ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܽܘܒܳܐ ܫܰܪܝ̣ܪܳܐ ܘܰܡܫܰܡܠܝܳܢܳܐ ܕܰܠܘܳܬܳܟ ܘܰܠܘܳܬ ܚܕܳܕ̈ܶܐ ܣܰܬܶܬ ܒܢܰܦ̈ܫܳܬܰܢ: ܒܟܽܠ ܙܒܰܢ ܡܳܪܝܳܐ ܐܰܠܳܗܳܐ: ܚܠܳܦ ܫܶܡܫܳܐ ܗܳܢܳܐ ܡܶܬܪܰܓܫܳܢܳܐ: ܕܗܳܫܳܐ ܐܰܝܟ ܦܘ̣ܩܳܕܢܳܐ ܕܝ̣ܠܳܟ ܘܨܶܒܝܳܢܳܟ ܡ̣ܶܢ ܠܘܳܬܰܢ ܫܰܢܝ̣: ܚܘ̣ܒܳܟ ܢ̣ܰܙܠܶܓ ܒܓܰܘ ܪ̈ܶܥܝܳܢܰܝܢ: ܘܒܳܟ ܢ̇ܶܬܢܰܗܰܪ ܘܢ̇ܶܙܟܶܐ ܠܟܽܠ ܚܶܫܘ̣ܟܳܐ ܕܰܚܛܝ̣ܬܳܐ: ܘܰܠܟܽܠ ܦܘ̣ܪܣܳܐ ܡܪܰܡܝܳܢܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܥܰܬܝ̣ܪܳܐ ܘܛܳܒܳܐ ܘܰܫܦܝ̣ܥܳܐ ܘܝܳܗܘ̣ܒܳܐ: ܗܰܘ̇ ܢܝ̣ܚܳܐ ܘܒܰܣܝ̣ܡܳܐ ܗܰܘ̇ ܙܳܝܘ̣ܢܳܐ ܘܰܡܦܰܪܢܣܳܢܳܐ: ܗܰܘ̇ ܚܰܝܘ̣ܣܬܳܢܳܐ ܘܫܳܒܘ̣ܩܳܐ ܡܪܰܚܡܳܢܳܐ ܘܰܡ̇ܠܶܐ̣ ܚܘ̣ܒܳܐ: ܛܳܒܳܐ ܘܡܰܛܶܐܒܳܢܳܐ ܢܰܓܝ̣ܪ ܪܘ̣ܚܳܐ ܘܰܡܫܰܝܢܳܐ ܪܳܚܶܡ ܠܓܶܢܣܰܢ ܘܰܡܚܰܒܶܒ ܠܰܟܝܳܢܰܢ: ܐܳܣܝܰܢ ܘܡܰܠܦܳܢܰܢ: ܐܰܒܽܘܢ ܒܛܰܝܒܘ̣ܬܳܐ ܘܰܡܒܰܝܳܐܢܰܢ ܒܛܰܝܒܘ̣ܬܶܗ: ܠܰܚܢܳܢܳܟ ܗܳܫܳܐ ܡܦܝ̣ܣܝ̣ܢܰܢ ܘܰܠܪ̈ܰܚܡܰܝܟ ܡܶܬܟܰܫܦܝ̣ܢܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ܀

ܣܶܕܪܳܐ

ܒܬܰܪܥܳܐ ܕܪ̈ܰܚܡܰܝܟ ܢܳܩ̇ܫܝ̣ܢܰܢ ܐܳܘ ܡܳܪܳܐ ܛܳܒܳܐ ܘܰܐܠܳܗܳܐ ܡܪܰܚܡܳܢܳܐ ܐܰܝܟ ܕܰܦ̇ܐܶܐ̣ ܠܛܰܝܒܘܽܬܳܟ ܬ̣ܶܥܒܶܕ ܘܰܬ̣ܫܰܡܠܶܐ ܠܘܳܬܰܢ ܡܶܣ̈ܟܺܢܶܐ ܘܚܰܛ̈ܳܝܶܐ ܥܰܒ̈ܕܰܝܟ: ܘܰܬ̣ܦܰܪܢܶܣ ܠܰܢ ܡ̣ܶܢ ܒܶܝܬ ܓܰܙܳܟ ܒܪܝ̣ܟܳܐ ܘܡ̣ܶܢ ܝܰܡܝ̣ܢܳܐ ܠܳܐ ܡܶܬܬܟܝ̣ܠܳܢܝ̣ܬܳܐ ܕܰܡܪܰܚܡܳܢܘ̣ܬܳܟ ܡܶܬܬܫܝ̣ܓܳܢܘ̣ܬܳܐ ܕܟܽܠܗܶܝܢ ܐܰܝܠܶܝܢ ܕܠܳܐ ܢܳܡܘ̣ܣܳܐܝ̣ܬ ܡܶܢܰܢ ܐܶܣ̣ܬܥܰܪ̈ܝ̱: ܘܰܒܪ̈ܰܚܡܰܝܟ ܣܰܓܺܝ̈ܶܐܐ ܬ̣ܶܫܬܟܰܚܝ̱ ܐܰܒܝ̣ܕܘ̣ܬܰܢ ܘܬܶܬ̣ܚܰܠܶܐ ܡܰܪܝ̣ܪܘ̣ܬܰܢ ܒܳܟ ܬ̣ܶܥܬܰܪܝ̱ ܡܶܣܟܺܢܘ̣ܬܰܢ: ܬ̣ܶܫܦܰܪܝ̱ ܐܳܦ ܣܰܢܝܘ̣ܬܰܢ ܘܬ̣ܶܬܚܰܟܰܡܝ̱ ܗܶܕܝܘ̣ܛܘ̣ܬܰܢ: ܚܰܠܶܦ ܒܛܳܒܬܳܐ ܠܒܝ̣ܫܘ̣ܬܰܢ: ܟܰܢܶܫ ܡܳܪܝ ܦܰܗܝܘ̣ܬܰܢ: ܘܰܐܩܢܳܐ ܐܰܘܝܘ̣ܬܳܐ ܠܰܦܠܝ̣ܓܘ̣ܬܰܢ ܥܒܶܕ ܫܠܳܡܳܐ ܠܰܪܓܝ̣ܙܘ̣ܬܰܢ ܘܩܰܪܝ̣ܒܘ̣ܬܳܐ ܠܪܰܚܝ̣ܩܘ̣ܬܰܢ: ܘܬܰܪܥܘ̣ܬܳܐ ܠܰܒܥܶܠܕܒܳܒܘ̣ܬܰܢ ܘܚܰܝܘ̣ܬܳܐ ܠܡܝ̣ܬܘ̣ܬܰܢ: ܒܰܝܬܳܗ̇ ܠܢܘ̣ܟܪܳܝܘ̣ܬܰܢ ܘܫܰܦܳܗ̇ ܠܰܕܠܝ̣ܚܘ̣ܬܰܢ: ܨܰܠܶܠ ܠܬܶܐܛܪܘ̣ܬܰܢ ܘܰܐܒܗܶܠ ܠܰܫܓܝ̣ܫܘ̣ܬܰܢ: ܩܰܒܶܠ ܬܝܳܒܘ̣ܬܰܢ ܘܶܐܬܪܰܥܳܐ ܒܨܰܘܡܳܐ ܫܡܰܥ ܨܠܰܘ̈ܳܬܰܢ: ܘܨܘ̣ܬ ܬܰܟܫ̈ܦܳܬܰܢ ܐܶܬ̣ܬܢܝ̣ܚ ܒܒܳܥ̈ܘܳܬܰܢ ܘܰܐܝܟ ܨܶܒܝܳܢܳܟ ܢ̣ܶܗܘܽܘܢ ܕܘ̣ܒܳܪ̈ܰܝܢ ܩܕܳܡܰܝܟ: ܘܰܒܝܰܕ ܫܦܝ̣ܥܘ̣ܬܳܐ ܕܪ̈ܰܚܡܰܝܟ ܡܳܪܝܳܐ ܥܒܶܕ ܠܰܢ ܒܟܰܪܡܳܟ ܦܳܥ̈ܠܶܐ ܟܰܫܝ̣ܪ̈ܶܐ: ܒܶܐܫܟܳܪܳܟ ܦܰܠܳܚ̈ܶܐ ܒܕܰܝܪܳܟ ܥܳܡܘ̣ܪ̈ܶܐ: ܒܰܙܩܝ̣ܦܳܟ ܚܕܘ̣̈ܓܶܐ ܒܚܰܫ̈ܰܝܟ ܫܰܘܬܳܦ̈ܶܐ: ܒܶܝܬ ܦܳܠ̈ܚܰܝܟ ܓܡܝ̣ܪ̈ܶܐ ܒܶܝܬ ܟܳܪ̈ܘ̣ܙܰܝܟ ܡܗܰܝ̈ܡܢܶܐ ܒܰܛܝܳܪܳܟ ܐܶܡܪ̈ܶܐ: ܒܰܓܙܳܪܳܟ ܥܶܪ̈ܒܶܐ ܒܩܶܢܳܟ ܦܰܪ̈ܘ̣ܓܶܐ ܠܘܳܬ ܦܰܓܪܳܟ ܢܶܫܪ̈ܶܐ: ܒܟܰܟܪܳܟ ܬܰܓܳܪ̈ܶܐ ܒܶܝܬ ܥܝ̣ܪ̈ܶܐ ܚܰܒܝ̣̈ܒܶܐ ܒܶܝܬ ܪ̈ܘܽܚܳܢܶܐ ܟܢܰܘ̈ܳܬܳܐ ܥܰܡ ܟܪ̈ܘܽܒܶܐ ܡܒܰܪ̈ܟܳܢܶܐ: ܘܥܰܡ ܣܪ̈ܳܦܶܐ ܡܩܰܕ̈ܫܳܢܶܐ ܘܥܰܡܳܟ ܘܰܠܥܳܠܰܡ ܝܳܪ̈ܘ̣ܬܶܐ: ܘܩܰܘܡܰܢ ܕܗܳܫܳܐ ܢ̣ܶܗܘܶܐ ܠܬܶܫܒܘ̣ܚܬܳܐ ܕܰܫܡܳܟ ܩܰܕܝ̣ܫܳܐ ܘܰܙܡܝ̣ܪ̈ܳܬܰܢ ܠܪܘ̣ܡܪܳܡܳܐ ܕܪܰܒܘ̣ܬܳܟ ܘܗܘ̣ܠܳܠܰܝ̈ܢ ܠܩܘ̣̈ܠܳܣܶܐ ܕܡܳܪܘ̣ܬܳܟ: ܘܰܨܠܰܘ̈ܳܬܰܢ ܘܬܰܟܫ̈ܦܳܬܰܢ ܠܬܰܪܥܘ̣ܬܳܐ ܕܰܡܪܰܚܡܳܢܘ̣ܬܳܟ: ܦܝ̣ܪܡܰܢ ܢ̣ܶܫܦܰܪ ܠܺܐܝܩܳܪܳܟ ܘܕܘ̣ܒܳܪ̈ܰܝܢ ܠܨܶܒܝܳܢܳܟ: ܘܢ̣ܶܬܠܽܘܢ ܠܳܟ ܦܘ̣ܡܰܝ̈ܢ ܬܰܘܕ̈ܝܳܬܳܐ: ܠܶܫܳܢ̈ܰܝܢ ܪ̈ܘ̣ܡܪܳܡܶܐ: ܘܪ̈ܶܥܝܳܢܰܝܢ ܩܘ̣̈ܠܳܣܶܐ ܘܡ̣ܶܢ ܩܕܳܡ ܦܰܪܨܽܘܦܳܐ ܕܪ̈ܰܚܡܰܝܟ ܚܘܽܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܢ̣ܶܫܬܰܕܪܽܘܢ ܠܰܢ: ܚܢܰܢ ܕܶܝܢ ܐܝ̣ܬܰܝܢ ܐܶܡܪ̈ܶܐ ܕܥܳܢ̈ܳܟ ܘܥܶܪ̈ܒܶܐ ܕܡܰܪܥܝ̣ܬܳܟ ܡܶܛܽܠ ܕܛܳܒܳܐ ܘܰܫܦܝ̣ܥ ܒܡܰܘ̈ܗܒܳܬܳܟ ܘܥܰܬܝ̣ܪ ܒܫܘ̣̈ܘܟܳܢܶܐ ܐܝ̣ܬܰܝܟ ܡܳܪܝܳܐ: ܘܠܳܟ ܫܘ̣ܒܚܳܐ ܘܬܰܘܕܝ̣ܬܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܒܟܽܠܙܒܰܢ ܠܥܳܠܡܝܺܢ܀

ܥܶܛܪܳܐ

ܗܰܒܠܰܢ ܡܳܪܝܳܐ ܐܰܠܳܗܳܐ ܕܝ̣ܠܰܢ ܕܰܒܨܰܘܡܰܢ ܢܶܫ̇ܦܰܪ ܠܳܟ: ܘܒܰܨ̈ܠܰܘܳܬܰܢ ܢ̇ܪܰܥܶܐ ܠܟܺܐܢܘ̣ܬܳܟ: ܘܰܒܪܶܗܛܰܢ ܕܰܠܘܳܬܳܟ ܬ̣ܰܕܪܶܟܝ̱ ܠܰܢ ܒܰܥܓܰܠ ܛܰܝܒܘ̣ܬܳܟ: ܘܰܬ̣ܒܰܛܶܠ ܡܶܢܰܢ ܠܰܓܙܳܪ ܕܝ̣ܢܳܟ: ܘܬܰܫ̣ܦܰܥܝ̱ ܥܠܰܝܢ ܪ̈ܰܚܡܶܐ ܕܒܰܣܝ̣ܡܘ̣ܬܳܟ: ܘܬ̣ܰܫܘܶܐ ܠܰܢ ܘܰܠܥܰܢܝ̣̈ܕܰܝܢ ܠܡܶܬܒܰܣܳܡܘ̣ ܒܡܰܠܟܘ̣ܬܳܟ ܥܰܡ ܟܽܠܗܽܘܢ ܓܒ̈ܰܝܳܐ ܕܝ̣ܠܳܟ: ܘܟܽܠܰܢ ܒܚܰܕ ܚܰܓܳܐ ܪܘ̣ܚܳܢܳܝܳܐ ܢ̇ܫܰܒܚܳܟ ܘܰܢ̇ܩܰܠܣܳܟ ܘܰܢ̇ܪܰܡܪܡܳܟ ܠܥܳܠܡܝ̣ܢ܀