ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܡܶܠܬܳܐ ܦܫܝ̣ܛܳܐ ܘܪܘ̣ܚܳܢܳܐ ܒܰܟܝܳܢܶܗ ܕܐܶܬ̣ܳܐ ܠܪܘ̣ܟܳܒܳܐ ܦܰܓܪܳܢܳܝܳܐ ܒܨܶܒܝܳܢܶܗ: ܕܢ̣ܰܝܬܶܐ ܠܦܰܓܪ̈ܳܢܶܐ ܘܥܰܦܪ̈ܳܢܶܐ ܠܰܕܡܘ̣ܬܶܗ: ܘܢܶܥ̣ܒܶܕ ܠܰܛܪ̈ܝ̣ܕܶܐ ܘܢܘ̣ܟܪ̈ܳܝܶܐ ܒܢܰܝ̈ ܛܘ̣ܗܡܶܗ: ܘܰܢ̣ܩܰܪܶܒ ܠܪ̈ܰܚܝ̣ܩܶܐ ܠܘܳܬܶܗ ܘܰܢ̣ܟܢܶܫ ܐܶܢܽܘܢ ܠܘܰܥܕܳܐ ܕܪܰܒܘ̣ܬܶܗ: ܘܰܢ̣ܨܘ̣ܒ ܐܶܢܽܘܢ ܦܳܥ̈ܠܶܐ ܠܦܳܠܚܘ̣ܬܶܗ: ܘܢܰܘܪܶܬ ܐܶܢܽܘܢ ܛܘ̣̈ܒܶܐ ܕܡܰܠܟܘ̣ܬܶܗ: ܘܰܢܒܰܣܶܡ ܐܶܢܽܘܢ ܒܙܝ̣ܘܳܐ ܕܪܰܒܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܘܐܰܒܳܐ ܘܡܳܪܳܐ ܘܥܳܒܘ̣ܕܳܐ ܕܟܽܠܗܶܝܢ ܒܶܪ̈ܝܳܬܳܐ ܡܶܬܝܕ̈ܥܳܢܝܳܬܳܐ ܕܶܝܢ ܘܡܶܬܪ̈ܰܓܫܳܢܝܳܬܳܐ: ܗܰܘ̇ ܕܡܶܛܽܠ ܪܶܚܡܰܬ݀ ܐ̱ܢܳܫܘ̣ܬܳܟ ܠܳܐ ܡܶܬܡܰܠܠܳܢܝ̣ܬܳܐ ܢܨܰܒ̣ܬ ܒܰܐܪܥܳܐ ܠܟܰܪܡܳܐ ܡܶܬܝܰܕܥܳܢܳܐ ܐܝ̣ܣܪܳܐܝܶܠ: ܘܐܰܚ̣ܕܰܪܬ ܠܶܗ ܣܝܳܓܳܐ ܢܳܡܘ̣ܣܳܐ ܡܘܫܳܝܳܐ: ܘܰܚܦ̣ܰܪܬ ܒܶܗ ܡܰܥܨܰܪܬܳܐ ܟܳܗܢܘ̣ܬܳܐ ܐܰܗܪܘ̣ܢܳܝܬܳܐ ܓܳܡܪܰܬ݀ ܕܶܒܚ̈ܶܐ ܢܳܡܘ̣̈ܣܳܝܶܐ: ܘܰܒܢ̣ܰܝܬ ܒܶܗ ܡܰܓܕܠܳܐ ܪܳܡܳܐ ܡܥܰܠܝܳܐ ܕܰܢܒܺܝܘ̣ܬܳܐ ܚܳܙܝܰܬ݀ ܟܰܣ̈ܝܳܬܳܐ: ܘܐܰܫܠܶܡ̣ܬܶܗ ܠܦܰܠ̈ܳܚܶܐ ܟܳܗ̈ܢܶܐ ܘܣܳܦܪ̈ܶܐ ܘܠܶܘ̈ܳܝܶܐ: ܕܢܶܦ̣ܠܚܘ̣ܢܳܝܗ̱ܝ ܘܢ̣ܶܟܣܚܘ̣ܢܳܝܗ̱ܝ ܘܰܢ̣ܙܰܒܠܘ̣ܢܳܝܗ̱ܝ ܘܰܢ̣ܫܰܪܪܘ̣ܢܳܝܗ̱ܝ ܒܝܰܕ ܡܰܠܦܳܢܘ̣ܬܳܐ ܘܡܰܪܬܝܳܢܘ̣ܬܳܐ: ܘܠܘ̣̈ܚܳܡܶܐ ܘܰܓ̈ܙܳܡܶܐ ܘܰܠܡ̣ܶܥܒܰܕ ܦܺܐܪ̈ܶܐ ܕܙܰܕܝ̣ܩܘ̣ܬܳܐ: ܟܰܕ ܕܶܝܢ ܡ̣ܛܳܐ ܙܰܒܢܳܐ ܕܦܺܐܪ̈ܶܐ ܫ̣ܰܕܰܪܬ ܠܥܰܒܕܰܝ̈ܟ ܢܒܺܝ̈ܶܐ ܩܰܕܝ̣̈ܫܶܐ ܠܘܳܬܗܽܘܢ ܕܦܰܠ̈ܳܚܶܐ: ܐܰܝܟܰܢܳܐ ܕܒܐܝ̣ܕܰܝ̈ܗܽܘܢ ܢ̣ܫܰܕܪܽܘܢ ܘܰܢ̣ܩܰܪܒܽܘܢ ܦܺܐܪ̈ܶܐ ܪ̈ܘ̣ܚܳܢܳܝܶܐ: ܘܐܶܚ̣ܰܕܘ̱ ܐܶܢܽܘܢ ܦܰܠ̈ܳܚܶܐ: ܘܰܠܗܳܢܳܐ ܡܚ̣ܰܐܘܽܘ̣ܗ̱ܝ ܘܰܠܗܳܢܳܐ ܩܰܛܠܘ̣ܗ̱ܝ: ܘܬܘ̣ܒ ܫ̣ܰܕܰܪ ܥܰܒ̈ܕܶܐ ܐ̱ܚܪ̈ܳܢܶܐ ܣܰܓܺܝ̈ܺܐܝ̣ܢ ܡܶܢ ܩܰܕ̈ܡܳܝܶܐ ܘܗܳܟܘܳܬ ܥܰܒ̣ܕ ܠܗܽܘܢ: ܒܚܰܪܬܳܐ ܕܶܝܢ ܫ̣ܰܕܰܪܬ ܠܘܳܬܗܽܘܢ ܠܰܒܪܳܟ ܚܰܒܝ̣ܒܳܐ ܐܰܝܟܰܢܳܐ ܕܢܶܚ̣ܙܘ̣ܢܳܝܗ̱ܝ ܘܢ̣ܶܒܗܬܽܘܢ ܘܒܐܝ̣ܕܰܘ̈ܗ̱ܝ ܢ̣ܩܰܪܒܽܘܢ ܦܺܐܪ̈ܶܐ: ܘܟܰܕ ܚـܼܙܰܐܘܽܘ̣ܗ̱ܝ ܐ̱ܢܳܫ̈ܳܐ ܐܫ̣ܬܰܘܕܥܘ̣ܗ̱ܝ ܕܗܘ̣ ܐܝ̣ܬܰܘܗ̱ܝ ܝܳܪܬܳܐ: ܘܐܶܚ̣ܰܕܘ̱ ܐܰܦ̣ܩܘ̣ܗ̱ܝ ܠܒܰܪ ܡܶܢ ܟܰܪܡܳܐ ܘܙܰܩ̣ܦܘ̣ܗ̱ܝ ܘܩ̣ܰܛܠܘ̣ܗ̱ܝ ܘܠܰܩܒܘ̣ܪܬܳܐ ܐܫܠ̣ܡܘ̣ܗ̱ܝ: ܘܡܶܛܽܠ ܗܳܕܶܐ ܥܩ̣ܰܪܬܳܝܗ̱ܝ ܘܰܕܪܰܝܬܳܝܗ̱ܝ ܠܟܰܪܡܳܐ ܠܝ̣ܛܳܐ ܐܝ̣ܣܪܳܐܝܶܠ: ܕܰܚܠܳܦ ܥܶܢ̈ܒܶܐ ܕܰܡܝܰܬܪܘ̣ܬܳܐ ܥܒ̣ܰܕ ܚܰܪ̈ܘ̣ܒܶܐ ܕܘ̣ܒܳܪ̈ܶܐ ܒܝ̣̈ܫܶܐ ܘܡܰܣ̈ܠܰܝܳܐ: ܘܰܬܪܰܥ̣ܬ ܣܝܳܓܳܐ ܕܝ̣ܠܶܗ: ܘܰܣܚ̣ܰܦܬ ܡܰܓܕܠܶܗ ܪܳܡܳܐ ܘܰܢܒܺܝܳܝܳܐ: ܘܐܰܚܪܶܒ̣ܬܳܝܗ̱ܝ ܘܰܥܒ̣ܰܕܬܳܝܗ̱ܝ ܠܰܕܝܳܫܳܐ: ܘܦܰܩ̣ܶܕܬ ܠܰܥ̈ܢܳܢܶܐ ܡܰܠܰܐܟܝ̈ܳܬܳܐ ܕܠܳܐ ܢ̣ܰܚ̈ܬܳܢ ܥܠܰܘܗ̱ܝ ܡܶܛܪܳܐ ܕܝ̣ܕܰܥܬܳܐ ܐܰܠܗܳܝ̇ܬܳܐ: ܘܰܢܨܰܒ̣ܬ ܚܠܳܦܰܘܗ̱ܝ ܓܦܶܬܳܐ ܓܒܝ̣ܬܳܐ ܘܰܫܒܝ̣ܚܬܳܐ ܥܺܕܬܳܐ ܩܰܕܝ̣ܫܬܳܐ ܕܡܶܢ ܥܰܡ̱̈ܡܶܐ: ܘܐܰܚ̣ܕܰܪܬ ܠܶܗ ܣܝܳܓܳܐ ܢܳܡܘ̣ܣܳܐ ܐܶܘܰܢܓܶܠܳܝܳܐ: ܘܰܒܟܳܗܢܘ̣ܬܳܐ ܡܰܠܰܐܟܳܝ̇ܬܳܐ ܨܰܒܶܬ̣ܬܶܗ: ܘܒܰܨܠܝ̣ܒܳܐ ܡܰܓܕܠܳܐ ܪܳܡܳܐ ܫ̣ܰܪܰܪܬܳܗ̇ ܘܐܰܓܥܶܠ̣ܬܳܗ̇ ܠܦܰܠܳܚ̈ܶܐ ܫܠܝ̣̈ܚܶܐ ܘܡܣܰܒܪ̈ܳܢܶܐ ܘܪ̈ܳܥܰܘܳܬܳܐ ܡܰܠ̈ܦܳܢܶܐ ܘܟܳܗ̈ܢܶܐ ܓܒܰܝ̈ܳܐ: ܕܒܐܝ̣ܕܰܝ̈ܗܽܘܢ ܬ̣ܩܰܪܶܒܝ̱ ܦܺܐܪ̈ܶܐ ܪ̈ܘ̣ܚܳܢܳܝܶܐ ܕܚܳܫ̇ܚܝ̣ܢ ܠܰܐܠܳܗܘ̣ܬܳܟ: ܘܠܳܗ̇ ܠܟܺܐܦܳܐ ܡܫܝ̣ܚܳܝ̇ܬܳܐ ܕܐܶܣ̣ܬܰܠܝܰܬ݀ ܡܶܢ ܒܰܢܳܝ̈ܶܐ ܐܰܘܟܝ̣ܬ ܪ̈ܝ̣ܫܶܐ ܕܝܘ̣̈ܕܳܝܶܐ: ܐܰܩܝ̣ܡܬ ܠܪܝ̣ܫ ܙܳܘܺܝ̣ܬܳܐ ܕܐܳܣ̇ܪܳܐ ܘܰܡܚܰܝܕܳܐ ܠܰܫܡܰܝ̈ܳܢܶܐ ܘܐܰܪ̈ܥܳܢܳܝܶܐ ܘܰܠܥܰܡܳܐ ܘܰܠܥܰܡ̱̈ܡܶܐ: ܘܰܡܪܰܥܥܳܐ ܘܰܡܕܰܩܩܳܐ ܘܕܳܪܝܳܐ ܠܟܽܠܗܽܘܢ ܐܰܝܠܶܝܢ ܕܒܳܗ̇ ܡܶܬܟܰܫܠܝ̣ܢ: ܒܗܳܝ̇ ܕܡܶܢܳܟ ܐܝ̣ܬܶܝܗ̇ ܘܰܗ̣ܘܳܬ݀ ܬܶܕܡܘ̣ܪܬܳܐ ܒܥܳܠܡܳܐ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܐܳܘ ܡܳܪܳܐ ܛܳܒܳܐ ܘܪܳܚܶܡ ܐ̱ܢܳܫ̈ܳܐ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܬܶܥ̣ܒܶܕ ܠܰܢ ܟܰܪܡܳܐ ܓܰܒܝܳܐ ܕܡܰܝ̇ܬܶܐ ܦܺܐܪ̈ܶܐ ܕܙܰܕܝ̣ܩܘ̣ܬܳܐ ܐܰܝܟܰܢܳܐ ܕܥܰܡ ܦܳܠ̈ܚܶܐ ܟܰܫܝ̣ܪ̈ܶܐ ܗܳܢܽܘܢ ܕܰܒܟܰܪܡܳܟ ܡܶܢ ܨܰܦܪܳܐ ܘܰܥܕܰܡܳܐ ܠܪܰܡܫܳܐ ܦܠ̣ܰܚܘ̱ ܢܶܫ̇ܬܘܶܐ ܠܰܐܓܪܳܐ ܡܫܰܡܠܝܳܐ ܘܪܘ̣ܚܳܢܳܝܳܐ: ܘܰܕܢܶܫ̇ܬܘܶܐ ܚ̣ܰܕܬܳܐܝ̣ܬ ܡܶܢ ܝܰܠܕܳܐ ܕܰܓܦܶܬܳܐ ܪܘ̣ܚܳܢܳܝܬܳܐ ܒܡܶܫܬܘ̣ܬܳܟ ܗܳܝ̇ ܕܐܶܬ̣ܛܰܝܒܰܬ݀ ܡܶܢܳܟ: ܠܗܳܢܽܘܢ ܕܢܰܨܝ̣ܚܳܐܝ̣ܬ ܘܟܺܐܢܳܐܝ̣ܬ ܘܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܐܶܬܬܰܠܡ̣ܰܕܘ̱ ܠܳܟ: ܘܢܰܩ̣ܦܘ̣ܗ̱ܝ ܠܰܒܪܳܟ ܚܰܒܝ̣ܒܳܐ: ܘܐܰܝܟܰܢܳܐ ܕܫܰܘ̈ܬܳܦܶܐ ܗ̣ܘܰܝܢܰܢ ܕܚܰܫܶܗ ܘܰܕܡܰܘܬܶܗ ܐܳܦ ܒܚܰܝ̈ܶܐ ܚܰܕ̈ܬܶܐ ܘܠܳܐ ܡܶܫܬܰܪ̈ܝܳܢܶܐ ܕܝ̣ܠܶܗ: ܘܰܕܢܶܫ̇ܬܰܘܬܰܦ ܒܰܩܝܳܡܬܶܗ ܕܡܶܣ̣ܬܰܟܝܳܐ: ܘܒܐܝ̣ܕܰܘ̈ܗ̱ܝ ܘܥܰܡܶܗ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܦܺܐܪ̈ܶܐ ܕܣܶܦ̈ܘܳܬܰܢ ܘܬܰܘܕ̈ܝܳܬܳܐ ܕܠܶܫܳܢܰܝ̈ܢ: ܩܰܒܶܠ ܡܳܪܝܳܐ ܡܳܪܰܢ ܐܰܝܟ ܕܶܒܚ̈ܶܐ ܡܩܰܒ̈ܠܶܐ ܘܦܝ̣ܪ̈ܡܶܐ ܗܰܢܺܝ̈ܶܐܐ ܕܠܰܢܝܳܚܳܟ ܡܶܬ̣ܩܰܪܒܝ̣ܢ: ܘܒܰܪܶܟ ܠܰܡܩܰܪ̈ܒܳܢܶܐ: ܘܚܰܣܳܐ ܚܰܘ̈ܒܶܐ ܕܡܰܣ̈ܟܠܳܢܶܐ: ܕܐܰܢ̱ܬ ܗ̱ܘ̣ ܗܰܘ ܕܐܶܡ̣ܰܪܬ ܕܰܒܰܚܘ̱ ܠܰܐܠܳܗܳܐ ܬܰܘܕܝ̣ܬܳܐ: ܕܶܒܚ̈ܰܘܗ̱ܝ ܪܘ̣ܚܳܐ ܡܰܟܝ̣ܟܬܳܐ: ܗܳܟܰܢܳܐ ܐܰܫܘܳܐ ܠܰܢ ܕܰܢ̇ܟܰܗܶܢ ܠܳܟ ܐܰܡܝ̣ܢܳܐܝ̣ܬ: ܡܶܛܽܠ ܕܠܳܐ ܨܒ̣ܰܝܬ ܒܕܶܒ̈ܚܶܐ ܢܳܡܘ̣̈ܣܳܝܶܐ ܘܠܳܐ ܒܝܰܩ̈ܕܶܐ ܛܶܠܳܢ̈ܳܝܶܐ ܐܶܬܪܰܥܝ̣ܬ: ܐܶܠܳܐ ܒܕܶܒܚܶܗ ܡܚܰܣܝܳܢܳܐ ܕܰܒܪܳܟ ܚܰܒܝ̣ܒܳܐ ܐܨܛܒ̣ܰܝܬ ܘܗܘ̣ ܫܩ̣ܰܠ ܒܰܩܢܘ̣ܡܶܗ ܚܛܳܗܰܘ̈ܗ̱ܝ ܕܥܳܠܡܳܐ: ܕܠܶܗ ܥܰܡ ܪܘ̣ܚܳܟ ܩܰܕܝ̣ܫܳܐ ܫܘ̣ܒܚܳܐ ܘܐܝ̣ܩܳܪܳܐ ܘܪܘ̣ܡܪܳܡܳܐ ܥܰܡ ܩܘ̣ܒܳܠܛܰܝܒܘ̣ܬܳܐ ܘܣܶܓܕܬܳܐ ܢ̇ܩܰܪܶܒ ܠܥܳܠܡܝ̣ܢ܀