ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܩܰܕܝ̣ܫܳܐ ܘܝܳܗܘ̣ܒܳܐ ܕܩܰܕܝ̣ܫܘ̣ܬܳܐ: ܘܰܡܥܝ̣ܢܳܐ ܕܟܽܠܳܗ̇ ܒܰܣܝ̣ܡܘ̣ܬܳܐ: ܕܰܒܟܽܠܡܶܕܶܡ ܐܶܬ̣ܕܰܡܝ̣ ܠܰܢ ܣܛܰܪ ܡ̣ܶܢ ܚܛܝ̣ܬܳܐ: ܘܰܒܨܰܘܡܶܗ ܩܰܕܝ̣ܫܳܐ ܣܰܚ̣ܦܶܗ ܠܡܳܪܘ̣ܕܳܐ ܣܳܢܳܐܐ ܕܐ̱ܢܳܫܘ̣ܬܳܐ: ܘܰܕܪܰܫ̣ ܠܰܢ ܐܘ̣ܪܚܳܐ ܕܰܬܝܳܒܘ̣ܬܳܐ: ܘܡܰܥܰܠܬܳܐ ܕܰܠܡܰܠܟܘ̣ܬܳܐ ܕܰܫܡܰܝܳܐ: ܒܝܰܕ ܥܰܡ̈ܠܶܐ ܕܰܡܝܰܬܪ̈ܳܬܳܐ ܘܰܢܙܝ̣ܪܘ̣ܬܳܐ ܕܡ̣ܶܢ ܡܶܐܟ̈ܠܳܬܳܐ: ܘܰܐܠ̣ܶܦ ܠܰܢ ܕܠܳܐ ܗ̱ܘܳܐ ܒܠܰܥܒܘ̣ܬܳܐ ܕܰܪ̈ܓܝ̣ܓܳܬܳܐ ܗܰܢܺܝ̈ܳܐܬܳܐ ܫܟܝ̣ܚܝ̣ܢ ܚܰܝ̈ܶܐ ܠܢܰܦ̈ܫܳܬܳܐ: ܐܶܠܳܐ ܒܪܶܚܡܰܬ݀ ܡܶܠܬܳܐ ܡܬܰܪܣܝܳܢܝ̣ܬܳܐ ܕܰܠܗܰܘܢܳܐ ܠܒܰܝܬܳܝܽܘܬܳܐ ܕܝ̣ܠܶܗ ܡܰܣܩܳܐ: ܕܰܚܠܳܦ ܡܕܰܒܪܳܢܘ̣ܬܳܐ ܕܝ̣ܠܶܗ ܕܰܚܠܳܦܰܝܢ ܫܘ̣ܒܚܳܐ ܘܐܝ̣ܩܳܪܳܐ ܘܣܶܓ݂ܕܬܳܐ ܘܪܘܡܪܡܐ ܢ̇ܩܰܪܶܒ ܠܶܗ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܝܰܡܳܐ ܕܪ̈ܰܚܡܶܐ ܘܰܬܗܘ̣ܡܳܐ ܕܰܚܢܳܢܳܐ: ܗܰܘ̇ ܣܰܒܪܳܐ ܕܚܰܝ̈ܶܐ ܘܦܘ̣ܪܩܳܢܳܐ ܕܢܰܦ̈ܫܳܬܳܐ: ܗܰܘ̇ ܐܳܣܝܳܐ ܕܟܺܐܒ̈ܶܐ ܘܥܳܨܽܘܒܳܐ ܕܰܡܡܰܚ̈ܰܝܳܐ: ܗܰܘ̇ ܡܒܰܝܳܐܢܳܐ ܕܰܡܥ̈ܳܩܶܐ ܘܳܐܣܝܳܐ ܫܰܪܝ̣ܪܳܐ ܕܰܐܝܠܶܝܢ ܕܒܝ̣ܫܳܐܝ̣ܬ ܥܒܝ̣ܕܝ̣ܢ: ܗܰܘ̇ ܡܳܪܳܐ ܛܳܒܳܐ ܘܥܳܒܘ̣ܕܳܐ ܕܝ̣ܠܰܢ: ܗܰܘ̇ ܕܡܶܛܽܠ ܛܳܒܘ̣ܬܳܐ ܕܝ̣ܠܳܟ ܐܰܥܒ̣ܰܪܬ ܡܶܢܰܢ ܠܠܰܥܒܘ̣ܬܳܐ ܩܰܕܡܳܝܬܳܐ ܗܳܝ̇ ܕܒܰܥܒܳܪ ܦܘ̣ܩܕܳܢܳܐ ܒܦܰܪܕܰܝܣܳܐ ܐܶܬ̣ܥܰܛܰܦܢܰܢ: ܘܰܫܪܰܝܬ ܡܶܢܰܢ ܠܰܓܙܳܪܕܝ̣ܢܳܐ ܕܡܰܘܬܳܐ ܗܰܘ̇ ܕܡܶܛܽܠ ܡܶܐܟܘ̣ܠܬܳܐ ܐܶܬ̣ܓܙܰܪ ܥܠܰܝܢ: ܒܝܰܕ ܨܰܘܡܳܐ ܩܰܕܝ̣ܫܳܐ ܡܰܥܒܶܕ ܚܰܝ̈ܶܐ: ܘܚܰܪܰܪܬ ܠܰܢ ܡ̣ܶܢ ܛܪܘ̣ܢܘ̣ܬܶܗ ܕܣܳܛܳܢܳܐ ܒܥܶܠܕܒܳܒܳܐ: ܘܝܰܗ̣ܒܬ ܙܳܟܘ̣ܬܳܐ ܠܓ݂ܶܢܣܳܐ ܕܝ̣ܠܰܢ ܡܚܝ̣ܠܳܐ: ܘܰܒܦܰܓܪܳܐ ܕܝ̣ܠܳܟ ܩܰܕܝ̣ܫܳܐ ܕܰܐܚܠܶܡ̣ܬ ܠܟܺܐܒ̈ܶܐ ܕܰܒܦܰܓܪܳܐ ܕܝ̣ܠܰܢ ܛܡܝ̣ܪܝ̣ܢ ܗ̱ܘܰܘ: ܘܰܗ̣ܘܰܝܬ ܠܰܢ ܪܝ̣ܫܳܐ ܕܚܰܝ̈ܶܐ ܠܥܳܠܡܳܐ ܗܰܘ̇ ܡ̇ܠܶܐ̣ ܛܘ̣̈ܒܶܐ: ܘܠܳܐ ܡܶܟܝ̣ܠ ܒܢܰܝ̈ܳܐ ܠܥܳܠܡܳܐ ܗܳܢܳܐ ܢ̇ܶܗܘܶܐ: ܒܡܰܦܪܝܳܢܘ̣ܬܳܐ ܩܰܕܡܳܝܬܳܐ ܕܰܒܪܶܓܬܳܐ ܐܶܬ̣ܚܰܝܒܰܬ݀: ܐܶܠܳܐ ܒܢܰܝ̈ܳܐ ܚܰܒܝ̣̈ܒܶܐ ܘܝܳܪ̈ܬܶܐ ܕܡܰܠܟܘ̣ܬܳܐ ܫܡܰܝܳܢܝ̣ܬܳܐ: ܘܟܰܕ ܡܶܣܬܰܝܥܝ̣ܢܰܢ ܒܥܘ̣ܕܪܳܢܳܐ ܕܡܶܢܳܟ: ܢ̇ܶܫܬܰܘܫܰܛ ܠܘܳܬ ܟܽܠܳܗ̇ ܕܶܚܠܰܬ݀ ܐܰܠܳܗܳܐ: ܘܰܒܢܰܟܦܘ̣ܬܳܐ ܘܰܒܕܘ̣ܒܳܪ̈ܶܐ ܡܝܰܬܪ̈ܶܐ ܢ̇ܶܫܬܘܶܐ ܠܰܐܬܪܰܢ ܩܰܕܡܳܝܳܐ: ܗܰܘ̇ ܕܒܰܛܥܳܡܬܳܐ ܡܰܪܝ̣ܪܬܳܐ ܐܰܘܒ̣ܶܕܢܰܢ: ܘܠܳܐ ܡܶܟܝ̣ܠ ܠܐܝ̣ܠܳܢܳܐ ܕܝ̣ܕܰܥܬܳܐ ܢ̇ܶܬܩܰܪܰܒ ܕܦܺܐܪܳܐ ܡܡܝ̣ܬܳܢܳܐ ܡܰܘܫܶܛ ܠܰܢ: ܐܶܠܳܐ ܠܳܟ ܦܺܐܪܳܐ ܩܰܕܝ̣ܫܳܐ ܘܐܝ̣ܠܳܢܳܐ ܕܚܰܝ̈ܶܐ ܢ̇ܶܫܬܰܘܫܰܛ: ܐܰܝܟܰܢܳܐ ܕܟܰܕ ܡܶܬܒܰܣܡܝ̣ܢܰܢ ܒܳܟ ܢ̇ܕܽܘܫ ܠܟܽܠܗܽܘܢ ܚܰܫ̈ܶܐ ܕܰܚܛܝ̣ܬܳܐ ܡܰܥܒ̈ܕܳܢܘܳܬܳܐ ܕܪ̈ܘ̣ܚܶܐ ܛܰܢܦ̈ܳܬܳܐ: ܘܰܢ̇ܩܰܪܶܒ ܠܳܟ ܢܰܦ̈ܫܳܬܰܢ ܩܘ̣ܪ̈ܒܳܢܶܐ ܡܩܰܒ̈ܠܶܐ: ܘܦܰܓܪ̈ܰܝܢ ܕܶܒܚܬܳܐ ܠܳܐ ܙܺܐܦܳܢܳܝܬܳܐ: ܘܚܘ̣ܫܳܒ̈ܰܝܢ ܝܰܩ̈ܕܶܐ ܫܰܠ̈ܡܶܐ ܘܬܰܪ̈ܥܝܳܬܰܢ ܦܝ̣ܪ̈ܡܶܐ ܕܟܰܝ̈ܳܐ: ܘܗܘ̣ܦܳܟ݂ܰܢ ܟܽܠܶܗ ܡܽܘܪܽܘܢ ܒܰܣܝ̣ܡܳܐ ܘܪܝ̣ܚܳܐ ܡܶܬܝܰܕܥܳܢܳܐ: ܘܫܰܟܶܢ ܠܰܢ ܕܰܒܝܰܘ̈ܡܳܬܳܐ ܗܳܠܶܝܢ ܕܟܰܝ̈ܳܐ ܘܩܰܕܝ̣̈ܫܶܐ: ܕܰܒܨܰܘ̈ܡܶܐ ܘܒܰܨܠܱ̈ܘܳܬܳܐ ܘܰܒܬܶܫܡ̈ܫܳܬܳܐ ܕܰܟ̈ܝܳܬܳܐ ܘܰܥܒܴ̈ܕܶܐ ܛܳܒ̈ܶܐ: ܢ̇ܕܰܟܶܐ ܢܰܦܫ̈ܳܬܳܐ ܕܝ̣ܠܰܢ ܡ̣ܶܢ ܟܽܠܶܗ ܛܘ̣ܠܫܳܐ ܕܰܚܛܝ̣ܬܳܐ: ܘܢ̇ܶܫܟܰܚ ܚܢܳܢܳܐ ܘܪ̈ܰܚܡܶܐ ܘܚܘ̣ܣܳܝܳܐ ܡ̣ܶܢ ܒܶܝܬ ܓܰܙܳܟ ܡܠܶܐ ܥܘ̣ܕܪ̈ܳܢܶܐ: ܘܐܶܬ̣ܪܰܥܳܐ ܒܬܰܟܫ̈ܦܳܬܳܐ ܘܒܳܥܘ̈ܳܬܳܐ ܕܝ̣ܠܰܢ: ܘܫܰܟܶܢ ܠܰܢ ܚܰܝ̈ܶܐ ܢܰܟ̈ܦܶܐ ܘܕܘ̣ܒܳܪ̈ܶܐ ܡܝܰܬܪ̈ܶܐ: ܘܠܶܒܳܐ ܕܡܶܫܟܰܚ ܕܰܢ̣ܨܽܘܡ ܡ̣ܶܢ ܚܶܪ̈ܝܳܢܶܐ ܘܡܰܨ̈ܘܳܬܳܐ: ܘܠܳܐ ܢ̇ܶܥܠܽܘ̣ܒ ܠܰܚ̈ܕܳܕܶܐ: ܘܒܶܣܬܪܳܐ (ܒܳܬܰܪܟܶܢ) ܢ̇ܰܘܒܶܕ ܚܰܕ ܠܚܰܕ: ܐܶܠܳܐ ܟܰܕ ܫܳܕܶܝܢܰܢ ܡ̣ܶܢ ܠܶܒܰܢ ܠܟܽܠܶܗ ܢܶܟܠܳܐ ܘܥܘ̣ܪ̈ܙܳܠܶܐ ܕܰܚܛܝ̣ܬܳܐ: ܘܰܡܨܰܒܬܝ̣ܢܰܢ ܒܚܘ̣ܒܳܐ ܕܰܠܘܳܬܳܟ ܘܰܠܘܳܬ ܚܕ̈ܳܕܶܐ: ܢ̇ܶܫܬܘܶܐ ܕܢ̇ܶܗܘܶܐ ܠܳܟ ܥܳܢ̈ܳܐ ܢܰܨܺܝ̣ܚܬܳܐ ܘܰܕܠܳܐ ܛܘ̣ܠܫܳܐ ܘܰܕܫܳܘܝܳܐ ܠܰܛܝܳܪܳܟ ܗܰܘ̇ ܕܰܠܥܶܠ: ܟܰܕ ܡܚܰܪܪܝ̣ܢܰܢ ܡ̣ܶܢ ܟܽܠܶܗ ܚܣܳܡܳܐ ܢ̇ܶܫܬܰܘܬܰܦ ܒܐ̱ܪ̈ܳܙܶܐ ܕܝ̣ܠܳܟ ܣܓܝ̣̈ܕܶܐ ܘܡܰܚ̈ܝܳܢܶܐ: ܘܰܠܦܶܨܚܳܐ ܩܰܕܝ̣ܫܳܐ ܥܰܡ ܚܰܕܘ̣ܬܳܐ ܢ̇ܡܰܢܰܥ: ܘܰܒܢܰܚ̈ܬܶܐ ܕܰܡܝܰܬܪܘ̣ܬܳܐ ܢ̇ܶܦܘ̣ܩ ܠܐܘ̣ܪܥܳܟ: ܒܡܶܐܬܝ̣ܬܳܟ ܕܬܰܪܬܶܝܢ: ܘܥܰܡ ܩܰܕܝ̣̈ܫܶܐ ܕܡ̣ܶܢ ܥܳܠܰܡ ܫܦܰܪܘ̱ ܠܳܟ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܢܘ̣ܪܳܐ ܠܳܐ ܗܘ̣ܠܳܢܳܝܬܳܐ ܕܕܰܥ̣ܟܰܬ݀ ܠܫܰܠܗܶܒܝ̣ܬܳܐ ܝܳܩܶܕܬܳܐ ܡ̣ܶܢ ܦܰܓܪ̈ܶܐ ܕܰܛܠܳܝ̈ܶܐ ܢܰܟ̈ܦܶܐ ܘܨܰܝ̈ܳܡܶܐ: ܫܓܘ̣ܪ ܡܳܪܝ̱ ܢܘ̣ܪܶܗ ܕܚܘ̣ܒܳܟ ܒܬܰܪ̈ܥܝܳܬܳܐ ܕܝ̣ܠܰܢ: ܘܫܰܠܗܶܒ ܠܪ̈ܶܥܝܳܢܰܝܢ ܒܦܘ̣ܩ̈ܕܳܢܰܝܟ ܘܩܰܒܶܠ ܠܒܶܣ̈ܡܶܐ ܕܥܰܠ ܢܘ̣ܪܳܐ ܐܰܥ̣ܛܰܪܢܰܢ: ܘܬ̣ܰܣܶܩܝ̱ ܬܰܘܕܝ̣ܬܳܐ ܕܣܶܦ̈ܘܳܬܰܢ ܠܰܐܬܪܳܐ ܡܗܰܕܰܪ ܒܫܘ̣ܦܪܳܐ ܡܬܘ̣ܡܳܝܳܐ: ܐܰܝܟܰܢܳܐ ܕܰܒܨܰܘܡܳܐ ܕܰܟܝܳܐ ܘܩܰܕܝ̣ܫܳܐ ܢ̇ܶܫܬܰܘܙܰܒ ܡ̣ܶܢ ܝܰܩܕܳܢܳܐ ܕܢܘ̣ܪܳܐ ܗܳܝ̇ ܕܠܳܐ ܕܳܥܟܳܐ: ܘܰܢ̇ܫܰܒܰܚ ܠܛܰܝܒܘ̣ܬܳܟ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀