ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܕܒܺܐܝ̈ܕܰܘܗ̱ܝ ܐܶܢܽܘܢ ܚܰܝܰܝ̈ܢ: ܘܰܒܨܶܒܝܳܢܶܗ ܐܝ̣ܬܰܘܗ̱ܝ ܡܰܘܬܰܢ: ܘܰܒܩܳܠܶܗ ܡܩܺܝܡ ܠܰܢ ܡܶܢ ܩܰܒܪ̈ܰܝܢ: ܘܰܒܦܽܘܩܕܳܢܶܗ ܡܰܗܦܶܟ ܪ̈ܽܘܚܳܬܰܢ ܠܦܰܓܪ̈ܰܝܢ: ܘܰܒܛܰܝܒܽܘܬܶܗ ܘܰܒܪ̈ܰܚܡܰܘܗ̱ܝ ܡܰܘܪܶܬ ܠܰܢ ܦܰܪܕܰܝܣܳܐ ܗܰܘ ܕܡܶܢܶܗ ܐܶܬܛܪܶܕܘ̱ ܐܰܒܳܗܰܝ̈ܢ: ܠܗܰܘ ܚܰܢܳܢܳܐ ܕܒܰܫܦܺܝܥܽܘܬܳܐ ܕܪܶܚܡܬܶܗ ܚܳܢܶܗ ܠܐܴܕܳܡ ܨܰܠܡܶܗ: ܘܦܰܢܝܶܗ ܠܰܥܕܶܝܢ ܝܳܪܬܽܘܬܶܗ: ܕܠܶܗ ܠܗܰܘ ܛܳܒܳܐ ܘܰܡܪܰܚܡܳܢܳܐ ܕܚܳܢܶܗ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܐܶܬܕܰܟܰܪ ܡܳܪܝܳܐ ܡܪܰܚܡܳܢܳܐ ܠܟܽܠܗܽܘܢ ܩܰܕܺܝ̈ܫܶܐ ܕܡܶܢ ܥܳܠܰܡ ܫܦ̣ܰܪܘ̱ ܠܳܟ: ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܥܰܡ ܫܰܦܺܝܪܽܘܬ ܕܶܚܠܬܳܐ ܢܦ̣ܰܩܘ̱ ܘܫܰܢܺܝܘ ܡܶܢ ܥܳܠܡܳܐ ܗܳܢܳܐ ܘܰܠܘܳܬܳܟ ܡܰܢܰܥܘ̱: ܝܺܕܺܝܥܳܐܝ̣ܬ ܕܶܝܢ ܗܳܠܶܝܢ ܕܝܰܘܡܳܢܳܐ ܕܽܘܟܪܳܢܳܐ ܕܺܝܠܗܽܘܢ ܡܫܰܡܠܶܝܢܰܢ: ܩܰܕܡܳܝܰܬ݀ ܕܶܝܢ ܠܰܢܒܺܝ̈ܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ: ܘܠܰܡܣܰܒܪ̈ܳܢܶܐ ܘܰܠܣܳܗ̈ܕܶܐ ܘܡܰܘܕ̈ܝܳܢܶܐ ܘܟܺܐܢ̈ܶܐ ܘܟܳܗ̈ܢܶܐ ܘܰܐܒܳܗ̈ܳܬܳܐ ܩܰܕܺܝ̈ܫܶܐ: ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܘܬܽܘܒ ܕܶܝܢ ܘܥܰܡܗܽܘܢ ܠܐܷܘܰܢܓܶܠܺܝ̈ܣܛܶܐ ܫܰܪܺܝܪ̈ܶܐ ܐܰܪܒܥܳܐ: ܘܡܰܐ̱ܪ̈ܙܳܢܶܐ ܚܰܟܺܝ̈ܡܶܐ: ܘܠܐܱܝܠܶܝܢ ܕܰܒܕܽܘܒܳܪ̈ܶܐ ܢܰܟ̈ܦܶܐ ܘܰܡܣܰܡ̈ܥܠܐܷ ܫܰܠܶܡ̣ܘ̱ ܚܰܝܰܝ̈ܗܽܘܢ: ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܟܰܫܺܝܪ̈ܶܐ: ܘܠܐܱܝܠܶܝܢ ܕܰܒܫܶܢ̈ܳܬܳܐ ܘܰܓܕܳܢ̈ܦܶܐ ܘܥܰܡܗܽܘܢ ܠܐܷܣܛܽܘܢܳܪ̈ܶܐ ܘܥܳܢܘ̈ܳܝܶܐ: ܘܰܠܟܽܠܗܽܘܢ ܐܰܝܠܶܝܢ ܕܰܒܦܶܥܪ̈ܶܐ ܘܰܡܥܰܪ̈ܶܐ ܘܰܒܚܶܦܪ̈ܶܐ ܕܰܐܪܥܳܐ ܨܳܡ̣ܘ̱ ܘܨܰܠܺܝ ܐܳܦ ܐܶܬܢܰܙܰܪܘ̱: ܘܰܒܚܰܝ̈ܶܐ ܫܚܺܝ̣̈ܩܶܐ ܫܰܠ̣ܶܡܘ̱ ܚܰܝܰܝ̈ܗܽܘܢ ܘܥܰܒܪܽܘܗ̱ܝ ܠܥܳܠܡܳܐ ܕܥܳܩ̈ܳܬܳܐ: ܬܽܘܒ ܕܶܝܢ ܥܰܡܗܽܘܢ ܠܩܰܕܺܝܫܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ: ܫܳܘܝܰܬ݀ ܗܝ̣ ܠܛܽܘ̈ܒܶܐ ܘܡܰܠܝܰܬ݀ ܡܶܢ ܩܽܘ̈ܠܳܣܶܐ ܗܳܝ ܕܺܐܝܬܶܝܗ̇ ܡܶܬܟܰܫܦܳܢܺܝܬܳܐ ܘܰܡܦܝ̣ܣܳܢܝ̣ܬܳܐ ܚܠܳܦ ܟܽܠܰܢ: ܠܰܡܫܺܝܚܳܐ ܒܪܳܗ̇ ܘܐܰܠܳܗܳܐ ܕܟܽܠܐܴ ܕܰܒܝܰܘܡܳܐ ܕܚܺܝܠܐܴ ܢܶܥ̇ܒܰܪ ܝܰܡܳܐ ܕܢܽܘܪܳܐ: ܘܢܶܪܕܶܐ ܠܰܠܡܺܐܢܳܐ ܕܚܰܝ̈ܶܐ ܕܠܐܴ ܩܶܢܛܳܐ ܘܰܕܠܐܴ ܒܶܗܬܬܳܐ: ܘܥܰܡܳܗ̇ ܕܶܝܢ ܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܡܶܢ ܐܳܕܳܡ ܘܚܰܘܳܐ ܘܰܥܕܰܡܳܐ ܠܝܰܘܡܳܢܳܐ ܒܽܐܘܪ̈ܚܳܬܳܐ ܬܪ̈ܺܝܨܳܬܳܐ ܗܰܠܶܟܘ̱: ܘܒܰܫܒܺܝ̣̈ܠܐܷ ܕܚܰܝ̈ܶܐ ܪܕܰܘ ܘܰܒܢܳܡܽܘ̈ܣܰܝܟ ܐܶܬܗܰܓܺܝܘ ܐܺܝܡܳܡܳܐ ܘܠܺܠܝܳܐ: ܐܰܢ̱ܬ ܕܶܝܢ ܛܳܒܳܐ ܘܒܰܣܺܝܡܳܐ ܩܰܒܶܠ ܬܰܟܫ̈ܦܳܬܰܢ ܘܰܨܠܰܘ̈ܳܬܰܢ ܕܰܚܠܳܦܰܝܗܽܘܢ ܠܳܟ ܡܩܰܪܒܺܝܢܰܢ ܚܠܳܦ ܢܰܦ̈ܫܳܬܳܐ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܕܡܶܢ ܚܶܫܽܘܟܳܐ ܠܢܽܘܗܪܳܐ ܐܰܦ̣ܶܩ ܐܶܢܽܘܢ ܡܶܢ ܬܚܶܝܬ ܫܽܘܥܒܳܕܶܗ ܕܡܰܘܬܳܐ ܚܰܪܰܪ ܐܶܢܽܘܢ: ܘܡܶܢ ܒܶܝܬ ܐܰܣܺܝܪ̈ܶܐ ܕܰܫܝܽܘܠ ܒܳܠܰܥܬܳܐ ܫܪܺܝ ܘܰܐܦܶܩ ܐܶܢܽܘܢ: ܘܠܐܱܬܪܳܐ ܕܰܡܥܰܠܰܝ ܡܶܢ ܚܰܫ̈ܶܐ ܡܰܢܰܥ ܐܶܢܽܘܢ: ܘܒܰܡܕܺܝܢ̱ܬܳܐ ܥܶܠܳܝܬܳܐ ܕܠܰܝܬ ܒܳܗ̇ ܩܶܢܛܳܐ ܐܰܥܡܰܪ ܐܶܢܽܘܢ: ܘܒܰܐܘܨܪ̈ܶܐ ܕܚܰܕ̈ܘܳܬܳܐ ܚܡܽܘܠ ܐܶܢܽܘܢ: ܘܥܰܠ ܡܰܪ̈ܓܶܐ ܕܥܽܘܫܢܳܐ ܪܥܺܝ ܐܶܢܽܘܢ: ܘܥܰܠ ܡܰܝ̈ܳܐ ܕܰܢܝܳܚܳܐ ܕܰܒܰܪ ܐܶܢܽܘܢ: ܘܰܒܢܽܘܗܪܳܐ ܡܫܰܒܚܳܐ ܕܦܰܪܨܽܘܦܳܟ ܒܰܣܶܡ ܐܶܢܽܘܢ: ܘܒܰܫܪܳܪܳܐ ܕܡܽܘܠܟܳܢܰܝ̈ܟ ܠܰܒܶܒ ܐܶܢܽܘܢ: ܘܰܒܚܰܘܣܳܢܳܐ ܘܰܥܛܳܝܳܐ ܕܡܶܬܥܰܒܪ̈ܳܢܘܳܬܗܽܘܢ ܚܰܕܳܐ ܐܶܢܽܘܢ: ܘܰܒܟܽܠ ܡܰܝܬܳܝܽܘܬ ܦܺܐܪ̈ܶܐ ܕܛܳܒ̈ܳܬܳܐ: ܕܰܚܠܳܦܰܝܗܽܘܢ ܡܶܬܟܰܗܢܺܝܢ ܐܰܪܓܶܫ ܐܶܢܽܘܢ: ܘܰܒܝܰܘܡܳܐ ܗܰܘ ܕܢܽܘܚܳܡܳܐ ܕܫܳܥܬܳܐ ܐ̱ܚܪܳܝܬܳܐ ܕܦܳܣܺܝ̈ܩܳܬܳܐ ܡܶܢ ܩܝܳܡܬܳܐ ܕܕܺܝܢܳܐ ܫܰܘܙܶܒ ܐܶܢܽܘܢ: ܘܠܰܩܝܳܡܬܳܐ ܕܚܰܝ̈ܶܐ ܚܰܕ̈ܬܶܐ ܐܰܫܘܳܐ ܐܶܢܽܘܢ: ܘܠܰܓܢܽܘܢܳܐ ܕܢܽܘܗܪܳܐ ܛܰܝܶܒ ܐܶܢܽܘܢ: ܘܠܰܢ ܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀