ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܨܰܝܳܪܳܐ ܡܗܺܝ̣ܪܳܐ ܕܰܒܦܘ̣ܩܳܕܢܳܟ ܐܶܬ̣ܬܨܝ̣ܪܘ̱ ܥܘ̣̈ܠܶܐ ܒܟܰܪ̈ܣܳܬܳܐ ܘܰܒܡܶܠܬܳܟ ܐܶܬܓܠܶܦ̣ܘ̱ ܘܶܐܬ̣ܬܰܩܰܢܘ̱ ܠܶܫܳܢܰܝ̈ܗܽܘܢ ܕܰܢ̣ܩܰܠܣܽܘܢ ܩܕܳܡܰܝܟ ܒܐܘ̣ܫܰܥ̈ܢܰܝܗܽܘܢ: ܨܘ̣ܪ ܡܳܪܝ̱ ܡܶܐܬܝ̣ܬܳܟ ܩܕܳܡ ܥܰܝ̈ܢܰܝܢ ܘܰܒܓܰܘ ܬܰܪ̈ܥܝܳܬܰܢ ܩܘ̣̈ܠܳܣܰܝܟ ܘܰܓܠܘ̣ܦ ܩܝ̣̈ܢܳܬܰܢ ܠܫܘ̣ܒܚܳܟ ܘܰܠܪܘ̣ܡܪܳܡܳܐ ܕܪܰܒܘ̣ܬܳܟ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܩܰܕܝ̣ܫܳܐ ܘܡܳܪܳܐ ܕܩܰܕܝ̣̈ܫܶܐ ܕܰܣܪ̈ܳܦܶܐ ܩܰܕܝ̣̈ܫܶܐ ܒܰܫܡܰܝܳܐ ܡܩܰܕܫܝ̣ܢ ܠܶܗ: ܘܡ̣ܶܢ ܛܠܳܝ̈ܶܐ ܐܶܫ̣ܬܰܒܰܚ ܒܫܘ̣̈ܩܰܝ ܨܶܗܝܽܘܢ ܕܰܫܦ̣ܰܪ ܠܶܗ: ܠܗܰܘ̇ ܒܪܝ̣ܟܳܐ ܘܰܡܒܰܪܟܳܐ ܕܒܰܐܬܪܶܗ ܪܳܡܳܐ ܘܡܰܪܟܰܒܬܳܐ ܕܢܘ̣ܪܳܐ ܟܕܝ̣ܢܳܐ ܠܺܐܝ̣ܩܳܪܶܗ: ܘܰܟܪ̈ܘ̣ܒܶܐ ܡܝܰܒܒܝ̣ܢ ܠܶܗ ܒܘ̣ܪ̈ܟܳܬܳܐ: ܘܒܰܐܪܥܳܐ ܥܰܠ ܥܝ̣ܠܳܐ ܫܝ̣ܛܳܐ ܪܟ̣ܶܒ ܒܨܶܒܝܳܢܶܗ ܠܗܰܘ̇ ܫܒܝ̣ܚܳܐ ܘܰܡܫܰܒܚܳܐ ܕܡܰܠܰܐܟ̈ܶܐ ܩܳܥܶܝܢ ܬܶܫܒܘ̣ܚܬܶܗ: ܘܡ̣ܶܢ ܫܰܒܪ̈ܶܐ ܘܝܰܠ̈ܘ̣ܕܶܐ ܒܐܘ̣ܪܫܠܶܡ ܐܶܬ̣ܩܰܠܰܣ ܒܫܘ̣ܒܚܳܐ ܕܰܪܚܝ̣ܡ ܠܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝܠܰܢ: ܗܰܘ̇ ܡܗܰܕܪܳܐ ܘܰܡܥܰܠܰܝ ܒܬܶܫܒ̈ܚܳܬܳܐ ܬܰܩܝ̣ܦܳܐ ܒܥܘ̣ܫܢܳܐ: ܘܓܰܢ̱ܒܳܪܳܐ ܒܚܰܝܠܬܳܢܘ̣ܬܳܐ ܠܳܐ ܡܶܬܕܰܪܟܳܢܳܐ ܠܝ̣ܕܰܥܬܳܐ ܐܰ‌ܠܳܗܳܝܬܳܐ ܘܠܳܐ ܡܶܬܒܰܨܝܳܢܳܐ ܠܚܶܟܡܬܳܐ ܐ̱ܢܳܫܳܝܬܳܐ: ܐܰܢ̱ܬ ܗ̱ܘ̣ ܕܡ̣ܶܢ ܡܒܰܕ̈ܩܳܢܶܐ ܡܶܬܡܰܠܰܠ ܗ̱ܘܰܝܬ: ܡ̣ܶܢ ܪܝ̣ܫܝ̣ܬܳܐ ܘܡ̣ܶܢ ܚܰܙܳܝ̈ܶܐ ܡܰܬܒܰܕܰܩ ܗ̱ܘܰܝܬ ܒܰܓܢܝ̣̈ܙܳܬܳܐ: ܟܰܕ ܚܰܕ ܡܰܢ ܒܨܶܒܥܳܐ ܡܚܰܘܶܐ ܗ̱ܘܳܐ ܠܳܟ ܠܰܟܢܘ̣ܫܬܳܐ: ܘܰܐ̱ܚܪܺܢܳܐ ܕܗܳܐ ܡܰܠܟܶܟܝ̱ ܐܳܬܶܐ ܠܶܟܝ̱ ܩܘ̣ܡܝ̱ ܦܘ̣ܩܝ̱ ܠܐܘ̣ܪܥܶܗ ܒܚܰܕܘ̣ܬܳܐ ܪܳܡܶܙ ܗ̱ܘܳܐ: ܚܰܕ ܕܡܰܟܝ̣ܟ ܘܰܪܟܝ̣ܒ ܥܰܠ ܚܡܳܪܳܐ ܡܶܐܬܝ̣ܬܳܟ ܡܰܘܕܰܥ ܗ̱ܘܳܐ: ܘܰܐ̱ܚܪܺܢܳܐ ܕܶܐܬ̣ܬܥܝ̣ܪܝ̱ ܐܶܬ̣ܬܥܝ̣ܪܝ̱ ܐܘ̣ܪܫܠܶܡ ܡܶܬܢܰܒܶܐ ܗ̱ܘܳܐ: ܚܰܕ ܕܗܳܐ ܦܳܪܘ̣ܩܶܟܝ̱ ܙܳܚ̣ ܕܢ̣ܶܥܘ̣ܠ ܠܶܟܝ̱ ܒܬܶܫܒܘ̣ܚܬܳܐ ܐܳܡܰܪ ܗ̱ܘܳܐ: ܘܰܐ̱ܚܪܺܢܳܐ ܕܰܐܬܩܶܢ ܠܶܟܝ̱ ܩ̈ܳܠܶܐ ܕܰܡܗܰܕܪܝ̣ܢ ܒܬܶܫܒ̈ܚܳܬܳܐ ܦܳܩܶܕ ܗ̱ܘܳܐ: ܚܰܕ ܕܩܘ̣ܡܝ̱ ܐܰܢܗܰܪܝ̱ ܝܳܬܒܰܬ݀ ܒܚܶܫܘ̣ܟܳܐ ܡܝܰܒܶܒ ܗ̱ܘܳܐ: ܘܰܐ̱ܚܪܺܢܳܐ ܕܺܐܝܩܳܪܶܗ ܕܡܳܪܝܳܐ ܥܠܰܝܟܝ̱ ܢ̣ܶܕܢܰܚ ܡܣܰܒܰܪ ܗ̱ܘܳܐ: ܚܰܕ ܕܠܳܟ ܢ̣ܶܣܓܕܽܘܢ ܥܰܡ̱̈ܡܶܐ ܘܶܐܡ̈ܘܳܬܳܐ ܡܒܰܕܶܩ ܗ̱ܘܳܐ: ܘܰܐ̱ܚܪܺܢܳܐ ܕܡܰܠܟܘ̣ܬܳܟ ܡܰܠܟܘ̣ܬ ܟܽܠ ܥܳܠܡܝ̣̈ܢ ܦܰܐܝܘ̣ܬ ܕܰܘܝ̣ܕܳܐܝ̣ܬ ܡܙܰܡܰܪ ܗ̱ܘܳܐ: ܕܝ̣ܠܳܟ ܐܶܢܽܘܢ ܓܶܝܪ ܫܡܰܝ̈ܳܐ ܒܣܳܟܰܝ̈ܗܽܘܢ ܘܕܝ̣ܠܳܟ ܗ̱ܝ̣ ܐܰܪܥܳܐ ܒܰܡܠܳܐܴܗ̇: ܕܝ̣ܠܳܟ ܗ̱ܘ̣ ܥܘ̣ܫܢܳܐ ܘܓܰܐܝܘ̣ܬܳܐ ܘܕܝ̣ܠܳܟ ܗ̱ܘ̣ ܫܘ̣ܒܚܳܐ ܘܡܰܠܟܘ̣ܬܳܐ: ܕܝ̣ܠܳܟ ܗ̱ܘ̣ ܕܪܳܥܳܐ ܒܫܘ̣ܠܛܳܢܶܗ ܘܕܝ̣ܠܳܟ ܗܝ̣ ܓܰܢ̱ܒܳܪܘ̣ܬܳܐ ܒܐܘ̣ܚܕܳܢܳܗ̇: ܘܕܝ̣ܠܳܟ ܗ̱ܝ̣ ܪܰܒܘ̣ܬܳܐ ܒܰܫܪܳܪܳܐ ܕܝ̣ܠܳܟ ܗ̱ܝ̣ ܦܰܐܝܘ̣ܬܳܐ ܘܺܐܝܩܳܪܳܐ: ܕܝ̣ܠܳܟ ܗ̱ܝ̣ ܛܰܝܒܘ̣ܬܳܐ ܕܠܳܐ ܣܳܟܳܐ ܘܕܝ̣ܠܳܟ ܗ̱ܝ̣ ܡܪܰܚܡܳܢܘ̣ܬܳܐ ܕܠܳܐ ܟܰܝܠܳܐ: ܠܳܟ ܡܪܰܡܪܡܝ̣ܢ ܥܶܠ̈ܳܝܶܐ ܒܕܰܪ̈ܓܰܝܗܽܘܢ ܘܠܳܟ ܡܩܰܠܣܝ̣ܢ ܬܰܚ̈ܬܳܝܶܐ ܒܛܶܟ̈ܣܰܝܗܽܘܢ: ܠܳܟ ܡܫܰܒܚܝ̣ܢ ܫܡܰܝ̈ ܫܡܰܝ̈ܳܐ ܒܪܘ̣ܡܪ̈ܳܡܰܝܗܽܘܢ: ܘܠܳܟ ܣܳܓ̈ܕܳܢ ܫܶܬܶܐܣ̈ܰܝ ܬܺܐܒܶܝܠ ܒܥܘ̣ܡ̈ܩܰܝܗܽܘܢ: ܠܳܟ ܡܰܟܪܶܙ ܪܩܝ̣ܥܳܐ ܒܬܰܨܒܝ̣ܬܶܗ: ܘܠܳܟ ܡܚܰܘܶܐ ܢܘܽܗܪܳܐ ܒܦܰܐܝܘ̣ܬܶܗ: ܠܳܟ ܡܫܰܒܰܚ ܫܶܡܫܳܐ ܒܙܰܠܝ̣̈ܩܰܘܗ̱ܝ: ܠܳܟ ܡܗܰܕܰܪ ܣܰܗܪܳܐ ܒܫܘ̣ܚ̈ܠܳܦܰܘܗ̱ܝ: ܠܳܟ ܡܩܰܠܣܝ̣ܢ ܟܰܘ̈ܟܒܶܐ ܒܣܶܕܪ̈ܰܝܗܽܘܢ: ܘܠܳܟ ܡܝܰܩܪܝ̣ܢ ܢܰܗܝ̣ܪ̈ܶܐ ܒܨܶܡ̈ܚܰܝܗܽܘܢ: ܠܳܟ ܣܳܓܕܝ̣ܢ ܡܰܠ̈ܟܶܐ ܒܬܳܓܰܝ̈ܗܽܘܢ: ܘܠܳܟ ܡܶܬܪܰܟܢܝ̣ܢ ܕܰܝܳܢ̈ܶܐ ܒܐܘ̣ܚܕܳܢܰܝ̈ܗܽܘܢ: ܠܳܟ ܡܩܰܪܒܝ̣ܢ ܟܳܗ̈ܢܶܐ ܒܕܶܒܚܰܝ̈ܗܽܘܢ: ܘܠܳܟ ܡܰܘܕܶܝܢ ܡܫܰܡ̈ܫܳܢܶܐ ܒܦܝ̣ܪ̈ܡܰܝܗܽܘܢ: ܘܠܳܟ ܡܰܟܪܶܙ ܝܰܡܳܐ ܪܰܒܳܐ ܒܪܳܡܘ̣ܬܶܗ: ܘܠܳܟ ܡܗܰܕܰܪ ܝܰܒܫܳܐ ܒܦܰܐܝܘ̣ܬܶܗ: ܘܠܳܟ ܡܝܰܒܶܒ ܪܰܘܡܳܐ ܒܰܡܥܰܠܝܘ̣ܬܶܗ: ܘܠܳܟ ܡܰܘܪܒܳܐ ܐܰܪܥܳܐ ܒܦܰܐܝܘ̣ܬܳܗ̇: ܘܠܳܟ ܣܳܓܕܝ̣ܢ ܐܝ̣ܠ̈ܳܢܶܐ ܒܦܺܐܪ̈ܰܝܗܽܘܢ: ܘܠܳܟ ܡܗܰܕܪܝ̣ܢ ܐܰܪ̈ܙܶܐ ܒܪ̈ܰܘܡܰܝܗܽܘܢ: ܘܠܳܟ ܡܝܰܩܪܝ̣ܢ ܘܰܪ̈ܕܶܐ ܘܗܰܒܳܒ̈ܶܐ ܒܪ̈ܝ̣ܚܳܢܰܝܗܽܘܢ: ܘܠܳܟ ܡܫܰܒܚܝ̣ܢ ܦܰܩ̈ܚܶܐ ܒܓܰܘ̈ܢܰܝܗܽܘܢ: ܘܠܳܟ ܐܰܟ̣ܪܶܙܘ̱ ܢܒܺܝ̈ܶܐ ܒܐ̱ܪ̈ܳܙܰܝܗܽܘܢ: ܘܠܳܟ ܒܰܕܶܩ̣ܘ̱ ܚܰܙܳܝ̈ܶܐ ܒܨܘ̣ܪ̈ܳܬܗܽܘܢ: ܘܠܳܟ ܐܰܪܶܙܘ̱ ܙܰܕܝ̣̈ܩܶܐ ܒܫܰܪ̈ܒܰܝܗܽܘܢ: ܘܠܳܟ ܫܰܘܕܰܥ̣ܘ̱ ܟܺܐܢ̈ܶܐ ܘܰܐܒܳܗ̈ܳܬܳܐ ܒܦ̈ܶܠܳܐܬܗܽܘܢ: ܘܠܳܟ ܫ̣ܰܕܰܪܘ̱ ܙܰܝ̈ܬܶܐ ܣܰܘ̈ܟܰܝܗܽܘܢ: ܘܠܳܟ ܩܰܪܶܒ̣ܘ̱ ܕܶܩ̈ܠܶܐ ܛܰܪ̈ܦܰܝܗܽܘܢ: ܘܠܳܟ ܫܰܒܰܚ̣ܘ̱ ܛܠܳܝ̈ܶܐ ܒܩܳܠܰܝ̈ܗܽܘܢ: ܘܠܳܟ ܩܰܠ̣ܶܣܘ̱ ܥܠܰܝ̈ܡܶܐ ܒܐܘ̣ܫܰܥ̈ܢܰܝܗܽܘܢ: ܘܠܳܟ ܐܰܓܥ̣ܶܠܘ̱ ܬܰܠܡܝ̣̈ܕܶܐ ܢܰܦ̈ܫܳܬܗܽܘܢ: ܘܠܳܟ ܫܰܘܺܝ̣ܘ ܩܕܳܡ ܥܝ̣ܠܳܐ ܡܳܐܢܰܝ̈ܗܽܘܢ: ܐܰܢ̱ܬ ܐܰܥܕܝ̣ܬ ܡ̣ܶܢ ܝܘ̣̈ܕܳܝܶܐ ܡܰܠܟܰܝ̈ܗܽܘܢ: ܘܰܡܒܰܕ̈ܩܳܢܶܐ ܡ̣ܶܢ ܒܶܝܬ ܪ̈ܶܓܠܰܝܗܽܘܢ: ܘܗܳܐ ܣܳܓ̇ܕܝ̣ܢ ܠܳܟ ܥܰܡ̱̈ܡܶܐ ܒܐܘ̣ܚ̈ܕܳܢܰܝܗܽܘܢ: ܐܰܢ̱ܬ ܐܝ̣ܬܰܝܟ ܡܳܪܳܐ ܕܰܬܪ̈ܰܝܗܽܘܢ ܥܳܠ̈ܡܶܐ ܘܕܰܝܳܢܗܽܘܢ: ܐܰܢ̱ܬ ܕܝܶܢ ܐܳܘ ܚܰܢܳܢܳܐ ܘܛܳܒܳܐ ܠܳܐ ܬ̣ܶܟܠܶܐ ܪ̈ܰܚܡܰܝܟ ܡܶܢܰܢ ܐܶܠܳܐ ܒܝܰܕ ܫܽܘ̣ܘ̈ܟܳܢܶܐ ܕܡܰܘܗ̈ܒܳܬܳܟ ܘܰܕܥܘ̣ܕܪ̈ܳܢܰܝܟ ܐܰܦܨܰܚ ܠܰܢ ܘܡ̣ܶܢ ܟܽܠ ܣܘ̣ܓ̈ܦܳܢܝ̣ܢ ܕܢܰܦܫܳܐ ܘܰܕܦܰܓܪܳܐ ܫܰܘܙܶܒ ܠܰܢ: ܘܰܕܢ̇ܶܩܪܶܐ ܠܳܟ ܥܰܡ ܛܥܝ̣ܢܘ̣ܬ ܣܰܘ̈ܟܶܐ: ܫܘ̣ܒܚ̈ܶܐ ܘܪܘ̣ܡܪ̈ܳܡܶܐ ܚܠܰܝ̈ܳܐ ܕܰܕܟܶܝܢ ܡ̣ܶܢ ܟܽܠ ܛܘ̣ܠ̈ܫܶܐ ܐܰܫܘܳܐ ܠܰܢ: ܘܰܒܟܽܠܳܗ̇ ܡܰܥܒܕܳܢܘ̣ܬܳܐ ܕܛܰܝܒܘ̣ܬܳܟ ܗܰܕܰܪ ܠܰܢ: ܘܰܒܢܰܝ̈ܳܐ ܕܰܫܠܳܡܳܐ ܘܰܕܓܳܡܪܝ̣ܢ ܨܶܒܝܳܢܳܟ ܚܰܘܳܐ ܠܰܢ: ܘܰܒܫܘ̣ܡ̈ܠܳܝܶܐ ܕܫܘ̣̈ܘܟܳܢܰܝܟ ܠܳܐ ܡܶܫ̈ܬܰܬܩܳܢܶܐ ܓܡܘ̣ܪ ܠܰܢ: ܒܬܶܐܘܳܪ̈ܺܝܰܐܣ ܢܰܨܝ̣ܚ̈ܳܬܳܐ ܘܪ̈ܳܡܳܬ݀ ܡ̣ܶܢ ܥܳܠܡܳܐ ܐܰܥܬܰܪ ܠܰܢ: ܘܰܒܓ̈ܘ̣ܕܶܐ ܕܰܡܫܰܒ̈ܚܳܢܰܝܟ ܫ̈ܡܰܝܳܢܶܐ ܚܰܠܶܛ ܠܰܢ: ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܒܰܐܘ̈ܘܳܢܶܐ ܛܘ̣ܒ̈ܬܳܢܶܐ ܐܰܫܪܳܐ ܐܶܢܽܘܢ: ܘܰܒܡܰܫ̈ܟܢܶܐ ܕܚܰܕ̈ܘܳܬܳܐ ܒܰܣܶܡ ܐܶܢܽܘܢ: ܘܕܰܢ̣ܩܘ̣ܡܽܘܢ ܡ̣ܶܢ ܝܰܡܝ̣ܢܳܟ ܒܐܘ̣ܫܰܥ̈ܢܶܐ ܒܡܶܐܬܝ̣ܬܳܟ ܕܬܰܪܬܶܝܢ ܛܰܝܶܒ ܐܶܢܽܘܢ: ܘܰܚܢܰܢ ܘܗ̣ܶܢܽܘܢ ܢ̇ܩܘ̣ܡ ܡ̣ܶܢ ܝܰܡܝ̣ܢܳܟ ܘܢܶܚ̇ܙܶܐ ܚܢܳܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝܺܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܠܳܟ ܡܳܪܝ̱ ܡܫܰܒܚܺܝ̣ܢ ܥܝ̣ܪ̈ܶܐ ܒܪܰܘܡܳܐ ܒܩܳܠ̈ܰܝܗܽܘܢ: ܫܰܒ̣ܰܚܘ̱ ܝܰܠ̈ܘ̣ܕܶܐ ܒܥܘ̣ܡܩܳܐ ܒܠܶܥ̈ܙܰܝܗܽܘܢ: ܘܠܳܟ ܩܰܪܶܒ̣ܘ̱ ܐܝ̣ܠ̈ܳܢܶܐ ܕܳܫܢ̈ܶܐ ܣܰܘ̈ܟܰܝܗܽܘܢ: ܘܬܰܠܡܝ̣̈ܕܶܐ ܫܰܘܺܝ̣ܘ ܡܳܐܢܰܝ̈ܗܽܘܢ: ܘܠܳܟ ܡܩܰܪܒܝ̣ܢ ܝܰܘܡܳܢܳܐ ܟܳܗ̈ܢܶܐ ܦܝ̣ܪ̈ܡܰܝܗܽܘܢ: ܩܰܒܶܠ ܨܠܰܘ̈ܳܬܗܽܘܢ ܘܣܰܘ̈ܟܰܝܗܽܘܢ: ܘܐܘ̣ܫܰܥ̈ܢܰܝܗܽܘܢ ܘܶܐܬ̣ܬܢܝ̣ܚ ܒܬܶܫܡ̈ܫܳܬܗܽܘܢ ܘܰܒܬܶܫܒ̈ܚܳܬܗܽܘܢ ܘܰܒܗܘ̣ܠܳܠܰܝ̈ܗܽܘܢ: ܘܰܚܠܳܦ ܡܳܐܢܰܝ̈ܗܽܘܢ ܠܶܒܰܘ̈ܳܬܗܽܘܢ ܦܳܪܣܝ̣ܢ ܩܕܳܡܰܝܟ ܘܫܳܐܠܝ̣ܢ ܡܶܢܳܟ ܫܘ̣ܒܩܳܢܳܐ ܕܚܰܘ̈ܒܰܝܗܽܘܢ: ܐܰܫܘ̣ܕ ܥܠܰܝܗܽܘܢ ܪ̈ܰܚܡܰܝܟ: ܐܰܡܛܰܪ ܒܘ̣ܪ̈ܟܳܬܳܟ: ܐܰܓܶܢ ܥܠܰܝܗܽܘܢ ܝܰܡܝ̣ܢܳܟ: ܢܰܛܰܪ ܠܫܰܒܪ̈ܶܐ ܕܚܳܕܶܝܢ ܒܥܰܕܥܺܐܕܳܟ ܚܰܕܳܐ ܠܰܛܠܳܝ̈ܶܐ ܕܰܒܣܰܘ̈ܟܶܐ ܢܦ̣ܰܩܘ̱ ܠܐܘ̣ܪܥܳܟ: ܩܰܕܶܫ ܠܟܳܗ̈ܢܶܐ ܘܳܐܦ ܠܰܡܫܰܡ̈ܫܳܢܶܐ ܕܡܰܟܪܙܝ̣ܢ ܐ̱ܪܳܙܳܐ ܬܗܝ̣ܪܳܐ ܕܐܘ̣ܫܰܥ̈ܢܰܝܟ: ܘܰܐܢܝ̣ܚ ܠܥܰܢܝ̣̈ܕܶܐ ܕܫܰܢܝ̣ܘ ܠܘܳܬܳܟ ܘܰܚܢܰܢ ܘܗܶܢܽܘܢ ܢ̇ܫܰܒܚܳܟ ܘܠܰܐܒܘ̣ܟ ܘܰܠܪܘ̣ܚܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀