ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܰܠܟܳܐ ܕܰܠܥܳܠܡܝ̣ܢ ܡܳܪܶܐ ܟܽܠ: ܕܰܒܥܰܬܝ̣ܩܬܳܐ ܐܶܬ̣ܪܫܶܡ: ܘܒܰܚܕܰܬܳܐ ܐܶܬ̣ܝܕܰܥ ܘܶܐܬ̣ܓܠܝ̣ ܠܗܰܘ̇ ܕܡܽܘܫܶܐ ܢܒܺܝܳܐ ܨܳܪ ܛܘ̣ܦܣܳܐ ܕܚܰܫܰܘ̈ܗ̱ܝ ܘܰܙܩܝ̣ܦܘ̣ܬܶܗ ܒܚܘ̣ܛܪܳܐ ܗܰܘ̇ ܕܰܦܠ̣ܰܓ ܝܰܡܳܐ: ܒܰܙܒܰܢ ܡܰܢ ܕܶܝܢ ܠܬܰܢܝ̣̈ܢܶܐ ܒܳܠܰܥ ܗ̱ܘܳܐ: ܘܠܰܚ̈ܘܰܘܳܬܳܐ ܡܣܝ̣ܦ: ܘܰܒܡܶܨܥܰܬ݀ ܡܰܫܪܝ̣ܬܳܐ ܐܰܩܝ̣ܡܶܗ ܘܚܶܘܝܳܐ ܟܰܢ̣ܝܶܗ ܗ̱ܘܳܐ: ܕܢ̣ܶܗܘܶܐ ܐܳܬܳܐ ܠܥܶܒܪ̈ܳܝܶܐ ܡܳܪ̈ܘ̣ܕܶܐ: ܕܟܽܠ ܕܡ̣ܶܢ ܫܺܐܕ̈ܶܐ ܡܶܬܢܰܟܶܐ ܢ̣ܚܘ̣ܪ ܒܚܶܘܝܳܐ ܕܰܢܚܳܫܳܐ ܘܢ̣ܶܬܰܐܣܶܐ: ܘܰܒܗܳܕܶܐ ܫ̣ܰܘܕܰܥ ܕܰܒܚܶܘܝܳܐ ܐܶܬ̣ܬܨܝ̣ܪ: ܒܰܨܠܝ̣ܒܳܐ ܡܶܬܰܐܣܶܝܢܰܢ: ܘܡܶܛܽܠ ܗܳܕܶܐ ܥܰܡ ܕܰܘܺܝ̣ܕ ܢ̇ܙܰܡܰܪ ܕܚܘ̣ܪܘ̱ ܠܘܳܬܶܗ ܘܣܰܒܰܪܘ̱ ܒܶܗ ܘܰܐܦܰܝ̈ܟܽܘܢ ܠܳܐ ܢ̣ܰܚܦܪ̈ܳܢ: ܘܠܶܗ ܠܰܐܠܳܗܳܐ ܕܰܥܠܰܘܗ̱ܝ ܐܶܬ̣ܬܠܝ̣ ܒܰܒܣܰܪ ܢ̇ܦܝ̣ܣ ܘܢ̇ܶܬܟܰܫܰܦ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܠܰܨܠܝ̣ܒܳܐ ܕܝ̣ܠܳܟ ܒܚܘ̣ܕܳܬܳܐ ܕܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܡܝܰܩܪܝ̣ܢܰܢ ܐܳܘ ܡܳܪܝܳܐ ܘܰܠܡܶܠܬܳܐ ܕܬܶܫܒܘ̣ܚܬܳܐ ܩܕܳܡ ܪܰܒܘ̣ܬܳܟ ܡܚܰܓܶܝܢܰܢ ܐܳܘ ܡܶܠܬܳܐ ܐܰܠܳܗܳܐ: ܗܳܝ ܕܠܰܐܒܝ̣̈ܕܶܐ ܫܟܳܚܬܳܐ ܗ̱ܝ: ܠܰܢ ܕܶܝܢ ܡܫܝ̣ܚܳܐ ܚܰܝܠܳܐ ܘܚܶܟܡܬܳܐ ܕܰܐܠܳܗܳܐ: ܐܰܢ̱ܬ ܐܝ̣ܬܰܝܟ ܩܰܝܣܳܐ ܕܚܰܝ̈ܶܐ ܠܗܳܢܽܘܢ ܕܒܶܗ ܡܣܰܒܪܝ̣ܢ: ܠܗܰܘ̇ ܕܟܰܕ ܐܰܝܟ ܠܰܘܛܬܳܐ ܐܶܬ̣ܬܠܝ̣ ܒܰܙܩܝ̣ܦܳܐ ܘܰܗ̣ܘܳܐ ܙܰܕܝ̣ܩܘ̣ܬܳܐ: ܡܒܰܪܟܳܐ ܚܰܘܝ̣ ܠܩܰܝܣܳܐ ܗܰܘ̇ ܕܡܶܢܶܗ ܐܶܬ̣ܚܙܝ̣: ܐܰܢ̱ܬ ܗ̱ܘ̣ ܓܶܝܪ ܐܝ̣ܠܳܢܳܐ ܕܒܰܡܨܰܥܬܶܗ ܕܦܰܪܕܰܝܣܳܐ ܐܶܬ̣ܢܨܶܒ: ܘܰܥܒ̣ܰܕ ܦܘ̣ܪܩܳܢܳܐ ܒܰܡܨܰܥܬܳܗܿ ܕܰܐܪܥܳܐ ܗܳܝ ܕܡܘ̣ܠܟܳܢܳܐ: ܐܰܝܟܳܐ ܕܡ̣ܶܢ ܐܝܠ̣ܳܢܳܐ ܒܝܰܕ ܕܶܟܪܳܐ ܠܪܝ̣ܫ ܐܰܒ̈ܳܗܳܬܳܐ ܐܰܒܪܳܗܳܡ ܐܶܬ̣ܚܙܰܝܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܝܰܥܩܘ̣ܒ ܐܶܬ̣ܓܠܰܝܬ ܐܰܝܟ ܕܥܰܠ ܪܝܫ ܨܠܝ̣ܒܳܐ: ܐܰܢ̱ܬ ܗ̱ܘ̣ ܗܰܘ̇ ܫܰܒܛܳܐ ܕܰܬܪܝ̣ܨܘ̣ܬܳܐ ܘܚܘ̣ܛܪܳܐ ܕܥܘ̣ܫܢܳܐ ܕܫ̣ܰܕܰܪ ܡܳܪܝܳܐ ܡ̣ܶܢ ܨܶܗܝܽܘܢ ܠܡܶܫܬܰܠܰܛܘ̣ ܒܰܒܥܶܠ̈ܕܒܳܒܰܘܗ̱ܝ ܗܳܢܽܘܢ ܕܒܰܨܠܝ̣ܒܳܐ ܐܶܬ̣ܦܰܪܣܝ̣ܘ: ܐܰܢ̱ܬ ܗ̱ܘ̣ ܗܰܘ̇ ܕܰܒܚܶܘܝܳܐ ܕܰܢܚܳܫܳܐ ܕܶܐܬ̣ܬܪܝ̣ܡ ܒܡܰܕܒܪܳܐ ܐܶܬܪܫܶܡ̣ܬ: ܘܰܒܚܘ̣ܛܪܳܐ ܗܰܘ̇ ܣܳܥܰܪ ܚܰܝ̈ܠܶܐ ܒܬܶܕܡܘ̣ܪܬܳܐ ܩܕܳܡ ܚܶܘܝܳܐ ܐܶܬ̣ܡܰܬܰܠܰܬ: ܥܰܡܳܐ ܓܶܝܪ ܛܳܠܘ̣ܡܳܐ ܐܶܬ̣ܝܰܥܰܢ ܘܥܰܠ ܒܳܪܘ̣ܝܶܗ ܓܰܕܶܦ: ܘܡ̣ܶܢ ܚܘܰܘ̈ܳܬܳܐ ܡܶܫܬܰܢܰܩ ܗ̱ܘܳܐ: ܡܶܐܟܘ̣ܠܬܳܐ ܐܰܣ̣ܓܝ̣ ܠܶܗ ܘܠܳܐ ܐܶܬ̣ܪܟܶܢ ܕܢ̣ܶܬܶܠ ܫܘ̣ܒܚܳܐ ܠܙܳܝܘ̣ܢܶܗ: ܪܰܛܶܢ ܥܰܠ ܡܽܘܫܶܐ ܘܓ̣ܰܕܶܦ ܥܰܠ ܐܰܠܳܗܳܐ: ܠܡܘܢ ܐܰܦܶܩ̣ܬܳܢ ܡ̣ܶܢ ܡܶܨܪܶܝܢ ܡܶܬܠܰܚܰܡ ܗ̱ܘܳܐ ܥܰܠ ܥܰܡܳܐ: ܐܳܟܶܠ ܕܶܒܫܳܐ ܘܓܳܣܶܐ ܡܪܳܪ̈ܶܐ: ܘܟܰܕ ܥܶܫ̣ܢܰܬ݀ ܡܰܪܝ̣ܪܘ̣ܬܶܗ ܒܪܶܛܢܳܐ: ܪܕܳܝܗ̱ܝ ܓܳܒܘ̣ܠܶܗ ܒܰܚ̈ܘܰܘܳܬܳܐ ܕܡܶܪܬܳܐ ܓܳܣܶܝܢ: ܙܟܳܐ ܠܠܶܘܝܳܬܳܢ ܕܐܝ̣ܬܰܘܗ̱ܝ ܦܶܪܥܽܘܢ: ܘܪܰܨܶܨ ܪ̈ܝ̣ܫܰܘܗ̱ܝ: ܘܰܕܠܳܐ ܐܰܘܕܝ̣ ܒܠ̣ܰܥ ܗ̱ܘܳܐ ܒܪ̈ܰܚܫܳܐ ܕܰܚ̈ܘܰܘܳܬܳܐ: ܘܰܕܠܳܐ ܫܰܒ̣ܰܚ ܡ̣ܶܢ ܚܰܪܡܳܢܳܐ ܡܶܬܢܓܶܕ ܗ̱ܘܳܐ: ܒܝ̣ܫ ܚܰܪܡܳܢܳܐ: ܟܳܦܘ̣ܪܳܐ ܕܶܝܢ ܘܝܰܥܢܳܐ ܒܝ̣ܫ ܗ̱ܘܳܐ ܡܶܢܶܗ: ܕܐܘ̣ܟܠܶܗ ܒܰܣܝ̣ܡ: ܘܓܘ̣ܕܳܦܶܗ ܡܶܪܬܳܐ ܕܶܐܣܦܶܣ: ܡܽܘܫܶܐ ܕܶܝܢ ܦܣ̣ܰܩ ܥܶܩܳܪܳܐ: ܕܰܨܠܝ̣ܒܘ̣ܬܳܐ ܘܣܳܡ̣ܶܗ ܒܡܶܨܥܰܬ݀ ܡܰܫܪܝ̣ܬܳܐ ܩܕܳܡ ܥܶܒܪ̈ܳܝܶܐ ܕܰܢ̣ܚܘ̣ܪܘܢ ܒܶܗ ܘܢܶܬܰܐܣܽܘܢ: ܐܳܬܶܗ ܕܰܒܪܳܐ ܣ̣ܳܡ ܠܶܗ ܒܚܘ̣ܪܒܳܐ ܕܶܢ̣ܬܚܰܠܡܽܘܢ: ܐ̱ܪܳܙܶܗ ܕܡܳܪܰܢ ܐܺܝܳܠܳܐ ܗܳܘܶܐ ܗ̱ܘܳܐ ܠܰܚ̈ܘܰܘܳܬܳܐ: ܙܩܝ̣ܦܳܐ ܐܶܬ̣ܬܪܝܡ ܘܚ̣ܳܪ ܒܶܗ ܥܰܡܳܐ ܘܶܐܬ̣ܐܣܝ̣ ܗ̱ܘܳܐ: ܘܰܐܝܟ ܕܰܐܪܝ̣ܡ ܗ̱ܘܳܐ ܡܽܘܫܶܐ ܚܶܘܝܳܐ ܐܶܬ̣ܬܪܝܡ ܡܫܝ̣ܚܳܐ: ܟܽܠ ܡ̇ܰܢ ܕܰܢܟܝ̣ܬ ܢ̣ܚܘ̣ܪ ܒܶܗ ܘܢ̣ܶܬܰܐܣܶܐ: ܘܥܰܠ ܗܳܝ̇ ܙܩܝ̣ܦܳܐ ܐܶܬ̣ܬܪܝ̣ܡ ܥܰܠ ܓܳܓܘ̣ܠܬܳܐ: ܕܥܰܡ̱̈ܡܶܐ ܕܰܩܛܝ̣ܠܝ̣ܢ ܢ̣ܚܘ̣ܪܽܘܢ ܒܶܗ ܘܢ̣ܶܬܰܐܣܽܘܢ: ܐܳܘ ܕܰܩܛܝ̣ܠܝ̣ܢ ܡ̣ܶܢ ܒܝ̣ܫܳܐ܇ ܚܘ̣ܪܘ̱ ܒܰܨܠܝ̣ܒܳܐ ܘܬܶܬܰܐܣܘܢ: ܐܳܘ ܚܰܛܳܝ̈ܶܐ ܠܟܽܘܢ ܗ̱ܘ̣ ܚܳܐܰܪ ܕܒܶܗ ܬܶܬ̣ܚܰܠܡܽܘܢ: ܠܗܳܢܳܐ ܓܶܝܪ ܨܳܐܰܪ ܗ̱ܘܳܐ ܡܽܘܫܶܐ: ܟܰܕ ܒܰܦܫܳܛ ܐܝ̣̈ܕܰܘܗ̱ܝ ܙܳܟܘ̣ܬܳܐ ܥܰܠ ܥܡܳܠܝ̣ܩ ܢܳܣܶܒ ܗ̱ܘܳܐ ܐܰܢ̱ܬ ܗ̱ܘ̣ ܐ̱ܪܳܙܳܐ ܕܰܡܟܰܣܰܝ ܗ̱ܘܳܐ ܡ̣ܶܢ ܥܳܠܡܳܐ: ܘܶܐܬ̣ܓܠܝ ܒܰܒܣܰܪ ܠܥܰܡ̱̈ܡܶܐ: ܟܰܕ ܠܚܰܟܝ̣̈ܡܶܐ ܒܐܝ̣̈ܕܰܝܳܐ ܕܣܰܟ̈ܠܶܐ ܨܳܐܰܪ ܗ̱ܘܳܐ ܘܰܠܚܰܝ̈ܠܬܳܢܶܐ ܒܰܡܚܝ̣̈ܠܶܐ ܡܫܰܥܒܰܕ ܗ̱ܘܳܐ: ܐܰܢ̱ܬ ܗ̱ܘ̣ ܕܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ ܒܰܙܩܝ̣ܦܳܟ ܚ̣ܰܝܶܕܬ ܘܰܠܓܶܢܣܰܢ ܚܰܕܶܬܬ: ܐܰܢ̱ܬ ܗ̱ܘ̣ ܕܠܰܐܒܓܰܪ ܙܰܕܝ̣ܩܳܐ ܘܡܰܠܟܳܐ ܩܰܕܡܳܝܳܐ ܐܰܝܟ ܫܶܐܠܬܶܗ ܨܘ̣ܪܬܳܐ ܕܪܰܒܘ̣ܬܳܟ ܘܝܘ̣ܩܢܳܟ ܫܒܝ̣ܚܳܐ ܠܶܗ ܫ̣ܰܕܰܪܬ ܒܐܝ̣̈ܕܰܝ ܐܝ̣ܙܓ̈ܰܕܰܘܗ̱ܝ: ܘܰܠܢܰܦܫܶܗ ܥܰܡ ܦܰܓܪܶܗ ܒܰܚܙܳܬܳܟ ܐܰܣܝ̣ܬ ܘܠܰܡܕܝ̣ܢ̱ܬܶܗ ܟܰܗܝ̣ܢܬܳܐ ܡ̣ܶܢ ܦܬܰܟܪ̈ܶܐ ܕܰܟܝ̣ܬ: ܘܟܽܠܗܶܝܢ ܛܳܒ̈ܳܬܳܐ ܡܰܠܝ̣ܬ ܠܶܗ ܥܕܰܡܳܐ ܕܰܚܛܳܗܰܝ̈ܗܽܘܢ ܥܶܫ̣ܢܰܬ݀ ܘܥܰܘܠܗܽܘܢ ܕܗܳܢܽܘܢ ܕܡ̣ܶܢ ܒܳܬܪܶܗ ܗ̱ܘܰܘ: ܒܪ̈ܝ̣ܫܰܝܗܽܘܢ ܣܠ̣ܶܩ ܘܒܶܝܬ ܥܰܡ̱̈ܡܶܐ ܐܶܬ̣ܒܰܕܰܪܘ̱: ܘܡܶܛܽܠ ܗܳܕܶܐ ܐܳܦ ܚܢܰܢ ܡܚܝ̣̈ܠܶܐ ܘܥܰܡܳܐ ܡܫܝ̣ܚܳܝܳܐ ܕܬܰܘܕܝ̣ܬܳܐ ܫܠܝ̣ܚܳܝ̇ܬܳܐ: ܕܰܐܕܰܝ ܘܕܰܐܒܓܰܪ ܩܰܒܶܠ̣ܢܰܢ ܡܫܰܒܚܝ̣ܢܰܢ ܟܰܕ ܐܳܡܪܝ̣ܢܰܢ: ܐܳܘ ܥܘ̣ܡܩܳܐ ܕܐ̱ܪ̈ܳܙܶܐ ܠܳܐ ܡܶܬܡܰܠ̈ܠܳܢܶܐ: ܕܰܨܠܝ̣ܒܳܐ ܚܰܝܳܐ: ܕܒܶܗ ܚܰܕ̈ܬܳܬܳܐ ܐܶܫܬܰܡ̈ܠܺܝ̣: ܘܥܰܬܝ̣̈ܩܳܬܳܐ ܐܶܬܚ̣ܰܕ̈ܰܬܝ̱ ܘܬܰܟܫܶܦܬܳܐ ܘܒܳܥܘ̣ܬܳܐ ܩܕܳܡܰܘܗ̱ܝ ܡܩܰܪܒܝ̣ܢܰܢ: ܒܗܳܢܳܐ ܝܰܘܡܳܐ ܩܰܕܝ̣ܫܳܐ ܕܒܶܗ ܨܰܘܡܳܐ ܪܘ̣ܚܳܢܳܝܳܐ ܡ̣ܰܨܰܥ: ܘܒܶܗ ܥܰܡ̱̈ܡܶܐ ܡܗܰܝ̈ܡܢܶܐ ܚܳܕܶܝܢ ܘܡܶܬܦܰܨܚܝ̣ܢ ܟܰܕ ܠܐ̱ܪ̈ܳܙܶܐ ܡܰܚ̈ܝܳܢܶܐ ܕܦܰܓܪܳܐ ܘܰܕܡܳܐ ܡܚܰܣܝܳܢܳܐ ܢܳܣܒܝ̣ܢܰܢ: ܕܒܐܝ̣̈ܕܰܝ ܟܳܗ̈ܢܶܐ ܩܰܕܝ̣̈ܫܶܐ ܝܰܘܡܳܢܳܐ ܡܶܫܬܰܡܠܝ̣ܢܰܢ: ܘܒܶܗ ܬܘ̣ܒ ܡܶܫܚܳܐ ܡܒܰܣܡܳܐ ܡܶܬܩܰܕܰܫ: ܕܢ̣ܶܗܘܶܐ ܡܛܰܝܒܳܐ ܠܰܥܡܳܕܳܐ ܠܫܰܒܬܳܐ ܪܰܒܬܳܐ ܕܦܶܨܚܳܐ ܩܰܕܝ̣ܫܳܐ: ܕܨܳܐܰܪ ܠܐ̱ܢܳܫܘ̣ܬܶܗ ܕܰܒܪܳܐ: ܟܰܕ ܡܦܝ̣ܣܝ̣ܢܰܢ ܠܳܟ ܕܒܶܗ ܢ̣ܶܬܢܰܛܪܽܘܢ ܦܰܓܪ̈ܰܝܢ ܘܢܰܦ̈ܫܳܬܰܢ: ܘܒܶܗ ܢ̣ܶܙܕܰܗ̈ܝܳܢ ܪ̈ܘ̣ܚܳܬܰܢ: ܘܰܠܥܺܕܬܳܟ ܩܰܬܘ̣ܠܝ̣ܩܝ̣ ܘܰܫܠܝ̣ܚܳܝ̇ܬܳܐ: ܒܫܰܝܢܳܐ ܡܫܰܡܠܝܳܐ ܘܰܒܚܘ̣ܒܳܐ ܕܡܶܢܳܟ ܢܰܛܰܪ ܘܰܙܓܘ̣ܪ ܡܶܢܳܗܿ ܟܽܠ ܝܘ̣ܠܦܳܢܳܐ ܒܝ̣ܫܳܐ: ܘܠܰܐܝܠܶܝܢ ܕܰܒܕܘ̣ܓ̈ܡܰܛܰܐ ܬܪ̈ܝ̣ܨܶܐ ܠܳܐܝܶܢ ܒܳܗܿ: ܘܰܒܣܘ̣ܟܳܠܳܐ ܫܡܰܝܳܢܳܐ ܘܰܒܡܰܘܗ̈ܒܳܬܳܐ ܐܰܠܳܗܳܝ̈ܳܬܳܐ ܟܰܠܶܠ ܘܗܰܕܰܪ: ܠܰܟܪ̈ܝ̣ܗܶܐ ܐܰܣܳܐ ܠܰܡܚܝ̣̈ܠܶܐ ܫܰܪܰܪ: ܠܡܶܣ̈ܟܺܢܶܐ ܙܽܘܢ ܘܦܰܪܢܶܣ: ܘܠܰܐܝܠܶܝܢ ܕܡ̣ܶܢ ܗܳܪܟܳܐ ܚܙ̣ܰܩܘ̱ ܐܰܢܝ̣ܚ ܐܶܢܽܘܢ ܒܰܡ̈ܛܰܠ̱ܠܶܐ ܢܰܗܝ̣ܪ̈ܳܬܳܐ: ܘܠܰܩܝܳܡܬܳܐ ܕܡ̣ܶܢ ܒܶܝܬ ܡܝ̣̈ܬܶܐ ܐܰܫܘܳܐ: ܐܰܝܟܰܢܳܐ ܕܟܰܕ ܠܥܺܐܕܳܐ ܗܰܘ̇ ܪܰܒܳܐ ܒܚܰܕܘ̣ܬܳܐ ܡܶܬܡܰܢܥܝ̣ܢܰܢ ܘܰܒܚܰܓܳܐ ܕܬܰܡܳܢ ܪܳܘܙܝ̣ܢܰܢ: ܒܳܟ ܐܝ̣ܠܳܢܳܐ ܕܚܰܝ̈ܶܐ ܢ̇ܶܦܓܰܥ ܘܡ̣ܶܢ ܦܺܐܪ̈ܶܐ ܕܠܳܐ ܡܳܝܘ̣ܬܘ̣ܬܳܐ ܢ̇ܶܩܛܘ̣ܦ: ܘܰܒܟܶܢܫܳܐ ܕܗܳܢܽܘܢ ܕܡܶܬܦܰܪܩܝ̣ܢ: ܩܳܠܳܐ ܕܫܘ̣ܒܚܳܐ ܘܬܰܘܕܝ̣ܬܳܐ ܢ̇ܰܣܶܩ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀