ܨܠܽܘܬܳܐ ܕܫܽܘܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܠܶܫܳܢ̈ܶܐ ܫܦܰܝ̈ܳܐ ܘܰܒܩ̈ܳܠܐܷ ܡܰܠܝ̈ܰܝ ܫܽܘܒܚܳܐ ܢܩܰܠܶܣ ܠܝܰܘܡܳܐ ܕܰܩܝܳܡܬܳܟ ܡܫܰܒܰܚܬܳܐ: ܐܰܝܟܰܢܳܐ ܕܥܰܡ ܡܰܪܝܰܡ ܘܚܰܒܪ̈ܳܬܳܗ̇: ܘܥܰܡ ܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ ܘܚܰܒܪ̈ܰܘܗ̱ܝ ܒܟܽܠܙܒܰܢ ܢܶܚܕܶܐ ܘܢܶܪܘܰܙ: ܘܥܰܡ ܟܽܠܗܽܘܢ ܐܰܝܠܶܝܢ ܕܰܫܦܰܪܘ̱ ܠܳܟ ܢܫܰܒܰܚ ܘܢܰܘܕܶܐ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܚܰܕ ܐܰܒܳܐ ܩܰܕܺܝܫܳܐ ܕܡܶܢܶܗ ܪܳܕܝܳܐ ܘܡܶܬܬܰܝܬܝܳܐ ܟܽܠܳܗ̇ ܡܪܰܚܡܳܢܽܘܬܳܐ ܘܩܰܕܺܝܫܽܘܬܳܐ ܟܝܳܢܳܐܝ̣ܬ: ܠܚܰܕ ܒܪܳܐ ܩܰܕܺܝܫܳܐ ܕܚܰܫ ܘܡܺܝܬ ܒܰܒܣܰܪ ܘܳܐܦ ܐܶܬܩܒܰܪ ܘܩܳܡ ܡܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܚܠܳܦ ܓܶܢܣܳܐ ܕܰܒܢܰܝ̈ܢܳܫܳܐ ܨܶܒܝܳܢܳܐܝ̣ܬ: ܠܚܰܕ ܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܘܰܡܫܰܡܠܝܳܢܳܐ ܕܩܰܕܺܝܫܽܘܬܳܐ ܠܩܰܕܺܝ̈ܫܶܐ ܩܰܕܺܝܫܳܐܝ̣ܬ: ܕܠܶܗ ܢܶܫܬܘܶܐ ܟܽܠܰܢ ܕܰܢܩܰܪܶܒ ܠܶܗ ܬܶܫܒ̈ܚܳܬܳܐ ܘܩܽܘ̈ܠܳܣܶܐ ܘܣܶܓܕ̈ܳܬܳܐ ܡܳܪܳܢܳܐܝ̣ܬ ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܚܰܝ̈ܶܐ ܫܰܪܺܝܪ̈ܶܐ ܘܽܐܘܣܝ̈ܳܝܶܐ ܘܪ̈ܰܚܺܝܩܰܝ ܡܶܢ ܡܰܘܬܳܐ: ܗܰܘ ܕܣܰܓܺܝ̈ܳܐܬܳܐ ܪܰܘܪ̈ܒܳܬܳܐ ܐܶܢܶܝ̈ܢ ܓܒܰܪ̈ܘܳܬܳܐ ܘܰܬܡܺܝ̈ܗܳܬܳܐ ܕܺܝܠܳܟ ܕܰܠܘܳܬܰܢ ܐܶܬܥܰܛܰܦܬ ܐܳܕܫܳܢܳܝܽܘܬܳܐ ܕܺܝܠܳܟ ܕܳܐܕܳܡ ܕܬܶܥܒܶܕ ܠܰܢ ܚܽܘܕܳܬܳܐ ܡܫܰܡܠܝܳܐ: ܘܠܰܡܚܺܝܠܽܘܬܶܗ ܕܓܶܢܣܰܢ ܡܳܟܳܐ ܘܬܰܚܽܘܒܳܐ ܘܫܰܦܠܐܴ ܬܚܰܕܬܺܝܘܗ̱ܝ ܒܰܩܝܳܡܬܳܟ ܒܡܶܐܬܺܝܬܳܟ ܘܰܒܝܰܕ ܡܰܚܰܬܬܳܟ ܕܰܠܗܳܕܶܐ ܐܰܪܥܳܐ ܟܽܘܒܳܢܳܝܬܳܐ: ܐܶܬܕܰܪܰܪܬ ܥܰܡ ܡܰܘܬܳܐ ܒܰܩܒܽܘܪܬܳܟ ܬܠܺܝܬܳܝܰܬ݀ ܝܰܘ̈ܡܶܐ ܕܰܙܪܰܥ̣ܬ ܚܽܘܕܳܬܳܐ ܘܣܰܒܪܳܐ ܒܥܳܡܪ̈ܰܝ ܩܰܒܪ̈ܶܐ ܘܰܐܦܨܰܚ̣ܬ ܠܗܳܢܘܢ̇ ܕܒܰܫܒܳܒܽܘܬܶܗ ܕܰܚܒܳܠܐܴ ܝܳܬܒܺܝܢ ܗ̱ܘܰܘ: ܐܶܬܬܥܺܝܪܬ ܐܰܝܟ ܕܰܡܟܳܐ ܡܶܢ ܒܶܝܬ ܡܺܝ̈ܬܶܐ: ܘܚܰܬܶܡܬ ܒܢ̈ܳܬ ܩ̈ܳܠܐܷ ܕܰܥܠܰܝܟ ܐܶܬܡ̈ܰܠܰܠܝ̱: ܐܰܪܥܽܘܟ ܒܰܩܝܳܡܬܳܟ ܚܰܝ̈ܠܰܝ ܪܰܘܡܳܐ ܒܗܽܘܠܳܠܰܝ̈ܗܽܘܢ ܘܚܰܕܪܽܘܗ̱ܝ ܠܩܰܒܪܳܟ ܒܩ̈ܳܠܐܷ ܕܚܰܕ̈ܘܳܬܳܐ: ܕܳܨܘ̱ ܡܰܠܐܱܟ̈ܶܐ ܥܛܺܝ̣̈ܦܰܝ ܢܽܘܗܪܳܐ ܘܰܟܪ̈ܺܝܟܰܝ ܓܰܘܙܰܠܬܳܐ: ܝܰܒܶܠܘ̱ ܣܒܰܪܬܳܟ ܕܢܽܘܚܳܡܳܐ ܕܰܩܝܳܡܬܳܟ ܠܢ̈ܶܫܶܐ ܢܰܟ̈ܦܳܬܳܐ: ܙܳܚ̈ܝ̱ ܠܶܓܝܽܘ̈ܢܶܐ ܡܢܰܒܪ̈ܫܳܬܳܐ ܘܰܫܓܺܝܪ̈ܳܬܳܐ ܕܓܰܘܙܰܠܬܳܐ ܘܝܰܒܶܒܘ̱ ܩܽܘܕ̈ܳܫܶܐ ܥܛܺܝ̈ܦܰܝ ܒܰܪ̈ܩܶܐ ܢܰܨܺܝ̈ܚܶܐ ܕܰܦܨܺܝܚܽܘܬܳܐ ܘܢܰܨܰܪ̈ܝ̱ ܢܽܘܚܳܡܳܟ ܕܡܶܢ ܩܰܒܪܳܐ: ܢܚܶܬܘ̱ ܠܓܰܢܬܳܐ ܝܰܘܣܶܦܳܝܬܳܐ ܛܶܟܣܺܝ̈ܣ ܪ̈ܳܬܚܳܬ݀ ܒܢܽܘܪܳܐ ܐܳܟܶܠܬܳܐ ܘܡܰܘܩܕܳܢܺܝܬܳܐ ܘܶܐܬܬܙܺܝܥܘ̱ ܘܥܰܓܶܠܘ̱ ܟܺܐܦܳܐ ܕܥܰܠ ܬܰܪܥܶܗ ܕܩܰܒܪܳܟ ܡܰܥܒܶܕ ܚܰܝ̈ܶܐ: ܘܫܽܘܪܳܪ ܢܽܘܚܳܡܳܟ ܡܒܰܕܩܺܝܢ ܗ̱ܘܰܘ ܠܣܺܝܣܰܪܬܳܐ ܘܚܽܘܓܬܳܐ ܟܽܠܳܗ̇ ܕܰܥܠܰܝܟ ܐܰܒܺܝܠܐܴ ܗ̱ܘܳܬ݀: ܫܩܰܠܘ̱ ܣܒܰܪܬܳܐ ܕܚܰܕܽܘܬܳܐ ܒܦܽܘ̈ܡܶܐ ܟܺܝܬ ܘܰܒܡܰܫܡܰܥܬܳܐ ܕܡܰܐܪ̈ܙܳܢܰܝܟ ܘܩܳܠ ܪܒܳܒܬܳܐ ܬܗܺܝܪܬܳܐ ܒܣܶܦܘ̈ܳܬܳܐ ܕܰܐܪ̈ܥܳܢܳܝܶܐ ܒܰܣܒܺܝܣܽܘܬ ܣܽܘܟܳܠܐܴ ܡܶܫܬܰܡܥܳܐ ܗ̱ܘܳܬ݀: ܘܙܳܥܩ̈ܳܬܳܐ ܕܠܶܓܝܽܘ̈ܢܶܐ ܗܕܺܝܪ̈ܳܬܳܐ ܒܰܐܬܪܳܐ ܕܪܰܚܺܝܩ ܡܶܢ ܪܓܶܫܬܳܐ: ܘܥܰܬܺܝܪ ܒܫܶܠܝܳܐ ܘܰܒܫܶܬܩܳܐ ܡܶܫܬܰܡ̈ܥܳܢ ܚܰܕ̈ܬܳܬܳܐ ܘܟܽܠ ܩܳܠܺܝ̈ܢ: ܬܶܫܒ̈ܚܳܬܳܐ ܒܟܽܠ ܦܽܘܡܺܝ̈ܢ ܘܬܰܘܕ̈ܝܳܬܳܐ ܒܟܽܠ ܠܶܫܳܢܺܝ̈ܢ: ܒܰܚܕܳܐ ܩܥܳܬܳܐ ܠܡܺܝܬܳܐ ܕܰܒܡܰܘܬܶܗ ܚܰܠܨܳܗ̇ ܠܰܫܝܽܘܠ: ܘܰܥܩܰܪ ܐܶܢܽܘܢ ܠܓܰܙܶܝ̈ܗ̇ ܘܰܐܚܪܶܒ ܠܙܳܘ̈ܝܳܬܳܗ̇ ܟܰܗܺܝ̈ܢܳܬܳܗ̇: ܝܰܘܡܳܢܳܐ ܡܰܗܶܠ ܢܒܺܝܳܐ ܒܰܫܝܽܘܠ ܘܰܒܡܰܘܬܳܐ ܘܳܐܡܰܪ: ܕܰܐܝܟܰܐ ܗ̱ܘ ܥܽܘܩܣܳܟ ܡܰܘܬܳܐ ܝܰܥܢܳܐ: ܘܰܐܝܟܳܐ ܗ̱ܝ ܙܳܟܽܘܬܶܟܝ̱ ܫܝܽܘܠ ܕܳܘܺܝܬܳܐ: ܝܰܘܡܳܢܳܐ ܬܰܘܕܶܐ ܥܺܕܬܳܐ ܒܰܪ̱ܬ ܐܰܪ̈ܡܳܝܶܐ: ܘܥܰܠ ܛܽܘܪ̈ܶܐ ܪ̈ܳܡܶܐ ܬܶܣܰܩܝ̱ ܘܬܶܬܩܰܢܝ̱: ܝܰܘܡܳܢܳܐ ܢܕܽܘ̈ܨܳܢ ܥܠܰܝ̈ܡܳܬܳܐ ܘܥܰܡ ܡܰܪܝܰܡ ܢܒܺܝܬܳܐ ܒܰܦܠܰܓܰܝ̈ܗܶܝܢ ܢܶܥܢ̈ܝܳܢ ܠܐܻܝܠ ܓܰܢ̱ܒܳܪܳܐ ܕܩܳܡ ܡܶܢ ܩܰܒܪܳܐ ܒܚܰܝܠܶܗ ܥܰܙܺܝܙܳܐ: ܝܰܘܡܳܢܳܐ ܬܶܓܠܐܷ ܪܺܝܫܳܗ̇ ܢܒܺܝܽܘܬܳܐ ܘܥܰܡ ܕܰܘܺܝܕ ܢܒܺܝܳܐ ܬܝܰܒܶܒܝ̱ ܠܡܳܪܝܳܐ ܕܰܦܪܰܩܬܳܗ̇ ܝܰܡܺܝܢܶܗ ܘܣܰܡܟܳܗ̇ ܕܪܳܥܶܗ ܥܰܫܺܝܢܳܐ ܘܚܰܝܠܬܳܢܳܐ: ܝܰܘܡܳܢܳܐ ܒܬܶܫܒ̈ܚܳܬܳܐ ܠܓܰܢܰܬ݀ ܓܰܘ̈ܙܶܐ ܢܶܚܽܘܬ ܘܢܶܚܕܶܐ ܒܶܐܒܳܐ ܕܢܰܚ̈ܠܐܷ: ܘܢܶܚܙܶܐ ܐܶܢ ܐܰܦܪܥܰܬ݀ ܬܺܬܳܐ: ܘܶܐܢ ܦܩܰܚ ܘܪܕܳܐ: ܘܶܐܢ ܒܠܰܨ ܪܽܘܡܳܢܳܐ: ܘܶܐܢ ܣܡܳܕܪܳܐ ܝܰܗܒ ܪܺܝܚܳܐ: ܝܰܘܡܳܢܳܐ ܪܶܗܛܳܐ ܪܗܺܝܒܳܐ ܢܶܠܒܽܘܟ: ܘܰܠܟܰܪܡܳܐ ܡܶܬܝܰܕܥܳܢܳܐ ܕܥܝ̣ܢܓܳܕ ܢܶܥܘ̣ܠ: ܘܢܶܠܽܘܥ ܚܰܝ̈ܶܐ ܡܶܢ ܣܓܽܘܠ ܟܽܘܦܪܳܐ: ܘܰܢܒܰܣܶܡ ܠܣܰܘ̈ܩܰܝܢ ܒܫܽܘܫܰܢܰܬ݀ ܫܰܪ̈ܘܰܝܢܶܐ ܐܳܦ ܒܫܽܘܫܰܢܰܬ݀ ܥܽܘܡܩܳܐ: ܘܡܶܢ ܡܽܘܪܽܘܢ ܡܣܰܦܩܳܐ ܘܡܶܢ ܐܶܣܛܰܩܛܳܐ ܡܥܰܠܝܳܐ: ܝܰܘܡܳܢܳܐ ܒܫܰܦܪܳܐ ܢܩܰܕܶܡ ܠܚܰܩܠܐܴ ܘܢܶܩܛܽܘܦ ܠܦܺܐܪܳܐ ܕܚܰܝ̈ܶܐ: ܘܰܢܣܰܒܰܥ ܟܰܦܢܽܘܬܳܐ ܡܰܪܺܝܪܬܳܐ ܗܳܝ ܕܒܰܩܛܳܦ ܦܺܐܪܳܐ ܩܰܕܡܳܝܳܐ ܐܶܬܦܰܫܛܰܬ݀ ܥܠܰܝܢ: ܝܰܘܡܳܢܳܐ ܢܰܦܪܶܓ ܒܚܰܓܳܐ ܘܰܢܝܰܒܶܒ ܒܬܶܫܒܽܘܚܬܳܐ: ܒܰܠܒܽܘ̈ܫܶܐ ܚܰܕ̈ܬܶܐ ܘܫܰܦܺܝܪ̈ܰܝ ܡܰܒܪܩܽܘܬܳܐ ܕܰܡܒܰܣܡܺܝܢ: ܘܟܽܘܪܟܡܳܐ ܘܩܰܢܝܳܐ: ܝܰܘܡܳܢܳܐ ܢܶܓܠܽܘܦ ܩܺܝ̈ܢܳܬܰܢ ܘܰܢܩܰܢܩܶܢ ܒܩܳܠܰܝ̈ܢ ܘܰܒܓܰܓܪ̈ܳܬܰܢ ܢܶܓܥܶܐ ܘܠܐܴ ܢܶܚܽܘܣ ܘܢܶܩܥܶܐ ܒܫܺܝܦܽܘܪ̈ܰܝܢ ܘܠܐܴ ܢܶܫܠܐܷ: ܘܢܰܟܪܶܙ ܫܰܝܢܳܐ ܘܰܫܠܳܡܳܐ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ: ܘܥܰܡ ܝܰܗ̈ܠܐܷ ܟܪ̈ܽܘܒܳܝܳܬܳܐ ܢܺܐܡܰܪ: ܒܪܺܝܟ ܗ̱ܘ̣ ܐܺܝܩܳܪܳܟ ܡܶܢ ܐܰܬܪܳܟ ܡܰܠܟܳܐ ܕܰܠܥܳܠܡܺܝܢ: ܝܰܘܡܰܐ ܗ̱ܘ ܕܰܦܨܺܝܚܽܘܬܳܐ ܘܰܕܪ̈ܶܦܣܶܐ: ܝܰܘܡܰܐ ܗ̱̇ܘ ܕܚܰܕܽܘܬܳܐ ܘܕܰܪܘܳܙܳܐ: ܝܰܘܡܰܐ ܗ̱̇ܘ ܕܬܳܪܶܨ ܡܰܦܽܘܠܬܰܢ: ܝܰܘܡܰܐ ܗ̱̇ܘ ܕܰܡܩܺܝܡ ܕܰܡܟܽܘܬܰܢ ܘܰܡܛܰܠܐܷ ܥܰܬܺܝܩܽܘܬܰܢ: ܘܡܶܟܺܝܠ ܕܰܒܗܳܢܳܐ ܝܰܘܡܳܢܳܐ ܐܶܬܚܰܕܰܬܢܰܢ ܢܶܫܰܐܠ ܚܢܺܝܓܳܐܝ̣ܬ ܘܢܶܒܥܶܐ ܫܰܝܢܳܐ ܐܰܡܺܝܢܳܐ ܘܰܚܘܺܝܚܳܐ ܘܚܽܘܒܳܐ ܠܐܴ ܡܶܬܦܰܣܩܳܢܳܐ: ܘܟܰܕ ܠܚܰܝ̈ܶܐ ܥܰܬܺܝܪ̈ܰܝ ܒܰܩܝܳܡܬܳܟ ܡܰܠܝܰܬ݀ ܬܶܗܪܳܐ: ܒܝܰܘ̈ܡܳܬܳܐ ܕܟܰܝ̈ܳܐ ܡܰܨܡܰܚ ܐܰܢ̱ܬ ܘܰܒܡܰܘܬܳܐ ܗܰܘ ܕܰܐܡܠ̣ܶܟ ܥܠܰܝܢ ܡܰܗܶܠ ܐܰܢ̱ܬ: ܬܶܕܡܪ̈ܳܬܳܟ ܘܰܓܒܰܪ̈ܘܳܬܳܟ ܢܶܬܚܰܙ̈ܝܳܢ ܒܰܛܡܺܝܪ̈ܰܝ ܕܰܚܺܝܚܳܐ: ܘܒܽܐܘܪܳܥܳܐ ܗܰܘ ܬܪܰܝܳܢܳܐ ܢܩܰܒܠܳܟ: ܘܫܽܘܒܚܳܐ ܕܢܽܘܟܪܳܝ ܡܶܢ ܗܽܘ̈ܠܐܷ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀