ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܝ̣ܺܚܺܝ̣ܕܳܝܶܗ ܕܰܐܒܳܐ ܓܢܺܝ̣ܙܳܐ: ܘܨܶܡܚܳܐ ܫ̇ܘܶܐ̣ ܒܰܡܬܘ̣ܡܳܝܘ̣ܬܳܐ ܠܝܳܠܘ̣ܕܶܗ: ܗܰܘ̇ ܕܒܰܡܪ̈ܰܘܡܶܐ ܥܶܠ̈ܳܝܶܐ ܘܰܓܢܝ̣̈ܙܶܐ ܕܰܠܥܶܠ ܒܰܡܥܰܠܝܘ̣ܬܳܐ ܡܪܰܝܰܡܬܳܐ ܘܦܰܐܝܰܬ݀ ܠܰܐܠܳܗܳܐ ܥܰܡ ܐܰܒܳܐ ܘܪܘ̣ܚܳܐ ܩܰܕܝ̣ܫܳܐ ܡܶܬܪܰܡܪܰܡ ܐܰܢ̱ܬ ܘܡܶܙܕܰܝܰܚ ܐܰܢ̱ܬ ܒܒܘ̣ܪ̈ܟܳܬܳܐ ܕܡܰܠܰܐܟ̈ܶܐ: ܘܰܨܒ̣ܰܝܬ ܘܰܢܚ̣ܶܬܬ ܠܰܐܪܥܳܐ ܡܶܛܽܠ ܦܘ̣ܪܩܳܢܰܢ: ܘܰܫܦ̣ܰܪ ܠܳܟ ܫܘ̣ܒܚܳܐ ܕܰܛܠܳܝ̈ܶܐ ܘܫܰܒܪ̈ܶܐ ܕܰܒܣܰܘ̈ܟܶܐ ܕܙܰܝ̈ܬܶܐ ܡܩܰܠܣܝ̣ܢ ܗ̱ܘܰܘ ܠܳܟ: ܐܰܫܘܳܐ ܠܰܢ ܡܳܪܝ̱ ܕܒܐܘ̣̈ܫܰܥܢܶܐ ܡܶܬܝܰܕ̈ܥܳܢܶܐ: ܘܰܒܣܰܘ̈ܟܶܐ ܡܶܫܬܰܒ̈ܚܳܢܶܐ ܢ̇ܶܦܘ̣ܩ ܠܐܘ̣ܪܥܳܟ ܒܡܶܐܬܝ̣ܬܳܟ ܕܬܰܪܬܶܝܢ ܢ̇ܰܣܶܩ ܠܳܟ ܫܽܘ̣ܒܚܳܐ ܠܳܐ ܡܶܫܬܰܬܩܳܢܳܐ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܡܳܪܝܳܐ ܡܪܰܝܡܳܐ ܕܡ̣ܶܢ ܬܶܫܒܘ̣ܚܬܶܗ ܫܡܰܝܳܐ ܡܰܠܝܳܐ ܘܡ̣ܶܢ ܛܰܝܒܘ̣ܬܶܗ ܟܽܠܳܗ̇ ܐܰܪܥܳܐ ܡܶܬܒܰܣܡܳܐ: ܠܗܰܘ̇ ܕܚܝ̣ܠܳܐ ܕܡܰܪܟܰܒܬܳܐ ܕܰܟܪ̈ܘ̣ܒܶܐ ܟܕܝ̣ܢܳܐ ܠܺܐܝܩܳܪܶܗ ܒܕܶܚܠܳܐ: ܘܚܰܝܘ̣ܬܳܐ ܫܝ̣ܛܬܳܐ ܣܶܦ̣ܩܰܬ݀ ܠܶܗ ܘܰܛܥܶܢ̣ܬܶܗ ܥܰܠ ܕܰܨܒ̣ܳܐ ܒܰܚܢܳܢܶܗ ܫܦܝ̣ܥܳܐ: ܠܗܰܘ̇ ܓܢܝ̣ܙܳܐ ܕܟܰܪܟܘ̣ܗ̱ܝ ܛܠܳܝ̈ܶܐ ܒܫܘ̣̈ܩܰܝ ܨܶܗܝܽܘܢ ܒܓܶܠܝܳܐ ܟܰܕ ܠܶܓ̈ܝܽܘܢܐ ܕܢܘ̣ܪܳܐ ܠܳܐ ܡܨܶܝܢ ܚܳܝܪܝ̣ܢ ܠܘܰܥܕܳܐ ܕܺܐܝܬܘ̣ܬܶܗ ܠܗܰܘ̇ ܕܥܰܙܝ̣ܙ ܘܰܕܚܝ̣ܠ ܥܰܠ ܬܶܓ̈ܡܶܐ ܕܰܣܪ̈ܳܦܶܐ ܒܰܡܪ̈ܰܘܡܶܐ: ܘܡܰܟܝ̣ܟ ܘܰܚܠܝ̣ܛ ܒܰܝܢܳܬ ܟܶܢ̈ܫܶܐ ܕܬܰܚ̈ܬܳܝܶܐ ܒܥܘ̣ܡܩܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܕܺܐܝܬܰܝܟ ܚܰܝ̈ܶܐ ܡܬܘ̣̈ܡܳܝܶܐ ܘܣܰܬܝ̣̈ܬܶܐ ܘܰܕܠܳܐ ܬܚܘ̣ܡ: ܗܰܘ̇ ܕܰܠܥܶܠ ܘܕܰܠܬܰܚܬ ܘܰܠܓܰܘ ܘܰܠܒܰܪ ܠܳܐ ܡܣܰܝܟܝ̣ܢ ܠܺܐܝܬܘ̣ܬܳܟ ܡܪܰܝܡܬܳܐ: ܘܰܫ̇ܘܶܐ̣ ܐܰܢ̱ܬ ܥܰܡ ܐܰܒܳܐ ܘܪܘ̣ܚܳܐ ܩܰܕܝ̣ܫܳܐ: ܒܛܰܝܒܘ̣ܬܳܐ ܡܬܘ̣ܡܳܝܬܳܐ ܘܰܡܫܰܡܠܝܽܘ̣ܬܳܐ ܘܒܰܐܠܳܗܘ̣ܬܳܐ ܘܡܶܛܽܠ ܦܘ̣ܪܩܳܢܳܐ ܕܓܶܢܣܳܐ ܐ̱ܢܳܫܳܝܳܐ ܐܶܫܬܰܘܬܰܦ̣ܬ ܠܒܶܣܪܳܐ ܘܰܕܡܳܐ: ܘܩܰܒܶܠ̣ܬ ܥܠܰܝܟ ܟܽܠܗܶܝܢ ܗܳܠܶܝܢ ܕܝ̣ܠܰܢ ܣܛܰܪ ܡ̣ܶܢ ܚܛܝ̣ܬܳܐ: ܘܰܣܥ̣ܰܪܬ ܚܰܝ̈ܠܶܐ ܘܬܶܕܡܪ̈ܳܬܳܐ ܫܒܝ̣̈ܚܳܬܳܐ: ܒܣܰܘ̈ܦܶܐ ܕܶܝܢ ܐ̱ܚܪ̈ܳܝܶܐ ܕܰܡܕܰܒܪܳܢܘ̣ܬܳܟ ܦܳܪܘ̣ܩܳܝܬܳܐ ܠܘܳܬ ܨܶܗܝܽܘܢ ܡܕܝ̣ܢ̱ܬܳܐ ܕܨܳܠ̈ܘ̣ܒܶܐ ܘܺܐܝܪܝ̣ܚܘ̣ ܐܰܬܪܳܐ ܬܰܚܬܳܝܳܐ ܘܣܝ̣ܡ ܒܥܘ̣ܡܩܳܐ ܐܶܬ̣ܰܝܬ: ܕܠܰܢ ܬ̣ܶܓܶܕ ܠܐܘ̣ܪܫܠܶܡ ܫܡܰܝܳܢܝ̣ܬܳܐ ܗܳܝ ܕܺܐܝܬܶܝܗ̇ ܡܕܝ̣ܢ̱ܬܳܐ ܕܩܰܕܝ̣̈ܫܶܐ ܘܒܶܝܬ ܨܰܘܒܳܐ ܕܰܓܡܝ̣ܪ̈ܶܐ: ܘܐܰܝܟ ܓܳܡܘ̣ܪܳܐ ܘܰܡܚܰܬܡܳܢܳܐ ܕܐ̱ܪ̈ܳܙܶܐ ܢܒܺܝܳܝ̈ܶܐ ܘܰܫܠܝ̣̈ܚܳܝܶܐ ܠܫܶܡܥܽܘܢ ܪܝ̣ܫܳܐ ܕܰܚܕܰܬܳܐ ܘܰܠܬܰܠܡܝ̣ܕܳܐ ܡܡܰܠܶܠ ܐܰ‌ܠܳܗܳܝ̈ܳܬܳܐ ܠܘܳܬ ܬܰܪܥܝ̣ܬܳܐ ܒܘ̣ܪܳܝܬܳܐ ܡܬܝ̣ܠܰܬ݀ ܒܰܩܪܳܝܬܳܐ ܕܥܰܡ̱̈ܡܶܐ ܕܒܰܥܪܝ̣ܪܳܐܝ̣ܬ ܚ̣ܝܰܘ ܫ̣ܰܕܰܪܬ: ܕܰܠܥܝ̣ܠܳܐ ܠܳܐ ܡܟܰܒܫܳܐ ܒܦܘ̣ܩܕܳܢܳܟ ܡ̣ܶܢ ܣܘ̣̈ܛܡܶܐ ܘܟܶܒ̈ܠܶܐ ܕܰܚܛܝ̣ܬܳܐ ܢ̣ܶܫܪܽܘܢ: ܘܰܒܟܳܪܘ̣ܙܘ̣ܬܗܽܘܢ ܪܟܘ̣ܒܳܐ ܨܶܒܝܳܢܳܝܳܐ ܢ̣ܛܰܝܒܽܘܢ ܘܰܢ̣ܥܰܬܕܽܘܢ: ܟܰܕ ܠܢܰܚ̈ܬܶܐ ܪ̈ܓܝ̣ܓܶܐ ܕܗܰܝܡܳܢܘܽܬܳܐ ܕܒܳܟ ܥܠܰܝܗܽܘܢ ܦܪܰܣ̣ܘ̱ ܐܶܬܚ̣ܰܪܰܪܘ̱ ܡ̣ܶܢ ܦܬܰܟܪܘ̣ܬܳܐ ܕܶܐܡܗܽܘܢ: ܘܢܰܩܦܘ̣ܟ ܐܰܝܟ ܕܙܳܕܶܩ ܘܠܳܬܶܟ ܘܶܐܫܟܰܚ̣ܬܳܝܗ̱ܝ ܘܝ̣ܬܶܒܬ ܥܠܰܘܗ̱ܝ ܘܒܶܗ ܐܶܬ̣ܢܰܨܰܚܬ ܝܰܬܝ̣ܪ ܡ̣ܶܢ ܕܰܗ̣ܘܰܘ ܠܘܳܬܗܽܘܢ ܥܘ̣ܬܪ̈ܶܐ ܕܩܰܕ̈ܡܳܝܶܐ: ܘܗܰܠܶܟ̣ܬ ܥܰܠ ܠܶܒܰܘ̈ܳܬܗܽܘܢ ܘܬܰܪ̈ܥܝܳܬܗܽܘܢ ܕܰܫ̣ܕܰܘ ܩܕܳܡܰܝܟ ܒܐܘ̣ܪܚܳܐ ܕܥܳܠܡܳܐ ܗܳܢܳܐ ܐܰܝܟ ܕܥܰܠ ܕܺܝܰܐܛܶܟܣܝ̣ܣ ܡܰܠܰܐܟܳܝ̈ܳܬܳܐ ܘܰܒܪܶܥܝܳܢܳܐ ܫܰܦܝܳܐ ܘܠܳܐ ܫܒܰܪ ܒܛܳܥܝܘ̣ܬܳܐ: ܒܕܶܩ̈ܠܶܐ ܪ̈ܳܡܶܐ ܕܬܶܐܘܳܠܳܘܓܺܝܰܐ ܘܰܒܣܰܘ̈ܟܶܐ ܕܙܰܝ̈ܬܶܐ ܫܘ̣ܘܕܳܥܳܐ ܐ̱ܚܪܳܝܳܐ ܕܪܶܚܡܰܬ݀ ܐ̱ܢܳܫܘ̣ܬܳܟ ܦܰܐܝܳܐܝ̣ܬ ܠܳܟ ܡܙܰܝܚܝ̣ܢ ܗ̱ܘܰܘ ܩܕܳܡ ܡܰܠ̈ܟܶܐ ܘܫܰܠܝ̣̈ܛܳܢܶܐ ܕܰܐܪܥܳܐ ܟܰܕ ܐܳܡܪܝ̣ܢ: ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ ܕܰܗ̣ܘܰܝܬ ܡ̣ܶܢ ܟܝܳܢܶܗ ܠܶܗ ܒܪܳܐ ܒܛܰܝܒܘ̣ܬܳܐ ܟܰܕ ܠܳܐ ܡܶܣܬܕܶܩ ܐܰܢ̱ܬ ܠܰܬܪܝܳܢܘ̣ܬܳܐ ܕܰܟܝ̈ܳܢܶܐ ܒܰܥܦܝ̣ܦܘ̣ܬ ܒܢ̈ܳܬ ܩ̈ܳܠܶܐ ܗܳܠܶܝܢ: ܐܶܠܳܐ ܚܰܕ ܡܶܬܝ̣ܕܰܥ ܐܰܢ̱ܬ ܘܗܘ̣ ܟܰܕ ܗܘ̣ ܐܶܬܡܳܠܝ̱ ܘܝܰܘܡܳܢܳܐ ܘܰܠܥܳܠܡܝ̣ܢ ܡ̣ܶܢ ܐܰܠܳܗܘ̣ܬܳܐ ܘܡ̣ܶܢ ܐ̱ܢܳܫܘ̣ܬܳܐ ܕܠܳܐ ܬܠܝ̣ܚ ܠܰܬܪܶܝܢ ܦܶܠ̈ܓܶܐ ܘܟܰܕ ܥܰܠ̣ܬ ܠܗܰܝܟܠܳܐ ܕܰܐܒܘ̣ܟ ܕܶܐܣܬܰܪܰܚ ܕܰܐܟܝ̣ܬܳܝܗ̱ܝ ܡ̣ܶܢ ܢܘ̣ܟܪܝ̣ܛܘ̣ܬܳܐ ܕܩܰܕ̈ܡܳܝܶܐ ܒܰܛܢܳܢܳܐ ܕܰܐܚ̣ܕܳܟ ܡܶܛܽܠ ܒܰܝܬܳܟ ܗܰܘ̇ ܕܰܗ̣ܘܳܐ ܒܶܝܬ ܡܰܥܡܪܳܐ ܠܪ̈ܰܚܫܳܐ ܒܝ̣̈ܫܶܐ ܘܰܣܪ̈ܝ̣ܚܶܐ ܡܠܰܣ̈ܛܝ݂ܰܝ݂ ܢܰܦ̈ܫܳܬܳܐ ܚܺܐܪ̈ܳܬܳܐ ܕܰܒܢܰܝ̈ܢܳܫܳܐ: ܘܠܶܗ ܝ̣ܪܶܬܬ ܘܠܳܐ ܫܒܰܩ̣ܬ ܕܐ̱ܢܳܫ ܕܢܰܥܒܰܪ ܒܓܰܘܶܗ ܡܳܐܢ̈ܶܐ ܨ̈ܳܐܶܐ ܐܰܘܟܝ̣ܬ ܕܘ̣ܒܳܪ̈ܶܐ ܢܕܝ̣̈ܕܶܐ ܒܝܰܕ ܕܰܐܢ̱ܬ ܗ̱ܘ̣ ܡܳܪܳܐ ܕܥܰܬܝ̣ܩܬܳܐ ܘܕܰܚܕܰܬܳܐ: ܗܰܘ̇ ܕܰܡܕܰܟܶܐ ܠܒܰܪܢܳܫܳܐ ܓܰܘܳܝܳܐ ܡ̣ܶܢ ܚܘ̣ܫ̈ܳܒܶܐ ܡܥܰܪ̈ܦܳܢܶܐ ܕܥܰܘܠܳܐ: ܠܥܶܪ̈ܒܶܐ ܘܰܠܬܰܘܪ̈ܶܐ ܘܰܠܝܰܘ̈ܢܶܐ ܡܶܢܶܗ ܐܰܦܶܩ̣ܬ: ܐܰܟܡܰܢ ܕܐܰܢ̱ܬ ܐܝ̣ܬܰܝܟ ܒܰܫܪܳܪܳܐ ܗܰܘ̇ ܕܥܰܠ ܐܰܦ̈ܰܝ ܦܘ̣ܪܩܳܢܳܐ ܕܥܳܠܡܳܐ ܡܶܬܕܒܰܚ: ܕܒܶܗ ܡܶܫ̈ܬܰܬܩܳܢ ܟܽܠܗܶܝܢ ܢܶܟ̈ܣܳܬܳܐ ܠܳܐ ܨܶܒ̈ܝܳܢܳܝܳܬܳܐ ܘܰܙܓ̣ܰܪܬ ܠܗܳܢܽܘܢ ܕܒܳܟ ܨܒ̣ܰܘ ܕܰܢܫܰܬܩܽܘܢ ܠܰܢܒܺܝܽܘ̣ܬܳܐ ܟܰܕ ܐܶܡ̣ܰܪܘ̱: ܕܰܟܐܺܝ̣ ܒܬܰܠ̈ܡܝ̣ܕܰܝܟ ܢ̣ܶܫܠܽܘܢ ܡ̣ܶܢ ܬܶܫܒܘ̣ܚܬܳܐ ܘܚܰܘܝ̣ܬ ܕܶܐܢ ܗܶܢܽܘܢ ܢ̣ܶܫܬܩܽܘܢ ܟܺܐܦ̈ܶܐ ܠܳܐ ܡܰܪ̈ܓܫܳܢܝܳܬܳܐ ܢ̣ܶܩ̈ܥܳܝܢ ܘܗ̣ܶܢܶܝܢ ܢܡܰܠ̈ܝܳܢܳܝܗ̱ܝ ܠܫܘ̣ܒܚܳܐ ܗܳܝ ܕܳܐܦ ܥܠܶܝܗ̇ ܕܨܳܠܘ̣ܒܬܳܐ ܕܰܡܰܥ̣ܬ ܕܟܰܕ ܠܳܐ ܨܒ̣ܳܬ݀ ܕܬ̣ܶܕܰܥܝ̱ ܙܰܒܢܳܐ ܕܦܘ̣ܪܩܳܢܳܗ̇: ܒܝܰܘܡܳܐ ܕܒܶܗ ܣܥ̣ܰܪܬܳܗ̇ ܕܰܚܢܰܢ ܡܳܪܝ̱ ܥܰܡ̱̈ܡܶܐ ܐܰܪ̈ܡܳܝܶܐ ܕܳܐܬܶܝܢ ܠܡܶܣܓܰܕ ܒܥܰܕܥܺܐܕܳܟ ܕܰܠܗܝ̣ܩܳܐܝ̣ܬ ܐܶܬ̣ܪܰܓܪܰܓܢܰܢ ܠܡܶܚܙܳܐ ܦܰܪܨܘ̣ܦܳܟ: ܒܫܳܥܬܳܐ ܗܳܝ ܕܟܶܢܫܳܐ ܚܰܣܳܡܳܐ ܕܝܘ̣̈ܕܳܝܶܐ ܐܰܚ̣ܨܶܦܘ̱ ܥܰܠ ܩܶܛܠܳܟ ܘܰܟܦ̣ܰܪܘ̱ ܒܳܟ ܐܳܦ ܕܚ̣ܶܠܘ̱ ܡ̣ܶܢ ܪܰܘܒܳܐ ܕܥܰܡ̱̈ܡܶܐ: ܡܦܝ̣ܣܝ̣ܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܬ̣ܶܕܪܘ̣ܟ ܘܰܬ̣ܗܰܠܶܟ ܒܢܰܦ̈ܫܳܬܰܢ ܙܰܗܝܳܐܝ̣ܬ: ܘܐܰܝܟ ܕܰܠܥܝ̣ܠܳܐ ܒܰܪ ܐܰܬܳܢܳܐ ܐܰܪܥ̣ܰܢ ܫܒܝ̣ܫܬܳܐ ܕܝ̣ܕܰܥܬܳܟ: ܐܰܣܘ̣ܪ ܒܰܓܦܶܬܳܐ ܕܡܶܢܰܢ ܠܳܟ ܐܶܬ̣ܚܰܝܕܰܬ݀ ܫܰܪܝ̣ܪܳܐܝ̣ܬ ܒܝܰܨܝ̣ܦܘ̣ܬܳܐ ܕܰܐܒܘ̣ܟ ܦܰܠܳܚܳܐ: ܕܠܳܐ ܡܶܣܬܰܕܩܳܐ ܠܰܬܪܶܝܢ ܓܰܒܝ̣̈ܢ ܦܰܓ̈ܶܐ ܦܳܠܫܰܬ ܐܘ̣ܪ̈ܚܳܬܳܐ ܘܰܦܣ̣ܰܩ̈ܝ̱ ܣܰܘ̈ܟܶܐ ܕܫܘ̣ܒܚܳܐ ܩܕܳܡܰܝܟ ܟܽܠܫܳܥ ܐܰܩܝ̣ܡ ܕܡܰܝܬܶܝܢ ܡܪܰܚܡܳܢܘ̣ܬܳܐ ܫܦܝ̣ܥܬܳܐ ܕܙܰܝ̈ܬܶܐ ܣܒܰܪܬܳܐ ܡܚܰܕܝܳܢܝ̣ܬܳܐ ܘܰܠܪܰܘܡܳܐ ܛܳܝܣܝ̣ܢ ܘܓܳܕܶܝܢ: ܘܦܶܪ̈ܥܶܐ ܙܪ̈ܝ̣ܩܶܐ ܐܰܝܟ ܕܶܩ̈ܠܶܐ ܕܫܳܘܚܝ̣ܢ ܡܚܰܘܶܝܢ: ܕܰܐܝܠܶܝܢ ܕܰܠܪܝ̣ܫܶܗ ܡܶܬܡܰܛܶܝܢ ܡ̣ܶܢ ܠܶܒܶܗ ܚܰܘܪܳܐ ܡܶܣܬܰܝܒܪܝ̣ܢ: ܫܘ̣ܘܕܳܥܳܐ ܕܡܶܬܢܰܗܪܳܢܘ̣ܬܳܐ ܓܡܝ̣ܪܬܳܐ ܕܫܳܟܢܳܐ ܠܥܶܠ ܡ̣ܶܢ ܕܘ̣̈ܒܳܨܶܐ ܟܘ̣̈ܒܳܢܳܝܶܐ ܕܰܚܛܝ̣ܬܳܐ: ܗܳܟܰܢܳܐ ܠܥܶܠ ܡ̣ܶܢ ܚܰܫ̈ܶܐ ܥܕܝ̣̈ܠܶܐ ܢ̇ܶܬܚܙܶܐ ܦܫܳܛܳܐ ܕܢܰܚ̈ܬܶܐ ܕܰܩܢܘ̣ܡܰܝܢ ܩܕܳܡܰܝܟ ܟܰܕ ܠܳܐ ܣܳܟ ܡܶܬܥܰܪܩܰܠ ܒܥܘ̣ܪ̈ܙܳܠܶܐ ܕܒܝ̣̈ܫܳܬܳܐ: ܐܶܡܰܬܝ̱ ܕܪܰܒܘ̣ܬ ܦܰܐܝܘ̣ܬܳܐ ܕܝ̣ܠܳܟ ܬܶܕܪܘ̣ܟܝ̱ ܘܬ̣ܶܫܟܰܢܝ̱ ܒܢܰܘ̈ܣܶܐ ܕܝ̣ܠܰܢ ܘܗܰܒܠܰܢ ܕܠܳܐ ܢ̇ܶܬܕܰܡܶܐ ܒܬܺܬܳܐ ܚܰܪܳܫܬܳܐ ܒܪܝ̣ܫܝ̣ܬ: ܘܗܳܫܳܐ ܒܰܓܠܝ̣ܙܘ̣ܬ ܦܺܐܪ̈ܶܐ ܒܥܰܢܝܳܐ ܒܶܝܬ ܒܰܘܬܳܐ ܕܰܢܝܳܚܳܐ ܕܛܰܪ̈ܦܶܐ ܒܰܠܚܘ̣ܕ ܩܳܢܶܝܢܰܢ ܗܰܝܡܳܢܘ̣ܬܳܐ ܕܠܳܐ ܥܒܳܕ̈ܶܐ ܒܙܰܒܢܳܐ ܗܰܘ̇ ܕܒܶܗ ܬܘ̣ܪܣܳܝܳܐ ܠܰܝܬ ܕܶܢ̇ܫܟܰܚ: ܘܶܐܠܳܐ ܟܰܕ ܠܕܰܒܪܳܐ ܒܚܰܓܳܐ ܗܳܢܳܐ ܢܳܦܩܝ̣ܢܰܢ ܐ̱ܪܳܙܳܐ ܕܰܡܒܰܕܶܩ ܠܡܶܐܬܝ̣ܬܳܟ ܕܰܒܚܰܪܬܳܐ ܡܳܐ ܕܰܠܟܽܠ ܒܣܰܪ ܠܳܐ ܡܶܬܚܰܒܠܳܢܳܐܝ̣ܬ ܩܕܳܡܰܝܟ ܡܩܝ̣ܡ ܐܰܢ̱ܬ: ܐܰܫܘܳܐ ܕܰܢ̇ܩܰܒܶܠ ܐܰܦ̈ܰܝܟ ܦܨܝ̣ܚܳܐܝ̣ܬ ܟܰܕ ܢܳܩܫܝ̣ܢܰܢ ܟܰܦܳܐ ܒܨܶܗܝܽܘܢ ܩܪܝ̣ܬܳܐ ܕܝ̣ܠܳܟ ܒܶܝܬ ܨܰܘܒܳܐ ܕܰܡܝܰܬܪܘ̣ܬܳܐ: ܘܰܒܩ̈ܳܠܶܐ ܪ̈ܳܡܶܐ ܕܐܘ̣ܫܰܥ̈ܢܶܐ ܕܚܰܕ̈ܘܳܬܳܐ ܢܺܐܡܰܪ ܒܪܝ̣ܟ ܗ̱ܘ̣ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܡܰܠܟܶܗ ܕܐܝ̣ܣܪܳܐܝܶܠ: ܕܰܠܥܰܡܶܗ ܢ̣ܟܰܢܶܫ ܠܐܘ̣ܪܫܠܶܡ ܫܡܰܝܳܢܝ̣ܬܳܐ ܕܰܠܥܶܠ ܒܶܝܬ ܚܙܳܬܳܐ ܕܫܰܝܢܳܐ: ܘܡܰܥܡܪܳܐ ܕܪܰܘܪ̈ܒܶܐ ܗܳܢܽܘܢ ܕܰܡܪܰܡܪܡܝ̣ܢ ܘܰܡܥܕܰܥܕܝ̣ܢ ܘܚܳܕܝܶܢ ܘܡܶܬܒܰܣܡܝ̣ܢ ܪܘ̣ܚܳܢܳܐܝ̣ܬ: ܘܒܳܗ̇ ܢ̇ܶܙܡܰܪ ܠܳܟ ܫܘ̣ܒܚܳܐ ܘܬܰܘܕܝ̣ܬܐ ܚܢܰܢ ܘܰܐܒܳܗ̈ܰܝܢ ܘܰܐܚ̈ܰܝܢ ܘܪ̈ܰܒܳܢܰܝܢ ܕܰܫܟܶܒ̣ܘ̱ ܥܰܠ ܣܰܒܪܳܟ ܘܒܗܰܝܡܳܢܘ̣ܬܳܐ ܕܰܫܪܳܪܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܳܦ ܗܳܫܳܐ ܡܳܪܝܳܐ ܡܦܝ̣ܣܝ̣ܢܰܢ ܠܳܟ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܚܘ̣ܕܳܬܳܐ ܕܐܘ̣ܫܰܥ̈ܢܶܐ ܐܘ̣ܪ̈ܫܠܶܡܳܝܶܐ: ܢ̣ܶܬܥܰܠ̈ܝܳܢ ܨܠܰܘ̈ܳܬܰܢ ܩܕܳܡܰܝܟ: ܘܢ̣ܶܬܦܬܰܚ ܬܰܪܥܳܐ ܕܪ̈ܰܚܡܰܝܟ ܠܫܶܐܠ̈ܳܬܰܢ: ܘܫܰܕܰܪ ܠܰܢ ܡ̣ܶܢ ܫܟܝ̣ܢܬܳܐ ܕܺܐܝܩܳܪܳܟ ܪ̈ܰܚܡܶܐ ܘܰܚܢܳܢܳܐ: ܘܚܘ̣ܣܳܝܳܐ ܕܚܰܘ̈ܒܶܐ ܘܳܐܣܝܘ̣ܬܳܐ ܠܟܽܠܗܽܘܢ ܟܪ̈ܝ̣ܗܶܐ ܘܰܐܠܝ̣̈ܨܶܐ ܘܫܰܝܢܳܐ ܘܰܫܠܡܳܐ ܠܟܽܠܶܗ ܥܳܠܡܳܐ: ܘܕܘ̣ܟܪܳܢܳܐ ܛܳܒܳܐ ܠܟܽܠܗܽܘܢ ܡܗܰܝ̈ܡܢܶܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀