ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܢܽܘܗܪܳܐ ܠܐܴ ܡܶܬܩܰܪܒܳܢܳܐ: ܠܗܰܘ ܚܰܝܠܐܴ ܠܳܐ ܡܶܬܡܰܠܠܳܢܳܐ: ܘܚܶܟܡܬܳܐ ܠܐܴ ܡܶܬܦܰܫܩܳܢܺܝܬܳܐ: ܠܗܳܝ ܪܰܒܽܘܬܳܐ ܠܐܴ ܡܰܘܦܝܳܢܺܝܬܳܐ: ܘܫܽܘܦܪܳܐ ܠܐܴ ܡܶܬܦܰܚܡܳܢܳܐ ܟܝܳܢܳܐ ܠܐܴ ܒܰܪܝܳܐ: ܘܫܽܘܠܛܳܢܳܐ ܡܳܪܳܢܳܝܳܐ: ܗܰܘ ܕܒܰܩܝܳܡܬܶܗ ܦܳܪܽܘܩܳܝܬܳܐ ܫܰܟܶܢ ܠܰܢ ܥܽܘܕܪ̈ܳܢܶܐ ܘܰܡܫܰܡܠܰܝ̈ܳܐ ܘܰܕܪܰܫ ܠܰܢ ܐܽܘܪܚܳܐ ܠܘܳܬ ܐܰܒܽܘܗ̱ܝ ܡܫܰܒܚܳܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܡܰܠܟܳܐ ܪܰܒܳܐ ܕܬܶܫܒܽܘܚܬܳܐ ܗܳܝ ܚܰܝ̈ܶܐ ܘܰܩܝܳܡܬܳܐ ܕܟܽܠܗܽܘܢ ܐܰܝܠܶܝܢ ܕܒܳܟ ܡܗܰܝܡܢܺܝܢ: ܡܶܠܬܳܐ ܘܚܰܝ̈ܶܐ ܕܡܶܢ ܐܰܠܳܗܳܐ ܐܰܒܳܐ: ܗܰܘ ܪܳܥܝܳܐ ܛܳܒܳܐ ܕܰܗ̣ܘܳܐ ܥܶܪܒܳܐ: ܘܶܐܬܕܒܰܚ ܥܰܠ ܐܰܦ̈ܰܝ ܡܰܪܥܺܝܬܶܗ: ܘܒܰܕܒܺܝܚܽܘܬܶܗ ܚܰܝܬܳܐ ܐܶܬܚܰܣܝܰܬ݀ ܟܽܠܳܗ̇ ܒܪܺܝܬܳܐ: ܗܰܘ ܕܫܽܘܠܛܳܢܳܐ ܐܝ̣ܬ ܠܳܟ ܐܰܝܟܰܢܳܐ ܕܰܬܣܺܝܡ ܢܰܦܫܳܟ ܚܠܳܦ ܥܶܪ̈ܒܰܝܟ ܡܠܺܝ̣̈ܠܐܷ: ܘܰܩܢܶܐ ܐܢ̱ܬ ܫܽܘܠܛܳܢܳܐ ܠܘܳܬ ܗܳܝ ܕܬܶܣܒܺܝܗ̇: ܒܗܳܝ ܕܰܫܘܶܐ ܐܰܢ̱ܬ ܒܰܡܬܽܘܡܳܝܽܘܬܳܐ ܘܰܒܒܳܪܽܘܝܽܘܬܳܐ ܠܐܱܒܳܐ ܘܰܠܪܽܘܚܳܐ ܩܰܕܺܝܫܳܐ: ܗܰܘ ܕܡܶܛܽܠ ܦܽܘܪܩܳܢܳܐ ܕܺܝܠܰܢ ܒܢ̈ܰܝ ܐ̱ܢܳܫ̈ܳܐ ܡܰܘܬܳܐ ܨܶܒܝܳܢܳܐܝ̣ܬ ܥܰܠ ܨܠܺܝܒܳܐ ܒܰܒܣܰܪ ܣܰܝܒ̣ܰܪܬ: ܘܰܒܝܰܕ ܡܰܘܬܳܟ ܡܰܥܒܶܕ ܚܰܝ̈ܶܐ ܐܰܡܺܝܬܬ ܠܡܰܘܬܳܐ ܕܰܥܠܰܝܢ ܐܰܡܠ̣ܶܟ ܡܶܢ ܣܰܓܺܝ̈ܶܐܐ ܘܰܠܒܰܪܢܳܫܳܐ ܗܰܘ ܕܡܺܝܬ ܒܰܚܛܺܝܬܳܐ ܘܶܐܬܚܰܒܰܠ ܐܰܚܺܝܬܳܝܗ̱ܝ: ܘܰܫ̣ܪܰܝܬ ܠܠܰܘܛܬܳܐ ܕܒܰܥܒܳܪ ܦܽܘܩܕܳܢܳܐ ܥܰܠ ܐܳܕܳܡ ܐܶܬܓܰܙܪܰܬ݀: ܘܰܒܠܐܴ ܡܳܝܽܘܬܽܘܬܳܐ ܫܰܘܬܶܦܬ ܐܶܢܽܘܢ: ܘܡܶܛܽܠ ܛܥܳܡܬܳܐ ܡܰܪܺܝܪܬܳܐ ܕܒܰܥܒܳܪ ܦܽܘܩܕܳܢܳܐ ܐܶܬܛܪܶܕ ܗ̣ܽܘ ܘܝܰܠܕ̈ܰܘܗ̱ܝ ܠܐܱܪܥܳܐ ܢܽܘܟܪܳܝܬܳܐ ܘܰܗܘܳܐ ܬܚܶܝܬ ܫܽܘܥܒܳܕܶܗ ܕܰܒܥܶܠܕܰܪܳܐ ܐܰܠܦ̈ܶܐ ܘܕܳܪ̈ܶܐ ܕܰܫܢܰܝ̈ܳܐ: ܘܰܒܝܰܕ ܩܝܳܡܬܳܟ ܡܫܰܒܰܚܬܳܐ ܡܠ̣ܰܝܬ ܚܰܕܽܘܬܳܐ ܘܰܦܨܺܝܚܽܘܬܳܐ ܠܰܫܡܰܝܳܐ ܘܠܐܱܪܥܳܐ: ܘܰܒܝܰܕ ܡܰܚܰܬܬܳܟ ܕܠܰܫܝܽܘܠ ܘܰܠܚ̈ܶܙܶܐ ܥܰܡܺܝ̈ܩܶܐ ܕܗܳܡܳܢ ܒܢܽܘܗܪܳܐ ܕܺܝܠܳܟ ܐܰܨܡ̣ܰܚܬ: ܘܰܠܢܰܦ̈ܫܳܬܳܐ ܕܩܰܕܺܝ̈ܫܶܐ ܕܬܰܡܳܢ ܚܒܺܝ̣̈ܫܳܢ ܗ̱ܘ̈ܰܝ ܡܶܢ ܥܰܒܕܽܘܬܳܐ ܚ̣ܰܪܰܪܬ: ܘܟܰܕ ܣܠ̣ܶܩܬ ܡܶܢ ܓܰܘ ܫܝܽܘܠ ܬܰܪ̈ܥܶܐ ܥܰܫܺܝ̣̈ܢܶܐ ܕܗܳܡܳܢ ܫܚ̣ܰܩܬ ܘܡܽܘ̈ܟܠܐܷ ܗܳܢܘܢ̇ ܦܰܪ̈ܙܠܳܝܶܐ ܓܰܕܶܡ̣ܬ: ܘܒܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ ܚܰܝ̈ܶܐ ܘܚܰܕ̈ܘܳܬܳܐ ܠܰܒܪܺܝܬܳܐ ܫܰܟܶܢ̣ܬ: ܘܒܽܘܟܪܳܐ ܕܡܶܢ ܒܶܝܬ ܡܺܝ̈ܬܶܐ ܒܰܐܚ̈ܶܐ ܣܰܓܺܝ̈ܶܐܐ ܗ̣ܘܰܝܬ: ܘܪܺܝܫܺܝܬܳܐ ܕܠܐܴ ܡܳܝܽܘܬܽܘܬܳܐ ܘܠܐܴ ܡܶܬܚܰܒܠܳܢܽܘܬܳܐ ܐܰܩܺܝܡܬ ܠܰܢ: ܘܟܰܕ ܒܬܰܪ̈ܥܶܐ ܐܰܚܺܝ̣̈ܕܶܐ ܕܥܶܠܺܝܬܳܐ ܥܰܠ̣ܬ: ܘܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܐܶܬܚܙܰܝܬ: ܘܡܶܢ ܒܳܬܰܪ ܩܝܳܡܬܳܟ ܡܫܰܒܰܚܬܳܐ ܫ̣ܰܪܰܪܬ ܐܶܢܽܘܢ ܥܰܠ ܢܽܘܚܳܡܳܟ ܡܠܐܷ ܬܶܗܪܳܐ: ܗܰܘ ܕܠܐܴ ܡܶܫܬܰܚܠܦܳܢܳܐܝ̣ܬ ܡܶܛܽܠܳܬܰܢ ܐܶܬܒܰܪܢܰܫ̣ܬ: ܘܨܶܒܝܳܢܳܐܝ̣ܬ ܚܰܫ̣ܬ: ܘܡܰܘܬܳܐ ܒܰܒܣܰܪ ܛܥܶܡ̣ܬ: ܘܥܰܡ ܡܺܝ̈ܬܶܐ ܝܰܘ̈ܡܶܐ ܬܠܳܬܳܐ ܩܰܘܺܝܬ: ܘܰܒܫܽܘܒܚܳܐ ܕܠܐܴ ܚܒܳܠܐܴ ܩܳܡ̣ܬ ܘܶܐܬܢܰܚܰܡ̣ܬ: ܘܒܰܕܓܽܘܢ ܐܰܝܟ ܫܠܺܝ̈ܚܶܐ ܩܰܕܺܝ̈ܫܶܐ ܡܰܘܕܶܝܢܰܢ ܕܚܰܕ ܗ̱ܘ ܟܝܳܢܳܐ ܕܡܶܠܬܳܐ ܐܰܠܳܗܳܐ ܕܶܐܬܒܰܣܰܪ: ܘܰܠܛܽܘܡܣܳܐ ܚܰܢܦܳܝܳܐ ܕܠܐܷܘܳܢ ܡܰܣܠܶܝܢܰܢ ܘܰܠܣܽܘܢܢܰܗܕܳܘܣ ܪܰܫܺܝܥܬܳܐ ܘܚܰܢܦܳܝܬܳܐ ܡܰܚܪܡܺܝܢܺܢ: ܕܰܬܪܶܝܢ ܟܝܳܢ̈ܶܐ ܐܰܠܦܰܬ݀ ܒܗܰܘ ܕܠܐܴ ܡܶܬܥܰܩܰܒ ܘܰܚܒܳܠܐܴ ܡܰܘܒܕܳܢܳܐ ܥܰܠ ܥܺܕܬܳܟ ܐܰܥܠܰܬ݀: ܐܶܠܐܴ ܚܢܰܢ ܕܗܰܝܡܳܢܽܘܬܳܐ ܫܠܺܝܚܳܝܬܳܐ ܩܰܒܶܠܢܰܢ: ܗܳܝ ܕܥܰܠ ܐܰܦܶܝ̈ܗ̇ ܚܰܫ̈ܶܐ ܣܳܒܠܺܝܢܰܢ: ܘܰܠܣܰܒܪܳܐ ܠܐܴ ܡܰܒܗܬܳܢܳܐ ܡܣܰܟܶܝܢܰܢ: ܘܟܰܕ ܠܝܰܘܡܳܐ ܗܳܢܳܐ ܕܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ ܡܥܰܕܥܕܺܝܢܰܢ: ܟܰܕ ܒܚܰܝ̈ܶܐ ܚܰܕ̈ܬܶܐ ܡܶܬܕܰܒܪܺܝܢܰܢ: ܐܰܩܺܝܡ ܠܰܢ ܡܶܢ ܡܰܦܽܘܠܬܳܐ ܕܰܚܛܺܝܬܳܐ: ܘܫܳܘ̈ܝܰܝ ܒܪ̈ܶܦܣܶܐ ܚܰܘܳܐ ܠܰܢ ܥܰܡ ܗܳܢܘܢ̇ ܕܡܶܢ ܥܳܠܰܡ ܫܦ̣ܰܪܘ̱ ܠܳܟ: ܗܳܢܘܢ̇ ܕܰܒܝܰܕ ܨܠܰܘ̈ܳܬܗܽܘܢ ܘܰܒܬܰܟܫ̈ܦܳܬܗܽܘܢ ܡܦܺܝܣܺܝܢܰܢ ܠܛܰܝܒܽܘܬܳܟ ܕܰܬܦܰܨܶܐ ܠܰܢ ܡܶܢ ܗܰܝܡܳܢܽܘܬܳܐ ܐܶܪܶܝܛܝܩܳܝܬܳܐ: ܘܠܐܴ ܬܡܺܝܬ ܠܰܢ ܡܰܘܬܳܐ ܬܶܢܝܳܢܳܐ ܗܰܘ ܕܰܚܛܺܝܬܳܐ: ܟܰܕ ܡܫܰܘܙܶܒ ܐܰܢ̱ܬ ܠܰܢ ܡܶܢ ܚܶܫܽܘܟܳܐ ܒܰܪܳܝܳܐ ܕܰܠܟܳܦܪ̈ܰܝ ܒܰܡܕܰܒܪܳܢܽܘܬܳܟ ܡܛܰܝܰܒ: ܘܶܐܬܥ̱ܰܗܰܕ ܠܥܰܢܺܝ̈ܕܰܝܢ ܡܗܰܝܡ̈ܢܶܐ ܐܰܝܠܶܝܢ ܕܰܒܗܰܝܡܳܢܽܘܬܳܐ ܬܪܺܝܨܬܳܐ ܩܰܕܶܡܘ̱ ܐܶܬܬܢܺܝܚܘ̱: ܒܪܶܚܡܰܬ݀ ܐ̱ܢܳܫܽܘܬܳܟ ܡܳܪܰܢ ܝܶܫܽܘܥ ܡܫܺܝܚܳܐ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ܀