ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܪܳܚܶܡ ܐ̱ܢܳܫ̈ܳܐ: ܕܢ̇ܶܗܘܶܐ ܬܰܠܡܝ̣̈ܕܶܐ ܠܰܫܪܳܪܳܟ ܘܡܶܫܬܰܡ̈ܥܳܢܶܐ ܠܦܘ̣ܩ̈ܕܳܢܰܝܟ ܘܰܡܫܰܡܠ̈ܝܳܢܶܐ ܕܢܳܡܘ̣̈ܣܰܝܟ: ܘܰܡܢܝ̣̈ܚܳܢܶܐ ܠܡܳܪܘ̣ܬܳܟ ܘܰܠܪ̈ܰܚܡܰܝܟ: ܘܦܰܨܳܐ ܠܰܢ ܡ̣ܶܢ ܗܳܝ ܕܠܳܐ ܫܳܦ̇ܪܳܐ ܠܳܟ: ܘܚܰܪܰܪ ܠܰܢ ܡ̣ܶܢ ܗܳܝ ܕܢ̇ܶܚܛܶܐ ܠܳܟ: ܘܰܐ‌ܠܶܦ ܠܰܢ ܕܢ̇ܶܥܒܶܕ ܨܶܒܝܳܢܳܟ ܒܟܽܠܙܒܰܢ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܠܗܰܘ̇ ܕܰܒܚܰܕ ܢܘ̣ܗܪܳܐ ܡܶܬܬܰܒܪܰܩ: ܘܒܰܬܠܳܬܳܐ ܡܶܬܝ̣ܕܰܥ: ܒܰܬܠܳܬܳܐ ܡܰܢ ܒܕܝ̣ܠܳܝ̈ܳܬܳܐ ܘܰܒܩ̈ܢܘ̣ܡܶܐ ܒܚܰܕ ܕܶܝܢ ܒܡܶܠܬܳܐ ܕܐܘ̣ܣܺܝܰܐ ܐܰܘܟܝ̣ܬ ܒܰܐܠܳܗܘ̣ܬܳܐ: ܗܰܘ̇ ܕܡܶܬܚܰܝܰܕ ܡܦܰܠܓܳܐܝ̣ܬ ܘܡܶܬܗܰܝܡܰܢ ܬܠܝ̣ܬܳܐܝ̣ܬ ܘܡܶܣܬܓܶܕ ܚܕܳܢܳܐܝ̣ܬ: ܘܡܶܬܬܰܘܕܶܐ ܢܰܨܝ̣ܚܳܐܝ̣ܬ: ܕܺܐܝܬܰܘܗ̱ܝ ܐܰܠܳܗܳܐ ܫܰܪܝ̣ܪܳܐ ܘܰܡܫܰܒܚܳܐ: ܘܚܰܝܠܬܳܢܳܐ ܘܰܡ̇ܨܶܐ̣ ܟܽܠ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܽܘ̣ܒܚܳܐ ܠܳܟ ܡܫܝ̣ܚܳܐ ܢܘ̣ܗܪܳܐ ܕܰܫܪܳܪܳܐ ܘܫܶܡܫܳܐ ܕܙܰܕܝ̣ܩܘ̣ܬܳܐ ܕܰܫ̣ܪܰܝܬ ܒܥܺܕܬܳܟ ܘܢܶܗ̣ܪܰܬ݀ ܘܰܒܓܰܘ ܬܺܐܒܶܝܠ ܘܶܐܬܦ̣ܰܨܰܚܬ݀ : ܩܪܶܒ̣ܘ̱ ܠܳܟ ܚܰܛܳܝ̈ܶܐ ܘܶܐܙ̣ܕܰܕܰܩܘ̱ ܛܳܥܰܝ̈ܳܐ ܘܰܐܒܝ̣̈ܕܶܐ ܘܶܐܬ̣ܦܢܝ̣ܘ: ܚ̣ܙܰܐܘܽܘܟ ܣܡܰܝ̈ܳܐ ܘܶܐܬ̣ܦܰܬܰܚܘ̱ ܘܳܐܦ ܚܶܫܘ̣̈ܟܶܐ ܐܶܬ̣ܢܰܗܰܪܘ̱: ܫܡܰܥܘ̱ ܩܳܠܳܟ ܡܝ̣̈ܬܶܐ ܘܰܢܦ̣ܰܩܘ̱ ܚܒܝ̣̈ܫܶܐ ܘܰܐܣܝ̣ܪ̈ܶܐ ܘܶܐܫ̣ܬܪܝ̣ܘ: ܘܥܰܡ̱̈ܡܶܐ ܡܒܰܕܪ̈ܶܐ ܐܶܬܟܰܢܰܫܘ̱: ܐܰܢ̱ܬ ܗ̱ܘ̣ ܢܘ̣ܗܪܳܐ ܕܠܳܐ ܦܳܛܰܪ ܐܰܢ̱ܬ ܗ̱ܘ̣ ܐܝ̣ܡܡܳܐ ܕܠܳܐ ܡܰܘܦܶܐ: ܐܰܢ̱ܬ ܗ̱ܘ̣ ܨܶܡܚܳܐ ܕܠܳܐ ܚܳܫܶܟ ܘܨܰܦܪܳܐ ܦܨܝ̣ܚܳܐ ܕܠܳܐ ܡܰܕܪܶܟ ܠܶܗ ܪܰܡܫܳܐ: ܐܝ̣ܢ ܡܳܪܝܳܐ ܒܢܘ̣ܗܪܳܟ ܢ̣ܰܢܗܪ̈ܳܢ ܥܰܝ̈ܢܶܐ ܕܠܶܒܰܘ̈ܳܬܰܢ ܘܰܒܙܰܠ̈ܝ̣ܩܶܐ ܕܕܶܢܚܳܟ ܢ̇ܶܬܚܰܪܰܪ ܡ̣ܶܢ ܚܶܫܘ̣ܟܘ̣ܬܳܐ ܕܰܚܛܝ̣ܬܳܐ: ܘܢ̣ܶܗܘܶܐ ܠܰܢ ܫܘ̣ܪܳܝܶܗ ܕܨܰܦܪܳܟ ܥܶܠܬܳܐ ܕܟܽܠܗܶܝܢ ܛܳܒ̈ܳܬܳܐ: ܘܬܰܪ̈ܥܝܳܬܰܢ ܒܚܘ̣ܒܳܟ ܢ̣ܶܬܰܐܣܳܪ̈ܳܢ: ܡܰܚܫ̈ܒܳܬܰܢ ܒܪܶܚܡܬܳܟ ܢ̣ܟܰܬܪ̈ܳܢ ܘܰܐܝܟܰܢܳܐ ܕܰܐܫܘܝ̣ܬ ܠܰܢ ܒܰܚܢܳܢܳܟ: ܕܡ̣ܶܢ ܚܶܫܟܶܗ ܕܠܶܠܝܳܐ ܢ̇ܶܬܦܰܠܰܛ: ܘܰܠܥܶܕܳܢܳܐ ܗܳܢܳܐ ܕܨܰܦܪܳܐ ܢ̇ܡܰܢܰܥ ܩܕܳܡ ܟܘ̣ܪܣܝܳܐ ܕܺܐܝܩܳܪܳܟ ܥܶܛܪܳܐ ܒܰܣܝ̣ܡܳܐ ܢ̇ܩܰܪܶܒ: ܐܰܫܘܳܐ ܠܰܢ ܕܰܠܟܽܠܗܽܘܢ ܡܣܰܓܦܳܢ̈ܝܳܬܳܐ ܕܦܳܓ̈ܥܳܢ ܒܰܢ ܒܰܕܡܘ̣ܬ ܬܶܢܳܢܳܐ ܢ̇ܦܰܠܗܶܕ ܐܶܢܶܝܢ ܒܝܰܕ ܡܶܠܬܳܟ ܚܰܝܬܳܐ ܘܡܰܨܝܰܬ݀ ܟܽܠ: ܘܰܠܟܽܠܗܽܘܢ ܚܘܽܟܳܡ̈ܰܘܗ̱ܝ ܢܟܝ̣̈ܠܶܐ ܕܰܒܥܶܠܕܒܳܒܳܐ ܗܰܘ̇ ܕܨܳܒܶܐ ܕܢ̣ܶܬܕܰܡܶܐ ܒܡܰܠܰܐܟ̈ܶܐ ܕܢܘܽܗܪܳܐ ܒܚܶܟܡܬܳܐ ܕܡܶܢܳܟ ܢ̇ܶܙܟܶܐ ܘܰܠܦܰܚ̈ܰܘܗ̱ܝ ܘܰܡܨܝ̣̈ܕܳܬܶܗ ܢ̇ܬܰܒܰܪ ܒܚܰܝܠܳܟ ܙܳܟܶܐ ܟܽܠ: ܠܰܢ ܕܶܝܢ ܡܳܪܝܳܐ ܢܰܛܰܪ ܕܠܳܐ ܬܘ̣ܒ ܢ̇ܶܗܦܘ̣ܟ ܠܘܳܬ ܥܒ̈ܳܕܶܐ ܚܶܫܘ̣̈ܟܳܝܶܐ ܘܠܺܠܝ݂̈ܳܝܶܐ: ܐܳܦܠܳܐ ܕܢ̇ܶܨܛܠܶܐ ܚܰܘܪܰܢ ܡ̣ܶܢ ܢܘܽܗܪܳܐ ܦܰܐܝܳܐ ܘܰܕܢܝ̣ܚܳܐ: ܐܶܠܳܐ ܕܰܐܝܟ ܣܳܝܘ̣ܡܘ̣ܬ ܢܳܡܘ̣̈ܣܰܝܟ ܢ̣ܶܗܘܽܘܢ ܕܘ̣ܒܳܪ̈ܰܝܢ ܘܰܐܝܟ ܫܒܝ̣ܚܘ̣ܬ ܦܘ̣̈ܩܕܳܢܰܝܟ ܬ̣ܶܫܬܰܡܠܶܐ ܡܰܪܕܝ̣ܬܰܢ ܘܰܢ̇ܡܰܢܰܥ ܒܛܰܝܒܘ̣ܬܳܟ ܠܗܰܘ̇ ܨܰܦܪܳܟ ܦܨܝ̣ܚܳܐ ܕܒܶܗ ܚܳܕܝܶܢ ܟܺܐܢ̈ܶܐ ܘܙܰܕܝ̣̈ܩܶܐ: ܘܒܶܗ ܕܳܝ̇ܨܝ̣ܢ ܒܢ̈ܰܝ ܢܘܽܗܪܳܐ: ܘܒܰܐܬܪ̈ܰܘܳܬܳܐ ܕܚܰܝ̈ܶܐ ܥܰܡ ܟܽܠܗܽܘܢ ܩܰܕܝ̣̈ܫܰܝܟ ܩ̈ܳܠܶܐ ܕܕܰܟܝܘ̣ܬܳܐ ܢ̇ܙܰܡܰܪ ܠܛܰܝܒܘ̣ܬܳܟ: ܢܘܽܗܪܳܐ ܫܰܪܝ̣ܪܳܐ ܘܠܳܐ ܡܶܬܦܰܚܡܳܢܳܐ ܘܠܰܡܬܘ̣ܡܳܝܘ̣ܬܳܐ ܕܰܐܒܘ̣ܟ ܓܢܝ̣ܙܳܐ ܘܠܳܐ ܡܶܬܥܰܩܒܳܢܳܐ: ܘܰܠܫܒܝ̣ܚܘ̣ܬܶܗ ܕܪܘ̣ܚܳܟ ܩܰܕܝ̣ܫܳܐ ܡܰܢܗܪܳܢܳܐ ܘܠܳܐ ܙܰܒܢܳܝܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝܺܢ܀

ܥܶܛܪܳܐ

ܦܬܰܚ ܡܳܪܝ̱ ܬܰܪ̈ܥܶܐ ܪ̈ܳܡܶܐ ܕܰܫ̈ܡܰܝܟ ܥܶܠ̈ܳܝܶܐ: ܘܡܰܕܒ̈ܚܶܐ ܫܒܝ̣̈ܚܶܐ ܕܪ̈ܰܚܡܰܝܟ ܡܬܘ̣̈ܡܳܝܶܐ: ܘܢ̣ܶܣܰܩ ܥܶܛܪܳܐ ܒܰܣܝ̣ܡܳܐ ܡ̣ܶܢ ܟܶܢܫܰܢ ܠܣܶܕܪ̈ܰܝܗܽܘܢ ܕܢܘ̣ܪ̈ܳܢܶܐ ܒܥܶܕܳܢܳܐ ܗܳܢܳܐ ܕܒܶܗ ܦܨܝ̣ܚܝ̣ܢ ܫܡܰܝܳܢ̈ܶܐ ܘܰܐܪ̈ܥܳܢܳܝܶܐ: ܘܟܽܠܗܽܘܢ ܡܥܰܕܥ̈ܕܳܢܶܐ ܕܥܺܐܕ̈ܶܐ ܦܳܪ̈ܘ̣ܩܳܝܶܐ: ܘܢܶܬܩܰܒܰܠ ܦܝ̣ܪܡܳܐ ܗܳܢܳܐ ܕܶܐܬ̣ܩܰܪܰܒ ܠܳܟ ܡܶܢܰܢ ܡܚܝ̣̈ܠܶܐ ܘܚܰܛܳܝ̈ܶܐ ܘܫܰܟܶܢ ܒܶܗ ܦܘ̣ܢܳܝܳܐ ܡܫܰܡܠܝܳܐ ܠܫܶܐܠ̈ܳܬܳܐ ܫܰܦܝ̣ܪ̈ܳܬܳܐ ܕܟܽܠܗܽܘܢ ܡܗܰܝ̈ܡܢܶܐ ܫܰܪܝ̣ܪ̈ܶܐ: ܘܚܰܣܳܐ ܒܶܗ ܠܟܽܠܗܽܘܢ ܚܰܛܳܝ̈ܶܐ ܘܚܰܝܳܒ̈ܶܐ: ܘܰܐܢܝ̣ܚ ܒܶܗ ܪ̈ܘ̣ܚܳܬܳܐ ܕܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀