ܨܠܽܘܬܳܐ ܕܫܽܘܪܳܝܳܐ

ܒܰܐܬܪܳܐ ܗܰܘ ܕܪܰܚܺܝܩ ܡܶܢ ܟܽܠ ܟܺܐܒ̈ܶܐ ܘܥܳܩ̈ܳܬܳܐ ܘܬܶܢܚ̈ܳܬܳܐ: ܘܡܰܒܥܰܕ ܡܶܢ ܫܚ̈ܳܩܶܐ ܘܛܽܘܪ̈ܳܦܶܐ: ܘܪܳܣܶܡ ܛܰܠܐܴ ܗܰܢܺܝܳܐܐ: ܐܰܫܪܳܐ ܡܳܪܝܳܐ ܠܢܰܦ̈ܫܳܬܳܐ ܟܳܗ̈ܢܳܝܳܬܳܐ ܘܚܰܣ̈ܝܳܬܳܐ ܘܩܰܕܺܝ̈ܫܳܬܳܐ ܕܥܰܒ̣ܕ̈ܶܐ ܕܺܝܠܳܟ: ܕܶܐܬܟܰܗܰܢܘ̱ ܠܳܟ ܕܰܟܝܳܐܝ̣ܬ ܘܩܰܕܺܝܫܳܐܝ̣ܬ: ܘܰܐܫܘܳܐ ܐܶܢܽܘܢ ܠܒܽܘܝܳܐܳܐ ܘܰܠܢܰܘܚܳܐ ܕܡܶܢ ܫܚ̈ܳܩܶܐ ܥܳܠܡܳܢܳܝ̈ܶܐ: ܘܰܠܒܽܘܣܳܡܳܐ ܕܰܒܚܰܝ̈ܶܐ ܫܡܰܝ̈ܳܢܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܀

ܦܪܽܘܡܝܽܘܢ

ܬܶܫܒܘ̣ܚܬܳܐ ܠܗܰܘ ܕܐܰܘܪܶܒ ܕܘ̣ܟܪܳܢܳܐ ܦܰܐܝܳܐ ܕܰܪ̈ܚܘ̣ܡܰܘܗ̱ܝ ܒܟܽܠ ܕܳܪܕܳܪ̈ܝ̣ܢ: ܘܢܰܨܰܚ ܘܪܰܡܪܶܡ ܥܰܕܥܺܐܕܗܘܢ ܒܰܫܡܰܝܳܐ ܘܒܰܐܪܥܳܐ: ܘܦܰܠܶܓ ܣܝ̣ܡܰܬ݀ ܓܰܪ̈ܡܰܝܗܘܢ̇ ܒܰܒܪܝ̣ܬܳܐ ܠܥܘ̣ܕܪܳܢܳܐ ܕܰܡܗܰܝܡ̈ܢܰܘܗ̱ܝ ܕܰܒܗܘܢ̇ ܡܶܬܓܰܘܣܝ̣ܢ: ܠܗܰܘ ܓܰܢ̱ܒܳܪܳܐ ܘܚܰܝܠܬܳܢܳܐ ܐܳܦ ܥܰܫܝ̣ܢܳܐ ܘܰܩܪܰܒܬܳܢܳܐ ܒܙܳܟܘ̣ܬܳܐ ܕܚܰܝܶܠ ܠܥܰܒ̈ܕܰܘܗ̱ܝ ܡܗܰܝ̈ܡܢܶܐ ܒܰܐܓܘ̣ܢܳܐ ܕܰܡܥܰܙܝܳܢܘ̣ܬܳܐ ܕܥܰܠ ܚܰܫ̈ܶܐ ܡܰܪܝ̣ܪ̈ܶܐ: ܕܠܶܗ ܠܗܰܘ ܕܰܓܒܳܐ ܐܶܢܘܢ̇ ܠܬܶܫܡܶܫܬܳܐ ܕܝ̣ܠܶܗ ܢܰܘܕܶܐ ܘܰܢܫܰܒܰܚ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܘܢ̇ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܘܢ̇ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ ܪܰܒܳܐ ܒܛܰܝܒܽܘܬܳܐ: ܘܠܐܴ ܡܶܣܬܰܝܟܳܢܳܐ ܒܺܐܝܬܽܘܬܳܐ ܘܛܽܘܒܬܳܢ ܒܟܽܠ: ܗܰܘ ܠܚܽܘܕܳܐܝ̣ܬ ܡܰܢ ܩܢܶܐ ܐܰܢ̱ܬ ܪ̈ܰܚܡܶܐ: ܘܡܳܪܳܢܳܐܝ̣ܬ ܐܳܦ ܫܰܪܺܝܪܳܐܝ̣ܬ ܐܝ̣ܬ ܠܳܟ ܛܰܝܒܽܘܬܳܐ ܘܩܽܘܫܬܳܐ: ܗܰܘ ܕܰܒܣܰܓܺܝܐܘܽܬ ܫܽܘ̈ܟܳܢܶܐ ܦܰܐܝ̈ܰܝ ܠܐܱܠܳܗܳܐ ܐܰܥ̣ܬܰܪܬ ܠܓܶܢܣܳܐ ܕܺܝܠܰܢ ܒܢܰܝ̈ܢܳܫܳܐ: ܘܝܰܩܰܪܬܳܝܗ̱ܝ ܒܪܰܒܽܘܬܳܐ ܘܰܐܘܪܶܒܬܳܝܗ̱ܝ ܒܰܡܟܰܗܢܳܢܽܘܬܳܐ ܕܟܳܗ̈ܢܶܐ ܚܣܰܝ̈ܳܐ ܘܰܡܫܰܡ̈ܫܳܢܶܐ ܕܟܰܝ̈ܳܐ ܐܰܝܟܰܢܳܐ ܕܠܳܟ ܢܟܰܗܢܽܘܢ ܘܰܢܫܰܡܫܽܘܢ: ܘܡܶܢ ܢܽܘܗܪܳܐ ܕܺܝܠܳܟ ܢܶܬܡܠܽܘܢ: ܗܳܠܶܝܢ ܕܟܰܕ ܪ̈ܰܒܰܝ ܒ̈ܳܬܶܐ ܕܒܶܝܬܓ̈ܰܙܶܐ ܕܺܝܠܳܟ ܫܡܰܝ̈ܳܢܶܐ ܥܒ̣ܰܕܬ: ܘܰܡܟܰܗܢܳܢܽܘܬܳܐ ܘܡܰܐܪܙܳܢܽܘܬܳܐ ܕܩܽܘ̈ܕܳܫܶܐ ܕܺܝܠܳܟ ܗܰܝܡܶܢܬ ܚܰܣܝܳܐܝ̣ܬ ܘܪܶܚܡܰܬ݀ ܐ̱ܢܳܫܳܐܝ̣ܬ: ܘܡܶܢ ܬܥܺܝܫܽܘܬ ܛܽܘܪ̈ܳܦܶܐ ܘܚܰܫ̈ܶܐ ܒܝܰܕ ܡܰܘܬܳܐ ܕܳܒܰܪ ܐܰܢ̱ܬ ܠܗܽܘܢ: ܒܗܳܝ ܕܡܶܢ ܥܰܦܪܳܐ ܓܒ̣ܰܠܬܳܝܗ̱ܝ ܠܒܰܪܢܳܫܳܐ: ܘܰܠܥܰܦܪܳܐ ܡܰܗܦܶܟ ܐܰܢ̱ܬ ܠܶܗ: ܐܶܠܐܴ ܥ̱ܽܘܗܕܳܢܳܐ ܛܽܘܒܬܳܢܳܐ ܕܫܳܘܶܐ ܠܕܽܘܒܳܪ̈ܶܐ ܕܺܝܠܗܽܘܢ ܝܰܬܺܝܪ ܚܰܣܝܳܐܝ̣ܬ ܡܫܰܡܠܐܷ ܐܰܢ̱ܬ: ܘܰܕܚܰܝܺܝ̈ܢ ܠܳܟ ܓܰܠܝܳܐܝ̣ܬ ܐܰܘܕܰܥ̣ܬ ܒܶܐܘܰܢܓܶܠܺܝ̈ܰܐ ܕܺܝܠܳܟ ܣܓܺܝ̈ܕܶܐ ܟܰܕ ܐܳܡܰܪ ܐܰܢ̱ܬ ܩܕܳܡ ܬܰܠܡܺܝ̈ܕܰܝܟ ܕܰܐܝܟܳܐ ܕܶܐܢܳܐ ܐܝ̣ܬܝ ܬܰܡܳܢ ܢܶܗܘܶܐ ܡܫܰܡܫܳܢܳܐ ܕܺܝܠܝ: ܘܠܳܟ ܗܳܟܺܝܠ ܡܳܪܝܳܐ ܡܦܺܝܣܺܝܢܰܢ ܐܳܦ ܡܶܬܟܰܫܦܺܝܢܰܢ ܘܒܳܥܶܝܢܰܢ ܡܶܢܳܟ ܚܠܳܦ ܟܳܗ̈ܢܶܐ ܕܺܝܠܳܟ ܘܰܡܫܰܡ̈ܫܳܢܶܐ ܕܡܳܪܽܘܬܳܟ ܗܳܠܶܝܢ ܕܰܒܕܽܘܒܳܪ̈ܶܐ ܟܳܗ̈ܢܳܝܶܐ ܐܶܬܥܰܢܘܺܝܘ: ܘܡܶܢ ܥܺܕܬܳܐ ܕܗܳܪܟܳܐ ܫܰܢܺܝܘ: ܘܡܶܢ ܝܰܡܳܐ ܕܚܰܘ̈ܒܶܐ ܐܰܓܗܺܝܘ: ܘܰܠܘܳܬܳܟ ܡܰܢܰܥ̣ܘ̱: ܗܳܢܘܢ̇ ܕܶܐܬܓܒܺܝܘ ܡܶܢܳܟ ܘܶܐܫܬܰܠܰܛܘ̱ ܥܰܠ ܟܰܣ̈ܝܳܬܳܐ ܕܐ̱ܪ̈ܳܙܰܝܟ: ܗܳܢܘܢ̇ ܕܰܒܕܳܪ̈ܳܬܳܐ ܕܺܝܠܳܟ ܩܰܕܺܝ̈ܫܳܬܳܐ ܕܰܝܰܪܘ̱ ܘܰܒܗܶܝܢ ܐܰܝܟ ܕܰܒܓܰܘ ܩܰܝܛܽܘ̈ܢܶܐ ܕܡܰܠܟ̈ܶܐ ܥܡ̣ܰܪܘ̱: ܘܰܐܪܟ̣ܶܢܘ̱ ܠܨܰܘܪ̈ܶܐ ܘܢܰܦ̈ܫܳܬܳܐ ܕܺܝܠܗܽܘܢ ܩܕܳܡܰܝܟ ܘܰܡܦܺܝ̈ܣܳܢܶܐ ܘܡܶܬܚܰܢ̈ܳܢܶܐ ܚܠܳܦ ܢܰܦ̈ܫܳܬܳܐ ܕܰܡܗܰܝ̈ܡܢܶܐ ܗܘܰܘ: ܗܳܢܘܢ̇ ܕܰܒܬܶܫܒ̈ܚܳܬܳܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܐܰܡܺܝܢܳܐܝ̣ܬ ܐܶܬܗܰܓܺܝܘ ܠܰܝ̈ܠܰܝ ܐܺܝܡܳܡ ܘܰܒܪ̈ܽܘܡܪܳܡܶܐ ܚܠܰܝ̈ܳܐ: ܘܰܒܗܽܘ̈ܠܳܠܐܷ ܕܟܰܝ̈ܳܐ ܠܐܱܠܳܗܽܘܬܳܟ ܚܰܓܺܝܘ ܘܰܒܩܰܘ̈ܡܶܐ ܐܺܝܡܳܡܳܝ̈ܶܐ ܘܠܺܠܝ̈ܳܝܶܐ ܚܰܝ̈ܶܐ ܕܺܝܠܗܽܘܢ ܐܰܥܒ̣ܰܪܘ̱ ܘܫܰܢܺܝܘ: ܗܳܢܘܢ̇ ܕܒܺܐܝ̈ܕܰܝܗܽܘܢ ܫܰܟܶܢ̣ܬ ܠܥܳܢ̈ܳܐ ܕܺܝܠܳܟ ܡܠܺܝܠܬܳܐ ܡܰܘܗܰܒܬܳܐ ܪܽܘܚܳܢܳܝܬܳܐ ܗܳܝ ܕܣܺܝܡܰܬ݀ ܒܢܰܝ̈ܳܐ ܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ: ܩܨܳܝܳܐ ܕܶܐܘܟܰܪܺܣܛܺܝܰܐ: ܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ: ܗܳܢܘܢ̇ ܕܰܚܠܳܦܰܝܗܽܘܢ ܚܢܰܢ ܟܺܝܬ ܒܨܺܝܪ̈ܶܐ ܘܫܰܪܟܳܐ ܕܰܡܟܰܗܢ̈ܳܢܶܐ ܕܐ̱ܪ̈ܳܙܶܐ ܕܺܝܠܳܟ: ܡܦܺܝܣܺܝܢܰܢ ܠܳܟ ܕܰܬܩܰܒܶܠ ܐܶܢܽܘܢ ܦܰܐܝܽܘܬ ܟܳܗܢܳܐܝ̣ܬ ܘܝܰܬܺܝܪ ܡܫܰܝܢܳܐܝ̣ܬ: ܘܰܬܣܰܝܰܥ ܐܶܢܽܘܢ ܒܰܨܠܺܝܒܳܟ ܙܰܟܳܝܳܐ ܕܰܥܠܰܝܗܽܘܢ ܪܫܺܝܡ: ܘܦܰܓܪܳܟ ܘܰܕܡܳܟ ܕܰܒܗܰܕ̈ܳܡܶܐ ܕܺܝܠܗܽܘܢ ܛܡܺܝܪ: ܘܰܐܫܘܳܐ ܠܟܽܠܰܢ ܐܰܝܟ ܕܰܦܐܶܐ ܠܕܽܘܒܳܪ̈ܶܐ ܕܺܝܠܗܽܘܢ ܚܣܰܝ̈ܳܐ ܢܫܰܡܠܐܷ ܠܕܽܘܟܪ̈ܳܢܰܝܗܽܘܢ: ܟܰܕ ܡܚܰܘܶܐ ܐܰܢ̱ܬ ܠܰܢ ܬܰܝܳܒ̈ܶܐ ܫܰܪܺܝܪ̈ܶܐ ܩܕܳܡ ܡܰܦܰܩܬܳܢ ܕܡܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ: ܘܰܠܗܽܘܢ ܐܰܫܘܳܐ ܡܳܪܝܳܐ ܠܒܽܘܣܳܡܳܐ ܕܥܰܡܳܟ ܘܰܠܗܰܢܺܝܽܐܘܬܳܐ ܕܡܰܠܟܽܘܬܳܐ ܕܺܝܠܳܟ ܘܰܠܛܳܒ̈ܳܬܳܐ ܕܰܡܠ̈ܝ̣ܟܳܢ ܠܳܟ: ܘܰܠܬܶܫܒܽܘܚܬܳܐ ܕܥܳܒ̇ܕ̈ܰܝ ܨܶܒܝܳܢܳܟ: ܘܰܐܣܡܶܟ ܐܶܢܽܘܢ ܐܰܝܟܰܢܳܐ ܕܟܳܗ̈ܢܶܐ ܩܰܕܺܝ̈ܫܶܐ ܕܺܝܠܳܟ ܡܬܽܘܡܳܐܝ̣ܬ ܡܫܰܒܚܺܝܢ ܘܰܡܪܰܡܪܡܺܝܢ ܠܳܟ ܘܠܐܴ ܡܶܫܬܰܬܩܳܢܳܐܝ̣ܬ ܡܗܰܠܠܺܝܢ: ܐܰܝܟܳܐ ܕܢܰܦ̈ܫܳܬܳܐ ܕܟܺܐܢ̈ܶܐ ܡܕܰܝܪ̈ܳܢ: ܘܪ̈ܽܘܚܳܬܳܐ ܕܙܰܕܺܝ̈ܩܶܐ ܡܩܰܘ̈ܝܳܢ: ܐܰܝܟܳܐ ܕܥܳܩ̈ܳܬܳܐ ܓܠܺܝ̣̈ܙܳܢ: ܘܡܰܘܬܳܐ ܠܐܴ ܡܰܡܠܶܟ ܒܰܐܘܘ̈ܳܢܶܐ ܕܢܽܘܗܪܳܐ ܘܕܰܕܝܳܨܳܐ ܒܰܐܘܨܪ̈ܶܐ ܗܰܢܺܝ̈ܰܐܝ ܚܰܕ̈ܘܳܬܳܐ: ܘܰܒܝܰܘܡܳܐ ܗܰܘ ܕܕܳܢܚܳܐ ܘܡܶܬܓܰܠܝܳܐ ܒܶܗ ܪܰܒܽܘܬܳܟ: ܘܨܳܦܰܚ ܒܶܗ ܘܦܽܘܪܥܳܢܳܐ ܕܟܺܐܢܽܘܬܳܐ ܠܟܽܠ ܒܣܰܪ ܘܬܳܩܢܳܐ ܒܶܗ ܒܺܐܡܰܐ ܕܚܺܝܠܬܳܐ ܕܺܝܠܳܟ ܡܳܪܝܳܐ: ܘܰܩܕܳܡܰܝܟ ܩܳܝܡܺܝܢ ܟܽܠܗܽܘܢ ܝܺܠܺܝ̣̈ܕܰܝ ܐܰܢ̱ܬܬܳܐ ܘܰܐܝܟ ܫܶܡܫܳܐ ܡܰܙ̈ܠܓܳܢ ܟܰܣ̈ܝܳܬܳܐ: ܘܡܶܬܬܙܺܝܥ ܝܰܡܳܐ ܕܓܰܘܙܰܠܬܳܐ ܐܰܝܟܰܢܳܐ ܕܢܶܦܪܽܘܫ ܓܰܒܳܐ ܡܶܢ ܚܰܒܪܶܗ: ܡܳܐ ܕܰܓܡܺܝܪ̈ܶܐ ܓܡܺܝܪܳܐܝ̣ܬ ܚܳܕܶܝܢ: ܘܡܳܪ̈ܽܘܕܶܐ ܢܰܓܺܝܪܳܐܝ̣ܬ ܒܒܶܝܬ ܩܒܽܘܪ̈ܶܐ ܥܳܡܪܺܝܢ: ܐܶܡܰܬܝ ܕܰܠܙܰܕܺܝ̈ܩܶܐ ܟܠܺܝ̈ܠܐܷ ܡܶܬܓܰܕܠܺܝܢ: ܘܰܠܪ̈ܰܫܺܝܥܶܐ ܘܳܝ̈ܶܐ ܡܶܬܝܰܗܒܺܝܢ: ܡܳܐ ܕܡܰܠܟܽܘܬܳܐ ܒܝܳܪ̈ܽܘܬܶܝܗ̇ ܪܳܘܙܳܐ: ܘܓܺܗܰܢܳܐ ܒܰܒ̈ܢܶܝܗ̇ ܡܶܬܦܰܬܚܳܐ ܘܡܶܬܪܰܘܚܳܐ: ܥܰܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ ܕܰܠܥܰܒ̣ܕ̈ܶܐ ܕܺܝܠܳܟ ܡܢܺܝ̣̈ܚܳܢܶܐ ܕܡܳܪܽܘܬܳܟ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܰܥܢ̣ܰܕܘ̱ ܡܶܢܰܢ ܕܠܐܴ ܬܶܫܕܶܐ ܐܶܢܽܘܢ ܠܒܰܪ ܡܶܢ ܚܰܓܶܗ ܕܰܓܢܽܘܢܳܟ: ܘܠܐܴ ܬܶܛܪܽܘܕ ܐܶܢܽܘܢ ܡܶܢ ܒܽܘܣܳܡܳܐ ܕܥܰܡܳܟ: ܘܠܐܴ ܒܰܦܓܽܘ̈ܕܶܐ ܕܢܽܘܪܳܐ ܬܶܒܠܽܘܡ ܠܦܽܘ̈ܡܶܐ ܕܺܝܠܗܽܘܢ: ܐܶܠܐܴ ܐܰܕܢܰܚ ܥܠܰܝܢ ܘܰܥܠܰܝܗܽܘܢ ܢܽܘܗܪܳܐ ܦܰܐܝܳܐ ܕܦܰܪܨܽܘܦܳܟ: ܘܰܐܫܘܳܐ ܠܟܽܠܰܢ ܕܦܰܪܶܗܣܺܝܝܳܐܝ̣ܬ ܘܰܕܠܐܴ ܒܶܗܬܬܳܐ ܢܩܽܘܡ ܩܕܳܡ ܒܺܐܡܰܐ ܕܺܝܠܳܟ ܡܰܠܝܰܬ݀ ܪܬܺܝܬܳܐ: ܘܢܶܫܬܘܶܐ ܠܰܡܫܰܝܢܽܘܬܳܐ ܘܪܶܚܡܰܬ݀ ܐ̱ܢܳܫܽܘܬܳܐ ܘܰܠܡܰܥܰܠܬܳܐ ܗܳܝ ܛܽܘܒܬܳܢܳܝܬܳܐ ܕܠܰܩܕܽܘܫܩܽܘܕ̈ܫܺܝܢ ܕܺܝܠܳܟ ܠܐܴ ܡܶܬܚܰܙܝܳܢܳܐ: ܘܰܒܗܽܘܢ ܢܟܰܗܶܢ ܠܳܟ ܕܶܒܚ̈ܶܐ ܪ̈ܽܘܚܳܢܳܝܶܐ ܡܬܽܘܡܳܐܝ̣ܬ ܘܰܡܫܰܝܢܳܐܝ̣ܬ ܐܳܦ ܢܰܨܺܝܚܳܐܝ̣ܬ: ܘܗܳܪܟܳܐ ܘܰܒܚܰܝ̈ܶܐ ܕܰܥܬܺܝܕܺܝܢ ܢܫܰܡܶܫ ܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܥܶܛܪܳܐ

ܣܥܽܘܪ ܡܳܪܝܳܐ ܒܣܳܥܽܘܪܽܘܬܳܐ ܕܺܝܠܳܟ ܓܡܺܝܪܬܳܐ ܘܰܒܪ̈ܰܚܡܶܐ ܐܽܘܣ̈ܝܳܝܶܐ ܕܺܝܠܳܟ ܘܰܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡܶܢܰܢ ܐܶܬܩܰܪܰܒ ܠܳܟ: ܚܠܳܦ ܟܽܠܗܽܘܢ ܐܰܒܳܗ̈ܳܬܳܐ ܘܰܐܚ̈ܶܐ ܘܪ̈ܰܒܳܢܶܐ ܕܺܝܠܰܢ ܕܰܠܘܳܬܳܟ ܫܰܢܺܝܘ ܡܳܐ ܕܥܰܠ ܟܽܘܪܣܰܝ ܪܰܒܽܘܬܳܟ ܝܳܬܶܒ ܐܰܢ̱ܬ ܘܰܒܬܶܐܘܰܛܪܽܘܢ ܕܡܰܠܐܱܟ̈ܐ ܘܕܰܒܢܰܝ̈ܢܳܫܳܐ ܠܟܽܠ ܐ̱ܢܳܫ ܦܳܪܰܥ ܐܰܢ̱ܬ: ܥܰܡ ܐܶܡܪ̈ܶܐ ܒܢ̈ܰܝ ܝܰܡܺܝܢܳܐ ܢܶܬܛܰܟܣܽܘܢ ܘܠܰܓܢܽܘܢܳܐ ܕܢܽܘܗܪܳܐ ܥܰܡܳܟ ܢܶܥܠܽܘܢ ܘܒܶܗ ܢܶܬܓܰܐܘܽܘܢ ܘܢܶܚܕܽܘܢ: ܘܠܳܟ ܢܫܰܒܚܽܘܢ ܘܰܢܩܰܠܣܽܘܢ ܡܫܺܝܚܳܐ ܐܠܰܗܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀