ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܫܡܰܝܳܢܳܐ ܘܡܰܠܟܳܐ ܕܰܫܠܳܡܳܐ: ܠܗܰܘ ܫܰܝܢܳܐ ܡܰܦܨܚܳܢܳܐ ܕܰܒܡܶܬܢܰܚܬܳܢܽܘܬܶܗ ܕܠܰܐܪܥܳܐ ܗܳܕܶܐ: ܥܒܰܕ ܫܰܝܢܳܐ ܥܰܡ ܥܳܡܽܘܪ̈ܶܝܗ̇ ܘܰܬܪܰܥ ܠܰܣܝܳܓܳܐ ܕܰܪܓܺܝܙܽܘܬܳܐ ܒܰܨܠܺܝܒܶܗ ܘܒܰܩܝܳܡܬܶܗ ܚܰܠܶܛ ܐܶܢܽܘܢ ܒܰܚܕ̈ܳܕܶܐ: ܘܶܐܬܳܐ ܘܣܰܒܰܪ ܫܠܳܡܳܐ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ: ܘܒܰܝܬܺܝ ܠܥܰܡܳܐ ܘܰܠܥܰܡ̱̈ܡܶܐ ܘܫܰܝܶܢ ܠܢܰܦ̈ܫܳܬܳܐ ܘܰܠܦܰܓܪ̈ܶܐ: ܘܫܰܝܢܳܐ ܘܰܫܠܳܡܳܐ ܐܰܓܥܶܠ ܠܬܰܠܡܺܝ̈ܕܰܘܗ̱ܝ ܕܰܢܝܰܒܠܽܘܢ ܣܒܰܪܬܶܗ ܠܟܽܠ ܣܰܘ̈ܦܺܝܢ: ܘܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܗܰܘ ܫܰܝܢܳܐ ܐܰܡܺܝܢܳܐ ܕܒܶܪ̈ܝܳܬܳܐ: ܘܰܫܠܳܡܳܐ ܫܰܪܺܝܪܳܐ ܕܦܶܢ̈ܝܳܬܳܐ: ܗܰܘ ܕܟܰܕ ܚܽܘܒܳܐ ܐܝ̣ܬܝܟ ܘܚܽܘܒܳܐ ܡܶܬܟܰܢܶܐ ܐܰܢ̱ܬ: ܘܰܒܗܳܢܳܐ ܫܡܳܐ ܛܳܒ ܡܶܢ ܟܽܠ ܫܡܳܗܺܝ̣̈ܢ ܚܳܕܶܐ ܐܰܢ̱ܬ: ܘܒܶܗ ܪܳܚܶܡ ܐ̱ܢܳܫ̈ܳܐ ܡܶܬܺܝܕܰܥ ܐܰܢ̱ܬ: ܘܠܰܐܝܠܶܝܢ ܕܠܶܗ ܡܰܚܒܺܝܢ ܡܝܰܩܰܪ ܐܰܢ̱ܬ: ܗܰܘ ܕܩܰܪܶܒܬ ܐܰܢ̱ܬ ܠܳܟ ܚܠܳܦܰܝܢ ܩܽܘܪܒܳܢܳܐ ܡܩܰܒܠܳܐ ܠܰܐܒܽܘܟ ܘܶܐܬܪܰܥܺܝ ܠܰܢ ܒܡܰܘܬܳܟ ܗܰܘ ܚܰܒܺܝܒܳܐ: ܘܟܰܕ ܒܰܙܩܺܝܦܳܐ ܕܺܝܠܳܟ ܬܪܰܥܬ ܠܰܣܝܳܓܳܐ ܥܰܬܺܝܩܳܐ ܕܰܒܥܶܠܕܒܳܒܽܘܬܳܐ ܘܒܰܕܡܳܐ ܕܰܩܢܽܘܡܳܟ ܫܰܝܶܢܬ ܡܳܐ ܕܒܰܫܡܰܝܳܐ ܘܡܳܐ ܕܒܰܐܪܥܳܐ: ܘܰܐܪܺܝܡܬ ܠܰܪܓܺܝܙܽܘܬܳܐ ܡܶܢ ܡܨܰܥܬܳܐ ܕܰܥܒܰܕܬ ܠܬܰܪ̈ܬܰܝܗܶܝܢ ܚܕܳܐ: ܒܰܚܕܳܝܽܘܬܳܐ ܡܬܽܘܡܳܝܬܳܐ ܕܐܰܠܳܗܽܘܬܳܟ ܘܐ̱ܢܳܫܽܘܬܳܟ ܗܳܝ ܙܰܒܢܳܝܬܳܐ: ܕܒܳܗ̇ ܩܪܰܝܬܳܢ ܘܶܐܣܰܪܬܳܢ ܒܰܐܘܝܽܘܬܳܐ ܕܪܶܚܡܬܳܟ ܘܰܒܒܰܝܬܳܝܽܘܬܳܐ ܕܡܽܘܠܟܳܢܰܝ̈ܟ ܫܡܰܝ̈ܳܢܶܐ: ܘܡܶܢ ܗܳܪܟܳܐ ܫܠܳܡܳܐ ܘܫܰܝܢܳܐ ܣܰܒܰܪܬ: ܘܬܰܟܬܽܘܫܳܐ ܡܶܢ ܣܰܘ̈ܦܶܝܗ̇ ܒܰܛܶܠܬ: ܟܰܕ ܡܶܢ ܥܺܝܪܳܐ ܕܢܽܘܪܳܐ ܓܰܒܪܺܐܝܶܠ ܒܰܫܠܳܡܳܐ ܣܰܒܰܪ ܒܰܛܢܳܟ ܠܰܒܬܽܘܠܬܳܐ ܡܰܪܝܰܡ ܐܶܡܳܟ: ܘܒܰܫܠܳܡܳܐ ܐܶܡܳܟ ܦܶܓܥܰܬ݀ ܗܘܳܬ݀ ܒܶܐܠܺܝܫܒܰܥ ܐܶܡܶܗ ܕܟܳܪܽܘܙܳܟ: ܘܒܰܫܠܳܡܳܐ ܒܰܕܶܩܘ̱ ܥܺܝܪ̈ܰܝ ܪܰܘܡܳܐ ܠܪ̈ܳܥܰܘܳܬܳܐ ܥܰܠ ܡܰܘܠܳܕܳܟ: ܘܒܰܫܠܳܡܳܐ ܦܓܰܥܘ̱ ܡ̈ܰܠܰܐܟܶܐ ܒܢܶܫ̈ܶܐ ܕܶܐܬܰܝ̈ ܕܰܢܒܰܣ̈ܡܳܢ ܠܦܰܓܪܳܟ ܩܰܕܺܝܫܳܐ: ܘܒܰܫܠܳܡܳܐ ܥܰܠܬ ܠܥܶܠܺܝܬܳܐ ܕܰܟܢܺܝܫܺܝܢ ܗ̱ܘܰܘ ܒܳܗ̇ ܬܰܠܡܺܝ̈ܕܰܝܟ: ܘܫܰܪܰܪܬ ܐܶܢܽܘܢ ܥܰܠ ܢܽܘܚܳܡܳܟ ܘܰܫܠܳܡܳܐ ܝܰܗܒܬ ܠܗܽܘܢ ܟܰܕ ܐܶܬܥܰܠܺܝܬ ܠܘܳܬ ܫܳܠܽܘܚܳܟ: ܘܶܐܡܰܪܬ ܠܗܽܘܢ ܕܰܫܠܳܡܳܐ ܕܺܝܠܝ̱ ܝܳܗܶܒ ܐ̱ܢܳܐ ܠܟܽܘܢ: ܫܠܳܡܳܐ ܕܺܝܠܝ̱ ܫܳܒܶܩ ܐ̱ܢܳܐ ܠܟܽܘܢ: ܠܳܐ ܐܰܝܟ ܕܝܳܗܶܒ ܥܳܠܡܳܐ ܝܳܗܶܒ ܐ̱ܢܳܐ ܠܟܽܘܢ: ܗܳܢܰܘ ܦܽܘܩܕܳܢܝ̱ ܕܬܰܚܒܽܘܢ ܠܰܚܕ̈ܳܕܶܐ ܐܰܝܟܰܢܳܐ ܕܶܐܢܳܐ ܐܰܚܶܒܬܟܽܘܢ: ܠܗܳܢܳܐ ܚܽܘܒܳܐ ܛܰܪ ܠܘܳܬܰܢ ܦܳܪܽܘܩܰܢ: ܒܗܳܢܳܐ ܚܽܘܒܳܐ ܫܰܪܰܪ ܠܰܢ: ܘܰܒܚܽܘܒܳܟ ܥܒܶܕ ܠܰܢ ܢܳܛܽܘܪ̈ܶܐ ܕܦܽܘܩ̈ܕܳܢܰܝܟ ܩܰܕܺܝ̈ܫܶܐ: ܒܚܽܘܒܳܟ ܚܰܘܳܐ ܠܰܢ ܒܢܰܝ̈ܳܐ ܕܫܰܝܢܳܐ ܘܕܰܫܠܳܡܳܐ ܒܚܽܘܒܳܟ ܐܰܘܳܐ ܠܪ̈ܳܥܰܘܳܬܳܐ ܘܰܓܙܳܪ̈ܰܝܗܽܘܢ: ܒܚܽܘܒܳܟ ܒܰܣܶܡ ܠܟܳܗ̈ܢܶܐ ܒܐ̱ܪ̈ܳܙܰܝܗܽܘܢ: ܒܰܫܠܳܡܳܟ ܓܡܽܘܪ ܠܥܺܕܬܳܐ ܘܰܠܝܰܠܕܶܝ̈ܗ̇: ܒܰܫܠܳܡܳܟ ܕܰܒܰܪܶܝܗ̇: ܘܰܒܫܰܝܢܳܟ ܨܰܒܶܬܺܝܗ̇: ܒܰܫܠܳܡܳܟ ܗܰܕܳܐ ܠܟܶܢܫܶܝ̈ܗ̇: ܒܰܫܠܳܡܳܟ ܘܰܥܶܕ ܠܪ̈ܰܚܺܝܩܶܝܗ̇: ܘܒܰܫܠܳܡܳܟ ܙܰܡܶܢ ܠܩܰܪ̈ܝ̣ܒܶܝܗ̇: ܒܰܫܠܳܡܳܟ ܚܰܝܶܕ ܠܟܳܗ̈ܢܶܝܗ̇ ܘܰܒܫܰܝܢܳܟ ܛܰܟܶܣ ܟܽܠܗܽܘܢ ܬܶܓܡܶܝ̈ܗ̇: ܒܰܫܠܳܡܳܟ ܝܰܒܶܠ ܥܰܕܥܺܐܕܶܝ̈ܗ̇ ܒܰܫܠܳܡܳܟ: ܘܒܰܫܠܳܡܳܟ ܟܰܢܶܫ ܠܰܪ̈ܓܺܝܙܶܝܗ̇: ܘܰܒܫܰܝܢܳܟ ܠܰܚܶܡ ܠܰܣܕܺܝ̈ܩܶܐ: ܒܰܫܠܳܡܳܟ ܡܠܺܝ ܠܰܢ ܚܰܕܽܘܬܳܐ: ܘܰܒܫܰܝܢܳܟ ܢܰܛܰܪ ܠܟܽܠܰܢ: ܒܰܫܠܳܡܳܟ ܣܰܬܶܬ ܪ̈ܶܥܝܳܢܰܝܢ: ܘܰܒܫܰܝܢܳܟ ܥܰܫܶܢ ܘܕܰܟܳܐ ܠܚܽܘ̈ܫܳܒܰܝܢ: ܒܰܫܠܳܡܳܟ ܦܪܽܘܩ ܠܰܢ ܡܶܢ ܡܰܪ̈ܕܘܳܬܳܐ: ܘܰܒܫܰܝܢܳܟ ܨܰܒܶܬ ܠܰܢ ܒܥܺܐܕܳܟ: ܒܰܫܠܳܡܳܟ ܩܰܒܶܠ ܡܳܪܝ̱ ܨܰܘܡܰܢ: ܘܰܒܫܰܝܢܳܟ ܪ̈ܰܚܡܶܐ ܘܰܚܢܳܢܳܐ ܫܰܟܶܢ ܠܰܢ: ܘܒܰܫܠܳܡܳܟ ܫܪܺܝ ܡܶܢܰܢ ܩܶܛܪ̈ܶܐ ܕܰܚܛܺܝܬܳܐ: ܘܰܒܫܰܝܢܳܟ ܬܒܽܘܪ ܠܪܺܝܫܶܗ ܕܰܛܪܽܘܢܳܐ ܒܥܶܠܕܒܳܒܰܢ: ܫܠܳܡܳܟ ܢܶܗܘܶܐ ܥܰܡܰܢ: ܘܫܰܝܢܳܟ ܢܰܡܠܶܟ ܒܰܝܢܳܬܰܢ: ܘܚܽܘܒܳܟ ܐܰܣܶܢ ܒܠܶܒܰܘ̈ܳܬܰܢ: ܘܪܶܚܡܬܳܟ ܐܰܚܶܡ ܒܢܰܦ̈ܫܳܬܰܢ: ܫܠܳܡܳܟ ܢܶܗܘܶܐ ܥܰܡܰܢ ܘܒܰܝܢܳܬܰܢ: ܘܚܽܘܒܳܟ ܢܟܰܬܰܪ ܒܰܢ ܥܕܰܡܳܐ ܠܫܽܘܠܳܡܳܐ: ܘܢܶܗܘܶܐ ܠܳܟ ܥܳܢ̈ܳܐ ܢܰܨܺܝܚܬܳܐ ܘܰܕܠܳܐ ܛܽܘܠܫܳܐ: ܘܢܰܘܕܶܐ ܠܳܟ ܝܳܗܽܘܒܶܗ ܕܰܫܠܳܡܳܐ: ܘܠܰܐܒܽܘܟ ܡܰܫܟܢܳܢܶܗ ܕܫܰܝܢܳܐ ܘܰܠܪܽܘܚܳܟ ܩܰܕܺܝܫܳܐ ܓܳܡܽܘܪܳܐ ܕܚܽܘܒܳܐ ܫܰܪܺܝܪܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝ̣ܢ܀