ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܒܳܪܘ̣ܝܳܐ ܚܰܟܝ̣ܡܳܐ ܕܰܒܛܰܝܒܘ̣ܬܶܗ ܠܗܳܢܳܐ ܟܽܠ ܐܰܝܬܝ̣ ܠܰܗܘܳܝܳܐ: ܠܗܰܘ̇ ܦܳܪܘ̣ܩܳܐ ܘܰܡܫܰܘܙܒܳܢܳܐ ܬܰܩܝ̣ܦܳܐ: ܕܰܒܪܶܚܡܰܬ݀ ܐ̱ܢܳܫܘ̣ܬܶܗ ܚܠܳܦ ܗܳܢܳܐ ܟܽܠ ܢܰܦܫܶܗ ܣܳܡ̣ ܦܘ̣ܪܩܳܢܳܐ: ܠܗܰܘ̇ ܠܡܺܐܢܳܐ ܕܫܰܝܢܳܐ ܕܒܶܗ ܠܰܐܝ̈ܳܐ ܘܰܡܛܰܪ̈ܦܰܝ ܒܰܚܛܝ̣ܬܳܐ ܐܶܫܟܰܚ̣ܘ̱ ܠܢܰܦܫܗܽܘܢ ܢܝܳܚܳܐ: ܠܗܰܘ̇ ܢܰܘܚܳܐ ܕܰܫܠܳܡܳܐ ܕܒܶܗ ܛܥܝ̣̈ܢܰܝ ܡܰܘ̈ܒܠܶܐ ܝܰܩܝ̣ܪ̈ܳܬܳܐ ܕܢܳܡܘ̣ܣܳܐ ܩܢ̣ܰܘ ܚܘ̣ܪܳܪܳܐ: ܠܗܰܘ̇ ܙܰܕܝ̣ܩܳܐ ܕܡܶܛܽܠ ܚܰܛܳܝ̈ܶܐ ܗܘ̣ ܠܶܗ ܥܒ̣ܰܕ ܚܛܝ̣ܬܳܐ: ܠܗܰܘ̇ ܐܳܣܝܳܐ ܚܰܟܝ̣ܡܳܐ ܕܰܚܠܳܦ ܟܪ̈ܝ̣ܗܶܐ ܡܢ̣ܳܐ ܢܰܦܫܶܗ ܟܪܝ̣ܗܳܐ ܕܢ̣ܰܐܣܶܐ ܟܺܐܒܰܝ̈ܗܽܘܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܠܝ̣ܬܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܢܘ̣ܗܪܳܐ ܫܰܪܝ̣ܪܳܐ ܘܠܳܐ ܡܶܬ̣ܕܰܪܟܳܢܳܐ: ܘܝܳܨܘ̣ܦܳܐ ܘܰܡܥܰܕܪܳܢܳܐ ܕܟܽܠ: ܗܰܘ̣ ܕܰܒܥܰܙܝ̣ܙܘ̣ܬܳܐ ܕܕܶܢܚܳܟ ܡܰܢܗܰܪ ܐܰܢ̱ܬ ܠܟܽܠܗܶܝܢ ܦܶܢ̈ܝܳܬܳܐ: ܘܰܠܨܰܠܡܳܟ ܠܒܰܪܢܳܫܳܐ ܒܪܝ̣ܫܝ̣ܬ ܒ̣ܪܰܝܬ ܘܡܶܢ ܫܘ̣ܒܚܳܐ ܘܫܽܘ̈ܘ̣ܟܳܢܶܐ ܕܪܘ̣ܚܳܟ ܩܰܕܝ̣ܫܳܐ ܡܠ̣ܰܝܬܳܝܗ̱ܝ: ܘܟܰܕ ܥܒ̣ܰܪ ܥܰܠ ܦܘ̣ܩܕܳܢܳܐ ܕܝ̣ܠܳܟ ܐܶܣܬܠܝ̣ ܡ̣ܶܢ ܐܰܬܪܳܐ ܕܚܰܝ̈ܶܐ ܘܰܗ̣ܘܳܐ ܛܪܝ̣ܕܳܐ ܡܶܢ ܦܰܪܕܰܝܣܳܐ: ܒܗܽܘܢ ܒܪ̈ܰܚܡܶܐ ܕܝ̣ܠܳܟ ܚܳܣ̣ܬ ܥܠܰܘܗ̱ܝ ܕܐܰܥ̣ܬܶܩ ܗ̱ܘܳܐ ܘܰܒܠܝ̣ ܒܰܚܒܳܠܳܐ ܘܫ̣ܰܕܰܪܬ ܒܪܳܐ ܕܝ̣ܠܳܟ ܠܦܘ̣ܪܩܳܢܳܐ ܕܝ̣ܠܶܗ ܗܰܘ ܕܡ̣ܶܢ ܒܬܘ̣ܠܬܳܐ ܩܰܕܝ̣ܫܬܳܐ ܐܶܬܝ̣ܠܶܕ: ܘܒܰܡܕܰܒܪܳܢܘ̣ܬܳܐ ܕܝ̣ܠܶܗ ܦܳܪܘ̣ܩܳܝܬܳܐ ܘܡܰܥܒܕܰܬ݀ ܚܰܝ̈ܶܐ: ܥܨܳܒܳܐ ܘܚܘ̣ܠܡܳܢܳܐ ܫܰܟ̣ܶܢ ܠܗܰܘ̇ ܕܰܟܪܝ̣ܗ ܗ̱ܘܳܐ ܘܰܡܛܰܪܛܰܫ ܒܫܘ̣ܚܬܳܐ ܣܝܳܢܳܝܬܳܐ: ܘܐܝ̣ܕܳܐ ܕܥܘ̣ܕܪ̈ܳܢܶܐ ܐܰܘܫ̣ܶܛ ܠܶܗ ܘܥܰܠ ܡܰܚ̈ܘܳܬܳܐ ܕܝ̣ܠܶܗ ܚܰܡܪܳܐ ܘܡܶܫܚܳܐ ܢ̣ܨܰܠ: ܘܰܠܥܰܪܦܶܠܳܐ ܐܒܠܳܢܳܝܬܳܐ ܕܚܰܫܰܘ̈ܗ̱ܝ ܒܚܰܫܶܗ ܩܦ̣ܰܠ: ܘܰܡ̣ܠܳܐ ܡ̣ܶܢ ܢܘ̣ܗܪܳܐ ܕܝ̣ܕܰܥܬܳܐ ܕܝ̣ܠܶܗ ܠܟܽܠܳܗ̇ ܗܳܝ̇ ܕܰܬܚܶܝܬ ܫܡܰܝܳܐ: ܘܐܰܝܟ ܙܰܠܝ̣ܩܳܐ ܫܒܝ̣ܚܳܐ ܐܶܬ̣ܚܙܝ̣ ܘܒܰܕܡܘ̣ܬ ܠܰܡܦܺܐܕܳܐ ܕܢܘ̣ܗܪܳܐ ܒ̣ܰܕܶܩ ܠܰܢ ܥܰܠ ܐܘ̣ܪܚܳܐ ܕܚܰܝ̈ܶܐ ܕܢ̇ܶܪܕܶܐ ܒܳܗ̇: ܘܗܰܕܳܝܳܐ ܠܘܳܬ ܫܪܳܪܳܐ ܠܰܢ ܗ̣ܘܳܐ: ܘܒܶܝܬ ܘܰܥܕܳܐ ܕܟܽܠ ܛܳܒ̈ܳܬܳܐ: ܘܰܠܡܺܐܢܳܐ ܕܡܶܢ ܟܽܠ ܓܰܠ̱̈ܠܶܐ ܫܓܝ̣̈ܫܶܐ ܘܥܳܠ̈ܡܳܢܳܝܶܐ ܠܰܢ ܐܶܬ̣ܚܰܘܝ̣: ܘܢܰܘܚܳܐ ܓܡܝ̣ܪܳܐ ܕܡܶܢ ܠܶܐܘܬܳܐ ܘܛܘ̣ܪ̈ܳܦܶܐ ܘܡܰܘ̈ܒܠܶܐ ܝܰܩܝ̣ܪ̈ܳܬܳܐ ܕܢܳܡܘ̣ܣܳܐ ܠܰܢ ܐܶܫܬܟܰܚ: ܘܦܘ̣ܩܕܳܢܳܐ ܚ̣ܰܕܬܳܐ ܕܢܝ̣ܪܳܐ ܩܰܠܝ̣ܠܳܐ ܕܡܰܟܝ̣ܟܘ̣ܬܳܐ ܬܰܪܥܝ̣ܬܳܐ ܢܝ̣ܚܬܳܐ ܐܰܠ̣ܶܦ ܠܰܢ: ܕܒܶܗ ܢܝܳܚܳܐ ܓܡܝ̣ܪܳܐ ܠܢܰܦܫܰܢ ܐܶܫܟ̣ܰܚܢ: ܘܗܳܫܳܐ ܥܰܡ ܚܰܕܘ̣ܬܳܐ ܕܠܶܒܳܐ ܘܰܪܘܳܙܳܐ ܘܰܦܨܝ̣ܚܘ̣ܬܳܐ ܕܬܰܪܥܝ̣ܬܳܐ ܪܳܘܙܝ̣ܢܰܢ ܒܦܘ̣ܪܩܳܢܳܐ ܕܒܐܝ̣̈ܕܰܘܗ̱ܝ ܐܶܫܬܰܟܰܢ ܠܰܢ: ܘܰܒܣܶܦ̈ܘܳܬܰܢ ܡܩܰܠܣܝ̣ܢܰܢ ܓܰܠܝܳܐܝ̣ܬ ܘܰܒܚܘ̣̈ܫܳܒܰܝܢ ܟܰܣܝܳܐܝ̣ܬ ܡܰܘ̇ܕܶܝܢܰܢ: ܘܰܒܨܶܒ̈ܥܳܬܰܢ ܠܰܡ̈ܦܺܐܕܶܐ ܠܒܝ̣ܟܝ̣ܢܰܢ: ܘܰܠܒܰܪܢܳܫܰܢ ܥܰܬܝ̣ܩܳܐ ܫܳܠ̇ܚܝ̣ܢܰܢ: ܘܰܒܙܰܗܪܝ̣ܪ̈ܶܐ ܢܘ̣ܗܪ̈ܳܢܳܝܶܐ ܡܶܬ̣ܬܰܒܪܩܝ̣ܢܰܢ: ܠܰܕܡܘ̣ܬܳܐ ܕܒܳܟ ܠܗܰܘ ܚ̣ܰܕܬܳܐ ܠܳܒܫܝ̣ܢܰܢ: ܘܡܶܢ ܗܳܪܟܳܐ ܠܘܰܥܕܶܗ ܕܢܘ̣ܗܪܳܐ ܡܶܬ̣ܡܰܢܥܝ̣ܢܰܢ: ܘܥܰܡ ܢܒܺܝܳܐ ܕܰܘܝ̣ܕ ܐܳܡ̇ܪܝ̣ܢܰܢ: ܕܒܐܝ̣ܡܳܡܳܐ ܒܢܘ̣ܗܪܳܟ ܢ̇ܶܬܢܗܰܪ: ܘܰܒܠܶܠܝܳܐ ܒܳܟ ܥܰܡܘ̣ܕܳܐ ܕܢܘ̣ܗܪܳܐ ܢ̇ܶܪܕܶܐ: ܘܚܘ̣̈ܫܳܒܶܐ ܘܬܰܪ̈ܥܝܳܬܳܐ ܕܝ̣ܠܰܢ ܒܳܟ ܢܘ̣ܗܪܳܐ ܕܰܫܪܳܪܳܐ ܢ̣ܶܬܢܰܗܪܽܘܢ: ܘܒܰܥ̈ܒܳܕܶܐ ܕܙܰܕܝ̣ܩܘ̣ܬܳܐ ܢܶܦ̇ܠܘ̣ܚ: ܘܰܡܛܰܝ̈ܒܶܐ ܠܰܡ̣ܩܰܒܳܠܘ̣ ܠܚܰܫܳܐ ܦܳܪܘ̣ܩܳܝܳܐ ܘܡܰܥܒܶܕ ܚܰܝ̈ܶܐ ܕܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ ܢ̇ܶܗܘܶܐ: ܗܰܘ ܕܰܠܡܺܐܢܳܐ ܕܦܘ̣ܪܩܳܢܳܐ ܗܳܘܶܐ ܠܰܢ ܠܡܰܠܟܘ̣ܬܳܟ ܕܠܳܐ ܦܳܛܪܳܐ: ܘܥܰܡ ܒܬܘ̣̈ܠܳܬܳܐ ܚܰܟܝ̣̈ܡܳܬܳܐ ܒܠܰܡ̈ܦܺܐܕܶܐ ܕܢܘ̣ܗܪܳܐ ܢ̇ܶܦܓܰܥ ܒܳܟ: ܟܰܕ ܠܳܐ ܡܛܰܦܛܦܝ̣ܢ ܫܪ̈ܳܓܰܝܢ: ܘܰܣܢܝ̣ܩܝ̣ܢ ܥܰܠ ܡܶܫܚܳܐ ܕܰܥܒ̈ܳܕܶܐ ܛܳܒ̈ܶܐ: ܐܶܠܳܐ ܚܠܳܦ ܠܰܡܦܝ̣̈ܕܶܐ ܡܶܫܬܰܪ̈ܝܳܢܶܐ ܕܗܳܫܳܐ ܕܒܐܝ̣̈ܕܰܝܢ ܠܒܝ̣ܟܝ̣ܢܰܢ: ܚܠܳܦ ܥܺܕܬܳܐ ܩܰܕܝ̣ܫܬܳܐ ܒܬܰܨܒܝ̣ܬܳܐ ܕܝ̣ܠܳܗ̇ ܚܳܙܶܝܢܰܢ: ܬܰܡܳܢ ܒܰܓܢܽܘܢܳܟ ܗܰܘ ܫܒܝ̣ܚܳܐ ܢ̣ܰܢܗܪܽܘܢ ܠܰܡ̈ܦܺܐܕܶܐ ܕܢܰܦ̈ܫܳܬܰܢ ܒܡܶܫܚܳܐ ܕܰܡܪܰܚܡܳܢܘ̣ܬܳܐ: ܘܥܰܡ ܕܰܟܝܘ̣ܬܳܐ ܕܠܶܒܳܐ ܘܨܘ̣ܠܳܠܳܐ ܕܬܰܪܥܝ̣ܬܳܐ: ܘܚܘ̣ܪܳܪܳܐ ܓܡܝ̣ܪܳܐ ܕܡܶܢ ܒܝ̣̈ܫܳܬܳܐ: ܘܰܓܗܳܝܬܳܐ ܟܘ̣ܠܳܢܳܝܬܳܐ ܕܡܶܢ ܛܘ̣ܪܳܦܳܐ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ ܘܰܠܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀