ܨܠܽܘܬܳܐ ܕܫܽܘܪܳܝܳܐ

ܐܰܢܗܰܪ ܡܳܪܝ̱ ܠܥܰܝ̈ܢܶܐ ܕܝ̣ܠܰܢ ܒܙܰܠܓ̈ܶܐ ܛܽܘܒܬܳܢ̈ܶܐ ܡܰܠܝ̈ܰܝ ܢܽܘܗܪܳܐ: ܘܚܰܕܳܐ ܠܰܢ ܒܝܰܘܡܳܐ ܕܰܩܝܳܡܬܳܟ ܕܡܶܢ ܒܶܝܬ ܡܺܝ̈ܬܶܐ ܘܰܐܦܨܰܚ ܠܰܢ ܒܕܶܢܚܳܐ ܕܡܳܪܽܘܬܳܟ ܘܥܰܕܰܪ ܠܰܢ ܒܥܽܘܕܪܳܢܳܐ ܕܛܰܝܒܽܘܬܳܟ: ܡܫܺܝܚܳܐ ܣܰܒܪܐ ܕܚܰܝܰܝ̈ܢ ܘܦܳܪܽܘܩܳܐ ܕܢܰܦ̈ܫܳܬܰܢ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܡܳܪܳܐ ܡܪܰܚܡܳܢܳܐ ܕܰܢܚܶܬ ܘܶܐܬܒܰܣܰܪ ܒܛܰܝܒܽܘܬܶܗ: ܘܰܛܥܶܡ ܡܰܘܬܳܐ ܚܠܳܦ ܡܳܝܽܘ̈ܬܶܐ ܒܨܶܒܝܳܢܶܗ ܘܰܢܚܶܬ ܓܳܫ ܬܗܽܘ̈ܡܶܐ ܬܰܚܬܳܝ̈ܶܐ ܒܝܰܕ ܢܰܦܫܶܗ : ܘܬܰܒܰܪ ܡܽܘܟ̈ܠܶܐ ܥܰܫܺܝ̈ܢܶܐ ܒܬܽܘܩܦܶܗ: ܘܰܐܥܪܶܩ ܠܩܶܣܛܽܘܢܳܪ̈ܶܐ ܒܰܩܒܽܘܪܬܶܗ ܘܰܐܒܗܶܬ ܐܶܢܽܘܢ ܒܰܩܝܳܡܬܶܗ: ܘܚܰܕܺܝ ܘܰܐܦܨܰܚ ܠܬܰܠܡܺܝ̈ܕܶܐ ܘܬܰܠܡܺܝ̈ܕܳܬܳܐ ܒܢܽܘܚܳܡܶܗ: ܘܚܰܘܺܝ ܘܰܕܢܰܚ ܠܟܽܠܗܽܘܢ ܥܰܡ̱̈ܡܶܐ ܦܽܘܪܩܳܢܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܚܽܘܣܳܝܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܡܶܠܬܳܐ ܝܺܚܺܝܕܳܝܳܐ ܘܰܡܬܽܘܡܳܝܳܐ ܘܰܟܣܶܐ ܒܺܐܝܬܽܘܬܶܗ ܕܕܳܠ ܡܶܢ ܡܶܕܝܳܪ̈ܰܘܗ̱ܝ ܓܢܺܝ̈ܙܶܐ ܕܢܶܣܥܽܘܪ ܠܰܓܒܺܝܠܬܶܗ: ܘܶܐܬܥܰܛܰܦ ܦܰܓܪܳܐ ܕܐ̱ܢܳܫܽܘܬܰܢ: ܘܶܐܬܓܠܺܝ ܒܶܗ ܠܒܶܪ̈ܝܳܬܳܐ ܕܺܝܠܶܗ: ܗܰܘ ܪܳܡܳܐ ܘܰܡܥܰܠܝܳܐ ܕܰܐܪܟܶܢ ܪܰܘܡܳܐ ܕܪܰܒܽܘܬܶܗ ܘܶܐܬܢܰܚܰܬ ܠܥܽܘ̈ܡܩܶܐ ܬܰܚܬܳܝ̈ܶܐ ܒܣܽܘܓܳܐܐ ܕܛܰܝܒܽܘܬܶܗ: ܘܶܐܬܗܰܦܰܟ ܥܰܡܰܢ ܡܕܰܒܪܳܢܳܐܝܬ ܒܝܰܕ ܚܽܘܒܶܗ: ܘܫܰܡܠܺܝ ܐ̱ܪ̈ܳܙܶܐ ܘܛܽܘܦ̈ܣܶܐ ܕܚܰܙܳܝ̈ܶܐ ܒܰܩܢܽܘܡܶܗ: ܘܡܰܠܺܝ ܦ̈ܶܠܳܐܬܳܐ ܕܟܺܐܢ̈ܶܐ ܒܡܽܘܟܳܟܶܗ: ܥܰܬܺܝܪܳܐ ܕܶܐܬܡܰܣܟܰܢ ܡܶܛܽܠܳܬܰܢ ܒܰܚܢܳܢܶܗ: ܓܰܢ̱ܒܳܪܳܐ ܕܩܰܛܠܶܗ ܠܩܳܛܽܘܠܰܢ ܒܩܶܛܠܶܗ: ܘܰܐܡܺܝܬ ܠܡܰܘܬܳܐ ܡܡܺܝܬܳܢܰܢ ܒܡܰܘܬܶܗ: ܚܰܝܳܐ ܕܰܐܚܺܝ ܠܳܐܕܳܡ ܒܢܽܘܚܳܡܶܗ: ܘܚܰܕܶܬ ܨܽܘܪ̈ܳܬܳܐ ܕܨܰܠܡܶܗ ܒܰܩܝܳܡܬܶܗ: ܘܚܰܕܺܝ ܠܥܶܠܳܝ̈ܶܐ ܒܙܳܟܽܘܬܶܗ: ܘܰܐܦܨܰܚ ܠܬܰܚܬܳܝ̈ܶܐ ܒܰܚܙܳܬܶܗ: ܘܰܢܚܶܬܘ̱ ܪ̈ܽܘܚܳܢܶܐ ܠܐܝ̣ܩܳܪܶܗ: ܘܶܐܬܘܰܥܰܕܘ̱ ܡܰܠܰܐܟ̈ܶܐ ܨܶܝܕ ܩܰܒܪܶܗ ܘܶܐܬܚܰܠܰܛܘ̱ ܥܶܠܳܝ̈ܶܐ ܥܰܡ ܬܰܚܬܳܝ̈ܶܐ ܘܶܐܫܬܰܝܰܢܘ̱ ܫܡܰܝ̈ܳܢܶܐ ܥܰܡ ܐܰܪ̈ܥܳܢܳܝܶܐ: ܣܠܶܩ ܒܫܽܘܒܚܳܐ ܕܡܶܢ ܥܺܝܪ̈ܰܝ ܪܰܘܡܳܐ ܘܰܒܢܰܝ̈ܢܳܫܳܐ: ܘܝܰܒܶܒܘ̱ ܪ̈ܽܘܚܳܢܶܐ ܥܰܡ ܦܰܓܪ̈ܳܢܶܐ: ܐܳܦ ܐܰܣܪܰܚܘ̱ ܬܶܫܒܽܘܚܬܳܐ ܓܫܺܝ̈ܡܶܐ ܥܰܡ ܠܳܐ ܓܫܺܝ̈ܡܶܐ ܘܰܐܒܗܶܬ ܙܳܩܽܘ̈ܦܶܐ ܝܽܘܕܳܝ̈ܶܐ ܕܰܟܦܰܪܘ̱ ܒܶܗ: ܘܰܪܘܰܙܘ̱ ܬܰܠܡܺܝ̈ܕܶܐ ܕܗܰܝܡܶܢܘ̱ ܒܶܗ: ܐܶܬܟܰܦܰܪ̈ܝ̱ ܕܶܡ̈ܥܶܐ ܕܚܰܘܳܐ ܐܶܡܰܢ ܩܰܕܡܳܝܬܳܐ ܘܰܥܒܰܪ ܐܶܒܠܳܐ ܡܶܢ ܐܳܕܳܡ: ܝܰܘܡܳܢܳܐ ܐܶܬܚܰܕܰܬ ܟܽܠܶܗ ܟܝܳܢܳܐ ܕܺܝܠܰܢ ܕܰܒܪܶܓܰܬ݀ ܐܺܝܠܳܢܳܐ ܚܳܒ ܘܶܐܙܕܟܺܝ: ܝܰܘܡܳܢܳܐ ܒܰܙ ܓܰܢ̱ܒܳܪܳܐ ܠܡܺܐܢ̈ܶܐ ܕܚܰܣܺܝܢܳܐ ܘܠܰܫܒܺܝܬܶܗ ܐܰܗܦܶܟ: ܝܰܘܡܳܢܳܐ ܓܳܠܽܘܬܳܐ ܕܡܶܢ ܥܳܠܡܺܝܢ ܐܶܬܦܰܪܩܰܬ݀ ܘܰܙܡܺܝܪܬܳܐ ܕܦܽܘܢܳܝܳܐ ܒܝܽܘܒܳܒܳܐ ܐܶܫܬܰܡܥܰܬ: ܝܰܘܡܳܢܳܐ ܕܰܘܺܝܕ ܒܩܺܝܬܳܪܶܗ ܡܰܙܥܶܩ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ: ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܝܰܘܡܳܢܳܐ ܗܶܪܓܳܐ ܙܺܐܦܳܢܳܐ ܕܝܽܘ̈ܕܳܝܶܐ ܕܺܐܒ̈ܶܐ ܪ̈ܰܡܫܳܝܶܐ: ܐܶܬܦܰܪܣܺܝ ܒܨܰܦܪܳܐ ܚܰܕܬܳܐ ܕܰܕܢܰܚ ܒܰܐܪܥܳܐ ܘܰܐܢܗܰܪ ܠܦܶܢ̈ܝܳܬܳܐ: ܝܰܘܡܳܢܳܐ ܘܰܥܕܳܐ ܕܚܰܝ̈ܶܐ ܡܶܢ ܒܶܝܬ ܡܺܝ̈ܬܶܐ ܠܰܫܠܺܝ̈ܚܶܐ ܐܶܬܓܠܺܝ ܘܒܶܗ ܫܽܘܠܛܳܢ ܡܰܘܬܳܐ ܛܪܽܘܢܳܐ ܐܶܫܬܪܺܝ: ܝܰܘܡܳܢܳܐ ܙܺܝܘܳܐ ܕܬܶܫܒܽܘܚܬܳܐ ܠܳܐ ܡܶܬܚܰܒܠܳܢܺܝܬܳܐ ܡܶܢ ܫܝܽܘܠ ܒܳܠܰܥܬܳܐ ܕܢܰܚ: ܝܰܘܡܳܢܳܐ ܚܰܟܺܝ̈ܡܳܬܳܐ ܬܰܠܡܺܝ̈ܕܳܬܳܐ ܒܗܶܪ̈ܽܘܡܶܐ ܢܦܰܩ̈ܝ̱ ܗ̱ܘ̈ܰܝ ܕܰܢܒܰܣ̈ܡܳܢ ܠܦܰܓܪܳܟ ܝܰܩܺܝܪܳܐ ܘܰܠܩܰܒܪܳܟ ܡܰܥܒܶܕ ܚܰܝ̈ܶܐ ܘܠܰܣܒܰܪܬܳܐ ܕܰܩܝܳܡܬܳܟ ܒܚܰܕܽܘܬܳܐ ܩܰܒ̈ܶܠܝ̱: ܝܰܘܡܳܢܳܐ ܛܳܣܘ̱ ܥܶܠܳܝ̈ܶܐ ܟܰܕ ܡܰܒܪܩܺܝܢ ܒܰܠܒܽܘ̈ܫܶܐ ܚܶܘܳܪ̈ܶܐ: ܘܰܐܟܪܶܙܘ̱ ܕܠܰܝܬܰܘܗ̱ܝ ܒܶܝܬ ܡܺܝ̈ܬܶܐ ܚܰܝܳܐ ܒܰܪ ܚܺܐܪ̈ܶܐ: ܝܰܘܡܳܢܳܐ ܝܰܗ̈ܠܶܐ ܕܢܽܘܪܳܐ ܘܰܕܪܽܘܚܳܐ ܐܰܪܝ̣ܡܘ̱ ܩܳܠܰܝ̈ܗܽܘܢ ܘܙܰܠܚܽܘܗ̇ ܠܰܐܪܥܳܐ ܒܫܽܘܒܚܳܐ ܕܗܽܘܠܳܠܰܝ̈ܗܽܘܢ: ܝܰܘܡܳܢܳܐ ܟܡܺܝܪܽܘܬܳܐ ܘܰܒܟܳܬܳܐ ܪܰܡܫܳܝܬܳܐ ܡܶܢ ܬܰܠܡܺܝ̈ܕܶܐ ܐܶܬܛܰܠܩܰܬ: ܘܚܰܕܽܘܬܳܐ ܘܰܦܨܺܝܚܽܘܬܳܐ ܬܰܪܥܺܝܬܗܽܘܢ ܐܶܬܡܰܠܝܰܬ݀ : ܝܰܘܡܳܢܳܐ ܠܽܘܬܳܟܳܐ ܦܪܺܝܫܳܝܳܐ ܐܶܙܕܰܝܰܦ: ܘܛܽܘܟܳܢܳܐ ܕܣܳܦܪ̈ܶܐ ܒܕܶܢܚܶܗ ܕܢܽܘܚܳܡܳܐ ܐܶܬܒܰܛܰܠ: ܝܰܘܡܳܢܳܐ ܡܺܝܬܽܘܬܰܢ ܒܠܐܴ ܡܳܝܽܘܬܽܘܬܳܐ ܐܶܬܚܰܠܦܰܬ݀ : ܘܡܶܬܚܰܒܠܳܢܽܘܬܶܗ ܕܰܟܝܳܢܰܢ ܐܶܬܚܰܕܬܰܬ݀ ܒܠܐܴ ܡܶܬܚܰܒܠܳܢܽܘܬܳܐ: ܝܰܘܡܳܢܳܐ ܢܽܘܗܪܳܐ ܕܠܳܐ ܥܝܳܕܳܐ ܐܰܪܗܶܒ ܠܩܶܣܛܽܘܢܳܪ̈ܶܐ ܘܟܳܣܳܐ ܕܪܶܥܠܳܐ ܘܰܕܩܽܘܛܳܦܳܐ ܡܥܺܝܩܳܢܳܐ ܠܗܽܘܢ ܐܰܪܘܺܝ: ܝܰܘܡܳܢܳܐ ܣܰܦܣܺܝ̣ܪܶܗ ܠܛܺܝܫܬܳܐ ܕܡܰܘܬܳܐ ܩܗܳܬ: ܘܚܰܓܰܘ̈ܗ̱ܝ ܡܰܪܺܝܪ̈ܶܐ ܠܡܰܪܩܽܘܕܬܳܐ ܐܶܬܗܰܦܰܟܘ̱: ܝܰܘܡܳܢܳܐ ܥܠܰܝܡܽܘܬܳܐ ܒܬܽܘܠܳܝܬܳܐ ܘܣܰܝܒܽܘܬܳܐ ܙܗܺܝܬܳܐ ܠܩܰܒܪܶܗ ܕܡܰܚܶܐ ܡܺܝ̣̈ܬܶܐ ܪ̈ܳܗܛܳܢ ܗ̱ܘ̈ܰܝ: ܝܰܘܡܳܢܳܐ ܦܳܓ ܢܳܡܽܘܣܳܐ ܕܛܶܠܳܢܳܝ̈ܳܬܳܐ: ܘܥ̣ܰܠ ܚܠܳܦܰܘܗ̱ܝ ܢܳܡܽܘܣܳܐ ܕܪ̈ܽܘܚܳܢܝܳܬܳܐ: ܝܰܘܡܳܢܳܐ ܨܡܰܚ ܡܶܢ ܚܶܫܽܘܟܳܐ ܢܽܘܗܪܳܐ: ܘܡܶܢ ܥܰܡܛܳܢܳܐ ܫܶܡܫܳܐ ܗܰܘ ܕܰܥܪܰܒ ܒܰܥܪܽܘܒܬܳܐ: ܝܰܘܡܳܢܳܐ ܩܳܠܳܐ ܕܰܡܣܰܒܰܪ̈ܰܝ ܫܠܳܡܳܐ ܘܰܕܡܰܫ̈ܡܥܰܝ ܚܰܕܽܘܬܳܐ ܕܳܐܡܪܺܝܢ ܠܨܶܗܝܽܘܢ ܡܣܰܒܰܪܬܳܐ: ܕܶܐܬܬܥܺܝܪܝ̱ ܐܶܬܬܥܺܝܪܝ̱ ܡܕܺܝܢܬܳܐ ܕܦܽܘܪܩܳܢܳܐ ܘܰܠܒܰܫܝ̱ ܥܽܘܫܢܳܐ ܕܰܕܪܳܥܶܗ ܕܡܳܪܝܳܐ: ܝܰܘܡܳܢܳܐ ܪܺܝܫ ܓܽܘܢܝܳܐ ܕܙܳܘܺܝܬܳܐ ܚܰܝܶܕ ܘܐܰܠܘܶܬ ܙܡܺܝܪ̈ܳܬܳܐ ܡܰܠܰܐܟܳܝ̈ܳܬܳܐ ܕܒܰܚܕܳܐ ܫܰܘܝܽܘܬ ܩܺܝܢܬܳܐ ܢܰܣ̈ܩܳܢ ܬܶܫܒܽܘܚܬܳܐ: ܝܰܘܡܳܢܳܐ ܫܰܝܢܳܐ ܫܰܪܺܝܪܳܐ ܘܰܫܠܳܡܳܐ ܫܰܦܝܳܐ ܐܶܬܺܝܗܶܒ ܒܥܶܠܺܝܬܳܐ ܠܫܽܘܘܕܳܥܳܐ ܕܪܶܚܡܰܬ݀ ܐ̱ܢܳܫܽܘܬܳܐ: ܝܰܘܡܳܢܳܐ ܬܳܐܘܡܰܐ ܡܶܫܬܰܪܰܪ ܡܶܢ ܒܳܬܰܪ ܦܽܘܠܳܓܳܐ ܒܓܶܫܬܳܐ ܚܰܝܬܳܐ ܘܡܰܚܝܳܢܺܝܬܳܐ: ܘܝܰܘܡܳܢܳܐ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܰܠܳܗܰܢ: ܚܢܰܢ ܗܳܢܽܘܢ ܕܶܐܙܕܰܕܰܩܢܰܢ ܒܛܰܝܒܽܘܬܳܟ ܡܰܓܳܢ ܘܶܐܬܚܢܶܢܶܢ ܡܶܢܳܟ: ܟܰܕ ܠܗܳܕܶܐ ܡܰܘܗܰܒܬܳܐ ܠܳܐ ܫܳܘܶܝܢ ܗܘܰܝܢ ܡܶܛܽܠ ܫܟܺܝܪܽܘܬܳܐ ܕܣܳܥܽܘܪ̈ܘܳܬܰܢ: ܐܶܠܐ ܬܽܘܒ ܐܰܝܟ ܡܳܪܳܐ ܚܰܟܺܝܡܳܐ ܚܰܕܶܬ ܠܰܢ: ܘܰܒܫܰܝܢܳܐ ܘܒܰܫܠܳܡܳܐ ܕܡܶܢܳܟ ܫܰܪܰܪ ܠܰܢ: ܐܰܘܳܐ ܠܰܣܕܺܝ̈ܩܶܐ ܕܡܰܪܥܺܝܬܳܟ: ܒܰܝܬܳܐ ܠܰܓܙܳܪ̈ܶܐ ܕܥܳܢ̈ܳܟ: ܓܶܕ ܠܐܷܡܪ̈ܶܐ ܕܶܐܬܠܰܣܛܺܝܘ ܡܶܢ ܛܝܳܪܳܟ: ܕܰܒܰܪ ܠܥܶܪ̈ܒܶܐ ܕܡܶܬܝܰܐܝܒܺܝܢ ܠܪܶܥܝܳܟ: ܗܰܕܳܐ ܠܰܢܩܰܘ̈ܳܬܳܐ ܕܣܳܘ̈ܚܳܢ ܠܩܳܠܳܟ: ܘܰܥܶܕ ܠܚܶܪ̈ܝܳܝܶܐ ܕܰܡܪܰܕܘ̱ ܡܶܢ ܢܺܝܪܳܟ: ܙܰܡܶܢ ܠܪ̈ܰܚܺܝܩܶܐ ܕܶܐܬܢܰܟܪܺܝܘ ܡܶܢ ܫܳܪܽܘܬܳܟ: ܚܰܝܶܕ ܠܰܦܠܺܝ̈ܓܶܐ ܕܥܰܡܳܟ: ܛܰܪ ܠܰܦܪ̈ܺܝܩܰܝ ܒܰܕܡܳܟ: ܝܰܒܶܠ ܠܪ̈ܰܚܺܝܩܶܐ ܡܣܰܟ̈ܝܰܝ ܠܣܰܒܪܳܟ: ܟܰܢܶܫ ܠܓܳܠܽܘܬܳܐ ܕܡܰܘܕ̈ܝܰܝ ܒܰܫܡܳܟ: ܠܰܚܶܡ ܠܗܰܕ̈ܳܡܶܐ ܚܬܺܝ̈ܡܰܝ ܒܰܨܠܺܝܒܳܟ: ܡܰܟܶܟ ܠܪ̈ܳܡܶܐ ܘܰܠܩܰܫ̈ܝܰܝ ܩܕܳܠܳܐ ܫܰܗܳܐ: ܢܰܛܰܪ ܠܪ̈ܳܥܰܘܳܬܳܐ ܘܥܰܠ̈ܠܳܢܶܐ: ܣܰܬܶܬ ܠܥܳܢ̈ܳܟ ܡܗܰܝܡܰܢܬܳܐ: ܥܰܫܶܢ ܠܰܥܠܺܝ̈ܒܶܐ ܕܓܳܥܶܝܢ ܠܘܳܬܳܟ: ܦܰܓܶܕ ܠܪ̈ܶܥܝܳܢܶܐ ܕܰܢܦܰܪܘ̱ (ܕܐܶܬܪܚܶܩܘ̱) ܡܶܢ ܫܪܳܪܳܟ: ܨܰܠܶܡ ܠܬܰܪ̈ܥܝܳܬܳܐ ܕܰܐܚܓܰܪ̈ܝ̱ ܡܶܢ ܢܳܡܽܘܣܳܟ: ܩܒܽܘܥ ܠܪ̈ܶܓܠܶܐ ܕܰܕܪ̈ܰܟܝ̱ ܠܒܰܪ ܡܶܢ ܫܒܺܝ̈ܠܰܝܟ: ܪܰܝܰܚ ܠܣܶܢܶܐܬܳܐ ܘܠܰܚܣܳܡܳܐ ܕܰܙܩܺܝܦ ܠܩܽܘܒܠܶܗ: ܫܰܗܳܐ ܠܡܶܪܬܶܗ ܕܚܶܘܝܳܐ ܥܩܰܠܩܠܳܐ: ܬܰܗܳܐ ܘܰܐܥܒܰܪ ܠܚܰܫ̈ܶܐ ܕܶܐܬܒܰܛܰܠܘ̱ ܒܚܰܫܶܗ ܕܰܙܩܺܝܦܳܟ: ܘܰܥܒܶܕ ܕܽܘܟܪܳܢܳܐ ܛܳܒܳܐ ܠܰܐܒܳܗܰܝ̈ܢ ܘܠܰܐܚܰܝ̈ܢ ܘܪ̈ܰܒܳܢܰܝܢ: ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܘܰܐܥܶܠ ܐܶܢܽܘܢ ܠܰܓܢܽܘܢܳܟ ܒܝܰܘܡܳܐ ܕܡܶܬܓܰܠܝܳܐ ܪܰܒܽܘܬܳܟ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀