ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܝ̣ܬܝܳܐ ܡܬܘ̣ܡܳܝܳܐ ܕܰܗ̣ܘܳܐ ܙܰܒܢܳܝܳܐ: ܟܰܕ ܒܰܡܬܘ̣ܡܳܝܘ̣ܬܶܗ ܩܰܘܝ̣: ܗܰܘ̇ ܕܰܪܟ̣ܶܒ ܥܰܠ ܡܰܥܪܒܳܐ ܕܐ̱ܢܳܫܘ̣ܬܰܢ: ܟܰܕ ܠܳܐ ܫܒ̣ܰܩ ܠܡܰܕܢܚܳܐ ܕܬܶܫܒܘ̣ܚܬܶܗ: ܗܰܘ̇ ܕܰܣܠ̣ܶܩ ܠܰܨܠܝ̣ܒܳܐ ܡܶܛܽܠ ܦܘ̣ܪܩܳܢܰܢ ܘܥܰܒ̣ܕܶܗ ܬܘ̣ܒ ܠܰܨܠܝ̣ܒܳܐ ܢܝ̣ܫܳܐ ܕܙܳܟܘ̣ܬܳܐ ܠܰܡܗܰܝ̈ܡܢܶܐ ܚܠܳܦ ܚܶܘܝܳܐ ܕܰܢܚܳܫܳܐ ܒܡܶܨܥܰܬ݀ ܡܰܫܪܝ̣ܬܳܐ: ܛܳܒܳܐ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܒܰܨܠܝ̣ܒܳܐ ܕܫܘ̣ܒܚܳܐ ܕܝ̣ܠܳܟ ܘܪܘ̣ܡܪܳܡܳܐ ܕܰܐܠܳܗܘ̣ܬܳܟ ܡܶܬܓܰܘܣܝ̣ܢܰܢ ܐܳܘ ܡܶܠܬܳܐ ܐܰܠܳܗܳܐ ܘܡܳܪܳܐ ܘܥܳܒܘ̣ܕܳܐ ܕܟܽܠ: ܗܰܘ̇ ܕܠܰܢ̈ܒܺܝܶܐ ܩܰܕܝ̣̈ܫܶܐ ܘܚܰܙܳܝ̈ܶܐ ܘܰܡܒܰܕ̈ܩܳܢܶܐ ܕܡܶܐܬܝ̣ܬܳܟ ܦܳܪܘ̣ܩܳܝ̇ܬܳܐ ܩܰܕܶܡ̣ܬ ܘܫܰܘܕܰܥ̣ܬ: ܠܳܟ ܗ̱ܘ̣ ܕܶܝܢ ܐܰܒ̈ܗܳܬܳܐ ܨܳܝܪܝ̣ܢ ܗ̱ܘܰܘ ܒܝܰܕ ܐ̱ܪ̈ܳܙܶܐ ܘܛܘ̣ܦ̈ܣܶܐ ܕܰܙܢܝ̣̈ܢ ܙܢܝ̣̈ܢ: ܟܰܕ ܚܰܕ ܒܝܰܕ ܐܝ̣ܠܳܢܳܐ ܕܒܐܝ̣ܕܶܗ ܗ̣ܘܳܐ ܦܘ̣ܪܩܳܢܳܐ ܠܐܝ̣ܣܚܳܩ ܡܛܰܦܶܣ ܗ̱ܘܳܐ: ܘܰܐ̱ܚܪܺܢܳܐ ܕܝܰܗ̣ܒܬ ܠܕܳܚ̈ܠܰܝܟ ܐܳܬܳܐ ܐܳܡܰܪ ܗ̱ܘܳܐ: ܘܰܕܚܘ̣ܪܘ̱ ܠܘܳܬܶܗ ܘܣܰܒ̣ܪܘ̱ ܒܶܗ ܘܰܐܦܰܝ̈ܟܽܘܢ ܠܳܐ ܢ̣ܰܚܦܪ̈ܳܢ ܡܶܬܢܰܒܶܐ ܗ̱ܘܳܐ: ܚܰܕ ܒܰܦܫܳܛܳܐ ܕܐܝ̣̈ܕܰܘܗ̱ܝ ܙܳܟܘ̣ܬܳܐ ܕܒܶܗ ܡܰܟܪܶܙ ܗ̱ܘܳܐ: ܘܰܐ̱ܚܪܺܢܳܐ ܕܰܡܒܰܪܰܟ ܗ̱ܘ̣ ܩܰܝܣܳܐ ܕܰܨܠܝ̣ܒܳܐ ܩܳܥܶܐ ܗ̱ܘܳܐ: ܗܳܢܳܐ ܓܶܝܪ ܩܰܝܣܳܐ ܕܰܨܠܝ̣ܒܳܐ ܥܒ̣ܰܕ ܒܡܶܨܪܶܝܢ ܩܕܳܡ ܦܶܪܥܽܘܢ ܐܳܬܘ̈ܳܬܳܐ ܘܰܬܡܝ̣̈ܗܳܬܳܐ: ܘܠܐܝ̣ܣܪܳܐܝܶܠ ܡ̣ܶܢ ܥܰܒܕܘ̣ܬܳܐ ܦ̣ܪܰܩ: ܚܘ̣ܛܪܳܐ ܕܶܝܢ ܡܶܬܦܩܶܕ ܗ̱ܘܳܐ ܡܽܘܫܶܐ ܠܡܶܛܥܰܢ: ܘܒܶܗ ܚܰܝ̈ܠܶܐ ܘܬܶܕܡܪ̈ܳܬܳܐ ܣܥ̣ܰܪ: ܘܰܕܢ̣ܰܠܶܦ ܕܚܘ̣ܛܪܳܐ ܠܰܘ ܡܶܛܽܠ ܡܶܕܶܡ ܐ̱ܚܪܝ̣ܢ ܚܰܝ̈ܠܶܐ ܣܳܥܰܪ: ܐܶܠܳܐ ܡܶܛܽܠ ܕܛܘ̣ܦܣܳܐ ܕܰܨܠܝ̣ܒܳܐ ܡܝܰܩܪܳܐ ܛܥܝ̣ܢ ܗ̱ܘܳܐ: ܗܰܘ̇ ܕܒܶܗ ܟ̇ܣܶܐ̣ ܗ̱ܘܳܐ: ܒܳܐܬܳܐ ܕܨܠܝ̣ܒܳܐ ܙܟ̣ܳܐ ܗ̱ܘܳܐ ܡܽܘܫܶܐ ܠܰܥܡܳܠܝ̣ܩ: ܥܰܡܳܐ ܕܶܝܢ ܐܝ̣ܬܰܘܗ̱ܝ ܗ̱ܘܳܐ ܩܰܫܝܳܐ ܘܰܩܪܰܒܬܳܢܳܐ ܟܰܕ ܓܶܝܪ ܩܳܡ ܠܶܗ ܠܘ̣ܩܒܰܠ ܐܝ̣ܣܪܳܐܝܶܠ ܘܣܰܟ̣ܪܳܗܿ ܠܡܰܥܒܰܪܬܳܐ: ܐܝ̣ܬܰܘܗ̱ܝ ܗ̱ܘܳܐ ܡܰܢ ܪܝ̣ܫ ܚܰܝܠܳܐ ܝܶܫܘ̣ܥ ܒܰܪܢܽܘܢ: ܩܳܐܶܡ ܗ̱ܘܳܐ ܕܶܝܢ ܡܽܘܫܶܐ ܥܰܠ ܪܝܫ ܛܘ̣ܪܳܐ ܘܐܝ̣̈ܕܰܘܗ̱ܝ ܦܳܪܶܣ ܗ̱ܘܳܐ: ܘܰܒܗܳܢܳܐ ܛܘ̣ܦܣܳܐ ܨܠܝ̣ܒܳܐ ܡܥܰܠܝܳܐ ܨܳܐܪ ܗ̱ܘܳܐ ܐܶܡܰܬܝ̱ ܕܶܝܢ ܕܰܡܪܝ̣ܡ ܗ̱ܘܳܐ ܐܝ̣̈ܕܰܘܗ̱ܝ ܙܳܟܶܐ ܗ̱ܘܳܐ ܠܥܰܡܳܐ: ܐܶܡܰܬܝ̱ ܕܶܝܢ ܕܡܰܚܶܬ ܗ̱ܘܳܐ ܐܝ̣̈ܕܰܘܗ̱ܝ ܥܡܳܠܝ̣ܩ ܙܳܟܶܐ ܗ̱ܘܳܐ: ܘܝ̣ܩܰܪ̈ܝ̱ ܐܝ̣̈ܕܰܘܗ̱ܝ ܕܡܽܘܫܶܐ ܘܰܢܣ̣ܰܒ ܟܺܐܦܳܐ ܘܣܳܡ ܬܚܶܝܬ ܐܝ̣̈ܕܰܘܗ̱ܝ ܐܰܘܟܝ̣ܬ ܕܪ̈ܳܥܰܘܗ̱ܝ: ܘܰܗ̣̈ܘܰܝ ܐܝ̣̈ܕܰܘܗ̱ܝ ܕܡܽܘܫܶܐ ܣܡܝ̣̈ܟܳܢ: ܘܬܰܒ̣ܪܶܗ ܝܶܫܘ̣ܥ ܒܰܪܢܽܘܢ ܠܰܥܡܳܠܝ̣ܩ ܘܰܠܟܽܠܶܗ ܥܰܡܳܐ ܒܩܶܛܠܳܐ ܕܚܰܪܒܳܐ: ܚܶܘܝܳܐ ܓܶܝܪ ܐܰܩܝ̣ܡ ܗ̱ܘܳܐ ܡܽܘܫܶܐ ܒܡܶܨܥܰܬ݀ ܡܰܫܪܝ̣ܬܳܐ: ܐܳܬܳܐ ܕܫܘ̣ܘܙܳܒܳܐ ܠܥܰܡܳܐ ܕܥܶܒܪ̈ܳܝܶܐ ܡ̣ܶܢ ܚܘܰܘ̈ܳܬܳܐ ܐܳܫܕܰܬ݀ ܡܶܪܬܳܐ: ܘܰܡܫܝ̣ܚܳܐ ܡܳܪܰܢ ܡܳܪܶܗ ܕܡܽܘܫܶܐ ܙܩܝ̣ܦܶܗ ܒܰܡܨܰܥܬܳܗܿ ܕܰܐܪܥܳܐ ܕܡܘ̣ܠܟܳܢܳܐ ܩܒ̣ܰܥ: ܕܟܽܠ ܐܰܝܢܳܐ ܕܡ̣ܶܢ ܒܝ̣ܫܳܐ ܡܶܬܥܫܶܡ ܘܰܡܗܰܝܡܶܢ ܒܶܗ ܠܳܐ ܢ̣ܺܐܒܰܕ: ܘܡܽܘܫܶܐ ܛܶܠܳܢܝ̣ܬܳܐ ܥܒ̣ܰܕ: ܘܡܳܪܰܢ ܫܪܳܪܳܐ ܓܡ̣ܰܪ: ܘܒܰܕܓܽܘܢ ܐܳܦ ܚܢܰܢ ܟܰܕ ܒܙܰܠܝ̣̈ܩܶܐ ܕܰܨܠܝ̣ܒܳܐ ܥܰܝ̈ܢܶܐ ܕܠܶܒܰܘ̈ܳܬܰܢ ܢܳܗܪ̈ܳܢ: ܒܣ̈ܘ̣ܟܳܠܶܐ ܕܡܶܛܽܠܳܬܶܗ ܡܰܦܪܓܝ̣ܢܰܢ: ܒܢܰܦܫܳܐ ܘܗܰܘܢܳܐ ܘܡܰܕܥܳܐ ܪܘ̣ܚܳܢܳܐܝ̣ܬ ܡܶܬܗܰܘܢܝ̣ܢܰܢ ܘܥܰܡ ܡܽܘܫܶܐ ܪܰܒܳܐ ܐܳܡܪܝ̣ܢܰܢ: ܗܳܢܰܘ ܕܦܰܠ̣ܶܓ ܝܰܡܳܐ ܕܣܘ̣ܦ ܛܘ̣ܦܣܶܗ ܘܛܰܒ̣ܰܥ ܠܦܶܪܥܽܘܢ ܘܫ̣ܰܘܙܶܒ ܠܐܝ̣ܣܪܳܐܝܶܠ: ܘܰܒܚܶܘܝܳܐ ܕܰܢܚܳܫܳܐ ܐܶܬ̣ܬܨܝ̣ܪ ܘܛܘ̣ܦ̈ܣܰܘܗ̱ܝ ܫܰܦ̣ܶܠܘ̱ ܠܰܥܡܳܠܝ̣ܩ: ܘܕܰܟܝ̣ ܓܰܪ̈ܒܶܐ: ܘܰܐܚܝ̣ ܡܝ̣̈ܬܶܐ ܒܐ̱ܪܳܙܳܐ ܕܝ̣ܠܶܗ: ܗܳܢܰܘ ܕܶܐܬ̣ܪܰܓܪܰܓ ܠܶܗ ܐܰܒܓܰܪ ܡܰܠܟܳܐ ܘܰܒܥ̣ܳܐ ܕܢ̣ܶܣܰܩ ܠܐܘ̣ܪܫܠܶܡ ܘܢ̣ܰܚܪܒܝ̣ܗܿ ܘܰܟܬ̣ܰܒ ܐܶܓܰܪܬܳܐ ܘܫ̣ܰܕܰܪ ܐܰܝܟ ܪܳܚܡܳܐ ܕܩܘ̣ܫܬܳܐ ܟܰܕ ܐܳܡܰܪ: ܫܡܝ̣ܥ ܗ̱ܘ̣ ܠܝ̣ ܓܶܝܪ ܥܠܰܝܟ ܝܶܫܘ̣ܥ ܐܳܣܝܳܐ ܛܳܒܳܐ ܒܰܐܪܥܳܐ ܕܐܘ̣ܪܫܠܶܡ: ܕܠܳܐ ܗ̱ܘܳܐ ܒܣܰܡ̱ܡ̈ܳܢܶܐ ܘܠܳܐ ܒܥܶܩܳܪ̈ܶܐ ܡܰܐܣܶܐ ܐܰܢ̱ܬ: ܐܶܠܳܐ ܒܡܶܠܬܳܟ ܣܡܰܝ̈ܳܐ ܡܦܰܬܰܚ ܐܰܢ̱ܬ: ܘܓܰܪ̈ܒܶܐ ܡܕܰܟܶܐ ܐܰܢ̱ܬ: ܘܰܠܡܝ̣̈ܬܶܐ ܡܩܝ̣ܡ ܐܰܢ̱ܬ: ܘܣܳܡܶܬ ܒܪܶܥܝܳܢܝ̱ ܕܰܐܘ ܐܰܠܳܗܳܐ ܐܰܢ̱ܬ ܕܰܢܚ̣ܶܬ ܡ̣ܶܢ ܫܡܰܝܳܐ: ܐܰܘ ܒܪܶܗ ܕܰܐܠܳܗܳܐ: ܗܳܠܶܝܢ ܟܽܠܗܶܝܢ ܥܳܒܶܕ ܐܰܢ̱ܬ: ܘܡܶܛܽܠ ܗܳܕܶܐ ܟܶܬܒܶܬ ܒܥܝ̣ܬ ܡܶܢܳܟ ܕܬ̣ܺܐܬܶܐ ܠܘܳܬܝ̱ ܟܰܕ ܣܳܓܶܕ ܐ̱ܢܳܐ ܠܳܟ: ܘܟܺܐܒܳܐ ܡܶܕܶܡ ܕܐܝ̣ܬ ܠܝ̣ ܬܰܐܣܶܐ: ܐܳܦ ܗܳܕܶܐ ܬܘ̣ܒ ܫܶܡ̇ܥܶܬ: ܕܝܘ̣ܕܳܝ̈ܶܐ ܪܳܛܢܝ̣ܢ ܥܠܰܝܟ ܘܪܳܕܦܝ̣ܢ ܠܳܟ ܘܳܐܦ ܕܢ̣ܶܙܩܦܘ̣ܢܳܟ ܒܳܥܶܝܢ: ܘܰܠܡܶܣܪܰܚ ܒܳܟ ܚܳܝܪܝ̣ܢ: ܡܕܝ̣ܢ̱ܬܳܐ ܚܕܳܐ ܙܥܘ̣ܪܬܳܐ ܐܰܚܝ̣ܕ ܐ̱ܢܳܐ ܘܫܰܦܝ̣ܪܳܐ ܘܦܰܐܝܳܐ: ܘܠܰܬܪ̈ܰܝܢ ܣܳܦܩܳܐ ܠܡܶܥܡܰܪ ܒܳܗܿ ܒܫܶܠܝܳܐ: ܘܟܰܕ ܗܳܠܶܝܢ ܡ̈ܶܠܶܐ ܡ̣ܶܢ ܐܰܒܓܰܪ ܐܶܫ̣ܬܰܕܰܪ̈ܰܝ̱: ܘܨܘ̣ܪܬܳܐ ܕܝܘ̣ܩܢܶܗ ܫ̣ܶܐܠ ܕܢ̣ܶܚܙܶܐ: ܦܰܢܝ̣ ܠܶܗ ܡܳܪܰܢ ܟܰܕ ܐܳܡܰܪ: ܛܘ̣ܒܰܝܟ ܐܰܒܓܰܪ ܕܟܰܕ ܠܳܐ ܚܙ̣ܰܝܬܳܢܝ̱ ܒܝ̣ ܗܰܝܡ̣ܶܢܬ: ܟܬܝ̣ܒ ܓܶܝܪ ܕܰܐܝܠܶܝܢ ܕܚܳܙܶܝܢ ܠܝ̣ ܘܠܳܐ ܡܗܰܝܡܢܝ̣ܢ ܒܝ̣ ܠܕܝ̣ܢܳܐ ܪܰܒܳܐ ܫܳܘܶܝܢ: ܘܕܰܟܬ̣ܰܒܬ ܕܺܐܬܳܐ ܠܘܳܬܳܟ: ܐܶܢܳܐ ܠܘܳܬ ܐܳܒܝ̱ ܕܫ̣ܰܕܪܰܢܝ̱ ܣܳܠܶܩ ܐ̱ܢܳܐ: ܘܡܳܐ ܕܣܶܠ̇ܩܶܬ ܠܘܳܬܶܗ ܠܚܰܕ ܡ̣ܶܢ ܬܰܠ̈ܡܝ̣ܕܰܝ ܡܫܰܕܪ ܐ̱ܢܳܐ: ܘܟܺܐܒ̈ܶܐ ܕܐܝ̣ܬ ܠܳܟ ܢ̣ܰܐܣܶܐ ܘܢ̣ܰܚܠܶܡ: ܘܟܽܠ ܡܰܢ ܕܐܝ̣ܬ ܠܳܟ ܢ̣ܰܦܢܶܐ ܠܚܰܝ̈ܶܐ ܕܰܠܥܳܠܰܡ: ܘܟܰܪܟ݂ܳܐ ܕܝ̣ܠܳܟ ܢ̣ܶܗܘܶܐ ܒܪܝ̣ܟܳܐ: ܘܰܒܥܶܠܕܒܳܒܳܐ ܠܳܐ ܢ̣ܶܫܬܰܠܰܛ ܒܳܗ̇: ܘܥܰܠ ܫܘ̣ܫܶܦܳܐ ܘܝܘ̣ܩܢܳܐ ܕܨܘ̣ܪܬܶܗ ܫ̣ܰܕܰܪ ܠܶܗ: ܟܘ̣ܪ̈ܗܳܢܰܘܗ̱ܝ ܐܶܬ̣ܰܐܣܝ̣ܘ: ܘܗܳܫܳܐ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܗܰܘ̇ ܕܚܰܕ̈ܬܳܬܳܐ ܕܰܒ̣ܰܪܬ ܡܶܛܽܠܬܰܢ: ܘܰܥܕܰܡܳܐ ܠܡܰܘܬܳܐ ܕܰܙܩܝ̣ܦܳܐ ܩܰܒܶܠ̣ܬ: ܐܰܝܟܰܢܳܐ ܕܰܒܨܶܡ̈ܚܶܐ ܕܛܰܝܒܘ̣ܬܳܟ ܥܠܰܝܢ ܬ̣ܰܒܪܶܩ ܘܰܒܫܶܦ̈ܥܶܐ ܕܒܘ̣ܪ̈ܟܳܬܳܟ ܠܰܢ ܬ̣ܚܰܕܶܬ ܠܪ̈ܝ̣ܫܰܝ ܟܳܗ̈ܢܶܐ ܒܢܰܨܝ̣ܚܘ̣ܬܳܐ ܓܡܘ̣ܪ: ܠܟܳܗ̈ܢܶܐ ܘܰܡܫܰܡ̈ܫܳܢܶܐ ܠܝ̣ܕܰܥܬܳܟ ܐܰܝܬܳܐ ܠܡܰܠ̈ܟܶܐ ܡܗܰܝ̈ܡܢܶܐ ܘܠܐܘ̣ܚ̈ܕܳܢܰܝܗܽܘܢ ܫܰܝܶܢ: ܠܓܰܒܪ̈ܶܐ ܘܢܶܫ̈ܶܐ ܟܰܢܶܟ: ܠܫܰܒܪ̈ܶܐ ܢܰܛܰܪ ܠܣܳܒ̈ܶܐ ܣܰܡܶܟ: ܠܰܪ̈ܕܝ̣ܦܶܐ ܫܰܘܙܶܒ: ܠܰܒ̈ܬܘ̣ܠܶܐ ܚܬܘ̣ܡ: ܠܐܝ̣̈ܕܰܝܳܐ ܕܥܰܬܝ̣ܪ̈ܶܐ ܦܫܘ̣ܛ ܒܰܡܪܰܚܡܳܢܘ̣ܬܳܐ: ܠܡܶܣ̈ܟܢܶܐ ܙܽܘܢ ܒܬܰܘܕܝ̣ܬܳܐ: ܠܰܟܪ̈ܝ̣ܗܶܐ ܘܠܰܐܠܝ̣̈ܨܶܐ ܫܰܘܙܶܒ ܡ̣ܶܢ ܥܫܘ̣ܡܝܳܐ ܘܰܛܪܘ̣ܢܘ̣ܬܳܐ: ܠܕܶܡ̈ܥܶܐ ܕܡܰܪ̈ܝ̣ܪܰܝ ܢܰܦܫܳܐ ܠܳܐ ܬܫܘ̣ܛ: ܠܰܓܥܳܬܳܐ ܕܥܰܡܳܟ ܠܳܐ ܬ̣ܰܣܠܶܐ: ܠܪ̈ܘ̣ܓܙܶܐ ܕܬܳܟܒܝ̣ܢ ܙܓܘ̣ܪ: ܠܫܰܒ̈ܛܶܐ ܠܳܐ ܡܶܣܬܰܝܒܪ̈ܳܢܶܐ ܒܰܛܶܠ: ܚܰܘ̈ܒܳܬܰܢ ܒܕܰܟܝܘ̣ܬܳܟ ܟܰܦܰܪ: ܟܘ̣ܬܡ̈ܳܬܰܢ ܒܙܘ̣ܦܳܟ ܩܰܕܝ̣ܫܳܐ ܚܰܘܰܪ: ܐܶܬܕܰܟܰܪ ܠܪ̈ܰܚܡܰܝܟ ܕܡ̣ܶܢ ܥܳܠܰܡ: ܘܫܰܘܙܶܒ ܠܰܦܪ̈ܝ̣ܩܰܝܟ: ܚܘ̣ܪ ܘܰܚܙܝ̣ ܕܡ̣ܶܢ ܟܽܠ ܐ̱ܢܳܫ ܐܝ̣ܬܰܝܢ ܣܢܺܝ̈ܶܐܐ ܡܶܛܽܠ ܫܡܳܟ: ܫܡܰܥ ܠܚܶܣܕܳܐ ܕܰܡܚܰܣ̈ܕܳܢܰܝܟ ܕܡܶܢܗܽܘܢ ܡܶܬܚܰܣܕܝ̣ܢܰܢ ܘܡܶܬܬܠܝ̣ܛܝ̣ܢܰܢ ܘܰܐܝܟ ܐܶܡܪ̈ܶܐ ܠܢܶܟܣܬܳܐ ܚܫܝ̣ܒܝ̣ܢܰܢ: ܘܠܳܐ ܬܶܛܥܶܐ ܕܰܠܕܺܝܰܬܝ̣ܩܝ̣ ܕܝ̣ܠܳܟ: ܐܶܠܳܐ ܫܰܟܶܢ ܠܰܢ ܕܰܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ ܒܰܨܠܝ̣ܒܳܟ ܢ̇ܶܫܬܰܒܗܰܪ: ܐܰܝܟ ܟܽܠܗܽܘܢ ܗܳܢܽܘܢ ܕܰܠܥܳܠܡܳܐ ܐܶܨܛܠ̣ܶܒܘ̱: ܘܰܠܢܰܦ̈ܫܳܬܳܐ ܕܰܐܒܳܗ̈ܰܝܢ ܘܕܰܐܚ̈ܰܝܢ ܐܰܢܝ̣ܚ ܒܰܡ̈ܛܰܠ̱ܠܶܐ ܕܢܘ̣ܗܪܳܐ: ܘܰܐܫܘܳܐ ܠܰܢ ܘܰܠܗܽܘܢ ܕܥܰܡ ܩܰܕܝ̣̈ܫܰܝܟ ܢ̇ܶܙܡܰܪ ܫܘ̣ܒܚܳܐ ܒܝܰܘܡܳܐ ܕܡܶܬܓܰܠܝܳܢܘ̣ܬܳܟ ܫܒܝ̣ܚܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀