ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܰܠܟܳܐ ܕܡܰܠ̈ܟܶܐ: ܘܡܳܪܳܐ ܕܡܰܠܰܐܟ̈ܶܐ ܕܥܘ̣ܬܪܶܗ ܫܟܝ̣ܚ ܘܓܰܙܶܗ ܪܘܝ̣ܚ: ܘܬܰܪܥܶܗ ܦܬܝ̣ܚ ܘܨܶܒܝܳܢܶܗ ܚܘܝ̣ܚ: ܠܗܰܘ̇ ܛܳܒܳܐ ܕܠܳܐ ܡܶܫܬܰܚܠܰܦ: ܠܗܰܘ̇ ܕܶܐܡ̣ܰܪ ܕܰܒܥܰܘ ܘܬ̣ܶܫܟܚܘܢ ܘܩܘ̣ܫܘ̱ ܢ̣ܶܬܦܬܰܚ ܠܟܽܘܢ: ܠܳܟ ܩܳܪܶܝܢܰܢ ܐܰܒܳܐ ܡܪܰܚܡܳܢܳܐ ܥܢܝ̣ ܠܰܢ ܒܚܢܳܢܳܟ: ܘܥܰܕܰܪ ܠܰܢ ܐܰܝܟ ܫܘ̣ܘܕܳܝܳܟ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܐܰܠܗܳܐ ܗܰܘ̇ ܕܐܝ̣ܬܰܘܗ̱ܝ ܚܰܣܝܳܐ ܩܰܕܝ̣ܫܳܐ ܘܰܡܚܰܣܝܳܢܳܐ ܕܟܽܠܗܶܝܢ ܫܘ̣ܪ̈ܥܳܬܳܐ ܕܝ̣ܠܰܢ: ܗܰܘ̇ ܕܩܳܪܶܐ ܠܚܰܛܳܝ̈ܶܐ ܠܰܬܝܳܒܘ̣ܬܳܐ ܘܠܳܐ ܟܳܠܶܐ ܪ̈ܰܚܡܰܘܗ̱ܝ ܡ̣ܶܢ ܣܳܓ̈ܘ̣ܕܰܘܗ̱ܝ: ܗܰܘ̇ ܕܒܳܚܰܪ ܩܰܛܝ̣ܢܳܐܝ̣ܬ ܠܟܽܠܗܶܝܢ ܣܰܟܠ̈ܘܳܬܳܐ ܕܝ̣ܠܰܢ: ܘܟܽܠܗܶܝܢ ܟܰܣ̈ܝܳܬܳܐ ܕܝ̣ܠܰܢ: ܘܟܽܠܗܶܝܢ ܟܰܣ̈ܝܳܬܳܐ ܘܓܰܠ̈ܝܳܬܳܐ ܕܟܽܠܗܽܘܢ ܒܢܰܝ̈ܢܳܫܳܐ: ܘܰܚ̈ܛܳܗܶܐ ܕܝ̣ܠܗܽܘܢ ܟܣܰܝ̈ܳܐ ܓ̇ܠܶܝܢ̣ ܐܶܢܽܘܢ ܘܰܡܦܰܪܣܝ̣ܢ ܩܕܳܡܰܘܗ̱ܝ: ܗܰܘ̇ ܕܠܳܐ ܛܳܥܶܐ ܘܠܳܐ ܡܶܬܛܰܫܶܐ ܠܶܗ ܚܕܳܐ ܡ̣ܶܢ ܙܥܘ̣ܪ̈ܝܳܬܳܐ ܘܪܰܘܪ̈ܒܳܬܳܐ ܕܝ̣ܠܰܢ ܗܳܠܶܝܢ ܕܡܶܢܰܢ ܡܶܣܬܰܥܪ̈ܳܢ ܐܶܠܳܐ ܩܕܳܡ ܒܺܐܡܰܐ ܕܝ̣ܠܶܗ ܕܚܝ̣ܠܬܳܐ ܓܳܠܶܐ ܘܰܡܦܰܪܣܶܐ ܠܗܶܝܢ ܠܚܰܝ̈ܠܰܘܳܬܳܐ ܫܡܰܝ̈ܳܢܶܐ: ܗܳܢܰܘ ܕܶܝܢ ܩܕܳܡ ܬܳܐܘܰܛܪܳܘܢ ܕܰܟܢܘ̣ܫܝܳܐ ܗܰܘ̇ ܛܘ̣ܒܬܳܢܳܐ ܕܡܰܠܰܐܟ̈ܶܐ ܘܰܒܢܰܝ̈ܢܳܫܳܐ ܗܰܘ̇ ܕܰܠܣܰܓܺܝܽܐܘ̣ܬ ܪ̈ܰܚܡܶܐ ܕܠܶܗ ܣܳܟܳܐ ܠܳܐ ܐܝ̣ܬ: ܐܶܠܳܐ ܣܰܓܺܝ̈ܺܐܝ̣ܢ ܪ̈ܰܚܡܰܘܗ̱ܝ ܘܥܰܬܝ̣ܪ ܒܶܝܬ ܓܰܙܳܐ ܕܰܡܪܰܚܡܳܢܘ̣ܬܶܗ ܝܰܬܝ̣ܪ ܡ̣ܶܢ ܟܽܠܗܽܘܢ ܚܛܳܗ̈ܶܐ ܕܝܰܠ̈ܕܰܘܗ̱ܝ ܕܳܐܕܳܡ: ܐܝ̣ܢ ܒܒܳܥܘ̣ ܡܶܢܳܟ ܐܰܠܳܗܰܢ ܗܰܘ̇ ܕܐܝ̣ܬܰܝܟ ܣܘ̣ܟܳܝܳܐ ܕܟܽܠܗܽܘܢ ܐܰܒ̈ܳܗܳܬܳܐ ܘܪ̈ܝ̣ܫܰܝ ܐܰܒ̈ܳܗܳܬܳܐ: ܕܰܬ̣ܫܰܟܶܢ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܠܟܽܠܗܽܘܢ ܚܰܛܳܝ̈ܶܐ ܕܢܳܩܫܝ̣ܢ ܒܬܰܪܥܳܐ ܪܰܒܳܐ ܕܰܡܪܰܚܡܳܢܘ̣ܬܳܟ: ܡܶܛܽܠ ܕܰܡܪܰܚܡܳܢܳܐ ܐܝ̣ܬܰܝܟ ܣܰܓܝ̣ ܪ̈ܰܚܡܶܐ ܕܠܳܐ ܨܳܒܶܐ ܐܰܢ̱ܬ ܒܰܐܒܕܳܢܳܐ ܕܰܓܒܝ̣ܠܬܳܟ: ܘܶܐܢ ܚܛܳܗ̈ܶܐ ܘܣܰܟ̈ܠܘܳܬܳܐ ܘܫܘ̣ܪ̈ܥܳܬܳܐ ܘܡܶܬܥܰܒܪ̈ܳܢܘܳܬܳܐ ܕܝ̣ܠܰܢ ܢܳܛܰܪ ܐܰܢ̱ܬ ܡܳܪܝܳܐ: ܘܟܽܠܗܶܝܢ ܟܰܣ̈ܝ̣ܬܳܐ ܠܓܶܠܝܳܐ ܡܰܝܬܶܐ ܐܰܢ̱ܬ: ܘܥܰܪܛܶܠܳܐܝ̣ܬ ܒܒܶܗܬܬܳܐ ܠܰܢ ܡܩܝ̣ܡ ܐܰܢ̱ܬ: ܘܰܒܕܝ̣ܢܳܐ ܕܠܳܐ ܪ̈ܰܚܡܶܐ ܠܰܢ ܕܳܐܶܢ ܐܰܢ̱ܬ ܘܰܒܫܰܠܗܶܒܝ̣ܬܳܐ ܕܠܳܐ ܕܳܥܟܳܐ ܠܰܢ ܡܫܰܢܶܩ ܐܰܢ̱ܬ: ܠܰܐܝܟܳܐ ܡܳܪܝ̱ ܢ̇ܶܥܪܘ̣ܩ ܡܶܢܳܟ: ܘܒܰܐܝܢܳܐ ܐܰܬܪܳܐ ܢ̇ܶܬܛܰܫܶܐ ܡ̣ܶܢ ܩܕܳܡܰܝܟ: ܠܳܐ ܡܳܪܝ ܬ̣ܶܥܒܶܕ ܥܰܡܰܢ ܐܰܝܟ ܚ̈ܛܳܗܰܝܢ ܘܠܳܐ ܐܰܝܟ ܣܰܟ̈ܠܘܳܬܰܢ ܬ̣ܶܣܥܘ̣ܪ ܥܰܡܰܢ: ܠܳܐ ܠܥܳܠܰܡ ܬ̣ܶܪܓܰܙ ܥܠܰܝܢ ܡܳܪܝܳܐ ܘܠܳܐ ܬ̣ܶܛܰܪ ܪܘ̣ܓܙܳܟ ܠܕܳܪܕܳܪ̈ܝ̣ܢ: ܚܢܰܢ ܓܶܝܪ ܠܦܘ̣ܪܩܳܢܳܟ ܡܶܬܝܰܐܝܒܝ̣ܢܰܢ: ܘܰܠܪ̈ܰܚܡܶܐ ܫܦܝ̣̈ܥܶܐ ܕܰܚܢܳܢܳܐ ܕܝ̣ܠܳܟ ܡܣܰܟܶܝܢܰܢ: ܟܰܕ ܒܪܝ̣ܫܳܐ ܡܰܪܟܢܳܐ ܘܰܒܢܰܦܫܳܐ ܙܗܝ̣ܬܳܐ ܘܣܶܓܕܬܳܐ ܪܟܝ̣ܢܬܳܐ: ܘܰܒܠܶܒܳܐ ܕܰܟܝܳܐ ܕܓܳܥܶܐ ܒܚܰܫܳܐ ܘܰܒܚ̈ܶܢܳܓܬܳܐ ܪ̈ܰܥܘ̣ܡܳܬܳܐ ܘܒܶܟܝܳܐ ܡܰܪܝ̣ܪܳܐ ܠܳܟ ܡܳܪܝܳܐ ܡ̇ܠܶܐ̣ ܪ̈ܰܚܡܶܐ ܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ: ܕܬܰܛܶܠ ܥܠܰܝܢ ܝܰܡܝ̣ܢܳܟ ܗܳܝ̇ ܡܰܠܝܰܬ݀ ܪ̈ܰܚܡܶܐ: ܘܰܬ̣ܦܰܨܶܐ ܠܰܢ ܡ̣ܶܢ ܟܽܠܗܽܘܢ ܚܘ̣ܫܳܒ̈ܶܐ ܘܚܘ̣ܝܳܒ̈ܶܐ ܕܰܚܛܝ̣ܬܳܐ: ܠܡܰܢ ܢ̇ܶܒܥܶܐ ܕܰܢ̇ܦܝ̣ܣܳܟ ܚܠܳܦܰܝܢ: ܐܶܠܳܐ ܐܶܢ ܠܪ̈ܰܚܡܶܐ ܕܝ̣ܠܳܟ ܡܬܘ̣̈ܡܳܝܶܐ ܗܳܠܶܝܢ ܕܰܟܝܳܢܳܐܝ̣ܬ ܥܙܝ̣ܠܝ̣ܢ ܒܳܟ ܘܰܦܪܝ̣ܣܝ̣ܢ ܟܽܠ ܫܳܥ ܥܰܠ ܒܶܪ̈ܝܳܬܳܟ: ܡ̣ܶܢ ܐܰܝܟܳܐ ܢ̇ܶܣܰܒ ܚܘ̣ܣܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ: ܐܶܠܳܐ ܐܶܢ ܡ̣ܶܢ ܒܶܝܬܓܰܙܳܟ ܡܰܠܝܳܐ ܘܥܰܬܝܪܳܐ: ܡܰܢܘ̣ ܕܰܢ̣ܦܝ̣ܣܳܟ ܥܰܠ ܟܽܠܗܶܝܢ ܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ ܘܢ̣ܶܠܚܶܐ ܠܶܐܫܛܳܪܳܐ ܕܰܚ̈ܛܳܗܶܐ ܕܝܠܰܢ: ܐܳܘ ܡܰܢܘ̣ ܕܰܢ̣ܚܰܣܶܐ ܠ̈ܥܰܘܠܶܐ ܕܝ̣ܠܰܢ ܘܢ̣ܰܥܒܰܪ ܣܰܟ̈ܠܘܳܬܰܢ: ܐܶܠܳܐ ܐܶܢ ܛܰܝܒܘ̣ܬܳܐ ܕܝ̣ܠܳܟ: ܗܳܝ ܕܐܰܝܟ ܐܶܡܳܐ ܡܪܰܚܡܳܢܝ̣ܬܳܐ ܟܰܪܝܳܐ ܠܳܗܿ ܥܰܠ ܚܰܛܳܝ̈ܶܐ: ܘܡܰܢܘ̣ ܕܰܢ̣ܦܰܨܶܐ ܘܰܢ̣ܫܰܘܙܶܒ ܠܰܢ ܡ̣ܶܢ ܟܽܠܗܶܝܢ ܡܥܝ̣ܩܳܢ̈ܝܳܬܳܐ ܐܶܠܳܐ ܐܶܢ ܚܰܝܠܳܐ ܟܰܣܝܳܐ ܘܚܰܣܝ̣ܢܳܐ ܕܰܓܒܰܪ̈ܘܳܬܳܐ ܕܝ̣ܠܳܟ: ܡܰܢܘ̣ ܕܢ̣ܰܐܣܶܐ ܘܢ̣ܰܚܠܶܡ ܠܟܺܐܒ̈ܶܐ ܡܫܝ̣̈ܡܳܢܶܐ ܕܰܚܛܳܗ̈ܶܐ ܕܰܒܦܰܓܪܳܐ ܕܝ̣ܠܰܢ ܛܡܝ̣ܪܝ̣ܢ: ܐܶܠܳܐ ܐܶܢ ܐܰܢ̱ܬ ܐܳܣܝܳܐ ܫܡܰܝܳܢܳܐ ܕܒܳܟ ܡܶܬܓܰܘܣܝ̣ܢ ܟܽܠܗܽܘܢ ܐܰܠܝ̣̈ܨܶܐ ܘܥܰܝ݂ܺܝ݂̈ܩܰܝ ܪܘ̣ܚܳܐ: ܡܰܢܘ̣ ܕܢ̣ܶܪܥܶܐ ܠܥܳܢ̈ܳܐ ܕܝ̣ܠܳܟ ܡܠܝ̣ܠܬܳܐ: ܘܢ̣ܶܛܪܘ̣ܕ ܡܶܢܳܗ̇ ܠܰܐܪܝܳܐ ܣܳܪܘ̣ܚܳܐ: ܘܰܠ̈ܕܺܐܒܶܐ ܡܚܰܒ̈ܠܳܢܶܐ: ܐܶܠܳܐ ܐܶܢ ܐܰܢ̱ܬ ܪܳܥܝܶܗ ܕܐܝ̣ܣܪܳܐܝܶܠ ܕܠܳܐ ܢܳܐܶܡ ܘܠܳܐ ܕܳܡܶܟ: ܘܠܳܐ ܫܳܒܶܩ ܠܳܗܿ ܠܥܳܢܶܗ ܕܬ̣ܺܐܒܰܕܝ̱: ܠܳܐ ܡܳܪܝ̱ ܢ̇ܺܐܒܰܕ ܡ̣ܶܢ ܛܝܳܪܳܟ: ܠܳܐ ܡܳܪܝ̱ ܬ̣ܶܥܒܶܕ ܠܰܢ ܢܘ̣ܟܪ̈ܳܝܶܐ ܡ̣ܶܢ ܓܙܳܪܳܟ: ܠܳܐ ܡܳܪܝ̱ ܬܶܬܥ̱ܰܗܰܕ ܥܰܘ̈ܠܶܐ ܘܪ̈ܘ̣ܫܥܶܐ ܕܝ̣ܠܰܢ ܗܳܠܶܝܢ ܕܰܒܚܺܐܦ̈ܶܐ ܬܰܙܝ̣̈ܙܶܐ ܕܛܰܠܝܘ̣ܬܳܐ ܡܶܢܰܢ ܒܝ̣ܫܳܐܝ̣ܬ ܐܶܣ̣ܬܥܰܪܘ̱: ܠܳܐ ܡܳܪܝ̱ ܬ̣ܚܰܝܶܒ ܠܰܢ ܒܝܰܘܡܳܐ ܕܕܝ̣ܢܳܐ: ܠܳܐ ܡܳܪܝ̱ ܬ̣ܰܗܦܶܟ ܐܰܦ̈ܰܝܟ ܡܶܢܰܢ: ܠܳܐ ܡܳܪܝ̱ ܢ̣ܶܕܥܰܟ ܢܘ̣ܗܪܳܐ ܕܠܰܡ̈ܦܺܐܕܰܝܢ ܩܕܳܡܰܝܟ: ܠܳܐ ܬ̣ܶܢܰܕ ܠܳܟ ܡܶܢܰܢ ܪܳܚܶܡ ܐ̱ܢܳܫܳܐ: ܠܳܐ ܬ̣ܰܣܠܶܐ ܠܰܢ ܡ̣ܶܢ ܝܳܪܬܘ̣ܬܳܐ ܕܝ̣ܠܳܟ: ܠܳܐ ܬ̣ܶܓܥܘ̣ܪ ܒܰܢ ܒܚܶܡܬܳܐ ܘܠܳܐ ܬ̣ܰܪܟܶܢ ܪ̈ܝ̣ܫܰܝܢ ܒܒܶܝܬ ܕܝ̣ܢܳܐ: ܠܳܐ ܬ̣ܰܒܗܶܬ ܠܰܢ ܒܗܳܝ ܫܳܥܬܳܐ ܕܦܳܣܝ̈ܩܳܬܳܐ: ܘܠܳܐ ܬ̣ܰܪܦܶܐ ܠܰܢ ܒܰܦܣܳܩܣܰܒܪܳܐ ܗܰܘ̇ ܕܰܠܥܳܠܰܡ: ܠܳܐ ܡܳܪܝ̱ ܬ̣ܰܫܢܶܩ ܠܰܢ ܒܚܶܫܘ̣ܟܳܐ ܗܰܘ̇ ܒܰܪܳܝܳܐ ܕܐܝ̣ܬܰܘܗ̱ܝ ܠܡܺܐܢܳܐ ܕܥܳܒ̈ܕܰܝ ܒܝ̣̈ܫܳܬܳܐ: ܠܳܐ ܡܳܪܝ̱ ܢ̣ܶܫܬܡܰܥ ܡܶܢܰܢ ܚܠܳܦ ܙܡܝ̣ܪ̈ܳܬܳܐ ܕܪܘ̣ܚܳܐ ܩܰܕܝ̣ܫܳܐ ܩ̈ܳܠܶܐ ܕܒܶܟܝܳܐ ܘܰܕܚܘ̣ܪܳܩ ܫܶܢ̈ܶܐ: ܠܳܐ ܡܳܪܝ̱ ܬ̣ܫܰܢܶܩ ܠܰܢ ܒܢܘ̣ܪܳܐ ܕܠܳܐ ܕܳܥܟܳܐ ܘܰܕܠܰܝܬ ܠܳܗܿ ܫܘ̣ܠܳܡܳܐ: ܐܶܠܳܐ ܡܶܛܽܠ ܪ̈ܰܚܡܶܐ ܕܝ̣ܠܳܟ ܡܬ̈ܘ̣ܡܳܝܶܐ ܡܳܪܝܳܐ܇ ܩܪܝ̣ ܘܩܰܪܶܒ ܠܰܢ ܠܘܳܬܳܟ ܘܰܠܚܝ̣ ܘܰܐܥܒܪ ܠܟܽܠܗܽܘܢ ܚܛܳܗ̈ܶܐ ܘܣܰܟ̈ܠܘܳܬܳܐ ܘܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ ܕܰܣܥ̣ܰܪܢ ܩܕܳܡܰܝܟ:ܓܠܝ̣ ܡ̣ܶܢ ܐܰܦ̈ܝܰܢ ܠܟܽܠܶܗ ܥܰܡܛܳܢܳܐ ܕܰܚܛܝ̣ܬܳܐ: ܐܰܥܒܰܪ ܡܶܢܰܢ ܠܥܰܪܦܶܠܳܐ ܚܶܫܘ̣ܟܳܝܬܳܐ ܗܳܝ̇ ܕܰܒܝܰܕ ܚܛܳܗ̈ܰܝܢ ܥܠܰܝܢ ܐܶܬ̣ܦܰܪܣܰܬ݀ : ܩܰܒܶܠ ܡܶܢܰܢ ܠܰܬܝܳܒܘ̣ܬܳܐ ܗܳܕܶܐ ܕܰܡܩܰܪܒܝ̣ܢܰܢ ܩܕܳܡܰܝܟ ܐܶܬܪܰܥܳܐ ܒܨܠܰܘ̈ܳܬܳܐ ܘܒܳܥ̈ܘܳܬܳܐ ܕܡܰܪܥܝ̣ܬܳܐ ܕܝ̣ܠܳܟ ܫܡܰܥ ܠܬܰܟܫܶܦܬܳܐ ܕܣܳܓ̈ܘ̣ܕܰܝܟ ܥܒܶܕ ܠܰܢ ܒܢܰܝ̈ ܝܳܪܬܘ̣ܬܳܟ ܘܰܕܩܰܕܝ̣̈ܫܰܝܟ: ܚܰܠܶܛ ܠܰܢ ܒܟܶܢ̈ܫܶܐ ܕܓܰܒ̈ܝܰܟ ܡܢܝ̣ ܠܰܢ ܒܰܓܙܳܪܳܟ: ܘܰܚܫܘ̣ܒ ܠܰܢ ܥܰܡ ܐܶܡܪ̈ܰܝܟ ܐܰܫܘܳܐ ܠܰܢ ܠܚܰܝ̈ܶܐ ܛܘ̣ܒ̈ܬܳܢܶܐ ܕܰܠܥܳܠܰܡ ܘܰܠܛܳܒܬܳܐ ܕܡ̣ܶܢ ܠܘܳܬܳܟ: ܥܰܡ ܟܽܠ ܕܰܫܦ̣ܰܪܘ̱ ܠܳܟ ܘܰܥܒ̣ܰܕܘ̱ ܠܨܶܒܝܳܢܳܐ ܕܰܐܠܳܗܘ̣ܬܳܟ: ܒܛܰܝܒܘ̣ܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ݀ ܐ̱ܢܳܫܘ̣ܬܳܐ ܕܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ: ܕܥܰܡܶܗ ܠܳܟ ܦ̇ܐܶܐ̣ ܫܘ̣ܒܚܳܐ ܘܐܝ̣ܩܳܪܳܐ ܘܐܘ̣ܚܕܳܢܳܐ ܥܰܡ ܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܟܠܝ̣ ܘܰܐܥܒܰܪ ܡܶܢܰܢ ܡܳܪܝܳܐ ܘܡ̣ܶܢ ܥܰܡܳܟ ܘܝܳܪܬܘ̣ܬܳܟ ܟܽܠ ܡܣܳܡܒܪܝ̣ܫܳܐ ܘܫܰܒ̈ܛܶܐ ܘܡܰܚ̈ܘܳܬܳܐ ܩܰܫ̈ܝܳܬܳܐ ܐܰܝܠܶܝܢ ܕܡܶܛܽܠ ܚܛܳܗ̈ܰܝܢ ܟܺܐܢܳܐܝ̣ܬ ܕܡܶܬܬܰܝܬܶܝܢ ܥܠܰܝܢ: ܐܰܝܟܰܢܳܐ ܕܢ̣ܶܒܗܬܽܘܢ ܘܢ̣ܶܚܦܪܽܘܢ ܣܳܢ̈ܰܐܝܢ ܒܥܘ̣ܫܢܳܐ ܘܚܰܝܠܬܳܢܘ̣ܬܳܐ ܕܡܶܢܳܟ: ܘܰܚܢܰܢ ܢ̇ܶܚܕܶܐ ܘܰܢ̇ܕܘ̣ܨ ܒܦܘ̣ܪܩܳܢܳܟ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀