ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܪܳܥܝܳܐ ܛܳܒܳܐ ܕܝܰܗ̣ܒ ܢܰܦܫܶܗ ܠܩܶܛܠܳܐ ܘܰܦܪܰܩ ܡܰܪܥܝ̣ܬܶܗ ܡܶܢ ܕܺܐܒ̈ܶܐ ܚܳܛܘ̣̈ܦܶܐ: ܠܗܰܘ ܒܰܣܝ̣ܡܳܐ ܕܣܰܝܒ̣ܰܪ ܚܰܫ̈ܶܐ ܡܶܢ ܛܰܡ̈ܶܐܐ: ܘܐܰܠ̣ܶܦ ܬܶܫܒ̈ܚܳܬܳܐ ܠܣܳܓܘ̣̈ܕܶܐ: ܒܰܪ ܚܺܐܪ̈ܶܐ ܕܫܰܥ̣ܒܶܕ ܢܰܦܫܶܗ ܠܣܘ̣ܪܳܩܳܐ ܐ̱ܢܳܫܳܝܳܐ ܘܩܰܒܶܠ ܒܶܙܚܳܐ ܘܡܰܘܬܳܐ ܘܰܦ̣ܪܰܩ ܠܥܳܠܡܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܦܶܠܓܶܗ ܕܝܰܘܡܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܽܘ̣ܒܚܳܐ ܠܳܟ ܐܰܠܳܗܳܐ ܡܶܠܬܳܐ: ܕܟܰܕ ܐܶܬܡܰܟ̣ܰܟܬ ܠܘܳܬ ܪܰܘܡܳܟ ܟ̣ܰܬܰܪܬ ܐܶܣ̣ܬܰܪܰܩܬ ܒܡܰܠܝܘ̣ܬܳܟ ܩܰܘܝ̣ܬ: ܘܐܶܬܓܰܫ̣ܰܡܬ ܘܡܶܢ ܪܘ̣ܚܳܢܳܝܘ̣ܬܳܟ ܠܳܐ ܐܰܪܚܶܩ̣ܬ: ܘܐܶܬܒܰܪܢܰܫ̣ܬ ܘܐܰܠܳܗܘ̣ܬܳܟ ܠܳܐ ܐܘܒ̣ܶܕܬ: ܬܰܘܕܝ̣ܬܳܐ ܠܳܟ ܕܐܶܬܬܚ̣ܶܕܬ ܘܠܳܐ ܥ̣ܨܰܝܬ: ܘܐܶܬ̣ܢ̣ܰܓܰܕܬ ܘܠܳܐ ܒܰܓܶܢ̣ܬ: ܘܐܶܬܩܰܦ̣ܰܚܬ ܘܠܳܐ ܐܶܬܟܡ̣ܰܪܬ: ܘܐܶܬܒܰܙܰܚ̣ܬ ܘܠܳܐ ܪܰܛܶܢ̣ܬ: ܘܐܶܫ̣ܬܰܐܰܠܬ ܘܠܳܐ ܦܰܢܝ̣ܬ: ܘܐܶܬܕܒ̣ܰܪܬ ܐܰܝܟ ܐܶܡܪܳܐ ܠܢܶܟܣܬܳܐ ܘܠܳܐ ܡ̣ܰܠܶܠܬ: ܘܐܰܫܠ̣ܚܘ̣ܟ ܢܰܚ̈ܬܰܝܟ ܘܠܳܐ ܐܶܬܪܗܶܒ̣ܬ: ܘܐܰܠܒ̣ܫܘ̣ܟ ܟܠܰܐܡܝ̣ܣ ܘܠܳܐ ܐܶܫ̣ܬܐܶܠܬ: ܘܩܰܒ̣ܥܘ̣ܟ ܒܰܙܩܝ̣ܦܳܐ ܘܠܳܐ ܐܶܬ̣ܬܦܝ̣ܪܬ: ܘܐܰܣܒ̣ܠܘ̣ܟ ܚܰܫ̈ܶܐ ܘܡܶܢ ܝܳܬܳܟ ܠܳܐ ܐܶܫ̣ܬܰܓܢܝ̣ܬ: ܘܐܶܬܟܰܠ̣ܰܠܬ ܒܟܘ̣̈ܒܶܐ ܘܠܳܐ ܐܶܬ̣ܟܠܝ̣ܬ: ܘܩ̣ܰܪܶܒܘ̱ ܠܳܟ ܚܰܠܳܐ ܘܠܳܐ ܐܶܬ̣ܚܪܝ̣ܬ: ܫܘ̣ܒܚܳܐ ܠܢܰܓܝ̣ܪܘ̣ܬ ܪܘ̣ܚܳܟ ܥܰܠ ܐܰܝܠܶܝܢ ܕܐܰܣܒ̣ܠܘ̣ܟ ܗܳܠܶܝܢ ܡܨܰܠܶܐ ܗ̱ܘܰܝܬ: ܘܫܘ̣ܒܩܳܢܳܐ ܡܶܢ ܠܘܳܬ ܐܰܒܳܐ ܕܝ̣ܠܳܟ ܠܗܽܘܢ ܐܰܝܬܝ̣ܬ: ܘܰܚ̣ܙܳܬܳܟ ܡܰܕܢܚܳܐ ܘܐܶܬܟܰܡ̣ܪܰܬ݀ ܘܐܰܨܕܰܬ݀ ܒܳܟ ܡܰܥܪܒܳܐ ܘܐܶܬ̣ܬܙܝ̣ܥܰܬ݀ : ܘܫܰܪܟܳܐ ܕܦܶܢܝ̈ܳܬܳܐ ܐܶܬܪ̈ܗܶܒܝ̱: ܘܰܚ̣ܙܳܟ ܗ̱ܘܳܐ ܫܶܡܫܳܐ ܒܪܰܘܡܳܐ ܘܐܶܫܬܰܓܢܝ̣: ܘܣܰܗܪܳܐ ܒܰܫܡܰܝܳܐ ܐܶܬ̣ܒܰܠܗܝ̣: ܘܟܰܘ̈ܟܒܶܐ ܒܰܪܩܝ̣ܥܳܐ ܘܰܢ̣ܬܰܪܘ̱: ܘܦܰܓܪ̈ܶܐ ܕܥܰܢܝ̣̈ܕܶܐ ܐܶܬܢܰܚ̣ܰܡܘ̱: ܘܐܰܦܰܝ̈ ܬܰܪܥܳܐ ܕܗܰܝܟܠܐ ܐܶܣܬܕܶܩ: ܘܛܘ̣ܪ̈ܶܐ ܘܪ̈ܳܡܳܬܳܐ ܐܶܬ̣ܦܰܫܰܪܘ̱: ܘܚܶܫܘ̣ܟܳܐ ܥܰܠ ܐܰܦܰܝ̈ ܬܺܐܒܶܝܠ ܐܶܬ̣ܩܪܶܡ: ܘܠܶܠܝܳܐ ܡܶܨܥܰܬ݀ ܛܰܗܪܳܐ ܐܶܬ̣ܚܙܝ̣: ܘܡܰܘܬܳܐ ܡܶـܼܢܫܶܝܠ ܐܶܫ̣ܬܰܦܰܠ: ܘܰܛܪܘ̣ܢܘ̣ܬܗܽܘܢ ܕܫܺܐܕ̈ܶܐ ܐܶܫ̣ܬܰܪܝܰܬ݀ ܘܰܚܛܝ̣ܬܳܐ ܐܶܬ̣ܒܰܛܠܰܬ݀ ܘܓܶܢܣܳܐ ܕܰܒܢܰܝ̈ܢܳܫܳܐ ܐܶܬ̣ܦܪܶܩ: ܠܳܟ ܐܰܠܳܗܳܐ ܕܰܒܚܘ̣ܒܳܟ ܠܗܳܢܳܐ ܟܽܠܶܗ ܡܘ̣ܟܳܟܳܐ ܡܶܛܽܠ ܦܘ̣ܪܩܳܢܰܢ ܐܶܬܪܟܶܢ̣ܬ ܡܶܬ̣ܟܰܫܦܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܟܰܕ ܫܳܐܠܝ̣ܢܰܢ ܡ̣ܶܢ ܡܪܰܚܡܳܢܘ̣ܬܳܟ ܕܰܫܡܳܟ ܩܰܕܝ̣ܫܳܐ ܬܪܰܡ̣ܪܶܡ ܒܰܢ: ܘܫܰܘ̈ܬܳܦܶܐ ܕܚܰܫܳܟ ܘܰܕܫܘ̣ܒܚܳܐ ܕܡܰܠܟܘ̣ܬܳܟ ܬܶܥ̣ܒܶܕ ܠܰܢ: ܘܝ̣ܕܰܥܬܳܐ ܕܗܰܘ̇ ܪܰܘܡܳܐ ܘܥܘ̣ܡܩܳܐ ܘܰܦܬܳܝܳܐ ܘܐܘ̣ܪܟܳܐ ܦܳܪܘ̣ܩܳܐܝ̣ܬ ܐܰܚ̣ܶܫ ܠܟܽܠܗܽܘܢ ܣܰܘ̈ܦܶܐ ܐܰܩܢܳܐ ܠܰܢ: ܘܰܕܢܶܨ̇ܛܠܶܒ ܠܥܳܠܡܳܐ ܘܰܠܟܽܠܗܶܝܢ ܪ̈ܓܝ̣ܓܳܬܶܗ ܚܰܝܶܠ ܠܰܢ: ܘܰܕܢܶܫ̇ܬܰܒܗܰܪ ܒܰܙܩܝ̣ܦܳܟ ܡܫܰܒܚܳܐ ܐܰܥܒܶܕ ܒܰܢ: ܘܰܕܟܽܠ ܝܘ̣ܡ ܓܰܢ̱ܒܳܪܳܐܝ̣ܬ ܒܢܰܦ̈ܫܳܬܰܢ ܢܶܫ̇ܩܠܝ̣ܘܗ̱ܝ ܐܰܫܘܳܐ ܠܰܢ: ܘܐܰܝܟ ܕܒܳܐܬܳܐ ܕܚܝ̣ܠܬܳܐ ܕܐܶܬܝܰܗ̣ܒܰܬ݀ ܠܕܳܚ̈ܠܰܝܟ ܒܢܝ̣ܫܶܗ ܚܰܝܳܐ ܢܰܛܰܪ ܠܰܢ: ܘܰܠܙܰܠܝ̣̈ܩܰܘܗ̱ܝ ܫܒܝ̣̈ܚܶܐ ܘܐܰܠܳܗ̈ܳܝܶܐ ܐܰܨܡܰܚ ܒܰܢ: ܘܰܒܚܰܡܪܳܐ ܕܚܘ̣ܒܳܟ ܩܰܕܝ̣ܫܳܐ ܐܰܪܘܳܐ ܠܰܢ: ܘܰܠܫܰܘܬܳܦܘ̣ܬܳܐ ܕܦܶܨܚܳܟ ܡܰܚܝܳܢܳܐ ܡܰܢܰܥ ܠܰܢ: ܘܕܰܢ̇ܥܰܕܥܶܕ ܒܕܰܟܝܘ̣ܬܳܐ ܠܰܩܝܳܡܬܳܟ ܡܫܰܒܰܚܬܳܐ ܛܰܝܶܒ ܠܰܢ: ܘܰܕܢܶܚ̇ܕܶܐ ܒܫܘ̣ܒܩܳܢܳܐ ܕܰܚܛܳܗܰܝ̈ܢ ܘܰܕܥܰܢܝ̣̈ܕܰܝܢ ܡܗܰܝ̈ܡܢܶܐ ܫܰܟܶܢ ܠܰܢ: ܐܰܝܟܰܢܳܐ ܕܰܚܢܰܢ ܘܶܗ̣ܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀