ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܚܰܣܝܳܢܳܐ ܕܚܰܘܒ̈ܶܐ: ܠܗܰܘ̇ ܡܩܰܒܠܳܢܳܐ ܕܬܰܝ̈ܳܒܶܐ: ܘܨܳܒܶܐ ܒܚܰܝ̈ܶܐ ܘܡܶܬܦܰܢܝܳܢܘ̣ܬܳܐ ܕܚܰܛܳܝ̈ܶܐ ܠܗܰܘ̇ ܡܩܰܕܫܳܢܳܐ ܕܛܰܡ̈ܶܐܐ: ܘܰܡܚܰܠܠܳܢܳܐ ܕܰܡܟܰܬܡ̈ܶܐ: ܠܗܰܘ̇ ܕܗܘ̣ ܒܰܠܚܘ̣ܕܰܘܗ̱ܝ ܐܝ̣ܬܰܘܗ̱ܝ ܡܚܰܣܝܳܢܳܐ ܕܫܘ̣ܪ̈ܥܳܬܳܐ ܕܝ̣ܠܰܢ: ܚܰܣܳܐ ܡܳܪܝ̱ ܘܕܰܟܳܐ ܠܝ̣: ܘܰܠܥܰܒ̈ܕܰܝܟ ܡܗܰܝܡ̈ܢܶܐ ܕܰܒܟܽܠ ܐܰܬܰܪ ܡܶܢ ܟܽܠ ܩܘ̣ܛܪܳܓܳܐ ܘܛܘ̣ܠܫܳܐ ܘܡܘ̣ܡܳܐ ܕܰܚܛܝ̣ܬܳܐ: ܐܰܝܟܰܢܳܐ ܕܟܰܕ ܡܶܢܳܟ ܡܶܬܕܰܟܶܝܢܰܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܦܳܪܘ̣ܩܳܐ ܕܰܛܠܝ̣̈ܡܶܐ: ܫܳܒܘ̣ܩܳܐ ܘܰܡܙܰܕܩܳܢܳܐ ܕܚܰܛܳܝ̈ܶܐ: ܪܳܚܡܳܐ ܘܰܡܩܰܒܠܳܢܳܐ ܕܬܰܝ̈ܳܒܶܐ: ܪܳܥܝܳܐ ܘܰܡܟܰܢܫܳܢܳܐ ܕܰܐܒܝ̣̈ܕܶܐ: ܡܥܰܕܪܳܢܳܐ ܘܩܳܝܽܘ̣ܡܳܐ ܕܰܐܟܣ̈ܢܳܝܶܐ: ܐܰܒܳܐ ܘܝܳܨܽܘܦܳܐ ܕܡܶܣ̈ܟܺܢܶܐ: ܨܳܒܶܐ ܒܬܶܢܚ̈ܳܬܳܐ ܕܰܐܒܝ̣̈ܠܶܐ: ܗܰܘ̇ ܕܒܰܬܝܳܒܘ̣ܬܰܢ ܚܳܕܶܐ ܐܰܢ̱ܬ ܘܨܳܒܶܐ ܐܰܢ̱ܬ ܒܡܶܬܦܰܢܝܳܢܘ̣ܬܳܐ ܕܝ̣ܠܰܢ: ܘܡܶܢ ܒܳܥ̈ܘܳܬܰܢ ܠܳܐ ܡܰܗܡܶܐ ܐܰܢ̱ܬ: ܗܰܘ̇ ܕܰܒܪ̈ܰܚܡܶܐ ܫܦܝ̣ܥ ܐܰܢ̱ܬ: ܘܰܕܥܘ̣ܕܪ̈ܳܢܶܐ ܝܳܨܶܦ ܐܰܢ̱ܬ: ܘܰܠܟܽܠ ܐ̱ܢܳܫ ܒܟܽܠܕܘ̣ܟ ܡܥܰܕܰܪ ܐܰܢ̱ܬ: ܐܰܢ̱ܬ ܡܳܪܝ̱ ܐܳܦ ܗܳܫܳܐ ܥܢܝ̣ ܠܰܢ ܠܚܰܛܳܝ̈ܶܐ ܕܩܳܪܶܝܢܰܢ ܠܳܟ: ܘܠܳܐ ܬ̣ܰܗܡܶܐ ܡܶܢ ܥܘ̣ܕܪ̈ܳܢܶܐ ܘܝܰܨܝ̣ܦܘ̣ܬܳܐ ܕܰܥܠܰܝܢ ܡܶܛܽܠ ܣܰܓܺܝܽܐܘ̣ܬܳܐ ܕܥܰܘ̈ܠܰܝܢ: ܘܰܫܟܝ̣ܪܘ̣ܬܳܐ ܕܰܚܛܳܗ̈ܰܝܢ: ܘܰܢܕܝ̣ܕܘ̣ܬܳܐ ܕܣܘ̣ܥܪ̈ܳܢܰܝܢ: ܐܶܠܳܐ ܐܰܢ̱ܬ ܒܥܝ̣ ܚܠܳܦܰܝܢ: ܘܪܰܥܳܐ ܠܰܓܙܳܡܳܐ ܕܟܺܐܢܘ̣ܬܳܟ ܕܰܥܠܰܝܢ: ܘܰܨܒܝ̣ ܠܰܡܩܰܒܳܠܽܘ̣ ܬܰܟܫ̈ܦܳܬܰܢ: ܟܰܕ ܚܘ̣ܣܳܝܳܐ ܥܳܒܶܕ ܐܰܢ̱ܬ ܕܟܽܠܗܽܘܢ ܚܰܘܒܰܝ̈ܢ: ܘܫܘ̣ܒܩܳܢܳܐ ܕܟܽܠܗܽܘܢ ܚܛܳܗ̈ܰܝܢ: ܘܕܘ̣ܟܳܝܳܐ ܕܟܽܠܗܽܘܢ ܣܰܟܠ̈ܘܳܬܰܢ: ܘܚܘ̣ܠܳܠܳܐ ܕܟܽܠܗܶܝܢ ܟܘ̈ܬܡܳܬܰܢ: ܟܰܕ ܡܳܠܶܐ ܐܰܢ̱ܬ ܬܰܪ̈ܥܝܳܬܰܢ ܕܶܚܠܬܳܟ ܘܡܶܬܬܰܘܝܳܢܘ̣ܬܳܐ ܕܰܠܘܳܬܳܟ: ܟܰܕ ܩܳܦܶܣ ܐܰܢ̱ܬ ܚܶܡܬܳܟ ܘܡܰܥܒܰܪ ܐܰܢ̱ܬ ܠܠܘ̣ܚܳܡܳܐ ܕܪܘ̣ܓܙܳܟ: ܠܰܝܬ ܓܶܝܪ ܪܝ̣ܫܳܐ ܘܠܳܐ ܢܒܺܝܳܐ: ܘܠܳܐ ܡܕܰܒܪܳܢܳܐ ܕܡܶܫܟܰܚ ܒܳܥܶܐ ܦܰܪܶܗܣܺܝܳܐܝ̣ܬ ܚܠܳܦܰܝܢ: ܘܡܰܪܟܶܢ ܪ̈ܰܚܡܰܝܟ ܠܘܳܬܰܢ: ܒܗܳܝ̇ ܕܟܽܠܰܢ ܚ̣ܛܰܝܢܰܢ ܘܰܐܪܫܰܥ̣ܢܰܢ ܩܕܳܡܰܝܟ: ܘܶܐܬ̣ܬܚܶܕܢܰܢ ܒܦܰܚ̈ܶܐ ܕܥܰܘܠܳܐ ܘܒܰܙܢܰܝ̈ܳܐ ܕܣܰܟܠ̈ܘܳܬܳܐ: ܐܶܬܛܡ̣ܰܪܢܰܢ ܒܒܝ̣̈ܫܳܬܳܐ ܘܶܐܫ̣ܬܒܝ̣ܢܰܢ ܒܓܰܠ̱̈ܠܶܐ ܕܰܚܛܝ̣ܬܳܐ: ܘܰܒܠܰܥ̣ܢܰܢ ܡܶܢ ܟܺܐܡ̈ܘ̣ܢܶܐ ܘܡܰܚ̈ܫܘ̣ܠܶܐ ܡܳܪ̈ܘ̣ܕܶܐ: ܘܰܛܒܰܥ̣ܢܰܢ ܒܨܳܡܰܪܬܳܐ ܕܚܶܫܘ̣ܟܳܐ: ܘܰܐܝܟܰܢܳܐ ܢ̇ܶܓܥܶܐ ܠܘܳܬܳܟ: ܕܗܳܐ ܥܢܳܢܳܐ ܕܰܚܛܳܗ̈ܰܝܢ ܡܰܒܗܬܳܐ ܘܰܡܚܰܦܝܳܐ ܠܰܨܠܰܘ̈ܳܬܰܢ: ܡܩܰܪܒܝ̣ܢܰܢ ܠܳܟ ܕܶܝܢ ܥܰܡܰܢ ܘܰܚܠܳܦܰܝܢ ܘܡܶܛܽܠܳܬܰܢ: ܟܽܠܗܽܘܢ ܐܰܝܠܶܝܢ ܕܰܒܕܘ̣ܒܳܪ̈ܰܝܗܽܘܢ ܪܰܥܝܽܘ̣ܟ ܘܒܰܐܓ̈ܘ̣ܢܰܝܗܽܘܢ ܫܦ̣ܰܪܘ̱ ܩܕܳܡܰܝܟ: ܡܰܥ̱ܗܕܝ̣ܢܰܢ ܠܳܟ ܬܘ̣ܒ ܚܰܫܰܘ̈ܗ̱ܝ ܡܝܰܩܪ̈ܶܐ ܘܩܰܕܝ̈ܫܶܐ ܕܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ: ܕܰܒܗܽܘܢ ܬ̣ܶܬܦܝ̣ܣ ܠܰܡܪܰܚܡܳܢܘ̣ܬܳܟ ܕܰܥܠܰܝܢ: ܒܝܰܕ ܨܠܰܘ̈ܳܬܳܐ ܕܰܟܝ̈ܳܬܳܐ ܘܰܡܩܰܒ̈ܠܳܬܳܐ ܕܗܳܝ̇ ܕܡܶܢܳܗ̇ ܐܶܬ̣ܒܰܣܰܪ ܘܶܐܬܝ̣ܠܶܕ ܦܰܓܪܳܢܳܐܝ̣ܬ ܐܰܠܳܗܳܐ ܡܶܠܬܳܐ: ܒܬܘ̣ܠܬܳܐ ܕܠܳܐ ܡܘ̣ܡ ܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܬܘ̣ܒ ܡܦܝ̣ܣܝ̣ܢܰܢ ܠܳܟ ܒܬܰܟܫ̈ܦܳܬܳܐ ܕܟܺܐܢ̈ܶܐ ܒܒܳܥܘ̈ܳܬܳܐ ܕܙܰܕܝ̈ܩܶܐ: ܒܚܘ̣ܒܳܐ ܕܰܢܒܺܝ̈ܶܐ: ܒܰܫܪܳܪܳܐ ܕܰܫܠܝ̣̈ܚܶܐ: ܒܩܶܛܠܳܐ ܕܣܳܗ̈ܕܶܐ: ܒܰܕܡܳܐ ܕܡܰܘܕ̈ܝܳܢܶܐ: ܒܫܘ̣ܩܳܦܳܐ ܕܰܪ̈ܕܝ̣ܦܶܐ: ܕܰܒܬܘ̣ܩ̈ܠܳܬܳܐ ܕܰܐܟܣ̈ܢܳܝܶܐ: ܒܕܶܡ̈ܥܶܐ ܕܬܰܝ̈ܳܒܶܐ: ܒܬܶܢܚ̈ܳܬܳܐ ܕܰܫܚܝ̣̈ܩܶܐ: ܒܙܶܕܩ̈ܳܬܳܐ ܕܰܡܪ̈ܰܚܡܳܢܶܐ: ܒܟܽܠܶܗ ܣܰܒܪܳܐ ܘܕܘ̣ܒܳܪܳܐ ܕܩܰܕܝ̈ܫܶܐ ܕܝ̣ܠܳܟ: ܒܝܰܕ ܕܶܝܢ ܦܝܳܣܳܐ ܕܗܳܠܶܝܢ ܐܳܘ ܡܳܪܝܳܐ: ܩܰܒܶܠ ܦܝ̣ܪ̈ܡܶܐ ܘܬܶܢܚ̈ܳܬܳܐ ܘܰܬܘܳܬ ܢܰܦܫܳܐ ܕܝ̣ܠܰܢ ܚܰܛܳܝ̈ܶܐ ܘܡܰܣܟ̈ܠܳܢܶܐ ܥܰܒ̈ܕܰܝܟ: ܘܶܐܬܕܰܟܰܪ ܠܰܚܢܳܢܳܟ ܘܰܠܪ̈ܰܚܡܰܝܟ ܕܥܰܡ ܓܶܢܣܰܢ: ܘܠܰܩܝ̈ܳܡܶܐ ܘܫܽܘܘ̣̈ܕܳܝܶܐ ܕܝ̣ܠܳܟ ܕܰܠܘܳܬܰܢ: ܘܚܘ̣ܣ ܘܪܰܚܶܡܥܠܰܝܢ: ܘܒܰܛܶܠ ܡܰܪ̈ܕܘܳܬܳܐ ܕܪܘ̣ܓܙܳܐ ܡܶܢܰܢ: ܘܰܐܫܘܳܐ ܠܰܢ ܕܥܰܡ ܐܰܝܠܶܝܢ ܕܰܫܦ̣ܰܪܘ̱ ܠܳܟ ܒܟܽܠܕܳܪ̈ܝ̣ܢ ܢ̇ܫܰܒܰܚ ܠܰܡܪܰܚܡܳܢܘ̣ܬܳܐ ܕܝ̣ܠܳܟ ܐܰܠܳܗܳܐ ܐܰܒܳܐ: ܘܕܝ̣ܚܝ̣ܕܳܝܳܐ ܒܪܳܟ ܘܰܕܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀