܽܘܠ ܐܳܕܳܡ: ܘܠܐܻܝܠܳܢܳܐ ܕܺܝܕܰܥܬܳܐ ܕܺܐܝܬ ܒܰܡܨܰܥܬܳܐ ܕܛܳܒܳܬܳܐ ܘܰܕܒܺܝܫܬܳܐ ܠܐܴ ܬܶܬܩܰܪܰܒ ܠܶܗ ܡܰܘܬܳܐ ܟܣܶܐ ܒܶܗ: ܗ̣ܽܘ ܕܶܝܢ ܡܰܪܳܚܳܐ ܒܠ̣ܰܥ ܒܟܺܐܒܳܐ ܡܰܪܺܝܪܳܐ ܕܥܶܨܝܳܝܽܘܬܳܐ ܡܶܢ ܒܺܝܫܽܘܬܳܐ ܕܒܺܝܫܳܐ ܒܥܶܠܕܰܪܳܐ: ܘܫܳܛ ܠܢܳܡܽܘܣܳܐ ܘܠܰܣܝܳܓܳܐ ܐܰܘܟܺܝܬ ܬܚܽܘܡܳܐ ܕܣܳܡ ܠܶܗ ܡܳܪܶܗ ܦܣ̣ܰܥ ܘܰܥܒ̣ܰܪ ܘܰܚ̣ܛܳܐ ܘܰܢܦ̣ܰܠ: ܓܳܠ̣ܘ̱ ܪ̈ܰܚܡܶܐ ܡܬܽܘܡܳܝ̈ܶܐ ܕܺܝܠܳܟ ܥܠܰܘܗ̱ܝ ܘܰܦܪܰܩ̣ܬܳܝܗ̱ܝ ܡܶܢ ܐܺܝܕܰܝ̈ ܢܳܟܽܘܠܶܗ: ܘܥܰܠ ܨܰܠܡܳܟ ܐܶܬܪܰܚܰܡܬ ܘܰܐܣܺܝܬ ܡܰܚܘ̈ܳܬܶܗ ܘܟܺܐܒܰܘ̈ܗ̱ܝ ܘܰܥܨܰܒ̣ܬ ܫܽܘܚ̈ܢܰܘܗ̱ܝ: ܘܦܰܓܪܳܐ ܐܰܢ̱ܬ ܐܶܬܥܰܛܰܦ̣ܬ ܡܶܢ ܒܰܪܬܶܗ: ܘܒܶܗ ܩܰܒ̣ܶܠܬ ܘܣܰܝܒ̣ܰܪܬ ܚܰܫܳܐ ܘܡܰܘܬܳܐ ܘܰܙܩܺܝܦܳܐ ܘܫܽܘܩܳܦ ܦܰܟ̈ܶܐ ܘܚܰܠܐܴ ܘܰܡܪܳܪ̈ܶܐ ܡܶܛܽܠܳܬܶܗ: ܘܰܣܠ̣ܶܩܬ ܠܰܨܠܺܝܒܳܐ ܘܰܙܟ̣ܰܝܬ ܠܰܒܥܶܠܕܰܪܶܗ: ܘܩܳܡ̣ܬ ܡܶܢ ܩܰܒܪܳܐ ܒܬܶܫܒܽܘܚܬܳܐ ܘܰܒܙܳܟܽܘܬܳܐ ܘܥܰܡܳܟ ܐܰܩܺܝܡܬܳܝܗ̱ܝ ܒܫܽܘܒܚܳܐ ܐܰܦܢܺܝܬܳܝܗ̱ܝ ܠܐܱܬܪܶܗ ܩܰܕܡܳܝܳܐ: ܘܫܽܘ̈ܟܳܢܶܐ ܫܰܦܺܝܪ̈ܶܐ ܝܰܗ̣ܒܬ ܠܶܗ: ܘܠܰܢ ܝܰܠܕ̈ܰܘܗ̱ܝ ܐܰܦܢܺܝܬ ܠܰܢ ܠܰܥܕܶܝܢ ܝܳܪܬܽܘܬܰܢ: ܘܫܰܟܶܢ̣ܬ ܠܰܢ ܚܰܝ̈ܶܐ ܚܰܕ̈ܬܶܐ ܕܠܐܴ ܣܳܐܒܺܝܢ ܒܰܩܝܳܡܬܳܟ ܡܫܰܒܰܚܬܳܐ: ܘܪܰܗܒܽܘܢܳܐ ܕܚܰܝ̈ܶܐ ܫܡܰܝ̈ܳܢܶܐ ܕܠܐܴ ܥܳܒܪܺܝܢ ܕܰܐܘܕܺܝܢܰܢ ܒܳܟ: ܘܗܰܒܠܰܢ ܕܢܶܬܒܰܣܰܡ ܒܰܓܢܽܘܢܳܟ: ܘܢܶܚܕܶܐ ܒܡܶܐܬܺܝܬܳܟ ܕܬܰܪܬܶܝܢ ܥܰܡ ܟܽܠܗܽܘܢ ܩܰܕܺܝ̈ܫܰܝܟ: ܘܰܐܫܘܳܐ ܠܥܰܢܺܝ̈ܕܰܝܢ ܕܰܫܟ̣ܶܒܘ̱ ܥܰܠ ܣܰܒܪܳܟ: ܘܰܐܩܺܝܡ ܐܶܢܽܘܢ ܡܶܢ ܝܰܡܺܝܢܳܟ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܝ̣ܢ܀