ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܚܰܕܬܳܢܳܐ ܕܥܳܠܡ̈ܶܐ: ܕܒܽܐܘܪܚܳܐ ܚܰܕܬܳܐ ܐܶܬܳܐ ܠܰܒܪܺܝܬܳܐ: ܕܰܢܚܰܕܶܬ ܠܰܓܒܺܝܠܬܶܗ ܕܰܐܥܬܩܰܬ݀ ܒܛܳܥܝܽܘܬܳܐ ܕܰܚܛܺܝܬܳܐ: ܠܗܰܘ ܡܰܢܗܪܳܢܳܐ ܕܟܽܠ ܢܽܘܗܪܳܐ: ܕܢܽܘܗܪܳܐ ܚܰܕܬܳܐ ܡܶܬܝܰܕܥܳܢܳܐ ܡܠܳܐ ܠܬܺܒܶܝܠ ܒܰܩܝܳܡܬܶܗ ܡܫܰܒܰܚܬܳܐ: ܘܚܰܕܽܘܬܳܐ ܚܕܰܬܳܐ ܫܰܟܶܢ ܠܥܳܡܰܪܬܳܐ ܒܢܽܘܚܳܡܶܗ: ܠܗܰܘ ܕܽܘܡܳܪܳܐ ܬܗܺܝܪܳܐ: ܕܬܶܕܡܽܘܪܬܳܐ ܚܕܰܬܳܐ ܥܒܰܕ ܒܡܰܥܰܠܬܶܗ ܕܰܠܥܶܠܺܝܬܳܐ: ܘܰܦܨܺܝܚܽܘܬܳܐ ܚܕܰܬܳܐ ܐܰܩܢܺܝ ܠܠܶܒܳܐ ܕܰܫܠܺܝܚܽܘܬܳܐ: ܠܗܰܘ ܦܳܪܽܘܩܳܐ ܕܟܽܠ: ܕܚܰܘܺܝ ܦܽܘܪܩܳܢܳܐ ܚܰܕܬܳܐ ܠܟܶܢܫܳܐ ܕܬܰܠܡܺܝ̈ܕܰܘܗ̱ܝ: ܘܰܠܥܺܝܢ ܥܰܡ̱̈ܡܶܐ ܓܠܳܐ ܒܝܰܕ ܟܳܪ̈ܽܘܙܰܘܗ̱ܝ ܙܰܕܺܝܩܽܘܬܶܗ ܡܥܰܠܰܝܬܳܐ: ܘܗܳܐ ܡܶܢ ܣܰܘ̈ܦܶܐ ܠܣܰܘ̈ܦܶܝܗ̇ ܕܰܐܪܥܳܐ: ܬܶܫܒ̈ܚܳܬܳܐ ܚܰܕ̈ܬܳܬܳܐ ܡܶܬܩܰܪ̈ܒܳܢ ܠܶܗ ܒܗܰܝܡܳܢܽܘܬܳܐ ܘܬܰܘܕ̈ܝܳܬܳܐ ܦܰܐܝ̈ܳܬܳܐ ܡܶܙܕܰܡܪ̈ܳܢ ܠܶܗ ܒܰܦܨܺܝܚܽܘܬܳܐ: ܘܣܶܓ̈ܕܳܬܳܐ ܪ̈ܟܺܝܢܳܬܳܐ ܡܶܬܟܰܦ̈ܦܳܢ ܠܶܗ ܒܰܓܗ̈ܳܢܳܬܳܐ ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ: ܗܰܘ ܕܚܰܕܶܬܬ ܒܝܰܕ ܪ̈ܰܚܡܰܝܟ: ܠܥܰܬܺܝܩܽܘܬ ܥܳܠܡܳܐ ܕܰܐܫܶܚܬ ܒܛܳܥܝܽܘܬ ܚܛܺܝܬܳܐ: ܒܝܰܕ ܡܰܘܬܳܐ ܕܒܰܒܣܰܪ ܘܚܽܘܕܳܬܳܐ ܕܰܩܝܳܡܬܳܟ ܡܫܰܒܰܚܬܳܐ: ܡܶܢܕܪܺܝܫ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ: ܒܓܰܘ ܥܶܠܺܝܬܳܐ ܐܰܚܺܝܕܰܬ݀ ܬܰܪ̈ܥܶܐ ܟܰܕ ܠܳܗ̇ ܥܰܠ̣ܬ: ܠܰܘ ܪܽܘܚܳܐ ܗܰܓܳܓܳܝܳܐ ܕܰܫܪܰܓ݂ܪܳܓ݂ܪܳܝܳܐ: ܐܶܠܐܴ ܟܰܕ ܒܒܶܣܪܳܐ ܘܓܰܪ̈ܡܶܐ ܘܦܰܓܪܳܐ ܕܠܐܴ ܚܙܳܐ ܚܒܳܠܐܴ ܕܺܐܝܬ ܠܳܟ: ܡܰܐܠܽܘܢ ܕܶܝܢ ܐܰܠܳܗܳܐ ܕܰܡܒܰܣܰܪ ܐܶܬܢܰܚܰܡܬ: ܫܽܘܘܕܳܥܳܐ ܕܠܶܗ ܟܰܕ ܠܶܗ ܠܦܰܓܪܳܐ ܕܰܟܝܳܢܰܢ ܒܢܽܘܚܳܡܳܐ ܠܐܴ ܡܶܬܚܰܒܠܳܢܳܐ ܡܶܬܥܰܛܦܺܝܢܰܢ: ܘܫܰܪܰܪܬ ܐܶܢܽܘܢ ܒܗܰܝܡܳܢܽܘܬܳܐ ܕܒܳܟ: ܒܚܽܘܘܳܝ ܨܶܨ̈ܶܐ ܕܒܺܐܝ̈ܕܰܝܟ ܐܶܣܬܰܟܰܟ̈ܝ̱ ܘܰܬܪܳܥ ܕܰܦܢܳܟ ܗܳܝ ܕܰܐܪܕܝܰܬ݀ ܠܰܢ ܡܥܺܝܢܳܐ ܕܚܰܝ̈ܶܐ ܘܠܐܴ ܡܳܝܽܘܬܽܘܬܳܐ ܘܟܰܕ ܒܚܰܕܬܘ̣ܬ ܪܽܘܚܳܐ ܢܗܰܠܟܽܘܢ ܐܰܘܟܺܝܬ ܢܰܠܦܽܘܢ: ܠܰܒܢܰܝ̈ܢܳܫܳܐ ܕܒܳܟ ܢܶܫܕܽܘܢ ܘܰܢܕܽܘܫܽܘܢ ܠܟܽܠܳܗ̇ ܥܰܡܽܘܛܽܘܬܳܐ ܗܽܘܠܳܢܳܝܬܳܐ: ܘܡܶܢ ܗܳܪܟܳܐ ܒܢܰܩܺܝܦܽܘܬܳܐ ܠܚܰܣܺܝܪܽܘܬ ܗܰܝܡܳܢܽܘܬܳܐ ܕܬܽܐܘܡܰܐ ܫܠܺܝܚܳܐ ܕܶܐܬܦܰܠܰܓ ܐܰܣܺܝܬ: ܐܰܘܟܺܝܬ ܬܰܘܕܺܝܬܳܐ ܚܰܬܺܝܬܬܳܐ ܐܰܠܶܦ ܠܰܢ: ܕܡܳܪܝܳܐ ܐܰܠܳܗܳܐ ܐܝ̣ܬܘܗ̱ܝ ܕܚܰܫ ܘܡܺܝܬ ܚܠܳܦܰܝܢ ܨܶܒܝܳܢܳܐܝ̣ܬ ܕܓܰܫܳܟ ܐܰܝܟ ܓܫܺܝܡܳܐ: ܘܶܐܫܬܰܘܕܥܳܟ ܐܰܝܟ ܠܐܴ ܓܫܺܝܡܳܐ: ܒܝܰܕ ܕܚܰܕ ܒܰܠܚܽܘܕ ܡܶܬܺܝܕܰܥ ܐܰܢ̱ܬ: ܘܗ̣ܽܘ ܟܰܕ ܗ̣ܽܘ ܡܶܢ ܒܳܬܰܪ ܚܕܳܝܽܘܬܳܐ ܐܰܠܳܗܽܘܬܳܐ ܡܪܰܝܰܡܬܳܐ: ܘܐ̱ܢܳܫܽܘܬܳܐ ܕܟܺܝܬܳܐ ܘܰܡܕܰܒܪܳܢܳܐܝ̣ܬ ܐܶܟܰܠ̣ܬ ܥܰܡܗܽܘܢ ܘܶܐܫܬܺܝܬ ܠܥܺܢܰܝ̈ܗܽܘܢ: ܕܰܬܚܰܘܶܐ ܕܗܰܘ ܕܚܰܫ ܘܡܺܝܬ ܗܽܘܝܽܘ ܕܩܳܡ ܘܶܐܬܢܰܚܰܡ: ܐܰܝܟ ܕܶܐܫܬܰܘܕܺܝܬ ܕܒܳܬܰܪ ܩܝܳܡܬܳܐ ܥܰܡ ܓܽܘܕܳܐ ܪܚܺܝܡܬܳܐ ܕܬܰܠܡܺܝ̈ܕܰܝܟ ܬܶܫܬܶܐ ܠܝܰܠܕܳܐ ܕܰܓܦܶܬܳܐ ܚܰܕܬܳܐܝ̣ܬ ܒܡܰܠܟܽܘܬܳܟ ܥܺܕܬܳܐ ܩܰܕܺܝܫܬܳܐ: ܟܰܕ ܠܰܘ ܦܰܓܪܳܐ ܚܳܫܽܘܫܳܐ ܐܝ̣ܬ ܠܳܟ: ܘܠܐܴ ܡܶܬܚܰܒܠܳܢܳܐ: ܡܶܟܺܝܠ ܐܳܦܠܐܴ ܡܶܫܬܰܓܢܝܳܢܳܐ ܘܶܐܬܬܢܺܝܚܬ ܘܰܐܢܺܝܚܬ ܒܝܰܘܡܳܐ ܫܒܺܝܥܳܝܳܐ ܠܟܽܠܗܽܘܢ ܫܟܺܝ̈ܒܶܐ: ܢܝܳܚܬܳܐ ܪܽܘܚܳܢܳܝܬܳܐ ܕܠܐܴ ܣܳܟ ܡܶܫܬܰܪܝܳܐ ܕܒܳܗ̇ ܐܳܦ ܥܬܺܝܕ ܕܢܶܗܘܶܐ ܫܽܘܒܳܬܳܐ ܠܛܳܒ̈ܶܐ ܘܒܺܝ̈ܫܶܐ ܟܰܕ ܫܳܩܠܐܴ ܣܳܟܳܐ ܫܒܺܝܥܳܝܽܘܬܳܐ ܕܥܳܠܡܳܐ ܗܳܢܳܐ: ܕܠܰܬܡܺܝܢܳܝܽܘܬܳܐ ܕܝܰܘܡܳܐ ܗܰܘ ܚܰܕܬܳܐ: ܘܚܰܕ ܐܺܝܡܳܡܳܐ ܩܰܕܡܳܝܳܐ ܘܰܐ̱ܚܪܳܝܳܐ ܕܠܐܴ ܠܶܠܝܳܐ ܗܳܘܶܐ: ܕܪܰܡܫܳܐ ܘܨܰܦܪܳܐ ܐܳܦ ܦܳܢܝܳܐ ܠܐܴ ܡܰܥܒܶܕ ܠܶܗ: ܕܒܶܗ ܬܶܢܝܳܢܽܘܬ ܬܶܕܢܰܚ ܡܶܢ ܫܡܰܝܳܐ: ܘܠܐܷܣܟܺܡܳܐ ܒܰܠܚܽܘܕ ܕܰܒܪܺܝܬܳܐ ܗܽܘܠܳܢܳܝܬܳܐ ܬܰܥܒܰܪ: ܘܠܰܘ ܠܐܘ̣ܣܺܝܰܐ ܕܺܝܠܳܗ̇: ܘܚܽܘܕܳܬܳܐ ܕܠܐܴ ܣܳܐܶܒ ܓܡܺܝܪܳܐܝ̣ܬ ܠܟܽܠ ܗܰܘܢܳܐ ܠܳܐ ܡܶܬܚܰܙܝܳܢܳܐ ܘܠܐܴ ܡܶܬܚܰܒܠܳܢܳܐ ܬܶܥܒܶܕ: ܒܝܰܕ ܕܗܰܘܢܳܐ ܗܰܘ ܒܺܝܫܳܐ ܐܳܒܶܕ: ܗ̣ܘܰܝܬ ܒܰܡܨܰܥܬܳܗ̇ ܕܡܶܬܥܰܡܪܳܢܺܝܬܳܐ ܒܠܶܒܳܗ̇ ܕܰܐܪܥܳܐ ܬܠܳܬܳܐ ܝܰܘ̈ܡܺܝܢ: ܘܰܦܫܰܛܬ ܠܒܰܪܢܳܫܳܐ ܕܶܐܙܕܩܶܬ(ܐܶܬܕܩܰܪ ܒܙܶܩܬܳܐ) ܒܛܳܥܝܽܘܬܳܐ ܠܘܳܬ ܪܰܒܽܘܬܳܐ: ܘܰܒܚܰܫܳܟ ܐܰܚܶܫܬ ܠܚܰܫܰܝ̈ܢ ܘܰܐܚܺܝܬ ܠܰܢ: ܘܰܒܡܰܘܬܳܟ ܡܰܘܬܶܗ ܕܡܰܘܬܳܢ ܗ̱ܘܳܐ ܘܢܰܚܶܡܬ ܠܰܢ: ܘܡܶܛܽܠ ܗܳܠܶܝܢ ܘܕܰܐܝܟ ܗܳܠܶܝܢ ܡܶܬܟܰܫܦܺܝܢܰܢ ܠܳܟ ܐܳܘ ܛܳܒܳܐ ܚܰܝܳܐ ܕܡܺܝܬ ܘܰܚܝܳܐ ܒܚܰܝ̈ܶܐ ܐ̱ܢܳܫܳܝ̈ܶܐ: ܟܰܕ ܒܚܰܝ̈ܶܐ ܐܝ̣ܬܝ̈ܳܝܶܐ ܚܰܝܰܐ ܗ̱ܘ ܕܠܐܴ ܡܳܐܶܬ: ܕܰܒܝܰܘܡܳܐ ܗܰܘ ܩܰܕܡܳܝܳܐ ܘܰܐ̱ܚܪܳܝܳܐ ܕܒܶܗ ܚܽܘܕܳܬܳܐ ܡܒܰܛܠܳܢܳܐ ܕܰܚܛܺܝܬܳܐ ܐܳܒܶܕ ܠܥܳܠܡܺܝܢ: ܕܬܰܫܘܶܐ ܠܰܢ ܠܚܽܘܕܳܬܳܐ ܕܗܰܘ ܛܽܘܒܬܳܢܳܐ ܕܩܰܕܺܝ̈ܫܶܐ: ܘܰܕܫܳܘܶܐ ܠܰܣܡܳܟܳܐ ܗܰܘ ܚܰܕܬܳܐ ܕܪ̈ܽܘܚܳܢܶܐ: ܘܰܒܝܰܕ ܒܛܺܝܠܽܘܬܳܐ ܕܛܰܝܒܽܘܬܳܟ ܕܰܥܠܰܝܢ ܬܶܬܶܠ ܠܰܢ ܡܶܢ ܬܢܳܢ ܪܰܗܒܽܘܢܳܐ ܪܽܘܚܳܢܳܝܳܐ ܠܗܳܠܶܝܢ ܕܬܰܡܳܢ: ܘܢܶܬܚܰܕܰܬ ܒܕܽܘܒܳܪ̈ܶܐ ܕܰܡܫܰܠܚܺܝܢ ܠܥܰܬܺܝܩܳܐ: ܘܰܐܥܛܶܦ ܠܰܢ ܠܗܰܘ ܚܰܕܬܳܐ ܘܡܰܦܪܓܳܐ ܕܡܶܬܚܰܕܰܬ ܒܺܝܕܰܥܬܳܐ ܕܒܳܪܘ̣ܝܶܗ: ܕܰܒܚܰܕܽܘܬܳܐ ܕܪܽܘܚܳܐ ܩܕܳܡܰܝܟ ܢܗܰܠܶܟ ܘܠܳܐ ܗ̱ܘܳܐ ܒܣܰܝܒܽܘܬܳܐ ܐܰܘܟܺܝܬ ܒܥܰܬܺܝܩܽܘܬܳܐ ܕܰܟܬܳܒܳܐ ܘܚܰܝ̈ܶܐ ܠܐܴ ܚܳܫܽܘ̈ܫܶܐ ܒܰܙܢܰܝ̈ܳܐ ܕܰܡܝܰܬܪܽܘܬܳܐ ܫܰܟܶܢ ܠܰܢ ܐܰܝܟܰܢܳܐ ܕܢܶܬܚܙܶܐ ܠܘܳܬܳܟ ܣܰܚܺܝ̈ܚܶܐ: ܘܰܨܠܺܝ̈ܠܐܷ ܘܰܪ̈ܓܺܝܓܶܐ: ܐܰܝܟ ܕܳܐܕܳܡ ܩܕܳܡ ܥܒܳܪ ܦܽܘܩܕܳܢܳܐ: ܒܝܰܕ ܡܰܥܒܕܳܢܽܘܬܳܐ ܕܚܰܝ̈ܶܐ ܕܠܐܴ ܡܳܝܽܘܬܽܘܬܳܐ: ܕܡܶܢܳܟ ܢܳܣܒܺܝܢ ܓܒܰܝ̈ܳܐ ܒܰܢܝܳܚ̈ܳܬܳܐ ܕܢܰܦ̈ܫܳܬܳܐ ܡܗܰܝܡ̈ܢܳܬܳܐ ܕܰܐܚܶܒ̈ܝ̱ ܠܫܽܘܢܳܝܳܐ ܕܡܶܢ ܗܳܪܟܳܐ: ܒܝܰܕ ܕܶܐܬܪܰܓܪ̈ܰܓܝ̱ ܕܥܰܡܳܟ ܘܰܠܘܳܬܳܟ ܢܶܗܘ̈ܝܳܢ: ܘܢܶܫܬܘܶܐ ܕܰܢܩܽܘܡ ܚܰܕܬܳܐܝ̣ܬ ܥܰܡ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܩܰܕܶܡܘ̱ ܚܰܫܘ̱ ܫܪܳܝܳܐ ܕܦܰܓܪ̈ܶܐ: ܘܰܒܓܽܘܕܰܝ̈ܗܽܘܢ ܕܠܐܴ ܫܶܠܝܳܐ: ܢܰܣܶܩ ܠܳܟ ܬܶܫܒܽܘܚܬܳܐ ܚܕܰܬܳܐ: ܕܰܒܝܰܘܡܳܐ ܗܰܘ ܚܰܕܬܳܐ ܕܒܶܗ ܡܚܰܕܶܬ ܐܰܢ̱ܬ ܐܰܦܶܝ̈ܗ̇ ܕܰܐܪܥܳܐ: ܘܒܺܐܝ̈ܕܰܝܟ ܘܥܰܡܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀