ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܙܽܘ̣ܦܳܐ ܡܚܰܠܠܳܢܳܐ ܘܰܡܚܰܣܝܳܢܳܐ: ܕܕܰܟܝ̣ ܥܰܘܠܶܗ ܕܥܳܠܡܳܐ: ܘܚ̣ܰܘܰܪ ܒܰܚܢܳܢܶܗ ܟܘ̣ܬܡ̈ܳܬܳܐ ܕܒܶܝܬ ܐܳܕܳܡ ܒܳܟ ܡܳܪܝ̱ ܢ̣ܶܬܕܰܟܽܘܢ ܥܰܘ̈ܠܰܝܢ ܘܬ̣ܶܬܚܰܠܰܠܝ̱ ܨܳܐܝܘ̣ܬܳܐ ܕܰܥ̈ܒܳܕܰܝܢ ܒܝ̣̈ܫܶܐ: ܘܢ̇ܶܫܬܘܶܐ ܕܟܽܠܶܗ ܙܰܒܢܳܐ ܕܚܰܝ̈ܰܝܢ: ܘܩܰܕܝܫܘ̣ܬܳܐ ܢ̇ܶܦܠܘ̣ܚ ܠܳܟ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝܢ܀

ܦܪܽܘ̣ܡܝܽܘܢ

ܫܘ̣ܒܚܳܐ ܘܩܘ̣ܠܳܣܳܐ ܘܪܘ̣ܡܪܳܡܳܐ: ܠܗܰܘ̇ ܦܳܪܘ̣ܩܳܐ ܕܰܒܨܰܘܡܶܗ ܙܰܗܝܳܐ ܨܰܘܡܳܐ ܐܰܠ̣ܶܦ ܠܰܢ: ܒܰܩܪ̈ܳܒܰܘܗ̱ܝ ܕܥܰܡ ܒܝ̣̈ܫܶܐ: ܬܰܟܬ̈ܘ̣ܫܰܘܗ̱ܝ ܕܰܐܓܘ̣ܢܳܐ ܕܙܰܕܝ̣ܩܘ̣ܬܳܐ ܚܰܘܝ̣ ܠܰܢ: ܘܰܠܘܳܬ ܐܘ̣ܪܚܳܐ ܫܦܝ̣ܬܳܐ ܕܦܘ̣ܪܩܳܢܳܐ ܩ̣ܰܪܶܒ ܠܰܢ: ܘܒܰܫܒܝ̣ܠܳܐ ܕܰܡܥܰܠܶܐ ܠܪܰܘܡܳܐ ܕܰܫܡܰܝܳܐ ܐܰܩܝ̣ܡ ܠܰܢ: ܘܡܰܠܟܘ̣ܬܳܐ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ ܐܶܫ̣ܬܰܘܕܝ̣ ܠܰܢ: ܘܛܘ̣ܒܬܳܢܘ̣ܬܳܐ ܕܠܳܐ ܦܳܛܪܳܐ ܘܠܳܐ ܓܳܡܪܳܐ ܛܰܝܶܒ ܠܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܒܳܥܶܝܢܰܢ ܡ̣ܶܢܟ ܡܳܪܝܳܐ ܐܰܠܳܗܳܐ: ܩܰܕܝ̣ܫܳܐ ܕܡ̣ܶܢ ܩܰܕܝ̣̈ܫܶܐ ܡܶܫܬܰܡܰܫ: ܩܰܕܶܫ ܒܰܫܪܳܪܳܐ ܕܝ̣ܠܳܟ ܦܰܓܪ̈ܰܝܢ ܘܢܰܦ̈ܫܳܬܰܢ ܘܪ̈ܘ̣ܚܳܬܰܢ: ܘܟܰܢܶܫ ܪ̈ܶܥܝܳܢܰܝܢ ܡ̣ܶܢ ܦܶܗܝܳܐ ܡܰܘܒܕܳܢܳܐ ܕܰܣܪܝ̣ܩܘ̣ܬܳܐ: ܕܢ̇ܶܗܘܶܐ ܥܰܡܳܟ ܚܰܕ ܒܥܺܕܬܳܟ ܩܰܕܝ̣ܫܬܳܐ ܘܥܰܡ ܟܪ̈ܘ̣ܒܶܐ ܘܰܣܪ̈ܳܦܶܐ ܙܰܗܝܳܐܝ̣ܬ ܢ̇ܫܰܒܚܳܟ: ܘܰܐܫܘܳܐ ܡܳܪܝ̱ ܒܪ̈ܰܚܡܶܐ ܕܒܰܣܝܡܘ̣ܬܳܟ: ܕܥܰܡ ܟܶܢ̈ܫܶܐ ܘܡܰܫܪ̈ܝܳܬܳܐ ܕܥܝ̣ܪ̈ܶܐ ܢ̇ܙܰܡܰܪ ܠܳܟ ܘܢ̣ܶܫܬܰܦܥܽܘܢ ܪ̈ܰܚܡܰܝܟ ܥܰܠ ܓܶܢܣܰܢ ܡܰܣܟܠܳܢܳܐ: ܘܛܰܠܳܐ ܕܫܘ̣ܒܩܳܢܳܐ ܢ̣ܶܬܪܣܶܣ ܥܰܠ ܛܘ̣ܗܡܰܢ ܕܒܰܚܛܝ̣ܬܳܐ ܐܶܬ̣ܚܰܝܰܒ: ܘܐܰܝܟ ܕܰܐܫ̣ܘܺܝ̣ܬܳܢ ܒܝܰܕ ܪ̈ܰܚܡܰܝܟ ܠܡܰܘܗܰܒܬܳܐ ܕܚܰܝ̈ܶܐ: ܘܦܰܓܪܳܟ ܘܰܕܡܳܟ ܒܛܰܝܒܘ̣ܬܳܟ ܢܳܣ̇ܒܝ̣ܢܰܢ: ܐܰܫܘܳܢ ܘܰܒܗܽܘܢ ܒܪ̈ܰܚܡܰܝܟ ܠܚܘ̣ܣܝܳܐ ܕܚܰܘ̈ܒܶܐ: ܘܰܠܫܘ̣ܒܩܳܢܳܐ ܕܰܚ̈ܛܳܗܶܐ ܘܰܫܒܘ̣ܩ ܡܳܪܝ̱ ܠܡܰܣܟ̈ܠܳܢܶܐ ܚܰܣܳܐ ܠܚܰܝ̈ܳܒܶܐ: ܙܰܕܶܩ ܠܥܰܘ̈ܳܠܶܐ ܚܽܘܢ ܠܚܰܛ̈ܳܝܶܐ ܐܰܦܢܳܐ ܠܛܳܥܰܝ̈ܳܐ ܢܰܟܶܦ ܠܙܰܠܝ̣̈ܠܶܐ: ܐܰܣܳܐ ܠܰܟܪ̈ܝ̣ܗܶܐ: ܐܰܚܠܶܡ ܠܡܰܪ̈ܥܶܐ: ܥܨܽܘ̣ܒ ܠܰܡ̈ܡܰܚܰܝܳܐ: ܒܰܝܰܐ ܠܰܬܒܝ̣ܪ̈ܰܝ ܠܶܒܳܐ: ܐܰܩܝ̣ܡ ܡܳܪܝ̱ ܠܢܰܦ̈ܠܶܐ: ܣܡܘ̣ܟ ܠܰܣܚܝ̣̈ܦܶܐ ܣܰܒܰܥ ܠܟܰܦ̈ܢܶܐ: ܙܽܘܢ ܠܝܰܬܡ̈ܶܐ ܦܰܪܢܶܣ ܠܡܰܣܟ̈ܠܳܢܶܐ ܠܰܒܶܒ ܠܥܰܝܺܝ̣̈ܩܰܝ ܠܶܒܳܐ: ܢܰܛܰܪ ܠܰܓܡܝ̣ܪ̈ܶܐ: ܓܡܘ̣ܪ ܠܰܒ̈ܬܘ̣ܠܶܐ ܟܰܠܶܠ ܠܨܰܝܳܡ̈ܶܐ: ܙܰܗܳܐ ܠܕܰܝܪ̈ܳܝܶܐ ܥܡܰܪ ܒܢܝ̣ܚ̈ܶܐ: ܫܪܝ̣ ܒܡܰܟܝ̈ܟܶܐ ܨܒܝ̣ ܒܰܐܒܝ̣̈ܕܶܐ ܫܰܝܶܢ ܠܰܪ̈ܓܝ̣ܙܶܐ: ܕܰܥܶܟ ܫܓܘ̣ܫ̈ܝܶܐ ܒܰܛܶܠ ܩܪ̈ܳܒܶܐ ܫܰܗܳܐ ܬܰܟܬ̈ܘ̣ܫܶܐ: ܐܰܥܒܰܪ ܩܺܐܪ̈ܣܶܐ ܫܰܠܳܐ ܚܶܪ̈ܝܳܢܶܐ: ܩܰܝܶܡ ܡܳܪܝ̱ ܠܥܺܕܬܳܟ ܐܰܘܪܶܒ ܠܰܒ̈ܢܶܝܗ̇ ܐܰܣܓܳܐ ܫܠܳܡܳܗܿ ܪܰܡܪܶܡ ܩܰܪܢܳܗܿ ܙܰܗܳܐ ܠܰܡܫܰܡ̈ܫܳܢܶܝܗܿ: ܚܰܟܶܡ ܠܪ̈ܳܥܰܘܳܬܳܗܿ ܐܰܢܝ̣ܚ ܠܥܰܠ̈ܳܠܳܢܶܝܗܿ ܒܰܛܶܠ ܡ̣ܶܢܳܗܿ ܣܶܕ̈ܩܶܐ ܘܚܶܪ̈ܝܳܢܶܐ: ܘܟܽܠܗܶܝܢ ܐܶܪ̈ܶܣܝ̣ܣ ܡܫܰܚ̈ܠܦܳܬܳܐ ܘܰܥܒܶܕ ܢܘ̣ܚܳܡܳܐ ܕܙܰܕܝܩܘ̣ܬܳܐ: ܘܕܘ̣ܟܪܳܢܳܐ ܘܥ̱ܘ̣ܗܕܳܢܳܐ ܫܰܦܝ̣ܪܳܐ: ܠܟܽܠܗܽܘܢ ܫܟܝ̣̈ܒܰܝ ܥܰܦܪܳܐ: ܘܰܩܪܝ̣ ܘܰܐܩܝ̣ܡ ܐܶܢܽܘܢ ܡ̣ܶܢ ܝܰܡܝ̣ܢܳܐ ܥܰܡ ܟܺܐܢ̈ܶܐ ܘܥܰܡ ܙܰܕܝ̣̈ܩܶܐ ܕܰܫܦ̣ܰܪܘ̱ ܠܳܟ: ܘܰܚܢܰܢ ܘܗܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܪܰܒܳܐ ܕܰܙܥ̣ܰܪ ܘܰܐܘܪܶܒ ܠܰܢ: ܥܰܬܝ̣ܪܳܐ ܕܶܐܬܡܰܣ̣ܟܰܢ ܘܰܐܥ̣ܬܰܪ ܠܰܢ: ܠܳܐ ܣܢܝ̣ܩܳܐ ܕܨܳܡ̣ ܘܙܰܟܝ̣ ܠܰܢ: ܩܰܒܶܠ ܡܳܪܝ̱ ܦܝ̣ܪܡܰܢ ܘܨܰܘܡܰܢ ܘܰܨ̈ܠܰܘܳܬܰܢ: ܘܡ̣ܶܢ ܡܘ̣ܟܳܟܳܐ ܕܰܚܛܝ̣ܬܳܐ: ܠܘܳܬ ܡܥܰܠܝܘ̣ܬܳܐ ܕܥܘ̣ܬܪ̈ܰܝܟ ܐܰܠܳܗܳܝ̈ܶܐ ܐܰܣܶܩ ܠܰܢ: ܘܟܽܠ ܢܶܫ̈ܒܶܐ ܡܰܘ̈ܒܕܳܢܶܐ ܕܳܐܟܶܠܩܰܪܨܳܐ ܦܣܘ̣ܩ ܡܶܢܰܢ: ܘܗܰܒܠܰܢ ܕܰܒܕܰܟܝܘ̣ܬܳܐ ܕܢܰܦܫܳܐ ܘܰܕܦܰܓܪܳܐ ܢ̇ܶܬܚܙܶܐ ܩܕܳܡܰܝܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܝܰܢ: ܘܰܥܒܶܕ ܕܘ̣ܟܪܳܢܳܐ ܛܳܒܳܐ ܠܥܰܢܝ̣̈ܕܰܝܢ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝܢ܀