ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܠܳܐ ܡܳܪܝ̱ ܬ̣ܶܗܘܶܐ ܕܠܳܐ ܦܺܐܪ̈ܶܐ ܐܰܪܥܳܐ ܕܨܶܒܝܳܢܰܢ: ܐܰܝܟ ܟܰܪܡܳܐ ܗܰܘ̇ ܐܝ̣ܣܰܪܐܠܳܝܳܐ ܕܰܚܠܳܦ ܥܶܢ̈ܒܶܐ ܥܒ̣ܰܕ ܚܰܪ̈ܘ̣ܒܶܐ: ܐܶܠܳܐ ܫܒܺܫ̈ܳܬܳܐ ܕܰܢܨܝ̣̈ܒܳܢ ܒܳܟ ܐܰܝܟ ܓܦܶܬܳܐ ܘܰܥܢ̈ܳܩܶܐ ܕܰܫܬܝ̣̈ܠܳܢ ܒܳܟ ܣܰܬܳܐ: ܢܶܛܥ̈ܢܳܢ ܦܺܐܪ̈ܶܐ ܕܰܡܚܰܕ̈ܝܳܢ ܘܐܳܕ̈ܫܶܐ ܒܰܣܝ̣̈ܡܶܐ ܕܰܪܚܝ̣ܡܝ̣ܢ: ܘܢ̣ܶܚܕܶܐ ܒܰܢ ܐܰܒܘ̣ܟ: ܘܢ̣ܶܫܬܰܒܰܚ ܡܶܢܰܢ ܥܰܡܳܟ ܒܫܰܘܝܘ̣ܬ ܐܘ̣ܣܺܝܰܐ ܥܰܡ ܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܠܳܟ ܬܶܫܒܘ̣ܚܬܳܐ ܘܬܰܘܕܝ̣ܬܳܐ ܦܰܠܳܚܳܐ ܕܩܘ̣ܫܬܳܐ: ܘܡܳܪܶܐ ܟܰܪܡܳܐ ܕܰܫܪܳܪܳܐ: ܕܰܓܦܶܬܳܐ ܢܨܰܒ̣ܬ ܠܳܟ ܒܰܝܢܳܬ ܥܰܡ̱̈ܡܶܐ ܡܶܨܪ̈ܳܝܶܐ: ܘܰܒܚܰܝ̈ܠܶܐ ܘܬܶܕܡܪ̈ܳܬܳܐ ܐܰܦܶܩ̣ܬܳܗ̇ ܘܰܡܠ̣ܳܬ݀ ܐܰܪܥܳܐ ܡܶܢܳܗ̇ ܘܰܛܥܶܡ̣ܬܳܟ ܦܺܐܪ̈ܶܐ ܕܙܳܕܩܝ̣ܢ ܠܳܟ: ܘܦܰܠܳܚ̈ܶܝܗ̇ ܩܛܰܠ̣ܘ̱ ܠܰܢܒܺܝܰܝ̈ܟ ܒܓܰܘ ܟܰܪܡܳܐ: ܘܠܰܒܪܳܟ ܚܰܒܝ̣ܒܳܐ ܙܩܰܦ̣ܘ̱ ܟܳܗ̈ܢܶܝܗ̇: ܘܥܰܩ̣ܪܳܗ̇ ܘܰܫ̣ܕܳܗ̇ ܘܗܳܐ ܡܶܬ̣ܬܕܝ̣ܫܳܐ ܡܶܢ ܥܰܡ̱̈ܡܶܐ: ܘܰܠܥܺܕܬܳܐ ܢ̣ܨܰܒ ܚܠܳܦܶܝܗ̇: ܘܗܳܐ ܝܳܗ̇ܒܳܐ ܠܶܗ ܦܺܐܪ̈ܶܐ ܚܠܰܝ̈ܳܐ ܕܬܶܫܒܘ̣ܚܬܳܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܓܢܝ̣ܙܳܐ ܘܐܰܒܳܐ ܘܡܳܪܳܐ ܕܟܽܠ ܘܥܳܒܘ̣ܕܳܐ ܕܟܽܠ: ܗܰܘ ܕܰܒ̣ܪܰܝܬ ܠܥܳܠܡܳܐ ܗܳܢܳܐ ܡܶܬܚܰܙܝܳܢܳܐ ܘܗܘ̣ܠܳܢܳܝܳܐ: ܘܐܰܩܝ̣ܡܬ ܒܶܗ ܡܰܠܟܳܐ ܘܡܳܪܳܐ ܠܒܰܪܢܳܫܳܐ ܩܰܕܡܳܝܳܐ ܒܨܰܠܡܳܐ ܕܫܘ̣ܒܚܳܟ ܘܰܕܡܘ̣ܬܳܐ ܕܪܰܒܘ̣ܬܳܟ ܐܰܪܥܳܢܳܐ ܟܝ̣ܬ ܘܰܫܡܰܝܳܢܳܐ: ܕܒܰܚܣܳܡܶܗ ܕܒܝ̣ܫܳܐ ܢܦ̣ܰܠ ܡܶܢ ܕܘ̣ܝܳܪܳܐ ܕܝ̣ܠܶܗ ܥܕܶܝܢܳܝܳܐ: ܟܰܕ ܛܥ̣ܳܐ ܘܠܳܐ ܢ̣ܰܛܪܶܗ ܠܦܘ̣ܩܕܳܢܳܐ ܕܣܳܡ̣ܬ ܠܶܗ: ܘܐܶܙܕܟܝ̣ ܡܶܢ ܛܥܳܡܬܳܐ ܡܰܪܝ̣ܪܬܳܐ ܘܡܶܢ ܐܝ̣ܠܳܢܳܐ ܕܚܰܝ̈ܶܐ: ܠܰܐܟܣܘ̣ܪܺܝܰܐ ܕܳܘܺܝ̣ܬܳܐ ܐܶܫ̣ܬܕܝ̣ ܘܠܳܐ ܦܳܫ̣ ܒܳܬܰܪܟܶܢ ܡܶܢ ܐܺܝܳܠܳܐ ܕܛܰܝܒܘ̣ܬܳܟ: ܟܰܕ ܛܳܒ ܒܝ̣̈ܫܳܬܳܐ ܣܰܓܺܝ̈ܳܐܬܳܐ ܚܠܳܦܰܘܗ̱ܝ ܣܒܰܠ̣ܬ ܘܣܰܝܒ̣ܰܪܬ: ܘܡܶܛܽܠ ܩܝܳܡܳܐ ܕܝ̣ܠܳܟ ܕܥܰܡ ܟܺܐܢ̈ܶܐ ܩܰܕ̈ܡܳܝܶܐ ܘܪ̈ܝ̣ܫܰܝ ܐܰܒܳܗ̈ܳܬܳܐ ܐܒܪܳܗܳܡ ܘܐܝ̣ܣܚܳܩ ܘܝܰܥܩܘ̣ܒ ܢ̣ܛܰܪܬ ܩܝܳܡܳܐ ܘܛܰܝܒܘ̣ܬܳܐ ܠܥܰܡܳܐ ܕܝ̣ܠܳܟ ܐܝ̣ܣܪܳܐܝܶܠ ܚܰܒܝ̣ܒܳܐ ܗܰܘ ܕܡܶܢ ܥܰܡ̱̈ܡܶܐ ܓܒ̣ܰܝܬܳܝܗ̱ܝ ܠܳܟ ܘܰܫܡܳܟ ܐܶܬ̣ܩܪܝ̣ ܥܠܰܘܗ̱ܝ:ܓܦܶܬܳܐ ܗܳܝ̇ ܕܡܶܢ ܡܶܨܪܶܝܢ ܒܚܰܝ̈ܠܶܐ ܬܡܝ̣̈ܗܶܐ ܘܒܳܐܬܳܘ̈ܬܳܐ ܣܰܓܺܝ̈ܳܐܬܳܐ ܐܰܦܶܩ̣ܳܬܗ̇ ܘܐܰܘܒ̣ܶܕܬ ܥܰܡ̱̈ܡܶܐ ܘܰܢܨܰܒ̣ܳܬܗ̇ ܘܰܡܠ̣ܳܬ݀ ܐܰܪܥܳܐ ܡܶܢܳܗ̇: ܘܛܘ̣ܪ̈ܶܐ ܐܶܬ̣ܟܰܣܝ̣ܘ ܡܶܢ ܛܶܠܳܠܳܗ̇ ܘܪ̈ܳܡܳܬܳܐ ܡܶܢ ܥܰܘܦ̈ܶܝܗ̇: ܟܰܪܡܳܐ ܗܰܘ ܓܰܒܝܳܐ ܘܡܶܬܝܰܕܥܳܢܳܐ ܕܒܘ̣ܟܪܳܐ ܐܶܬ̣ܩܪܝ̣ ܘܚܰܒܝ̣ܒܳܐ: ܗܰܘ ܕܒܰܣܝܳܓܳܐ ܢܳܡܘ̣ܣܳܝܳܐ ܐܶܬܬܣܝ̣ܓ ܘܐܶܬ̣ܚܰܣܰܢ: ܘܡܰܥܨܰܪܬܳܐ ܕܟܘ̣̈ܗܳܢܶܐ ܢܳܡܘ̣̈ܣܳܝܶܐ ܘܛܶܠܳܢ̈ܳܝܶܐ ܐܶܬܚ̣ܦܰܪ ܒܶܗ: ܘܡܰܓܕܠܳܐ ܪܳܡܳܐ ܕܰܩܝܳܡܳܟ ܩܰܕܝ̣ܫܳܐ ܒܢ̣ܰܝܬ ܒܶܗ: ܘܰܒܡܶܛܪ̈ܶܐ ܢܒܺܝ̈ܳܝܶܐ ܐܰܫܩܝ̣ܬ ܘܪܰܒܝ̣ܬܳܝܗ̱ܝ: ܘܰܠܦܰܠܳܚ̈ܶܐ ܙܪ̈ܝ̣ܙܶܐ ܣܳܦܪ̈ܰܝ ܥܰܡܳܐ ܐܰܫܠܶܡ̣ܬܳܝܗ̱ܝ ܐܰܟܡܰܢ ܕܰܒܡܰܪܬܝܳܢܘ̣ܬܳܐ ܘܣܳܥܘ̣ܪ̈ܘܳܬܳܐ ܛܳܒ̈ܳܬܳܐ ܢ̣ܶܬܦܠܰܚ: ܘܦܺܐܪ̈ܶܐ ܫܰܦܝ̣ܪ̈ܶܐ ܢ̣ܶܬܶܠ: ܘܰܒܙܰܒܢܳܐ ܕܥܰܠ̈ܠܳܬܳܐ ܠܥܰܒܕܰܝ̈ܟ ܢܒܺܝ̈ܶܐ ܩܰܕܝ̣̈ܫܶܐ ܫ̣ܰܕܰܪܬ ܠܘܳܬ ܦܰܠ̈ܳܚܶܐ ܡܰܐܝ̣̈ܺܢܶܐ ܕܒܐܝ̣̈ܕܰܝܗܽܘܢ ܪܝ̣ܫܝ̣ܬܳܐ ܕܦܺܐܪ̈ܶܐ ܛܳܒ̈ܶܐ ܢ̣ܰܝܬܽܘܢ ܠܳܟ: ܘܗ̣ܶܢܽܘܢ ܒܓܘ̣ܡܕܳܢܘ̣ܬܗܽܘܢ ܠܰܘ ܒܰܠܚܘ̣ܕ ܦܺܐܪ̈ܶܐ ܠܳܐ ܩܰܪܶܒ̣ܘ̱: ܐܶܠܳܐ ܠܥܰܒܕܰܝ̈ܟ ܚܰܒܝ̣̈ܒܶܐ ܒܝ̣̈ܫܳܬܳܐ ܐܰܣܒ̣ܶܠܘ̱: ܘܰܠܚܰܕ ܕܳܢܘ̣ܗ̱ܝ ܘܠܰܐ̱ܚܪܺܢܳܐ ܡܚܰܐܘܽܘ̣ܗ̱ܝ: ܘܰܠܚܰܕ ܪܰܕܦܘ̣ܗ̱ܝ ܘܠܰܐ̱ܚܪܺܢܳܐ ܨܰܥܪܘ̣ܗ̱ܝ: ܘܰܠܚܰܕ ܨܰܠܦܘ̣ܗ̱ܝ ܘܠܰܐ̱ܚܪܺܢܳܐ ܩܰܛܠܘ̣ܗ̱ܝ: ܘܰܐܝܟ ܕܰܠܟܘ̣ܐܳܪܗܽܘܢ ܘܟܘ̣ܚܳܕܗܽܘܢ ܠܰܒܪܳܟ ܚܰܒܝ̣ܒܳܐ ܫ̣ܰܕܰܪܬ ܠܘܳܬܗܽܘܢ ܘܟܰܕ ܚ̣ܰܙܐܘܽܘ̣ܗ̱ܝ ܕܡܰܟܝ̣ܟ ܘܢܝ̣ܚ ܘܰܡܫܰܝܰܢ ܒܰܝܢܳܬܗܽܘܢ ܫ̣ܳܛܘ̣ܗ̱ܝ ܘܕܰܝܘܳܢܳܐ ܘܫܳܡܪܳܝܳܐ ܩ̣ܪܰܐܘܽܘ̣ܗ̱ܝ: ܘܟܽܠ ܚܰܫܝ̣̈ܢ ܐܰܣܒ̣ܠܘ̣ܗ̱ܝ ܘܟܽܠ ܨܰܥܪ̈ܝ̣ܢ ܦ̣ܰܪܥܘ̣ܗ̱ܝ: ܘܰܒܒܶܝܬ ܕܝ̣ܢܳܐ ܐܰܥ̣ܠܘ̣ܗ̱ܝ ܘܐܰܩܝ̣ܡܘ̣ܗ̱ܝ: ܘܢܰܚ̈ܬܶܐ ܕܒܶܙܚܳܐ ܐܰܠܒܫܘ̣ܗ̱ܝ: ܘܟܰܕ ܝ̣ܕܰܥܘ̱ ܕܗܘ̣ܝܘ̣ ܝܳܪܬܳܐ ܠܒܰܪ ܡܶܢ ܟܰܪܡܳܐ ܐܰܦ̣ܩܘ̣ܗ̱ܝ ܘܥܰܠ ܩܰܝܣܳܐ ܙܰܩ̣ܦܘ̣ܗ̱ܝ: ܘܰܚܠܳܦ ܦܺܐܪ̈ܶܐ ܚܠ̈ܰܝܳܐ ܚܰܠܳܐ ܘܰܡܪܳܪ̈ܶܐ ܐܰܫܩ̣ܝܘ̣ܗ̱ܝ: ܐܰܢ̱ܬ ܕܶܝܢ ܡܳܪܶܗ ܕܟܰܪܡܳܐ ܘܢܳܨܘ̣ܒܶܗ ܟܺܐܢܳܐܝ̣ܬ ܦܪܰܥ̣ܬ ܐܶܢܽܘܢ: ܟܰܕ ܠܟܰܪܡܳܐ ܠܝ̣ܛܳܐ ܕܰܚܠܳܦ ܥܶܢ̈ܒܶܐ ܝܰܗ̣ܒ ܚܰܪ̈ܘ̣ܒܶܐ ܥܩ̣ܰܪܬܳܝܗ̱ܝ: ܘܒܶܝܬ ܥܰܡ̱̈ܡܶܐ ܒ̣ܰܕܰܪܬܳܝܗ̱ܝ: ܘܰܠܬܶܡܗܳܐ ܘܠܰܕܝܳܫܳܐ ܥܒ̣ܰܕܬܳܝܗ̱ܝ ܘܚܰܝ̈ܘܳܬܳܐ ܕܒܰܪܳܐ ܪ̈ܰܥܝܳܝܗ̱ܝ: ܘܢܘ̣ܪܳܐ ܐܰܪܡܝ̣ܬ ܒܫܰܒܘ̣̈ܩܰܘܗ̱ܝ: ܘܰܣܝܳܓܶܗ ܢܳܡܘ̣ܣܳܐ ܬܪܰܥ̣ܬܳܝܗ̱ܝ ܘܰܠܡܰܓܕܠܶܗ ܥܰܫܝ̣ܢܳܐ ܣܚܰܦ̣ܬܳܝܗ̱ܝ ܘܰܠܡܰܥܨܰܪܬܳܐ ܕܟܘ̣̈ܗܳܢܰܘܗ̱ܝ ܒܰܛܶܠ̣ܬܳܗ̇: ܘܰܢܨܰܒ̣ܬ ܠܳܟ ܚܠܳܦܰܘܗ̱ܝ ܟܰܪܡܳܐ ܛܳܒܳܐ: ܥܰܡܳܐ ܚ̣ܰܕܬܳܐ ܗܰܘ ܕܡ̣ܶܢ ܥܰܡ̱̈ܡܶܐ: ܥܺܕܬܳܐ ܕܡܶܢ ܐܶܡ̈ܘܳܬܳܐ ܘܛܘ̣̈ܗܡܶܐ ܐܶܬܟܰܢ̣ܫܰܬ݀ : ܗܳܝ̇ ܕܒܰܕܡܶܗ ܕܝ̣ܚܝ̣ܕܳܝܳܟ ܐܶܬܦ̣ܰܪܩܰܬ݀ ܘܡܶܢ ܛܳܥܝܘ̣ܬܳܐ ܕܰܦܬܰܟܪ̈ܶܐ ܠܝ̣ܕܰܥܬܳܐ ܕܝ̣ܠܳܟ ܐܶܬܦ̣ܰܢܝܰܬ݀ : ܗܳܝ̇ ܕܝܰܠ̈ܕܶܝܗ̇ ܢܳܛܪܝ̣ܢ ܫܪܳܪܳܟ ܘܰܒܢܶܝ̈ܗ̇ ܐܰܒܽܘܢ ܩܳܪܶܝܢ ܠܳܟ: ܗܳܝ ܕܰܒܡܰܘܬܶܗ ܕܰܒܪܳܟ ܝ̣ܚܝ̣ܕܳܝܳܐ ܚܬܝ̣ܪܳܐ: ܘܰܒܚܰܫܰܘ̈ܗ̱ܝ ܩܰܕܝ̣̈ܫܶܐ ܡܶܫ̣ܬܰܒܗܪܳܐ: ܗܳܝ ܕܡܶܛܽܠܳܬܳܗ̇ ܢܒܺܝܳܐ ܩ̣ܰܕܶܡ ܐܰܟ݂ܪܶܙ: ܕܰܣܓܝ̣ܘ ܒܢܶܝ̈ܗ̇ ܕܨܳܕܺܝ̣ܬܳܐ ܝܰܬܝ̣ܪ ܡܶܢ ܒܢܶܝ̈ܗ̇ ܕܰܒܥܝ̣ܠܬܳܐ: ܗܳܝ̇ ܕܰܡܦܝ̣ܣܝ̣ܢܰܢ ܠܳܟ ܡܳܪܝܳܐ ܕܬ̣ܰܛܶܠ ܥܠܶܝܗ̇ ܝܰܡܝ̣ܢܳܟ: ܘܰܫܚܘ̣ܩ ܒܰܕܪܳܥܳܟ ܥܰܫܝ̣ܢܳܐ ܠܣܳܢ̈ܶܐܝܗ̇: ܘܒܰܛܶܠ ܒܥܘ̣ܫܢܳܟ ܘܰܣܬܘ̣ܪ ܠܣܳܩܘ̣ܪ̈ܶܝܗ̇: ܘܟܰܢܶܫ ܠܪ̈ܰܚܝ̣ܩܶܝܗ̇: ܘܢܰܛܰܪ ܠܩܰܪ̈ܝ̣ܒܶܝܗ̇: ܘܚܰܕܳܐ ܠܪ̈ܳܥܰܘܳܬܳܗ̇: ܘܐܰܦܨܰܚ ܠܟܳܗ̈ܢܶܝܗ̇: ܩܰܕܶܫ ܠܰܡܫܰܡܫܳܢܶܝ̈ܗ̇: ܘܢܰܟܶܦ ܠܟܽܠܗܽܘܢ ܛܶܟܣܶܝ̈ܗ̇ ܘܐܳܦ ܠܥܰܢܝ̣̈ܕܶܐ ܕܰܦ̣ܛܰܪܘ̱ ܡܶܢܳܗ̇ ܐܰܢܝ̣ܚ ܐܶܢܽܘܢ ܒܰܐܘ̈ܘܳܢܶܐ ܛܘ̣ܒ̈ܬܳܢܶܐ ܕܝ̣ܠܳܟ ܐܰܝܟܰܢܳܐ ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝܢ܀