ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܕܗܘ̣ ܒܰܠܚܘ̣ܕܰܘܗ̱ܝ ܐܝ̣ܬܰܘܗ̱ܝ ܚܘ̣ܒܳܐ ܫܰܪܝ̣ܪܳܐ ܘܰܡܫܰܡܠܝܳܐ: ܗܰܘ̇ ܕܡܶܛܽܠ ܪܶܚ̣ܡܰܬ݀ ܐ̱ܢܳܫܘ̣ܬܶܗ ܡ̣ܶܢ ܫܡܰܝܳܐ ܢܚ̣ܶܬ: ܘܐܶܬ̣ܗܰܦܰܟ ܡܕܰܒܪܳܢܳܐܝ̣ܬ ܥܰܠ ܐܰܪܥܳܐ: ܘܗܘ̣ ܒܰܩܢܘ̣ܡܶܗ ܚܰܘܝ̣ ܡܰܟܝ̣ܟܘ̣ܬܳܐ: ܘܐܘ̣ܪܚܳܐ ܛܰܪܩܬܳܐ ܕܰܓܡܝ̣ܪܘ̣ܬܳܐ: ܟܰܕ ܩ̣ܳܡ ܡܚ̣ܳܐ ܣܶܕܘ̣ܢܳܐ ܒܚܰܨܰܘ̈ܗ̱ܝ ܘܐܰܫܝ̣ܓ ܪ̈ܶܓܠܶܐ ܕܬܰܠܡܝ̣̈ܕܰܘܗ̱ܝ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܣܘ̣ܬܳܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܰܠܠܳܐ ܡܶܬܚܰܙܝܳܢܝ̈ܳܬܳܐ ܟܝ̣ܬ ܘܡܶܬܚܰܙܝܳܢܝ̈ܳܬܳܐ ܒܡܶܠܬܳܐ ܕܝ̣ܠܳܟ ܐܰܩܝ̣ܡܬ: ܗܰܘ̇ ܕܟܽܠ ܡܶܕܶܡ ܡܰܝ̇ܬܶܐ ܐܰܢ̱ܬ ܠܰܗܘܳܝܳܐ ܒܚܰܝܠܳܐ ܕܝ̣ܠܳܟ ܡܬܘ̣ܡܳܝܳܐ: ܐܰܢ̱ܬ ܓܶܝܪ ܐܝ̣ܬܰܝܟ ܡܥܝ̣ܢܳܐ ܕܩܰܕܝ̣ܫܘ̣ܬܳܐ: ܘܢܘ̣ܗܪܳܐ ܕܚܰܝ̈ܶܐ ܘܚܰܝܠܳܐ ܕܙܰܕܝ̣ܩܘ̣ܬܳܐ ܘܕܰܟܝܘ̣ܬܳܐ: ܘܐܶܬܒܰܣ̣ܰܪܬ ܠܳܐ ܡܶܫܬܰܚܠܦܳܢܳܐܝ̣ܬ ܡܶܛܽܠܳܬܰܢ ܘܣܰܝܒ̣ܰܪܬ ܚܠܳܦܰܝܢ ܨܰܥܪ̈ܶܐ ܘܒܶܙܚ̈ܶܐ ܘܡܘ̣̈ܝܳܩܶܐ: ܘܟܰܕ ܡ̣ܶܢ ܚܰܝ̈ܠܰܘܳܬܳܐ ܫܡܰܝ̈ܳܢܶܐ ܡܶܫܬܰܡܰܫ ܐܰܢ̱ܬ: ܡܶܛܽܠ ܦܘ̣ܪܩܳܢܳܐ ܕܰܒܢܰܝ̈ܢܳܫܳܐ ܡܫܰܡܫܳܢܳܐܝ̣ܬ ܐܶܬܚ̣ܙܰܝܬ: ܘܗܳܕܶܐ ܒܪܶܚ̣ܡܰܬ݀ ܐ̱ܢܳܫܳܐܝ̣ܬ ܫܰܡܠܝ̣ܬ: ܕܟܰܕ ܬܰܠܡܝ̣̈ܕܶܐ ܓܒ̣ܰܝܬ ܘܠܳܐ ܣܦܝ̣ܪ̈ܶܐ ܘܰܕܗܶܕܝܘ̣ܛܝ̣ܢ ܡ̣ܶܢ ܣܰܓܺܝ̈ܶܐܐ: ܝܘ̣ܠܦܳܢܳܐ ܕܰܡܝܰܬܪܘ̣ܬܳܐ ܐܰܫܠܶܡ̣ܬ ܠܗܽܘܢ: ܘܟܰܕ ܒܳܟ ܚܰܘܝ̣ܬ ܠܗܽܘܢ ܩܰܕܡܳܐܝ̣ܬ ܕܡܘ̣ܬܳܐ ܕܡܘ̣ܟܳܟܳܐ: ܟܰܕ ܥܰܡܗܽܘܢ ܒܥܶܠܝ̣ܬܳܐ ܗܳܝ̇ ܐ̱ܪܳܙܳܢܳܝ̇ܬܳܐ ܐܶܣ̣ܬܡܶܟܬ ܘܦܶܨܚܳܐ ܩܰܕܝ̣ܫܳܐ ܐܶܟܰܠ̣ܬ: ܘܐ̱ܪ̈ܳܙܶܐ ܟܣܰܝ̈ܳܐ ܓܠ̣ܰܝܬ ܘܚܰܘܝ̣ܬ: ܘܒܳܬܰܪ ܗܳܠܶܝܢ ܛܘ̣ܦܣܳܐ ܫܰܦܝ̣ܪܳܐ ܐܫܠܶܡ̣ܬ ܠܗܽܘܢ: ܟܰܕ ܐܰܝܟ ܡܫܰܡܫܳܢܳܐ ܩܳܡ̣ܬ ܡ̣ܶܢ ܚܫܳܡܝ̣ܬܳܐ ܘܐܶܣ̣ܰܪܬ ܣܶܕܘ̣ܢܳܐ ܒܚܰܨܰܝ̈ܟ: ܘܡܶܚܕܳܐ ܒܰܡܫܳܓܬܳܐ ܠܪ̈ܶܓܠܶܐ ܕܝ̣ܠܗܽܘܢ ܡܫܝ̣ܓ ܗ̱ܘܰܝܬ: ܟܰܕ ܕܶܝܢ ܡ̣ܶܢ ܙܥܘ̣ܪܳܐ ܫܰܪܝ̣ܬ ܘܰܠܘܳܬ ܦܶܛܪܘ̣ܣ ܐܶܬ̣ܰܝܬ: ܠܚܰܪܬܳܐ ܛܘ̣ܦܣܳܐ ܕܡܰܟܝ̣ܟܘ̣ܬܳܐ ܠܰܢ ܚܰܘܝ̣ܬ ܘܐܰܠܶܦ̣ܬ: ܘܰܕܗܳܟܰܢܳܐ ܚܰܝܳܒܝ̣ܢܰܢ ܠܰܚ̈ܕܳܕܶܐ ܦܰܩ̣ܶܕܬ: ܟܰܕ ܚܕܳܝܘ̣ܬܳܐ ܕܚܘ̣ܒܳܐ ܘܫܰܘܬܳܦܘ̣ܬܳܐ ܗܳܝ̇ ܕܰܡܣܰܝܒܪܳܢܘ̣ܬܳܐ ܕܥܰܡ ܚܕ̈ܳܕܶܐ ܒܝܰܕ ܗܳܠܶܝܢ ܙܪܰܥ̣ܬ: ܗܳܢܽܘܢ ܕܟܰܕ ܗܳܕܶܐ ܩܰܒܶܠ̣ܘ̱ ܐܳܦ ܠܰܢ ܕܠܳܐ ܚܣܳܡ ܐܰܫܠܶܡ̣ܘ̱: ܚܢܰܢ ܕܶܝܢ ܒܛܘ̣ܦܣܳܐ ܕܗܳܠܶܝܢ ܩܳܝ̇ܡܝ̣ܢܰܢ ܡܦܝ̣ܣܝ̣ܢܰܢ ܠܛܳܒܘ̣ܬܳܐ ܕܝ̣ܠܳܟ: ܕܠܳܐ ܠܥ̱ܘ̣ܗܕܳܢܳܐ ܬ̣ܰܝܬܶܐ ܠܫܘ̣ܪ̈ܥܳܬܳܐ ܕܡܶܢܰܢ ܐܶܣ̣ܬܥܰܪ̈ܝ̱: ܐܶܠܳܐ ܚܘ̣ܣܳܝܳܐ ܕܟܽܠܗܶܝܢ ܫܰܟܶܢ ܠܰܢ ܐܰܝܟ ܕܠܰܙܚܘ̣ܪܝ̣ܬܳܐ: ܘܒܰܓ̈ܒܰܝܳܐ ܕܝ̣ܠܳܟ ܛܰܟܶܣ ܠܰܢ: ܘܗܰܒ ܕܬܶܗ̣ܘܶܐ ܠܰܢ ܫܝܳܓܬܳܐ ܗܳܕܶܐ ܕܰܒܝܰܘܡܳܐ ܗܳܢܳܐ ܕܘ̣ܟܳܝܳܐ ܕܡ̣ܶܢ ܟܽܠܳܗ̇ ܨܳܐܝܘ̣ܬܳܐ ܕܢܰܦܫܳܐ ܘܰܕܦܰܓܪܳܐ: ܟܽܠܳܗ̇ ܕܶܝܢ ܡܰܪܝ̣ܪܘ̣ܬܳܐ ܘܪܘ̣ܓܙܳܐ ܘܓܘ̣ܕܳܦܳܐ ܘܡܶܐܟܰܠܩܰܪܨܳܐ ܘܪܶܛܢܳܐ ܘܰܚܣܳܡܳܐ ܘܦܳܠܰܓ̈ܘܳܬܳܐ: ܘܡܰܥܒ̈ܕܳܢܘܳܬܳܐ ܒܝ̣̈ܫܳܬܳܐ ܐܰܪܚܶܩ ܡܶܢܰܢ: ܘܒܰܪܢܳܫܰܢ ܓܰܘܳܝܳܐ ܚܰܕܶܬ ܘܰܒܪܘ̣ܚܳܟ ܚܰܝܳܐ ܩܰܕܶܫ: ܘܗܰܒ ܠܰܢ ܠܥܰܒ̈ܕܶܐ ܕܝ̣ܠܳܟ ܠܪ̈ܝ̣ܫܳܢܶܐ ܘܠܰܐܝܠܶܝܢ ܕܰܬܚܶܝܬ ܪܝ̣ܫܳܐ ܠܪܘܪ̈ܒܶܐ ܟܝ̣ܬ ܘܠܰܙܥܘ̣ܪ̈ܶܐ: ܕܪܘ̣ܚܳܢܳܐܝ̣ܬ ܘܚܘ̣ܒܳܢܳܐܝ̣ܬ ܥܰܡ ܚ̈ܕܳܕܶܐ: ܘܐܰܝܟ ܗܰܕ̈ܳܡܶܐ ܕܝ̣ܠܰܢ ܠܰܚ̈ܕܳܕܶܐ ܢ̇ܥܰܦܶܩ: ܟܰܕ ܥܰܡ ܚ̈ܕܳܕܶܐ ܚܳܐܫܝ̣ܢܰܢ ܘܥܰܡ ܚ̈ܕܳܕܶܐ ܡܶܫܬܰܒܚܝ̣ܢܰܢ: ܘܥܰܡ̈ܠܶܐ ܡܫܰܚ̈ܠܦܶܐ ܕܬܶܫܡ̈ܫܳܬܳܐ ܥܰܡ ܚ̈ܕܳܕܶܐ ܡܦܰܠܓܝ̣ܢܰܢ: ܘܟܽܠܰܢ ܐܰܟܚܕܳܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀