ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܡܶܠܬܳܐ ܕܠܳܐ ܡܶܬܡܰܠܰܠ: ܘܢܘ̣ܗܪܳܐ ܡܬܘ̣ܡܳܝܳܐ ܕܠܳܐ ܡܶܬܦܰܫܰܩ: ܟܰܣܝܳܐ ܕܠܳܐ ܡܶܬܕܪܶܟ: ܗܰܘ̇ ܕܶܐܫܬܰܕܰܪ ܡ̣ܶܢ ܐܰܒܳܐ ܓܢܝ̣ܙܳܐ ܠܥܳܠܡܳܐ ܡܶܛܽܠ ܦܘ̣ܪܩܳܢܳܐ ܕܰܓܒܝ̣ܠܬܶܗ ܘܫܽܘܘ̣ܙܳܒܳܐ ܕܥܰܒ̈ܕܰܘܗ̱ܝ ܡ̣ܶܢ ܫܘ̣ܠܛܳܢܶܗ ܕܡܳܪܘ̣ܕܳܐ: ܘܶܐܬܪܰܒܝ̣ ܒܡܘ̣ܫ̈ܚܳܬܳܐ ܐ̱ܢܳܫܳܝ̈ܳܬܳܐ: ܘܩܰܒ̣ܶܠ ܥܠܰܘܗ̱ܝ ܨܰܘܡܳܐ ܘܰܨܠܘ̣ܬܳܐ ܘܚܰܫ̈ܶܐ ܘܠܶܐܘܬܳܐ: ܘܰܗ̣ܘܳܐ ܠܰܢ ܡܰܚܙܝ̣ܬܳܐ ܕܒܶܗ ܢ̇ܶܬܕܰܡܶܐ: ܐܰܫܘܳܐ ܠܰܢ ܡܳܪܝ̱ ܕܰܢ̇ܨܽܘܡ ܠܳܟ ܨܰܘܡܳܐ ܩܰܕܝ̣ܫܳܐ ܕܰܡܚܰܪܰܪ ܡ̣ܶܢ ܟܽܠ ܬܶܛܪܳܐ ܕܰܚܛܝ̣ܬܳܐ: ܘܰܢ̇ܩܰܪܶܒ ܠܳܟ ܢܰܦܫ̈ܳܬܰܢ ܘܦܰܓܪ̈ܰܝܢ ܕܶܒܚܬܳܐ ܚܰܝܬܳܐ ܕܫܳܦܪܳܐ ܠܳܟ: ܘܰܚܢܰܢ ܘܥܰܢܝ̣̈ܕܰܝܢ ܥܰܠ ܐܰܦܰܝ̈ ܦܘ̣ܪܩܳܢܰܢ ܠܳܟ ܢ̇ܫܰܒܰܚ ܠܳܟ ܢ̇ܩܰܠܶܣ: ܠܳܟ ܢ̇ܪܰܡܪܶܡ: ܠܳܟ ܢ̇ܒܰܪܶܟ: ܠܳܟ ܢ̇ܶܣܓܘ̣ܕ: ܠܳܟ ܢ̇ܰܘܕܶܐ: ܠܳܟ ܢ̇ܗܰܠܶܠ: ܠܳܟ ܢ̇ܙܰܡܰܪ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܳܪܳܐ ܡܪܰܚܡܳܢܳܐ ܕܰܢܚ̣ܶܬ ܘܰܗ̣ܘܳܐ ܠܰܢ ܢܝ̣ܫܳܐ ܘܰܕܡܘ̣ܬܳܐ ܕܦܘ̣ܪܩܳܢܳܐ: ܘܚܰܘܝ̣ ܠܰܢ ܒܝܰܕ ܨܰܘܡܶܗ ܫܒܝ̣ܠܳܐ ܡܥܰܠܝܳܐ ܠܪܰܘܡܳܐ ܕܰܫܡܰܝܳܐ: ܠܗܰܘ̇ ܦܳܪܘ̣ܩܳܐ ܕܦܰܪܢܶܣ ܠܰܢ ܐ̱ܪܳܙܳܐ ܕܙܳܟܘ̣ܬܳܐ ܠܘ̣ܩܒܰܠ ܣܳܛܳܢܳܐ: ܘܛܰܝܶܒ ܠܰܢ ܟܠܝ̣ܠܳܐ ܕܢܰܨܝ̣ܚܘ̣ܬܳܐ ܒܝܰܕ ܡܶܫܬܰܡܥܳܢܘ̣ܬܳܐ ܡܝܰܬܰܪܬܳܐ: ܠܗܰܘ̇ ܚܰܝܠܬܳܢܳܐ ܕܝܰܗ̣ܒ ܨܰܘܡܶܗ ܙܰܝܢܳܐ ܠܣܳܓ̈ܘ̣ܕܰܘܗ̱ܝ: ܘܶܐܬ̣ܥܰܠܝ̣ ܠܪܰܘܡܳܐ ܕܢܶܗ̣ܘܶܐ ܡܚܰܝܠܳܢܳܐ ܠܰܡܕܰܡ̈ܝܰـܝ ܒܨܰܘܡܶܗ ܩܰܕܝ̣ܫܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܶܐܬܝ̣ܠܶܕ ܡܬܘ̣ܡܳܐܝ̣ܬ ܡ̣ܶܢ ܥܘ̣ܒܳܐ ܕܰܐܒܘ̣ܗ̱ܝ: ܘܶܐܬܝ̣ܠܶܕ ܡ̣ܶܢ ܒܬܘ̣ܠܬܳܐ ܩܰܕܝ̣ܫܬܳܐ ܡܰܘܠܳܕܳܐ ܬܡܝ̣ܗܳܐ ܘܠܳܐ ܡܶܬܦܰܫܩܳܢܳܐ: ܘܗܰܠ̣ܶܟ ܡܕܰܒܪܳܢܳܐܝ̣ܬ ܥܰܠ ܐܰܪܥܳܐ ܐܰܝܟ ܪܳܥܝܳܐ ܒܳܬܰܪ ܓܙܳܪܶܗ: ܘܡܰܟ̣ܶܟ ܢܰܦܫܶܗ ܒܛܰܝܒܘ̣ܬܶܗ ܐܰܝܟܰܢܳܐ ܕܰܠܚܰܪܡܘ̣ܬܳܐ ܠܳܐ ܡܶܬܬܦܝ̣ܣܳܢܝ̣ܬܳܐ ܕܒܶܠܶܐܝܰܪ ܡܳܪܘ̣ܕܳܐ ܢ̣ܫܰܦܶܠ: ܘܠܰܢ ܚܰܝܠܳܐ ܘܙܳܟܘ̣ܬܳܐ ܢ̣ܫܰܟܶܢ: ܘܒܰܐܓܘ̣ܢܳܐ ܪܘ̣ܚܳܢܳܝܳܐ ܢܶܓܡܘ̣ܪ: ܘܕܘ̣̈ܗܳܢܶܐ ܫܒܝ̣̈ܚܶܐ ܕܢܰܦܫ̈ܳܬܰܢ ܢ̣ܶܡܠܶܐ: ܘܥܰܡ ܣܶܕܪ̈ܶܐ ܕܪ̈ܘ̣ܚܳܢܶܐ ܠܰܢ ܢ̣ܚܰܠܶܛ: ܒܝܰܕ ܐܰܓܘ̣ܢܳܐ ܕܠܘ̣ܩܒܰܠ ܒܝ̣ܫܳܐ ܚܠܳܦܰܝܢ ܣ̣ܕܰܪ: ܗܰܘ̇ ܕܳܐܦ ܚܢܰܢ ܚܳܕܝܳܐܝ̣ܬ ܡܩܰܒܠܝ̣ܢܰܢ ܘܰܦܨܺܝ̣ܚܳܐܝ̣ܬ ܓܳܡܪܝ̣ܢܰܢ: ܘܢ̇ܶܫܬܰܘܫܰܛ ܒܙܰܒܢܳܐ ܗܳܢܳܐ ܠܘܳܬ ܟܽܠܗܶܝܢ ܐܰܝܠܶܝܢ ܕܰܠܘܳܬ ܒܰܝܬܳܝܘ̣ܬܳܐ ܕܝ̣ܠܳܟ ܡܥܰܠ̈ܝܳܢ ܠܰܢ: ܡܶܛܽܠ ܕܙܰܒܢܰܐ ܗ̱ܘ̇ ܕܥܳܒܶܕ ܠܰܢ ܚܰܒܪ̈ܶܐ ܠܪ̈ܘ̣ܚܳܢܶܐ: ܕܙܰܒܢܰܐ ܗ̱ܘ̇ ܕܰܡܚܰܠܶܠ ܨܳܐܬܳܐ: ܠܳܐ ܐ̱ܢܳܫ ܢ̣ܶܬܦܰܠܦܰܠ ܒܰܣܝܳܢܳܐ ܕܣܰܪܝܘ̣ܬܳܐ: ܙܰܒܢܰܐ ܗ̱ܘ̇ ܕܡܶܬܚܰܣܶܝܢ ܒܶܗ ܚܰܘܒ̈ܶܐ: ܠܳܐ ܐ̱ܢܳܫ ܢ̣ܶܥܒܶܕ ܒܶܗ ܬܰܘܣܶܦܬܳܐ ܕܰܚܛܳܗ̈ܶܐ: ܙܰܒܢܰܐ ܗ̱ܘ̇ ܕܡܶܬܦܰܪ̈ܥܳܢ ܒܶܗ ܣܰܟܠ̈ܘܳܬܳܐ: ܠܳܐ ܐ̱ܢܳܫ ܢ̣ܰܘܣܶܦ ܥܰܠ ܣܰܟܠ̈ܘܳܬܶܗ: ܙܰܒܢܰܐ ܗ̱ܘ̇ ܕܡܶܬܠܚܶܝܢ ܒܶܗ ܐܶܫܛܳܪ̈ܶܐ ܥܰܬܝ̣̈ܩܶܐ: ܠܳܐ ܐ̱ܢܳܫ ܢ̣ܚܰܕܶܬ ܒܶܗ ܟܬܳܒܳܐ ܕܣܰܟܠ̈ܘܳܬܶܗ: ܙܰܒܢܰܐ ܗ̱ܘ̇ ܕܡܶܬܬܫܝ̣̈ܓܳܢ ܒܶܗ ܚܒܳܪ̈ܳܬܳܐ ܕܢܰܦܫܳܐ: ܠܳܐ ܐ̱ܢܳܫ ܢ̣ܰܘܣܶܦ ܒܶܗ ܥܰܠ ܟܘ̣ܬܡ̈ܳܬܶܗ: ܙܰܒܢܰܐ ܗ̱ܘ̇ ܕܦܘ̣ܠܚܳܢܳܐ ܕܫܰܦܝ̣ܪ̈ܳܬܳܐ: ܠܳܐ ܐ̱ܢܳܫ ܢ̣ܶܪܚܰܡ ܒܶܗ ܒܶܛܠܳܢܳܐ: ܙܰܒܢܰܐ ܗ̱ܘ̇ ܕܬܶܐܓܘ̣ܪܬܳܐ ܕܝܘ̣ܬܪ̈ܳܢܶܐ: ܠܳܐ ܐ̱ܢܳܫ ܢ̣ܶܬܬܰܗܶܐ ܒܶܗ ܕܠܳܐ ܥܰܡ ܒܰܛܝ̣̈ܠܶܐ ܢ̣ܶܬܚܫܶܒ: ܙܰܒܢܰܐ ܗ̱ܘ̇ ܕܡܰܣܶܩ ܠܰܢ ܠܰܫܡܰܝܳܐ: ܠܳܐ ܐ̱ܢܳܫ ܢ̣ܶܪܚܰܡ ܥܒܳܕ̈ܶܐ ܐܰܪ̈ܥܳܢܳܝܶܐ: ܙܰܒܢܰܐ ܗ̱ܘ̇ ܕܡܶܬܕܰܡܶܝܢ ܒܶܗ ܨܰܝ̈ܳܡܶܐ ܠܡܰܠܰܐܟ̈ܶܐ: ܠܳܐ ܐ̱ܢܳܫ ܢ̣ܶܬܠܰܥܰܒ ܒܳܐܣܘ̣ܛܘ̣ܬܳܐ: ܙܰܒܢܰܐ ܗ̱ܘ̇ ܕܡܶܬܚܰܙܝܳܐ ܒܶܗ ܐܘ̣ܪܚܳܐ ܫܦܝ̣ܬܳܐ ܠܳܐ ܐ̱ܢܳܫ ܢ̣ܗܰܠܶܟ ܒܶܗ ܒܰܫܒܝ̣̈ܠܶܐ ܡܥܰܩ̈ܡܶܐ: ܙܰܒܢܰܐ ܗ̱ܘ̇ ܕܡܶܬܦܬܰܚ ܒܶܗ ܬܰܪܥܳܐ ܕܚܰܝ̈ܶܐ: ܠܳܐ ܐ̱ܢܳܫ ܢܰܗ̣ܡܶܐ ܘܰܠܒܰܪ ܡܶܢܶܗ ܢ̣ܦܘ̣ܫ: ܙܰܒܢܰܐ ܗ̱ܘ̇ ܕܪܳܚܶܡ ܡܘ̣ܟܳܟܳܐ: ܠܳܐ ܐ̱ܢܳܫ ܢ̣ܶܩܢܶܐ ܒܶܗ ܪܳܡܘ̣ܬܳܐ: ܙܰܒܢܰܐ ܗ̱ܘ̇ ܕܰܡܢܰܟ݂ܶܦ ܠܙܰܠܝ̣̈ܠܶܐ: ܠܳܐ ܐ̱ܢܳܫ ܠܳܐ ܢ̣ܶܙܕܰܠܠܽܘܢ ܒܶܗ ܥܛܝ̣̈ܦܰܝ ܐܶܣܟܝ̣ܡܳܐ ܫܰܦܝ̣ܪܳܐ: ܙܰܒܢܰܐ ܗ̱ܘ̇ ܕܰܥܛܝ̣ܦ ܚܰܫܳܐ ܘܟܰܪܝܽܘ̣ܬܳܐ: ܠܳܐ ܐ̱ܢܳܫ ܢ̣ܶܬܚܰܫܰܚ ܒܶܗ ܒܓܘ̣ܚܟܳܐ ܐܰܫܝ̣ܕܳܐ: ܙܰܒܢܰܐ ܗ̱ܘ̇ ܕܪܳܚܶܡ ܕܘ̣ܒܳܪ̈ܶܐ ܫܒܝ̣̈ܚܶܐ: ܠܳܐ ܐ̱ܢܳܫ ܢܶܣ̣ܪܘ̣ܚ ܠܶܫܳܢܶܗ ܒܣܰܢܝ̈ܳܬܳܐ: ܙܰܒܢܰܐ ܗ̱ܘ̇ ܕܨܰܘܡܳܐ: ܙܰܒܢܰܐ ܗ̱ܘ̇ ܕܟܘ̣ܢܳܫ ܝܘ̣ܬܪ̈ܳܢܶܐ: ܙܰܒܢܰܐ ܗ̱ܘ̇ ܕܡܰܥܬܰܪ ܠܠܶܫܳܢܰܢ ܒܬܰܘܕܝ̣ܬܳܐ: ܙܰܒܢܰܐ ܗ̱ܘ̇ ܕܰܡܓܰܪܶܓ ܠܰܢ ܠܡܶܣܥܰܪ ܛܳܒ̈ܳܬܳܐ: ܙܰܒܢܰܐ ܗ̱ܘ̇ ܕܫܳܪܶܐ ܡܶܢܰܢ ܐܰܣܘ̣ܪ̈ܶܐ ܕܰܚܛܝ̣ܬܳܐ: ܙܰܒܢܰܐ ܗ̱ܘ̇ ܕܡܰܩܢܶܐ ܠܬܰܪܥܝ̣ܬܳܐ ܓܶܦ̈ܶܐ ܕܪܘ̣ܚܳܐ ܩܰܕܝ̣ܫܳܐ: ܙܰܒܢܰܐ ܗ̱ܘ̇ ܕܰܡܦܰܠܶܓ ܝܘ̣ܬܪ̈ܳܢܳܐ ܠܰܕܡܰܚܒܝ̣ܢ ܠܶܗ: ܙܰܒܢܰܐ ܗ̱ܘ̇ ܕܰܕܪܰܫ ܠܰܢ ܐܘ̣ܪܚܳܐ ܕܚܰܝ̈ܶܐ ܠܪܰܘܡܳܐ ܕܰܠܥܶܠ: ܙܰܒܢܰܐ ܗ̱ܘ̇ ܕܥܳܨܶܒ ܚܒܳܪ̈ܳܬܳܐ ܕܢܰܦܫܳܐ: ܙܰܒܢܰܐ ܗ̱ܘ̇ ܕܡܳܪܶܩ ܠܫܘ̣ܚܬܳܐ ܕܦܰܓܪ̈ܰܝܢ: ܙܰܒܢܰܐ ܗ̱ܘ̇ ܕܰܡܟܰܠܶܠ ܠܰܢ ܒܰܟܠܝ̣ܠܳܐ ܕܠܳܐ ܚܳܡܶܐ: ܙܰܒܢܰܐ ܗ̱ܘ̇ ܕܡܰܫܠܰܚ ܡܶܢܰܢ ܠܗܘ̣ܦܳܟܳܐ ܕܰܚܛܝ̣ܬܳܐ: ܙܰܒܢܰܐ ܗ̱ܘ̇ ܕܡܰܠܒܶܫ ܠܰܢ ܐܶܣܛܠܳܐ ܫܒܝ̣ܚܬܳܐ: ܙܰܒܢܰܐ ܗ̱ܘ̇ ܕܡܳܠܶܐ ܠܰܢ ܚܘ̣ܒܳܐ ܘܙܳܪܰܥ ܒܰܢ ܫܰܝܢܳܐ: ܙܰܒܢܰܐ ܗ̱ܘ̇ ܕܰܡܕܰܠܶܐ ܠܰܢ ܡ̣ܶܢ ܝܰܡܳܐ ܕܚܰܘܒ̈ܶܐ: ܙܰܒܢܰܐ ܗ̱ܘ̇ ܕܟܺܐܢܘ̣ܬܳܐ ܘܰܕܙܰܕܝ̣ܩܘ̣ܬܳܐ: ܡܶܛܽܠ ܗܳܕܶܐ ܚܢܰܢ ܐܳܘ ܡܳܪܝܳܐ ܕܰܠܚܰܓܳܐ ܗܳܢܳܐ ܕܝܘ̣ܬܪ̈ܳܢܶܐ ܒܪܶܚܡܰܬ݀ ܐ̱ܢܳܫܘ̣ܬܳܟ ܙܰܡܶܢ̣ܬ ܠܰܢ: ܒܳܥܶܝܢܰܢ ܡܶܢܳܟ ܕܶܝܢ ܘܡܶܬܟܰܫܦܝ̣ܢܰܢ ܠܳܟ ܕܰܬܫܰܟܶܢ ܠܰܢ ܚܰܝܠܳܐ ܘܙܳܟܘ̣ܬܳܐ ܕܡܶܢܳܟ ܥܰܠ ܟܽܠܗܶܝܢ ܨܶܢܥ̈ܳܬܶܗ ܕܒܝ̣ܫܳܐ: ܘܠܳܐ ܡܶܨ̈ܛܰܠܝܳܢܶܐ ܘܠܳܐ ܡܶܙܕܰܥ̈ܙܥܳܢܶܐ ܒܗܰܝܡܳܢܘ̣ܬܳܐ ܢ̇ܟܰܬܰܪ: ܘܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢ̇ܨܽܘ̣ܡ: ܘܝ̣ܚܝ̣ܕܳܐܝ̣ܬ ܘܰܫܒܝ̣ܚܳܐܝ̣ܬ ܢ̇ܫܰܡܠܝ̣ܘܗ̱ܝ: ܘܰܚܢܰܢ ܘܥܰܢܝ̣̈ܕܰܝܢ ܒܓܰܠܝܽܘ̣ܬ ܐܰܦ̈ܶܐ ܢ̇ܶܦܓܰܥ ܒܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܚܰܝܠܳܐ ܘܚܶܟܡܬܳܐ ܕܰܐܒܳܐ: ܫܘ̣ܪܳܐ ܬܰܩܝ̣ܦܳܐ ܘܰܕܪܳܥܳܐ ܠܳܐ ܡܶܬܚܰܣܢܳܢܳܐ: ܡܰܠܟܳܐ ܕܡܰܠ̈ܟܶܐ ܘܡܳܪܳܐ ܘܥܳܒܘ̣ܕܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܕܰܒܨܶܒܝܳܢܳܟ ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܡܶܛܽܠ ܦܘ̣ܪܩܳܢܰܢ ܐܶܬ̣ܡܰܟܰܟ݂ܬ: ܘܰܠܫܳܛܝܽܘ̣ܬܳܐ ܐ̱ܢܳܫܳܝܬܳܐ ܐܰܚܶܒ̣ܬ: ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܕܰܬ̣ܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܠܳܟ: ܫܡܰܥ ܨܠܰܘ̈ܳܬܰܢ ܘܶܐܬܪܰܥܳܐ ܒܨܰܘܡܰܢ ܘܶܐܬܬܢܝ̣ܚ ܒܬܶܫܡ̈ܫܳܬܰܢ: ܘܰܥܒܶܕ ܪ̈ܰܚܡܰܝܟ ܥܰܠ ܢܰܦܫ̈ܳܬܰܢ ܘܰܕܥܰܢܝ̣̈ܕܰܝܢ ܘܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀