ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܰܝܶܠ ܠܢܰܦ̈ܫܳܬܳܐ ܕܝ̣ܠܰܢ ܡܚܝ̣̈ܠܳܬܳܐ ܡܳܪܝܳܐ ܐܰܠܳܗܳܐ: ܐܰܝܟܰܢܳܐ ܕܚܰܝܠܬܳܢܳܐܝ̣ܬ ܘܓܰܢ̱ܒܳܪܳܐܝ̣ܬ ܬܰܟܬܘ̣ܫܳܐ ܘܕܰܪܳܐ ܢܶܥܒܪ̈ܳܢ ܒܝܰܕ ܨܰܘܡܳܐ ܗܳܢܳܐ ܩܰܕܝ̣ܫܳܐ ܠܘ̣ܩܒܰܠ ܐܳܟܶܠܩܰܪܨܳܐ: ܚܶܘܝܳܐ ܘܰܡܪܰܡܝܳܢܳܐ ܘܣܰܓܝ̣ ܪ̈ܝ̣ܫܶܐ ܘܰܐܫܘܳܐ ܠܰܢ ܕܰܢ̇ܕܘ̣ܫ ܥܠܰܘܗ̱ܝ ܘܢ̇ܶܒܣܘ̣ܪ ܠܰܫ̈ܟܳܚܳܬܶܗ ܕܰܓܳܠܴ̈ܬܳܐ: ܒܝܰܕ ܚܰܝܠܳܐ ܘܥܘ̣ܕܪܳܢܳܐ ܕܡ̣ܶܢ ܠܘܳܬܳܟ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܫܳܒܘ̣ܩܳܐ ܕܥܰܘ̈ܠܶܐ ܐ̱ܢܳܫܳܝ̈ܶܐ: ܠܗܰܘ̇ ܡܚܰܠܠܳܢܳܐ ܕܟܘ̣ܬܡ̈ܳܬܳܐ ܘܨܳܐܝܘ̣ܬܳܐ ܕܰܒܢܰܝ̈ܢܳܫܳܐ: ܠܗܰܘ̇ ܡܪܰܚܡܳܢܳܐ ܘܰܡܪܰܚܦܳܢܳܐ ܢܰܓܝ̣ܪ ܪܘ̣ܚܳܐ ܘܣܰܓܝ̣ ܛܰܝܒܘ̣ܬܳܐ ܘܩܘ̣ܫܬܳܐ: ܠܗܰܘ̇ ܐܳܣܝܳܐ ܕܟܽܠ ܟܺܐܒܝ̣̈ܢ ܘܥܳܨܘ̣ܒܳܐ ܕܟܽܠ ܡܰܚ̈ܘܳܢ: ܠܗܰܘ̇ ܚܰܝܠܳܐ ܟܰܣܝܳܐ ܕܰܒܬܰܪܥܝ̣ܬܳܐ ܠܳܐ ܡܶܬܥܰܩܰܒ: ܘܰܒܦܘ̣ܡܳܐ ܠܳܐ ܡܶܬܡܰܠܰܠ: ܘܡ̣ܶܢ ܠܶܫܳܢܳܐ ܠܳܐ ܡܶܬܦܰܫܰܩ ܘܒܝ̣ܕܰܥܬܳܐ ܠܳܐ ܡܶܬܕܪܶܟ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܰܡܗܰܝܡܰܢ ܒܡܶܠ̈ܰܘܗ̱ܝ ܘܫܰܪܝ̣ܪ ܒܫܘ̣ܘ̈ܕܳܝܰܘܗ̱ܝ ܬܪܝ̣ܨ ܒܕܝ̣̈ܢܰܘܗ̱ܝ ܘܟܺܐܢ ܒܰܥ̈ܒܳܕܰܘܗ̱ܝ ܘܙܰܕܝ̣ܩ ܒܦܘ̣ܪ̈ܥܳܢܰܘܗ̱ܝ: ܗܰܘ̇ ܕܰܒܦܘ̣ܩܕܳܢܶܗ ܡܩܰܘܶܐ ܘܡܘ̣ܠܟܳܢܶܗ ܡܟܰܬܰܪ ܘܛܰܝܒܘ̣ܬܶܗ ܡܫܰܪܪܳܐ: ܚܶܙܘܳܐ ܕܝ̣ܠܶܗ ܡܰܢ ܡܝܰܒܰܫ ܬܗܘ̣ܡ̈ܶܐ ܟܐܳܬܶܗ ܕܝܶܢ ܡܫܰܢܝܳܐ ܛܘ̣ܪ̈ܶܐ: ܪܶܡܙܶܗ ܟܝ̣ܬ ܡܢܝ̣ܕ ܠܰܐܪܥܳܐ ܢܰܦܫܳܐ ܒܐܘ̣ܠܨܳܢܳܐ: ܘܪܘ̣ܚܳܐ ܒܟܰܪܝܘ̣ܬܳܐ ܘܦܰܓܪܳܐ ܒܛܘ̣ܪܳܦܳܐ: ܥܰܠ ܕܶܐܬ̣ܛܰܪܛܰܫܘ̱ ܒܣܰܢܝ̈ܳܬܳܐ ܓܳܥܶܝܢ ܠܘܳܬܳܟ: ܫܰܪܝ̣ܪܳܐܝ̣ܬ ܓܶܝܪ ܠܰܝܬ ܡ̣ܶܢ ܝ̣ܠܝ̣̈ܕܶܐ ܕܠܳܐ ܐܰܥ̣ܘܶܠ ܐܳܦܠܳܐ ܡ̣ܶܢ ܐܰܝܠܶܝܢ ܕܰܗ̣ܘܰܘ ܕܠܳܐ ܚ̣ܛܰܘ: ܘܡ̣ܶܢ ܗܳܪܟܳܐ ܥܰܕ ܚܰܝ ܐ̱ܢܳܐ ܐܶܡܰܠܶܠ: ܘܡ̣ܶܢ ܟܰܕ ܐܝ̣ܬ ܒܝ ܢܫܰܡܬܳܐ ܕܚܰܝ̈ܶܐ ܐܰܬܝ̣ܒ ܦܶܬܓܳܡܳܐ: ܥܕܰܡܳܐ ܠܶܐܡܰܬܝ̱ ܓܶܝܪ ܪܘ̣ܚܳܐ ܕܝ̣ܠܰܢ ܡܶܬܛܰܪܦܳܐ ܒܢܰܓܝܪܘ̣ܬ ܪܘ̣ܚܳܐ ܕܨܶܝܕ ܒܥܶܠ̈ܕܒܳܒܰܝܢ ܠܒܘ̣ܚܪܳܢ ܥܒܳܕ̈ܰܝܢ: ܠܳܐ ܡܳܪܝ̱ ܬܚܘ̣ܪ ܒܫܘ̣ܪ̈ܥܳܬܳܐ ܕܡܰܣܟ̈ܠܳܢܶܐ: ܐܶܠܳܐ ܒܰܐܝܠܶܝܢ ܕܠܳܟ ܐܶܫ̣ܬܰܥܒܰܕܘ̱ ܒܩܘ̣ܫܬܳܐ: ܠܳܐ ܬܰܨܶܕ ܒܣܰܟ̈ܠܘܳܬܳܐ ܕܨܶܢ̈ܥܳܬܗܽܘܢ ܕܰܒܢܰܝ̈ܢܳܫܳܐ ܒܝ̣̈ܫܶܐ: ܐܶܠܳܐ ܐܶܬܒܰܩܳܐ ܒܰܐܝܠܶܝܢ ܕܩܰܒ̣ܶܠܘ̱ ܢܰܗܝ̣ܪܘ̣ܬܶܗ ܕܢܳܡܘ̣ܣܳܟ: ܠܳܐ ܬ̣ܶܪܓܰܙ ܥܰܠ ܐܰܝܠܶܝܢ ܕܰܐܒ̣ܶܫܘ̱ ܒܡܰܪܳܚܘ̣ܬܗܽܘܢ ܝܰܬܝ̣ܪ ܡ̣ܶܢ ܚܰܝ̈ܘܳܬܳܐ: ܐܶܠܳܐ ܐܰܚܶܒ ܡܶܛܽܠ ܐܰܝܠܶܝܢ ܕܰܐܡܝ̣ܢܳܐܝ̣ܬ ܐܶܬ̣ܬܟܶܠܘ̱ ܥܰܠ ܬܶܫܒܘ̣ܚܬܳܟ: ܡܰܢܘ̣ ܒܰܪܢܳܫܳܐ ܕܬ̣ܶܟܐܶܐ ܒܶܗ ܘܠܳܐ ܡܶܢܫܶܝܠ ܒܰܥܓܰܠ ܡܶܬܛܰܠܰܩ ܘܳܐܒܶܕ ܘܣܳܐܶܦ: ܒܛܰܝܒܘ̣ܬܳܟ ܐܶܬܦܪܶܩ̣ܢܰܢ ܒܝܰܕ ܗܰܝܡܳܢܘ̣ܬܳܟ ܘܠܳܐ ܒܟܺܐܢܘ̣ܬܳܐ: ܛܰܝܒܘ̣ܬܳܟ ܐܳܦ ܗܳܫܳܐ ܬ̣ܚܽܘܢ ܠܰܢ ܪܳܚܶܡ ܒܢܰܝ̈ܢܳܫܳܐ: ܘܰܒܗܳܕܶܐ ܡܶܬܝܰܕܥܳܐ ܪܰܒܘ̣ܬܳܟ ܡܳܪܝ̱: ܐܶܡܰܬܝ̱ ܕܰܡܪܰܚܶܡ ܐܰܢ̱ܬ ܥܰܠ ܐܰܝܠܶܝܢ ܕܠܰܝܬ ܒܗܽܘܢ ܚܰܝܠܳܐ ܠܡܶܓܡܳܪܘ̣ ܥܒܳܕ̈ܶܐ ܛܳܒ̈ܶܐ: ܚܢܰܢ ܘܐܰܝܠܶܝܢ ܕܡ̣ܶܢ ܩܕܳܡܰܝܢ ܣܘ̣ܥܪ̈ܳܢܶܐ ܕܰܚܒܳܠܳܐ ܥܒ̣ܰܕܢ ܘܰܦܩ̣ܰܕܢ: ܘܡ̣ܶܢ ܗܳܪܟܳܐ ܒܳܥܶܝܢܰܢ ܒܬܶܢ̈ܚܳܬܳܐ ܘܰܒܬܰܚܢܰܢܬܳܐ ܡܶܬܓܰܪܓܚܳܢܝ̣ܬܳܐ ܚܘ̣ܣ ܡܳܪܝܳܐ ܥܰܠ ܒܪܝ̣ܬܳܐ ܕܝ̣ܠܳܟ ܘܝܘ̣ܩܢܳܐ ܕܪܰܒܘ̣ܬܳܟ: ܕܶܐܬ̣ܬܰܩܢܰܬ݀ ܒܰܕܡܳܐ ܘܡܰܝ̈ܳܐ ܕܡ̣ܶܢ ܐܶ‌ܠܥܳܐ ܕܰܒܪܳܟ ܝ̣ܚܝ̣ܕܳܝܳܐ ܪܕܰܘ: ܕܡܶܛܽܠܳܬܶܗ ܒ̣ܪܰܝܬ ܠܟܘ̣ܠܳܐ: ܘܥܰܠ ܗܳܝ̇ ܒܩܳܠܳܐ ܚܢܝ̣ܓܳܐ ܘܡܰܪܝ̣ܪܳܐ ܡܶܬܟܰܫܦܳܐ ܠܰܡܪܰܚܡܳܢܘ̣ܬܳܟ: ܣܰܓܝ̣ ܚܰܣܝ̣ܪ ܕܬ̣ܰܚܒܝ̣ܗܿ ܡ̣ܶܢ ܒܪ̈ܰܝܳܐ: ܠܳܐ ܢ̣ܶܗܘܳܐ ܥܰܡܠܳܟ ܕܒܳܗܿ ܣܪܝ̣ܩܳܐ ܘܰܐܒܝ̣ܕܳܐ: ܝܳܕܥܝ̣ܢܰܢ ܓܶܝܪ ܕܟܽܠ ܡܶܕܶܡ ܕܰܓ̣ܕܰܫ ܠܰܢ ܒܙܰܒܢܳܐ ܗܳܢܳܐ ܡܰܪܝ̣ܪܳܐ ܒܕܝ̣ܢܳܐ ܟܺܐܢܳܐ ܘܰܒܟܰܝܠܳܐ ܡܰܟܝܳܢܳܐ ܒܛܶܟܣܳܐ ܘܰܒܡܰܬܩܳܠܳܐ ܗ̣ܘܳܐ: ܥܰܠ ܕܠܳܐ ܥܒ̣ܰܕܢ ܡܶܕܶܡ ܕܦܰܩ̣ܶܕܬܳܢ: ܗܳܐ ܐܶܢ ܐܰܣܟܶܠ̣ܢܰܢ ܕܝ̣ܠܳܟ ܚܢܰܢ: ܘܶܐܢ ܢ̇ܺܐܒܰܕ ܕܛܳܒ ܗܝ̣ ܟܰܕ ܗܝ̣: ܒܪܰܡ ܠܳܐ ܬ̣ܰܫܠܶܡ ܠܰܢ ܥܕܰܡܳܐ ܠܚܰܪܬܳܐ ܒܐܝ̣̈ܕܰܝܳܐ ܕܰܒܥܶܠ̈ܕܒܳܒܰܝܢ: ܦܳܩܚܳܐ ܗܳܝ ܕܢ̇ܶܬܡܣܰܪ ܒܐܝ̣̈ܕܰܝܟ ܡܳܪܝܳܐ ܘܠܳܐ ܒܐܝ̣̈ܕܰܝ ܢܘ̣ܟܪ̈ܳܝܶܐ: ܠܰܘ ܓܶܝܪ ܡܶܛܽܠ ܥܰܘ̈ܠܰܝܢ ܘܒܝ̣̈ܫܳܬܰܢ ܢ̣ܶܬܕܰܓܰܠ ܫܽܘܘ̣ܕܳܝܳܟ ܕܝܰܗ̣ܒܬ ܠܥܺܕܬܳܟ ܡܛܰܪܰܦܬܳܐ: ܕܗܳܐ ܐܶܢܳܐ ܥܰܡܶܟܝ̱ ܐܝ̣ܬܰܝ ܥܕܰܡܳܐ ܠܫܘ̣ܠܳܡܶܗ ܕܥܳܠܡܳܐ ܐܰܘܕܰܥ̣ܬ ܠܰܢ ܠܣܰܓܺܝܽܐܘ̣ܬ ܝܰܨܝ̣ܦܘ̣ܬܳܟ ܕܰܥܠܶܝܗܿ: ܟܰܕ ܪܫܰܡ̣ܬܳܗܿ ܥܰܠ ܦܰܣܰܬ ܐܝ̣̈ܕܰܝܟ: ܘܕܰܩܕܳܡܰܝܟ ܟܽܠܫܳܥ ܣܝ̣ܡܳܐ ܘܬ̣ܶܡܬܘ̣ܚ ܝܳܪܝ̣ܥܬܳܗ̇: ܐܳܦ ܬ̣ܦܰܬܶܐ ܚܰܒܠ̈ܶܝܗܿ ܘܬ̣ܰܣܓܶܐ ܘܬ̣ܶܩܒܘ̣ܥ ܣܶܟܶܝ̈ܗܿ: ܘܬ̣ܰܘܪܶܟ ܛܘ̣̈ܢܒܶܝܗܿ: ܘܬ̣ܶܪܕܶܐ ܠܝܰܡܝ̣ܢܳܐ ܘܰܠܣܶܡܳܠܳܐ ܘܠܳܐ ܬ̣ܙܘ̣ܥܝ̱: ܘܰܐܫ̣ܪܰܬ݀ ܠܗܳܕܶܐ ܘܗܰܝܡ̣ܢܰܬ݀ : ܐܳܦ ܐܰܢ̱ܬ ܡܳܪܝ̱ ܡܰܠܳܐ ܫܽܘܘ̣ܕܳܝܳܟ ܠܘܳܬܳܗܿ: ܒܗܳܝ ܕܠܳܐ ܬ̣ܶܕܚܠܝ̣ܢ ܡܶܛܽܠ ܕܠܳܐ ܒܳܗܬܰܬܝ̱: ܒܗܳܝ ܕܶܐܢܳܐ ܐܰܫ̇ܠܶܡܬܶܟܝ̱ ܘܶܐܢܳܐ ܡܥܰܕܰܪ ܐ̱ܢܳܐ ܠܶܟܝ̱: ܒܰܡܚܘ̣ܬܳܐ ܙܥܘ̣ܪܬܳܐ ܡܚ̣ܰܝܬܶܟܝ̱: ܘܰܒܪ̈ܰܚܡܶܐ ܕܰܠܥܳܠܰܡ ܐܶܪܰܚܶܡ ܘܶܐܟܰܢܫܶܟܝ̱: ܪܰܒܳܐ ܗܳܝ ܡܚܘ̣ܬܳܐ ܕܪܶܚܡܰܬ݀ ܐ̱ܢܳܫܘ̣ܬܳܟ: ܝܰܬܝ̣ܪ ܡ̣ܶܢ ܡܫܘ̣ܚܬܳܐ ܕܬܺܐܪܘ̣ܬܳܐ: ܐܳܦ ܗܳܫܳܐ ܡܳܪܝܳܐ ܚܘ̣ܪ ܒܰܢ ܒܪ̈ܰܚܡܶܐ ܘܠܳܐ ܐܰܝܟ ܪܰܒܘ̣ܬ ܪ̈ܘ̣ܫܥܰܝܢ ܬܶܬ̣ܒܥܰܢ: ܒܗ̣ܶܬܢ ܠܡܰܪܡܳܝܘ̣ ܐܰܦ̈ܝܰܢ ܠܘܳܬܳܟ ܒܝܰܕ ܗܳܝ ܕܰܚ̈ܛܳܗܰܝܢ ܡܰܛܝ̣ܘ ܥܕܰܡܳܐ ܠܰܫܡܰܝܳܐ: ܒܪܰܡ ܬܩܘ̣ܠ ܒܡܰܣܰܐܬܳܐ ܥܰܘܠܰܢ ܘܰܕܥܳܡܘ̣ܪ̈ܰܘܗ̱ܝ ܕܥܳܠܡܳܐ: ܘܰܚܙܝ̣ ܢܬܳܥܶܗ ܕܩܰܢܝܳܐ ܘܰܕܟܰܦܬܳܐ ܠܰܐܝܟܳܐ ܡܰܪܟܢܝ̣ܢ ܘܰܕܗܳܝܕܶܝܢ ܬ̣ܶܪܓܰܙ ܥܠܰܝܢ: ܐܶܡܰܬܝ̱ ܠܳܐ ܦ̣ܰܕܘ̱ ܩܕܳܡܰܝܟ ܒܢ̈ܰܝ ܥܰܦܪܳܐ: ܐܰܝܟܳܐ ܠܳܐ ܐܰܣܟ̣ܶܠܘ̱ ܒܢ̈ܰܝ ܒܶܣܪܳܐ: ܐܰܒܳܐ ܕܝ̣ܠܰܢ ܐܶܬ̣ܟܰܢܝ̣ܬ: ܡܪܰܚܡܳܢܳܐ ܐܶܬ̣ܩܪܝ̣ܬ: ܚܰܢܳܢܳܐ ܐܶܫܬܰܡ̣ܰܗܬ: ܡܳܕܶܝܢ ܐܰܝܟ ܕܠܰܒܢܰܝ̈ܳܐ ܪܕܝ̣ ܠܰܢ ܘܰܟܐܝ̣ ܒܰܢ: ܘܠܳܐ ܐܰܝܟ ܥܰܒ̈ܕܶܐ ܡܳܪ̈ܘ̣ܕܶܐ ܘܢܘ̣ܟܪ̈ܳܝܶܐ: ܒܗܳܝ ܕܠܰܐܒܪܳܗܳܡ ܠܳܐ ܝܕܰܥ̣ܢ ܘܠܐܝ̣ܣܪܳܐܝܶܠ ܠܳܐ ܐܶܫ̣ܬܰܘܕܰܥܢ: ܥܠܰܝܟ ܗܽܘ ܐܶܫܬܕܝ̣ܢܰܢ ܡ̣ܶܢ ܟܰܪܣܳܐ ܕܶܐܡܳܐ ܡܰܥܡܘ̣ܕܝ̣ܬܳܐ ܡܚܰܣܝܳܢܝ̣ܬܳܐ: ܟܰܕ ܫܳܦܪܝ̣ܢܰܢ ܐܶܫܬܰܘܕܰܥ̣ܢܳܟ ܐܰܠܳܗܰܢ: ܘܒܰܕܓܽܘܢ ܠܳܐ ܬ̣ܰܪܚܶܩ ܡܶܢܰܢ ܡܶܛܽܠ ܕܐܘ̣ܠܨܳܢܳܐ ܩ̣ܪܶܒ ܘܠܰܝܬ ܕܰܡܥܰܕܰܪ ܐܶܠܳܐ ܐܶܢ ܐܰܢ̱ܬ: ܬܰܘܪ̈ܶܐ ܘܰܐܪ̈ܘܳܢܶܐ ܕܒܰܝܫܳܢ ܥܰܡܳܐ ܚܰܪܡܳܐ ܐ̱ܚܪ̈ܳܢܝܰـܝ ܠܶܫܳܢܳܐ ܕܥܳܡܰܪ ܒܡܰܫ̈ܟܢܶܐ ܚܰܕܪܘܢ ܚܪܘ̣ܒ ܐܶܢܽܘܢ ܒܚܰܝܠܶܗ ܪܰܒܳܐ ܕܰܨܠܝ̣ܒܳܐ ܕܝ̣ܠܳܟ: ܕܢ̣ܶܫܬܰܘܕܥܽܘܢ ܘܰܕܢ̣ܶܕܥܽܘܢ ܕܐܰܢ̱ܬ ܩܳܐܡ ܐܰܢ̱ܬ ܒܰܐܦ̈ܰܝܢ: ܘܡܶܛܽܠ ܗܳܠܶܝܢ ܘܕܰܐܝܟ ܗܳܠܶܝܢ ܟܰܢܶܫ ܒܘܕܳܪܰܢ ܡܳܪܝܳܐ܇ ܒܢܝ̣ ܡܣܰܚ̈ܦܳܬܰܢ ܚܰܕܶܬ ܚܰܪ̈ܒܳܬܰܢ ܚܡܘ̣ܠ ܠܰܢ ܠܰܛܝܳܪܳܟ ܡܢܝ̣ ܠܰܢ ܒܰܓܙܳܪܳܟ: ܐܰܦܢܳܐ ܠܰܢ ܠܫܶܕܬܰܢ ܩܰܕܡܳܝܬܳܐ ܘܢ̣ܶܪܥܡܽܘܢ ܩ̈ܳܠܶܐ ܕܬܶܫ̈ܡܫܳܬܰܢ ܒܥܺܕ̈ܳܬܳܟ ܩܰܕܝ̣̈ܫܳܬܳܐ: ܫܰܢܶܩ ܠܰܕܡܶܬܬܪܝ̣ܡܝ̣ܢ ܥܠܰܝܢ ܒܫܘܢܩܳܐ: ܪܰܝܰܚ ܠܰܫܓ̈ܘ̣ܫܝܶܐ ܟܶܢ̈ܫܳܢܳܝܶܐ ܕܩܰܘ̈ܡܶܐ ܡܕ̈ܝ̣ܢܳܝܶܐ: ܐܰܪܡܳܐ ܒܗܽܘܢ ܕܶܚܠܬܳܟ ܘܰܪܬܝ̣ܬܳܟ: ܥܒܶܕ ܕܢ̣ܶܬܪܰܥܽܘܢ ܥܠܰܝܢ ܡܫܰܝ̈ܢܳܬܳܐ ܘܥܰܠ ܟܽܠܶܗ ܥܰܡܳܐ ܚܣܝ̣ܡܳܐ ܕܰܟܪ̈ܝ̣ܣܛܝܳܢܶܐ: ܘܗܳܝܕܝܶܢ ܚܰܕܳܢ ܡܶܛܽܠ ܥܰܘܠܰܢ ܘܬ̣ܶܗܘܶܐ ܒܰܣܝ̣ܡܘ̣ܬܳܟ ܥܠܰܝܢ ܐܰܝܟܰܢܳܐ ܕܣܰܟܝ̣ܢܰܢ ܠܳܟ: ܘܟܽܠܳܗܿ ܕܰܬܚܶܝܬ ܫܡܰܝܳܐ ܬ̣ܶܕܰܥܝ̱ ܕܐܰܢ̱ܬ ܐܝ̣ܬܰܝܟ ܚܰܕ ܐܰ‌ܠܳܗܳܐ ܫܰܪܝ̣ܪܳܐ: ܘܡܰܢ ܕܫ̣ܰܕܰܪܬ ܝܶܫܘ̣ܥ ܡܫܝ̣ܚܳܐ ܥܰܡ ܪܘ̣ܚܳܟ ܩܰܕܝ̣ܫܳܐ: ܘܠܳܟ ܙܳܕܩܳܐ ܘܡܶܬܬܚܝ̣ܒܳܐ ܬܶܫܒܘ̣ܚܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܚܰܕܳܐ ܡܳܪܝ̱ ܠܪ̈ܰܚܝ̣ܩܶܐ ܒܰܚܢܳܢܳܟ: ܘܪܰܚܶܡ ܥܰܠ ܩܰܪ̈ܝ̣ܒܶܐ ܒܛܰܝܒܘ̣ܬܳܟ: ܘܰܐܪܘܰܚ ܠܰܐܠܝ̣̈ܨܶܐ ܘܒܰܝܰܐ ܠܰܐܒܝ̣̈ܠܶܐ: ܘܰܥܨܘ̣ܒ ܠܰܬܒܝ̣ܪ̈ܶܐ: ܘܰܐܣܳܐ ܠܰܟܪ̈ܝ̣ܗܶܐ: ܘܚܰܝܶܠ ܠܰܡܚܝ̣̈ܠܶܐ: ܘܦܰܢܳܐ ܠܰܐܒܝ̣̈ܕܶܐ: ܘܚܰܣܳܐ ܠܥܰܢܝ̣̈ܕܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ ܒܗܰܝܡܳܢܘ̣ܬܳܐ ܕܰܫܪܳܪܳܐ: ܘܰܐܫܘܳܐ ܠܰܢ ܡܳܪܝ̱ ܥܰܡܗܽܘܢ ܒܪ̈ܰܚܡܶܐ ܕܛܰܝܒܘ̣ܬܳܟ: ܠܗܰܘ̇ ܡܰܥܡܪܳܐ ܕܰܟܝܳܐ ܘܰܒܪܝ̣ܟܳܐ ܕܒܶܗ ܡܶܬܬܢܝ̣ܚܝ̣ܢ ܣܶܕܪ̈ܶܐ ܕܰܡܢܝ̣̈ܚܳܢܰܝܟ ܪ̈ܘ̣ܚܳܢܳܝܶܐ: ܡܳܪܰܢ ܘܰܐܠܳܗܰܢ܀